“Ndaipóri tape ipukuetereíva ni ijetuʼuetereíva”

UPÉRÕ ningo el 26 de marzo de 1937, ha Arthur Willis ha Bill Newlands omaneha oúvo mbeguekatu peteĩ kamionéta ikyʼapámava. Haʼekuéra og̃uahẽ Sídneype (Australia) heʼongue ijapére. Upérõ kavalete ojapo 1 áño osẽ hague hikuái upe siudágui, ha orrekorre 19.300 kilómetro umi lugár desiértore ha ambue lugár pe tape ivaietereihárupi. Koʼã kuimbaʼe ndoviahái oikuaa hag̃ua heta lugár, síno haʼekuéra prekursór, ha ojapoháicha heta prekursór, osẽ omombeʼu pe marandu porã umi lugár mombyryvehápe Austráliape.

Áño 1930 potaite peve, umi Estudiánte de la Biblia opredikáma kuri heta lugár Australia vórdere, péro saʼieterei opredika Australia mbytére, haʼéva peteĩ desiérto tuicháva oikohápe saʼieterei hénte.a Ko lugárnte voi tuichaiterei, ñambojojárõ Estados Unídosre, alamita rasa voi ohupyty. Upéicharõ jepe, umi ermáno oikuaa Jesús oipotaha opredika hikuái “mombyryvehápe ko yvy tuichakuére”, tahaʼe jepe Australia mbytépe (Hech. 1:8). Añetehápe upe tembiapo tuichaiterei. ¿Ikatúnepa okumpli hikuái? Umi ermáno ojapo ikatúva entéro, ha ojerovia Jehová ovendesitaha chupekuéra.

Áño 1929-pe, algúna kongregasión oĩva Queensland ha Australia Occidentálpe, otransforma unas kuánta kamionéta ha oekipa porã ikatu hag̃uáicha oho hikuái Australia mbytépe. Ojeporavo prekursór ikatu vaʼerã oaguanta pe viáhe ha omyatyrõ umi veíkulo tekotevẽ jave. Koʼã ermáno oho jepe heta lugárpe arakaʼeve ndojepredikaihápe.

Oĩ vaʼekue prekursór ndaikatúiva oreko veíkulo, upéicharõ jepe odesidi hikuái oviaha visikléta ári. Por ehémplo, 1932-pe Bennett Brickell haʼéva peteĩ mitãrusu de 23 áño, oho Rockhámptongui (Queensland) ha opredika 5 mésere umi lugár mombyryvehápe oĩva nórte gotyo upe estádope. Ivisiklétape okarga ikatúva entéro, por ehémplo ao, tembiʼu, oñeñua hag̃ua ha atyraite lívro. Upéi, iperõmbámarõ jepe la ikuviérta, lomímonte osegi pórke ojerovia Jehová oipytyvõtaha chupe. Upéi, ofaltávo 300 kilómetro og̃uahẽ jey hag̃ua osẽ haguégui, ko ermáno ogueraha ijykére ivisikléta. Hiʼarive ohasa umi lugár heta persóna omano haguépe uhéigui. Upe rire, 30 áñore oviaha hetaiterei kilómetro Australia tuichakuére visikléta, móto ha áutope. Ko ermáno haʼe pe primera persóna opredika vaʼekue umi indíhena australiánope, ha oipytyvõ oñeforma hag̃ua unas kuánta kongregasión. Heta hénte oikuaa ko ermánope umi lugár oho haguépe ha ojerrespeta chupe.

Oikoháicha avei mbovymi paíspe oĩva ko múndope, Austráliape oĩ hetaiterei terréno iñavitantekuérape g̃uarã, koʼýte pe país mbytépe. Upévare, umi Testigokuéra ojapo vaʼerã tuicha sakrifísio opredika hag̃ua umi persóna oikóvape umi sónare.

Mokõi prekursór hérava Stuart Keltie ha William Torrington ojapo vaʼekue avei tuicha sakrifísio opredika hag̃ua umi héntepe. Áño 1933-pe ohasa hikuái pe desiérto de Simpson ha umi sérro yvykuʼi oĩva upépe, ha og̃uahẽ peteĩ puévlope hérava Alice Springs oĩva pe país mbytetépe. Oñembyaírõ guare chuguikuéra iveíkulo, ohejámante vaʼerã, ha ermáno Keltie hetyma de madéra un ládova, oho hendivekuéra kaméllo ári. Añetehápe noñehaʼãreíri hikuái, pórke og̃uahẽvo William Créekpe otopa peteĩ karaíre hérava Charles Bernhardt. Ko karai oreko peteĩ posáda mombyry peteĩ paráda de trénpe. Charles oasepta pe añetegua, ovende la iposáda ha oñepyrũ iprekursorádo. Upéi haʼe opredika haʼeño 15 áñore umi lugár hakuvehápe ha mombyryvehápe Austráliape.

Jahechaháicha, umi prekursór tekotevẽ kuri ipyʼaguasu ha isakrifikádo ombohovái hag̃ua umi situasión ijetuʼúva oñepresentáva chupekuéra. Por ehémplo Arthur Willis ha Bill Newlands, ñañeʼẽma hague ajeʼi, 2 semánape ojapo 30 kilómetronte oviahávo Australia mbyte gotyo pórke pe ama oheja pe desiérto lódo memete. Avei oĩ vése omyaña vaʼerãha hikuái ikamionéta pe desiértore kuarahy mbytépe, arrivádape ha ivykuʼi atýpe, térã ombohasa vaʼerã umi ita atýre térã umi rrío isékovare henyhẽhápe yvykuʼi. Pyʼỹinte oñembyai ikamionetakuéra, péicha jave oho hikuái yvýrupi térã visikléta ári pe puévlo hiʼag̃uivévape oheka hag̃ua rrepuésto. Sapyʼánte og̃uahẽ hikuái pe puévlope unos kuánto día haguépe, ha ohaʼarõ jey vaʼerã unas kuánta semána og̃uahẽ meve umi rrepuésto. Upéicharõ jepe ipositívo hikuái. Arthur Willis heʼi peteĩ fráse oĩháicha lénto ¡Despertad!-pe, upérõ hérava The Golden Age: “Ndaipóri tape ipukuetereíva ni ijetuʼuetereíva Itestigokuérape g̃uarã”.

Charles Harris oservi vaʼekue kómo prekursór heta áñore, ha heʼi pe soleda ha pe vída ijetuʼuetéva desiérto australiánope omoag̃uiveha chupe Jehováre. Charles omombeʼu: “Ñande rekove ningo haʼete peteĩ viáhe, ha amáske saʼi ñande ekipáhe javiaha porãve. Jesús oĩ vaʼekue dispuésto okévo okápe tekotevẽ jave, ñande avei javyʼa vaʼerã jajapóramo upéva ñane asignasiónpe”. Jahechaháicha, upeichaite ojapo vaʼekue umi prekursór. Haʼekuéra ojesakrifika heta rupi, pe marandu porã og̃uahẽ pe lugár mombyryvehápe Austráliape, ha heta persóna oñemoĩ Ñandejára Rréino poguýpe.