Ñañatendékena la Jesús omboʼe vaʼekuére

 1. ¿Mbaʼépa ojapóta koʼẽrõitéma Jesús?

KOʼẼRÕITÉMA oikóta heta kámbio tuicháva. Jesús ohusgáta káda persóna oikóvape ko yvy ape ári. Haʼe oikuaauka vaʼekue mbaʼéichapa oĩta ko múndo haʼe ohusga potaitépe. Upearã omeʼẽ vaʼekue idisipulokuérape peteĩ ‘señál ojepilla hag̃ua haʼe oĩmaha, ha pe fin ou potaitemaha’ (Mat. 24:3). Ko profesía jatopa Mateo kapítulo 24 ha 25-pe, avei Marcos kapítulo 13-pe ha Lucas kapítulo 21-pe.

 2. ¿Mbaʼépa ñaanalisáta ko artíkulope, ha mbaʼéichapa ñanepytyvõta upéva?

² Jesús omombeʼu vaʼekue mbohapy ehémplo ñanepytyvõtava jajeprepara porã hag̃ua, haʼe ñandeavisa porã vaʼekue mbaʼépa ikatu oiko. ¿Mbaʼe ehémplopa Jesús oipuru vaʼekue? 1) Pe oñeʼẽva ovecha ha kavaráre, 2) pe oñeʼẽva umi kuñataĩ iñarandúvare ha umi oñembotavývare, ha 3) pe ehémplo oñeʼẽva umi vosa henyhẽvare plátagui. Koʼãva ñanepytyvõ ñantende hag̃ua Jesús ohusgataha umi héntepe asegún la ojapóvare. Ko artíkulope ñaanalisáta koʼã ehémplo ha mbaʼépa ikatu ñaaprende káda únogui. Pe primer ehémplo jahechátava haʼe hína pe oñeʼẽva umi ovecha ha kavaráre.

UMI OVECHA HA KAVARA

 3. ¿Arakaʼépa Jesús oporohusgáta?

³ Jesús oñeʼẽrõ guare umi ovecha ha kavaráre heʼi vaʼekue ohusgataha umi héntepe asegún oaseptápa raʼe umi notísia porã, ha oapojápa raʼe iñermanokuéra unhídope (Mat. 25:​31-46). Pe “jehasa asy guasu” aja Jesús ohecháta umi hénte ojoguápa ovechápe térã kavarápe, upéva oikóta og̃uahẽ mboyvemi pe Armagedón (Mat. 24:21). Peteĩ pastór oseparaháicha umi ovecha umi kavarágui, péicha avei Jesús oseparáta umi héntepe. Omoĩta un ládo umi oapoja vaʼekuépe umi unhídope, ha ótro ládo umi ndoapojái vaʼekuépe chupekuéra.

 4. Ohechaukaháicha Isaías 11:​3, 4, ¿mbaʼérepa ikatu ñaĩ segúro Jesús ihustotaha oporohusga vove? (Ehecha pe taʼanga).

⁴ La Biblia ohechauka Jehová onombraha Hués Jesúspe, ha haʼe oporohusga vove siémpre ojapóta hustísia (elee Isaías 11:​3, 4). Jesús ojesareko porã umi hénte ojapóvare, opensáva ha heʼívare. Avei oñatende porã mbaʼéichapa otrata hikuái umi unhídope (Mat. 12:​36, 37; 25:40). Upévare Jesús oikuaáta mávapa oapoja iñermanokuéra unhídope ha mávapa oipytyvõ chupekuéra pe traváho ojapóvape hikuái.a ¿Mbaʼépa pe iñimportantevéva ikatúva ojapo peteĩ persóna oapoja hag̃ua Cristo ermanokuérape? Oipytyvõ vaʼerã chupekuéra ojepredika hag̃ua opárupi. ¿Mbaʼépa ikatúta ohupyty hikuái oapoja haguére umi unhídope? Jesús oporohusga vove heʼíta hesekuéra ‘ihustoha’, ha orekóta hikuái la oportunida ‘oikovévo pára siémpre’ ko yvy ape ári (Mat. 25:46; Apoc. 7:​16, 17). ¡Ajépa iporãite la ohaʼarõva umi osegívape ifiél! Haʼekuéra osegíramo péicha pe jehasa asy guasu aja ha upe rire avei, herakuéra osegíta oĩ “pe lívro de la vídape” (Apoc. 20:15).

 5. ¿Mbaʼépa ñanemboʼe pe ehémplo oñeʼẽva umi ovecha ha kavaráre, ha mbaʼéichapa ideprovécho ñandéve?

⁵ Jahechaukákena jajerovia ha ñandefielha. Pe ehémplo oñeʼẽva umi ovecha ha kavaráre, prinsipálmente haʼe hína umi oikótavape g̃uarã ko yvy ape ári. Haʼekuéra ohechauka ojeroviaha oipytyvõvo Cristo ermanokuérape ojepredika hag̃ua opárupi, ha avei ohechauka ojeroviaha hikuái osegívo fiélmente pe gía omeʼẽva chupekuéra pe esklávo de konfiánsa ha iñarandúva (Mat. 24:45). Umi ohótava yvágape avei tekotevẽ oñatende porã ko ehémplore. ¿Mbaʼérepa? Pórke Jesús ojesareko avei haʼekuéra ojapóvare, opensáva ha heʼívare, ha upévare haʼekuéra ohechauka vaʼerã ifielha. Jesús omombeʼu vaʼekue mokõi ehémplo prinsipálmente haʼéva umi unhídope g̃uarã. Upévare haʼekuéra oñatende vaʼerã umívare. Umi ehémplo jatopa avei Mateo kapítulo 25-pe. Jahechami raẽna pe oñeʼẽva umi kuñataĩ iñarandúvare ha umi oñembotavývare.

UMI KUÑATAĨ IÑARANDÚVA HA UMI OÑEMBOTAVÝVA

 6. ¿Mbaʼéichapa umi 5 kuñataĩ ohechauka vaʼekue iñaranduha? (Mateo 25:​6-10).

⁶ Jesús oñeʼẽ vaʼekue 10 kuñataĩ osẽvare ohug̃uaitĩ pe nóvio omendátavape (Mat. 25:​1-4). Enterove koʼã kuñataĩ omoirũse kuri pe nóviope pe kasamientohápe. Jesús heʼi vaʼekue koʼãva apytégui 5 iñaranduha ha umi ótra 5 oñembotavyha. Umi kuñataĩ iñarandúva ojeprepara ha oñatende porã vaʼekue. Haʼekuéra oĩ vaʼekue ohaʼarõ hag̃uáicha pe nóviope og̃uahẽramo jepe tárdema pyhare. Upearã ogueraha vaʼekue ilámpara ohesape hag̃ua pytũmbýpe ha orahave hikuái aséite peteĩ mbaʼyrúpe. Péicha ilamparakuéra ndoguemoʼãi pe nóvio nog̃uahẽirõ ensegída (elee Mateo 25:​6-10). Upéi pe nóvio og̃uahẽrõ guare, umi kuñataĩ iñarandúva oike hendive pe kasamientohápe. Péicha avei umi kristiáno unhído ojeprepara porãva ha osegíva ifiél ou peve Cristo, orresivíta iprémio omoirũvo Jesúspe Irréinope yvagapeguápe (Apoc. 7:​1-3).b ¿Ha mbaʼépa oiko umi 5 kuñataĩ oñembotavy vaʼekuégui?

 7. ¿Mbaʼépa oiko umi ótro 5 kuñataĩgui, ha mbaʼérepa?

⁷ Umi kuñataĩ oñembotavýva ndojoguaiete umi iñarandúvape, haʼekuéra noĩri vaʼekue preparáda pe nóvio og̃uahẽrõ guare. Umi ilámpara ogue potaitéma kuri ha haʼekuéra ndoguerahái aséite. Umi kuñataĩ oñembotavýva oikuaárõ guare pe nóvio og̃uahẽ potaitéma hague ohómante ojogua aséite, péro oho aja hikuái pe nóvio og̃uahẽ. Upérõ “umi kuñataĩ ojeprepara vaʼekue oike hendive pe kasamientohápe, ha pe okẽ oñemboty” (Mat. 25:10). Upéi umi kuñataĩ oñembotavýva oikesemoʼã pe kasamientohápe, péro pe nóvio heʼi chupekuéra: “Che ndapoikuaái” (Mat. 25:​11, 12). Umi kuñataĩ ndojepreparái ohaʼarõ hag̃ua pe nóviope haʼe og̃uahẽ meve. ¿Mbaʼépa ikatu oaprende ko ehémplogui umi kristiáno unhído?

8, 9. ¿Mbaʼépa ikatu oaprende umi unhído pe ehémplo oñeʼẽvagui umi kuñataĩre? (Ehecha pe taʼanga).

⁸ Jahechaukákena jajeprepara porãha. Jesús ndoprofetisái vaʼekue oĩtaha mokõi grúpo de unhído. Haʼe ndeʼiséi vaʼekue peteĩ grúpo ojeprepara porãtaha og̃uahẽ meve pe fin ha pe ótro nahániri. Upéva rangue Jesús ohechaukasénte vaʼekue la ikatúva oiko umi unhído ndojepreparaporãirõ ifiél hag̃ua ipahaite peve. Haʼekuéra ndojepreparaporãirõ ndorresivimoʼãi iprémio (Juan 14:​3, 4). ¡Upéva ndahaʼéi vyrorei! Upévare tahaʼe jareko la esperánsa jahávo yvágape térã jaikóvo ko yvy ape ári, enterovéva ñanemanduʼa meme vaʼerã ko ehémplore. Káda uno jasegi vaʼerã ñañatende porã ha jajeprepara ikatu hag̃uáicha ñaaguanta ipahaite peve (Mat. 24:13).

⁹ Jesús omoĩ vaʼekue pe ehémplo oñeʼẽva umi kuñataĩre ohechauka hag̃ua iñimportantetereiha siémpre ñaĩ preparádo. Upe rire haʼe omombeʼu ótro ehémplo oñeʼẽva vosa henyhẽvare plátagui. Upe ehémplo ohechauka iñimportantetereiha ñandeguápo.

VOSA HENYHẼVA PLÁTAGUI

10. ¿Mbaʼéichapa mokõi esklávo ohechauka vaʼekue ikatuha oñekonfia hesekuéra? (Mateo 25:​19-23).

¹⁰ Pe ótro ehémplope Jesús oñeʼẽ vaʼekue mbohapy esklávore. Umívagui mokõi ohechauka vaʼekue ipatrónpe ikatuha okonfia hesekuéra, péro peteĩva nahániri (Mat. 25:​14-18). Umi mokõi ohechauka vaʼekue haʼeha esklávo de konfiánsa pórke iguápo ha omombaʼapo ipatrón pláta. Pe patrón oviaháta kuri ótro paíspe, péro oho mboyve oheja káda esklávope heta pláta vosápe. Umi mokõi esklávo iguápo ha oipuru porã kuri pe pláta, upéicha rupi ipatrón ou jeýrõ guare haʼekuéra orekóma kuri el dóvle pe pláta haʼe omeʼẽ vaʼekuégui chupekuéra. Pe patrón oguerohory umi mokõi esklávope ha heʼi chupekuéra ‘ovyʼa hag̃ua hendive’ (elee Mateo 25:​19-23). ¿Péro mbaʼépa oiko pe ótro esklávogui? ¿Mbaʼépa ojapo raʼe pe pláta omeʼẽ vaʼekuégui chupe ipatrón?

11. ¿Mbaʼépa oiko pe esklávo ‘iñateʼỹvagui’, ha mbaʼérepa?

¹¹ Pe ótro esklávope oñemeʼẽ vaʼekue peteĩ vosa henyhẽva plátagui, péro haʼe ‘iñateʼỹ’. Ipatrón oipota kuri haʼe oipuru porã pe pláta, péro upéva rangue haʼe oho oñotỹ pe vosa henyhẽva plátagui. Upévare ipatrón ou jeýrõ guare, ko esklávo omeʼẽ jey chupe la orresivi vaʼekuénte. Hiʼarive ko esklávo heʼi ipatrónpe haʼe ‘ojopyetereiha hapichándi’, ojediskulpa rangue hendive nomombaʼapói haguére ipláta. Upévare pe patrón ndoguerohorýi ko esklávope, ha ndahaʼéi upévante, ojepeʼa ko esklávogui la oñemeʼẽ vaʼekue chupe ha oñemosẽ pe patrón rógagui (Mat. 25:​24, 26-30).

12. ¿Mávapepa orrepresenta umi mokõi esklávo de konfiánsa?

¹² Umi mokõi esklávo de konfiánsa orrepresenta umi kristiáno unhído ifiélvape. Pe patrón haʼéva Jesús heʼi chupekuéra ‘pevyʼa chendive’. Koʼãvape oñepremia yvágape ha oĩ hikuái “umi primeroite oikove jeýva” apytépe (Mat. 25:​21, 23; Apoc. 20:5a). Péro pe ehémplo vai omoĩva pe esklávo ‘iñateʼỹva’ omboʼe álgo iñimportantetereíva umi unhídope ¿Mbaʼépa hína upéva?

13, 14. ¿Mbaʼépa ikatu oaprende umi unhído pe ehémplo oñeʼẽvagui umi vosa henyhẽvare plátagui? (Ehecha pe taʼanga).

¹³ Jahechaukákena ñandeguapoha. Jesús oñeʼẽrõ guare umi vosa henyhẽvare plátagui ndeʼiséi vaʼekue umi unhído oúta hague iñateʼỹ. Upéva rangue haʼe ohechaukasénte mbaʼépa oikóta upeichahágui haʼekuéra naikyreʼỹvéirõ. Oiko sapyʼárõ upéva, haʼekuéra noĩmoʼãvéima “umi persóna Ñandejára ohenói ha oiporavo vaʼekue apytépe”, ha noñepermitimoʼãi chupekuéra oike pe Rréino yvagapeguápe (2 Ped. 1:10).

¹⁴ Jesús oñeʼẽrõ guare umi kuñataĩre ha umi vosa henyhẽvare plátagui, ohechauka porã entéro umi unhído tekotevẽha ojeprepara porã ha iguápo. ¿Péro heʼípa rakaʼe Jesús ótra kósa ideprovéchotava umi unhídope? Si, upéva jatopa Mateo 24:​40, 41-pe.

¿MÁVAPEPA “ÑANDEJÁRA OASEPTÁTA”?

15, 16. Ohechaukaháicha Mateo 24:​40, 41, ¿mbaʼérepa umi kristiáno unhído tekotevẽterei osegi oñatende porã?

¹⁵ Jesús oñeʼẽ mboyve umi ehémplore, haʼe heʼi mbaʼéichapa ojehusgáta ipahaite umi unhídope ojehecha hag̃ua mávapepa ojeasepta. Jesús oñeʼẽ mokõi kuimbaʼe ombaʼapóvare kokuépe ha avei mokõi kuña omolinávare. Koʼã kásope haʼete umi kuimbaʼe ojapóva elmímo traváho ha umi kuña upéichante avei. Péro Jesús heʼi ‘peteĩvape Ñandejára oaseptataha ha pe ótrope oheja reitaha’ (elee Mateo 24:​40, 41). Upémarõ heʼi idisipulokuérape: “Peñatende porãke siémpre, pórke ndapeikuaái hína mbaʼe díapa oúta pende Ruvicha” (Mat. 24:42). Jesús heʼi upéicha lénto avei oñeʼẽmba rire umi 10 kuñataĩre (Mat. 25:13). ¿Oñeñeʼẽpa upéicharõ la mísma kósare? Haʼetévaicha la upéicha. Ñandejára sólamente oaseptáta umi kristiáno unhído añetehápe ojeporavo vaʼekuépe ha ifiélvape. Haʼekuéra añoite ikatúta omoirũ Jesúspe pe Rréino yvagapeguápe (Juan 14:3).

¹⁶ Jahechaukákena ñañatende porãha. Oimeraẽ kristiáno unhído ndosegíriva oñatende porã, ndaikatumoʼãi oĩ umi ojeporavo vaʼekue apytépe oñembyaty vove chupekuéra (Mat. 24:31). Avei umi oikótava ko yvy ape ári pára siémpre, oreko vaʼerã enkuénta la Jesús heʼi vaʼekue ikatu hag̃uáicha oñatende porã ha osegi ifiél.

17. ¿Mbaʼérepa ndajajepyʼapýi vaʼerã Jehová odesidírõ oiporavo umi unhído pyahúpe ko ñane tiémpope?

¹⁷ Jaikuaa porãgui Jehovápe ñaĩ segúro entéro mbaʼe haʼe ojapóva oĩ porãha. Upévare ndajaikomoʼãi jajepyʼapy oimérõ Jehová odesidi oiporavo umi unhído pyahúpe ko ñane tiémpope.c Ikatu ñanemanduʼa pe ehémplo Jesús oipuru vaʼekuére oñeʼẽva umi oñepyrũvare ombaʼapo la 5 rupi pe parraltýpe (Mat. 20:​1-16). Upe ehémplope oñemombeʼu oĩ hague oñepyrũva ombaʼapo tárdema pe parraltýpe. Avei oĩ umi oñepyrũva ombaʼapo voi guive, péro enterovévape ojepaga vaʼekue elmimoite. Upéicha avei koʼág̃a, noimportái arakaʼépa ojeporavo umi unhídope, enterovéva orresivíta iprémio yvágape ojeʼérõ hesekuéra ifielha.

ÑAÑATENDÉKENA JESÚS OMBOʼE VAʼEKUÉRE

18, 19. ¿Mbaʼe mbaʼépa ñaaprende umi ehémplo jahecha vaʼekuégui?

¹⁸ ¿Mbaʼe mbaʼépa ñaaprendéma ko artíkulope? Pe ehémplo oñeʼẽva umi ovecha ha kavaráre omboʼe álgo iñimportánteva umi oikótavape pára siémpre ko yvy ape ári. Ohechauka chupekuéra tekotevẽtereiha osegi ojerovia ha ifiél Jehovápe koʼág̃ama voi, ha avei pe jehasa asy guasu og̃uahẽ mbotaitévape. Upe tiémpope Jesús ohusgáta umi ifiélvape ikatu hag̃uáicha ‘oikove pára siémpre’ (Mat. 25:46).

¹⁹ Avei jahecha mokõi ehémplo umi unhído tekotevẽvare oñatende porã. Jesús oñeʼẽrõ guare umi 10 kuñataĩre jahecha 5 oñembotavy hague péro umi ótra 5 ohechauka vaʼekue iñaranduha. Haʼekuéra ojeprepara porã vaʼekue ohaʼarõ hag̃ua pe nóviope haʼe og̃uahẽ meve. Umi kuñataĩ oñembotavýva katu ndojepreparái, upéicha rupi pe nóvio ndohejái haʼekuéra oike pe kasamientohápe. Ñande avei ñaĩ vaʼerã ñahaʼarõ hag̃uáicha la tekotevẽva guive, Jesús ohundi peve ko múndo aña. Avei Jesús oñeʼẽ vaʼekue umi vosa henyhẽvare plátagui, ha jahecha oĩ hague mokõi esklávo de konfiánsa ohechauka vaʼekue iguapoha. Haʼekuéra ombaʼapo jejopy ipatrónpe g̃uarã ha haʼe oguerohory chupekuéra. Péro pe esklávo iñateʼỹvape oñemboyke vaʼekue. ¿Mbaʼépa upéva ñanemboʼe? Jasegi vaʼerã ñambaʼapo jejopy Jehová servísiope og̃uahẽ meve pe fin. Ipahaitépe jahecha umi unhído tekotevẽha osegi oñatende porã ikatu hag̃uáicha ‘Ñandejára oasepta’ chupekuéra ha orresivi iprémio Jesucristo ndive yvágape. Haʼekuéra oipotaitereíma oñembyatypa chupekuéra yvágape Jesús ndive. Pe Armagedón rire umi unhído oñepresentáta peteĩ nóviaicha Jesúspe g̃uarã “pe Ovecha Raʼy kasamientorã” (2 Tes. 2:1; Apoc. 19:9).

20. ¿Mbaʼépa Jehová ojapóta ñanderehehápe ñañatendérõ Jesús omboʼe vaʼekuére?

²⁰ Pe tiémpo Jesús oporohusga hag̃ua hiʼag̃uimbaitéma ohóvo, péro natekotevẽi jakyhyje. Jasegíramo ñandefiél, ñande Ru yvagapegua omeʼẽta ñandéve “pe podér umi ótra hénte ndorekóiva” ikatu hag̃uáicha ñaime “pe Yvypóra Raʼy renondépe” (2 Cor. 4:7; Luc. 21:36). Tahaʼe jarekóramo esperánsa jaikóvo yvágape térã ko yvy ape ári tuicha ñambovyʼáta Jehovápe ñañatendérõ la Jesús ñanemboʼe vaʼekuére umi ehémplo rupive. Jehová imbaʼeporãiterei rupi, ñande réra oĩta ‘pe lívro de la vídape’ (Dan. 12:1; Apoc. 3:5).