Ñanemanduʼákena Jehová ha Itaʼýrare

¿MBAʼÉICHAPA reñeñandúne peteĩ persóna omeʼẽrõ ndéve peteĩ rregálo iporãitereíva?... ¿Erétapa grásia ha upéi nderesaráitama chugui? ¿Térãpa nemanduʼáta pe tapicháre?...

Jehová ningo omeʼẽ vaʼekue ñandéve peteĩ rregálo iporãitereíva. Ombou itaʼýra ko yvy ape ári omano hag̃ua ñanderehehápe. ¿Ndépa reikuaa mbaʼérepa tekotevẽ vaʼekue Jesús omano opavave rehehápe?... Ko mbaʼe ningo iñimportanteterei ñantende porã.

Ñaaprende haguéicha kapítulo 23-pe, Adán ndojapói kuri Ñandejára heʼíva ha upévare oiko chugui pekadór. Adán ningo ñande túva ypykue ha ombohasa ñanderehe pe pekádo. Upévare ¿mbaʼépa nde ere ñaikotevẽha?... Ñaikotevẽ peteĩ túva pyahu, peteĩ kuimbaʼe perfékto oikóva ko yvy ape ári. ¿Mávapa ndéverõ g̃uarã upéva?... Jesús.

Jehová ombou vaʼekue Jesúspe Adán rekovia, oiko hag̃ua chugui ñande túva. La Biblia heʼi: “‘Pe kuimbaʼe ypykue Adán, haʼe vaʼekue peteĩ yvypóra oikovéva.’ Pe último Adán katu haʼe peteĩ espíritu oporomoingovéva”. ¿Mávapa raʼe pe kuimbaʼe ypykue?... Adán. Ñandejára ojapo vaʼekue chupe yvýgui. ¿Ha mávapa pe último Adán?... Jesús. La Biblia ningo heʼi voi: “Pe primer kuimbaʼe [Adán] ou yvýgui ha ojejapo yvýgui, pe segundo kuimbaʼe [Jesús] katu ou yvágagui” (1 Corintios 15:45, 47; Génesis 2:7).

Ñandejára oguerova itaʼýra rekove María retepýpe. Upévare Jesús ndahaʼéi vaʼekue pekadór, síno peteĩ kuimbaʼe perfékto (Lucas 1:30-35). Upéicha rupi peteĩ ánhel heʼi vaʼekue umi ovecharerekuápe: ‘Koestedía onase upe pendesalvátava’ (Lucas 2:11). Péro pe mitã ñandesalva hag̃ua, ¿mbaʼépa oiko raẽ vaʼerã?... Okakuaapa vaʼerã. Upéicharõmante ikatúta oiko chugui pe ‘segundo Adán’.

La Biblia heʼi avei Jesús haʼeha ñande “Túva opa ára g̃uarã” (Isaías 9:6, 7, NM). Jesús ningo peteĩ kuimbaʼe perfékto vaʼekue, ha upévare ikatu oiko chugui ñande túva, Adán rekovia. Upéicharõ, opavave ikatu hína jaiporavo pe “segundo kuimbaʼe”, térã Jesúspe ñande tuvarã. Jaikuaaháicha, Jesús oreko avei Itúva, haʼéva hína Ñandejára Jehová.

Jaikuaavévo jahávo Jesúspe, jaheja oiko chugui ñande salvadór. ¿Nemanduʼápa mbaʼéguipa ñandesalva vaʼerã?... Ñandepeʼa vaʼerã pekádo ha ñemano poguýgui, ñanderupyty vaʼekue Adán káusare. Jesús omeʼẽ hekove perfékto ñanderehehápe ha upéicha ñandesalva. Jehová voi ombou Itaʼýrape ko yvy ape ári ikatu hag̃uáicha oñeperdona ñande pekadokuéra (Mateo 20:28; Romanos 5:8; 6:23).

Ñamombaʼeterei pe ojapo vaʼekue Ñandejára ha Itaʼýra ha arakaʼeve nañanderesaraimoʼãi upévagui, ¿ajépa?... Jesús ohechauka vaʼekue idisipulokuérape mbaʼéichapa ojegueromanduʼa vaʼerã haʼe ojapo vaʼekue. Jahechamína upéva.

Epensamína peteĩ pyharépe reimeha hína Jerusalénpe peteĩ óga dos pisohápe. Upépe Jesús ha ijapostolkuéra oguapy hína osena hag̃ua, oreko hikuái ovecha asádo, pan ha víno tínto. Ko séna ojapóva hikuái idiferénte ha iñimportánte. ¿Reikuaápa mbaʼérepa?...

Ko séna omomanduʼa chupekuéra la ojapo vaʼekue Jehová umi isrraelíta rehehápe, oĩrõ guare hikuái esklávoramo Egíptope. Upérõ Jehová heʼi chupekuéra: ‘Káda família pejuka vaʼerã peteĩ ovecharaʼy ha huguykue pemoĩ vaʼerã pende róga rokẽ márkore’. Heʼi avei chupekuéra: ‘Upéi peike pende rógape ha peʼu pe ovecha roʼokue’.

Umi isrraelíta ojapo vaʼekue upeichaite. Ha upe pyharépe oho peteĩ ánhel Egíptope ha ojuka umi mitã ypykuépe. Péro ohecháramo oñemoĩ hague tuguy pe okẽ márkore, ohasánte ha ndojukái avavépe. Faraón, pe rréi Egiptogua, oñemondýi ha opyta okyhyje ohechávo Jehová ánhel ojapo vaʼekue, upévare heʼi umi isrraelítape: ‘Tapeho koʼágui. ¡Pesẽ ore retãgui!’. Upémarõ umi isrraelíta ohupi ikosakuéra ikaméllo ha ivurrokuéra ári ha oho.

Jehová ndoipotái vaʼekue ipuévlo hesarái mbaʼéichapa oguenohẽ chupekuéra Egíptogui. Upévare heʼi umi isrraelítape: ‘Una ves káda áño pejapo vaʼerã peteĩ séna koichagua’. Pe séna iñimportantetévape ohenói hikuái Páskua, kóva omomanduʼáta chupekuéra Jehová ánhel “ohasánte hague” ohechávo pe tuguy umi okẽ márkore (Éxodo 12:1-13, 24-27, 31, NM).

Jesús ha ijapostolkuéra ogueromanduʼa vaʼekue ko mbaʼe ojapórõ guare pe Páskua. Osenamba rire hikuái, Jesús ojapo peteĩ mbaʼe iñimportantetereíva. Péro upe mboyve oho upégui Judas, pe apóstol otraisiona vaʼekue Jesúspe. Upémarõ pe Mboʼehára Guasu ojagarra peteĩ pan hembýva, ha oñemboʼe rire ombojaʼo ha omeʼẽ idisipulokuérape ha heʼi: “Kóina peʼu”. Upéi heʼive chupekuéra: “Kóva orrepresenta che rete, oñemeʼẽva penderehehápe”.

Upe rire ojagarra pe víno tínto, oñemboʼe jey, ombohasa chupekuéra ha heʼi: “Kóina peʼu enterovete”. Upéi katu heʼive: ‘Ko víno orrepresenta che ruguy, oñeñohẽtava oñeperdona hag̃ua pende pekádo. Pesegíkena pejapo péicha, penemanduʼa hag̃ua cherehe’ (Mateo 26:26-28; 1 Corintios 11:23-26).

¿Rehechakuaápa Jesús heʼi hague idisipulokuéra osegi vaʼerãha ojapo upéva?... Upe guive ojejapo rangue pe Páskua, ojejapo vaʼerã káda áño pe séna Jesús ojapo haguéicha. Kóvape ojeʼe Séna del Señór. Ñahenói jepi avei Konmemorasión, ¿reikuaápa mbaʼérepa?... Konmemorasión heʼise jagueromanduʼaha peteĩ mbaʼe, ha upépe ningo ñanemanduʼa Jesús ha Itúva ojapo vaʼekuére ñanderehehápe.

Pe pan orrepresenta hína Jesús rete, haʼe ñanderayhúgui omano vaʼekue jahupyty hag̃ua jeikove opaʼỹva. ¿Ha pe víno tínto?... Pe víno katu ñanemomanduʼa vaʼerã mbaʼépa jahupyty Jesús oñohẽ haguére huguy ñanderehehápe. Jesús ruguy iñimportanteve pe ovecha ruguýgui umi isrraelíta omoĩ vaʼekue hokẽ márkore. ¿Reikuaápa mbaʼérepa?... La Biblia heʼi Jesús omano hague oñeperdona hag̃ua ñande pekádo. Ág̃a ojepeʼaite vove pe pekádo ndaiporimoʼãvéima hasýva, itujáva ha omanóva. Ñanemanduʼa vaʼerã koʼã mbaʼére ñaime jave Konmemorasiónpe.

¿Hoʼu vaʼerãpa pe pan ha víno opavave ohóva Konmemorasiónpe?... Jesús heʼi umi hoʼúvape pe pan ha víno: ‘Peẽ peiméta che rréinope ha peguapýta umi trónope chendive yvágape’ (Lucas 22:19, 20, 30). Ko mbaʼe ohechauka haʼekuéra ohotaha yvágape ogoverna hag̃ua Jesús ndive. Upévare umi ohótava yvágape añónte hoʼu vaʼerã pe pan ha víno.

Péro umi ndoʼúiva pe pan ha víno lomímonte oho vaʼerã Konmemorasiónpe. ¿Reikuaápa mbaʼérepa?... Jesús omano rupi opavave rehehápe. Upévare, jaha jave Konmemorasiónpe jahechauka ñanemanduʼaha Jesús ojapo vaʼekuére. Ha avei jahechauka ñamombaʼeha pe rregálo porãite omeʼẽva Ñandejára.