¿Mbaʼérepa oĩ porã ojexpulsa umi hembiapo vaíva?

JULIAN omombeʼu mbaʼéichapa oñeñandu itaʼýra oñemosẽrõ guare kongregasióngui: “Ahendúrõ guare pe anúnsio, haʼete voi opáva chehegui la múndo. Haʼe ningo che raʼy ypykue ha rojepokuaaiterei ojuehe. Rojapo vaʼekue heta mbaʼe oñondive. Che raʼy ojeporta porãmi vaʼekue, péro peichaháguinte oñepyrũ oho tape vaíre. Che rembireko pyʼỹinte hasẽ upe oikóvare, ha che ndaikuaái mbaʼéichapa akonsoláta chupe. Mokõivéva roñeporandu noiméipa norokumpliporãi raʼe ore rresponsavilida”.

Oĩ jave oñemosẽva kongregasióngui ningo ñambyasyeterei. Upéicharõ, ¿mbaʼére piko ojeʼe ojehechaukaha mborayhu ojexpulsávo peteĩ hembiapo vaíva? ¿Mbaʼérepa heʼi la Biblia sapyʼánte oñemosẽmante vaʼerãha kongregasióngui umi hembiapo vaíva? ¿Mbaʼéicha javépa ojexpulsa peteĩ persónape?

Peteĩ testígo de Jehová oñemosẽ kongregasióngui mokõi mbaʼére. Ñepyrũrã, opekágui Ñandejára renondépe. Ha upéi, noñarrepentíri rupi hembiapo vaikuégui.

Jehová ndojeruréi ñandehegui perfeksión, péro omeʼẽ ñandéve mandáto ha konsého ñakumpli vaʼerã ikatu hag̃uáicha ñanderekopotĩ ha ñaime porã henondépe. Por ehémplo, haʼe ndoipotaiete ñamombaʼeguasu umi dios fálso, ñanemonda, japorojuka ni ñambotavy ñande rapichápe. Avei oipota jarrechasa pe inmoralida sexuál ha espiritísmo (1 Cor. 6:9, 10; Apoc. 21:8).

¿Reagradesépa Jehovápe omeʼẽ haguére umi mandáto ideprovécho ha ñandeprotehéva? Ajépa iporãite ñaime umi persóna ivuéno ha idesénteva apytépe ha ikatúva jajerovia hesekuéra. Peichagua persóna jajuhu kongregasiónpemante. ¿Mbaʼéicha rupípa upéva? Pórke ñañemeʼẽrõ guare Jehovápe, káda uno ñañekompromete kuri jasegitaha ñakumpli opa mbaʼe haʼe omandáva ñandéve Iñeʼẽme.

Péro ¿mbaʼépa oiko peteĩ kristiáno oúramo ojapo peteĩ mbaʼe ivaietereíva ndogueropuʼakáigui pe tentasión? Heta Ñandejára siérvo yma guare hoʼa avei koʼãichagua pekádope, péro ndahaʼéi upe haguére Jehová orrechasaitémava voi chupekuéra. Pór ehémplo pe rréi David. Haʼe ningo opeka peteĩ tembireko ahénondi ha ojukauka pe kuñakarai ménape. Péro pe proféta Natán heʼi chupe: “Jehová operdona nde pekádo” (2 Sam. 12:13, NM).

David oñarrepenti vaʼekue ipyʼaite guive, upévare Ñandejára operdona chupe (Sal. 32:1-5). Koʼág̃arupi peteĩ Ñandejára siérvo oñemosẽ kongregasióngui sólamente noñarrepentíriramo, térã osegíramo ojapo pe ivaíva (Hech. 3:19; 26:20). Peteĩ persóna ndohechaukáiramo oñarrepentiha ipyʼaite guive, umi ansiáno oĩva pe komite hudisiálpe omosẽ vaʼerã chupe kongregasióngui.

Ikatu ningo ñane hénte térã ñane amígo hína pe ojexpulsáva. Upéicha jave ikatu ñapensa umi ansiáno ojopyetereíma hague hendive ha natekotevẽiha la oñemose kuri chupe. Péro la Biblia heʼi mbaʼérepa Jehová omanda oñemosẽ kongregasióngui pe hembiapo vaívape, ha oĩ porãha ojejapo upéva.

Jesús heʼi kuri ojekuaataha ñanearanduha umi mbaʼe porã jahupytývare (Mat. 11:19). Añetehápe, oñemosẽvo peteĩ pekadór noñarrepentírivape, ojehupyty heta mbaʼe porã kongregasiónpe ha ovenefisia enterovépe. Jahechamína mbohapy mbaʼe ohechaukáva upéva.

Oñemosẽvo peteĩ hembiapo vaívape, noñemongyʼamoʼãi Jehová réra. Jajekuaa rupi opárupi testígo de Jehováramo, ñane kondúktare ikatu hína ñamopotĩ, térã ñamongyʼa Ñandejára réra (Is. 43:10). Por ehémplo, peteĩ mitãrusu ojeporta porãramo, oñeñeʼẽ porãta ituvakuérare. Upéicha avei, ñande voi ñanderekopotĩramo, umi hénte orrespetavéta Jehovápe. Péro jaikóramo jajapo ivaíva katu ñamotĩta chupe. Ñandejára réra osegíta ipotĩ isiervokuéra okumplíramo umi mbaʼe haʼe omandáva. Por ehémplo, Ezequiel tiémpope umi ótro tetã oikuaa vaʼekue umi hudío haʼeha Jehová siervokuéra (Ezeq. 36:19-23).

Ñande ñamongyʼáta Jehová réra jajúramo jaʼa inmoralida sexuálpe. Apóstol Pedro omeʼẽ vaʼekue ko konsého: “Anive pejapo umi mbaʼe pejapose vaʼekue yma ndapeikuaáirõ guare Ñandejárape. Upéva rangue, penemarangatu vaʼerã opa mbaʼe pejapóvape, upe penerenóiva Imarangatu rupi. Ñandejára Ñeʼẽ heʼi voi: ‘Peẽ penemarangatu vaʼerã, che chemarangatu rupi’” (1 Ped. 1:14-16). Ñanderekopotĩramo, ñambotuicha hína Jehová réra.

Péro peteĩ testígo de Jehová oikóramo ojapo peteĩ mbaʼe ivaíva, katuete umi iñamígo ha ikonosidokuéra oikuaáta pe ojapo vaʼekue. Oñemosẽvo chupe kongregasióngui, Jehová ohechauka omopotĩha ipuévlo ha isiervokuéra orrespetaha umi léi ha konsého oĩva Iñeʼẽme. Por ehémplo, peteĩ kuimbaʼe Suizagua og̃uahẽ oúvo rreunionhápe peteĩ Salón del Réinope. ¿Mbaʼépa ogueru chupe? Iñermána haʼe vaʼekue testígo de Jehová, péro oñemosẽ kuri chupe kongregasióngui hoʼa rupi inmoralidápe. Ko kuimbaʼe heʼi oikeseha ko rrelihiónpe ohechágui “noñepermitiriha ijapytepekuéra umi hembiapo vaívape”.

Oñemosẽvo peteĩ hembiapo vaívape, ojeprotehe pe kongregasión. Apóstol Pablo heʼi vaʼekue umi kristiáno Corintoguápe ipeligrosoha ojehejáramo umi pekadór noñarrepentíriva ojeheʼa ermanokuérare. Ha okompara upéva pe levadúrare. Haʼe heʼi: “¿Ndapeikuaái piko michĩmi levadúra ombovupaitemaha pe mása kompletoite?”. Upéi Pablo omeʼẽ ko konsého: “Pemosẽ pe kuimbaʼe aña pende apytégui” (1 Cor. 5:6, 11-13).

Amalisia “pe kuimbaʼe aña” Pablo oñeʼẽha, opraktika vaʼekue inmoralida, ha pe kongregasiónpe oĩma ermáno oaseptáva pe kuimbaʼe ojapóva (1 Cor. 5:1, 2). Oñepermitírire osegi kongregasiónpe upe pekadór, ogueraha vaíta kuri ótro ermánope ha ikatu avei hoʼa pe inmoralida sexuálpe, ojepraktika meméva upe siudápe. Péicha avei, oñepermitíramo osegi kongregasiónpe koʼãichagua pekadór, ikatu hína umi ótro ermáno mbeguekatúpe ndorrespetavéima Ñandejára mandamientokuéra (Ecl. 8:11). Umi hembiapo vaíva ha noñarrepentíriva oapeligra pe kongregasiónpe, haʼete umi “ita okañýva y guýpe”, ha ikatu ombojahoga umi ótro ermáno jerovia (Jud. 4, 12).

Oñemosẽvo peteĩ pekadórpe, oñepytyvõ chupe okambia hag̃ua. Jesús omombeʼu vaʼekue peteĩ istória oñeʼẽva peteĩ mitãrusu oheja vaʼekuére hóga, oho oiko iñakãre ha oipurupaite iñerénsia. Oaprende ikostíllare ijetuʼuha oiko mombyry hógagui ha ndaiporiha oñeinteresáva hese ipyʼaite guive. Upépe ohechakuaa tuichaiterei ofalla hague, oñarrepenti ha ou jey hógape (Luc. 15:11-24). Pe istóriape Jesús heʼi kuri pe túva ovyʼaiterei hague ohechávo itaʼýra ou jeyha. Upéva ohechauka mbaʼeichaitépa Jehová oñeñandu peteĩ persóna oñarrepentíramo ha ou jey kongregasiónpe. Haʼe heʼi voi: “Ndaipotái omano pe iñañáva, síno aipota oheja hape vai ha osegi oikove” (Ezeq. 33:11, NM).

Pe expulsádo ndahaʼevéima kongregasiongua térã noĩvéima Jehová família apytépe. Upéva ikatu oipytyvõ chupe ohechakuaa hag̃ua mbaʼépa pe operde vaʼekue. Oñandúta hembiapo vai repykue, ha imanduʼáta mbaʼeichaitépa ohasa porã vaʼekue oĩrõ guare ermanokuéra apytépe ha haʼérõ guare Jehová amígo. Katuete ombyasýta operde haguére koʼã mbaʼe ha omomýita chupe ou jey hag̃ua kongregasiónpe.

Ikatu hag̃uáicha pe expulsádo oñandu pe disiplína, tekotevẽ ñanembarete ha jahechauka jahayhuveha Jehovápe. Rréi David heʼi vaʼekue: “Kuimbaʼe joheipyre chenupãramo, upéva iporã. Chemongavajúramo, upéva mbaʼe ryakuã porãicha cherehe oñeñohẽva” (Sal. 141:5). Ñamoĩmína peteĩ ehémplo. Peteĩ persóna okaru hína. Peichaháguinte ijahyʼo paʼã, ndaikatuvéima oñeʼẽ ni ipytuhẽ. Sapyʼaitérõ g̃uarã ikangypaitéma. Avave noipytyvõiramo chupe, ikatu hína omano. Upéi peteĩ iñamígo ou olomopete chupe. Upéva ikatu hasy, péro osalváta chupe. Péicha avei, David orrekonose vaʼekue sapyʼánte tekotevẽha voínte ojekorrehi peteĩ ihústova jepe, ikatu hag̃uáicha osegi pe tape porãre.

Heta vése pe expulsión oipytyvõ pe hembiapo vaívape ojekorrehi hag̃ua. Upéva oiko vaʼekue Julian raʼýre, ñañeʼẽ hague iñepyrũme. Diez áño oñemosẽ rire, oñehaʼã oñemoĩ porã jey Jehovándi ha ou jey kongregasiónpe. Koʼág̃a oservíma kómo ansiáno. Haʼe omombeʼu: “Añemosẽ rire ambohovái kuri heta mbaʼe ijetuʼúva cherembiapo vai haguére, ha ahechakuaa hetaiterei mbaʼe aperde hague. Haʼekuaa aikotevẽ hague voi peichagua disiplína” (Heb. 12:7-11).

Añetehápe ningo pe expulsión haʼe hína peteĩ desgrásia ivaietereíva. Péro upéva ndeʼiséi oikoha petẽi mbaʼe ndorekovéimava solusión. Enterove jajapo vaʼerã Jehová ojeruréva ñandehegui, ikatu hag̃uáicha pe disiplína oipytyvõ pe expulsádope.

Umi ansiáno okomunikáva pe pekadórpe oñemosẽha kongregasióngui, ohechauka vaʼerã oporohayhuha Jehová ojapoháicha. Heʼívo upe persónape mbaʼépa ojedesidi, omombeʼu porã vaʼerã chupe mbaʼépa ojapo vaʼerã ou jey hag̃ua kongregasiónpe. Upéi, pe expulsádo ohechaukáramo okambiaha, umi ansiáno ikatu ovisita sapyʼapyʼa chupe ikatu hag̃uáicha omomanduʼa chupe mbaʼéichapa oñemoag̃ui jeýta Jehováre.a

Entéro ihénte orrespetáramo ansianokuéra odesidíva, ohechaukáta hína ohayhuha pe kongregasión ha avei pe expulsádope. Julian heʼi kuri: “Ahayhu ningo che raʼýpe, péro pe ojapo vaʼekue oreseparaite”.

Pe kongregasión kompletoite ikatu ohechauka oporohayhuha, orrespetávo Jehová omandáva ha noñeʼẽivo pe expulsádope ni ndojeheʼáivo hese (1 Cor. 5:11; 2 Juan 10, 11). Péicha oñekumplíta pe disiplína Jehová omeʼẽ vaʼekue umi ansiáno rupive. Péro aníkena ñamboyke pe oñemosẽva hentekuérape. Jahechauka vaʼerã katu jahayhuha koʼã ermánope, pórke haʼekuéra oiméne ombyasyeterei avei pe oikóva (Rom. 12:13, 15).

Julian heʼi: “Pe expulsión ningo peteĩ mbaʼe oñekotevẽva, pórke ñanepytyvõ jaiko hag̃ua Jehová oipotahaichaite”. Upéi omombeʼu avei: “Ñanembosufríramo jepe, amo ipahápe jahupyty mbaʼe porã. Ndarrespetáirire pe disiplína che raʼy orresivíva opeka haguére, haʼe núnka ndojekorrehimoʼãi ha ikatu kuri ojeperdete”.