Oñepytyvõ “heta héntepe ojapo hag̃ua iporãva”

 1. ¿Mbaʼe ndaijojaháivapa ñaneraʼarõ hína pe Goviérno de 1.000 áño aja?

¡AJÉPA javyʼaitéta oiko vove pe rresurreksión ko yvy ape ári Jesús Goviérno de 1.000 áño aja! Katuete ningo oiméne jahechasetereíma umi ñane hénte térã ñane amígo omano vaʼekuépe. Ha Jehová ningo upeichaite avei oñeñandu (Job 14:15). Epensamína mbaʼeichaitépa ojevyʼáta ko yvy ape ári oiko vove upéva. Jahecha haguéicha pe artíkulo ohasa vaʼekuépe, “umi ihústova” orekóva herakuéra pe lívro de la vídape “orresusitáta oikove hag̃ua” (Hech. 24:15; Juan 5:29). Ikatu hína umi jahayhúva omano vaʼekue orresusita oikove hag̃ua oñepyrũvo pe rresurreksión ko yvy ape ári Armagedón riremi.b Avei ‘umi iñinhústova’ ndoguerekói vaʼekue pe oportunida oaprendévo Jehovágui térã oservi hag̃ua chupe fiélmente omano mboyve, “orresusitáta ojehusga hag̃ua”.

2, 3. a) Ohechaukaháicha Isaías 11:9, 10, ¿mbaʼépa hína pe traváho tuichaitéva ojejapótava oñeporomboʼe hag̃ua? b) ¿Mbaʼépa jahecháta ko artíkulope?

² Enterovete umi orresusitátava ningo oikotevẽta oñemboʼe chupekuéra (Is. 26:9; 61:11). Upévare tekotevẽta ojejapo pe traváho tuichaitéva ojejapótava oñemboʼe hag̃ua la héntepe (elee Isaías 11:9, 10). ¿Mbaʼérepa upéva? Pórke umi iñinhústo orresusitáva oikotevẽta oñemboʼe chupekuéra Jesucrístogui, pe Rréinogui, pe rreskátegui ha avei mbaʼérepa iñimportantete Jehová réra ha haʼe añoite orekoha derécho ogovernávo. Ha umi ihústova jepe tekotevẽta oñemboʼe chupekuéra mbaʼéichapa Jehová mbeguekatúpe okumpli kuri ipropósito ko yvýpe g̃uarã. Heta koʼã Jehová siérvo ifiélva ningo omano vaʼekue oñekompleta mboyve la Biblia. Tahaʼe umi ihústo térã iñinhústova oguerekóta heta mbaʼe oaprende vaʼerã.

³ Ko artíkulope ñarrespondéta koʼã porandu: “¿Mbaʼéichapa ojejapóta pe traváho tuichaitéva ojejapótava oñeporomboʼe hag̃ua? ¿Mbaʼérepa odependéta ojeskrivítapa umi persóna réra permanéntemente pe lívro de la vídape térã nahániri?”. La rrespuésta koʼã porandúpe iñimportanteterei ñandéve g̃uarã koʼág̃arupi. Jahechataháicha, algúna profesía oĩva pe lívro de Daniel ha Apocalípsispe ñanepytyvõta ñantende porãve hag̃ua mbaʼépa oikóta orresusita vove umi omano vaʼekue. Primeroite jahecháta umi profesía ndaijojaháiva oĩva Daniel 12:1, 2-pe.

4, 5. ¿Mbaʼépa omombeʼu ñandéve Daniel 12:1 umi mbaʼe oikótavagui pe ára pahápe?

⁴ (Elee Daniel 12:1). Pe lívro de Daniélpe jatopa umi mbaʼe ndaijojaháiva oikótava umi ára pahápe. Por ehémplo, Daniel 12:1 omombeʼu Miguel, haʼéva hína Jesucristo, ‘opuʼãtaha oñemboʼy oipytyvõ hag̃ua Ñandejára puévlope’. Ko profesía oñepyrũ kuri oñekumpli áño 1914-pe oñemoĩrõ guare Jesúspe rréiramo Ñandejára Rréinope.

⁵ Avei Daniélpe ojeʼe Jesús ‘opuʼãtaha oñemboʼy peteĩ tiémpo ojeiko asytahápe, núnka ndoikóiva péicha oexisti guive umi nasión’. Ko “tiémpo ojeiko asytahápe” haʼe hína pe “jehasa asy guasu” oñemensionáva Mateo 24:21-pe. Jesús ningo opuʼãta oñemboʼy odefende hag̃ua Ñandejára puévlope opakuévo pe tiémpo ojeiko asytahápe térã Armagedónpe. Lívro de Apocalípsispe oñehenói koʼãvape peteĩ aty guasu “osẽva pe jehasa asy guasúgui” (Apoc. 7:9, 14).

 6. ¿Mbaʼépa oikóta pe aty guasúgui ohasa rire pe jehasa asy guasu? Emyesakã. (Ehecha avei ko rrevístape pe artíkulo “Oñeporandúva jepi” oñeʼẽva pe rresurreksión oikótavare ko yvy ape ári).

⁶ (Elee Daniel 12:2). ¿Mbaʼépa oikóta pe aty guasúgui ohasa rire pe jehasa asy guasu? Ko profesía oĩva Daniélpe noñeʼẽi hína pe rresurreksión espirituál térã oĩ porã jeytaha Ñandejára renondépe isiervokuéra koʼã ára pahápe, péicha ñantende vaʼekue anteve.c Upéva rangue oñeʼẽ pe rresurreksión oikótavare ko yvy ape ári pe múndo pyahúpe. ¿Mbaʼérepa jaʼe upéva? Job 17:16-pe ojepuru pe ñeʼẽ ‘yvy’ ha upépe heʼise ‘Sepultúra’. Upéicharõ Daniel 12:2-pe oñeñeʼẽ pe rresurreksión oikótavare ko yvy ape ári ohasa rire umi ára paha ha pe Armagedón rire.

 7. a) ¿Mbaʼéichapa umi orresusitátava ohupytýta pe vída etérna? b) ¿Mbaʼérepa ko rresurreksión ‘iporãvéta’ umi ótra rresurreksión oiko vaʼekuégui anteve?

⁷ ¿Mbaʼépa heʼise Daniel 12:2-pe jatopáva, heʼívo oĩtaha orresusitáva “oikove hag̃ua pára siémpre”? Upéva heʼise umi orresusitátava osegi vaʼerãha oikuaa ha iñeʼẽrendu Jehová ha Jesúspe umi 1.000 áño aja oikove hag̃ua pára siémpre (Juan 17:3). Ko rresurreksión ningo ‘iporãvéta’ hína umi ótro rresurreksión oiko vaʼekuégui ko yvy ape ári (Heb. 11:35). ¿Mbaʼérepa jaʼe upéva? Pórke koʼã persóna iñimperféktova oikove jey vaʼekue, omano jey kuri.

 8. ¿Mávapa hína umi orresusitátava “oñemotĩ ha ojedespresia hag̃ua chupekuéra opa ára g̃uarã”?

⁸ Naentéroi umi orresusitátava oaseptáta pe enseñánsa oúva Jehovágui. Pe profesía oĩva Daniel 12:2-pe heʼi oĩtaha orresusitáva “oñemotĩ ha ojedespresia hag̃ua opa ára g̃uarã”. Koʼãva ningo haʼe umi ohechaukáva irreveldeha, ha upévare herakuéra ndojeskrivimoʼãi pe lívro de la vídape ha ndohupytymoʼãi pe vída etérna. Upévare “ojedespresiáta chupekuéra opa ára g̃uarã” térã oñehundietéta chupekuéra. Upéicharõ Daniel 12:2-pe oñeñeʼẽ pe rresultádo finál oguerekótavare entéro umi orresusitáva. Ha upéva odependéta umi mbaʼe ojapóvare hikuái orresusita rire (Apoc. 20:12).d Algúno ohupytýta pe vída etérna ha ótrope katu oñehundíta.

9, 10. ¿Mbaʼépa oikóta avei pe jehasa asy guasu rire, ha mávapa hína umi “omimbítava pe yvágaicha”?

⁹ (Elee Daniel 12:3). ¿Mbaʼépa oikóta avei pe “jehasa asy guasu” rire? Daniel 12:2 rire, pe versíkulo 3-pe oñeñeʼẽ avei umi mbaʼe oikótavare pe jehasa asy guasu rire.

¹⁰ ¿Mávapa hína umi “omimbítava pe yvágaicha”? Ñantende hag̃ua mávapa hína umíva, ikatu jahecha umi mbaʼe Jesús heʼi vaʼekue Mateo 13:43-pe: “Upe tiémpope umi ihústova kuarahýicha omimbíta Itúa Rréinope”. Jesús heʼírõ guare koʼã mbaʼe oñeʼẽ hína kuri pe “Rréino raʼykuérare”, térã umi unhidokuéra ogovernátavare hendive yvágape (Mat. 13:38). Upévare jaʼekuaa Daniel 12:3-pe oñeñeʼẽha umi unhídore ha umi traváho ojapótavare hikuái umi 1.000 áño aja.

11, 12. ¿Mbaʼépa ojapóta umi 144.000 umi 1.000 áño aja?

¹¹ ¿Mbaʼéichapa umi unhído ‘oipytyvõta heta héntepe ojapo hag̃ua iporãva’? Umi unhidokuéra ombaʼapo jejopýta Jesús ndive ikatu hag̃uáicha ojejapo pe traváho tuichaitéva oñeporomboʼe hag̃ua ko yvy ape ári umi 1.000 áño aja. Umi 144.000 ndahaʼéi ogovernátanteva rréicha, síno oservíta avei saserdóteramo (Apoc. 1:6; 5:10; 20:6). Upéicha haʼekuéra ikatúta oipytyvõ ‘omonguera hag̃ua umi tetãnguérape’, mbeguekatúpe ohupyty hag̃ua pe perfeksión (Apoc. 22:1, 2; Ezeq. 47:12). ¡Ajépa ombovyʼaitéta upéva umi unhidokuérape!

¹² ¿Máva mávapa hína umi ‘heta hénte’ oñepytyvõtava ojapo hag̃ua iporãva? Umíva hína umi orresusitátava, umi ohasáva pe jehasa asy guasu ha umi mitã onaséva pe múndo pyahúpe. Opa rire umi 1.000 áño, enterove oikóva ko yvy ape ári haʼétama perfékto. Upéicharõ, ¿arakaʼépa ojeskrivíta herakuéra pára siémpre pe lívro de la vídape ku ojeskrivirõguáicha tíntape ha ndahaʼéi lápipe?

13, 14. ¿Mbaʼépa tekotevẽta ohechauka enterove persóna perféktova ohupyty hag̃ua pe vída etérna?

¹³ Ñanemanduʼa vaʼerã peteĩ persóna iperfékto haguérente ndeʼiseiha orekótamava pe vída etérna. Ñapensamíntena Adán ha Évare. Haʼekuéra ningo perfékto vaʼekue, péro ohechauka vaʼerã kuri iñeʼẽrenduha Jehovápe oñemeʼẽ hag̃ua chupekuéra pe vída etérna. Ha ñambyasýramo jepe, haʼekuéra naiñeʼẽrendúi kuri Jehovápe (Rom. 5:12).

¹⁴ ¿Mbaʼe situasiónpepa oĩta la hénte ohasa rire umi 1.000 áño? Enterovéva haʼétama perfékto. ¿Enterovépa koʼã persóna perféktomava oapojáta Jehová goviérno, térãpa oĩta avei umi ojoguáva Adán ha Évape, naiñeʼẽrendúi vaʼekue Jehovápe iperféktoramo jepe? ¿Mbaʼéichapa oñekontestáta ko pregúnta?

15, 16. a) ¿Arakaʼépa umi persóna perféktova oguerekóta la oportunida ohechauka hag̃ua iñeʼẽrenduha Jehovápe? b) ¿Mbaʼépa oikóta opa rire pe pruéva finál?

¹⁵ Satanás oĩta préso umi 1.000 áño aja. Upe tiémpope avavépe ndaikatumoʼãi ombotavy. Péro ohasa rire umi 1.000 áño, Satanáspe ojepoi jeýta pe oĩhágui préso. Upe rire oprokurapaitéta ombotavy hag̃ua umi persóna perfektóvape. Enterove ningo oguerekóta la oportunida ohechauka hag̃ua iñeʼẽrendútapa Jehovápe ha oñemoĩtapa igoviérno poguýpe (Apoc. 20:7-10). Asegún mbaʼéichapa káda persóna ombohovái ko pruéva, ojehecháta ojeskrivítapa herakuéra pára siémpre pe lívro de la vídape.

¹⁶ Oĩta unos kuánto, ndajaikuaái mboýpa, péro oĩta unos kuánto ohechaukáva ojoguaha Adán ha Évape naiñeʼẽrendúivo Jehovápe ha orrechasávo igoviérno. ¿Ha mbaʼépa oikóta chuguikuéra? Apocalipsis 20:15 heʼi ñandéve: “Avei entéro umi noĩriva pe lívro de la vídape ojepoi pe lágo oĩháme tatarendy”. Koʼã rrevéldepe oñehundíta pára siémpre. Péro la majoría umi persóna perféktova ohasáta pe pruéva finál, ha herakuéra ojeskrivíta pára siémpre pe lívro de la vídape.

17. ¿Mbaʼépa pe ánhel heʼi raʼe Daniélpe oikotaha ñane tiémpope? (Daniel 12:4, 8-10).

¹⁷ ¡Ajépa ñanemopirĩmba ñapensávo umi mbaʼe oikótavare koʼẽrõite! Péro Daniélpe avei oñemombeʼu peteĩ ánhel rupive umi mbaʼe iñimportánteva oikótava ñane tiémpope, koʼã “ára pahápe” (elee Daniel 12:4, 8-10; 2 Tim. 3:1-5). Pe ánhel heʼi Daniélpe: “Umi enseñánsa verdadéra heta hetavéta”. Upéicharõ umi profesía oĩva pe lívro de Daniélpe ontende porãvéta ohóvo Ñandejára puévlo. Pe ánhel heʼive vaʼekue voi ko tiémpope ‘umi iñañáva osegitaha ojapo ivaíva ha ni peteĩ iñañáva nontendemoʼãiha koʼã mbaʼe’.

18. ¿Mbaʼépa koʼẽrõite oikóta umi hénte iñañávagui?

¹⁸ Koʼág̃a haʼetévaicha umi iñañávape osẽ porãva opa mbaʼe ojapo haguére umi mbaʼe vai (Mal. 3:14, 15). Péro koʼẽrõitéma Jesús ohusgáta ha oseparáta umi ojoguávape ovechápe umi kavarágui (Mat. 25:31-33). Umi iñañáva oñehundíta Armagedónpe ha ndorresusitamoʼãi pe múndo pyahúpe. Ha herakuéra ndaiporimoʼãi pe ‘lívro orekóvape umi hentekuéra réra’ oñemensionáva Malaquías 3:16-pe.

19. ¿Mbaʼépa jajapo vaʼerã koʼág̃a, ha mbaʼérepa? (Malaquías 3:16-18).

¹⁹ Koʼág̃a hína la tiémpo jahechauka hag̃ua umi mbaʼe jajapóvare ndajajoguaiha umi iñañávape (elee Malaquías 3:16-18). Jehová koʼág̃a ombyaty umi haʼe ohayhúvape ha ‘ojapo chuguikuéra peteĩ puévlo espesiál’. Katuete ningo ñande ñaimeseterei umíva apytépe.

20. ¿Mbaʼe promésapa oñemeʼẽ vaʼekue Daniélpe, ha mbaʼérepa nde ehaʼarõite avei oñekumpli upéva?

²⁰ Koʼág̃a ningo ñande jaiko peteĩ tiémpo ijojahaʼỹvape. Péro koʼẽrõitéma oikóta heta mbaʼe ñanesorprendevétava. Koʼẽrõitéma jahecháta mbaʼéichapa oñehundi entéro mbaʼe vai ñanembohasa asyetéva. Upe rire jahecháta mbaʼéichapa oñekumpli ko promésa Jehová ojapo vaʼekue Daniélpe: “Repuʼã jeýta rerresivi hag̃ua pe otokáva ndéve” (Dan. 12:13). ¿Ndépa reipotáma og̃uahẽ pe día Daniel ha umi persóna nde rehayhúva omano vaʼekue ‘opuʼã jey’ vove? Oiméramo upéicha, ejapókena opa ikatúva ndefiél hag̃ua Jehovápe, ha ikatu eime segúro nde réra osegitaha oĩ pe lívro de la vída Jehová oguerekóvape.