¿Mbaʼérepa Jesús hasẽ vaʼekue?

1-3. ¿Mbaʼe mbaʼépa sapyʼánte omyasẽ Jehová siervokuérape?

¿ARAKAʼÉPA último nerasẽ raʼe? ¿Nemanduʼápa? Avése ñanerasẽ pórke javyʼaiterei, ha avése katu ñanerasẽ pórke ñañeñandu vaieterei. Péva la oikovéva jepi sapyʼánte. Por ehémplo, ikatu oime ñanerasẽ pórke omano ñandehegui peteĩ jahayhúva. Lorilei, peteĩ ermána oikóva Estados Unídospe, heʼi: “Sapyʼánteko añeñandu vaieterei jey omano haguére chehegui che memby, ha haʼete voi mbaʼeve ndaikatúiva chetrankilisa. Upéicha jave, aikuaase voi mbaʼéichapa ko che korasõmi osegi gueteri oaguanta”.b

² Sapyʼánte ótra kosaite la ñanemyasẽva. Por ehémplo, peteĩ prekursóra oikóva Japónpe, hérava Hiromi, omombeʼu: “Avése añeñandu vaieterei, pórke apredika jave ndatopái ni peteĩ persóna oñeinteresáva la Bíbliare. Upéicha jave, che resay che rováre ajerure Jehovápe tachepytyvõmi atopa hag̃ua peteĩ persóna oñemoag̃uiséva hese”.

³ ¿Ndépa reñeñandúmava koʼã ermánaicha? Heta oĩ oñeñandúva péicha (1 Ped. 5:9). Ñande ningo jaservise Jehovápe vyʼápe, péro sapyʼánte ndaikatúi. Ndaikatúi pórke omano ñandehegui peteĩ jahayhúva, ñañedesanima, térã ijetuʼueterei rupi ñandéve jaservi Jehovápe (Sal. 6:6; 100:2). ¿Mbaʼépa ñanepytyvõta ñañeñandu jave péicha?

 4. ¿Mbaʼépa jahecháta ko artíkulope?

⁴ Jesús ehémplo tuicha ikatu ñanepytyvõ. Sapyʼánte haʼe oñeñandu vaieterei vaʼekue ha upévare hasẽ (Juan 11:35; Luc. 19:41; 22:44; Heb. 5:7). Jahechamína koʼág̃a mbaʼeichahápepa Jesús hasẽ raʼe, ha mbaʼépa ikatu ñaaprende chugui. Upekuévo jahecháta avei mbaʼépa ikatu jajapo jahasa jave umi situasión ijetuʼuetereíva ha ñanemyasẽséva.

 5. ¿Mbaʼépa ñaaprende Jesúsgui jaleévo Juan 11:32-36?

⁵ Áño 32-pe d.C., hústo inviérno jave, Lázaro ou hasy ha omano. Haʼe Jesús amigoite vaʼekue (Juan 11:3, 14). Lázaro oreko vaʼekue mokõi ermána, hérava María ha Marta, ha Jesús ohayhueterei vaʼekue lotrevévape. María ha Marta oñeñandu vaieterei vaʼekue, pórke pe iñermanomi ohayhuetéva omano chuguikuéra. Lázaro omano rire, Jesús oho María ha Marta rendápe Betániape. Marta oikuaárõ guare Jesús ouha hína, pyaʼe porã oho ohug̃uaitĩ chupe. ¡Eñeimahinamíntena! Haʼéngo oñeñandu vaieterei hína kuri, ha péicha oho heʼi Jesúspe: “Che Ruvicha, reimérire koʼápe, che ermáno nomanomoʼãi kuri” (Juan 11:21). Upe riremínte, Jesús ohechárõ guare María ha umi ótro hasẽmba joa, haʼe hasẽ avei (elee Juan 11:32-36).

 6. ¿Mbaʼérepa Jesús hasẽ raʼe Lázaro omanórõ guare?

⁶ ¿Mbaʼérepa Jesús hasẽ raʼe upérõ? Pe lívro Perspicacia para comprender las Escrituras oñeʼẽ upévare, ha heʼi: “Jesús hasẽ vaʼekue pórke iñamigoite omano chugui, ha avei pórke ohecha María ha Marta oñembyasyetereiha”.c Jesús oiméne oñeimahina raʼe mbaʼeichaitépa ombosufri Lázarope imbaʼasy, ha mbaʼéichapa oiméne oñeñandu raʼe haʼe opillávo omanombotaitemaha. Katuete oiméne Jesús hasẽ raʼe avei ohechávo mbaʼeichaitépa oheja vai María ha Mártape la oiko vaʼekue. Oimérõ omanóma raʼe ndehegui peteĩ ne amigoite térã peteĩ ne hénte, katuete rentende hína María, Marta ha Jesúspe. Jahechamína mbohapy mbaʼe ikatúva ñaaprende ko oiko vaʼekuégui.

 7. ¿Mbaʼépa ikatu ñaaprende Jehovágui jaikuaávo Jesús hasẽ hague iñamígore?

⁷ Jehová ontende mbaʼéichapa reñeñandu. Jesús ningo ‘Jehová joguahaite’ (Heb. 1:3). Upévare Jesús hasẽrõ guare, ohechauka hína kuri mbaʼéichapa Jehová voi oñeñandu (Juan 14:9). Oimérõ omano raʼe ndehegui peteĩ rehayhúva ha reñeñandu vaieterei, nemanduʼákena Jehová oikuaaha hína la rehasáva ha nembyasyetereiha. Ha ndahaʼéi voi upévante, haʼe ojapose la ikatúva guive reime porã jey hag̃ua (Sal. 34:18; 147:3).

 8. ¿Mbaʼérepa ndajadudái Jesús omoingove jeytaha umi jahayhúva omano vaʼekuépe?

⁸ Jesús omopuʼãseterei jeýma umi nde rehayhúvape. Hasẽ mboyvemi, Jesús oasegura Mártape: “Ne ermáno opuʼã jeýta”. Ha Marta ndodudái ni michĩmi (Juan 11:23-27). Marta ningo oadora vaʼekue Jehovápe, upévare oiméne oikuaa raʼe Jehová omoingovéma hague la omanóvape, ojevalévo Elías ha Eliséore (1 Rey. 17:17-24; 2 Rey. 4:32-37). Ha katuete oikuaáne raʼe avei Jesús voi ojapóma hague upéicha (Luc. 7:11-15; 8:41, 42, 49-56). Nde avei ikatu reĩ segúro oikove jeytaha umi rehayhúva omano vaʼekue. Jesús ipyʼaite guive ombyasy vaʼekue iñamigokuérape, ha upévare hasẽ. Upéva ohechauka ñandéve haʼe ipyʼaite guive avei omopuʼãse jeymaha umi omano vaʼekuépe.

 9. Jesúicha avei, ¿mbaʼéichapa nde ikatu reipytyvõ umi oñembyasývape? Emombeʼu peteĩ ehémplo.

⁹ Nde ikatu reipytyvõ umi oñembyasývape. Jesús hasẽ vaʼekue Marta ha Maríandi, péro avei ohendu ha okonsola chupekuéra. Ha ñande ikatu avei jajapo upéicha. Peteĩ ansiáno oikóva Austráliape, hérava Dan, heʼi: “Omano rire che rembireko, aikotevẽterei kuri ótro chepytyvõ. Heta matrimónio naiprovlemaiete vaʼekue chepytyvõ hag̃ua. Ára ha pyhare añekomunika hendivekuéra. Che amombeʼu chupekuéra mbaʼéichapa añeñandu. Sapyʼánte cherasẽ voi chupekuéra, ha haʼekuéra naiprovlemaiete cherendu hag̃ua. Haʼekuéra ojapo avei heta mbaʼe cherehehápe che nameʼẽvéima jave. Por ehémplo, ojohéi chéve che áuto, oho ombaʼejogua che vése, ha ogueru chéve tembiʼu. Heta vése oñemboʼe avei chendive hikuái. Koʼã ermáno ha ermána ohechauka haʼeha ‘amígo verdadéro’, pórke oĩ che ykére ‘ahasa asy jave’” (Prov. 17:17).

10. ¿Mbaʼe mbaʼépa oñemombeʼu oiko hague Lucas 19:36-40-pe?

¹⁰ Áño 33-pe d.C., el 9 de Nisán, Jesús og̃uahẽ Jerusalénpe. Og̃uahẽvo ohóvo pe siudápe, hetaiterei hénte osẽ orresivi chupe, ha oipyso hikuái la ijao pe tapére. Péicha koʼã hénte ohechauka oipotaha Jesúspe irreirã. Upérõ ojevyʼaiterei kuri Jerusalénpe (elee Lucas 19:36-40). Péro upéi Jesús ojapo peteĩ mbaʼe idisipulokuéra nohaʼarõietéva. Haʼe omaña pe siudáre ha oñepyrũ hasẽ. Ha upépe, hesay hováre, oñepyrũ oprofetisa mbaʼépa oikopáta umi hénte oikóvagui Jerusalénpe (Luc. 19:41-44).

11. ¿Mbaʼérepa Jesús hasẽ raʼe umi Jerusalenguáre?

¹¹ ¿Mbaʼérepa Jesús oñeñandu vaiete raʼe? Pórke ojerresivi porãrõ jepe chupe haʼe oikuaa oĩtaha heta judío orrechasátava umi notísia porã haʼe omombeʼúva. Upéicha rupi, Jerusalén oñehundíta kuri, ha umi nomanóiva ojeguerahapaitéta esklávoramo (Luc. 21:20-24). Ñambyasýramo jepe, oiko Jesús heʼi hagueichaite, ha la majoría umi hénte orrechasa chupe. ¿Ha mbaʼetekópa pe nde reikoha ládo? ¿Nerendu porãpa la hénte reñeʼẽ jave chupe umi notísia porãre? Oiméro saʼi oĩ la nerendu porãva, ¿mbaʼépa ikatu nepytyvõ? Tuicha ikatu nepytyvõ pe rreláto omombeʼúva Jesús hasẽ hague hapicháre. Jahechamína mbohapy mbaʼe ñaaprendéva.

12. ¿Mbaʼépa ikatu ñaaprende Jehovágui jaikuaávo Jesús hasẽ hague hapichakuérare?

¹² Jehová ojepyʼapy la héntere. Jesús hasẽrõ guare ohechauka kuri mbaʼeichaitépa Jehová voi ojepyʼapy la héntere. Jehová ningo “ndoipotái avave oñehundi, síno oipota enterove oñarrepenti” (2 Ped. 3:9). ¿Mbaʼéichapa ñande avei ikatu jahechauka koʼág̃arupi jahayhuha ñande rapichakuérape? Ñañehaʼãmbaitévo ñamombeʼu chupekuéra umi notísia porã opoko hag̃uáicha ikorasõrekuéra (Mat. 22:39).

13, 14. ¿Mbaʼéichapa Jesús ohechauka vaʼekue ombyasyha hapichápe, ha mbaʼéichapa ñande avei ikatu jahechauka upéva?

¹³ Jesús iguápo vaʼekue predikasiónpe. Haʼe ohechauka vaʼekue ohayhuha umi héntepe pórke osegi opredika chupekuéra tahaʼe haʼehápe (Luc. 19:47, 48). Jesús ojapo vaʼekue upéicha pórke ombyasyeterei hapichápe. Sapyʼánte, haʼe ha idisipulokuéra ndaikatúi vaʼekue voi ni okaru, pórke hetaiterei oĩ vaʼekue la ohenduséva Jesúspe (Mar. 3:20). Ha oĩrõ pyharekuénte ikatúva ohendu Jesúspe, haʼe naiprovlemaiete vaʼekue oñemotiémpo hag̃ua upe órape (Juan 3:1, 2). Jesús opredika vaʼekue hetaiterei persónape, péro la majoría ndosegíri chupe. Upéicharõ jepe, haʼe enterovetévape oikuaauka umi notísia porã. Koʼág̃arupi avei, ñande ñameʼẽse la héntepe pe oportunida ohendúvo umi notísia porã (Hech. 10:42). Ha jajapo hag̃ua upéva jajadaptámante vaʼerã la héntere.

¹⁴ Ekambiákena tekotevẽhápe. Japredikáramo siémpre la mísma órape ijetuʼúta ñandéve jatopa hag̃ua umi ohenduséva pe notísia porã. Peteĩ prekursóra hérava Matilda heʼi: “Che ména ha che ropredika diferénte órape. Pyharevete ropredika umi negosiohárupi. Asajekue ropredika pe karríto reheve, pórke upe órape heta oĩ la okorréva pe kállere. Ha kaʼaruete ropredika umi ogahárupi, pórke upe órape hetave hénterema rotopa”. Ndovaléi ñandeserrádo peteĩ órarente, upéva rangue jajadapta vaʼerã ha jahecha mbaʼe órapepa ikatúta jatopa hetave héntere. Jajapóramo upéicha, Jehová katuete ñandeguerohorýta.

15. Según Lucas 22:39-44, ¿mbaʼépa oiko raʼe pe pyhare Jesús omano mboyve?

¹⁵ Pe 14 de Nisán del áño 33 d.C., Jesús oho pe Hardín de Getsemanípe. Upérõ pyharéma ha haʼe oho upépe oñemboʼe hag̃ua Jehovápe (elee Lucas 22:39-44). Upérõ Jesús oñeñandu vaieterei ha oñemboʼe Ñandejárape ipyʼaite guive, “hatã osapukái, hasẽ ha ojerure asy chupe umi mbaʼe oipotáva” (Heb. 5:7). ¿Mbaʼérepa Jesús oñemboʼe raʼe Jehovápe pe pyhare omano mboyve? Haʼe oñemboʼe Jehovápe imbarete hag̃ua, péicharõmante ikatúta ifiél chupe ha ojapo ivolunta. Jehová ohecha mbaʼeichaitépa Itaʼýra oñemboʼe chupe ha ojepyʼapy, upémarõ omondo hendápe peteĩ ánhel omombarete hag̃ua chupe.

16. ¿Mbaʼérepa Jesús ojepyʼapyete raʼe oñemboʼérõ guare pe Hardín de Getsemanípe?

¹⁶ Katueténgo Jesús hasẽne raʼe oñemboʼekuévo Jehovápe pe Hardín de Getsemanípe. ¿Péro mbaʼérepa la peichaite voi Jesús ojepyʼapy? Pórke haʼe oikuaa ojejuka hag̃ua chupe ojeʼetaha hese oñeʼẽ vaiha Jehová rérare. Avei haʼe oikuaa osegi vaʼerãha ifiél Jehovápe, péicharõmante ikatúta omopotĩ Itúa réra. ¿Ha nde? ¿Rehasápa hína peteĩ situasión ijetuʼúva tekotevẽhápe ehechauka ndefielha Jehovápe? Oimérõ upéicha, tuicha nepytyvõta pe rreláto omombeʼúva Jesús hasẽ hague Jehováre. Jahechamína mbaʼépa umi mbohapy mbaʼe ñaaprendéva.

17. ¿Mbaʼépa ñaaprende Jehovágui jaikuaávo orresponde hague Jesús ñemboʼe?

¹⁷ Jehová nerendu ejerure asy jave chupe la reipotáva. Jehová ohendu vaʼekue Jesúspe ojerure asýrõ guare chupe la oipotáva. ¿Mbaʼérepa? Pórke Jesúspe g̃uarã iñimportanteterei vaʼekue ifiél Jehovápe ha omopotĩ héra. Oimérõ nde avei eñehaʼãmbaite ndefiél hag̃ua Jehovápe ha emopotĩ hag̃ua héra, haʼe katuete orrespondéta ndéve ne ñemboʼe (Sal. 145:18, 19).

18. ¿Mbaʼérepa jaʼekuaa Jesús ontendeha umi mbaʼe jahasáva?

¹⁸ Jesús ontende mbaʼéichapa reñeñandu. Ñañeñandu vai jave, igústota jarekóramo peteĩ amígo ñanentendéva, koʼýte oimérõ ohasa avei la ñande jahasáva. Peichagua amígo hína Jesús. Haʼe oikuaa porã mbaʼépa heʼise la ñanekangy ha ñaikotevẽ ótro ñanepytyvõ. Jesús ningo oikuaa porã avei mbaʼe mbaʼépepa ñanekangy ha upévare katuete ñanepytyvõta “ñaikotevẽ jave” (Heb. 4:15, 16). Jesús oĩrõ guare pe Hardín de Getsemanípe oheja vaʼekue Jehovápe toipytyvõ chupe pe ánhel rupive, ha ñande upéicha vaʼerã avei. Jehová ikatu hína ojevale peteĩ ansiáno térã ótro ermánore ñanepytyvõ hag̃ua. Térã ikatu avei ñanepytyvõ peteĩ puvlikasión, peteĩ vidéo térã peteĩ diskúrso rupive.

19. ¿Mbaʼépa ikatu nemombarete? Emoĩ peteĩ ehémplo.

¹⁹ Jehová omeʼẽta ndéve pyʼaguapy. ¿Mbaʼéichapa Jehová ikatu nemombarete? Ñañemboʼe jave, Jehová omeʼẽ ñandéve pe “pyʼaguapy tuichavéva entéro mbaʼe yvyporakuéra ikatúvagui ontende” (Filip. 4:6, 7). Pe pyʼaguapy Jehová omeʼẽva ñandéve ñanepytyvõ ñaĩ hag̃ua trankílo ha avei ñapensa porã hag̃ua. Peteĩ ermána hérava Luz ohechakuaáma upéva siertoha, ha haʼe heʼi: “Chéngo siémpre añehaʼã ani hag̃ua añeñandu cheaño, sapyʼánte apensáma voi ni Jehová ndacherayhuiha. Péro añeñandu jave péicha, upepete añemboʼe Jehovápe ha amombeʼu chupe mbaʼéichapa añeñandu. Pe ñemboʼe tuicha chepytyvõ añeñandu porã jey hag̃ua”. Oiko haguéicha ko ermánare, ñande avei ikatu tuicha ñandepyʼaguapy ñañemboʼe rire Jehovápe.

20. ¿Mbaʼépa ñaaprende umi rreláto omombeʼúvagui Jesús hasẽ hague?

²⁰ Tuichaiterei ningo ñanepytyvõ ha ñanekonsola ñaanalisávo koʼã rreláto ohechaukáva Jesús hasẽ hague. Umíva ñanemomanduʼa iñimportantetereiha ñaipytyvõ ñane amigokuéra ihénte manóvape, ha avei Jehová ha Jesús ñanepytyvõtaha omano jave ñandehegui peteĩ jahayhúva. Jahechávo mbaʼeichaitépa Jehová ha Jesús ojepyʼapy umi héntere, ñanemomýi avei ñandéve jahayhu hag̃ua umi héntepe ha japredika hag̃ua chupekuéra. Avei tuichaiterei ñanepytyvõ jaikuaávo Jehová ha Jesús ontendeha umi mbaʼe ñañandúva ha jahasáva, upévare haʼekuéra ñanepytyvõseterei ñaaguanta hag̃ua. Ñañehaʼãmbaitékena jajapo koʼã mbaʼe ñaaprende vaʼekue, og̃uahẽ peve pe día Jehová ‘omokãmbaitetahápe ñande resay’ (Apoc. 21:4).