¡Jasegíkena ñandefiél Jehovápe!

 1. ¿Mbaʼéichapa koʼã mbohapy ermáno ohechauka oĩha Jehová ykére?

ÑAPENSAMÍNA koʼã mbohapy situasión ikatúvare oiko ermanokuérare. 1) Peteĩ mitãkuña oĩ hína ikoléhiope, ha upépe iprofesór heʼi chupekuéra entéro opartisipa vaʼerãha peteĩ ákto patriótikope. Ko mitãkuña oikuaa porã Jehová ndoguerohoryiha umíva, ha upévare heʼi porãnte iprofesórpe haʼe ndopartisipamoʼãiha. 2) Peteĩ mitãrusu hiʼotĩva oĩ hína predikasiónpe, ha opilla pe ótro ógape oikoha peteĩ ikompañéro de koléhio. Ko ikompañéro heta vésema oñembohory umi Testígore, péro ko ermaníto lomímonte oho og̃uahẽ upe ógape. 3) Peteĩ ermáno oñehaʼãmbaite omantene hag̃ua ifamíliape. Péro ipatrón heʼi chupe ijapu hag̃ua térã ojapo hag̃ua peteĩ mbaʼe pe léi heʼíva oĩ vaiha. Ko ermáno oikuaa ikatuha oñemosẽ itravahohágui, péro lomímonte oho ipatrón rendápe ha heʼi chupe ndojapomoʼãiha upéva pórke Ñandejára oipota isiervokuéra iñonrrádo ha okumpli umi léi (Rom. 13:1-4; Heb. 13:18).

 2. ¿Mbaʼe porandúpa ñambohováita, ha mbaʼérepa?

² ¿Mbaʼépa ikatu jaʼe umi mbohapy ermánore? Jaʼekuaa por ehémplo ipyʼaguasu ha iñonrradoha hikuái. Péro oĩ avei ótra kósa ojekuaa porãitereíva. ¿Mbaʼépa hína upéva? Ohechauka ifielha Jehovápe. Upéva omomýi chupekuéra osegi hag̃ua iñeʼẽrendu chupe, ha Jehová katuete ovyʼaitereíta hesevekuéra. Ñande ningo jaipota avei ñande Ru yvagapegua ovyʼa ñandereheve. Upévare tekotevẽ ñambohovái koʼã mbohapy porandu: ¿mbaʼépa heʼise ñandefielha Jehovápe? ¿Mbaʼérepa ñandefiél vaʼerã chupe? ¿Ha mbaʼépa jajapo vaʼerã ikatu hag̃uáicha siémpre ñandefiél Jehovápe ko tiémpo ijetuʼuetévape?

 3. a) ¿Mbaʼépa heʼise ñandefielha Jehovápe? b) Emombeʼu umi ehémplo ñanepytyvõva ñantende hag̃ua mbaʼépa heʼise upéva.

³ ¿Mbaʼépa heʼise ñandefielha Jehovápe? Upéva heʼise jahayhuha chupe ñande pyʼaite guive ha siémpre jajapoha umi mbaʼe ombovyʼátava chupe. Pe palávra hebrea la Bíbliape ojetradusíva “fiél” térã “ñeʼẽrendu” heʼise jepi peteĩ mbaʼe ikomplétova, hesãiva térã ndorekóiva defékto. Por ehémplo, pe Léi heʼi vaʼekue umi israelita osakrifika vaʼerãha Jehovápe peteĩ animál hesãivab (Lev. 22:21, 22). Ñandejára puévlo nopresentái vaʼerã kuri peteĩ animál hasýva, nahetymáiva, nainambíriva térã hesatũva. Jehovápe g̃uarã iñimportanteterei kuri upe animál hesãi, ikompléto ha ndorekói mbaʼeveichagua defékto (Mal. 1:6-9). Ñantende porãve hag̃ua mbaʼérepa Jehovápe g̃uarã iñimportánte upéva, ikatu ñamoĩ peteĩ ehémplo. Ñamoĩ chupe jahaha jajogua álgo, tahaʼe peteĩ frúta, lívro térã peteĩ erramiénta. Péro jajagarrávo, jahecha pe frúta ikuapaha, pe lívrope ofaltaha óha térã pe erramiénta ndorekoiha peteĩ párte. Katuete ningo ndajajoguamoʼãi umíva pórke ñande jaipota álgo ikomplétova ha ndorekóiva defékto. Upéicha avei Jehová oipota jahayhu ha ñandefiél chupe, ha umi mbaʼe ikompléto ha ndorekói vaʼerã defékto.

 4. a) ¿Tekotevẽ piko ñandeperfékto ñandefiél hag̃ua Ñandejárape? Emyesakã. b) Ohechaukaháicha Salmo 103:12-14, ¿mbaʼépa Jehová núnka ndojeruremoʼãi ñandéve?

⁴ Ñande ningo ñaneimperfékto, jareko heta defékto ha pyʼỹinte jajavy. Upévare ikatu ñañeporandu: “¿Tekotevẽ piko ñandeperfékto ñandefiél hag̃ua Ñandejárape?”. Jahechamína mokõi mbaʼe ñanepytyvõva ani hag̃ua jakyhyje. Primero, Jehová ndoikói oñekonsentra ñande deféktore. La Biblia heʼi voi: “Jehová, nde reikótarõ rekontrola umi mbaʼe vai rojapóva, ni peteĩvare ndaikatumoʼãi ojeʼe iñinosenteha” (Sal. 130:3). Haʼe oikuaa ñaneimperfektoha ha manterei jajavyha, upévare siémpre oĩ ñaneperdona hag̃uáicha (Sal. 86:5). Segundo, Jehová núnka ndojeruremoʼãi ñandéve peteĩ mbaʼe ndaikatumoʼãiva jajapo (elee Salmo 103:12-14). ¿Mbaʼépa upéicharõ heʼise tekotevẽha ñanekompléto ha ndajarekói vaʼerãha defékto?

 5. ¿Mbaʼérepa iñimportánte jahayhu Jehovápe ikatu hag̃uáicha ñandefiél chupe?

⁵ Ñandefiél hag̃ua Jehovápe iñimportanteterei jahayhu chupe. Haʼe ningo ñande Ru yvagapegua, upévare jahayhu ha ñandefiél vaʼerã chupe. Ha jahecha haguéicha, koʼã mbaʼe ikompléto ha ndorekói vaʼerã defékto. Upéva heʼise jajapo vaʼerãha umíva ñande pyʼaite guive. Péicha ikatúta ñaneñeʼẽrendu chupe jahasáramo jepe umi situasión ijetuʼúva (1 Crón. 28:9; Mat. 22:37). Jahechami jeýna umi mbohapy situasión ñañeʼẽma hague oñepyrũvo ko artíkulo. ¿Mbaʼérepa umi ermáno ojapo kuri umi mbaʼe jahecha vaʼekue? Pe ermána ningo ndahaʼéi kuri ndojedivertiséiva. Pe ermaníto katu ndoipotaichéne ikompañéro oñembohory hese haʼe haguére Testígo. Ha pe ótro ermáno katuete ndoperdeséi kuri itraváho. Péro koʼã mbohapy ermáno oikuaa umi mbaʼe Jehová heʼíva ihustoha, ha ojapose hikuái la ombovyʼátava chupe. Odesidi mboyve peteĩ mbaʼe, haʼekuéra siémpre ohecha mbaʼépa Ñandejára opensa, ha ojapo upéva ohayhúgui chupe. Upéicha ohechauka hikuái añetehápe ifielha Jehovápe.

 6. a) ¿Mbaʼérepa tekotevẽ jahechauka ñandefielha Jehovápe? b) ¿Mbaʼéicha rupípa Adán ha Eva ou kuri naiñeʼẽrenduvéi Ñandejárape?

⁶ ¿Mbaʼérepa iñimportantete káda uno ñandefiél Jehovápe? Tekotevẽ ñandefiél chupe pórke Satanás odesafia kuri Jehovápe, ha avei oñeʼẽ vai káda uno ñanderehe. Pe hardín de Edénpe ko ánhel rrevéldegui oiko kuri Satanás, heʼiséva “Oñemoĩva ótrore”. Haʼe omongyʼa Jehová réra porãite heʼívo hese iñañaha, nogovernaporãiha ha opensaha ijehénte. Ñambyasýramo jepe, Adán ha Eva ohendu chupe ha oñemoĩ avei Jehováre (Gén. 3:1-6). Oikóvo pe hardín de Edénpe, haʼekuéra oreko kuri hetaiterei oportunida ohayhuve hag̃ua Jehovápe. Péro Satanás ojerrevelárõ guare, ojekuaa Adán ha Eva ndohayhúi hague Jehovápe ipyʼaite guive, pe imborayhu naikomplétoi kuri. Upévare, tiémpo rire tekotevẽ kuri oñembohovái koʼã porandu: ¿ikatúnepa peteĩ persóna iñeʼẽrendu Jehovápe ohayhúgui chupe? ¿Térã ikatúpa umi persóna ohechauka añetehápe ifielha Jehovápe? Koʼã dúda oñepyrũ kuri Job tiémpope.

 7. Ohechaukaháicha Job 1:8-11, ¿mbaʼéichapa oñeñandu Jehová ohechávo Job ifielha chupe, péro mbaʼéichapa oñeñandu Satanás upe haguére?

⁷ Job oiko vaʼekue pe tiémpo umi israelita oĩrõ guare Egíptope. Upe tiémpope ndaipóri vaʼekue ótro ifiélva haʼéicha. Añetehápe Job ñandéichante avei iñimperfékto ha ojavy vaʼekue, péro Jehová ohayhueterei chupe iñeʼẽrendu haguére. Amalisia Satanás odesafiáma voi kuri anteve Jehovápe heʼívo yvyporakuéra ndaikatuiha ifiél chupe. Upévare Jehová heʼi Satanáspe ojesareko hag̃ua Job rehe. Job oiko lája ohechauka porãiterei kuri Satanás ijapuha. Upévare haʼe oipota kuri oñemoĩ a pruéva Jóbpe ojehecha hag̃ua oimépa añetehápe ifiél Jehovápe. Ñandejára katu okonfia iñamígo Job rehe, ha upévare oheja Satanás ombohasa asy chupe (elee Job 1:8-11).

 8. ¿Mbaʼéichapa Satanás oataka Jóbpe?

⁸ Satanás iñañaiterei, haʼe ningo peteĩ asesíno. Satanás oipeʼapaite Jóbgui umi mbaʼerepy orekóva, ojuka chugui isiervokuéra ha omoherakuã vaipa chupe. Ojukapaite avei chugui umi 10 ifamília ohayhuetéva, ha upéi ombou chupe peteĩ mbaʼasy ivaietereíva. Osẽ hese kuru vai ipeupáva, ipy guive iñakã meve. Job rembireko ohechávo umi mbaʼe oikóva oñeñandu vaieterei ha opyta yvýre, upévare heʼi iménape omaldesi hag̃ua Ñandejárape ha omanóntema hag̃ua. Job jepe omanoséntema kuri, péro lomímonte osegi ifiél. Upémarõ Satanás otantea ótro hendáicha oity hag̃ua chupe. Haʼe ojevale mbohapy Job amígore. Koʼã kuimbaʼe oho ovisita Jóbpe ha opyta hendive heta díare, péro haʼekuéra ni vy noipytyvõi ni nokonsolái chupe. Upéva rangue oñemoĩ hikuái okritika vaieterei Jóbpe. Heʼi avei hikuái Ñandejára káusare Job ohasa asyha, ha nointeresaiha chupe oimépa Job ifiél térã nahániri. Haʼekuéra ontendeka voi Job iñañaha ha upévare omereseha voi péicha osufri (Job 1:13-22; 2:7-11; 15:4, 5; 22:3-6; 25:4-6).

 9. ¿Mbaʼépa ndojapói Job ijetuʼuetereíramo jepe hendive?

⁹ ¿Mbaʼépa ojapo Job ohasávo koʼã situasión? Haʼe ningo ndahaʼéi vaʼekue perfékto. Upévare ipochy ha ojahéi umi iñamígo guaʼúre, ha heʼi umi mbaʼe upéi ombyasy vaʼekue. Job heʼi kuri ijehe ihustoha, omotenonde rangue Ñandejára hustísia (Job 6:3; 13:4, 5; 32:2; 34:5). Péro ijetuʼuetereíramo jepe hendive, Job noñemomombyrýi Jehovágui. Haʼe ndoroviái kuri umi japu heʼi vaʼekue umi iñamígo guaʼu, ha upévare heʼi: “Che ni mbaʼevéicharõ ndaʼemoʼãi peẽ pendehustoha. Amano meve asegíta cheñeʼẽrendu” (Job 27:5). Koʼã mbaʼe Job heʼi vaʼekue ohechauka porãiterei oĩ hague desidído osegitaha ifiél Jehovápe. Haʼe núnka noñentregái kuri, ha ñande ikatu avei jajapo upéva.

10. ¿Mbaʼérepa ñaneinteresa umi mbaʼe Satanás ojapo vaʼekue Job rehe?

¹⁰ ¿Mbaʼérepa ñaneinteresa vaʼerã koʼã mbaʼe oiko vaʼekue Job rehe? Pórke Satanás heʼi avei ñanderehe jahayhu ha ñandefiél guaʼunteha Jehovápe, ha ñañemomombyrytaha chugui jajúramo jajapeligra (Job 2:4, 5; Apoc. 12:10). ¿Mbaʼéichapa reñeñandu reikuaávo upéva? Katuete hasy asy ndéve heʼi haguére koʼã mbaʼe. Upéicha rupi iporãta siémpre nemanduʼáramo Jehová ojeroviaitereiha nderehe ha upévare omeʼẽha ndéve peteĩ oportunida iporãitereíva. Jehová opermiti hína Satanás nemoĩ a pruéva rehechauka hag̃ua añetehápepa ndefiél, péro ojapo upéva ojeroviágui nde ikatutaha rehechauka Satanás ijapuha. Hiʼarive opromete nepytyvõtaha upearã (Heb. 13:6). ¡Ajépa javyʼaite Jehová peichaite peve ojerovia haguére ñanderehe! ¿Rehechakuaápa upéicharõ mbaʼérepa iñimportantete ñandefiél chupe? Pórke péicha jahechauka Satanás tuichaiterei ijapuha, avei upéicha ñadefende Jehová réra porãite ha jahechauka jaapojaha igoviérno. ¿Péro mbaʼépa ñanepytyvõta jasegi hag̃ua ñandefiél Jehovápe?

11. ¿Mbaʼépa ikatu ñaaprende Job ehémplogui?

¹¹ Koʼã “ára pahápe” Satanás koʼýte oataka hína Jehová siervokuérape (2 Tim. 3:1). ¿Mbaʼépa jajapo vaʼerã ikatu hag̃uáicha siémpre ñandefiél Ñandejárape? Ñaaprendekuaa hetave mbaʼe Job ehémplogui. Heta tiémpo Satanás oñepyrũ mboyve oataka chupe, haʼe heta vésema ohechauka kuri ifielha Jehovápe. Jahechamína koʼág̃a mbohapy mbaʼe Job ojapo vaʼekue osegi hag̃ua ifiél. Upéva ñanepytyvõta ikatu hag̃uáicha jasegi iñehémplo.

12. a) Ohechaukaháicha Job 26:7, 8, 14, ¿mbaʼépa oipytyvõ Jóbpe omombaʼe ha orrespetave hag̃ua Jehovápe? b) ¿Mbaʼépa jajapo vaʼerã ñamombaʼe ha jarrespetave hag̃ua Jehovápe?

¹² Job ohayhuve Jehovápe oñemaravilla rupi opa mbaʼe haʼe okrea vaʼekuére. Job ohasa vaʼekue heta tiémpo omañávo umi mbaʼe Jehová okrea vaʼekuére (elee Job 26:7, 8, 14). Haʼe ohechakuaa saʼieterei oikuaaha Jehová kreasióngui, péro lomímonte oñemaravilla ojepyʼamongeta jave ko yvýre, pe yvágare, umi araíre ha pe arasunúre. Job ovaloraiterei vaʼekue avei umi mbaʼe Jehová omboʼéva, upévare heʼi: “Amombaʼe la haʼe heʼíva” (Job 23:12). Job ohecharamoiterei kuri opa mbaʼe Jehová ojapóva ha upévare orrespetaiterei chupe. Haʼe ohayhu Ñandejárape ha ombovyʼase chupe, upévare oĩve desidído ifieltaha Jehovápe. Ñande jajapo vaʼerã avei Job ojapo haguéicha. Koʼág̃arupi ñande jaikuaa hetaiteve mbaʼe pe kreasióngui, ha jareko voi la Biblia kompletoite ikatu hag̃uáicha jaikuaa porãve Ñandejárape. Opa mbaʼe ñaaprendéva ñanepytyvõta ñande avei ñamombaʼe ha jarrespeta hag̃ua Jehovápe. Koʼã mbaʼe ñanemomýita jahayhu ha ñaneñeʼẽrendu hag̃ua Ñandejárape, ha ñaimevéta desidído ñandefiél chupe ñande pyʼaite guive (Job 28:28).

13, 14. a) ¿Mbaʼéichapa Job 31:1 ohechauka vaʼekue Job iñeʼẽrenduha? b) ¿Mbaʼéichapa ikatu jasegi iñehémplo?

¹³ Job oñehaʼã vaʼekue iñeʼẽrendu Jehovápe opa mbaʼépe. Job oikuaa porã vaʼekue tekotevẽha iñeʼẽrendu Jehovápe ohechauka hag̃ua ifielha chupe. Upévare oñehaʼãmbaite iñeʼẽrendu káda día oikove aja pukukue. Por ehémplo, haʼe oñatende vaʼekue mbaʼéichapa otratáta umi kuñanguérape (elee Job 31:1). Haʼe ningo omendáma kuri, upévare oikuaa naiporãmoʼãiha oikóramo omañaiterei ótro kuñáre. Koʼág̃arupi, ko múndo ñandejopy opáicha rei ñanderekovai hag̃ua. ¿Ñañehaʼãtapa ani hag̃ua ñamañaiterei peteĩ persóna ndahaʼéivare ñane ména térã ñane rembireko? ¿Ñamboykétapa pe pornografía térã oimehaichagua taʼanga ikatúva ñanemoakãraku? (Mat. 5:28). Ñañehaʼãmbaitéramo káda día jajejokokuaa ikatúta jasegi ñandefiél Jehovápe.

¹⁴ Job iñeʼẽrendu vaʼekue avei Jehovápe ohecha lájape umi mbaʼerepy. Haʼe oikuaa ojeroviáramo umi mbaʼerepýre ikatuha ofalla vaieterei, ha omeresetaha ojekastiga chupe (Job 31:24, 25, 28). Ñande ningo jaiko peteĩ múndo oñemombaʼetereihápe umi mbaʼerepy. Péro jajapóramo la Biblia heʼíva ha jahecha hekópe porã pe pláta ha umi mbaʼerepy, ñaĩvéta desidído ñandefiél hag̃ua Jehovápe (Prov. 30:8, 9; Mat. 6:19-21).

15. a) ¿Mbaʼépa oipytyvõ raʼe Jóbpe osegi hag̃ua ifiél Ñandejárape? b) ¿Mbaʼérepa iporã siémpre ñanemanduʼa Jehová ñanevendesitaha ñandefiélramo chupe?

¹⁵ Job oikuaa Ñandejára ovendesitaha chupe, ha oñehaʼã oñekonsentra upévare. Job oikuaa vaʼekue Ñandejára oipotaha ifiél chupe (Job 31:6). Upévare oikuaa porã amo ipahápe Jehová omeʼẽtaha chupe heta mbaʼe porã iñeʼẽrendu haguére ohasa asýramo jepe. Upéva katuete oipytyvõne raʼe Jóbpe osegi hag̃ua ifiél. Upéicha rupi Jehová oguerohoryeterei kuri Jóbpe ha heta ovendesi chupe (Job 42:12-17; Sant. 5:11). Péro hetaiteve mbaʼe porãiti ohaʼarõ chupe amo gotyove. ¿Ñandépa jajerovia avei Ñandejára katuete ñanevendesitaha jasegíramo ñandefiél? Jehová ningo nokambiái (Mal. 3:6). Siémpre ñanemanduʼa vaʼerã Ñandejára omombaʼetereiha ñandefiélramo. Péicha ikatúta jajesareko umi mbaʼe porã jahupytýtavare amo gotyove (1 Tes. 5:8, 9).

16. ¿Mbaʼépa jadesidi vaʼerã jajapo?

¹⁶ Jadesidíkena upéicharõ siémpre ñandefieltaha Jehovápe. Sapyʼánte ikatu ñañandu ñandénte ñañehaʼãha jajapo upéva. Péro ani ñapensa upéicha, nañaiméi ningo ñaneaño. Ko múndo tuichakuére oĩ hetaiterei ermáno ha ermána oñehaʼãva ifiél Jehovápe. Avei yma oĩ vaʼekue hetaiterei persóna ifiélva Ñandejárape tekotevẽtaramo jepe omano upe haguére (Heb. 11:36-38; 12:1). Upévare, jasegíkena siémpre ñandefiél Jehovápe, ha jaʼe Job heʼi haguéicha: “Amano meve asegíta cheñeʼẽrendu”. Jajapóramo upéva ikatúta ñamombaʼeguasu Jehovápe pára siémpre.