¿Mbaʼéichapa ikatu javyʼa peteĩ asignasión pyahúpe?

1-3. ¿Mbaʼérepa umi oservíva de tiémpo kompléto sapyʼánte okambia vaʼerã iñasignasión?

ROBERT ha Mary Jo heʼi: “Rovyʼaiterei kuri roservírõ guare ore asignasiónpe misionéroramo 21 áñore. Péro upéi los 4 ore tuakuéra ou hasykatu. Ore ningo rovyʼa roñangarekóta haguére hesekuéra, péro lomímonte hasyeterei kuri oréve rohejátarõ guare pe lugár rohayhuetéva”.

² Peteĩ ermáno hérava William ha hembireko Terrie omombeʼu: “Roikuaárõ guare ndaikatumoʼãveimaha roho jey ore asignasiónpe pórke orerasykatu, hetaiterei orerasẽ. Ore ningo siémpre roservise vaʼekue Jehovápe ótro paíspe, péro koʼág̃a ndaikatumoʼãvéima rojapo upéva”.

³ Peteĩ ermáno hérava Aleksey heʼi: “Ore roikuaa vaʼekue pe goviérno ombotyseha pe sukursál che aservi hague aikóvo. Péro ni ndorogueroviaséi kuri ombotýrõ guare hikuái Betel ha rohopámante vaʼerã upégui”.

 4. ¿Mbaʼe pregúntapa ñambohováita ko artíkulope?

⁴ Avei oĩ hetaiterei ermáno ha ermána oservi vaʼekue de tiémpo kompléto, umíva apytépe oĩ hetaiterei betelita orresivi vaʼekue peteĩ asignasión pyahu.b Ikatu hína ijetuʼueterei koʼã ermáno ifiélvape oheja hag̃ua pe asignasión ohayhuetéva. ¿Mbaʼépa ikatu oipytyvõ chupekuéra ombohovái hag̃ua umi kámbio? ¿Mbaʼéichapa enterove ikatu ñaipytyvõ chupekuéra? Umi rrespuésta ikatu ñanepytyvõ enterovépe ñambohovái jave umi kámbio ñande rekovépe.

 5. ¿Mbaʼe ijetuʼúvapa ikatu ñambohovái okambiáramo ñandehegui ñane asignasión?

⁵ Oiméramo jaservi raʼe de tiémpo kompléto, tahaʼe Betélpe térã ótro lugárpe, ñande jareko kuri upépe ñane amigokuéra ha jahayhu kuri pe lugár jaservi hague. Ha ñambyasyeterei voi jahejátarõ ñane asignasión. Ikatu hína jahechagaʼu umi ermáno ha ermána jahejávape ha jajepyʼapy hesekuéra, koʼýte oimérõ jaheja raʼe upe lugár oĩ rupi persekusión (Mat. 10:23; 2 Cor. 11:28, 29). Avei ikatu ijetuʼueterei jaha ótro lugárpe, pórke jajepokuaa vaʼerã peteĩ kultúra pyahúre. Ha péichante avei ikatu ñañeñandu jaha jeýramo ñande vállepe. Robert ha Mary Jo omombeʼu: “Ore ningo ndorojepokuaavéima ni ore kultúra rehe. Ndorojepokuaavéima ropredika ore idiomaitépe ha roñeñandu voi extranhéroicha ore retãme”. Umi okambia vaʼekue chugui iñasignasión, ikatu hína derrepentete oreko umi gásto ymave ndorekói vaʼekue. Ha upéva ikatu omokangy, omoñeñandu vai ha odesanima chupekuéra. ¿Mbaʼépa ikatu oipytyvõ koʼã ermánope?

 6. ¿Mbaʼéichapa ikatu ñamombarete ñane amista Jehovándi?

⁶ Ñamombarete ñane amista Jehovándi (Sant. 4:8). ¿Mbaʼéichapa ikatu jajapo upéva? Jajerovia vaʼerã ‘Ñandejára ohendúvare umi hénte ñemboʼe’ (Sal. 65:2). “Pemombeʼupaite chupe umi mbaʼe oĩva pende pyʼapýpe” heʼi Salmo 62:8. Jehová ningo ipodér rupive “ikatu ojapo hetaitereive mbaʼe ñande ikatúvagui jajerure térã ñañeimahina” (Efes. 3:20). Jehová ningo ndahaʼéi omeʼẽva umi mbaʼe jajerurévante chupe ñane ñemboʼépe, síno ikatu ojapo umi mbaʼe nañahaʼarõiva jepe. Haʼe ikatu osolusiona umi provléma jarekóva ñande ñaimoʼãʼỹháicha.

 7. a) ¿Mbaʼépa ñanepytyvõta ñamombarete hag̃ua ñane amista Jehovándi? b) Heʼiháicha Hebreos 6:10-12, ¿mbaʼépa jahupytýta jasegíramo jaservi Jehovápe fiélmente?

⁷ Ñamombarete hag̃ua ñane amista Jehovándi, jalee vaʼerã la Biblia káda día ha jajepyʼamongeta hese. Peteĩ ermáno oservi vaʼekue misionéroramo heʼi: “Jasegi vaʼerã jajapo ñande estúdio de família ha jajeprepara rreunionrã, jajapo haguéicha voi jaikóvo anteve ñane asignasiónpe”. Iporãta avei jasegíramo jajapo opa ikatúva predikasiónpe ñane kongregasión pyahu ndive. Jehová ningo imanduʼa hína umi osegívare oservi chupe fiélmente, ndaikatúiramo jepe ojapo hikuái entéro mbaʼe anteve ojapo vaʼekue (elee Hebreos 6:10-12).

 8. ¿Mbaʼéichapa umi mbaʼe heʼíva 1 Juan 2:15-17 ñanepytyvõta jasegi hag̃ua jaiko sensillomínte?

⁸ Jasegi jaiko sensillomínte. Ani jaheja umi mbaʼe oĩva Satanás múndope ñandepyʼapyeterei ha ñandejoko jaservi hag̃ua Jehovápe (Mat. 13:22). Umi persóna ndoservíriva Jehovápe, umi ñane amígo térã parientekuéra oñehaʼãva ñanepytyvõ ikatu heʼi ñandéve tekotevẽha ñagana heta pláta jaiko porãve hag̃ua, péro aníkena ñahendu chupekuéra (elee 1 Juan 2:15-17). Jajerovia vaʼerã Jehováre, haʼe ningo opromete omeʼẽtaha ñandéve entéro mbaʼe “ñaikotevẽ jave”. Haʼe ñanepytyvõta jasegi hag̃ua ñande jerovia mbarete, ñaime hag̃ua trankílo ha omeʼẽta avei ñandéve umi mbaʼe ñaikotevẽva ñañemantene hag̃ua (Heb. 4:16; 13:5, 6).

 9. a) Heʼiháicha Proverbios 22:3, 7, ¿mbaʼérepa ndajadevéi vaʼerã natekotevẽiramo? b) ¿Mbaʼépa ikatu ñanepytyvõ jadesidi porã hag̃ua?

⁹ Ani jadeve natekotevẽiramo (elee Proverbios 22:3, 7). Javátaramo peteĩ lugárgui ikatu hína jagasta heta, ha ndahasyiete japyta hag̃ua jadeve. Upévare, ani hag̃ua jadeve heta, ñañatende vaʼerã pono jadeve jajogua hag̃ua umi mbaʼe añetehápe nañaikotevẽiva. Ikatu voi ijetuʼu hína ñandéve jadesidi hag̃ua mboy plátapa jaipurúta ótrogui jahasa jave umi situasión ivaíva, por ehémplo tekotevẽ jave ñañangareko peteĩ ñane hénte hasykatúvare. Upéicha jave ñanemanduʼa vaʼerã ‘ñañemboʼe ha jajerure asýramo’ Ñandejárape, haʼe ikatuha ñanepytyvõ jadesidi porã hag̃ua. Jehová ningo ikatu ombohovái ñandéve ñane ñemboʼe omeʼẽvo ñandéve pyʼaguapy ‘oñangarekótava ñane korasõre ha umi mbaʼe ñapensávare’, ha péicha ñanepytyvõ ñaime hag̃ua trankílo ikatu hag̃uáicha jadesidi porã (Filip. 4:6, 7; 1 Ped. 5:7).

10. ¿Mbaʼépa ikatu jajapo jareko hag̃ua amígo pyahu?

¹⁰ Jasegíkena jajogueraha porã ñane amigokuéra ha ñane parientekuérandi. Ñamombeʼu umi ñane amigoitépe, koʼýte umi ohasa vaʼekuépe avei peichagua situasión, mbaʼéichapa ñañeñandu ha umi mbaʼe ijetuʼúva jahasáva hína. Jajapóramo upéicha ikatu ñanepytyvõ ñañeñandu porãve hag̃ua (Ecl. 4:9, 10). Umi ñane amigokuéra jareko vaʼekue pe ñane asignasión anteve guarépe osegíta ñaneamígoramo. Péro koʼág̃a pe ñane asignasión pyahúpe tekotevẽ jareko ñane amígo pyahurã. Ñanemanduʼa vaʼerã avei jaipotáramo ñane amigorã tekotevẽha ñande voi ñanderory ha ñanembaʼeporã. ¿Mbaʼépa ikatu jajapo jareko hag̃ua amígo pyahu? Ñamombeʼu ñande rapichápe umi mbaʼe porã jahasa vaʼekue Jehová servísiope ikatu hag̃uáicha haʼekuéra ohechakuaa javyʼa hague. Kongregasiónpe oĩramo jepe umi nontendepáiva mbaʼérepa ñamombaʼete pe servísio de tiémpo kompléto, ótro ikatu ohecharamo ñane ehémplo ha oiko chuguikuéra ñane amigoite. Péro ñañatende vaʼerã ani ñañeʼẽterei ñandejehénte térã umi mbaʼe jajapo vaʼekuére Jehová servísiope, ni mbaʼeichaitépa ñañeñandu vai jaikóvo.

11. ¿Mbaʼéichapa ikatu jasegi javyʼa ñane matrimóniope?

¹¹ Oiméramo jaheja vaʼerã ñane asignasión hasykatu rupi ñane rembireko térã ñane ména, aníkena jakulpa chupe upévare. Térã oiméramo ñande voi la ñanderasykatúva, ani jajekulpa ha ñapensa ñadesepsionaha ñane rembireko térã ñane ménape. Ñanemanduʼa vaʼerã ñande ‘peteĩntemaha’, ha ñamendárõ guare ñapromete hague Jehová renondépe ñañangarekotaha ojuehe tahaʼe haʼéva umi situasión jahasáva (Mat. 19:5, 6). Ha oiméramo jaheja vaʼerã ñane asignasión pórke koʼág̃a jarekóta peteĩ mitã nañapensái vaʼekue jareko, jaasegurákena ñane famíliape haʼe iñimportanteveha ñandéve g̃uarã pe asignasión jareko vaʼekuégui. Jaʼe jey jeýkena pe mitãme haʼe haʼeha ñandéve g̃uarã peteĩ vendisión oúva Jehovágui (Sal. 127:3-5). Avei ñamombeʼu vaʼerã chupe umi mbaʼe porã jahasa vaʼekue ñane asignasiónpe. Jajapóvo upéicha ikatu hína ñamokyreʼỹ ñane famíliape oipuru hag̃ua hekove oservi hag̃ua Jehovápe vyʼápe, upe ñande jajapo haguéicha.

12. a) ¿Mbaʼéichapa ikatu ñaipytyvõ umi oservívape de tiémpo kompléto osegi hag̃ua iñasignasiónpe? b) ¿Mbaʼéichapa ikatu ñaipytyvõ umi ermánope ifasilve hag̃ua chupekuéra la kámbio?

¹² Jaguerohoryeterei ningo heta kongregasión ha ermanokuéra ojapoha opa ikatúva oipytyvõ hag̃ua umi oservívape de tiémpo kompléto osegi hag̃ua iñasignasiónpe. Haʼekuéra ojapo upéva omokyreʼỹvo chupekuéra osegi hag̃ua iñasignasiónpe, oipytyvõvo chupekuéra ekonómikamente térã omeʼẽvo chupekuéra álgo oikotevẽtava, térã oipytyvõvo chupekuéra oñangareko hag̃ua ifamíliare hógape (Gál. 6:2). Umi oservíva de tiémpo kompléto orresivíramo peteĩ asignasión pyahu ha ova ñane kongregasiónpe, ani ñapensa oñekambiaha chupekuéra de asignasión ndojapoporãi haguére itraváho térã ojekorrehi haguére chupekuéra.c Upéva rangue ñaipytyvõ vaʼerã koʼã ermánope ifasilve hag̃ua chupekuéra la kámbio. Jarresivi porã ha jaguerohorýkena chupekuéra pe traváho ojapo vaʼekuére, ndaikatuvéiramo jepe ojapo hikuái heta mbaʼe hasykatúma rupi. Ñañehaʼã jaikuaa porãve chupekuéra. Ikatu hína ñaaprende heta mbaʼe chuguikuéra, umi mbaʼe ohasa vaʼekuégui, umi mbaʼe oikuaávagui ha umi entrenamiénto orresivi vaʼekuégui.

13. ¿Mbaʼépa ikatu jajapo ñaipytyvõ hag̃ua umi orresivi vaʼekuépe asignasión pyahu?

¹³ Ñepyrũrã, umi orresivi vaʼekue asignasión pyahu ikatu oikotevẽ ñaipytyvõ chupekuéra otopa hag̃ua hogarã, itravahorã, transpórte ha ótra kósa ikatúva ifálta chupekuéra. Ikatu avei oikuaase hikuái moõpa opaga vaʼerã umi impuésto, moõguipa ikatu ojogua merkadería, ha umícha. Péro opa mbaʼe ári haʼekuéra oikotevẽ hína ñantende isituasionkuéra, ndahaʼéi ñambyasy chupekuéra. Umi ermáno térã peteĩva ihentekuéra ikatu hína hasykatu, ha ijetuʼu chupekuéra ombohovái hag̃ua upéva. Ikatu oime oñembyasy hikuái omano haguére peteĩ ohayhúva.d Ha ndeʼíriramo jepe mbaʼeve, ikatu avei ndovyʼái hikuái ohechagaʼúgui umi iñamigokuéra oheja vaʼekue iñasignasión anteve guarépe. Haʼekuéra ningo oikotevẽ tiémpo ogueropuʼaka hag̃ua umi mbaʼe oñandúva.

14. ¿Mbaʼéichapa umi ermanokuéra oipytyvõ peteĩ ermánape ojepokuaa hag̃ua iñasignasión pyahúpe?

¹⁴ Ñande ningo ikatu hína ñaipytyvõ chupekuéra japredikávo hendivekuéra ha ñamokyreʼỹ chupekuéra ñane ehémplo rupive. Peteĩ ermána oservi vaʼekue heta áñore ótro paíspe heʼi: “Pe asignasión areko vaʼekuépe che ajapo estúdio bíblico káda día, ha che asignasión pyahúpe katu ijetuʼueterei aavri hag̃ua la Biblia jepe predikasiónpe, térã ahechauka hag̃ua peteĩ vidéo jepe. Péro umi ermanokuéra oĩva che kongregasión pyahúpe cheinvita aha hag̃ua ajapo hendivekuéra rrevisíta ha estúdio bíblico. Ahecha umi ermáno ha ermána ijerovia mbaretetéva ha iguapoitéva ojapoha estúdio bíblico oprogresa porãva ohóvo, upéva chemoñeñandu porãve ha apensa porãve pe territóriore. Che aaprende mbaʼéichapa añepyrũ vaʼerã añemongeta umi héntendi ore território pyahúpe. Entéro koʼã mbaʼe ningo chepytyvõ avyʼa jey hag̃ua”.

15. ¿Mbaʼépa ikatu jajapo javyʼa hag̃ua ñane asignasión pyahúpe?

¹⁵ Ñande ningo ikatu javyʼa hína ñane asignasión pyahúpe. Ani ñapensa ndajajapoporãi hague ñane rembiapo pe asignasión jareko vaʼekuépe térã ndajavaleveimaha. Jajepyʼamongeta umi mbaʼe Jehová ojapóvare ñanepytyvõ hag̃ua ha jasegi japredika. Jasegi umi kristiáno ifiélva síglo primérope guare ehémplo. Haʼekuéra tahaʼe haʼéva lugárpe “oikuaauka ohóvo ohohárupi umi notísia porã oĩva Ñandejára ñeʼẽme” (Hech. 8:1, 4). Ñañehaʼãramo jasegi japredika ikatu hína jahasa heta mbaʼe porã. Por ehémplo, oĩ umi prekursór oñemosẽ vaʼekue peteĩ paísgui ha ováva ótro país opytávape ag̃ui upégui, ha upépe oñekotevẽnte avei umi opredika vaʼerã iñidiomakuérape. Ohasa rire unos kuánto mésente, hetaiterei hénte oho umi grúpo oñeformávape upe idiómape.

16. ¿Mbaʼépa ñanepytyvõta javyʼa hag̃ua ñane asignasión pyahúpe?

¹⁶ Nehemías heʼi vaʼekue: “Pe vyʼa Jehová omeʼẽva peẽme penemombaretéta” (Neh. 8:10, nóta). Ñane amista Jehovándi haʼe vaʼerã pe mbaʼe ñanembovyʼavéva, ndahaʼéi ñane asignasión, ñamombaʼetereíramo jepe upéva. Upéicharõ, javyʼaséramo jasegi vaʼerã ñañemoag̃ui Jehováre ha jajerovia hese ikatu hag̃uáicha haʼe ñanemoarandu, ñandegia ha ñanepytyvõ. Ñanemanduʼa vaʼerã jahayhueterei hague pe asignasión jareko vaʼekue pórke ñañehaʼãmbaite kuri ñaipytyvõ la héntepe upépe. Upévare, ñañehaʼãmbaitékena avei ñane asignasión pyahúpe ha jahecháta mbaʼéichapa Jehová ñanepytyvõ jahayhu hag̃ua avei upéva (Ecl. 7:10).

17. ¿Mbaʼe rehepa ñanemanduʼa vaʼerã ñapensávo pe asignasión jarekóvare koʼág̃a?

¹⁷ Ñanemanduʼa vaʼerã ñande jaservitaha Jehovápe pára siémpre, péro pe asignasión jarekóva koʼág̃a haʼeha por un tiémponte. Ha ág̃a múndo pyahúpe katu, enterovete ikatu hína jarresivi peteĩ kámbio de asignasión. Pe ermáno hérava Aleksey, ñañeʼẽma hague oñepyrũvo ko artíkulo, heʼi umi kámbio de asignasión orekóva koʼág̃a oipytyvõha hína chupe amo gotyove g̃uarã. Haʼe heʼi: “Che siémprente voi agueroviáva Jehová oexistiha ha pe múndo pyahu oĩtaha katuete, péro haʼetévaicha chéve oĩha mombyry lénto chehegui Jehová ha pe múndo pyahu. Péro koʼág̃a añeñandu ag̃uiete Jehovágui, oĩrõguáicha che renondetépe, ha pe múndo pyahu katu oĩmaha apeténte voi” (Hech. 2:25). Tahaʼe haʼéva pe asignasión jarekóva, ñañemantenese ag̃uieténte Jehovágui. Haʼe ningo arakaʼeve nañanderejamoʼãi, síno ñanepytyvõta jaservi hag̃ua chupe vyʼápe tahaʼe haʼéva pe jajapóva ha tañaime ñaimehápe (Is. 41:13).