Jehová oikuaauka hembipota

1, 2. ¿Mbaʼéichapa Jehová oikuaauka hembipota yvyporakuérape g̃uarã?

UMI túva imbaʼeporãva oñemongeta ifamíliandi odesidi mboyve peteĩ mbaʼe. Péro haʼekuéra oñatende porã mbaʼépa heʼíta chupekuéra. Omombeʼu ifamíliape umi mbaʼe ikatútava ontende añoiténte. Ni mbaʼevéicharõ umi michĩvape ndeʼimoʼãi umi kakuaánte oikuaa vaʼerã.

² Upéicha avei, Jehová mbeguekatúpente oikuaauka hembipota yvyporakuérape g̃uarã. Ha ojapo upéva ohecha vove og̃uahẽmaha pe tiémpo oikuaa hag̃ua hikuái. Koʼág̃a jahechamíta mbaʼéichapa ymaite guive oipytyvõ ipuévlope oikuaa hag̃ua mbaʼépa Irréino.

3, 4. ¿Odesidímapa rakaʼe Jehová mbaʼépa ojapóta yvyporakuéra? Emyesakã.

³ Ñandejára ojapórõ guare yvyporakuérape nopensái vaʼekue omoĩvo pe Rréino. Jahechami mbaʼérepa. Jehová ningo ndodesidíri vaʼekue mbaʼépa ojapóta yvyporakuéra. Haʼe oheja káda únope odesidi la ojapótava. Jehová omombeʼu Adán ha Évape mbaʼépa hembipota heʼívo: ‘Pende raʼýkena taheta, taisarambi yvy tuichakuére ha toguereko ipoguýpe ko yvy’ (Gén. 1:28). Jehová omanda chupekuéra iñeʼẽrendu vaʼerãha opa mbaʼépe (Gén. 2:16, 17). Adán ha Eva ikatu kuri odesidi iñeʼẽrendu Jehovápe. Haʼekuéra ha ifamiliakuéra ojapórire upéicha, natekotevẽmoʼãi kuri oñemoĩ peteĩ Rréino oñekumpli hag̃ua Ñandejára rembipota. Ko yvýpe henyhẽ vaʼerãmoʼã yvypóra perfékto ha oadoráva Jehovápe.

⁴ Ndoikóiramo jepe upéva pórke Satanás, Adán ha Eva opuʼã hese, Jehová ndohejareíri hembipota. Upéva rangue okambiánte la ojapóta vaʼekue oiko hag̃ua haʼe oipotáva. Jehová rembipota ikatu ñakompara peteĩ persónare oviaháva ikóchepe peteĩ tapérupi. Otópavo oñembotyha chugui upe tape, haʼe ndopytái upépe, ohekánte ótro tape oho hag̃ua. Añetehápe, Jehová heʼi jepéma guive ojapotaha peteĩ mbaʼe, ndaipóri ko univérsope ikatu vaʼerã ojoko chupe (Éxo. 3:14, 15; elee Isaías 55:11). a Ha ohecha vove opyta porãha, omombeʼu isiervokuéra iñeʼẽrendúvape mbaʼe ipyahúvapa ojapóta okumpli hag̃ua hembipota.

 5. ¿Mbaʼépa ojapo Jehová osolusiona hag̃ua pe mbaʼe vai oiko vaʼekue Edénpe?

⁵ Osolusiona hag̃ua pe mbaʼe vai oiko vaʼekue Edénpe Jehová odesidi omoĩtaha pe Rréino (Mat. 25:34). Adán ha Eva opekárõ guare haʼete vaʼekue ndaiporivéimava esperánsa. Péro upéi Jehová oikuaauka mbaʼépa ojapóta osalva hag̃ua yvyporakuérape ha osolusiona hag̃ua umi mbaʼe vai oiko vaʼekue Satanás káusare (Gén. 3:14-19). Péro ndahaʼéi una véspe Jehová omombeʼupámava mbaʼépa pe Rréino.

 6. ¿Mbaʼépa Jehová opromete, péro mbaʼépa nomombeʼúi gueteri?

⁶ Pe primera profesíape voi Jehová oprometéma peteĩ “ñemoñare” ombochipétava pe mbóipe (elee Génesis 3:15). Upéicharamo jepe, upérõ noñemombeʼúi mávatapa pe ñemoñare, ni pe mbói ñemoñare. Ohasa haimete dos mil áño Jehová oikuaaukave hag̃ua koʼã mbaʼe.b

 7. ¿Mbaʼérepa Jehová oiporavo Abrahánpe, ha mbaʼépa ñanemboʼe upéva?

⁷ Tiémpo rire Jehová oiporavo Abrahánpe, ikatu hag̃uáicha ifamíliagui ou pe ñemoñare oñeprometéva. Ojeporavo chupe ‘ojapo haguére Ñandejára heʼíva’ (Gén. 22:18). Ko mbaʼe ñanemboʼe peteĩ mbaʼe iñimportánteva: Jehová oikuaauka hembipota umi iñeʼẽrendúvape chupe añoiténte (elee Salmo 25:14).

8, 9. ¿Mbaʼe mbaʼépa Jehová heʼi Abrahán ha Jacóbpe pe ñemoñarére?

⁸ Jehová oñeʼẽrõ guare iñamígo Abrahánpe peteĩ ánhel rupive, oñepyrũ omyesakã mávatapa hína pe ñemoñare. Heʼi haʼetaha peteĩ yvypóra (Gén. 22:15-17; Sant. 2:23). Péro, ¿mávapa raʼe pe mbói? ¿Mbaʼéichapa oñembochipéta pe mbóipe? Koʼã mbaʼe oñemyesakã upe rireve.

⁹ Jehová odesidi pe ñemoñare outaha Abrahán niéto rupive. Upéva hína Jacob, peteĩ kuimbaʼe ojeroviáva ipyʼaite guive Ñandejárare (Gén. 28:13-22). Upéi, Jacob rupive Jehová oikuaauka pe ñemoñare osẽtaha itaʼýra Judá familiarégui. Jacob oprofetisa pe ñemoñarépe oñemeʼẽtaha peteĩ vastón, ohechaukáva ogovernataha. Heʼi avei ‘henondépe oñembyatypataha tetãnguéra’ iñeʼẽrendu hag̃ua chupe (Gén. 49:1, 10). Péicha Jehová oikuaauka pe ñemoñare haʼetaha peteĩ rréi.

10, 11. ¿Mbaʼérepa Jehová omyesakã hembipota David ha Daniélpe?

¹⁰ Oiméne 650 áñorupi Judá tiémpo rire, Jehová omyesakãve hembipota rréi Davídpe, haʼe ningo Judá familiare. Jehová heʼi vaʼekue hese: ‘Aguerohoryete ningo Davídpe’ (1 Sam. 13:14; 17:12; Hech. 13:22). David omombaʼe vaʼekue Ñandejárape, upévare Jehová ojapo hendive peteĩ kompromíso. Opromete chupe peteĩ ifamiliare ogovernataha opa ára g̃uarã (2 Sam. 7:8, 12-16).

¹¹ Ohasa rire 500 áñorupi, Jehová ojevale proféta Daniel rehe heʼi hag̃ua mbaʼe áñopepa oúta ko yvy ape ári pe ñemoñare térã Mesías (Dan. 9:25). Jehová ningo ‘ohayhu’ vaʼekue Daniélpe. ¿Mbaʼérepa? Daniel omombaʼetereígui Ñandejárape ha oservi meme rupi chupe (Dan. 6:16; 9:22, 23).

12. ¿Mbaʼépa ojeʼe Daniélpe ojapo hag̃ua, ha mbaʼérepa?

¹² Jehová ojevale proféta Daniel rehe ha ótro kuimbaʼe ijerovia mbaretévare oskrivi hag̃ua heta mbaʼe pe ñemoñare térã Mesías oñepromete vaʼekuére. Péro upérõ nog̃uahẽi gueteri pe tiémpo Jehová omyesakã hag̃ua chupekuéra opa mbaʼe ohai vaʼekue hikuái. Por ehémplo, Daniel ohecha rire peteĩ visión rupive mbaʼéichapa oñepyrũta pe Rréino, Ñandejára heʼi chupe oñongatúnte hag̃ua pe profesía. Upéva heʼise noñentendemoʼãiha og̃uahẽ meve pe tiémpo Ñandejára omoĩ vaʼekue. Jehová heʼi chupe amo gotyove oñemyesakã porãtaha pe profesía (Dan. 12:4).

13. a) ¿Mávapa pe ñemoñare oñepromete vaʼekue? b) ¿Mbaʼéichapa Jesús omyesakã pe profesía oĩva Génesis 3:15-pe?

¹³ Jehová omyesakã porãiterei Jesús haʼeha pe ñemoñare oñepromete vaʼekue. Haʼe ou David familiarégui ha oiko vaʼerã chugui Rréi (Luc. 1:30-33; 3:21, 22). Jesús oñepyrũrõ guare opredika oikuaauka heta mbaʼe Ñandejára rembipotágui. Haʼete voi kuarahy mbaʼe osẽva ha ohesape opárupi (Mat. 4:13-17). Por ehémplo Jesús omboʼéva rupive ojekuaa porãiterei Satanás haʼeha pe mbói oñeñeʼẽha Génesis 3:14, 15-pe. Haʼe heʼi Satanás ‘oporojuka’ hague ha haʼeha “pe japu ruvicha” (Juan 8:44). Tiémpo rire peteĩ visión rupive apóstol Juánpe oikuaauka “pe mbói ypykue” haʼeha pe “Diablo ha Satanás”c (elee Apocalipsis 1:1; 12:9). Pe visiónpe avei Jesús ohechauka mbaʼéichapa haʼe okumplipaitéta pe profesía oñemeʼẽ vaʼekue Edénpe. Upérõ heʼi ombochipetaha Satanáspe ha ohundietetaha chupe (Apoc. 20:7-10).

14-16. ¿Ontendépa rakaʼe umi disípulo ypykue opa mbaʼe Jesús omboʼe vaʼekue? Emyesakã.

¹⁴ Jahecháma haguéicha kapítulo 1-pe, Jesús oñeʼẽ meme vaʼekue pe Rréinore. Péro haʼe nomyesakãi opa mbaʼe idisipulokuéra oikuaaséva. Heta mbaʼe Jesús heʼi vaʼekue haʼekuéra nontendepyaʼéi. Péro heta áño rire umi isegidorkuéra ontende porã mbaʼépa heʼise vaʼekue imboʼehára omboʼéva. Jahechami koʼã ehémplo.

¹⁵ Áño 33-pe Jesús omombeʼu porã umi ogovernátava hendive Ñandejára Rréinope ojeguerahataha ko yvýgui. Umíva ohóta oiko espírituicha yvágape. Péro hemimboʼekuéra nontendéi vaʼekue upepete la haʼe heʼíva (Dan. 7:18; Juan 14:2-5). Upe áñope Jesús oiporu heta ehémplo ohechauka hag̃ua haʼe noñepyrũmoʼãiha ogoverna ensegída yvágape, síno ohasa raẽ vaʼerãha heta áño (Mat. 25:14, 19; Luc. 19:11, 12). Umi disípulo nontendéi upéva. Upéicha rupi, oñemoingove jey rire Jesúspe, oporandu chupe hikuái: “¿Remoĩ jeýtapa ko tiémpope, pe Rréino Israélpe?”. Péro Jesús odesidi nomyesakãmoʼãiha chupekuéra opa mbaʼe upe tiémpope (Hech. 1:6, 7). Jesús omboʼe avei oĩtaha “ambue ovechakuéra” nogovernamoʼãiva umi “ovechakuéra mbovymi” ndive (Juan 10:16; Luc. 12:32). Cristo segidorkuéra ndoikuaái mávapa oĩ umi mokõi grúpope. Pe Rréino oñepyrũ rire 1914-pe ohasa jey heta tiémpo ontende hag̃ua hikuái upéva.

¹⁶ Jesús oreko vaʼekue hetave mbaʼe ikatúva omombeʼu idisipulokuérape, péro oikuaa ndaikatumoʼãiha ogueropuʼaka hikuái (Juan 16:12). Jaikuaa ningo umi kristiáno yma guare tiémpope oñemyesakã hague heta mbaʼe pe Rréino rehegua. Upéicharamo jepe, upérõ neʼĩra og̃uahẽ pe tiémpo oñentende porãve hag̃ua umi profesía.

17. ¿Mbaʼépa jajapo vaʼerã ñantende hag̃ua Ñandejára rembipota, péro mávarepa ñaikotevẽ avei?

¹⁷ Jehová heʼi proféta Daniélpe ‘umi ára pahápe’ oĩtaha ‘heta oipyguaráva ágotyo pégotyo arandu rekávo’. Heʼi avei oñentende porãvetaha mbaʼépa Ñandejára rembipota (Dan. 12:4). Entéro oikuaaséva oñehaʼã vaʼerã upearã. Peteĩ lívro heʼi pe palávra evréa ‘oipyguara’, heʼiseha jastudia porã upe jaleéva. Añetehápe ñahesaʼỹijo porã vaʼerã la Biblia, péro jaikuaa Jehová nañanepytyvõirire, nañantendemoʼãi kuri umi profesía oñeʼẽva pe Rréinore (elee Mateo 13:11).

18. ¿Mbaʼéichapa Jehová siervokuéra ohechauka iñumílde ha ijerovia mbareteha?

¹⁸ Áño 1914 mboyve Jehová omyesakã heta profesía oñeʼẽva pe Rréinore, ha upéicha osegi ojapo koʼã ára paha aja. Kapítulo 4 ha 5-pe jahecháta mbaʼéichapa umi cien áño ohasa vaʼekuépe Ñandejára puévlo okambia heta vése ontende lája umi profesía. ¿Heʼisépa upéva Jehová novendesiriha chupekuéra? ¡Nahanirietépa! Haʼe oipytyvõ meme chupekuéra ontende porãve hag̃ua. ¿Mbaʼérepa ojapo upéva? Jehová siervokuéra ijerovia mbarete ha iñumílde rupi. Ha koʼã mokõi mbaʼe haʼe oguerohoryeterei hína (Heb. 11:6; Sant. 4:6). Jehová siervokuéra oguerovia oñekumplitaha opa mbaʼe oĩva la Bíbliape. Ha ohechakuaa jave hikuái nontendeporãi hague umi profesía, naiprovlémai okambia hag̃ua ha péicha ohechauka iñumildeha. Ko mbaʼe ojehecha porãiterei rrevísta Ñemañaháme, osẽ vaʼekue 1 de marzo de 1925. Upépe heʼi: “Jaikuaa porã Jehová voínte omyesakãha Iñeʼẽ, ha haʼe oipytyvõta ipuévlope ontende hag̃ua umi profesía opyta porãveháicha chupe ha itiempoitépe”.

19. ¿Mbaʼépa omyesakã ñandéve Jehová ko tiémpope, ha mbaʼérepa?

¹⁹ Pe Rréino oñepyrũrõ guare ogoverna yvágape 1914-pe, Ñandejára puévlo oikuaa vai vaínte mbaʼéichapa oñekumplíta umi profesía (1 Cor. 13:9, 10, 12). Jaipotaiterei rupi oñekumpli Ñandejára opromete vaʼekue, sapyʼánte ñantende vai umi profesía. Ohasávo umi áño ojekuaa siertoha la heʼi vaʼekue pe rrevísta Ñemañaha ñañeʼẽma hague pe ótro párrafope. Pe artíkulo heʼi: “Ñanemanduʼa vaʼerã umi profesía ikatuha ñantende porã oñekumplipa rire térã oñekumpli aja añoiténte”. Pe fin og̃uahẽmbotaitéma, ha heta profesía oñekumplipáma térã koʼág̃a oñekumpli hína. Ha ko tiémpope Jehová omyesakã porãvéntema ñandéve hembipota oikuaágui ipuévlo iñumílde ha naiprovlemaiha ojekorrehi hag̃ua. ¡Añetehápe hetaiteve mbaʼe ñantende ko tiémpope!

20, 21. ¿Mbaʼépa ojapo raʼe umi kristiáno yma guare oñekambiárõ guare umi mbaʼe ontendéva?

²⁰ Jehová omyesakã jave ñandéve peteĩ mbaʼe ñantende vaíva, ¿mbaʼépa jajapo? Upépe ningo ojekuaa mbaʼeichaguápa ñande. ¿Jajeroviátapa hese ha jahechaukáta ñaneumildeha ñakambiávo ñapensa lája? Umi kristiáno yma guarére oiko vaʼekue ko mbaʼe. Epensami nde haʼeha peteĩ hudío ha rejerovia Crístore. Nde remombaʼeterei Moisés Léi ha reñemombaʼe voi hudío haguére. Upéinte og̃uahẽ umi kárta apóstol Pablo ohaíva espíritu sánto rupive. Koʼã kárta heʼi natekotevẽveimaha oñekumpli Moisés Léi. Heʼi avei Jehová omboykemaha Israélpe ombyaty hag̃ua hekovia peteĩ tetã pyahu. Upévape oĩta hudío ha ndahaʼéiva hudío (Rom. 10:12; 11:17-24; Gál. 6:15, 16; Col. 2:13, 14). ¿Mbaʼépa rejapo vaʼerãmoʼã?

²¹ Umi kristiáno iñumíldeva oguerovia Pablo heʼíva ha Jehová ovendesi chupekuéra (Hech. 13:48). Oĩ katu ojepicháva umi mbaʼe oñekambiávare ha osegise haʼekuéra ontendeháichante (Gál. 5:7-12). Péro la Biblia heʼi umi nokambiáiva opensa lája, ojavy hague pe oportunida oho hag̃ua yvágape ogoverna Crístondi (2 Ped. 2:1).

22. ¿Mbaʼéichapa reñeñandu oñekambiávo umi mbaʼe jagueroviáva?

²² Umi áño ohasa vaʼekuépe Jehová omyesakã porãve ohóvo umi mbaʼe jagueroviáva pe Rréinogui. Por ehémplo, ñanepytyvõ ñantende hag̃ua arakaʼépa ojepeʼáta ojuehegui ovecha ha kavara. Umi ovecha ningo hína umi oikótava pe Rréino poguýpe, ha umi kavara katu umi hénte aña ndoikuaaséiva mbaʼeve umi notísia porãgui. Jehová ñanemboʼe avei arakaʼépa oñembyatypáta umi 144.000, omyesakã mbaʼépa heʼise umi ehémplo omombeʼu vaʼekue Jesús, ha arakaʼépa ohopáta yvágape umi unhído.d ¿Mbaʼépa rejapo raʼe oñekambiávo koʼã mbaʼe? ¿Oñemombaretépa nde jerovia? ¿Rehechakuaápa koʼã mbaʼe rupive Jehová osegiha ohekomboʼe isiervokuéra iñumíldevape? Ko lívro katuete nepytyvõta regueroviave hag̃ua Jehová siémpre omyesakãha hembipota umi iñeʼẽrendúvape chupe.