¿Mbaʼérepa jahechauka vaʼerã ñandeagradesidoha?

 1. ¿Mbaʼéichapa peteĩ samaritano Jesús omonguera vaʼekue ohechauka ijagradesidoha?

LA Biblia oñeʼẽ 10 kuimbaʼe oñeñandu vaietereívare ilépra haguére, haʼekuéra ningo operdetéma voi la esperánsa ikatúne hag̃ua algúna ves okuera. Péro peteĩ díape, umi lepróso ohecha mombyry guive Jesúspe. Haʼekuéra ohendúmava voi Jesús ikatuha omonguera opaichagua mbaʼasy, upévare oĩ segúro haʼe ikatutaha omonguera avei chupekuéra. Upéicha rupi ojerure asy chupe hikuái: “¡Jesús, Mboʼehára, oreporiahuverekomína!”. Upe rire, los 10 okueraite pe mbaʼasýgui. Katuete ningo koʼã kuimbaʼe oagradese Jesús omonguera haguére chupekuéra. Péro peteĩva añoite ohechauka ijagradesidoha,b upévare oho ha heʼi Jesúspe mbaʼéichapa oñeñandu. Pe persóna haʼe kuri peteĩ samaritano, ha omombaʼetereígui pe milágro “sapukaihápe ombotuicha Ñandejárape” (Luc. 17:12-19).

2, 3. a) ¿Mbaʼérepa sapyʼánte ikatu ndajahechaukái ñandeagradesidoha? b) ¿Mbaʼépa jahecháta ko artíkulope?

² Pe samaritano ojapo haguéicha, ñande avei jahechaukase ñandeagradesidoha umi imbaʼeporãvandi ñanendive. Péro sapyʼánte ikatu ñanderesarái jahechauka hag̃ua upéva umi mbaʼe jaʼe ha jajapóva rupive.

³ Ko artíkulope jahecháta mbaʼérepa iñimportánte jahechauka ñandeagradesidoha umi mbaʼe jaʼe ha jajapóva rupive. Ñahesaʼỹijóta umi ehémplo oĩva la Bíbliape oñeʼẽva umi persóna ijagradesído ha umi imalagradesídovare. Upéi ñaanalisáta avei mbaʼe mbaʼépa ikatu jajapo jahechauka hag̃ua jaagradeseha umi mbaʼe porã ojejapóva ñanderehe.

4, 5. ¿Mbaʼérepa jahechauka vaʼerã ñandeagradesidoha?

⁴ Jehová omoĩ ñandéve la ehémplo pórke haʼe voi ohechauka ijagradesidoha. Haʼe ojapo upéva ovendesi jave umi persóna oñehaʼãvape ojapo hembipota (2 Sam. 22:21; Sal. 13:6; Mat. 10:40, 41). La Biblia ñanemokyreʼỹ jasegi hag̃ua Jehová ehémplo heʼívo: “Pehaʼangáke Ñandejárape, peẽ itaʼýra haʼe ohayhuetéva” (Efes. 5:1). ¿Mbaʼérepa upéicharõ iñimportánte jahechauka ñandeagradesidoha? Pórke jasegise Jehová ehémplo.

⁵ ¿Mbaʼérepa iñimportánte avei jahechauka ñandeagradesidoha? Ñamoĩmína peteĩ ehémplo: jajapóramo peteĩ tembiʼu hetereíva, javyʼave ñakomparti jave. Péicha avei, jaagradeséramo peteĩ mbaʼe péro ndajahechaukái upéva, ñandénte javyʼáta. Péro jahechaukárõ ñande rapichápe ñandeagradesidoha ñambovyʼáta avei upe persónape. ¿Mbaʼérepa? Pórke péicha pe persóna oikuaáta noñehaʼãreíri hague ñanepytyvõ térã omeʼẽ hag̃ua ñandéve peteĩ mbaʼe ñaikotevẽva. Hiʼarive, pe amista jarekóva upe persónandi imbaretevéta.

 6. ¿Mbaʼépepa ojojogua peteĩ mansána de óro ha umi mbaʼe jaʼéva jahechauka hag̃ua ñandeagradesidoha?

⁶ Iñimportanteterei ningo jahechauka ñandeagradesidoha umi mbaʼe jaʼéva rupive. La Biblia heʼi: “Umi mbaʼe jaʼéva itiempoitépe iporãiterei, haʼete mansána de óro oñemoĩva peteĩ vandéha de plátape” (Prov. 25:11). Epensamíntena mbaʼeichaitépa iporã peteĩ mansána de óro oĩva peteĩ vandéha de plátape. Avei ivaliosoiterei upéva. ¿Mbaʼéichapa reñeñandúta oñemeʼẽramo ndéve peichagua rregálo? ¡Katuete ningo revyʼaitereíta! Peichaite avei iporã ehechaukáramo nde rapichápe ndeagradesidoha umi mbaʼe eréva rupive. Ojerregaláramo ndéve peteĩ mansána de óro, katuete reñongatu porãta ha erekóta heta tiémpore. Péicha avei, ehechaukáramo nde rapichápe ndeagradesidoha, haʼe imanduʼáta ha omombaʼéta upéva heta tiémpore, ikatu voi omano meve.

 7. a) Ohechaukaháicha Salmo 27:4, ¿mbaʼéichapa David ohechauka vaʼekue ijagradesidoha? b) ¿Mbaʼéichapa Asaf desendientekuéra ohechauka vaʼekue avei upéva?

⁷ Ñandejára siervokuéra yma guare ohechauka vaʼekue ijagradesidoha. Por ehémplo umíva apytépe oĩ David (elee Salmo 27:4). Haʼe ningo omombaʼe vaʼekue ipyʼaite guive ikatu haguére ombotuicha Jehovápe. Upévare ohechauka ijagradesidoha ha okontrivui hetaiterei mbaʼe oñemopuʼã hag̃ua pe témplo. Asaf desendientekuéra ohechauka vaʼekue avei ijagradesidoha oskrivívo unos kuánto salmo, haʼéva umi purahéi ombotuicháva Ñandejárape. Peteĩva umi purahéipe oagradese hikuái Jehovápe “umi mbaʼe porãita” ojapóvare (Sal. 75:1). Jahechaháicha, David ha Asaf desendientekuéra ohechauka kuri Jehovápe oagradesetereiha ovendesi haguére chupekuéra. ¿Mbaʼéichapa ñande avei ikatu jasegi koʼã ehémplo?

8, 9. a) ¿Mbaʼéichapa Pablo ohechauka vaʼekue omombaʼeha iñermanokuérape? b) ¿Mbaʼéichapa oñeñandúne raʼe hikuái upe haguére?

⁸ Apóstol Pablo omombaʼe vaʼekue avei iñermáno ha iñermanakuérape, ha ohechauka upeichaha umi mbaʼe heʼívare hesekuéra. Por ehémplo, siémpre oñemboʼémi oagradese hag̃ua Ñandejárape iñermanokuérare. Pablo ohechauka avei omombaʼeha iñermanokuérape oskrivi jave chupekuéra. Romanos 16:1-15-pe Pablo omensiona hérarupi 27 ermánope. Por ehémplo, heʼi Prisca ha Áquilape ‘haimete ojejuka hague hesehápe’. Avei omombeʼu mbaʼéichapa Febe “hetápe oipytyvõ vaʼekue”, umíva apytépe Páblope voi. Jahechaháicha haʼe ofelisita vaʼekue umi ermáno ohayhuetéva ha iguapoitereívape.

⁹ Pablo oikuaa vaʼekue iñermanokuéra iñimperfektoha. Upéicharõ jepe, omohuʼãvo ikárta oñeʼẽve umi mbaʼe porã ojapóvare hikuái. Epensamíntena mbaʼeichaitépa oiméne ovyʼa ha ikyreʼỹ raʼe umi ermáno ohendúrõ guare ojeleeha upe kárta, ha Pablo oñeʼẽ porãha hesekuéra. Katuete ningo upéva oipytyvõne avei imbareteve hag̃ua pe amista orekóva hikuái Páblondi. ¿Ndépa pyʼỹinte reagradese avei ne ermanokuéra ne kongregasionguápe umi mbaʼe heʼíva térã ojapóvare?

10. ¿Mbaʼépa ñaaprende Jesús ohechauka lájagui omombaʼeha la ojapóva isegidorkuéra?

¹⁰ Jesús omeʼẽ vaʼekue unos kuánto mensáhe umi kongregasión oĩvape Asia Menórpe. Ha umi mensáhepe ohechauka omombaʼeha la ojapóva isegidorkuéra. Por ehémplo, haʼe omoñepyrũ la imensáhe kongregasión de Tiatírape kóicha: “Che aikuaa opa mbaʼe rejapóva, mbaʼéichapa reporohayhu, rejerovia, reservi Ñandejárape ha reaguanta heta mbaʼe. Aikuaa avei umi mbaʼe rejapóva koʼág̃a tuichaveha yma rejapo vaʼekuégui” (Apoc. 2:19). Jesús ndahaʼéi heʼínteva ojapo porãha hikuái la itraváho, síno omombaʼe avei umi kualida omomýiva chupekuéra ojapo porã hag̃ua la hembiapo. Haʼe tekotevẽ kuri okorrehiʼimi unos kuánto kristiáno oĩvape Tiatírape, upéicharõ jepe oñepyrũre ha omohuʼãvo la imensáhe omokyreʼỹ chupekuéra (Apoc. 2:25-28). Jesús ningo omoakã umi kongregasión ha oreko tuicha autorida, upévare natekotevẽi kuri oagradese avavépe umi traváho ojejapóvare. Upéicharõ jepe haʼe oikuaauka omombaʼeha la isegidorkuéra ojapóva. ¡Ajépa iporãite ko ehémplo ansianokuérape g̃uarã!

11. Ohechaukaháicha Hebreos 12:16, ¿mbaʼépa opensa vaʼekue Esaú umi mbaʼe oúvare Ñandejáragui?

¹¹ Ñambyasýramo jepe, oĩ vaʼekue avei imalagradesídova, por ehémplo Esaú. Ituakuéra ohayhu ha orrespeta vaʼekue Jehovápe. Upéicharõ jepe, Esaú ndovalorái umi mbaʼe oúva Ñandejáragui (elee Hebreos 12:16). ¿Mbaʼéichapa ojekuaa hese imalagradesidoha? Esaú oreko vaʼekue pe priviléhio oñemeʼẽva umi taʼýra ypykuépe, péro chupe ndoúi ni ndohói upéva. Upéicha rupi ni ndahesapirĩri ovende hag̃ua un pláto tembiʼúre iñermáno menórpe upe derécho orekóva (Gén. 25:30-34). Tiémpo rire ombyasy la ojapo vaʼekue ha oñamarga ndorresivíri haguére la otokáva chupe. Péro reietéma oñelamenta pórke haʼe nomombaʼéi kuri la orekóva.

12, 13. ¿Mbaʼéichapa umi israelita ohechauka imalagradesidoha, ha mbaʼépepa opa upéva?

¹² Umi israelita ikatu kuri oagradese heta mbaʼére. Por ehémplo, haʼekuéra esklávo kuri Egíptope, péro Jehová ogueru 10 plága ha oguenohẽ chupekuéra upégui. Upe riremínte ohundi avei peteĩ ehérsito kompletoitépe pe Mar Rójope ha osalva umi israelítape. Upérõ guare haʼekuéra oagradeseterei Ñandejárape, ha opurahéi chupe haʼe osalva haguére chupekuéra. ¿Mboy tiémpopa osegi ijagradesído hikuái?

¹³ Umi israelita ombohováivo ótra situasión ijetuʼúva, hesaráima umi mbaʼe porãita Jehová ojapo vaʼekuégui hesehapekuéra ha ohechaukáma imalagradesidoha (Sal. 106:7). La Biblia heʼi: “Upéi enterove umi israelita oñepyrũ ojeplagea Moisés ha Aarónpe”. Péro añetehápe haʼekuéra Jehovágui la ojekeha (Éx. 16:2, 8). Jehová oñedesepsiona chuguikuéra, upéicha rupi upe rire heʼi entéro upe henerasión omanotaha pe desiértope ha sólamente Josué ha Caleb nomanomoʼãiha (Núm. 14:22-24; 26:65). Jahechamína mbaʼépa jajapo vaʼerã ani hag̃ua jajegia koʼãichagua ehémplo vaíre, síno jasegi hag̃ua umi ehémplo iporãva.

14, 15. a) ¿Mbaʼéichapa umi omendáva ikatu ohechauka ijagradesidoha? b) ¿Mbaʼéichapa tuakuéra ikatu omboʼe ifamíliape ijagradesído hag̃ua?

¹⁴ Ñande rogapýpe. Ñandeagradesídorõ ñande rogapýpe enterovéva oñevenefisiáta. Por ehémplo, umi omendáva ohechaukáramo ijagradesidoha, iñunidovéta hikuái ha ifasilvéta oñoperdona hag̃ua. Pe ména omombaʼéva hembirekópe ndahaʼéi oñemeʼẽnteva enkuénta hembireko heʼi térã ojapo porãha peteĩ mbaʼe, síno “opuʼã ha oguerohory avei chupe” (Prov. 31:10, 28). Pe tembireko iñarandúva katu heʼi iménape mbaʼérepa ovalora chupe.

¹⁵ Tuakuéra, ¿mbaʼéichapa ikatu pemboʼe pene famíliape ijagradesído hag̃ua? Ani penderesarái haʼekuéra heʼi ha ojapotaha la peẽ peje ha pejapóva. Upévare, pemoĩkena ehémplo porã ha peagradese chupekuéra ojapo jave álgo penderehehápe. Avei pemboʼe chupekuéra oagradese vaʼerãha ótrope la ojapóva hesehapekuéra. Peipytyvõkena pene famíliape ontende hag̃ua iñimportanteha oagradese ipyʼaite guive, ha upéva ikatuha oipytyvõiterei hapichakuérape. Por ehémplo, peteĩ ermána hérava Clary heʼi: “Che sy orekópe 32 áño ou opyta haʼeño ha haʼénte oremongakuaa. Ore roĩ kuri mbohapy ermáno. Che arekópe avei 32 áño apensa mbaʼeichaitépa oiméne ijetuʼu raʼe mamáme pe situasión ojecha vaʼekuépe. Upévare haʼe chupe amombaʼetereiha pe sakrifísio ojapo vaʼekue orerehehápe. Ramoite heʼi hague chéve ndahesarairiha la haʼe vaʼekuégui chupe, pyʼỹinte opensaha upévare ha omokyreʼỹha chupe káda ke imanduʼa”.

16. Emombeʼu peteĩ ehémplo ohechaukáva mbaʼéichapa ikatu omokyreʼỹ ñane ermanokuérape ñandeagradesídoramo hendivekuéra.

¹⁶ Kongregasiónpe. Ñandeagradesídoramo ñane ermanokuérandi opyta ikyreʼỹ hikuái. Ñañeʼẽmína peteĩ ansiáno orekóvare 28 áño hérava Jorge. Haʼe ou kuri hasyete ha 1 mes aja ndaikatuvéi oho rreunionhápe. Upéi oho jey péro ndaikatúi gueteri omeʼẽ diskúrso. Haʼe heʼi: “Añeñandu jepe ndavaleiha mbaʼeverã pórke ndaikatúi akumpli porã umi rresponsavilida arekóva kongregasiónpe. Péro peteĩ díape, peteĩ ermáno heʼi chéve rreunión rire: ‘Chéngo aagradesese ndéve remoĩ haguére ehémplo porã che familiakuérape. Ndéngo ndereikuaái mbaʼeichaitépa oregusta umi diskúrso rejapo vaʼekue koʼã áño ohasávape. Añetehápe omombareteve ore jerovia’. Ahendúvo upéva, chejuvypaite che ahyʼópe ha añepyrũ cheresaypororopa. Upépe añemeʼẽ enkuénta ahendu hague hústo la aikotevẽ vaʼekue”.

17. Heʼiháicha Colosenses 3:15, ¿mbaʼéichapa ikatu jahechauka jaagradeseha Jehovápe?

¹⁷ Ñandejárandi. Jehová omeʼẽ ñandéve hetaiterei aliménto espirituál. Por ehémplo, ojapo upéva umi rreunión, rrevistakuéra ha ñande sítio de Internét rupive. Oiméne oikómava ñanderehe ñahendu rire peteĩ diskúrso, jalee rire peteĩ artíkulo térã jahecha rire peteĩ prográma JW Broadcástingpe, ñapensa ojejapo hague ñanembaʼerãite. ¿Mbaʼéichapa ikatu jaagradese Jehovápe koʼã rregálore? (Elee Colosenses 3:15). Upéva ikatu jajapo ñañemboʼe jave chupe (Sant. 1:17).

18. ¿Mbaʼéichapa ikatu jahechauka ñamombaʼeha ñane Salón del Reino?

¹⁸ ¿Mbaʼéichapa ikatu avei jahechauka jaagradeseha Jehovápe? Por ehémplo, ñamantenévo potĩ asy ha vién ordenádo pe lugár ñañembyatyhápe ñamombaʼeguasu hag̃ua Jehovápe. Upévare pyʼỹinte japartisipa ojejapo jave limpiésa ha mantenimiénto ñane Salón del Réinope. Avei umi ermáno omaneháva pe ekípo de sonído ha vidéo, oñatende oipuru porã hag̃ua umíva. Ñamantene porãramo ñane Salón, oduravéta ha natekotevẽmoʼãi manterei oñemyatyrõ álgo tuicháva. Péicha jaaorravéta ha hembyvéta pláta oñemopuʼã hag̃ua hetave Salón ko yvy tuichakuére ha oñemyatyrõ umi oĩmava.

19. ¿Mbaʼépa ñanemboʼe la oiko vaʼekue peteĩ superintendénte ha hembirekóre?

¹⁹ Umi ombaʼapo jejopývandi ñanderehehápe. Jaagradese jave ótrope la ojapóva ikatu hína oipytyvõ chupe okambia hag̃ua opensa lája, por ehémplo ohasáramo peteĩ provléma. Jahechamína mbaʼépa oiko kuri peteĩ superintendénte de sirkuíto ha hembirekóre. Peteĩ díape roʼyeterei kuri ha un diaite ojapo hikuái aktivida. Haʼekuéra og̃uahẽ pe lugár opytahápe heʼongue ijapére. Pe ermána iroʼyetereígui ni ndoipeʼái ijavrígo ha ojepoíntema péicha hupápe. Al día sigiénte heʼi iménape nomeʼẽveimaha osegi hag̃ua upe asignasiónpe. Kavalete upe pyharevépe og̃uahẽ peteĩ kárta sukursálgui pe ermánape g̃uarã. Pe kárta rupive mborayhúpe oñemokyreʼỹ chupe oaguanta haguére iservísiope, ha heʼi avei oiméne ijetuʼuha chupe ova káda semána áoty péoty. Iména omombeʼu: “Umi mbaʼe heʼíva pe kárta opokoiterei hese, upévare núnka mas ni ndeʼivéima ohejaseha pe servísio. Oĩ vése che apensa hague ahejávo che asignasión, ha upe jave haʼeháma chemokyreʼỹ asegi hag̃ua”. Ko matrimónio osegi upe asignasiónpe haimete 40 áñore.

20. ¿Mbaʼépa ñañehaʼã vaʼerã jajapo káda día, ha mbaʼérepa?

²⁰ Ñañehaʼãkena káda día jahechauka ñandeagradesidoha. Umi mbaʼe jaʼéva térã jajapóva ikatu hína kavalete oipytyvõ álgienpe osegi hag̃ua oaguanta ko múndo ijetuʼuetévape. Ñandeagradesídoramo, ikatúta avei jatopa ñane amigorã ha upe amista ikatu odura opa árare. Péro iñimportanteveha, péicha jasegíta ñande Ru Jehová ehémplo, pórke haʼe imbaʼeporã ha ijagradesído.