¿Mbaʼépa jahechauka jaha jave rreunionhápe?

1, 2. a) ¿Mbaʼépa Jehová opensa ohecha jave hetaiterei hénte ijatyha ogueromanduʼa hag̃ua pe Séna del Señór? (Ehecha pe taʼanga oĩva ko rrevísta apére). b) ¿Mbaʼépa jahecháta ko artíkulope?

¿MBAʼÉPA Jehová opensa ohecha jave ijatyha hetaiterei persóna ko yvy tuichakuére ogueromanduʼa hag̃ua Jesús omano hague ára? Haʼe ningo ndahaʼéi ohechánteva heta persóna ijatyha, síno ojesareko porã káda uno oĩvare upe rreuniónpe. Ohecha oĩha persóna káda áño ohóva pe Konmemorasiónpe. Por ehémplo, ijapytepekuéra oĩ umi ombohováiva situasión ijetuʼúva ojepersegi rupi chupekuéra. Oĩ avei umi ndohoguasúiva umi ótro rreunión jarekóvape péro ndofaltái pe Konmemorasiónpe pórke omombaʼe upe okasión. Ha avei oĩ umi ohóva primera ves, ikatu voi ikuriósogui reínte.

² Añetehápe Jehová ovyʼa ohecha jave heta persóna oĩha pe Konmemorasiónpe (Luc. 22:19). Péro chupe g̃uarã ndahaʼéi la iñimportantetereíva mboy persónapa oĩ, síno mbaʼérepa ojeho upépe. Ko artíkulope ñambohováita ko porandu iñimportantetereíva: ¿mbaʼérepa ñande ndajahái pe Konmemorasionhápente, síno avei entéro umi rreunión Jehová opreparávape umi ohayhúvape chupe?

3, 4. a) ¿Mbaʼérepa jaha umi rreunionhápe? b) ¿Mbaʼépa jahechauka jahávo umi rreunionhápe? c) Heʼiháicha 1 Corintios 11:23-26, ¿mbaʼérepa ndajafaltái vaʼerã Konmemorasionhápe?

³ ¿Mbaʼérepa ñande jaha rreunionhápe? Prinsipálmente pórke péicha ñamombaʼeguasu Jehovápe. Avei Jehová ñanemboʼe umi rreunión rupive. Umi persóna oñembotuicháva ndoipotái avave omboʼe chupekuéra (3 Juan 9). Péro ñande jaipotaiterei Jehová ha iñorganisasión ñanemboʼe (Is. 30:20; Juan 6:45).

⁴ Jahávo rreunionhápe jahechauka ñanderekomirĩha ha jaipotaha Ñandejára ñanerekomboʼe. Avei, ñande ndajahái pe Konmemorasiónpe jaha vaʼerãgui reínte, síno ñaneumílde ha jasegiségui Jesús mandáto heʼíva: “Pesegíkena pejapo kóva penemanduʼávo cherehe” (elee 1 Corintios 11:23-26). Ko rreunión omombarete ñande jerovia ha ñanemomanduʼa mbaʼeichaitépa Jehová ñanderayhu. Péro haʼe oikuaa porã ndahaʼeiha una ves al áñonte la tekotevẽva ñanemokyreʼỹ ha ñanekonsola. Upéicha rupi ojejapo rreunión káda semána ha oñemanda ñandéve jaha hag̃ua umívape. Ñaneumílderamo jasegíta ko mandáto. Añetehápe ñamboyke heta óra káda semána ikatu hag̃uáicha jajeprepara rreunionrã ha ndajafaltái.

 5. ¿Mbaʼérepa umi hekomirĩva oasepta Jehová invitasión?

⁵ Káda áño heta persóna ohechauka hekomirĩha ha oasepta Jehová invitasión ikatu hag̃uáicha oaprende chugui (Is. 50:4). Ñepyrũrã oho hikuái Konmemorasionhápe ha upéi umi ótro rreuniónpe (Zac. 8:20-23). Ñande ha umi ipyahúva javyʼaiterei Ñandejára ñandegia ha ñanerekomboʼe haguére, haʼe ningo ‘ñanepytyvõ ha ñanedefende’ (Sal. 40:17). Jehová ha Itaʼýra ohayhuetéva ñaneinvita jaha hag̃ua umi rreuniónpe. Iñimportanteterei ningo jaasepta upe invitasión ñaaprende hag̃ua chuguikuéra (Mat. 17:5; 18:20; 28:20).

 6. ¿Mbaʼépa ojapo peteĩ karai hekomirĩ rupi?

⁶ Káda áño ñañehaʼã ñainvita ikatúva guivépe oho hag̃ua Konmemorasionhápe. Heta persóna hekomirĩva oñevenefisia oĩ haguére upe rreuniónpe. Jahechamína peteĩ ehémplo. Ojapo unos kuánto áño peteĩ ermáno ontrega hague peteĩ karaípe pe invitasión, péro pe karai heʼi chupe ndaikatumoʼãiha oho. Pe Konmemorasión díape pe ermáno oñesorprende ohechávo pe karaípe oikeha ohóvo Salónpe. Pe karai katu ohecharamoiterei ojerresivi porã haguére chupe, upémarõ osegi oho umi rreuniónpe ha 1 áñope 3 vésente ofalta. ¿Mbaʼépa omomýi chupe okambia hag̃ua la opensa lája? Pe ermáno oinvita vaʼekue chupe heʼi upe rire: “Haʼe ningo hekomirĩ”. Ojekuaa porã Jehová ogueru hague ko karaípe oĩ hag̃ua iñorganisasiónpe. Koʼág̃a haʼe ojevautisáma ha oiko chugui testígo de Jehová (2 Sam. 22:28; Juan 6:44).

 7. ¿Mbaʼéichapa umi mbaʼe ñaaprendéva rreuniónpe ha jaleéva la Bíbliape ñanepytyvõ ñaneumílde hag̃ua?

⁷ Umi mbaʼe ñaaprendéva rreunionhápe ha jaleéva la Bíbliape ñanepytyvõ ñanderekomirĩ hag̃ua. Umi semána og̃uahẽ mboyve pe Konmemorasión, rreunionhápe oñehesaʼỹijo Jesús ehémplo ha avei mbaʼéichapa haʼe hekomirĩ vaʼekue omeʼẽvo hekove ñanderehehápe. Ha unos kuánto día pe Konmemorasión mboyve, iporãta jaleéramo umi mbaʼe oiko vaʼekue Jesús omano ha oikove jeýrõ guare. Koʼã mbaʼe jaleéva la Bíbliape ha ñaaprendéva rreunionhápe ñanemomýi jaagradeseve hag̃ua pe sakrifísio Jesús ojapo vaʼekue ñanderehehápe. Avei ñanemokyreʼỹ ñanderekomirĩ ha jajapo hag̃ua Ñandejára rembipota, ijetuʼúramo jepe (Luc. 22:41, 42).

 8. ¿Mbaʼéichapa Jesús ohechauka vaʼekue ipyʼaguasuha?

⁸ Ñande ñandepyʼaguasuse avei Jesús ojapo haguéicha. ¿Mbaʼéichapa haʼe ohechauka vaʼekue ipyʼaguasuha omano mboyvemi? Jesús oikuaa porã kuri iñenemigokuéra omotĩta, ombyepotíta ha ojukataha chupe (Mat. 20:17-19). Upéicharõ jepe ndoguevíri, síno oĩ dispuésto omanóvo. Og̃uahẽrõ guare upe moménto, Jesús heʼi ijapostolkuéra ifiélvape oĩva hendive hardín de Getsemanípe: “Pepuʼã jaha, ¡péina!, og̃uahẽma hína pe chetraisionáva” (Mat. 26:36, 46). Peteĩ hénte aty oho árma reheve ojagarra hag̃ua chupe, péro Jesús oñemoĩ henondepekuéra, heʼi mávapa haʼe ha omanda umi soldádope oheja hag̃ua oho umi apóstol (Juan 18:3-8). ¡Ajépa ipyʼaguasuete! Koʼág̃a avei, umi unhído ha ambue ovechakuéra oñehaʼã osegi iñehémplo. ¿Mbaʼéichapa ojapo upéva?

 9. a) ¿Mbaʼérepa tekotevẽ jepi ñandepyʼaguasu jaha meme hag̃ua rreunionhápe? b) ¿Mbaʼéichapa ñane ehémplo ikatu omokyreʼỹ umi ermáno oĩvape préso ojerovia rupi Ñandejárare?

⁹ Tekotevẽ ñandepyʼaguasu jaha meme hag̃ua rreunionhápe ijetuʼúramo jepe. Oĩ ermáno hasykatúva, ndovyʼáiva térã oñedesanimáva. Ótrope katu ojopy ihentekuéra térã umi goviérno. Ñapensamína avei umi ermáno oĩvare préso ojerovia rupi Ñandejárare. ¿Ndépa reikuaa ne ehémplo ikatuha oipytyvõ chupekuéra? (Heb. 13:3). Haʼekuéra ohendúramo jasegiha jaservi Jehovápe ñaneprovléma hetáramo jepe, ikyreʼỹta avei osegi hag̃ua ojerovia, ipyʼaguasu ha ifiél. Apóstol Páblore oiko vaʼekue upéva. Oĩ aja préso Rómape, ovyʼa ohendu jave iñermanokuéra ifielha Ñandejárape (Filip. 1:3-5, 12-14). Ojepoi mboyvemi chugui térã ojepoi riremínte, oskrivi kuri pe kárta umi kristiáno hebréope. Pe kártape ojerure chupekuéra osegi hag̃ua ‘ojoayhu oñoermánoicha’ ha oho meme hag̃ua hikuái rreunionhápe (Heb. 10:24, 25; 13:1).

10, 11. a) ¿Mávapepa ñainvita vaʼerã Konmemorasionhápe? b) ¿Mbaʼérepa jajapo upéva heʼiháicha Efesios 1:7?

¹⁰ Ñande jahechauka ñandepyʼaguasuha ñainvita jave ñane héntepe, ñane kompañéro de traváho térã ñane vesinokuérape oho hag̃ua pe Konmemorasionhápe. ¿Mbaʼérepa jajapo upéva? Ñande ningo jaagradeseterei la Jehová ha Jesús ojapo vaʼekue ñanderehehápe, ha upéva ñanemomýi ñainvita hag̃ua ótrope ikatu hag̃uáicha ñanemoirũ avei upe díape. Ñandejára ningo “imbaʼeporãiterei” kuri ñanendive omeʼẽrõ guare Itaʼýrape sakrifísioramo, ha ñande jaipota enterovéva oikuaa ikatuha avei oñevenefisia upe mbaʼe porãitégui (elee Efesios 1:7; Apoc. 22:17).

¹¹ Ñande jaha jave rreunionhápe jahechauka hína ñandepyʼaguasuha, péro jahechauka avei peteĩ mbaʼe Ñandejára ha Itaʼýra ohechauka porãitereíva.

12. a) ¿Mbaʼéichapa umi rreunión ñanepytyvõ jahayhuve hag̃ua Jehová ha Jesúspe? b) ¿Mbaʼéichapa 2 Corintios 5:14, 15 ñanemokyreʼỹ jasegi hag̃ua Jesús ehémplo?

¹² Ñande jaha rreunionhápe jahayhueterei rupi Jehová ha Jesúspe. Ha umi mbaʼe ñaaprendéva upépe koʼýte ñanemomýi jahayhu hag̃ua chupekuéra. Umi rreuniónpe pyʼỹinte ojeʼe la Ñandejára ha Itaʼýra ojapo vaʼekue ñanderehehápe (Rom. 5:8). Pe Konmemorasión koʼýte ñanepytyvõ jahechakuaa hag̃ua mbaʼeichaitépa Jehová ha Jesús oporohayhu, tahaʼe jepe umi nomombaʼéivape gueteri Jesús sakrifísio. Jaagradesetereígui koʼã mbaʼe, káda día ñañehaʼã jaguata Jesús pyporére (elee 2 Corintios 5:14, 15). Ñande pyʼaite guive ñamombaʼeguasuse Jehovápe omeʼẽ haguére Itaʼýra ñanderehehápe. Ñakomentávo ñande pyʼaite guive rreunionhápe jahechauka hína ñamombaʼeha la Jehová ojapo vaʼekue.

13. ¿Mbaʼéichapa ikatu jahechauka jahayhuetereiha Jehová ha Itaʼýrape? Emyesakã.

¹³ Ikatu jahechauka mbaʼeichaitépa jahayhu Jehová ha Itaʼýrape ñaime haguére dispuésto jajapóvo sakrifísio hesehapekuéra. Sapyʼánte tekotevẽ ñambohovái heta mbaʼe jaha hag̃ua rreunionhápe. Por ehémplo, pyʼỹinte umi kongregasión oreko rreunión peteĩ óra umi ermáno ouha itravahohágui, upévare heta oĩ ikaneʼõva pe rreunión orarã. Ojereko avei pe ótro rreunión fin de semanakue, upéicha rupi ñande ñañembyaty jepi umi ótro hénte opytuʼu jave. ¿Ohechakuaápa Jehová jahaha rreuniónpe oimérõ jepe ñanekaneʼõ? Katuete haʼe ohechakuaa upéva. Amáske ñambohovái hetave provléma jaservi hag̃ua chupe, Jehová omombaʼeve la jajapóva jahayhúgui chupe (Mar. 12:41-44).

14. ¿Mbaʼeichagua ehémplo iporãitereívapa omoĩ Jesús?

¹⁴ Jesús ojesakrifika vaʼekue ohayhúgui yvyporakuérape, péicha oheja ñandéve peteĩ ehémplo iporãitereíva. Haʼe ningo oĩ vaʼekue dispuésto omanóvo idisipulokuéra rehehápe. Péro ndahaʼéi upéva añónte, káda día haʼe omotenonde vaʼekue umi ótrope. Por ehémplo, Jesús oĩ vaʼekue idisipulokuérandi ikaneʼõiterei ha ojepyʼapýramo jepe (Luc. 22:39-46). Haʼe opensave vaʼekue umi mbaʼe ikatúvare ojapo ótro rehehápe, ojesareko rangue la haʼekuéra ikatúvare omeʼẽ chupe (Mat. 20:28). Ñande avei jahayhúramo ñande pyʼaite guive Jehová ha umi ermánope, jajapóta ikatúva guive jaha hag̃ua Konmemorasiónpe ha avei entéro umi ótro rreuniónpe.

15. ¿Mávapepa koʼýte ñaipytyvõse?

¹⁵ Ñande ningo ñaĩ peteĩ família tuichávape jarekohápe heta ermáno ha ermána espirituál. Javyʼaiterei ñañehaʼã haguére ñainvita ótrope oike hag̃ua avei ko famíliape. Péro koʼýte ñaipytyvõse “ñane ermanokuéra” oñemomombyry vaʼekuépe Jehovágui ha upéva káusare oiko chuguikuéra inaktívo (Gál. 6:10). ¿Mbaʼéichapa ikatu jahechauka jahayhuha chupekuéra? Ñamokyreʼỹ ha ñainvitávo ou hag̃ua rreunionhápe, koʼýte pe Konmemorasionhápe. Ñande javyʼaiterei Jehová ha Jesús ovyʼaháicha peteĩ inaktívo oñemoag̃ui jeýramo Ñandejárare, haʼéva hína ñande Ru ñanderayhuetéva ha pe Pastór oñangarekóva ñanderehe (Mat. 18:14).

16. a) ¿Mbaʼépa ñañomokyreʼỹ vaʼerã jajapo hag̃ua, ha mbaʼéichapa ñanepytyvõ umi rreunión? b) ¿Mbaʼérepa iporã ñanemanduʼa ko tiémpope Juan 3:16 heʼívare?

¹⁶ Koʼã semána oúvape, jajapo vaʼerã ikatúva guive ñainvita hag̃ua heta héntepe ikatu hag̃uáicha ñanemoirũ pe Konmemorasiónpe, ojejapótava el 19 de abril de 2019 (ehecha pe rrekuádro hérava “¿Ñainvitátapa ñande rapichakuérape?”). Ha ko áño pukukue katu, ñañomokyreʼỹ ani hag̃ua jafalta umi rreunión Jehová omeʼẽvape ñandéve. Pe fin ningo hiʼag̃uivéntema ohóvo, upévare iñimportanteterei jaha umi rreuniónpe. Umíva ñanepytyvõ jasegi hag̃ua ñanderekomirĩ, ñandepyʼaguasu ha japorohayhu (1 Tes. 5:8-11). Jahechaukákena Jehovápe jaagradeseha haʼe ha Itaʼýra ñanderayhueterei haguére (elee Juan 3:16).