Pe kreasión ohechauka Ñandejára oexistiha

 1. ¿Mbaʼéichapa ñande voi ikatu jaroviave oexistiha Ñandejára?

HETA hénte ndoroviái oexistiha umi mbaʼe ndohecháiva. ¿Mbaʼéichapa ikatu ñaipytyvõ koʼãichagua tapichápe ojerovia hag̃ua Jehováre, ko ‘ni peteĩ yvypóra arakaʼeve ndohecháiva’ chupe? (Juan 1:18, NM.) ¿Mbaʼéichapa ñande voi ikatu jaroviave oexistiha “Ñandejára jahechaʼỹva”? (Col. 1:15, NM.) Ñepyrũrã jaikuaa vaʼerã mbaʼeichagua japúpa ojeʼe Jehováre ha oñemboʼe umi héntepe. Upéi jaiporukuaa vaʼerã la Biblia jaity hag̃ua yvýre umi japu “ojokóva umi héntepe oikuaa hag̃ua Ñandejárape” (2 Cor. 10:4, 5, NM).

2, 3. ¿Mbaʼeichagua japúpa oñemboʼe la héntepe ani hag̃ua ojerovia hikuái Ñandejárare?

² Pe evolusión ningo peteĩ japu oñemboʼéva oparupiete ha upevakuére heta hénte ndaikatúi oikuaa Ñandejárape. Ko enseñánsa oñemoĩ la Bíbliare ha oheja umi héntepe esperansaʼỹre. ¿Mbaʼépa omboʼe pe evolusión? Omboʼe opa mbaʼe oikovéva oñepyrũ hague ijehegui reínte. Péro oiméramo upéicha añete, ¿maʼerãpa ñande jaikove?

³ Oĩ katu ogueroviáva pe kreasionísmo. Ko enseñánsa ndojoguaiete pe evolusiónpe, upéicharõ jepe japúnte avei. Umi odefendéva pe kreasionísmo opensa pe univérso, ñane planéta ha opa mbaʼe oikovéva oexistiha ojapo 10 mil áñorupi ramo. Heʼi avei hikuái Ñandejára ojapo hague opa mbaʼe seis día de 24 órapente, ha omboykete umi pruéva sientífika ohechauka porãva tuicha ojavyha hikuái. Koʼã kristiáno guaʼu heʼíramo jepe omombaʼeha la Biblia, umi mbaʼe ogueroviávare ohechauka ndaupeichaiha. Haʼekuéra ningo oheja vai Ñandejára Ñeʼẽ, ku noĩporãirõguáicha umi mbaʼe oĩva pype. Ñapensávo koʼãichagua héntere oime vaʼerã ñanemanduʼa umi oiko vaʼekuére síglo primérope, opensáva omombaʼeguasuha Ñandejárape ipyʼaite guive, “péro ndoikuaaporãi chupe” (Rom. 10:2, NM). ¿Mbaʼéichapa ikatu jaiporu la Biblia jahechauka hag̃ua japuha pe evolusión ha pe kreasionísmo ‘oñembohapo pypukúva’ umi hénte akãme?a Ñañehaʼãmante vaʼerã jaikuaa porã la Biblia omboʼéva.

 4. ¿Mbaʼépa jaikuaa vaʼerã ikatu hag̃uáicha jajerovia?

⁴ La Biblia ñanemokyreʼỹ jasegi hag̃ua jaikuaa heta mbaʼe (Prov. 10:14). Jehová oipota jajerovia hese ñantende ha jahechakuaágui añeteha umi mbaʼe oñemboʼéva chugui. Ndoipotái jajesegi yvypóra omboʼévare ni umi kostúmbre rrelihionkuéra osegívare (elee Hebreos 11:1). Péro ikatu hag̃uáicha jajerovia hese ñande pyʼaite guive, tekotevẽ jaikuaa porã haʼe oexistiha (elee Hebreos 11:6). Upéva ndeʼiséi jaikuaaha ojeʼégui reínte ñandéve, síno ñahesaʼỹijo porã rupi upe “jagueroviáva” ha jaiporu ñane akã ñantende hagũa entéro mbaʼe (Rom. 12:1, NM).

 5. ¿Mbaʼépa ñanepytyvõta jaguerovia hag̃ua Ñandejára oexistiha?

⁵ Apóstol Pablo heʼi vaʼekue peteĩ mbaʼe iñimportánteva ha ñanepytyvõva jaguerovia hag̃ua Jehová oexistiha ndajahecháiramo jepe chupe. Haʼe heʼi: “Añetehápe ndaikatúiramo jepe ojehecha Ñandejárape, ko múndo ojejapo ypy guive, hembiapokuére umi hénte ikatu ohecha mbaʼeichaguápa haʼe, ohecha ipodér opaʼỹva ha haʼeha Ñandejára” (Rom. 1:20, NM). ¿Mbaʼéichapa ñaipytyvõta peteĩ ndogueroviáivape Ñandejára oexistiha ohechakuaa hag̃ua añeteha Pablo heʼi vaʼekue? Jahechamína umi mbaʼe ñande Apohare ojapo vaʼekue ohechaukáva ipoderóso ha iñaranduha.

6, 7. ¿Mbaʼéichapa pe atmósfera ha pe kámpo magnétiko ohechauka Jehová ipoderosoha?

⁶ Jehová ningo ipoderosoiterei ha upéva ojekuaa ojapo rupi mokõi mbaʼe oprotehe hag̃ua ko planéta: pe atmósfera ha pe kámpo magnétiko.b Pe atmósfera rupive oĩ áire ko Yvýpe, ha avei ñandeprotehe umi meteorítogui ikatúva ojapo sarambi hoʼáramo ñane planétape. Koʼã ita oho hatãva pe espásiore ojeka ha ikuʼipa oikévo pe atmósferape, ha sapyʼánte jahecha hendyha pyharekue pe yvágare.

⁷ Pe kámpo magnétiko oprotehe avei ñane planéta. Ko Yvy mbytetépe oĩ peteĩ núkleo ha ijape ningo iérro yku oprodusíva enerhía. Upe enerhía oho heta kilómetro pe espásiore ha ojoko pe kuarahy pytu aku ani hag̃ua operhudika ñane planéta. Ndaipóririre pe kámpo magnétiko, umi enerhía imbaretetéva oúva pe kuarahýgui ñanerundipa vaʼerãmoʼã. Avei pe kámpo magnétiko rupive ojekuaa umi auróra polár ikolór porã porãva pe yvágare. Ndareíri ningo la Biblia heʼi Jehová ‘ipuʼaka mbareteha’ (elee Isaías 40:26).

8, 9. ¿Mbaʼéichapa pe naturalésa ohechauka Ñandejára iñaranduha?

⁸ Ñandejára ohechauka avei iñaranduha opreparávo ñane planéta ikatu hag̃uáicha ojeporu jey umi mbaʼe ojeporúma vaʼekue. Ñamoĩmína peteĩ ehémplo: Ñapensami oĩha peteĩ siuda oñamurallapaitéva oikohápe hetaiterei hénte ha ndaikatúi oñesẽ opégui. Opáramo pe y ndaikatúi ojegueru okágui ni oñeguenohẽ pe yty. Ajépa sapyʼaitépe pe lugár henyhẽta mbaʼe kyʼágui ha ndaikatumoʼãvéima ojeiko upépe. Ñane planéta ojogua pe siudápe: ñande ndaikatúi ñasẽ koʼágui jaru hag̃ua y ofaltáramo, ni ñamombo yty pe espásiore. Upéicharõ jepe, ymaiterei guivéma ojeikove ñane planétape ha pe y ndopái ni nahenyhẽi ytýgui. ¿Mbaʼéicha rupípa upéva? Ñande Yvy oĩ rupi preparádo orresikla hag̃ua umi mbaʼe ojeporúma vaʼekue jepe.

⁹ Ñapensamína avei mbaʼéichapa ñane planéta oprodusi oxíheno. Jaikuaaháicha, hetaiterei yvypóra ha animál oikotevẽ oxíhenore. Ha entéronte orrespirávo omoinge oxíheno ha opoi dióxido de karvóno, ikatúva hína ñambojoja pe “ytýre”. Péro pe oxíheno arakaʼeve ndopái ni pe atmósfera nahenyhẽi dióxido de karvónogui. ¿Mbaʼéicha rupípa upéva? Umi plánta hogue vérdeva oiporu dióxido de karvóno, y, lús oúva kuarahýgui ha umi nutriénte, ha ojapo chugui karvoidráto ha oxíheno. Ko proséso héra fotosíntesis. Upéi opavave jaikovéva ko yvy ape ári jarrespira upe oxíheno. Jehová oiporu umi plánta haʼe voi ojapo vaʼekue ikatu hag̃uáicha enterovéva “oikove, orrespira ha oreko opa mbaʼe” (Hech. 17:25, NM). ¡Ajépa iñaranduete!

10, 11. ¿Mbaʼéichapa pe panambi monárka ha pe ñahatĩ ohechauka Jehová iñaranduetereiha?

¹⁰ Jehová ohechauka avei iñaranduetereiha ojapo rupi opa mbaʼe oikovéva. Ojekalkula oĩha dos a cien millón espésie oikóva ko planétape (elee Salmo 104:24). Jahechamína mbohapy ehémplo ñanepytyvõtava jahechakuaa hag̃ua mbaʼeichaitépa Jehová iñarandu.

¹¹ Pe panambi monárka apytuʼũ ningo viróme púntaichante michĩ. Upéicharõ jepe oikuaa mbaʼéichapa oviaháta 3.000 kilómetrorupi Canadá guive, peteĩ kaʼaguyʼi peve opytáva Méxicope. Upearã ojegia pe kuarahýre. Jehová ojapo pe panambi apytuʼũ ikatu hag̃uáicha opilla moõgotyopa oho vaʼerã okuʼéramo jepe pe kuarahy. Ñapensamína avei pe ñahatĩre. Ko vícho ningo 30.000 rupi hesaʼỹi káda hesápe, péro iñapytuʼũ michĩeterei. Upéicharamo jepe iñapytuʼũ ombyatypaite umi mbaʼe ohecháva umi 60 mil hesaʼỹi rupive. Pe ñahatĩ ohechapaite umi movimientoʼi jepe oikóva ijerére.

12, 13. ¿Mbaʼépa jaguerohoryete Jehová ojapo lájare umi sélula?

¹² Péro oĩ peteĩ mbaʼe ohechauka porãvéva mbaʼeichaitépa Jehová iñarandu ojapóvo opa mbaʼe oikovéva. Por ehémplo pe ADN (ácido desoxirribonucleico). Ñande rete oreko amo 100 billón sélularupi ha káda únope oĩ pe ADN, orekopaitéva umi informasión oñekotevẽva oñeforma hag̃ua peteĩ kuérpo.

¹³ ¿Mboy informasiónrupipa oike pe ADN-pe? Jaikuaa hag̃ua upéva ikatu ñamoĩ peteĩ ehémplo. Peteĩ CD-pe ikatu ijapaite umi informasión oĩva peteĩ diksionáriope, hiʼarive pe dísko peteĩ plástiko pererĩmínte hína. Péro un grámo ADN-pe ikatu ijapaite umi informasión oĩva un billón CD-pe. Térã, peteĩ kucharíta ADN-pe oĩ informasión ojejapo hag̃ua haimete 2.500 billón persónape.

14. ¿Mbaʼéichapa nde reñeñandu rentendevévo Jehová rembiapokue?

¹⁴ Rréi David heʼi vaʼekue haʼeteha ku Jehová orekóva peteĩ lívrope umi informasión oñekotevẽva ojejapo hag̃ua peteĩ kuérpo umáno. Haʼe heʼi Jehováre: “Nde resakuéra ohecháma che rekove oñepyrũ porã mboyve, ha nde kuatiañeʼẽme ojehaipáma opaite che rekove” (Sal. 139:16, ÑÑB). Ndareíri ningo David omombaʼeguasuse Jehovápe opensávo mbaʼéichapa ojejapo vaʼekue hete. Koʼág̃arupi umi sientífiko ontendeve mbaʼéichapa ombaʼapo ñande rete, ha umíva ñanepytyvõ ñamombaʼeve hag̃ua Jehová ojapo vaʼekue. Pe salmísta heʼi voi: “Che romombaʼeguasu Nde cheapo porãitégui, ne rembiapokuéra [ndaijojahái] ha che ánga oikuaa porã voi koʼã mbaʼe” (Sal. 139:14, ÑÑB). Ajépa pe kreasión ohechauka porãiterei Ñandejára oexistiha. Jaikuaase voi ningo mbaʼéichapa umi hénte ndohechakuaái upéva.

15, 16. a) ¿Mbaʼéichapa ñane puvlikasionkuéra oipytyvõ heta héntepe oaprende hag̃ua Jehovágui? b) Emombeʼu mbaʼe artíkulopa reguerohoryve umi osẽ vaʼekuégui ¿Casualidad o diseño?-pe.

¹⁵ Heta tiémporema pe rrevísta ¡Despertad! oipytyvõ umi héntepe ohechakuaa hag̃ua mbaʼépa pe kreasión omboʼe Ñandejáragui. Por ehémplo, septiembre 2006-pe osẽ vaʼekue pe téma “¿Existe un Creador?” ha ojejapo ohesapeʼa hag̃ua umi ojeroviávape pe evolusión ha kreasionísmo rehe. Peteĩ ermána oskrivi peteĩ kárta sukursál de Estados Unídospe, heʼihápe: “Hetaiterei mbaʼe ningo ojehupyty oñekuaveʼẽrõ guare ko rrevísta. Peteĩ profesóra de Violohía ojerure 20 rrevísta. Haʼe oipota káda alúmno oguereko peteĩ”. Ótro ermáno katu oskrivi: “Ojapóma 60 áño rasa apredika hague. Koʼág̃a arekótama 75 áño, ha arakaʼeve ndavyʼáiva peichaite peve predikasiónpe avyʼa haguéicha ko méspe aikuaveʼẽrõ guare pe rrevísta ¡Despertad! espesiál”.

¹⁶ Áño 2008 guive heta rrevísta ¡Despertad! ogueru pe artíkulo “¿Casualidad o diseño?”. Koʼã artíkulo mbykymíva ohechauka mbaʼeichaitépa Ñandejára iñarandu ha mbaʼéichapa yvyporakuéra oñehaʼã okopia umi mbaʼe haʼe ojapo vaʼekue. Áño 2010-pe jarresivi kuri pe folléto ¿Es la vida obra de un Creador?, ojejapo vaʼekue ikatu hag̃uáicha oñepytyvõ umi héntepe ombotuicha hag̃ua Ñandejárape. Ko folléto oreko heta taʼanga oipytyvõva umi oleévape ikatu hag̃uáicha ohechakuaa mbaʼeichaitépa Jehová ikatupyry okrea hag̃ua. Ha opakuévo peteĩ seksión oĩ heta porandu omopensáva pe oleévape. ¿Ndépa reiporúmava ko folléto repredika jave ogahárupi, kállere térã mamo reimehápe?

17, 18. a) ¿Mbaʼéichapa peẽ tuvakuéra ikatu peipytyvõ pene famíliape odefendekuaa hag̃ua ijerovia? b) ¿Mbaʼéichapa peiporu koʼã folléto pejapo hag̃ua pende estúdio de família?

¹⁷ Tuvakuéra, ¿pehesaʼỹijómapa ko folléto idivúho porã porãva pende estúdio de famíliape? Pejapóramo upéicha, haʼekuéra omombaʼevéta Ñandejárape. Oiméramo pene famíliape oĩ mitãrusu térã mitãkuña, ani penderesarái chupekuéra ojejopyveha koléhiope orovia hag̃ua pe evolusión. Umi sientífiko, mboʼehára, prográma oñeʼẽva naturalésare ha umi pelíkula omoingese iñakãmekuéra ikatuha ojejerovia pe evolusión rehe. Peipytyvõkena chupekuéra oñedefendekuaa hag̃ua. Peiporu upearã pe folléto El origen de la vida. Cinco cuestiones dignas de análisis, osẽ vaʼekue avei 2010-pe. Ko folléto omokyreʼỹ avei umi imitãvape oiporu hag̃ua iñakã, ojapoháicha pe ótro folléto ¿Es la vida obra de un Creador? (Prov. 2:10, 11). Ha omboʼe chupekuéra ohechakuaa hag̃ua oimépa isentído hína umi mbaʼe ohendúva koléhiope.

¹⁸ Sapyʼánte osẽ notísia heʼíva umi sientífiko otopa hague pruéva ohechaukáva ikatuha ojejerovia pe evolusiónre. Pe folléto El origen de la vida ojejapo oipytyvõ hag̃ua umi mitãrusu ha mitãkuñáme ikatu hag̃uáicha ohechakuaa oimépa hína añetehápe yvyporakuéra ou animálgui. Avei oipytyvõ chupekuéra oikuaa hag̃ua mbaʼéichapa ombohováita umi hénte opensávape sientifikokuéra oprovamaha ilavoratóriope opa mbaʼe oikovéva oñepyrũ hague ijehegui reínte. Tuvakuéra, pene família oñandu vaʼerã oĩha preparádo odefende hag̃uáicha ijerovia, ha peẽ ikatu peipytyvõ chupekuéra koʼã mokõi folléto rupive (elee 1 Pedro 3:15).

19. ¿Mbaʼe priviléhiopa jareko opavave kristiáno?

¹⁹ Ñande ikatu ñaaprende hetaiterei mbaʼe Jehovágui jaleéramo umi puvlikasión oñeʼẽva hembiapokuére omeʼẽva ñandéve iñorganisasión. Opaite koʼã pruéva ñanemomýi ñamombaʼeguasu hag̃ua Jehovápe ñande pyʼaite guive (Sal. 19:1, 2). ¡Ajépa javyʼaite ikatu haguére ñamombaʼe ha ñambotuicha Jehovápe, ko univérso Apoharépe! (1 Tim. 1:17.)