Roservi Jehovápe haʼe oremondohápe

UPÉVA oiko vaʼekue 1949-pe, ojapóma 60 áño rasa. Péro tamombeʼumína peẽme che istória. Che túva héra Hendrik, ha haʼe ningo sapatéro vaʼekue ha avei hardinéro táva Dónderenpe, opytáva nórte gotyo Drénthepe (Países Bajos). Upépe anase áño 1927-pe; roĩ 7 ermáno ha che hína pe cuatroha. Roiko vaʼekue kampáñape ha ore róga oĩ tape kóstare, peteĩ kálle yvy reihápe. Opavave lénto ore vesinokuéra oreko gránha ha ojededika upévape, ha chéve chegustaiterei vaʼekue avei peichagua traváho. Áño 1947-pe arekórõ guare 19 áño, ahendu ypy vaʼekue pe añetegua. Peteĩ che vesíno hérava Theunis Been, opredika chéve. Chemanduʼa ymave ndachaʼeguasúi hague Theunis rehe, péro pe segunda gérra mundiál riremi oiko chugui testígo de Jehová ha upe guive horyve. Haʼe ningo tuicha okambia, upévare ahendu porã chupe omombeʼúrõ guare chéve Ñandejára oprometeha ko Yvýgui ojapotaha peteĩ hardín neporãmba jepéva. Pyaʼe aguerovia umi mbaʼe la Biblia omboʼéva ha ropyta oñoamigoite.a

Añepyrũ vaʼekue apredika mayo 1948-pe ha ajevautisa un mes haguépe, el 20 de junio peteĩ aty guasúpe ojejapo vaʼekue Utréchtpe. Ha 1 de enero de 1949 guive ajapo che prekursorádo. Chemondo hikuái táva Bórculope, opytáva kuarahyresẽ gotyo, oĩháme peteĩ kongregasión michĩva. Péro ag̃uahẽ hag̃ua upépe aviaha vaʼerã 130 kilómetro, upémarõ adesidi aha visiklétape. Aimoʼã ag̃uahẽtaha seis órape, péro oky ha yvytu hatã, upéicha rupi ag̃uahẽ doce órape, hiʼarive 90 kilómetro aha trénpe. Pyharepytéma ag̃uahẽ peteĩ ermáno rógape ha apyta aiko pe famíliandi ajapo aja che prekursorádo upe lugárpe.

Gérra rire umi hénte opyta imboriahu ha naikomodidahetái. Che katu areko peteĩ tráhente tuichaitereíva cherehe ha peteĩ pantalón mbykyetereíva. Haʼéma haguéicha, pe primer mes ahasa vaʼekue Bórculope ijetuʼu chéve, péro Jehová chevendesi ha upéicha rupi areko heta estúdio vívliko. Nueve mése haguépe cheguerova hikuái Ámsterdampe.

Akakuaa vaʼekue kampáñape, péro upe rire aikóma Ámsterdampe, pe siuda tuichavéva oĩva Países Bájospe. Umi hénte upepegua ohendu porã pe predikasión. Un méspe akoloka hetaiteve puvlikasión umi nueve mése aime vaʼekuégui Bórculope. Sapyʼaitépe arekóma ocho estúdio vívliko. Añenombrárõ guare siérvo de kongregasión (koʼág̃a oñehenóiva koordinadór del kuérpo de ansiáno), oñemeʼẽ chéve primera ves ajapo hag̃ua diskúrso púvliko. Apensa haguénte chepyʼapererepáma voi. Upévare tuicha chepiroʼy cheguerovárõ guare hikuái ótra kongregasiónpe ameʼẽ potaitépe che diskúrso. Ndaikuaaiete kuri ajapotaha 5.000 diskúrso rasa ohasávo pe tiémpo.

Mayo de 1950-pe añeasigna Háarlempe. Tiémpo riremi, añeinvita aservi hag̃ua superintendénte de sirkuítoramo. Upéva chepyʼapyeterei ha tres nócherupi ndakeiete. Añemboja Robert Winkler rendápe, peteĩ ermáno ombaʼapóva sukursálpe ha haʼe chupe ndachekatupyryiha ajapo hag̃ua ko tembiapo. Haʼe katu heʼi chéve: “Ág̃ante reaprendéta, emyenyhẽ katu pe solisitu”. Upe riremi chembokatupyry hikuái un mes aja ha añepyrũma aservi de siérvo (superintendénte) de sirkuíto. Avisita aja peteĩ kongregasión, aikuaa Janny Táatgenpe, peteĩ prekursóra imitãva ohayhúva Jehovápe ha oñemeʼẽmbaitéva iservísiope, ha romenda 1955-pe. Péro asegi mboyve ore istória, Janny omombeʼúta mbaʼéichapa oiko chugui prekursóra.

Janny: Che sy ojevautisa 1945-pe arekórõ guare 11 áño. Oikuaa ypy guive Jehovápe ohechakuaa iñimportanteha oremboʼe la Biblia heʼíva. Che túvape katu ndogustaiete pe añetegua, upévare mama orembostudia chéve, che ermána ha che ermánope papa ndaipóri jave.

Áño 1950-pe aha kuri peteĩ asambléape La Háyape, upe guive añepyrũ vaʼekue añerreuni ermanokuéra ndive. Una semána haguépe aha primera ves peteĩ Salón del Rréinope táva Ássenpe (Drenthe). Che túva ipochyeterei ha chemosẽ ógagui. Mama katu heʼi chéve: “Che memby, reikuaáma moõpa ikatu reho”. Antende oñeʼẽha chéve umi ermánore, upévare ava peteĩ famíliandi oikóva ag̃uínte ógagui. Péro papa chepersegi meme, upémarõ adesidi aha peteĩ kongregasiónpe opytáva 95 kilometrohápe, táva Déventerpe (Overijssel). Upérõ ningo che menór de eda gueteri, ha papa tuicha iprovléma umi autorida oikuaárõ guare chemosẽ hague ógagui. Upéi haʼe heʼi ikatuha aha jey ógape. Haʼe ndoaseptái arakaʼeve pe añetegua, péro saʼi saʼípe ohejáma chéve aha umi rreunionhápe ha asẽ apredika.

Aju jey riremi ógape, mama ou hasyete ha umi tembiapo ogapypegua opytapaite chéve. Upéicharõ jepe, añakãrapuʼã ahávo ha ajevautisa 1951-pe arekórõ guare 17 áño. Upéi, 1952-pe, mama ojaliviárõ guare ajapo dos mésere che prekursorádo de vakasión (auxiliár) mbohapy prekursóra ndive. Roiko peteĩ varkoʼípe ha ropredika mokõi puévlo oĩvape Drénthepe. Áño 1953-pe añepyrũ ajapo che prekursorádo rregulár. Un áño haguépe, peteĩ superintendénte de sirkuíto imitãva, hérava Markus, ovisita ore kongregasión. Mayo de 1955-pe romenda ropenságui roservi porãvetaha Jehovápe oñondive (Ecl. 4:9-12).

Markus: Romenda rire roñeasigna roservi hag̃ua de prekursór Veendámpe (Groninga). Roiko peteĩ kotyʼípe orekóva 3 métro por 2 métro, upéicharõ jepe rovyʼa Janny oarregla porã rupi ha ombojeguapa voi pe koty michĩramo jepe. Káda pyhare romboyke pe eskínape ore mesa ha mokõi sílla ikatu hag̃uáicha romoĩ upépe ore rupa.

Seis mése haguépe roñeinvita roservi hag̃ua sirkuítope Bélgicape. Upérõ oĩ 4.000 maranduhárarupinte upe tetãme. Koʼág̃a katu oĩma 24.000 ermáno rasa. Flándespe, opytáva nórte gotyo Bélgicape, oñeñeʼẽ avei pe idióma ojeporúva Países Bájospe. Upéicharõ jepe, umi vélga oñeʼẽ diferénte, upévare ijetuʼu kuri oréve rontende porã hag̃ua.

Janny: Jaservívo sirkuítope jajesakrifikaʼimímante vaʼerã. Ore roviaha visiklétape rovisita hag̃ua umi kongregasión ha ropyta umi ermáno rógape. Ha ndoroguerekóimarõ moõpa ropytáta rovisita rire peteĩ kongregasión, ropyta jepi martes pyhareve peve ha upéguintema roho ambue kongregasiónpe. Rohasáramo jepe heta mbaʼe ijetuʼúva, akóinte ropensa ore asignasión haʼeha peteĩ vendisión oúva Jehovágui.

Markus: Ñepyrũrã ndoroikuaái ni peteĩ ermánope umi kongregasiónrupi, péro opavavénte hory ha imbaʼeporã (Heb. 13:2, nóta). Heta áñore rovisita jey jey entéro kongregasión oĩva Bélgicape oñeñeʼẽhápe olandés ha rohupyty heta vendisión. Por ehémplo, roikuaa haimete enterove ermáno oĩvape distríto olandéspe ha roju rohayhueterei chupekuéra. Rohecha heta mitãrusu ha mitãkuñáme okakuaávo ohóvo, oñakãrapuʼã, ojevautisa ha omotenondévo Ñandejára servísio. Orembopyʼarory rohechávo heta oiporupaiteha itiémpo Jehová servísiope (3 Juan 4). Péicha ‘roñomokyreʼỹ’ joa ha upéva orepytyvõ roñemeʼẽmbaite hag̃ua ore asignasiónpe (Rom. 1:12, NM).

Markus: Romenda ypy guive, rohoseterei vaʼekue Eskuéla de Galaádpe. Upévare rostudia inglés una óra káda día, péro hasy oréve roñeʼẽkuaa hag̃ua umi lívronte rostudiárõ. Upémarõ orevakasión jave, roho jepi Inglatérrape ha ropredika meme upérupi roñensaja hag̃ua. Hasýpe ningo áño 1963-pe og̃uahẽ oréve peteĩ sóvre séde mundiálgui, oĩva Broóklynpe. Oreko pype mokõi kárta, peteĩ chembaʼerã ha pe ótro katu Jánnype g̃uarã. Che kártape heʼi añeinvitaha aha hag̃ua Eskuéla de Galaádpe peteĩ kúrso espesiálpe hiʼarétava diez mése. Upe kúrsope oñembokatupyry ermanokuérape ha oñemboʼe chupekuéra omotenondekuaa hag̃ua umi tembiapo Jehová organisasiónpe. Upéicha rupi, umi 100 oñeinvita vaʼekuégui, 82 voi kuimbaʼe.

Janny: Che kártape katu heʼi añemboʼe hag̃ua Jehovápe upe situasión rehe ha apensa porã hag̃ua adesidi mboyve ikatútapa apyta Bélgicape che ména oho aja Galaádpe. Ñepyrũrã añeñandu vai ha apensa Jehová nachevendesiriha añehaʼãramo jepe ambaʼapove iservísiope. Péro upéi chemanduʼa pe Eskuéla de Galaad ombokatupyryha umi ermánope okumpli porã hag̃ua hembiapo opredikávo ko yvy tuichakuére pe marandu porã. Upévare adesidi apyta ha añeasigna Gántepe aservi hag̃ua de prekursóra espesiál Anna ha Maria Colpaert ndive, oservímava prekursóra espesiálramo heta tiémpore.

Markus: Upérõ ningo che nañeʼẽporãi gueteri ingléspe, upévare cheinvita hikuái aha hag̃ua Broóklynpe cinco mése oñepyrũ mboyve pe kúrso. Ambaʼapo Departaménto de Envío ha de Servísiope. Aime aja pe séde mundiálpe aprepara umi puvlikasión oñemondótava Asia, Europa ha Sudaméricape, ha upéva chepytyvõ amombaʼeve hag̃ua umi tembiapo ermanokuéra ojapóva ko yvy tuichakuére. Chemanduʼa avei ermáno Alexander H. Macmillan rehe, haʼe vaʼekue peregríno térã superintendénte viahánte ermáno Russell tiémpope. Haʼe ijedáma ha nohenduporãveiete vaʼekue, upéicharõ jepe ndofaltái rreunionhápe. Upéva opokoiterei cherehe ha chemboʼe iñimportanteha akóinte ajeheʼa ermanokuérare (Heb. 10:24, 25).

Janny: Markus ha che romondo ojupe heta kárta káda semána. ¡Rojuechagaʼueterei ningo! Péro upéicha avei Markus ovyʼa umi mbaʼe oaprendévare ohóvo, ha che katu torýpe asẽ meme apredika. Che ména oúrõ guare Estados Unídosgui che areko 17 estúdio vívliko. Ijetuʼueterei oréve roiko ojueheʼỹ 15 mésere, péro ahecha Jehová tuicha orevendesiha rojesakrifika haguére. Pe avión Markus ou haguépe ojatrasa heta óra. Hasýpe ningo og̃uahẽ ha rojotopávo roñoañuã ha orerasẽ. Upe guive ndorohovéi mamove ojueheʼỹ.

Markus: Aju rire Galaádgui, diciembre de 1964-pe, roñeinvita roservi hag̃ua Betélpe. Upérõ ndoroikuaái, péro noroimemoʼãi raʼe upépe heta tiémpo. Tres mése haguépe añeasigna aservi hag̃ua superintendénte de distrítoramo Flándespe. Upe rire oñemondo Aalzen ha Els Wiégersmape oservi hag̃ua misionéroramo Bélgicape ha pe ermáno oñenombra superintendénte de distríto. Upévare ore roho jey Betélpe ha che ambaʼapo Departaménto de Servísiope. Áño 1968 guive 1980 peve roservi Betélpe ha rombaʼapo jepi avei sirkuítope. Upéi 1980 guive 2005 peve aservi jey superintendénte de distrítoramo.

Heta vése oñekambia ore asignasión, péro akóinte oremanduʼa roñemeʼẽ hague Jehovápe roservi hag̃ua chupe ore pyʼaite guive. Tahaʼe haʼéva ore rembiapo, rojapo vyʼápe roikuaágui péicha roipytyvõha oñemotenonde hag̃ua Ñandejára Rréino.

Janny: Chemanduʼa heta avyʼa hague ahárõ guare Markus ndive Broóklynpe áño 1977-pe, ha Páttersonpe 1997-pe, haʼe ohórõ guare pe Eskuéla umi oĩvape g̃uarã Komite de Sukursálpe.

Markus: Áño 1982-pe Janny ojopera kuri, péro upéi ojalivia porã. Tres áño haguépe, pe kongregasión oĩva Lováinape omeʼẽ oréve peteĩ departaménto opytáva pe Salón del Rréino ári. Primera ves 30 áño haguépe roguereko sapyʼa peteĩ lugár ikatuhápe ropyta roiko. Péro rovisitáta jave peteĩ kongregasión, ajupi ha aguejy vaʼerã pe eskaléra orekóva 54 eskalón amboguejy hag̃ua ore kosakuéra. Roagradeseterei ningo áño 2002-pe umi ermáno okonsegírõ guare oréve peteĩ departaménto natekotevẽihápe rojupi ha roguejy eskalérape. Arekórõ guare 78 áño roñemondo táva Lokérenpe roservi hag̃ua prekursór espesiálramo. Rovyʼaiterei roservi haguére péicha Jehovápe ha ikatu haguére rosẽ gueteri ropredika káda día.

Janny: Oñondive roguerekóma 120 áño rasa roservi hague de tiémpo kompléto. Rohecha Jehová okumpliha ipromésa oñangarekóvo orerehe ha omeʼẽvo oréve ‘opa mbaʼe roikotevẽva’, ha roikuaa haʼe ‘arakaʼeve ndaorerejamoʼãiha’ oreñeʼẽrendúramo chupe (Heb. 13:5, NM; Deut. 2:7).

Markus: Ore ningo roñemeʼẽ vaʼekue Jehovápe orepyahúpe ha arakaʼeve noroñehaʼãiva rohupyty umi mbaʼe tuicháva. Roasepta ore pyʼaite guive entéro asignasión oñemeʼẽva oréve roikuaa porãgui naiñimportanteiha moõpa jaservi ni mbaʼe puéstopa jaguereko, síno mávapepa jaservi.