Marandukuéra aty guasu tres diaguápe g̃uarã

Mbaʼe órapa oñepyrũta. Pe portón ojavrítama las 8:00, ha káda pyhareve umi tres día aja oñemoĩta músika las 9:20 ñamoñepyrũ hag̃ua ñande aty guasu. Ñahendúvo umi músika, enterove jaguapýma vaʼerã oñepyrũ hag̃ua hekoitépe pe prográma. Viernes ha sábado kaʼaru ñande aty opáta las 5 rupi ha domingo katu las 4 rupi.

Ñamombaʼeguasu Jehovápe purahéi rupive. Yma, Ñandejára puévlo omombaʼeguasu vaʼekue Jehovápe umi purahéi rupive. Koʼág̃a ñande testígo de Jehová jasegi jajapo upéva jaikuaágui iñimportanteha ñamombaʼeguasu hag̃ua ñande Apoharépe (Sal. 28:7). Dos vése al áño umi ermáno ombaʼapóva pe Orquesta de la Wátchtowerpe opaga jepi ivolsíllogui ipasáhe oho hag̃ua ograva Patterson, Nueva Yórkpe, umi músika porãite ñahendúva jepi ñande aty guasu tres diaguápe. Upévare, pe omoakãva pe aty guasu heʼi jave oñepyrũtamaha pe musikapu, jaguapýma vaʼerã ñane asiéntope ha jajapysaka porã umi músikare, jasegi rangue ñañemongeta. Upéicha jahechaukáta ñamombaʼeha pe esfuérso ojapóva umi ermáno oprepara hag̃ua umíva. Ñahendupa rire umi músika, ñamombaʼeguasúta Jehovápe japurahéivo umi kántiko.

Estasionamiénto. Oiméramo ermanokuéra oñatendéta upépe, ndojekovramoʼãi estasionamiénto ha haʼekuéra voi ohechaukáta ñandéve moõpa ikatu ñamoĩ ñande veíkulo. Sapyʼánte ndatuichái pe estasionamiénto, upévare ñañemongetakuaa ñane ermanokuérandi jaha hag̃ua ikatúva guive peteĩ áutopente. Aníkena jaheja ñande veíkulo óga ahéno renondépe térã upérupi reínte.

Jaguapy hag̃ua. Ojavri vove pe portón, ani jadiparapa voi jaike jaipotágui asiénto umi lugár ñandegustavehápe. Ñande ningo ñanembaʼeporã vaʼerã enterovéndi, ha tekotevẽrõ jajesakrifikaʼimínte vaʼerã ha ñameʼẽ lugár ótrope, tajaguapy jepe raʼe umi lugár nañandegustáivape. Jajapóramo upéicha, ojekuaáta ñanderehe haʼeha kristiáno tee ha omomýita umi ñanderechávape omombaʼeguasu hag̃ua Ñandejárape (Juan 13:34, 35; 1 Cor. 13:5; 1 Ped. 2:12). Ikatu jarreserva asiénto ñande rogayguakuérape g̃uarã, umi ohóvape ñanendive ñande veíkulope térã ñane estudiántepe g̃uarã. Aníkena ñamoĩ reínte umi sílla ári ñande kosakuéra, upéicharõmante umi ótro ohekáva hína asiénto, oikuaáta umi lugár oĩha lívre. Oñemoĩ avei peteĩ seksión umi hasy ha ijedávape g̃uarã, péro ndaikatumoʼãi enterove hogaygua oguapy hendivekuéra upe lugárpe. Upévare, iporãta umi oñangarekóva hesekuérante oguapy hendivekuéra upépe.

Ñañemonde hekopete. Ñañemonde porã vaʼerã jaha hag̃ua ñande aty guasuhápe. Aníkena jaipuru umi ao naidesénteiva oipurúva umi hénte ko mundopegua (1 Tim. 2:9). Ñañatende vaʼerã avei ñañemonde lájare ñaime aja ñande alohamiéntope, térã ñasẽta jave pérupi pe asambléa rire. Upéicharõmante nañatĩmoʼãi jagueraha hag̃ua ñande tarhéta de solápa ha ikatúta japredika oñepresenta jave peteĩ oportunida. Ñañemonde porã ha jajeporta porãramo ñande aty guasu aja, umi hénte ñanderecháva ikatu ostudiase avei la Biblia. Iñimportanteveha katu, ñamombaʼeguasúta hína Ñandejára Jehovápe (Sof. 3:17).

Jaipurúta jave umi aparáto elektróniko. Regueraháramo nde selulár térã nde távlet, emoĩ vaʼerã silénsiope ani hag̃ua omolesta ótrope. Reipurútaramo kámara, filmadóra, távlet térã ambue aparáto elektróniko, eñatende vaʼerã ani hag̃ua redistrae ótrope térã emoʼã umi oĩvape nde kupépe. Aníkena avei remensahea pe prográma aja, péicha neremolestamoʼãi umi oĩvape nde jerére.

Ñande karurã. Jaguerahákena ñande karurã ha ani ñasẽ jajogua okápe. Upéicha jajapóramo, ndaiporimoʼãi ombaʼevendéva ñande aty guasu oikoha jerére. Jaguerahakuaa ñane rembiʼurã peteĩ mbaʼyru ija vaʼerãichaguápe ñane asiénto guýpe. Ñanemanduʼa vaʼerã ndovaleiha jagueraha konservadóra guasu ni mbaʼeveichagua mbaʼyru de vídrio.

Kontrivusión. Ikatu jahechauka ñamombaʼeha ñande aty guasu ñamoĩvo ñane kontrivusión pe káha heʼihápe “Obra mundial”, oĩva ñande aty guasu oikohápe. Ñameʼẽtarõ chéke ñamoĩ vaʼerã “Asociación Torre de Vigía de Biblias y Tratados” rérape.

Pohã. Reguerekóramo pohã reʼúva, aníkena nderesarái regueraha hag̃ua. Pe lugár oikohápe ñande aty guasu ndaikatumoʼãi rekonsegi umi mbaʼe. Oiméramo nderuguy asuka ha reipuru herínga remoĩ hag̃ua ne pohã, nemanduʼa vaʼerã ndovaleiha remombo umi vasuréro oĩvape upe lugárpe, umíva ipeligróso ha ikatu oporokutu.

Ñande pyrehegua. Jagueraha vaʼerã ñande pyrehegua umi ikómodova, ha ikatu vaʼerãichagua jaguata porã heseve oimehápe. Ani jaipuru umi sapatu itáko yvatetereíva, umíva ikatu ñandereity térã ñandepyjere heseve ha jajegolpea.

Umi nohenduporãivape g̃uarã. Ikatúta oñehendu avei pe prográma rrádio rupive (FM). Umi nohenduporãiva ikatu ogueraha irradioʼi ha iñaudífono.

Karríto mitãme g̃uarã ha sílla. Ndojeguerahái vaʼerã aty guasuhápe sílla plegávle ha karríto mitãme g̃uarã.

Formulário Sírvase visitar (S-43). Pe formulário Sírvase visitar ñallena vaʼerã oĩramo ñanerendu porãva japredika jave upe jaikohárupi pe asambléa aja. Upépe ñaanota vaʼerã pe persóna réra, inúmero de teléfono ha moõpa oiko. Upéi ñameʼẽ vaʼerã Departaménto de Puvlikasiónespe térã jaha rire ñande aty guasuhágui, ñameʼẽ pe sekretário oĩvape ñane kongregasiónpe.

Akomodadór. Oñemokyreʼỹ umi ermáno ikatupyrývape, koʼýte umi ansiáno ha siérvo ministeriálpe, ombaʼapo hag̃ua ko departaméntope ha oipytyvõ hag̃ua ermanokuérape. Jehová ningo oguerohoryetereíta upéva.

Voluntário. Umi ermáno ha ermána oipytyvõséva limpiésape, oho vaʼerã Departaménto de Servísio Voluntáriope. Umi ndoguerekóiva gueteri 16 áño ikatu avei oipytyvõ ohóramo hendive itúva, isy, térã peteĩ enkargádo.

Ñag̃uahẽkena órape. Jahupytýta heta mbaʼe porã ñañehaʼãramo ñag̃uahẽ órape ñande aty guasuhápe. Ikatúta ñañemongeta ermanokuérandi, ñahendu pe musikapu, japurahéi pe kántiko, ñahendu pe ñemboʼe ha pe ermáno omoakãva ñanemomaiteívo. Avei nañamolestamoʼãi ermanokuérape, ha jahechaukáta ñamombaʼe ha jarrespetaha Jehovápe (1 Cor. 14:40).

Alohamiénto. Oiméramo japytáta peteĩ otélpe térã ermáno rógape, ojehecha vaʼerã ñanderehe ñandeagradesidoha, ñanepasiénsia ha ñanembaʼerechakuaaha (Col. 4:6). Ha jajerurétaramo japyta hag̃ua ag̃ui pe aty guasu ojejapohágui, ñañeʼẽ vaʼerã umi ansiáno ñane kongregasionpeguándi, haʼekuéra omondóta pe solisitu Departaménto de Alohamiéntope.