¿Mbaʼépa pe Konmemorasión ñanemboʼe ñande Rréigui?

1, 2. a) ¿Mbaʼérepa ndajahecharamói Jesús ñanemboʼe haguére jagueromanduʼa hag̃ua pe Konmemorasión de fórma sensílla? b) ¿Mbaʼépa ñaaprendéta Jesúsgui?

¿IKATÚPA remombeʼu mbaʼéichapa ojejapo pe Konmemorasión káda áño? Katuete ikatúta rejapo upéva pórke ko akontesimiénto isensíllo. Péro ikatu oĩ oñeporandúva: “¿Mbaʼéicha rupípa peteĩ akontesimiénto iñimportantetéva ojejapo sensillomínte?”.

² Jesús oĩrõ guare ko yvy ape ári omboʼe porã vaʼekue pe añetegua, por ehémplo siémpre omyesakã isensilloveháicha ha ndahasýi vaʼekue oñentende hag̃ua (Mat. 7:28, 29). Ohechaukárõ guare mbaʼéichapa ojegueromanduʼab vaʼerã pe Séna del Señór, ojapo upéva de fórma sensílla péro ñanemboʼéva heta mbaʼe iñimportánteva. Ñañeʼẽmína koʼág̃a pe Konmemorasiónre, ha jahecha avei mbaʼépa Jesús heʼi ha ojapo vaʼekue. Koʼã mbaʼe ñanepytyvõta ñantende porãve hag̃ua mbaʼeichaite pevépa haʼe iñumílde, ipyʼaguasu ha oporohayhu. Avei ñanemokyreʼỹta jasegi porãve hag̃ua iñehémplo.

 3. Ohechaukaháicha Mateo 26:26-28, ¿mbaʼérepa jaʼekuaa pe Konmemorasión Jesús omoñepyrũ vaʼekue isensilloha, ha mbaʼépa orrepresenta pe pan ha pe víno?

³ Jesús omoñepyrũ pe Konmemorasión umi 11 apóstol ifiélvandi. Upearã oipuru la orekóva upe moméntope, por ehémplo umi mbaʼe hemby vaʼekue pe Páskuagui, ha péicha ojapo peteĩ séna isensíllova (elee Mateo 26:26-28). Jesús oipuru pe pan ilevaduraʼỹva ha pe víno oĩmava voi upépe, ha heʼi ijapostolkuérape koʼã mokõi mbaʼe isensíllova orrepresentaha pe hete ndorekóiva defékto ha huguy oñohẽtava hesehapekuéra. Oime vaʼerã umi apóstol noñesorprendéi raʼe isensíllo haguére pe akontesimiénto pyahu. ¿Mbaʼérepa jaʼe upéva?

 4. ¿Mbaʼe konséhopa Jesús omeʼẽ Mártape ñanepytyvõva ñantende hag̃ua mbaʼérepa pe Konmemorasión isensíllo?

⁴ Ñanemanduʼamína mbaʼépa oiko kuri unos kuánto mése upe mboyve. Upérõ haimetéma kuri 3 áño Jesús oñepyrũ hague opredika. Haʼe oho kuri ovisita iñamigokuéra Lázaro, Marta ha Maríape. Upépe ohasa porã hikuái ha Jesús oñepyrũ omboʼe chupekuéra. Marta oĩ avei upérõ, péro haʼe hembiapoiterei pórke oprepara heta mbaʼe pe senag̃ua omombaʼégui la iñinvitádope. Jesús ohecha la oikóva ha mborayhúpe okorrehi Mártape. Heʼi chupe natekotevẽiha oĩ katuete hetaiterei tembiʼu ni oñembaʼapoiterei ojeprepara hag̃ua la ojeʼu vaʼerã (Luc. 10:40-42). Un tiémpo rire, ofaltápe unas kuánta óra omano hag̃ua, Jesús osegi pe konsého haʼe voi omeʼẽ vaʼekue Mártape: oprepara peteĩ akontesimiénto isensíllova. ¿Mbaʼépa ñanemboʼe Jesúsgui la ojapóva?

 5. ¿Mbaʼépa ñanemboʼe Jesúsgui pe Konmemorasión ojejapo rupi de fórma sensílla, ha mbaʼépa ohechauka Filipenses 2:5-8?

⁵ Jesús ohechauka hekomirĩha opa mbaʼe heʼi ha ojapóvape. Upévare ndajahecharamói iñumílde hague avei pe pyhare omano mboyve (Mat. 11:29). Haʼe oikuaa ojapo potaitemaha pe sakrifísio tuichavéva, ha Jehová omoingove jeytaha chupe ha onombrataha chupe Rréi yvágape. Upéicharõ jepe, Jesús noñemombaʼeguasúi vaʼekue ha upévare noñepyrũi oprepara peteĩ akontesimiénto tuicháva ojegueromanduʼa hag̃ua isakrifísio. Upéva rangue, heʼi idisipulokuérape ojapo hag̃ua una ves al áño peteĩ akontesimiénto isensíllova (Juan 13:15; 1 Cor. 11:23-25). Péicha Jesús ohechauka noñemombaʼeguasuiha. ¡Ajépa javyʼaite ñande Rréi yvagapegua hekomirĩ haguére! (Elee Filipenses 2:5-8).

 6. ¿Mbaʼéichapa ikatu jasegi Jesús ehémplo jahasáramo jepe situasión ijetuʼúva?

⁶ ¿Mbaʼéichapa ikatu jasegi Jesús ehémplo ha ñanderekomirĩ avei? Ñamotenondévo ñande rapichakuérape (Filip. 2:3, 4). Ñapensamína mbaʼépa Jesús ojapo vaʼekue pe pyhare omano mboyve. Oikuaáramo jepe omano asyetereitaha, ndojepyʼapyguasúi ijehe síno idisipulokuérare. Chupe oipyʼapyve mbaʼéichapa oñeñandúta hikuái haʼe omano rire. Upévare, upe pyharépe heta omokyreʼỹ, ohekomboʼe ha okonsola chupekuéra (Juan 14:25-31). Jahechaháicha, Jesús omotenonde vaʼekue umi ótro oikotevẽva, péicha ohechauka porãiterei iñumildeha. Ñañehaʼãmbaitékena ñande avei jasegi iñehémplo.

 7. ¿Mbaʼéichapa Jesús ohechauka kuri ipyʼaguasueterei hague omoñepyrũ riremi pe Séna del Señór?

⁷ Jesús ohechauka vaʼekue ipyʼaguasuetereiha heʼi riremi ijapostolkuérape ojapo vaʼerãha hikuái pe Séna del Señór. ¿Mbaʼérepa jaʼe upéva? Pórke oĩ kuri dispuésto okumplívo Itúa rembipota oikuaáramo jepe ojejukataha chupe oñemboja haguére hese otakyha Ñandejárare (Mat. 26:65, 66; Luc. 22:41, 42). Jesús siémpre ifiél ha iñeʼẽrendu vaʼekue ohechauka hag̃ua omombaʼeha Jehová réra. Avei ojapo upéva oipotágui ojekuaa Jehová añoite orekoha derécho ogovernávo, ha avei ikatu hag̃uáicha entéro umi oñarrepentíva oreko pe oportunida oiko hag̃ua pára siémpre. ¿Péro mbaʼépa ojapove kuri Jesús upe pyharépe? Haʼe oprepara idisipulokuérape ikatu hag̃uáicha ombohovái porã umi situasión ijetuʼúva ohasátava hikuái upe riremi.

 8. a) ¿Mbaʼépa Jesús heʼi ijapostolkuéra ifiélvape? b) ¿Mbaʼéichapa Jesús disipulokuéra ohechauka avei ipyʼaguasuha haʼe omano rire?

⁸ Jesús ohechauka vaʼekue avei ipyʼaguasu hague ombotapykuévo umi mbaʼe oipyʼapýva chupe, ha omotenondévo ijapostolkuéra ifiélva oikotevẽva. Judas oho rire, omoñepyrũ peteĩ akontesimiénto isensíllova. Upéva omomanduʼáta entéro kristiáno unhídope umi mbaʼe porã ojehupytývare Jesús ruguy rupive, ha oike rupi hikuái pe kompromíso pyahúpe (1 Cor. 10:16, 17). Jesús heʼi isegidorkuérape mbaʼépa haʼe ha Itúa ohaʼarõ chuguikuéra. Péicha oipytyvõ umi unhídope ikatu hag̃uáicha iñeʼẽrendu ha oho yvágape oĩ hag̃ua hendive (Juan 15:12-15). Oñeʼẽ avei ijapostolkuérape umi mbaʼe ijetuʼúvare ohasátava hikuái, ha heʼi chupekuéra ipyʼaguasu hag̃ua haʼéicha (Juan 16:1-4a, 33). Heta áño upe rire, idisipulokuéra osegi ipyʼaguasu ha ojesakrifika ótro rehehápe. Por ehémplo, haʼekuéra osegi oñopytyvõ ogueropuʼaka hag̃ua opaichagua situasión ijetuʼúva, osufrítaramo jepe hikuái oipytyvõ haguére iñermánope (Heb. 10:33, 34).

 9. ¿Mbaʼéichapa ikatu ñandepyʼaguasu Jesús ojapo haguéicha?

⁹ Koʼág̃a avei ñande ñandepyʼaguasu Jesús ipyʼaguasu haguéicha. ¿Mbaʼéichapa jahechauka upéva? Por ehémplo, ñaipytyvõ jave umi ermáno ojepersegívape ojerovia haguére Ñandejárare. Sapyʼánte ñane ermanokuérape oñemoinge reiete kárselpe. Péicha jave jajapo vaʼerã ikatúva guive ñadefende hag̃ua chupekuéra. Por ehémplo ikatu ñañemboʼe hesekuéra ha ñañeʼẽ ifavorpekuéra umi trivunál ha umi autorida renondépe (Filip. 1:14; Heb. 13:19). Avei jahechauka ñandepyʼaguasuha japredika memévo kyhyjeʼỹme (Hech. 14:3). Jesús ojapo haguéicha, ñande avei jajedesidíma japredikataha pyʼaguasúpe pe mensáhe oñeʼẽva pe Rréinore, oĩramo jepe oñemoĩva ñanderehe térã ñandepersegíva. Péro, ¿mbaʼépa ikatu jajapo jahechakuaa jave tekotevẽha ñandepyʼaguasuve?

10. ¿Mbaʼépa jajapo vaʼerã umi semána og̃uahẽ mboyve pe Konmemorasión, ha mbaʼérepa?

¹⁰ ¿Mbaʼépa ñanepytyvõta avei ñandepyʼaguasu hag̃ua? Ñapensa vaʼerã pe esperánsa jarekóvare Jesús sakrifísio rupive (Juan 3:16; Efes. 1:7). Umi semána og̃uahẽ mboyve pe Konmemorasión, jareko oportunida ñamombaʼeve hag̃ua pe sakrifísio Jesús ojapo vaʼekue ñanderehehápe. Por ehémplo ikatu jalee umi téxto ojepreparáva upe féchape g̃uarã, ha jajepyʼamongeta porã umi mbaʼe oiko vaʼekuére Jesús omano mboyvemi. Péicha, ág̃a ñañembyaty vove pe Konmemorasión díape, ñantende porãvéta mbaʼépa orrepresenta pe pan ha pe víno, ha mbaʼe sakrifísio ijojahaʼỹvarepa ñanemomanduʼa. Ñantende porãramo mbaʼépa Jesús ha Jehová ojapo ñanderehehápe, ha mbaʼépa jahupyty ñande ha umi jahayhúva, jajeroviavéta ñane esperánsare. Avei ñanekyreʼỹvéta ñaaguanta hag̃ua ipahaite peve (Heb. 12:3).

11, 12. ¿Mbaʼépa ñaaprendéma koʼa peve?

¹¹ Jahechaháicha, pe Séna del Señór ndahaʼéi ñanemomanduʼáva pe sakrifísio Jesús ojapo vaʼekuérente, síno avei ohechauka ñandéve haʼe hekomirĩ ha ipyʼaguasuha. Ajépa javyʼaite ñande Saserdóte Prinsipál oĩva yvágape ohechauka haguére koʼã kualida porãite ha ojerure meme rupi ñanderehehápe (Heb. 7:24, 25). Jahechauka hag̃ua jaagradeseha upéva, jasegi vaʼerã jagueromanduʼa la Jesús omanda vaʼekue (Luc. 22:19, 20). Upéva jajapo hína káda áño el 14 de Nisán, pe día iñimportantevéva ñandéve g̃uarã.

¹² Pe Séna del Señór ojejapo lája ohechauka avei mbaʼépa omomýi vaʼekue Jesúspe omeʼẽ hag̃ua hekove ñanderehehápe. Oĩ aja ko yvy ape ári haʼe ohechauka meme vaʼekue upe kualida porãite. ¿Mbaʼe rehepa ñañeʼẽ hína?

13. ¿Mbaʼéichapa Juan 15:9 ha 1 Juan 4:8-10 ohechauka Jehová ha Jesús oporohayhuha, ha mávapa oñevenefisia upévagui?

¹³ Opa mbaʼe Jesús ojapo vaʼekuére ojekuaa porã Jehová ñanderayhuetereiha (elee Juan 15:9; 1 Juan 4:8-10). ¿Mbaʼépa omomýi Jesúspe omeʼẽ hag̃ua hekove ñanderehehápe? Haʼe ojapo upéva oporohayhúgui. Enterovéva ñañevenefisia pe sakrifísio Jehová ha Itaʼýra ojapo vaʼekuégui, tahaʼe umi unhído térã “ambue ovechakuéra” (Juan 10:16; 1 Juan 2:2). Pe Konmemorasión ojejapo lájare ojekuaa avei Jesús ohayhu ha imbaʼerechakuaaha idisipulokuérandi. ¿Mbaʼérepa jaʼe upéva?

14. ¿Mbaʼéichapa Jesús ohechauka ohayhuha idisipulokuérape?

¹⁴ Jesús nomoñepyrũi vaʼekue peteĩ akontesimiénto hasýva ojesegi hag̃ua, síno álgo isensíllova. Péicha haʼe ohechauka ohayhuha umi kristiáno unhídope. Ohasávo pe tiémpo, enterovéva umi unhído tekotevẽ kuri ojapo pe Séna del Señór káda áño, tahaʼe haʼéva la isituasión, sapyʼánte kárselpe jepe (Apoc. 2:10). ¿Iñeʼẽrendúpa hikuái Jesúspe? Si iñeʼẽrendu.

15, 16. Emombeʼu mbaʼéichapa ñane ermanokuéra ojapo pe Konmemorasión ijetuʼúramo jepe.

¹⁵ Koʼág̃a peve umi kristiáno tee oñehaʼã ogueromanduʼa Jesús omano hague ára. Upearã haʼekuéra ojapo ikatúva guive osegi hag̃ua Jesús instruksión, sapyʼánte ijetuʼúramo jepe la situasión. Jahechamína umi ehémplo ohechaukáva upéva. Ermáno Harold King ningo oĩ vaʼekue kárselpe Chínape. Upépe ojeheja kuri chupe haʼeñoite peteĩ kalavósope. Upéicha rupi, haʼe oñeinhenia vaʼerã kuri ojapo hag̃ua pe Konmemorasión. Por ehémplo, ñemiháme oipuru la orekomíva oprepara hag̃ua umi embléma. Avei, haʼe okalkula ikatumiháicha mbaʼe fechaitépa hoʼáta upe día. Upéi, og̃uahẽvo la tiémpo, haʼeñomi pe kalavósope opurahéi, oñemboʼe ha ojapo peteĩ diskúrso.

¹⁶ Jahechamína koʼág̃a ótro ehémplo. Pe segunda gérra mundiál aja, unas kuánta ermána oĩva peteĩ kámpo de konsentrasiónpe oapeligra hekove ojapo hag̃ua pe Konmemorasión. Péro pe Séna del Señór isensíllo rupi, kañyháme jepe ikatu kuri ojapo hikuái upéva. Haʼekuéra omombeʼu: “Roñemboʼy ojoykerepa ha roforma peteĩ sírkulo, mbytépe romoĩ peteĩ vankoʼi ha peteĩ páño morotĩ hiʼári, ha upépe rokoloka la pan ha la víno. Pe lu rendýpe ikatu kuri rojepilla, upémarõ romboguénte la lus ha roipuru tataindy. [...] Upe moméntope enterovéva roñekompromete jey Jehovápe ore pyʼaite guive rombotuichataha héra marangatu”. ¡Ajépa iporãite koʼã ehémplo! Jahechaháicha ojeroviaiterei hikuái. Añetehápe ojekuaa porã Jesús ñanderayhuha ojapo haguére pe Séna del Señór sensillomínte.

17. ¿Mbaʼe mbaʼépa ikatu ñañeporandu?

¹⁷ Saʼíma ofalta jagueromanduʼa hag̃ua Jesús omano hague ára. Upévare iporã ñañeporandu: “¿Mbaʼéichapa ikatu aporohayhuve Jesús ojapo haguéicha? ¿Ajepyʼapyvépa che ermanokuérare apensaiterei rangue chejehe? ¿Ahaʼarõitereípa chuguikuéra, térãpa areko enkuénta moõ pevépa omeʼẽ ikapasida?”. Ñañehaʼãkena siémpre jasegi Jesús ehémplo ha ñañemoĩ ñane ermanokuéra lugárpe (1 Ped. 3:8).

18, 19. a) ¿Mbaʼe rehepa jasegíta ñanemanduʼa? b) ¿Mbaʼépa jajedesidi vaʼerã jajapo?

¹⁸ Koʼẽrõite ndojejapomoʼãvéima pe Konmemorasión. Ág̃a Jesús “og̃uahẽ” vove pe jehasa asy guasu aja, ombyatýta “umi ojeporavo vaʼekuépe” ha ogueraháta chupekuéra yvágape. Upe guive ndojejapomoʼãvéima pe Séna del Señór (1 Cor. 11:26; Mat. 24:31).

¹⁹ Upéicharõ jepe, katuete jasegíta ñanemanduʼa porã ko akontesimiénto isensíllovare ohechauka porãva mbaʼeichaitépa peteĩ persóna hekomirĩ, ipyʼaguasu ha oporohayhu. Upe tiémpope, entéro umi ogueromanduʼa vaʼekue pe Konmemorasión, vyʼápe oñeʼẽta hese ikatu hag̃uáicha umi ndoikuaáiva oñevenefisia avei. Péro koʼág̃ama voi enterovéva ikatu ñañevenefisia ko akontesimiéntogui. ¿Mbaʼépa jajapo vaʼerã upearã? Ñañehaʼã vaʼerã ñanderekomirĩ, ñandepyʼaguasu ha japorohayhu Jesús ojapo haguéicha. Péicha Jehová katuete ñanevendesíta (2 Ped. 1:10, 11).