“Peservi Jehovápe hembiguáiramo”

 1. a) ¿Mbaʼépa umi hénte opensa ohendúvo pe ñeʼẽ esklávo? b) ¿Mbaʼépa Pablo ontendekase heʼírõ guare ojeservi vaʼerãha ‘Jehovápe tembiguáiramo’?

UMI hénte ohendúvo pe ñeʼẽ esklávo térã tembiguái, opensa umi persóna oñemaltrata vaipávare. Péro la Biblia noñeʼẽi koʼãichagua esklávorente, síno oñeʼẽve umi oservívare Ijára ipyʼaporãvape ohayhúgui chupe. Por ehémplo, Pablo heʼi umi kristiáno oiko vaʼekuépe síglo primérope, oservi hag̃ua “Jehovápe hembiguáiramo”. Upéicha ontendeka oservi vaʼerãha hikuái ohayhúgui chupe (Rom. 12:11, NM). ¿Mbaʼépa heʼise jaiko Ñandejára rembiguáiramo? ¿Mbaʼépa jajapo vaʼerã ani hag̃ua oiko ñandehegui Satanás térã ko múndo esklávo? ¿Mbaʼépa ohupytýta Jehová rembiguái iñeʼẽrendúva?

 2. a) ¿Mbaʼépa ikatu omomýi peteĩ tembiguáipe osegi hag̃ua oservi ipatrónpe? b) ¿Maʼerãpa pe patrón ombokua hembiguái nambi?

² Pe Léi Jehová omeʼẽ vaʼekue umi isrraelítape ñanepytyvõ ñantende hag̃ua mbaʼeichagua esklávo vaʼerãpa ñande. Peteĩ esklávo evréope oñemosãso vaʼekue oservi rire ipatrónpe 6 áño (Éx. 21:2). Péro Jehová Léi heʼi peteĩ tembiguái ohayhúramo ipatrónpe ha ndohejaséi chupe, ikatunteha osegi hendive. Upearã ipatrón omoĩ vaʼerã chupe peteĩ okẽre térã pe márkore ha ombokua chugui upépe inambi peteĩ punsónpe (Éx. 21:5, 6). ¿Mbaʼérepa ombokua vaʼerã chupe inambi? Idióma evréope ojeʼe hag̃ua “ñeʼẽrendu” ojeporu peteĩ ñeʼẽ heʼiséva peteĩ tapicha ojapysaka térã ohenduha. Upéicharõ, oñembokuávo peteĩ tembiguáipe inambi, ojehechauka hína haʼe osegiseha oservi ipatrónpe ha iñeʼẽrenduseha chupe. Upéva ñanepytyvõ ñantende hag̃ua mbaʼépa heʼise ñañemeʼẽha Jehovápe: ñaneñeʼẽrendu Ñandejárape jahayhúgui chupe.

 3. ¿Mbaʼérepa ñañemeʼẽ Jehovápe?

³ Jajevautisa mboyve opavave jadesidíma kuri jaservitaha Jehovápe ha jaikotaha hembiguáiramo, ha avave nañandeovligái upearã. Ñande jadesidi jajapo upéva ñaneñeʼẽrenduségui chupe ha ñakumplise rupi hembipota. Umi mitã jepe oñemeʼẽ Jehovápe ha ojevautisa haʼekuéra voi odesidi rupi, ndahaʼéi ombovyʼaséguinte ituvakuérape. Upeichaite, ñande ñañemeʼẽ Ñandejára yvagayguápe jahayhúgui chupe. Juan heʼi vaʼekue: “Jahayhu Ñandejárape heʼise ñakumpli imandamiénto” (1 Juan 5:3, NM).

 4. ¿Mbaʼépa jajapo vaʼerã oiko hag̃ua ñandehegui “hustísia rembiguái”?

⁴ Jaagradesete ningo Jehovápe oheja haguére jaiko hembiguáiramo. Jajerovia rupi Jesús sakrifísiore, jajei pekádo poguýgui. Añetehápe ñaneimperfékto gueteri, upéicharõ jepe jadesidíma ñaneñeʼẽrendu Jehová ha Jesúspe ha ñañemoĩ ipoguypekuéra. Pablo omyesakã vaʼekue upéva ohaírõ guare: “Pepensa vaʼerã pemanomaha ha ndaikatuveimaha pepeka. Pepensa vaʼerã avei pende rekove ojeporutaha ojejapo hag̃ua Ñandejára oipotáva, peẽ haʼégui Cristo Jesús disípulo”. Upéi heʼi avei: “Peẽ peikuaa akóinte peneñeʼẽrendúramo peteĩ tapichápe, peẽ haʼeha hembiguái. Upéicharõ, peẽ peikórõ pekádo rembiguáiramo pemanóta. Péro peikórõ Ñandejára rembiguáiramo ha peneñeʼẽrendu chupe, penderekojojáta. Peẽ haʼe vaʼekue pekádo rembiguái, péro koʼág̃a peneñeʼẽrendu pende pyʼaite guive Ñandejárape ha pejapo meme haʼe penemboʼe vaʼekue. Upévare aagradese Ñandejárape. Añetehápe, peẽ pejei rire pekádogui, oiko pendehegui hustísia rembiguái” (Rom. 6:11, 16-18, NM). Jahechakuaa Pablo heʼi hague “peneñeʼẽrendu pende pyʼaite guive”. Upéicharõ, ñañemeʼẽvo Jehovápe oiko ñandehegui “hustísia rembiguái”.

 5. ¿Mbaʼépa ñambohovái vaʼerã káda día, ha mbaʼérepa?

⁵ Oiko rire ñandehegui Ñandejára siérvo, jasegi vaʼerã ñambohovái mokõi mbaʼe ijetuʼúva. Ñepyrũrã jagueropuʼaka vaʼerã ñane imperfeksión Pablo ojapo haguéicha. Haʼe ohai vaʼekue: “Añetehápe, che pyʼaite guive aguerohory Ñandejára Léi, péro ahecha che retépe oĩha ótra léi, oñorairõva Ñandejára Léi ndive oĩva che akãme, ko léi haʼe hína pe pekádo oĩva che retépe ha cheguerekóva ipoguýpe” (Rom. 7:22, 23, NM). Ñande avei ñañorairõ vaʼerã káda día ñande rete rembipota vai ndive ñaneimperfékto rupi. Upévare apóstol Pedro heʼi ñandéve: “Peẽ ningo peteĩ puévlo orekóva liverta, péro ani peiporu pe liverta pejapo hag̃ua ivaíva. Upéva rangue, peservi Ñandejárape tembiguáiramo” (1 Ped. 2:16, NM).

6, 7. ¿Mbaʼépa ojapo Satanás ikatu hag̃uáicha ko múndo ñandestira?

⁶ Upéi avei ñambohovái vaʼerã ko múndo oĩvape umi demónio poguýpe. Satanás, ko múndo ruvicha, ñaneraʼã opáichavo oipotágui ñamboyke Jehová ha Jesúspe. Haʼe ningo ñanderekose ipoguýpe ha upearã omoĩ ñandéve umi mbaʼe ñandepyʼaraʼãva (elee Efesios 6:11, 12). Por ehémplo, omoĩ ko múndope heta mbaʼe iporãitereirõguáicha ha ikatúva ñandestira. Upévare apóstol Juan ohai: “Oĩramo ohayhúva ko múndo, péva ndohayhúi hína pe Túvape. Cháke entéro umi mbaʼe oĩva ko múndope ndoúi pe Túvagui, síno ou ko múndogui (por ehémplo, ñande rete rembipota vai, ñande resa oipotáva, ha jaiko jajechaukase umi mbaʼe jarekóvare)” (1 Juan 2:15, 16, NM).

⁷ Koʼág̃arupi umi hénte noñekontentái voi umi mbaʼe orekóvare. Satanás ogueroviauka chupekuéra ipláta heta vaʼerãha ovyʼa hag̃ua. Opárupi oĩ heta hetave negósio ha ojejapo propagánda ikatu hag̃uáicha oñepensa javyʼaveha ñanekomodida hetáramo ha jaikóramo diversión rapykuéri. Umi ahénsia oikuaveʼẽ viáhe heta lugár neporã porãvape, ha pyʼỹinte ojeviaha umi tapicha ndojapóivandi la Biblia heʼíva. Umi hénte ñandejopy opáicha rei jaiko hag̃ua ko múndope ojeikoháicha.

8, 9. ¿Mbaʼépa ikatu oiko ñanderehe, ha mbaʼérepa upéva ipeligrosoite?

⁸ Pedro imanduʼa vaʼekue umi kristiáno opensávare ko múndope oñepensaháicha, ha heʼi: “Koʼãva ovyʼaiterei oñemeʼẽgui hete rembipotápe, arakuépe jepe. Haʼekuéra ningo peteĩ mbaʼe ikyʼa ha ivaíva pende apytépe, oĩ jave penendive umi karu guasuhápe, ha ovyʼaiterei hikuái ombotavy jave ótrope omboʼévo umi japu. Umi mbaʼe heʼíva hikuái tuichaiterei guaʼu, péro ndovaléi mbaʼeverã. Oĩngo hénte apenaite ojesalváva hína umi oikóvagui tape vaíre; ha umívape haʼekuéra ombotavy ha upearã omboliga chupekuéra oiko hag̃ua hete rembipota vai rapykuéri ha hembiapo vai hag̃ua otĩʼỹre. Koʼã hénte aña opromete avei chupekuéra liverta, péro haʼekuéra voi oiko tembiguáiramo ñehundi poguýpe. Upe ohejáva ótro oreko chupe ipoguýpe, oiko chugui hembiguái” (2 Ped. 2:13, 18, 19, NM).

⁹ Jaikóramo jajapo “ñande resa oipotáva” nañanesãsomoʼãi, síno jaikóta Satanás, ko múndo ruvicha poguýpe (1 Juan 5:19, NM). Nañañatendéiramo, ikatu oiko ñandehegui umi mbaʼerepy rembiguái, ha hasyetereíta ñasẽ hag̃ua chugui.

10, 11. ¿Mávapepa Satanás oñehaʼãmbaite oity, ha mbaʼérepa umi estúdio ijyvatevéva ikatu omoñuhã chupekuéra?

¹⁰ Ojapo haguéicha hardín de Edénpe, Satanás oityse umi ndorekoguasúivape experiénsia, upévare oñehaʼãmbaite omoñuhã umi imitãvape. Haʼe ndoipotaiete avave oservi Jehovápe hembiguáiramo, tahaʼe imitãva térã kakuaa. Satanás oipota umi oñemeʼẽma vaʼekue Jehovápe ofalla ha ndoservivéi Ñandejárape.

¹¹ Ñanemanduʼami jey pe esklávo ohejávare oñembokua chupe inambi. Oime vaʼerã ñepyrũrã hasy chupe, péro upe rire okuera ha opyta peteĩ márka ohechaukáva haʼeha tembiguái. Péicha avei oiméne hasy hína peteĩ mitãrusúpe idiferénte hag̃ua ikompañerokuéragui umi mbaʼe odesidívape. Satanás oipota opavave opensa yvyporakuéra ovyʼavetaha osegíramo umi estúdio ijyvatevéva. Péro ñande jaikuaa porã nodependeiha upévare javyʼa hag̃ua. Jesús heʼi vaʼekue: “Ovyʼa umi ohechakuaáva oikotevẽha Ñandejárare” (Mat. 5:3, NM). Ñande jaikove jaservi hag̃ua Jehovápe, ndahaʼéi Satanáspe. Jahayhu Ñandejára Léi ha jajepyʼamongeta hese káda día (elee Salmo 1:1-3). Umi ostudiáva universidápe ndorekoguasuvéima tiémpo ojepyʼamongeta hag̃ua la Biblia heʼívare ha omombarete hag̃ua ijerovia.

12. ¿Mbaʼépa odesidi vaʼerã heta mitãrusu?

¹² Síglo primérope oĩ vaʼekue umi patrón ojopyetereíva hembiguaikuéra kristiáno ndive. Upévare, ohai ypýrõ guare umi Corintoguápe, Pablo oporandu: “¿Nde piko tembiguái raʼe reñehenóirõ guare? Ani reheja upéva ndepyʼapy”. Ha upéi heʼi: “Péro ikatúramo ereko liverta, reaprovecha vaʼerã” (1 Cor. 7:21, NM). Upéicha jave, ikuentave pe esklávo isãso chugui ikatu vovéntema. Ñane tiémpope avei heta tetãme pe goviérno voi heʼi mboy áñopa ojestudia vaʼerã. Upéi umi mitãrusu ikatúma odesidi mbaʼépa ojapóta, ha odesidikuaa oservi Jehovápe de tiémpo kompléto. Péro odesidíramo oho universidápe, ikatu operde iliverta (elee 1 Corintios 7:23).

13. ¿Mbaʼeichagua edukasiónpa oipytyvõve Jehová siervokuérape?

¹³ Pablo heʼi vaʼekue umi kristiáno Colosasguápe: “Peñatendéke ani avave oiporu yvypóra arandu, ni heʼi peẽme vyrorei penembotavy hag̃ua ha pendereity iñuhãme. Haʼekuéra ojevale umi kostúmbre kuimbaʼekuéra omboʼévare ha umi mbaʼe oñepensávare ko múndope, ha ndoiporúi Cristo omboʼéva” (Col. 2:8, NM). Heta mboʼehára koʼag̃agua ojevale “yvypóra arandu” rehe ha “umi kostúmbre kuimbaʼekuéra omboʼévare”. Heta persóna osegíva umi edukasión ijyvatevéva omohuʼã ijestúdio péro ni ndoikuaái mbaʼéichapa ombaʼapo vaʼerã, térã mbaʼéichapa ombohováita umi provléma káda diagua. Jehová rembiguaikuéra katu odesidi ostudia umi mbaʼe opreparátava chupekuéra oñemantene hag̃ua oservívo Jehovápe. Oñehaʼãmbaite hikuái osegi pe konsého Pablo omeʼẽ vaʼekue Timotéope: “Añetehápe, tuicha ideprovécho hína ñamombaʼeguasu Ñandejárape ñande pyʼaite guive, javyʼáma guive pe jarekomívare. Upéicharõ, jarekóma guive jaʼumi vaʼerã ha ñañemoʼã hag̃ua, javyʼáma vaʼerã umi mbaʼére” (1 Tim. 6:6, 8, NM). Oiko rangue ombyaty diplóma ha título, pe kristiáno oiporupaite itiémpo predikasiónpe ikatu hag̃uáicha oipytyvõ heta héntepe oiko hag̃ua chuguikuéra Jesús disípulo (elee 2 Corintios 3:1-3).

14. Ohechaukaháicha Filipenses 3:8, ¿mbaʼépa opensa vaʼekue Pablo pe priviléhio orekóvare oservívo Jehová ha Jesúspe?

¹⁴ Ñapensamína apóstol Pablo ehémplo rehe. Chupe ningo omboʼe vaʼekue Gamaliel, peteĩ mboʼehára ikatupyrýva pe Léi hudíape. Pe edukasión oñemeʼẽ vaʼekue Páblope ikatu ñambojoja umi oñemboʼévare koʼág̃arupi universidápe. ¿Mbaʼépa opensa haʼe umívare okomparávo pe priviléhio orekóvare oservívo Jehová ha Jesúspe tembiguáiramo? Haʼe voi heʼi: “Chéve g̃uarã koʼã mbaʼe ndovaléi mbaʼeverã aikuaa rupi che Ruvicha Cristo Jesúspe”. Ha upéi heʼi: “Hesehápe ahejapaite opa mbaʼe areko vaʼekue ha ahecha umíva ytýramo, ikatu hag̃uáicha agana hetave mbaʼe asegívo Crístope” (Filip. 3:8, NM). Umi mitãrusu ha ituvakuéra opensáramo Pábloicha ikatúta odesidi porã upe ojapótava (ehecha umi taʼanga).

15, 16. ¿Mbaʼeichagua edukasiónpa oñemeʼẽ Jehová organisasiónpe, ha maʼerãpa?

¹⁵ ¿Mbaʼéichapa oñepensa umi universidaháre? Heta oĩ upérupi oimoʼãva orekoha liverta opuʼã hag̃ua pe goviérnore térã umi ótra autoridáre (Efes. 2:2). Péro Jehová organisasiónpe katu pyʼaguapýpe oñemeʼẽ pe edukasión añetehápe ijyvatevéva. Por ehémplo, káda semána Jehová ñanerekomboʼe pe Eskuéla Jaiporukuaa Hag̃ua la Biblia rupive. Avei oĩ umi eskuéla ikatuhápe oho umi prekursór soltéro (Eskuéla Vívlika umi Kuimbaʼe Soltérope g̃uarã) ha umi prekursór omendáva (Eskuéla Vívlika umi Omendávape g̃uarã). Koʼãichagua edukasión ñanepytyvõ ñaneñeʼẽrendu hag̃ua Jehovápe, ñande Ru yvagaygua.

¹⁶ Ikatu avei “jaipyguara” jaheka hag̃ua heta mbaʼerepy omombaretéva ñande jerovia pe Índice de las publicaciones Watch Tower-pe ha pe CD-ROM Watchtower Library-pe. Pe edukasión oñemeʼẽva Jehová organisasiónpe ñanepytyvõ ñamombaʼeguasu hag̃ua Ñandejárape ha ñaipytyvõ hag̃ua ñande rapichakuérape oñemoĩ porã jey hag̃ua hendive (2 Cor. 5:20). Péicha avei koʼã tapicha ikatúta omboʼe hetave héntepe oikuaa hag̃ua Jehovápe (2 Tim. 2:2).

17. ¿Mbaʼépa ohupyty umi oiporavóva pe edukasión añetehápe ijyvatevéva?

¹⁷ Jesús oñeʼẽrõ guare umi talénto rehe, heʼi vaʼekue pe patrón ofelisitaha mokõi hembiguáipe iñeʼẽrendu haguére. Upéi pe patrón ohechauka oguerohoryha umi esklávope omeʼẽvévo chupekuéra tuichave rresponsavilida (elee Mateo 25:21, 23). Koʼág̃a avei, jaiporavóramo pe edukasión añetehápe ijyvatevéva jahupytýta heta mbaʼe porã ñanembovyʼátava. Jahechamína Michael ehémplo. Haʼe ningo inóta porãiterei ha imboʼeharakuéra oinvita chupe peteĩ rreuniónpe ohecha hag̃ua mbaʼépa ikatu ojapo oike hag̃ua universidápe. Péro haʼekuéra ni noimoʼãiete haʼe odesidiha ojapo peteĩ kúrso mbykyvéva oaprende hag̃ua peteĩ ofísio. Sapyʼaitérõ g̃uarã Michael ombaʼapóma, ikatúma oñemantene ha ojapo iprekursorádo rregulár. ¿Ombyasýpa odesidi haguére upéicha? Haʼe heʼi: “Pe edukasión omeʼẽva chéve Jehová organisasión aservívo prekursór ha ansiánoramo, ndaijojahái. Umi vendisión ha priviléhio arekóva koʼág̃a omyengovia opa mbaʼe ikatútava kuri agana asegi rire astudia. ¡Nambyasyiete ningo ndahái haguére pe universidápe!”.

18. ¿Mbaʼérepa jaʼekuaa iporãveha jaiporavo pe edukasión Jehová omeʼẽva?

¹⁸ Jehová omeʼẽ pe edukasión iporãvéva, ha upéva ñanepytyvõ jaikuaa hag̃ua hembipota ha jaservi hag̃ua chupe. Avei omeʼẽ ñandéve esperánsa jajeitaha “ñehundi poguýgui” ha jahupytytaha “Ñandejára raʼykuéra liverta ijojahaʼỹva” (Rom. 8:21, NM). Péro opa mbaʼe ári ñanemboʼe mbaʼéichapa jahechaukáta jahayhuha ñande Ru yvagaygua, Jehovápe (Éx. 21:5).