“Umi nerendúva” ojesalváta

 1. ¿Mbaʼépa enterove jaipotaiterei ojapo ñane parientekuéra?

PETEĨ ermána hérava Paulineb heʼi: “Aikuaa ypy guive Jehovápe, che aipotaiterei vaʼekue enterove che parientekuéra oĩ avei chendive pe paraísope, ha koʼýte aipota che ména Rubén ha che membykuimbaʼe oservi Jehovápe chendive”. ¿Jarekópa avei ñande ñane parientekuéra neʼĩrava oikuaa ha ohayhu Jehovápe? Katuete oiméne ñande jaipota avei oservi hikuái Jehovápe ñanendive, Pauline oipota haguéicha.

 2. ¿Mbaʼe porandúpa ñambohováita ko artíkulope?

² Ñande ningo ndaikatúi jaovliga ñane parientekuérape oasepta hag̃ua umi notísia porã. Péro ikatu ñaipytyvõ chupekuéra ohenduse ha oavri hag̃ua ikorasõ pe mensáhe oĩvape la Bíbliape (2 Tim. 3:14, 15). ¿Mbaʼérepa japredika vaʼerã ñane parientekuérape? ¿Mbaʼérepa ñañehaʼã vaʼerã ñantende mbaʼéichapa haʼekuéra oñeñandu? ¿Mbaʼépa ikatu jajapo ñaipytyvõ hag̃ua ñane parientekuérape ohayhu hag̃ua avei Jehovápe ñandéicha? ¿Ha mbaʼéichapa enterove oĩva kongregasiónpe ikatu ñanepytyvõ upearã?

 3. Heʼiháicha 2 Pedro 3:9, ¿mbaʼérepa japredika vaʼerã ñane parientekuérape?

³ Koʼẽrõitéma Jehová ohundíta hína ko múndo aña, ha “umi ipyʼaporãva ohupyty hag̃ua jeikove opaveʼỹva” añoite ojesalváta (Hech. 13:48). Ñande ningo ñañemotiémpo ha heta ñañehaʼã japredika hag̃ua umi extráño oikóvape ñande jaikohárupi, upévare katuete japredikáta avei ñane parientekuérape ikatu hag̃uáicha oservi Jehovápe ñanendive. Ñande Ru Jehová ñanderayhuetéva ningo “ndoipotái avave oñehundi, síno oipota enterove oñarrepenti” (elee 2 Pedro 3:9).

 4. ¿Mbaʼépepa ikatu jajavy hína japredika jave ñane parientekuérape?

⁴ Ñanemanduʼa vaʼerã ñamombeʼu jave umi notísia porã ikatuha jajapo porã upéva térã nahániri. Ñande ningo ñañatende jepi mbaʼéichapa ñañeʼẽta japredika jave peteĩ extráñope, péro sapyʼánte japredika jave ñane pariéntepe ñañeʼẽ jepi chupekuéra derechoite voi.

 5. ¿Mbaʼe rehepa ñanemanduʼa vaʼerã japredika mboyve ñane parientekuérape?

⁵ Ñanemanduʼa jave mbaʼéichapa japredika vaʼekue primera ves ñane parientekuérape, ikatu hína ñañeñandu vai upévare ha ekapadete ñandéve jajapo porãve kuri. Apóstol Pablo omeʼẽ vaʼekue ko konsého umi kristiánope: “Umi mbaʼe pejéva siémpre iporã ha ijuky vaʼerã, peikuaa hag̃ua mbaʼéichapa pembohováita káda persónape” (Col. 4:5, 6). Iporã vaʼerã ñanemanduʼami ko konséhore japredika jave ñane parientekuérape, pórke ndajajapóiramo upéicha ikatu hína ñambodipara ñaipytyvõ rangue chupekuéra ñanerenduse hag̃ua.

6, 7. Emoĩ peteĩ ehémplo ohechaukáva mbaʼérepa iñimportánte ñañemoĩ ñane ména térã ñane rembireko lugárpe.

⁶ Ñañemoĩ ilugarpekuéra. Pe ermána Pauline ñañeʼẽma hague ningo heʼi: “Ñepyrũrãngo che añeʼẽse che ménape Ñandejárare ha la Bíbliarente voi. Ore noroñeʼẽi voi ótra kósare”. Péro Pauline ména Rubén ndoikuaaguasúi heta mbaʼe la Bíbliagui ha nontendéi mbaʼe rehepa Pauline oñeʼẽ oikóvo chupe. Rubénpe g̃uarã hembireko opensa irrelihiónrente voi, ha ojepyʼapy oimérõ g̃uarã hembireko oike hína peteĩ sékta ipeligrósovape ha oñembotavy chupe.

⁷ Pauline orrekonose ohasaitereíma hague tiémpo umi ermáno ha ermanakuéra kongregasionpeguándi, tahaʼe kaʼaruete térã fin de semanakue. Haʼe oho rreunionhápe, predikasiónpe ha umi ermanokuéra rógape. Pauline omombeʼu: “Rubén ningo sapyʼánte oñeñandúma haʼeño pórke og̃uahẽvo ógape ndotopái jepi avavére”. Jahechakuaa upéicharõ mbaʼérepa Rubén ohechagaʼúma hembireko ha itaʼýrape. Haʼe ningo ndoikuaái mávarepa ojeheʼa oikóvo hikuái, ha opensáma Paulínepe g̃uarã umi iñamigokuéra pyahu iñimportanteveha chugui. Upéicha rupi Rubén heʼi Paulínepe ojedivorsiaseha chugui. ¿Jahechakuaápa mbaʼe mbaʼépa ikatu kuri ojapo porãve Pauline oñemoĩ hag̃ua iména lugárpe?

 8. Heʼiháicha 1 Pedro 3:1, 2, ¿mbaʼépa ikatu oipytyvõve hína ñane parientekuérape?

⁸ Ñamoĩ ehémplo porã. Sapyʼánte ñane parientekuérape ikatu tuichave oipytyvõ umi mbaʼe jajapóva umi mbaʼe jaʼévagui (elee 1 Pedro 3:1, 2). Mbeguekatúpe Pauline ohechakuaa ko mbaʼe: “Che aikuaa Rubén orerayhuha ha añetehápe haʼe ndojedivorsiaseiha chehegui. Péro heʼírõ guare upéva, che ahechakuaa ajapo vaʼerãha umi mbaʼe Jehová oipotaháicha. Asegínte rangue apredika che ménape, iñimportanteve kuri amoĩ chupe ehémplo porã che kondúkta rupive”. Upéi Pauline ndoovligavéima iménape oñemongeta hag̃ua hikuái la Bíbliare, ha oñepyrũ oñeʼẽ hendive umi mbaʼe oikóvare káda día. Rubén katu ohechakuaa avei Pauline itrankilaveha ha itaʼýra ojeporta porãveha (Prov. 31:18, 27, 28). Rubén ohechakuaárõ guare mbaʼéichapa la Biblia oipytyvõ ifamíliape, upéva omopensa chupe ha oavri ikorasõ oasepta hag̃ua Ñandejára Ñeʼẽ heʼíva (1 Cor. 7:12-14, 16).

 9. ¿Mbaʼérepa jasegi vaʼerã ñaipytyvõ ñane parientekuérape?

⁹ Jasegíkena ñaipytyvõ ñane parientekuérape. Jehová ningo omoĩ ñandéve ehémplo porã. Haʼe omeʼẽ “jey jey” oportunida ipuévlope oasepta hag̃ua umi notísia porã ha oikove (Jer. 44:4). Ha apóstol Pablo heʼi vaʼekue Timotéope osegi hag̃ua oipytyvõ ótrope, pórke upéicha ojesalváta ijupe ha avei umi ohendúvape chupe (1 Tim. 4:16). Ñande ningo jahayhu ñane parientekuérape ha upévare jaipota haʼekuéra oikuaa umi mbaʼe omboʼéva la Biblia. Pauline heʼíva ha ojapóva ningo mbeguekatúpe oipytyvõ kuri ifamíliape. Haʼe koʼág̃a vyʼápe oservi Jehovápe iménandi. Mokõivéva oservi de prekursór ha iména haʼe ansiáno.

10. ¿Mbaʼérepa tekotevẽ ñanepasiénsia?

¹⁰ Ñanepasiénsiakena. Ñande jadesidírõ guare ñaneñeʼẽrendutaha Ñandejárape, ñakambia kuri heta mbaʼépe ñande rekovépe ha avei ñakambia umi mbaʼe jagueroviáva. Ha ñane parientekuérape g̃uarã ikatu hína ijetuʼu oasepta hag̃ua ñakambia hague koʼã mbaʼépe. Sapyʼánte haʼekuéra púntape ohechakuaa ndajafestehaveimaha hendivekuéra umi fiésta rrelihiósa, ha ndajaikeveimaha polítikape. Ñepyrũrã ikatu voi algúno ipochy ñanendive upévare (Mat. 10:35, 36). Péro aníkena ñapensa haʼekuéra arakaʼeve nokambiamoʼãiha. Ndajasegíriramo ñaipytyvõ chupekuéra ontende hag̃ua umi mbaʼe jagueroviáva, haʼetéta hína ñande jahusgáva chupekuéra nomereseiha orresivi pe vída etérna. Jehová ningo nañanemoĩri vaʼekue japorohusga hag̃ua síno omeʼẽ upe traváho Jesúspe (Juan 5:22). Ñande ñanepasiénsiaramo, ñane parientekuéra ikatu hína mbeguekatúpe ohenduséma pe mensáhe oĩva la Bíbliape (ehecha pe rrekuádro “Jaipuru ñande sítio de Internet ñaporomboʼe hag̃ua”).

11-13. ¿Mbaʼépa ñanemboʼe Alicia otrata lája ituakuérape?

¹¹ Ñanderorýkena péro ani ñakambia jadesidíva (Prov. 15:2). Jahechami Alicia ehémplo. Haʼe ningo oaprende vaʼekue Jehovágui oikórõ guare ótro paíspe mombyry ituakuéragui, haʼekuéra ndogueroviái Ñandejára oexistiha ha ombaʼapo mbarete polítikape. Alicia ohechakuaa ensegída omombeʼu vaʼerãha chupekuéra umi mbaʼe porã haʼe oaprendéva hína. Alicia heʼi: “Ñahaʼarõitereíramo ñamombeʼu hag̃ua ñane hentekuérape ñakambia hague umi mbaʼe jajapóva ha jagueroviáva, koʼýte ipochýta hikuái ág̃a oikuaa vove”. Haʼe oñehaʼã otopa umi téma ikatúva ointeresa ituakuérape, por ehémplo pe mborayhu. Upéi haʼe oskrivi chupekuéra umi kárta omombeʼuhápe mbaʼépa heʼi la Biblia koʼã témare, ha oporandu chupekuéra mbaʼépa opensa umívare (1 Cor. 13:1-13). Alicia oagradese ituakuérape omongakuaa haguére chupe ha oñangareko haguére hese, ha avei oguerahaka chupekuéra rregálo. Upéi ovisitárõ guare ituakuérape, haʼe ojapo opa ikatúva oipytyvõ hag̃ua isýpe ogapýpe. Ñepyrũrã, ituakuérape ndogustaiete voi Alicia omombeʼúrõ guare chupekuéra umi mbaʼe ogueroviáva.

¹² Alicia oĩrõ guare ituakuéra rógape haʼe osegi olee la Biblia káda día. Alicia heʼi: “Upéva oipytyvõ che sýpe ontende hag̃ua mbaʼeichaitépa iñimportánte chéve g̃uarã la Biblia”. Alicia túa katu odesidi oaprendevetaha la Bíbliagui, ikatu hag̃uáicha ontende mbaʼérepa itajýra okambia opensa lája. Haʼe otopase algúna fálla oñeʼẽ vai hag̃ua la Bíbliare. Alicia omombeʼu: “Ameʼẽ che túape peteĩ ibibliarã ha askrivi hese álgo chupe g̃uarã”. ¿Mbaʼépa oiko upéi? Alicia túa ndotopái mbaʼevete oñeʼẽ vai hag̃ua la Bíbliare, upéva rangue omombaʼeterei umi mbaʼe olee vaʼekue.

¹³ Tekotevẽ ningo ñanderory péro ani ñakambia jadesidíva ñambohováiramo jepe umi situasión ijetuʼúva (1 Cor. 4:12b). Por ehémplo Alicia rehe oñemoĩ vaʼekue isy. Haʼe heʼi: “Ajevautisárõ guare, che sy heʼi chéve che ndahayhuiha chupe ha nacheñeʼẽrenduiha”. ¿Mbaʼépa Alicia ojapo? Haʼe heʼi: “Akirirĩnte rangue ha nañeʼẽi che rrelihión pyahúre, che trankílo porãnte haʼe chupe adesidíma hague oikotaha chehegui testígo de Jehová ha nakambiamoʼãiha la adesidi vaʼekue. Che haʼe jey jey che sýpe ahayhuetereiha chupe. Upéi mokõivéva orerasẽ oñondive, ha che akosina chupe álgo ogustáva chupe. Upe guive che sy orrekonose la Biblia chepytyvõ hague omehora hag̃ua che rekove”.

14. ¿Mbaʼérepa arakaʼeve nañapermitíri vaʼerã ñane parientekuéra okambia ñandehegui umi mbaʼe jadesidi vaʼekue?

¹⁴ Ikatu hína hasýpe ñane parientekuéra ontende porã mbaʼeichaitépa iñimportánte ñandéve g̃uarã jaservi Jehovápe. Por ehémplo, Alicia odesidírõ guare ojapotaha iprekursorádo osegi rangue ostudia universidápe ituakuéra oipota haguéicha, isy hetaiterei jey hasẽ. Péro Alicia nokambiái la odesidi vaʼekue. Haʼe heʼi: “Ñapermitíramo chupekuéra okambia ñandehegui peteĩ mbaʼe jadesidi vaʼekue jajapo, ñane família oñehaʼãta avei okambiaka ñandéve hetave mbaʼe jadesidi vaʼekue. Péro ñanderory ha jaʼe porãnteramo chupekuéra nañakambiamoʼãiha, ikatu hína peteĩva ijapyteguikuéra ñanerendu”. Ha upeichaite oiko kuri Alicia kásope. Itúa ha isy koʼág̃a oservi de prekursór, ha itúa katu ansiáno.

15. Heʼiháicha Mateo 5:14-16 ha 1 Pedro 2:12, ¿mbaʼéichapa “umi mbaʼe porã” ojapóva ermanokuéra ikatu oipytyvõ ñane parientekuérape?

¹⁵ Omoag̃ui hag̃ua la héntepe ijehe, Jehová ojevale “umi mbaʼe porã” ojapóvare pe kongregasión (elee Mateo 5:14-16; 1 Pedro 2:12). Ñane ména térã ñane rembireko ndahaʼéiramo testígo de Jehová, ¿oikuaa piko umi ermáno ha ermanakuéra oĩvape ñane kongregasiónpe? Pauline, ñañeʼẽma hague ajeʼi, oinvita vaʼekue umi ermáno ha ermanakuérape hógape, péicha iména ikatúta oikuaa chupekuéra. Iména Rubén imanduʼa mbaʼéichapa peteĩ ermáno oipytyvõ vaʼekue chupe ontende hag̃ua mbaʼeichagua héntepa hína umi testígo de Jehová. Haʼe heʼi: “Ko ermáno oñemovakasión ohecha hag̃ua chendive peteĩ partído. Upépe che apensa: ‘¡Haʼe ningo cheichaguánte avei raʼe!’”.

16. ¿Mbaʼérepa ñainvita vaʼerã ñane parientekuérape oho hag̃ua ñanendive rreunionhápe?

¹⁶ Iporãitereíta ningo ñainvitáramo ñane parientekuérape oho hag̃ua ñanendive rreunionhápe, upéva tuichaiterei oipytyvõta chupekuéra (1 Cor. 14:24, 25). Rubén oho vaʼekue primera ves rreunionhápe Konmemorasión jave, pórke upe rreunión ojejapo vaʼekue traváho riréma ha avei ndaipukúi. Haʼe heʼi: “Nantendepái vaʼekue mbaʼérepa oñeʼẽ pe diskúrso, péro chemanduʼa umi héntere. Haʼekuéra ou che rendápe, cheguerohory ha chepopyhy chesaludávo. Ha ikatu haʼe hesekuéra isinséro hague hikuái”. Peteĩ matrimónio ningo imbaʼeporãiterei vaʼekue Pauline ndive, oipytyvõ chupe oñangareko hag̃ua imembýre rreunión aja ha predikasiónpe. Upévare Rubén odesidírõ guare oikuaaseveha Pauline rrelihión pyahúgui, ojerure pe ermánope ombostudia hag̃ua chupe la Biblia.

17. a) ¿Mbaʼe rehepa ndovaléi jajekulpa? b) ¿Mbaʼérepa arakaʼeve nañapensái vaʼerã ñane parientekuéra nokambiamoʼãiha voi?

¹⁷ Hiʼãite ningo ñandéve enterove ñane parientekuéra ñanemoirũ jaservi hag̃ua Jehovápe oñondivepa. Péro ñañehaʼãmbaitéramo jepe ñaipytyvõ chupekuéra oservi hag̃ua Jehovápe, ikatu hína ndoaseptái hikuái la Biblia omboʼéva. Upéicha oikóramo, ani jajekulpa haʼekuéra odesidi haguére upéicha. Jaikuaa voi ñande ndaikatuiha jaovliga avavépe oasepta hag̃ua umi mbaʼe jagueroviáva. Upéicharõ jepe, ani ñapensa noipytyvõmoʼãiha ñane parientekuérape ñanderechávo javyʼaha jaservi haguére Jehovápe. Ñañemboʼékena hesekuéra, ñañeʼẽ porãnte chupekuéra ha jasegi ñaipytyvõ chupekuéra (Hech. 20:20). Ani jaduda Jehová katuete ovendesitaha umi mbaʼe ñañehaʼãva jajapo. Ha ñane parientekuéra odesidíramo ñanerendu, ¡upéicharõ ojesalváta hikuái!