Jehová, pe Dios oporoperdonáva

 1. Ohechaukaháicha Eclesiastés 7:20, ¿mbaʼépa omyesakã porã vaʼekue rréi Salomón?

RRÉI Salomón heʼi vaʼekue: “Ndaipóri ningo ni peteĩ kuimbaʼe ihústova siémpre ojapóva iporãva ha núnka ndopekáiva” (Ecl. 7:20). ¡Ajépa siertoite upéva! Ñande ningo enterove pekadór (1 Juan 1:8). Upévare ñande siémpre ñaikotevẽ ñaneperdona Ñandejára ha ñande rapichakuéra.

 2. ¿Mbaʼéichapa ñañeñandu peteĩ ñane amígo ñaneperdona jave?

² Oiméne nemanduʼa remoñeñandu vaírõ guare peteĩ ne amígope, katuete resolusionaséne raʼe pe oiko vaʼekue reĩ porã jey hag̃ua hendive, ha upearã rejediskulpa raʼe hendive. ¿Ha mbaʼéichapa reñeñandu haʼe neperdonárõ guare? ¿Reñeñandu porãpa raʼe? Si, ha katuete oiméne revyʼaiterei avei.

 3. ¿Mbaʼépa jahecháta ko artíkulope?

³ Ñande ningo jaipota Jehová haʼe ñane amigoite, péro ñaneimperfékto rupi heta vése ikatu jaʼe térã jajapo álgo ndogustáiva chupe. Upéicharõ jepe, ¿mbaʼérepa ñaimekuaa segúro Jehová siémpre oĩha ñaneperdona hag̃uáicha? ¿Mbaʼérepa jaʼekuaa Jehová oporoperdona jave idiferenteha yvyporakuéra operdona lájagui? ¿Ha mbaʼépa ikatu jajapo Jehová ñaneperdona hag̃ua?

 4. ¿Mbaʼérepa ñaimekuaa segúro Jehová siémpre oĩha ñaneperdona hag̃uáicha?

⁴ La Biblia heʼi ñandéve Jehová siémpre oĩha ñaneperdona hag̃uáicha. Jehová oñeʼẽrõ guare Moisés ndive pe Mónte Sinaípe peteĩ ánhel rupive, haʼe heʼi chupe: “Jehová, Jehová, che hína peteĩ Dios oporoporiahuverekóva ha oporombyasýva, ndaipochyreíriva, oporohayhuetereíva ha nopyrũiva iñeʼẽre, ohayhu añetéva hetaitereípe, operdonáva umi ojavývape, hembiapo vaíva ha opekávape” (Éx. 34:6, 7). Jehová ningo haʼe peteĩ Dios ivuenoitereíva ha oporoporiahuverekóva ha siémpre oĩva operdona hag̃uáicha umi pekadór oñarrepentívape ipyʼaite guive (Neh. 9:17; Sal. 86:15).

 5. Heʼiháicha Salmo 103:13, 14, ¿mbaʼépa Jehová ojapo ñandekuaa porãiterei rupi?

⁵ Jehová ningo ñandekuaa porãiterei haʼe rupi ñande Kreadór. Epensamíntena: Haʼe oikuaa porã káda persóna oĩvape ko yvy ape ári (Sal. 139:15-17). Jehová ningo ohechapaite umi imperfeksión ñanderupytýva ñande túa ypykuégui. Jehová ningo ontende umi mbaʼe ñande ñapensáva ha jajapóva ha oikuaa mbaʼeichagua persónapa ñande. ¿Mbaʼépa ojapo Jehová ñandekuaa porãiterei rupi? Ñandeporiahuvereko (Sal. 78:39; elee Salmo 103:13, 14).

 6. ¿Mbaʼéichapa Jehová ohechauka ñaneperdonasetereiha?

⁶ Jehová ningo ohechaukáma ñandéve ñaneperdonaseha. Haʼe oikuaa porã voi Adán ha Eva káusare ñande ñaimeha pe pekádo ha ñemano poguýpe (Rom. 5:12). Ñandejehegui reínte ndaikatumoʼãi kuri ñasẽ ni ñaguenohẽ ótrope pe pekádo ha ñemano poguýgui (Sal. 49:7-9). Ha Jehová ohechauka imbaʼeporãha ñanendive ha ojapo álgo ñaneguenohẽ hag̃ua upe situasióngui. ¿Mbaʼéichapa haʼe ojapo upéva? Heʼiháicha Juan 3:16, Jehová ontrega Itaʼýra peteĩete omano hag̃ua ñanderehehápe (Mat. 20:28; Rom. 5:19). Upéicha Jesús oñemoĩ ñande lugárpe ha omano enterove rehehápe, ha péicha entéro ojeroviáva hese ikatu ojei pe pekádo ha ñemano poguýgui (Heb. 2:9). Oiméne hasy asy raʼe Jehovápe ohechávo Itaʼýra ohayhuetéva omano asyete. Oiméramo Jehová nañaneperdonaséi nopermitíri vaʼerãmoʼã kuri upéva.

 7. ¿Mbaʼe ehémplo oĩva la Bíbliapepa ohechauka porã ñandéve Jehová oporoperdonasetereiha?

⁷ La Bíbliape ningo jatopa hetaiterei ehémplo ohechaukáva Jehová oporoperdonaseha (Efes. 4:32). ¿Mávapa ou ne akãme repensávo upévare? Oiméne repensa rréi Manasés rehe. Haʼe ningo ojapo hetaiterei mbaʼe ivaíva Jehová kóntrape. Haʼe omokyreʼỹ vaʼekue umi héntepe oadora hag̃ua umi dios fálsope, ha umi itaʼýra teépe jepe ohapy sakrifísioramo umi dios fálsope. Avei omoĩ Jehová témplope umi dios raʼanga haʼe ojapo vaʼekue. La Biblia heʼi hese: “Haʼe ojapo hetaiterei mbaʼe ivaíva Jehová renondépe ombopochy hag̃ua chupe” (2 Crón. 33:2-7). Manasés ojapóramo jepe koʼã mbaʼe, upe rire ohechauka oñarrepenti hague ipyʼaite guive, ha Jehová operdona chupe ha omoĩ jey chupe rréiramo (2 Crón. 33:12, 13). Térã ikatu avei repensa rréi David rehe. Haʼe ningo opeka kuri avei Jehová kóntrape, por ehémplo hekovaírõ guare ha oporojuka. Upéicharamo jepe, haʼe oñarrepentírõ guare ipyʼaite guive, Jehová operdona avei chupe (2 Sam. 12:9, 10, 13, 14). Upévare ñande ñaimekuaa segúro Jehová oĩha ñaneperdona hag̃uáicha. Ha jahechataháicha Jehová operdona lája idiferénte umi yvyporakuéra oporoperdona lájagui.

 8. ¿Mbaʼéichapa Jehová haʼe rupi peteĩ vuén Hués oipytyvõ chupe oporoperdona jave?

⁸ Jehová ningo haʼe “pe Hués ohusgáva ko yvy kompletoite” (Gén. 18:25). Peteĩ vuén hués oikuaa porã vaʼerã umi léi. Upévare ikatu jaʼe Jehová haʼeha peteĩ vuén Hués, pórke haʼe hína pe omeʼẽva ñandéve umi léi (Is. 33:22). Ha avei ndaipóri oikuaa porãvéva chugui mbaʼépa oĩ porã ha mbaʼépa oĩ vai. ¿Mbaʼépa oreko vaʼerã avei peteĩ vuén hués? Oreko vaʼerã la kapasida oikuaapaite hag̃ua entéro mbaʼe oiko vaʼekue, péicha ikatúta odesidi porã. Ha upévape Jehová ndaijojahái, pórke haʼe oikuaapaite entéro mbaʼe oikóva. Upévare Jehová haʼe peteĩ Hués ndaijojaháiva.

 9. ¿Mbaʼépa Jehová ogueraha enkuénta oporoperdonáta jave?

⁹ Jehová ningo idiferénte umi hués oĩvagui ko yvy ape ári, pórke haʼe oikuaa porãiterei opa mbaʼe oiko vaʼekue (Gén. 18:20, 21; Sal. 90:8). Haʼe ndahaʼéi yvypóraicha ojegiáva umi mbaʼe ohecha térã ohendúvarente. Upéva rangue haʼe oporohusgáta jave ogueraha enkuénta heta mbaʼe. Por ehémplo haʼe oikuaa porã mbaʼéichapa oñemongakuaa peteĩ persónape, moõpa oiko raʼe ha oikuaa umi mbaʼe opensáva, oñandúva ha avei ikatu oikuaa mbaʼépa oĩ ikorasõme. Upéicha rupi haʼe oikuaa mbaʼérepa peteĩ persóna ojapo kuri peteĩ mbaʼe. Ndaipóri mbaʼeve ni avave okañýva Ñandejáragui (Heb. 4:13). Upévare ikatu jaʼe Jehová ñaneperdona jave, haʼe oikuaapaiteha entéro mbaʼe oiko vaʼekue.

10. ¿Mbaʼérepa jaʼekuaa Jehová ihústo ha ndoladeaiha avavépe oporohusga jave? (Deuteronomio 32:4).

¹⁰ Jehová oporohusga jave siémpre ohechauka ihustoha ha avei ndoladeaiha avavépe. Upévare haʼe oporoperdona jave ndoguerahái enkuénta ipláta hetápa, ojekuaápa chupe térã ivalépa heta mbaʼépe (1 Sam. 16:7; Sant. 2:1-4). Ndaipóri ikatúva ojopy térã okoimea Jehovápe oporoperdona hag̃ua (2 Crón. 19:7). Haʼe ndoguerahái avei enkuénta umi mbaʼe oñandúvante oporohusgáta jave (Éx. 34:7). Añetehápe Jehová ontende ha oikuaa porãiterei rupi entéro mbaʼe, ikatu jaʼe hese haʼeha pe Hués Ijojahaʼỹva (elee Deuteronomio 32:4).

11. ¿Mbaʼérepa ndaijojahái Jehová perdón?

¹¹ Umi oskrivi vaʼekue umi Escrituras Hebreas orrekonose Jehová perdón ndaijojahaiha. Haʼekuéra heta vése oipuru peteĩ palávra hebrea oñeʼẽ hag̃ua upévare. Peteĩ óvra de rreferénsia bíblica heʼi voi: “Haʼekuéra oipuru ko palávra espesiálmente oñeʼẽ hag̃ua pe perdón Ñandejára ohechaukávare umi pekadórpe, ha núnka ndoipurúi ko palávra oñeʼẽ hag̃ua pe perdón ohechaukávare peteĩ persóna ótro hapichápe”. Añetehápe Jehová añoiténte oreko pe podér operdonaite hag̃ua peteĩ pekadór oñarrepentívape. ¿Ha mbaʼépa oiko Jehová ñaneperdona jave?

12, 13. a) ¿Mbaʼéichapa ñañeñandu Jehová ñaneperdona jave? b) ¿Mbaʼépa ojapo Jehová ñaneperdona jave?

¹² Ñande jaaseptáramo Jehová ñaneperdonaha ikatúta javyʼa, ñañeñandu porã ha ñanekonsiénsia potĩ. Peichagua perdón Jehová añoiténte ikatu omeʼẽ ñandéve (Hech. 3:19). Jehová ñaneperdona jave ikatu jey jaiko iñamígoramo.

¹³ Jehová ñaneperdona rire hesaraietéma umi mbaʼe vai ñande jajapo vaʼekuégui (Is. 43:25; Jer. 31:34). Jehová omomombyry ñandehegui umi ñane rembiapo vaikue ‘pe kuarahyresẽ mombyryháicha pe kuarahyreikégui’ (Sal. 103:12).b Jajepyʼamongetáramo mbaʼeichaitépa Jehová oporoperdonakuaa, upéva ñanemomýita jaagradese hag̃ua chupe (Sal. 130:4). Péro, ¿mávapepa Jehová ohechauka peichagua perdón?

14. ¿Mbaʼépa oipytyvõ Jehovápe odesidíta jave ñaneperdonátapa térã nahániri?

¹⁴ Jahecháma haguéicha Jehová oporoperdonáta jave ndoguerahái enkuénta pe pekádo igrávepa raʼe térãpa nahániri. ¿Mbaʼépa avei ñaaprendéma? Jehová haʼeha ñande Kreadór, pe omeʼẽva umi léi, ha peteĩ vuén Hués, ha koʼã mbaʼe oipytyvõ chupe odesidíta jave ñaneperdonátapa térã nahániri. Upéicharõ, ¿mbaʼe mbaʼépa la ohecháva Jehová ñaneperdona hag̃ua?

15. Heʼiháicha Lucas 12:47, 48, ¿mbaʼépa ohecha Jehová ñaneperdonáta jave?

¹⁵ ¿Mbaʼépa Jehová ogueraha avei enkuénta oporoperdonáta jave? Haʼe ohecha pe pekadórpa oikuaa porã raʼe la ojapo vaʼekue oĩ vaiha. Jesús omyesakã upéva Lucas 12:47, 48-pe (elee). Peteĩ persóna ojapóva peteĩ mbaʼe vai oikuaa porãramo jepe Jehovápe ndogustaiha, ivaieterei hína la ipekádo. Ikatu voi Jehová odesidi noñeperdonái chupe upevakuére (Mar. 3:29; Juan 9:41). Añetehápe heta vése ñande japilla voi pe jajapo vaʼekue oĩ vai hague. ¿Ikatúpa ñaneperdona péicha jave Jehová? Si ikatu, ha upéva jahecháta koʼág̃a.

16. ¿Mbaʼépa heʼise ñañarrepenti, ha mbaʼérepa ñaikotevẽ upéva Jehová ñaneperdona hag̃ua?

¹⁶ Ótra kósa Jehová ogueraháva avei enkuénta haʼe hína pe pekadórpa oñarrepenti ipyʼaite guive. ¿Mbaʼépa heʼise ñañarrepenti ñande pyʼaite guive? Upéva heʼise ñakambiaiteha umi mbaʼe ñapensáva ha jajapóva. Heʼise pe persóna oñarrepenti ha ombyasyetereiha pe mbaʼe vai ojapo vaʼekue. Ha ndahaʼéi oñembyasýnteva umi mbaʼe vai ojapo vaʼekuére, síno ohechakuaa mbaʼépa la ogueraha vai vaʼekue chupe hoʼa hag̃ua pe pekádope. Ñanemanduʼami jeýntena umi rréi Manasés ha David rehe. Haʼekuéra ningo opeka vaieterei vaʼekue Jehová renondépe, péro upéi oñarrepenti ipyʼaite guive ha Jehová operdona chupekuéra (1 Rey. 14:8). Jahecháma haguéicha Jehová ñaneperdona hag̃ua ñañarrepentímante vaʼerã ñande pyʼaite guive. Upéva heʼise ndahaʼeiha ñambyasýnteva umi mbaʼe vai jajapo vaʼekue, síno ñakambiaite vaʼerãha.c Jahechamína koʼág̃a ótra kósa Jehová ohecháva avei ñaneperdona hag̃ua.

17. ¿Mbaʼépa heʼise peteĩ persóna okambiaiteha, ha mbaʼérepa upéva iñimportánte anivéma hag̃ua hoʼa peteĩ pekádope? (Isaías 55:7).

¹⁷ Peteĩ mbaʼe Jehová ogueraháva avei enkuénta ñaneperdonáta jave haʼe upe persónapa okambia. Upéva heʼise ojevyha hape vaígui térã ohejaiteha umi mbaʼe vai ojapo vaʼekue ha oiko jey Jehová oipotaháicha (elee Isaías 55:7). Upe persóna okambiaite vaʼerã la opensa lája ha oheja vaʼerã ogia chupe umi mbaʼe Jehová heʼíva (Rom. 12:2; Efes. 4:23). Avei ohejaite vaʼerã umi mbaʼe vai opensa ha ojapo vaʼekue (Col. 3:7-10). Añetehápe ñande jajerovia rupi pe Jesús sakrifísiore, Jehová ñaneperdonáta ohecháramo ñañehaʼãmbaiteha ñakambia hag̃ua (1 Juan 1:7).

18. ¿Mbaʼépa jahecháma ko artíkulope Jehová oporoperdona lájagui?

¹⁸ Ko artíkulope jahecháma ndaiporiha ótro oporoperdonakuaavéva Jehovágui. ¿Mbaʼérepa jaʼekuaa upéva? Primero, haʼe oĩ siémpre ñaneperdona hag̃uáicha. Segundo, haʼe ñandekuaa porã. Upéicha rupi ndaipóri haʼéicha oikuaáva ñañarrepentípa hína ñande pyʼaite guive. Ha tercero, Jehová naimanduʼavéima umi mbaʼe vai jajapo vaʼekuére. Ha upéicha rupi ikatu jareko peteĩ konsiénsia potĩ ha oiko jey ñandehegui iñamígo.

19. Ñaneimperfékto ha jajavýramo jepe, ¿mbaʼérepa lomímonte ikatu javyʼa?

¹⁹ Añetehápe ñaneimperfékto aja, japekátante voi. Tuichaiterei ningo ñanekonsola pe jatopáva Perspicacia para comprender las Escrituras, volúmen 1, páhina 209-pe, upépengo heʼi: “Jehová ñandeporiahuvereko oikuaágui ñande ñaneimperfektoha ha pyʼỹinte jajavytaha. Upéicha rupi, isiervokuéra natekotevẽi oñeñandu vaieterei ojavy jave iñimperfékto haguére (Sal. 103:8-14; 130:3). Upéva rangue, oñehaʼãmbaitéramo oiko Jehová oipotaháicha ikatúta ovyʼa (Filip. 4:4-6; 1 Juan 3:19-22)”. ¡Ajépa ñanemokyreʼỹete jaikuaávo upéva!

20. ¿Mbaʼépa jahecháta pe ótro artíkulope?

²⁰ Ajépa javyʼaite Jehová oĩ haguére ñaneperdona hag̃uáicha ñañarrepentíma guive ñande pyʼaite guive. Upéicharõ, ¿mbaʼéichapa ikatu ñaporoperdona avei Jehová ojapoháicha? ¿Mbaʼépepa ojojogua ha mbaʼépepa idiferénte pe perdón ñande jahechaukáva ha pe perdón Jehová ohechaukáva ñandéve? ¿Ha mbaʼérepa iñimportantete jaikuaa upéva? Koʼã porandu ñambohováita pe artíkulo oúvape.