¿Mbaʼéichapa umi ansiáno oipytyvõ umi oñenohẽ vaʼekuépe kongregasióngui?

1, 2. a) ¿Mbaʼépa Jehová opensa umi pekadór noñarrepentiséivare? b) ¿Mbaʼépa Jehová ohaʼarõ ojapo umi opeka vaʼekue?

JEHOVÁ ndohejái isiervokuérape ojapo ojaposévante, pórke haʼe ndochaʼeiete pe pekádore (Sal. 5:​4-6). Upévare haʼe oipota ñande jajapo imandamientokuéra heʼíva, oĩva Ñandejára Ñeʼẽme. Péro Jehová nohaʼarõi ñande ñandeperfektotaha entéro mbaʼépe, pórke oikuaa ñaneimperfektoha (Sal. 130:​3, 4). Upéicharõ jepe, haʼe nopermitíri ipuévlo apytépe oĩ umi ‘kuimbaʼe aña oipurúva Ñandejára mbaʼeporã ojapo hag̃ua umi mbaʼe ohechaukáva notĩriha hembiapo vai hag̃ua’ (Jud. 4). La Biblia heʼi voi ‘oñehunditaha umichagua hénte añáme’ Ñandejára gérra héravape Armagedón (2 Ped. 3:7; Apoc. 16:16).

² Péro Jehová ndoipotái avave oñehundi. Jahecháma haguéicha umi ótro artíkulope, la Biblia heʼi porã Jehová ‘oipotaha enterove oñarrepenti’ (2 Ped. 3:9). Umi ansiáno osegi avei Jehová ehémplo. Upévare ipasiénsia ha oñehaʼãmbaite oipytyvõ pe opeka vaʼekuépe okambia hag̃ua la ojapóva oĩ porã jey hag̃ua Ñandejárandi. Péro naentéroi oñarrepenti (Is. 6:9). Oĩ osegíva hembiapo vai, jepe umi ansiáno heta vésema oñehaʼã oipytyvõ chupe oñarrepenti hag̃ua. ¿Mbaʼépa ojejapo peichagua situasiónpe?

“PENOHẼ KONGREGASIÓNGUI PE PERSÓNA OJAPÓVAPE MBAʼE VAI”

 3. a) Ohechaukaháicha la Biblia, ¿mbaʼépa ojejapo vaʼerã oĩramo peteĩ opekáva ha noñarrepentíriva? b) Peteĩ persóna noñarrepentíriramo, ¿mbaʼérepa jaʼekuaa haʼe voi odesidi hague oñenohẽtaha chupe kongregasióngui?

³ Peteĩ opekáva noñarrepentíriramo, umi ansiáno osegítamante pe instruksión oĩva 1 Corintios 5:​13-pe. Upépe heʼi: “Penohẽ kongregasióngui pe persóna ojapóvape mbaʼe vai”. Jaʼe porãsérõ g̃uarã pe opeka vaʼekue la odesidíva oñenohẽtaha chupe kongregasióngui. Heʼiháicha la Biblia haʼe omonoʼõ hína pe oñotỹ vaʼekue (Gál. 6:7). ¿Mbaʼérepa ikatu jaʼe upéva? Pórke umi ansiáno hetáma oñehaʼãramo jepe oipytyvõ pe persónape oñarrepenti hag̃ua, haʼe nokambiaséi (2 Rey. 17:​12-15). Umi mbaʼe ojapóva rupive, upe persóna ohechauka odesidiha omboyketaha Jehová mandamientokuéra (Deut. 30:​19, 20).

 4. ¿Mbaʼérepa oñanunsia oñenohẽ jave kongregasióngui peteĩ noñarrepentírivape?

⁴ Oñenohẽ jave kongregasióngui peteĩ noñarrepentírivape ojejapo peteĩ anúnsio, péicha ojeavisa pe kongregasiónpe pe persóna ndahaʼeveimaha testígo de Jehová.a ¿Maʼerãpa ojejapo ko anúnsio? Ndahaʼéi oñemotĩ hag̃ua pe persónape, síno ikatu hag̃uáicha umi ermáno ha ermána ojapo la Biblia heʼíva, pórke Ñandejára Ñeʼẽ omanda ‘anive hag̃ua jajeheʼa’ peichagua persónare ha ani hag̃ua ‘ni jakaru umichaguándi’ (1 Cor. 5:​9-11). Jehová ningo oikuaa porã mbaʼérepa ojerure ñandéve upéva. Apóstol Pablo heʼi vaʼekue: “Michĩmi levadúra ombovupaiteha pe mása kompletoite” (1 Cor. 5:6). Noñenohẽiramo kongregasióngui peteĩ noñarrepentírivape, umi ótro ermáno ha ermána ikatu ou ikangy openságui natekotevẽiha iñeʼẽrendu Jehová mandamientokuérape (Prov. 13:20; 1 Cor. 15:33).

 5. Oñenohẽ jave peteĩ persónape kongregasióngui, ¿mbaʼéichapa jahecha vaʼerã chupe ha mbaʼérepa?

⁵ Oñenohẽramo kongregasióngui peteĩ ermáno térã ermánape, ¿mbaʼéichapa jahecha vaʼerã chupe upe guive? Jaikuaa ningo ndajajeheʼamoʼãiha hese, péro nañapensamoʼãi naipohãveimaha. Upe persóna haʼe peteĩ ovecha okañy vaʼekue ikatúva hína ou jey. Ñanemanduʼa vaʼerã pe persóna oñemeʼẽ hague avei Jehovápe. Koʼag̃aiténte ñambyasýramo jepe, ohechauka nokumpliriha pe promésa ojapo vaʼekue Jehovápe, ha upéva ikatu ipeligrosoiterei chupe g̃uarã (Ezeq. 18:31). Péro Jehová omeʼẽ aja tiémpo, oĩ hína esperánsa pe persóna ou jeývo kongregasiónpe. ¿Mbaʼéichapa umi ansiáno ikatu oipytyvõ peteĩ persóna oñenohẽ vaʼekuépe kongregasióngui?

¿MBAʼÉICHAPA UMI ANSIÁNO OIPYTYVÕ UMI OÑENOHẼ VAʼEKUÉPE KONGREGASIÓNGUI?

 6. ¿Mbaʼe mbaʼépa ojapóta umi ansiáno oipytyvõ hag̃ua peteĩ oñenohẽ vaʼekuépe kongregasióngui?

⁶ Oñenohẽ jave peteĩ persónape kongregasióngui, ¿ojehejápa chupe haʼeño vera ha umi ansiáno noipytyvõvéima chupe oñemoag̃ui jey hag̃ua Jehováre? Ni mbaʼevéicharõ. Umi ansiáno heʼi jave peteĩ persónape oñenohẽtaha chupe kongregasióngui, upe komite oexplika avei chupe mbaʼépa ojapo vaʼerã ou jey hag̃ua kongregasiónpe. Péro umi ansiáno ikatu avei ojapo ótra kósa. La majoría umi kásope, haʼekuéra heʼíta pe opeka vaʼekuépe oñembyatyse jeyha hendive unos kuánto mése haguépe ohecha hag̃ua oimépa okambiáma raʼe opensa lája. Upéi pe persóna naiprovlémairõ oñembyaty hag̃ua umi ansiánondi, upe rreuniónpe haʼekuéra omokyreʼỹta chupe oñarrepenti hag̃ua ha ou jey hag̃ua kongregasiónpe. Oimérõ pe tiémpope g̃uarã pe persóna neʼĩra oñarrepenti, lomímonte umi ansiáno oñehaʼã jeýta un tiémpo haguépe oñeʼẽ jey hendive.

 7. Oñenohẽ jave peteĩ persónape kongregasióngui, ¿mbaʼéichapa umi ansiáno ohechauka oporoporiahuverekoha Jehová ojapoháicha? (Jeremías 3:12).

⁷ Osegi hag̃ua Jehová ehémplo, umi ansiáno ohechauka oiporiahuverekoha umi oñenohẽ vaʼekuépe kongregasióngui. Por ehémplo ñanemanduʼa yma, Jehová nohaʼarõi hague ipuévlo Israel oñarrepenti raẽ haʼe oipytyvõma hag̃ua chupekuéra. Umi israelita ni michĩmi ndohechaukái gueteri oñarrepentiha ha Jehová ja omondóma hendapekuéra iprofetakuérape. Pe segundo artíkulo oĩva ko rrevístape, jahecha kuri Jehová heʼi hague Oséaspe oho hag̃ua oheka hembirekópe operdona hag̃ua chupe, ha upérõ guare Oseas rembireko opeka gueteri hína kuri. Péicha Jehová omboʼe vaʼekue ipuévlope haʼe oiporiahuverekoitereiha chupekuéra (Os. 3:1; Mal. 3:7). Upévare umi ansiáno osegi Jehová ehémplo ha oipotaiterei voi pe hembiapo vaíva oñarrepenti ha ou jey kongregasiónpe. Umi ansiáno ombohapepa voi pe persónape ifásil hag̃ua chupe ojapo upéva (elee Jeremías 3:12).

 8. ¿Mbaʼéichapa ñantende porãve Jehová oiporiahuverekoha umi oheja vaʼekuépe chupe? (Lucas 15:7).

⁸ Pe segundo artíkulo oĩvape ko rrevístape, jahecha kuri Jesús oñeʼẽ hague pe taʼýra ofalla vaʼekuére. ¿Mbaʼéichapa orreaksiona vaʼekue pe túa ohechárõ guare itaʼýra oho jeyha hógape? Ohecháre chupe mombyry guive odipara hendápe, ha “hatã oañuã itaʼýrape ha ohetũ chupe” (Luc. 15:20). Pe túa nohaʼarõi vaʼekue itaʼýra ojerure raẽ operdona hag̃ua chupe, síno pe túa voi la ohóva itaʼýra rendápe ohayhúgui chupe. Amo ipahápe, oimeraẽ túa ohayhúva ifamíliape ojapótante voi upéva. Péicha avei Jehová ohechaukase ohayhuha umi oheja vaʼekuépe chupe, ha umi ansiáno oñehaʼãmbaite osegi Jehová ehémplo. Haʼekuéra oipotaiterei pe ovecha okañy vaʼekue ou jey kongregasiónpe, ifamília apytépe (Luc. 15:​22-24, 32). Peteĩ opeka vaʼekue oñarrepenti jave ojevyʼa yvágape, péro avei ikatu jaʼe ko yvy ape ári ojevyʼaha (elee Lucas 15:7).

 9. ¿Mbaʼépa Jehová oipotaiterei ojapo umi opeka vaʼekue?

⁹ Hetáma ñaanalisa Jehová nopermitiriha umi noñarrepentíriva osegi kongregasiónpe. Péro jahecha avei haʼe oñehaʼãha oipytyvõ chupekuéra, pórke oipotaiterei oñemoag̃ui jey hese. La Biblia omombeʼu mbaʼépa Jehová oñandu umi opekáva oñarrepenti jave. Oseas 14:4 heʼi: “Amongueráta chupekuéra ha nachetraisionamoʼãvéima. Ahayhúta chupekuéra che pyʼaite guive, pórke che ndachepochyvéima hendivekuéra”. Ko téxto ohechauka porã umi ansiánope la Jehová oñandúva. Upévare peteĩ opeka vaʼekue oñepyrũmíre ohechauka oñarrepentiha, umi ansiáno ensegídama voi oipytyvõ chupe. Avei pe téxto ikatu omomýi umi oheja vaʼekuépe Jehovápe oñemoag̃ui jey hag̃ua hese operdeʼỹre tiémpo.

10, 11. Oimérõ oĩ umi ymáma oñenohẽ vaʼekue kongregasióngui, ¿mbaʼéichapa umi ansiáno oipytyvõta chupekuéra?

¹⁰ Ikatu oime ojapóma unos kuánto áño oñenohẽ hague peteĩ persónape kongregasióngui. Péicha jave, ¿mbaʼéichapa ikatu oipytyvõ chupekuéra umi ansiáno? Ikatu oime koʼã persóna ndojapovéima pe mbaʼe vai ojapo vaʼekue oñenohẽrõ guare chupekuéra kongregasióngui. Sapyʼánte ikatu voi ni naimanduʼavéi hikuái mbaʼérepa oñenohẽ vaʼekue chupekuéra. Tahaʼe haʼeháicha, umi ansiáno oñehaʼãmbaitéta otopa koʼãichagua persónape ovisita hag̃ua chupekuéra. Umi ansiáno ovisita jave pe persónape ikatu oñemboʼe hendive ha mborayhúpe omokyreʼỹ vaʼerã chupe ou jey hag̃ua kongregasiónpe. Katuete pe persóna ikangýta oimérõ ojapóma heta áño oñemomombyry hague kongregasióngui. Upévare pe persóna heʼíramo oñemoag̃uise jeyha kongregasiónre, umi ansiáno ohecháta ojejapo hag̃ua chupe peteĩ kúrso bíblico jepe neʼĩra oñerreadmiti chupe. Entéro umi kásope umi ansiáno la oorganisa vaʼerã umi kúrso bíblico.

¹¹ Jehová ningo oporohayhueterei, ha umi ansiáno oñehaʼãmbaite osegi iñehémplo. Upévare umi ansiáno oheka umi oheja vaʼekuépe Jehovápe, ha oasegura koʼã persónape Jehová ohaʼarõha chupekuéra ifamiliakuéra apytépe. Peteĩ persóna opeka vaʼekue oñarrepentívo ha ohejávo hembiapo vaikue, natekotevẽvéima oñehaʼarõve oñerreadmiti hag̃ua chupe (2 Cor. 2:​6-8).

12. a) ¿Mbaʼéicha javépa tekotevẽ umi ansiáno oñatendeterei? b) ¿Mbaʼérepa nañapensái vaʼerã oĩha káso Jehová ndaikatuihápe oporoporiahuvereko? (Ehecha pe nóta).

¹² Oĩ umi káso tekotevẽhápe umi ansiáno oñatende porã orreadmiti mboyve peteĩ persónape. Por ehémplo oimérõ pe persóna oavusa raʼe peteĩ menór de eda rehe, oimérõ haʼe raʼe peteĩ apóstata, térã oimérõ oplanea voi ombyai imatrimónio ojedivorsia hag̃ua. Koʼãichagua kásope umi ansiáno tekotevẽterei ojasegura porã pe persóna oñarrepentípa añetehápe (Mal. 2:14; 2 Tim. 3:6). Péicha umi ansiáno ohechaukáta oñangareko porãha umi ermáno ha ermána oĩvare kongregasiónpe. Péro avei jaikuaa Jehová oasepta jeytaha ipuévlo apytépe oimeraẽ ohechaukávape oñarrepentiha ha ohejaitéva pe mbaʼe vai ojapo vaʼekue. Péicha jahecha umi ansiáno oñatendetereitaha oñepresenta jave umi káso oĩháme peteĩ persóna oporotraisiona vaʼekue. Péro avei umi ansiáno nopensái vaʼerã Jehová núnka ndaikatumoʼãiha oiporiahuvereko koʼãichagua persónape (1 Ped. 2:10).b

¿MBAʼÉPA IKATU OJAPO PE KONGREGASIÓN?

13. ¿Mbaʼérepa jaʼe idiferenteha jatrata lája peteĩ oñesensurávape ha peteĩ oñenohẽ vaʼekuépe kongregasióngui?

¹³ Jahecha haguéicha pe artíkulo ohasa vaʼekuépe, sapyʼánte ikatu ojejapo peteĩ anúnsio oñesensura jave peteĩ persónape. Péicha jave ñande jasegi jajeheʼa hese jaikuaágui haʼe oñarrepenti hague ha ohejaite hague hembiapo vaikue (1 Tim. 5:20). Haʼe ningo osegi oĩ pe kongregasión apytépe ha oikotevẽ ñamokyreʼỹ chupe ojapo hag̃ua iporãva (Heb. 10:​24, 25). Péro idiferentete la situasión oimérõ peteĩ persónape oñenohẽ pe kongregasióngui. Péicha jave ñande ‘ndajajeheʼavéima hese’ ni ‘ndajakarúi umichaguándi’ (1 Cor. 5:11).

14. ¿Mbaʼépa ikatu odesidi káda ermáno? (Ehecha pe taʼanga).

¹⁴ ¿Heʼisépa 1 Corintios 5:11 nañapenamoʼãiha ni michĩmi peteĩ persóna oñenohẽ vaʼekuére pe kongregasióngui? Ndahaʼéi la peichaite. Jaikuaaháicha ndajaikomoʼãi jajeheʼa hese. Péro káda kristiáno ikatu odesidi asegún ikonsiénsia oinvitátapa rreunionrã pe oñenohẽ vaʼekuépe kongregasióngui. Ikatu voi upe persóna haʼe ñane hénte, térã ymave haʼe raʼe ñane amigoite. ¿Ha mbaʼépa jajapóta ohóramo rreunionhápe? Ymave ni ndajasaludái vaʼekue koʼã persónape, péro ko kásope avei káda kristiáno ikatu oipuru ikonsiénsia odesidi hag̃ua mbaʼépa ojapóta. Algúno ikatu osaludase pe persónape rreunionhápe, péro ndajaikomoʼãi ñañeʼẽ puku hendive ni ndajahasamoʼãi tiémpo pe persónandi.

15. ¿Máva mávarepa oñeñeʼẽ 2 Juan 9-11-pe? (Ehecha pe rrekuádro “¿Oñeʼẽpa rakaʼe elmímo pekádore Juan ha Pablo?”).

¹⁵ Ikatu algúno opensa: “La Biblia ningo heʼi peteĩ kristiáno ni ndosaludái vaʼerãha umi opekávape, pórke osino ñamoirũ hína chupekuéra hembiapo vaikuépe” (elee 2 Juan 9-11). Ñaanalisáramo mbaʼe situasiónpepa ojeskrivi vaʼekue la heʼíva ko téxto, ñantende upépe oñeñeʼẽha umi apóstatare ha umi persóna oikóvare omboliga ótrope ojapo hag̃ua ivaíva (Apoc. 2:20). Upévare umi ansiáno ndovisitamoʼãi pe persónape oimérõ haʼe omboʼe umi enseñánsa japu térã omomýi hína ótrope hembiapo vai hag̃ua. Upéicharamo jepe koʼã persóna ikatu hína oñarrepenti, péro oiko peve upéva ndajasaludamoʼãi chupekuéra ni nañainvitamoʼãi umi persónape oho hag̃ua rreunionhápe.

JAIPORIAHUVEREKO HA JAPOROHAYHU JEHOVÁ OJAPOHÁICHA

16, 17. a) ¿Mbaʼépa Jehová oipota ojapo umi opeka vaʼekue? (Ezequiel 18:32). b) ¿Mbaʼéichapa umi ansiáno ohechauka haʼeha Ñandejára ajudánte?

¹⁶ ¿Mbaʼépa ñaaprende umi 5 artíkulo oĩvape ko rrevístape? Jahecha Jehová ndoipotaiha avave oñehundi (elee Ezequiel 18:32). Haʼe oipota umi opeka vaʼekue oĩ porã jey hendive (2 Cor. 5:20). Upévare ymaite guive Jehová heta vése omokyreʼỹ isiervokuéra oñemomombyrývape oñarrepenti ha oñemoag̃ui jey hag̃ua hese. Umi ansiáno oĩva kongregasiónpe ningo haʼe hína Ñandejára ajudánte ha ombaʼapo Jehová ndive oipytyvõ hag̃ua umi opekávape oñarrepenti hag̃ua (Rom. 2:4; 1 Cor. 3:9).

¹⁷ Ñañeimahinamína mbaʼeichaitépa ojevyʼa yvágape peteĩ pekadór oñarrepenti jave. Jehová ovyʼaiterei káda ke peteĩ ovecha okañy vaʼekue ou jey kongregasiónpe. Ha ñande jahayhuvéntema Jehovápe jahechávo ñandeporiahuvereko ha imbaʼeporãha ñanendive nañamereséiramo jepe (Luc. 1:78).