Ñaipytyvõ pe kongregasión ipotĩ ha oĩ hag̃ua pyʼaguapýpe

KÁDA áño oĩ hetaiterei hénte ohóva Jehová rógape oadora hag̃ua chupe haʼe oipotaháicha, péicha oñekumpli pe profesía oĩva la Bíbliape (Miq. 4:1, 2). Ajépa javyʼaite jarresivi jave umi ou ramóvape ‘Ñandejára kongregasiónpe’ (Hech. 20:28). Haʼekuéra ovyʼa avei ikatu haguére oservi Jehovápe ñanendive. Avei ovyʼa ikatu haguére oĩ pe kongregasión ipotĩvape ha ojeikohápe pyʼaguapýpe. Ñandejára espíritu sánto ha umi konsého porã oĩva Iñeʼẽme ñanepytyvõ péicha jaiko hag̃ua kongregasiónpe (Sal. 119:105; Zac. 4:6).

² Ñande jasegi umi konsého oĩva la Bíbliape ha ñamonde “peteĩ aóicha pe kondúkta pyahu” (Col. 3:10). Sapyʼánte oĩramo jepe provlemaʼimi ermanokuérandi ñamboykénte umíva. Ñañehaʼã jahecha entéro mbaʼe Jehová ohechaháicha, péicha ndajahejái ko múndo ñandeafekta ha jasegi ñaneunído ñane ermanokuéra oparupiguándi (Hech. 10:34, 35).

³ Péro sapyʼánte ikatu oĩ umi situasión ijetuʼúva ha péicha rupi ndaiporivéi pyʼaguapy ha ndojeikovéi peteĩ ñeʼẽme kongregasiónpe. ¿Mbaʼérepa oiko jepi upéva? Normálmente upéva oiko ndojesegíri rupi umi konsého oĩva la Bíbliape. Enterovéva ñaneimperfékto, ha jareko defékto (1 Juan 1:10). Ikatu oĩ ojapóva peteĩ mbaʼe naiporãiva ha upéva omongyʼa pe kongregasión ha pe adorasión oñemeʼẽva Jehovápe. Sapyʼánte ñaofende ótrope jaʼe térã jajapo rupi peteĩ mbaʼe ñapensaʼỹre. Térã ikatu ñandepochy algúno heʼíva térã ojapóvare (Rom. 3:23). Oiko jave koʼã mbaʼe, ¿mbaʼépa jajapokuaa ñasolusiona hag̃ua umi provléma?

⁴ Jehová ningo oreko enkuénta umi provléma ikatúva oĩ. Haʼe ñanderayhueterei, upévare Iñeʼẽme omeʼẽ konsého ohechaukáva mbaʼépa ikatu jajapo oĩ jave provléma. Avei umi ansiáno ikatu ogia ha oipytyvõ káda únope. Jasegírõ umi konsého bíblico haʼekuéra omeʼẽva ñandéve, jaikóta pyʼaguapýpe ótrondi ha ñaĩ porãta Jehovándi. Ñande jarresivíramo peteĩ disiplína jajapo haguére álgo ivaíva, ñaime vaʼerã segúro péicha ñande Ru yvagapegua ohechaukaha hína ñanderayhuha (Prov. 3:11, 12; Heb. 12:6).

⁵ Sapyʼánte ikatu jareko algún provléma umi ermánondi péro ndahaʼéi la igravetereíva. Péicha jave pyaʼe porã ñañehaʼã vaʼerã ñasolusiona upéva mborayhúpe (Efes. 4:26; Filip. 2:2-4; Col. 3:12-14). Katuete rehechakuaáta umichagua provléma ikatuha ñasolusiona jasegívo ko konsého omeʼẽ vaʼekue apóstol Pedro: “Pejoayhu vaʼerã pende pyʼaite guive, pórke pe oporohayhúva siémpre oĩ operdona hag̃uáicha hapichápe” (1 Ped. 4:8). La Biblia heʼi: “Enterovéva ningo jajavy heta vése” (Sant. 3:2). Jasegíramo Jesús konsého ha jajapóramo ñande rapicha rehehápe umi mbaʼe jaipotáva haʼekuéra ojapo ñanderehe, ikatúta ñaperdona ha ñanderesarái umichagua provlémagui (Mat. 6:14, 15; 7:12).

⁶ Oimérõ rehechakuaa nde rejapo hague térã ere hague álgo oofende vaʼekue peteĩ ermánope, nde voi reñehaʼã vaʼerã pyaʼe eiko porã jey hendive. Nemanduʼa vaʼerã nderejapóiramo upéva, ne amista Jehovándi ikatuha ojeperhudika. Jesús omeʼẽ vaʼekue idisipulokuérape ko konsého: “Regueraháramo hína ne ofrénda pe altárpe ha nemanduʼa ne ermáno ipochyha nderehe, eheja ne ofrénda pe altár renondépe, ha tereho eiko porã raẽ ne ermánondi, upéi ae eju emeʼẽ ne ofrénda” (Mat. 5:23, 24). Oimérõ oñentende vaínte raʼe álgo, ñañehaʼãkena ñañemongeta porã upe témare pe ermánondi. Enterove ñaimérõ dispuésto ñañemongeta hag̃ua, ikatúta pyaʼe ñasolusiona umi provléma oñepresentáva ñaneimperfékto haguére.

⁷ Sapyʼánte umi ansiáno ohechakuaa tekotevẽha omeʼẽ konsého peteĩ ermánope ikatu hag̃uáicha okambia opensa lája. Péro ndaifasilpái jepi oñemeʼẽ umi konsého. Apóstol Pablo oskrivi vaʼekue umi ermáno Galaciaguápe: “Che ermanokuéra, peteĩ persóna ohóramo tape vaíre haʼe oñemeʼẽʼỹre enkuénta, peẽ pejegiáva pe espíritu sántore pegueru jey vaʼerã chupe tape porãme. Péro pejapo vaʼerã upéva pyʼaguapýpe porãnte” (Gál. 6:1).

⁸ Umi ansiáno oñangareko Ñandejára ovechakuérare ha oprotehe chupekuéra ani hag̃ua mbaʼeve operhudika pe kongregasiónpe. Haʼekuéra oñatende ani hag̃ua oñepyrũ peteĩ provléma igráveva. Umi ansiáno oñehaʼãmbaite ojapo porã hembiapo ikatu hag̃uáicha okumpli pe Jehová opromete vaʼekue Isaías rupive: “Káda prínsipe haʼetéta peteĩ lugár ikatuhápe ñañemoʼã yvytu atãgui. Haʼekuéra haʼetéta peteĩ lugár ikatuhápe ñakañy ama ha torménta vaígui. Ojoguáta hikuái peteĩ ysyry ohasávape umi lugár isekohárupi, ha peteĩ ita guasu ñanemoʼãvape desiértope kuarahy akúgui” (Is. 32:2).

⁹ Apóstol Pablo heʼi vaʼekue oĩtaha umi ikatúva omongyʼa pe kongregasión. Haʼe heʼi: “Koʼág̃a ore roʼe peẽme ermanokuéra, [...] ani hag̃ua pejeheʼa umi ermáno naiñeʼẽrendúivare ha ndosegíriva umi instruksión perresivi vaʼekue orehegui”. Pablo oexplika porãve upéva ha heʼi: “Oĩramo ndojapóiva umi mbaʼe roʼéva ko kárta rupive, pemarka chupe ha anive pejeheʼa hese jahecha notĩripa. Upéicharõ jepe, ani pehecha chupe pene enemígoramo, síno pesegi peñemoñeʼẽ chupe peteĩ ermánoicha” (2 Tes. 3:6, 14, 15).

¹⁰ Sapyʼánte oĩ ermáno ndojapóiva peteĩ pekádo ivaíva oñemosẽ hag̃uáicha kongregasióngui, péro noñekomportái peteĩ kristiánoicha ha ohechauka ndorrespetaiha ni michĩmi Jehová ojeruréva. Por ehémplo iñateʼỹetereíma, okritikaiterei ótrore, ikyʼaiterei, térã ‘oiko oñentremete ótro ojapóvare’ (2 Tes. 3:11). Ikatu avei oiko oplanea mbaʼéichapa oganáta ótrore térã oiko oiporavo umi diversión ivaíva. Koʼãichagua kondúkta ningo ikatu operhudika pe kongregasiónpe ha omomýi ótrope ojapo hag̃ua avei umi mbaʼe.

¹¹ Primeroite voi umi ansiáno oñehaʼãmbaitéta oipytyvõ koʼãichagua ermáno naiñeʼẽrendúivape omeʼẽvo chupekuéra konsého oĩva la Bíbliape. Péro upe ermáno oñemohatã ha nohenduséiramo umi konsého bíblico oñemeʼẽva chupe heta vése, umi ansiáno ikatu odesidi ojapo peteĩ diskúrso de adverténsia pe kongregasiónpe. Umi ansiáno ohecha porã vaʼerã añetehápepa ivai upe situasión ha omolestámapa hína umi ermáno kongregasionpeguápe. Oiméramo upéicha, ojejapóta upe diskúrso. Pe ansiáno ojapótava pe diskúrso ohechaukáta mbaʼépa heʼi la Biblia upe kondúkta vaíre, péro ndeʼimoʼãi mávapa hína upe hembiapo vaíva. Upéicha umi oikuaáva upe situasión oñeñeʼẽha upe diskúrsope oñehaʼãta ani ohasa tiémpo upe ermánondi ndahaʼéima guive ojapo hag̃ua aktivida espirituál. Péicha ikatúta ‘jasegi ñañemoñeʼẽ chupe peteĩ ermánoicha’.

¹² Umi ermáno ifiél ha osegíramo Jehová heʼíva, oipytyvõta pe ermáno naiñeʼẽrendúivape otĩ hag̃ua umi mbaʼe ojapóvagui ha upéva omomýita chupe okambia hag̃ua. Upe rire ojehecha porã vove pe ermáno okambiáma hague, natekotevẽmoʼãvéima ojetrata chupe peteĩ oñemarkávaicha.

¹³ Iporã ningo añete ñaporoperdona ha ñanderesarái upe oiko vaʼekuégui, péro upéva ndeʼiséi nañapenamoʼãiha ojejapóramo álgo ivaietereíva térã jaʼetaha sonseraha. Ndaikatúi ningo jaʼe káda ke jafalla oikoha upéva ñaneimperfékto haguérente. Ha avei oikóramo álgo añetehápe ivaíva ndaikatúi ñambohasa reínte haʼeramoguáicha vyrorei (Lev. 19:17; Sal. 141:5). Umi léi oñemeʼẽ vaʼekue Israélpe ohechauka oĩha pekádo ivaivéva ótrogui. Entéro kristiánope g̃uarã péicha vaʼerã avei (1 Juan 5:16, 17).

¹⁴ Jesús heʼi vaʼekue mbaʼe mbaʼépa ojejapo vaʼerã oñesolusiona hag̃ua umi provléma tuichavéva ikatúva oĩ kristianokuéra apytépe: “Ne ermáno opekáramo ne kóntrape, [1] tereho ha peneañoháme ehechauka chupe mbaʼépepa ofalla. Nerendúramo, reipytyvõ ne ermánope oho jey hag̃ua tape porãre. Péro nanerendúiramo katu [2] egueraha nendive peteĩ térã mokõi testígo, ikatu hag̃uáicha mokõi térã mbohapy persóna heʼíva rupive, ojekuaa siértopa entéro mbaʼe ojeʼéva. Ha nohendúiramo chupekuéra, [3] emombeʼu kongregasiónpe. Ha nohendúiramo ni kongregasiónpe katu, etrata chupe peteĩ ojeroviaʼỹvaicha ha peteĩ impuésto kovraháramo” (Mat. 18:15-17).

¹⁵ Jarekórõ enkuénta pe ehémplo Jesús omoĩ vaʼekue Mateo 18:23-35-pe, jaʼekuaa Jesús oñeʼẽ hague Mateo 18:15-17-pe umi situasión oñepresentávare oĩ jave provléma plátare, terrénore térã ótra kósa jarekóvare. Por ehémplo ndojepagái jave peteĩ préstamo, térã oĩramo oporombotavýva oipeʼa hag̃ua ótrogui pláta. Umi pekádo apytépe oĩ avei umi okalumniáva térã oñeʼẽ vaíva hapicháre operhudika hag̃ua chupe.

¹⁶ Oimérõ reguereko pruéva peteĩ ermáno ojapo hague nderehe umichagua pekádo, ani rejapuraiterei reho hag̃ua umi ansiáno rendápe rejerure hag̃ua tointerveni nderehehápe. Jesús heʼi haguéicha, primeroite reñeʼẽ vaʼerã pe ofalla vaʼekue ndive. Eñehaʼã esolusiona upe provléma hendive, ani remoinge ótrope upe provlémape. Nemanduʼa vaʼerã avei Jesús ndeʼíri hague ‘tereho unavénte ha ehechauka chupe mbaʼépepa ofalla’. Pe ermáno ndoaseptaséiramo ojavy hague ha ndojediskulpaséi, iporãvéta reho jeýrõ hendápe ótro moméntope. Péro pe provléma oñesolusionárõ, pe ermáno ovyʼaitereíta neremombeʼúi haguére ótrope ha péicha nderehejavaíri chupe kongregasiónpe. Péicha “reipytyvõ ne ermánope oho jey hag̃ua tape porãre”.

¹⁷ Rehechakuaárõ pe ermáno orrekonoseha ojavy hague, ojerure perdón ha oñehaʼã osolusiona hembiapo vaikue, natekotevẽvéima rejapo mbaʼeve. Oiméramo jepe tuicha pe provléma, peteĩ pekádo peichagua ikatu ñasolusiona ñande ha pe ojavy vaʼekue.

¹⁸ Oimérõ ndaikatúi raʼe reipytyvõ ne ermánope peñeʼẽrõ guare peneañoháme, ikatu rejapo Jesús heʼi vaʼekue ha “egueraha nendive peteĩ térã mokõi testígo” ha eñeʼẽ jey hendive. Umi ohóva nendive oipytyvõse vaʼerã avei pe ermánope. Okonveníta oimérõ ohecha raʼe hikuái upe mbaʼe vai oikóva, péro oiméramo ndaipóri ohecha vaʼekue, reiporavo vaʼerã peteĩ térã mokõi ermáno térã ermánape ohendu hag̃ua upe konversasión. Iporãta reiporavóramo umi ermáno osolusionakuaáva koʼãichagua provléma, ha ohechakuaátava añetehápepa ivai raʼe upe ermáno ojapo vaʼekue. Oimérõ rejerure umi ansiánope oho hag̃ua de testígo, ereko vaʼerã enkuénta ndohoiha orrepresenta hag̃ua pe kongregasiónpe, pórke ndahaʼéi pe kuérpo de ansiáno la oasignáva chupekuéra oipytyvõ hag̃ua upe kásope.

¹⁹ Ikatu oime hetáma reñehaʼã resolusiona pe provléma ha rehóma reñeʼẽ pe ermáno ndive peneañohápe, ha upéi regueraha umi testígope peñeʼẽ hag̃ua. Oimérõ rejapopáma koʼã mbaʼe ha noñesolusionái gueteri mbaʼeve ha nde resegi repensa ndaikatuiha rembohasánte la oikóva, upéicharõ reho vaʼerã remombeʼu umi ansiánope. Haʼekuéra ningo oñehaʼãmbaite ojapo tekotevẽva pe kongregasión ipotĩ ha oĩ hag̃ua pyʼaguapýpe. Reñeʼẽ rire umi ansiáno ndive nde rehejáma vaʼerã ikargopekuéra la oikóva ha ekonfia Jehováre. Ha ani núnka reheja ótro ojapóva omokangy nde jerovia ha eju nderevyʼavéi Jehová servísiope (Sal. 119:165).

²⁰ Umi ansiáno oñangarekóva Jehová ovechakuérare oñepyrũta oaverigua mbaʼépa la oiko vaʼekue. Oimérõ ojehecha porãiterei upe persóna ojapo hague peteĩ mbaʼe ivaietereíva ne kóntrape, ha ojekuaa noñarrepentiriha ha ndojaposeiha mbaʼeve osolusiona hag̃ua la oikóva, umi ansiáno ikatu ojapo peteĩ komite hudisiál ha oñemosẽ kongregasióngui upe hembiapo vaívape. Péicha umi ansiáno oprotehe umi ovechápe ha ndohejái mbaʼeve omongyʼa pe kongregasión (Mat. 18:17).

²¹ Oĩ ningo umi pekádo ojejapóva ñane kóntrape ikatúva ñandénte ñaperdona. Péro ndahaʼéi upéicha ojejapóramo ótro pekádo ivaivéva. Por ehémplo idolatría, ñemoakãratĩ, kuimbaʼe oikóva kuimbaʼéndi térã kuña kuñándi, oñeʼẽ vaíva umi mbaʼe sagrádore, opuʼãva Ñandejárare, térã ojapóva ótro pekádo ñanembojeguarúva (1 Cor. 6:9, 10; Gál. 5:19-21). Peichagua pekádo ikatu omongyʼa pe kongregasión ha pe adorasión oñemeʼẽva Jehovápe, upévare oñemombeʼu vaʼerã umi ansiánope ha haʼekuéra oñenkargáta upe situasiónre (1 Cor. 5:6; Sant. 5:14, 15). Oĩ algúno ijeheguiete ohóva umi ansiáno rendápe omombeʼu hag̃ua chupekuéra ipekádo, térã oho omombeʼu hag̃ua ótro opeka hague (Lev. 5:1; Sant. 5:16). Tahaʼe haʼeháicha, umi ansiáno ohendu rire oĩha peteĩ ermáno opekáva, haʼekuéra omoñepyrũ vaʼerã peteĩ investigasión oĩtava mokõi ansiáno kárgope. Oimérõ otopa pruéva ohechaukáva pe ermáno opeka hague, upéicharõ pe kuérpo de ansiáno heʼíta ojejapo hag̃ua peteĩ komite hudisiál oĩtahápe mbohapy ansiáno jepe.

²² Umi ansiáno oñatende porã Ñandejára ovechakuérare ha oipytyvõ chupekuéra oĩ porã hag̃ua Jehová ndive. Umi ansiáno oñehaʼã oipuru porã la Biblia okorrehi hag̃ua umi hembiapo vaívape ha oipytyvõ hag̃ua chupekuéra oĩ porã jey hag̃ua Ñandejárandi (Jud. 21-23). Péicha osegi umi instruksión apóstol Pablo omeʼẽ vaʼekue Timotéope. Haʼe heʼi: ‘Ankarga ndéve koʼã mbaʼe Ñandejára renondépe ha Cristo Jesús renondépe, haʼe ohusgáta umi oikovéva ha omanóvape: ehechauka ótrope mbaʼépepa ojavy, eñemoñeʼẽ mbarete porã, emeʼẽ konsého, nepasiénsiakena rejapo hag̃ua entéro koʼã mbaʼe ha ndevaléke reporomboʼe hag̃ua’ (2 Tim. 4:1, 2). Umi ansiáno omboyke vaʼerã heta tiémpo ojapo hag̃ua koʼã mbaʼe, péro upéva ningo oike avei itravahokuéra apytépe. Pe kongregasión oagradeseterei la ojapóva hikuái ha oikuaa ‘ojerrespetave vaʼerãha’ umi ansiánope ombaʼapo jejopy haguére (1 Tim. 5:17).

²³ Káda situasión ojetopahápe oiko hague añetehápe peteĩ mbaʼe igráveva, umi ansiáno oñehaʼãmbaitéta oipytyvõ pe ermánope oñemoĩ porã jey hag̃ua Jehovándi. Pe ermáno ohechaukáramo añetehápe oñarrepentiha ha oheja umi ansiáno oipytyvõ chupe, oñesensuráta chupe. Upéva ojejapo en privádo térã umi testígo renondépe, umi oñeʼẽ vaʼekue pe komite hudisiálpe. Upe disiplína oipytyvõta upe opekávape okambia hag̃ua ha umi oikuaáva la oikóva orrespetavéta Jehovápe (2 Sam. 12:13; 1 Tim. 5:20). Oñesensuráramo peteĩ ermáno térã ermánape, oĩ umi mbaʼe ndaikatumoʼãiva ojapo kongregasiónpe. Péicha oñepytyvõ chupe oguata jey hag̃ua derechoite pe tape porãre (Heb. 12:13). Ojehechakuaa vove pe ermáno térã ermána okambiaha ohóvo, mbeguekatúpe oñemeʼẽ jeýta chupe umi priviléhio.

²⁴ Pe komite hudisiál ikatu ohecha pe ermáno térã ermána oñarrepentiha, péro haʼekuéra opensáramo pe kongregasión ojekuida vaʼerãha pe ermánogui, térã upe haʼe ojapo vaʼekue ojekuaataha pe kongregasiónpe térã pe lugár haʼe oikohápe, upéicharõ pe rreunión héravape Mbaʼéichapa Jaiko ha Japredika vaʼerã ojejapóta ko anúnsio: “[Pe persóna réra] oñesensura”.

²⁵ Sapyʼánte pe ermáno opeka vaʼekue nokambiaséi ha ndohejái oñepytyvõ chupe. Ha pe komite hudisiálpe umi ansiáno ohechakuaa pe ermáno ndohechaukaiha “umi mbaʼe ojapóva rupive oñarrepentiha” (Hech. 26:20). ¿Mbaʼépa ojejapo péicha jave? Umi kásope tekotevẽ oñemosẽ kongregasióngui upe opeka vaʼekuépe ha noñarrepentíriva. Péva heʼise haʼe ndaikatuiha ojeheʼa Jehová puévlo potĩetére. Péicha pe pekadór ndoperhudikamoʼãi avavépe pe kongregasiónpe, ha pe adorasión oñemeʼẽva Jehovápe osegíta ipotĩ ha noñeñeʼẽvaimoʼãi ñanderehe (Deut. 21:20, 21; 22:23, 24). Por ehémplo apóstol Pablo oikuaa vaʼekue peteĩ ermáno pe kongregasión Corintopegua opekaha oikóvo. Upérõ haʼe heʼi umi ansiánope: ‘Pentrega vaʼerã pe kuimbaʼe Satanáspe, péicha pe kongregasión ndoaseptamoʼãi umi pekádo ha osegíta oĩ porã Ñandejára renondépe’ (1 Cor. 5:5, 11-13). Pablo omombeʼu vaʼekue pe síglo primérope oĩ hague kristiáno oñemoĩva Ñandejárare ha upévare oñemosẽ vaʼekue kongregasióngui (1 Tim. 1:20).

²⁶ Ojedesidi vove peteĩ ermáno noñarrepentíriva oñemosẽ vaʼerãha kongregasióngui, pe komite hudisiál omombeʼu vaʼerã pe persónape upe ojedesidíva ha ohechauka vaʼerã chupe la Biblia rupive mbaʼérepa ojedesidi upéva. Upéi pe komite heʼi vaʼerã pe persónape ikatuha ojerure ojehecha jey hag̃ua la ikáso oimérõ haʼe opensa umi ansiáno ojavy hague. Upearã oskrivi vaʼerã peteĩ kárta ha omoĩ vaʼerã mbaʼe mbaʼérepa ojerure ojehecha jey hag̃ua la ikáso. Pe komite heʼi rire pe persónape oñemosẽtaha kongregasióngui oñemeʼẽ chupe 7 día oskrivisérõ g̃uarã pe kárta. Pe kuérpo de ansiáno orresivírõ upe kárta, ohenói vaʼerã hikuái pe superintendénte de sirkuítope. Pe superintendénte oiporavóta umi ansiáno ikatupyrývape ojejapo hag̃ua pe komite de apelasión ha oñeñatende jey hag̃ua pe káso. Haʼekuéra oñehaʼãmbaitéta ojapo pe komite de apelasión ohasa mboyve una semána ojerresivi hague pe kárta. Oimérõ ojeskrivi pe kárta de apelasión, noñeanunsiamoʼãi pe kongregasiónpe pe ermáno oñemosẽ hague. Péro upe aja, pe persóna ndaikatumoʼãi okomenta ni ojapo pe ñemboʼe umi atýpe, avei ndaikatumoʼãi oñemeʼẽ chupe ótro priviléhio.

²⁷ Ko oportunida oñemeʼẽva pe ermánope ohechauka ojetrata porãha chupe ha ojehejaha omombeʼu mbaʼépa oĩ vai kuri chupe g̃uarã. Upe hembiapo vai vaʼekue ndohóirõ upe rreunión ojejapóvape ojehecha jey hag̃ua ikáso, umi ansiáno oñehaʼãta unas kuánta vése oñekomunika hendive. Péro ohechaukárõ ndohoseiha, upéi oñeanunsiátama pe rreunionhápe haʼe oñemosẽha kongregasióngui.

²⁸ Pe hembiapo vaíva ikatu ndoskriviséi peteĩ kárta de apelasión, upéicharõ umi ansiáno oexplikáta chupe tekotevẽha oñarrepenti la ojapo vaʼekuégui ha mbaʼépa ojapo vaʼerã upéi oñerreadmiti hag̃ua kongregasiónpe. Ojapóvo péicha, umi ansiáno ohechauka ohayhuha ha oipytyvõseha pe ermánope. Avei ohechauka ohaʼarõha haʼe okambia ha oĩ porã jey Jehová organisasiónpe (2 Cor. 2:6, 7).

²⁹ Tekotevẽ jave oñemosẽ kongregasióngui peteĩ ermáno noñarrepentírivape, ojejapo vaʼerã peteĩ anúnsio mbykymi. Pe anúnsio heʼi vaʼerã péicha: “[Pe persóna réra] ndahaʼevéima testígo de Jehová”. Pe anúnsio rupive umi ermáno oikuaátama ndaikatumoʼãveimaha ojeheʼa hese (1 Cor. 5:11).

³⁰ Peteĩ Testígo ojedesasosiárõ heʼise orrenunsiaha ha ohechauka porã ndoikoseveimaha peteĩ kristiánoicha. Haʼe ikatu heʼi voi ndoipotaveimaha ojeʼe hese haʼeha testígo de Jehová. Térã ikatu ohechauka umi mbaʼe ojapóva rupive noĩseveimaha Jehová organisasiónpe. Por ehémplo oikévo peteĩ organisasión ojapóvape álgo oñemoĩva la Biblia omboʼévare ha Jehová okondenáva (Is. 2:4; Apoc. 19:17-21).

³¹ Apóstol Juan tiémpope oĩ vaʼekue umi orrenunsiáva ha ndahaʼevéimava kristiáno. Haʼe heʼi hesekuéra: “Haʼekuéra oĩ vaʼekue ñande apytépe, péro osẽ oho ndahaʼéigui ñandeichagua, pórke haʼekuéra haʼérire ñandeichagua opyta vaʼerãmoʼã ñanendive” (1 Juan 2:19).

³² Peteĩ persóna ojedesasosiáva térã orrenunsiáva ningo tuicha idiferénte peteĩ inaktívogui. Peteĩ inaktívo hína peteĩ ermáno térã ermána ndopredikavéiva. Ikatu ou ndopredikavéi pórke ndostudiavéi Ñandejára Ñeʼẽ, iprovléma heta, térã oĩ oñemoĩva ikóntrape ha upévare ou ikangy Jehová servísiope. Umi ansiáno ha umi ermáno oĩva kongregasiónpe osegíta oipytyvõ umichagua ermánope omombarete jey hag̃ua ijerovia (Rom. 15:1; 1 Tes. 5:14; Heb. 12:12).

³³ Peteĩ ermáno orrenunsiáramo ojejapóta peteĩ anúnsio mbykymi pe kongregasiónpe. Pe anúnsio heʼíta péicha: “[Pe persóna réra] ndahaʼevéima testígo de Jehová”. Ojetratáta chupe oñemosẽramoguáicha kongregasióngui.

³⁴ Peteĩ persóna oñemosẽva térã orrenunsiáva ikatu oñerreadmiti térã ovolve jey pe kongregasiónpe. Péro upearã ohechauka vaʼerã oñarrepentiha ha ohejáma hague hembiapo vaikue peteĩ tiémporema. Ojekuaa vaʼerã hese oĩ porãse jeyha Jehová ndive. Umi ansiáno ohaʼarõta ohasa peteĩ tiémpo ohecha hag̃ua añetehápepa pe persóna oñarrepenti ha okambiámapa. Ikatu ohaʼarõ unos kuánto mése, un áño térã hetave, upéva odependéma káda uno situasiónre. Pe persóna ontrega vove peteĩ kárta pe kuérpo de ansiánope omombeʼuhápe oĩse jeyha Jehová puévlope, peteĩ komite de rreadmisión oñeʼẽta hendive. Pe komite ohecháta pe persóna ohechaukápa “umi mbaʼe ojapóva rupive oñarrepentiha” ha odesidíta orreadmitítapa chupe térãpa nahániri (Hech. 26:20).

³⁵ Oiméramo pe persóna ojeruréva oñerreadmiti hag̃ua chupe oñemosẽ raʼe oĩrõ guare ótra kongregasiónpe, peteĩ komite de rreadmisión pe kongregasión ohohápe koʼág̃a oñembyatýta hendive ohecha hag̃ua ikáso. Oiméramo pe komite de rreadmisión opensa oñerreadmiti vaʼerãha chupe, omondóta irrekomendasión pe kuérpo de ansiáno oĩvape pe kongregasión ohecha vaʼekue ikáso. Umi mokõi komite ombaʼapóta oñondive ojasegura hag̃ua orekopápa umi informasión oñekotevẽva ikatu hag̃uáicha ojedesidi porã. ¿Péro mávapa odesidíta oñerreadmiti vaʼerãha pe persónape? Odesidi vaʼerã pe komite de rreadmisión oñeformáva pe kongregasión oñatende ypy vaʼekue la ikásore.

³⁶ Pe komite de rreadmisión oĩrõ segúro pe persóna oñemosẽ vaʼekue, térã orrenunsia vaʼekue, añetehápe oñarrepentiha ha oñerreadmiti vaʼerãha, oñeanunsia vaʼerã pe kongregasión oñeñatende ypy vaʼekuépe la ikáso. Pe persóna koʼág̃a oĩramo ótra kongregasiónpe, upépe avei oñeanunsiáta. Pe anúnsio heʼi vaʼerã: “[Pe persóna réra] haʼe jeýma testígo de Jehová”.

³⁷ Peteĩ menór de eda vautisádo ojapóramo álgo ivaíva oñemombeʼu vaʼerã umi ansiánope. Umi ansiáno oñerreuni vove hendive, iporãta oĩ avei ituakuéra haʼéva Testígo vautisádo. Haʼekuéra oñehaʼã vaʼerã oipytyvõ pe komite hudisiálpe, ndoikói vaʼerã omoʼã ifamíliape ani hag̃ua oñedisiplina chupe. Umi ansiáno oñehaʼãmbaite vaʼerã okorrehi ha oipytyvõ chupe oñemoĩ porã jey hag̃ua Jehovándi, ojejapoháicha avei umi ermáno majór de edándi. Péro pe menór de eda noñarrepentíriramo, oñemosẽ vaʼerã kongregasióngui.

³⁸ Peteĩ puvlikadór no vautisádope ndaikatúi oñemosẽ kongregasióngui pórke ndahaʼéi gueteri Testígo vautisádo. Péro, ¿mbaʼépa oikóta hembiapo vaíramo? Ikatu ningo oime haʼe nontendeporãi raʼe peteĩ mbaʼe Ñandejára omandáva, upévare umi ansiáno omeʼẽta pe puvlikadórpe konsého oipytyvõtava chupe oguata jey hag̃ua “derechoite pe tape porãre” (Heb. 12:13).

³⁹ Mokõi ansiáno oñembyatýta hendive ha oñehaʼãta oipytyvõ chupe, péro pe puvlikadór no vautisádo noñarrepentíriramo hembiapo vaikuégui, ojejapóta peteĩ anúnsio pe kongregasiónpe. Pe anúnsio heʼíta péicha: “[Pe persóna réra] ndahaʼevéima puvlikadór no vautisádo”. Upe guive pe kongregasión otratáta chupe peteĩ persóna ko mundopeguáicha. Ndahaʼéiramo jepe peteĩ oñemosẽva kongregasióngui, umi ermáno oñatende vaʼerã ojeheʼa hag̃ua hese (1 Cor. 15:33). Ndojeaseptamoʼãvéima chugui iñinfórme.

⁴⁰ Ohasávo pe tiémpo, pe persóna ikatu oservise jey de puvlikadór no vautisádo. Upéicharõ mokõi ansiáno oñembyatýta hendive ohecha hag̃ua mbaʼetekópa oho hese. Oiméramo okumpli umi rrekisíto, ojejapóta ko anúnsio kongregasiónpe: “[Pe persóna réra] haʼe jeýma peteĩ puvlikadór no vautisádo”.

⁴¹ Ñande ningo javyʼaiterei jaservívo Jehovápe, pórke haʼe omeʼẽ ñandéve opa mbaʼe ñaikotevẽva ñamombarete hag̃ua ñande jerovia. Jareko heta aliménto espirituál ha pe enseñánsa verdadéra haʼete voi y roʼysã asy. Jehová ñandeprotehe iñorganisasión odirihíva Cristo rupive (Sal. 23; Is. 32:1, 2). Jehová organisasión haʼete voi peteĩ paraíso, ha ñaĩ rupi upépe ñañeñandu segúro porã, koʼytevéntema jahechávo koʼã ára pahápe mbaʼéichapa ivai ko múndo.

⁴² Pe enseñánsa verdadéra osegíta omimbi pe kongregasión ipotĩramo ha oikóramo pyʼaguapýpe (Mat. 5:16; Sant. 3:18). Péicha Jehová ñanevendesíta, ha jahecháta mbaʼéichapa hetave hénte oñemoag̃ui iñorganisasiónre ikatu hag̃uáicha oikuaa ha oadora chupe ñanendive.