¿Mbaʼépa ikatu oaprende Gedeón ehémplogui umi ansiáno?

 1. Heʼiháicha 1 Pedro 5:2, ¿mbaʼe traváho iñimportántevapa oñenkarga umi ansiánope?

UMI ansiánope oñenkarga oñangareko hag̃ua Jehová ovecha mimíre. Haʼekuéra ovalora ko traváho ha oservise iñermanokuérape, upévare ombaʼapo jejopy oñangareko porã hag̃ua Ñandejára ovechakuérare (Jer. 23:4; elee 1 Pedro 5:2). Javyʼaite jareko haguére koʼãichagua ermáno ñane kongregasiónpe.

 2. ¿Mbaʼe ijetuʼúvapa ikatu ombohovái umi ansiáno?

² Okumpli aja irresponsavilida umi ansiáno ohasa heta mbaʼe ijetuʼúva. Haʼekuéra ombaʼapo jejopýmante vaʼerã oñangareko hag̃ua pe kongregasiónre. Tony, peteĩ ansiáno oservíva Estados Unídospe, tekotevẽ kuri orrekonose mboy traváhopa ikatu oasepta kongregasiónpe. Haʼe heʼi: “Oñepyrũrõ guare pe pandémia COVID-19, ajagarra heta rresponsavilida aorganisa hag̃ua umi rreunión ha predikasión. Péro ambaʼapo jejopýramo jepe, lomímo jeýnte heta la traváho. Aju rupi hetaiterei cherembiapo nañemotiempovéi alee hag̃ua la Biblia, astudia ha añemboʼe hag̃ua”. Ótro ansiáno Kosovopegua hérava Ilir oĩ kuri peteĩ sóna de gérrape ha ijetuʼu chupe osegi hag̃ua umi instruksión oúva Jehová organisasióngui. Haʼe heʼi: “Chepyʼamirĩ kuri pe sukursál omeʼẽrõ guare chéve peteĩ asignasión aipytyvõ hag̃ua umi ermáno oĩvape peteĩ sóna ipeligrosohápe. Akyhyje ha apensa umi instruksión ndoikomoʼãiha upe lugárpe”. Tim, oservíva de misionéro Ásiape, omombeʼu ijetuʼuha chupe okumplipa hag̃ua irresponsavilidakuéra. Haʼe heʼi: “Sapyʼánte nameʼẽvéima voi asegi hag̃ua añatende umi ermáno ha ermanakuérare”. ¿Mbaʼépa ikatu oipytyvõ umi ansiáno ohasávape koʼãichagua situasión?

 3. ¿Mbaʼéichapa ikatu ideprovécho enterovépe Gedeón ehémplo?

³ Umi ansiáno ikatu oaprende heta mbaʼe Gedeón ehémplogui (Heb. 6:12; 11:32). Haʼe ningo ogia ha oprotehe vaʼekue Ñandejára puévlope (Juec. 2:16; 1 Crón. 17:6). Gedeón kásoicha, umi ansiánope oñenombra oñatende hag̃ua Jehová puévlore peteĩ tiémpo ijetuʼuetereívape (Hech. 20:28; 2 Tim. 3:1). Gedeón ningo ehémplo porã pórke haʼe iñumílde, iñeʼẽrendu ha iñaguánte vaʼekue okumpli porã hag̃ua iñasignasión. Ñande ndahaʼéiramo jepe ansiáno ikatu ñañehaʼã ñamombaʼeve umi ansiánope, ha jaapoja koʼã ermáno ombaʼapo jejopyetévape oñangareko hag̃ua kongregasiónre (Heb. 13:17).

 4. ¿Mbaʼéichapa Gedeón ohechauka vaʼekue iñumildeha?

⁴ Gedeón iñumílde ha orrekonose vaʼekue la ndaikatúiva ojapo.b Jehová ánhel heʼírõ guare Gedeónpe ojeporavoha chupe osalva hag̃ua Israélpe umi madianítagui, haʼe ohechauka iñumildetereiha. Upérõ guare haʼe heʼi: “Che família ningo pe michĩvéva Manasés trívupe, ha che katu ndahaʼeiete voi mbaʼeve che túa rogayguakuéra apytépe” (Juec. 6:15). Gedeón opensa vaʼekue ndaikatumoʼãiha okumpli porã pe asignasión, péro Jehová oikuaa vaʼekue ikatuha. Ñandejára oipytyvõ rupi Gedeónpe, haʼe okumpli porã la oñenkargáva chupe.

 5. ¿Mbaʼéicha javépa ikatu ijetuʼu peteĩ ansiánope iñumílde hag̃ua?

⁵ Umi ansiáno oñehaʼã ohechauka iñumildeha entéro mbaʼépe (Miq. 6:8; Hech. 20:18, 19). Haʼekuéra ndoikói oñembotuicha ojapo porã haguére peteĩ mbaʼe ha ndojapoporãi jave álgo nopensái ndovaleiha mbaʼeverã. Péro sapyʼánte ikatu ijetuʼu peteĩ ansiánope ohechauka hag̃ua iñumildeha. Por ehémplo ikatu oime oasepta raʼe heta asignasión ha upéi ndaikatúi okumplipa. Avei ikatu ijetuʼu peteĩ ansiánope iñumílde hag̃ua oĩ jave okritikáva hese ojapo lájare hembiapo, térã oĩ jave oguerohorýva chupe ojapo porã haguére peteĩ asignasión. ¿Mbaʼéichapa Gedeón ehémplo ikatu oipytyvõ umi ansiánope koʼãichagua situasiónpe?

 6. ¿Mbaʼéichapa umi ansiáno ikatu oaprende Gedeóngui iñumílde hag̃ua? (Ehecha pe taʼanga).

⁶ Ejerure ajúda. Pe iñumíldeva orrekonose umi mbaʼe ndaikatumoʼãiva ojapo. Gedeón ohechauka vaʼekue iñumildeha, pórke naiprovlemaiete ojerure hag̃ua ajúda (Juec. 6:27, 35; 7:24). Umi ansiáno iñarandúva ojapo avei péicha. Pe ermáno ñamensiona vaʼekue hérava Tony omombeʼu: “Che ajepokuaa vaʼekue ajagarra hetave traváho la ikatu vaʼerãgui ajapo, pórke péicha chemongakuaa vaʼekue che tuakuéra. Péro upéi akalkula iporãtaha pe estúdio de famíliape roñeʼẽramo pe umildáre, ha ajerure che rembirekópe heʼi hag̃ua chéve la opensáva. Avei ahecha pe vidéo oĩva jw.org-pe hérava Jesús ojapo haguéicha, ñambokatupyry vaʼerã ótrope ha jajerovia hesekuéra”. Upémarõ Tony ojerure ajúda oñatende hag̃ua umi rresponsavilidáre. ¿Ha mbaʼépa ohupyty ojapo haguére péicha? Tony heʼi: “Ojesegi ojejapo porã pe traváho oĩva kongregasiónpe, ha che chetiempove amombareteve hag̃ua che amista Jehovándi”.

 7. ¿Mbaʼéichapa umi ansiáno ikatu osegi Gedeón ehémplo oĩ jave okritikáva hesekuéra? (Santiago 3:13).

⁷ Ani ndepochy oĩramo okritikáva nderehe. Ikatu ijetuʼu umi ansiánope iñumílde hag̃ua oĩ jave okritikáva hesekuéra. Upéicha jave iporãta imanduʼa jey hikuái Gedeón ehémplore. Haʼe orrekonose vaʼekue iñimperfektoha, upévare ndaipochýi umi kuimbaʼe Efraingua okritikárõ guare hese (Juec. 8:1-3). Gedeón nokontestavaíri kuri chupekuéra, síno ohechauka iñumílde ha iñakãguapyha. ¿Mbaʼéichapa? Haʼe ohendúnte umi efraimita ojeplageárõ guare, ha oñeʼẽ chupekuéra trankílo porã. Umi ansiáno iñarandúva osegi avei Gedeón ehémplo ojapysaka porãvo umi ermánore ha oñeʼẽvo akãguapýpe porãnte oĩ jave okritikáva hesekuéra (elee Santiago 3:13). Ojapóvo péicha oipytyvõ hikuái oĩ hag̃ua pyʼaguapy kongregasiónpe.

 8. ¿Mbaʼépa ojapo vaʼerã umi ansiáno oĩ jave oguerohorýva chupekuéra? Emoĩ peteĩ ehémplo.

⁸ Emombaʼe Jehovápe. Gedeón oganárõ guare umi madianítape oĩ kuri heta omombaʼetereíva chupe, péro haʼe heʼi oñemombaʼeguasu hag̃ua Jehovápe (Juec. 8:22, 23). ¿Mbaʼéichapa umi ansiáno ikatu osegi Gedeón ehémplo? Haʼekuéra orrekonose vaʼerã ojapoha entéro mbaʼe Jehová rupivénte (1 Cor. 4:6, 7). Por ehémplo oñemombaʼéramo peteĩ ansiánope ivaleterei haguére oporomboʼe hag̃ua, haʼe ikatu heʼi la Bíbliagui oguenohẽ hague pe enseñánsa, térã heʼi Ñandejára organisasión la ombokatupyrýva enterovépe. Iporãta ningo káda tánto umi ansiáno oñeporandúramo omboʼépa hína oñemombaʼe hag̃uáicha Jehovápe térãpa haʼekuéra ojechaukase hína. Jahechamína la oiko vaʼekue peteĩ ermáno héravare Timothy oñenombra ramoitépe chupe ansiáno. Haʼe heʼi: “Ajaposeterei vaʼekue umi diskúrso ha aprepara voi umi introduksión ha ehémplo ipukúva ha orekóva heta detálle. Upéi pyʼỹinte umi ermáno cheguerohory che diskúrsore, péro ahechakuaa oñekonsentraha hikuái cherehe ha ndahaʼéi la Bíbliare ni Jehováre”. Upe rire Timothy ohechakuaa okambiaʼimi vaʼerãha omboʼe lája oñepensave hag̃ua Jehováre haʼe ojapo aja idiskúrso (Prov. 27:21). ¿Mbaʼépa oiko upéi? Timothy heʼi: “Koʼág̃a umi ermáno omombeʼu chéve oimérõ peteĩ che diskúrso oipytyvõ raʼe chupekuéra ogueropuʼaka hag̃ua peteĩ provléma, oaguanta hag̃ua peteĩ situasión ijetuʼúva térã oñemoag̃uive hag̃ua Jehováre. Upéva chembovyʼaiterei pórke ndahaʼéi anteve guaréicha oúva chévente cheguerohory”.

 9. ¿Mbaʼe situasiónpepa ijetuʼu kuri Gedeónpe iñeʼẽrendu ha ipyʼaguasu hag̃ua? (Ehecha pe taʼanga oĩva ko rrevísta apére).

⁹ Oñenombra rire Gedeónpe odirihi hag̃ua Israélpe ijetuʼu kuri chupe iñeʼẽrendu ha ipyʼaguasu. Por ehémplo, oñemanda chupe ohundi hag̃ua pe altár oipurúva itúa oadora hag̃ua Baálpe, ha upéva peteĩ asignasión ipeligrósova (Juec. 6:25, 26). Ótra vuéltape, Gedeón ombyaty kuri isoldadokuérape oñorairõ hag̃ua, péro Jehová heʼi chupe 2 vése omomichĩve hag̃ua ijehérsito (Juec. 7:2-7). Upe rire ojeʼe chupe oataka hag̃ua iñenemigokuérape pyharepyte (Juec. 7:9-11).

10. ¿Mbaʼéicha javépa ikatu ijetuʼu umi ansiánope iñeʼẽrendu hag̃ua?

¹⁰ Iñimportanteterei umi ansiáno “ikyreʼỹ iñeʼẽrendu hag̃ua” (Sant. 3:17). Peteĩ ansiáno iñeʼẽrendúva pyaʼe voi osegi pe gía oĩva la Bíbliape ha umi instruksión oúva Jehová organisasióngui. Péicha omoĩ hikuái ehémplo porã enterovépe. Péro sapyʼánte ikatu ijetuʼu peteĩ ansiánope iñeʼẽrendu hag̃ua. Por ehémplo og̃uahẽrõ hetaiterei instruksión térã okambiárõ pyaʼeterei umíva, ikatu ijetuʼu chupe osegipa hag̃ua. Avése ikatu voi oduda ideprovéchotapa térã oikótapa upe lugárpe peteĩ instruksión. Ikatu avei oñemeʼẽ chupe peteĩ asignasión oĩháme la posivilida ohóvo préso. ¿Mbaʼéichapa umi ansiáno ikatu osegi Gedeón ehémplo péicha jave?

11. ¿Mbaʼéichapa ikatu ohechauka umi ansiáno iñeʼẽrenduha?

¹¹ Eñatende porã umi instruksión oñemeʼẽvare ikatu hag̃uáicha ekumpli. Jehová heʼi porã vaʼekue Gedeónpe mbaʼéichapa ohundi vaʼerã itúa altár, moõpa omopuʼã vaʼerã peteĩ altár pyahu Jehovápe g̃uarã ha mbaʼe animálpa osakrifika vaʼerã. Gedeón noñemoĩri okuestiona la ojeʼéva chupe, síno ojapo Jehová heʼi hagueichaite. Koʼág̃arupi avei umi ansiáno orresivi umi kárta, anúnsio ha instruksión, ojeʼehápe chupekuéra mbaʼéichapa okuida vaʼerã ermanokuérare ha oipytyvõ vaʼerãha chupekuéra oñemoag̃uive hag̃ua Jehováre. Ñande ñamombaʼeterei umi ansiánope osegipaite haguére umi instruksión oúva Jehová organisasióngui, pórke upéva ideprovechoiterei kongregasiónpe (Sal. 119:112).

12. Jehová organisasión heʼi jave oñekambia vaʼerãha ojejapo lája álgo, ¿mbaʼéichapa umi ansiáno ikatu osegi la konsého oĩva Hebreos 13:17-pe?

¹² Nekyreʼỹkena esegi hag̃ua umi kámbio ojapóva Jehová organisasión. Ñanemanduʼa Jehová ojerure hague Gedeónpe omondopa lénto jey hag̃ua isoldadokuéra hógape (Juec. 7:8). Ikatu oime Gedeón opensa: “¿Ojejapómante vaʼerã piko péicha? ¿Oikóta piko hína?”. Tahaʼe haʼeháicha Gedeón ojapo la ojeʼéva chupe. Koʼág̃a avei umi ansiáno osegi Gedeón ehémplo. Haʼekuéra iñeʼẽrendu Jehová organisasión ojerurérõ chupekuéra okambia hag̃ua álgo ojejapo lája (elee Hebreos 13:17). Por ehémplo, áño 2014-pe pe Kuérpo Governánte odesidi okambiataha la ojekuvri lája umi gásto oĩva oñemopuʼã hag̃ua umi Salón del Reino ha Salón de Asambléa (2 Cor. 8:12-14). Yma ñane organisasión oipurukámi pláta umi kongregasiónpe umi konstruksionrã, ha upéi umi kongregasión opaga ohóvo la préstamore. Péro koʼág̃a ojepuru umi kontrivusión omeʼẽva entéro kongregasión oĩva ko múndo tuichakuére. Péicha oñemopuʼã ifaltahápe umi Salón del Reino ha Salón de Asamblea, jepe pe kongregasión pe lugarpegua saʼieterei ikatu okontrivui. Peteĩ ermáno hérava José oikuaárõ guare ko kámbio oduda kuri la oikóne hag̃ua. Haʼe opensa kuri: “Koʼág̃a guive ni peteĩ Salón noñemopuʼãmoʼãvéima. Ko paíspe ndojejapói la kósa péicha”. ¿Mbaʼépa oipytyvõ Josépe oasepta hag̃ua la kámbio? Haʼe heʼi: “La heʼíva Proverbios 3:5, 6 chemomanduʼa akonfia vaʼerãha Jehováre, ha legálmente koʼág̃a ikatu haʼe oikoite hague la kámbio. Ndahaʼéi oñemopuʼãnteva hetave Salón, síno roaprende ikatuha romeʼẽ ore kontrivusión de diferénte fórma enterovéva jareko jojapa hag̃ua”.

13. a) ¿Mbaʼéguipa oĩ vaʼekue segúro Gedeón? b) ¿Mbaʼéichapa umi ansiáno ikatu osegi Gedeón ehémplo? (Ehecha pe taʼanga).

¹³ Ejapo Jehová volunta pyʼaguasúpe. Gedeón iñeʼẽrendu vaʼekue ipeligrósorõ jepe iñasignasión ha okyhyjéramo jepe (Juec. 9:17). Jehová oasegura rire Gedeónpe oĩtaha hendive, haʼe ndodudavéima Ñandejára oipytyvõta hague chupe oprotehe hag̃ua ipuévlope. Oĩ umi país ojeproivihápe Testigokuéra rembiapo, péro umi ansiáno uperupigua osegi Gedeón ehémplo. Haʼekuéra pyʼaguasúpe odirihi umi rreunión ha predikasión oĩramo jepe oamenasáva chupekuéra ojeguerahataha kárselpe, oñeinterrogataha, operdetaha itraváho ha oñemaltratataha.c Pe jehasa asy guasu aja umi ansiáno ipyʼaguasúmante vaʼerã osegi hag̃ua umi instruksión ipeligrósotaramo jepe. Por ehémplo ikatu og̃uahẽ umi instruksión heʼíva mbaʼéichapa ojepredika vaʼerã pe mensáhe de huísio ipohyietéva, ha heʼíva mbaʼépa tekotevẽ jajapo jajesalva hag̃ua Gog de Magog oataka vove (Ezeq. 38:18; Apoc. 16:21).

14. ¿Mbaʼe situasiónpepa ijetuʼu vaʼekue Gedeónpe oaguanta hag̃ua?

¹⁴ Gedeón tekotevẽ kuri ombaʼapo jejopy oservírõ guare de hués. Oñorairõrõ guare pyharepyte umi madianítandi, haʼekuéra osẽ okañy ha Gedeón omuña chupekuéra Jezreel Ñu guive rrío Jordán peve. Upe sóna provávlemente iñanandy kuri (Juec. 7:22). ¿Ojokópa rakaʼe upéva Gedeónpe? Nahániri. Ikaneʼõramo jepe, Gedeón ha umi 300 soldádo okrusa pe rrío ha osegi omuña iñenemigokuérape. Amo ipahápe ohupyty hikuái umi madianítape ha ogana chupekuéra (Juec. 8:4-12).

15. ¿Mbaʼérepa sapyʼánte ikatu ijetuʼu umi ansiánope osegi hag̃ua oaguanta?

¹⁵ Umi ansiáno ikatu ou oñandu nomeʼẽveimaha ha ikaneʼõiterei, pórke oñatende vaʼerã kongregasiónre ha avei ifamíliare. ¿Mbaʼéichapa ikatu osegi hikuái Gedeón ehémplo péicha jave?

16, 17. ¿Mbaʼépa oipytyvõ vaʼekue Gedeónpe oaguanta hag̃ua, ha mbaʼe rehepa ikatu oĩ segúro umi ansiáno? (Isaías 40:28-31) (Ehecha pe taʼanga).

¹⁶ Ekonfia Jehová nemombaretetaha. Gedeón ndodudái vaʼekue Jehová omombaretéta hague chupe ha peichaite oiko (Juec. 6:14, 34). Peteĩ jey Gedeón ha umi soldádo odipara ohóvo omuña hag̃ua mokõi rréi madianítape, ha koʼã rréi katu provávlemente oho kuri kaméllo ári (Juec. 8:12, 21). Péro Ñandejára oipytyvõ umi israelítape ohupyty hag̃ua koʼã rréipe ha ogana hikuái pe ñorairõ. Péicha avei umi ansiáno ikatu okonfia Jehová omombaretetaha chupekuéra, pórke “haʼe arakaʼeve naikaneʼõi ni núnka naikangýi” (elee Isaías 40:28-31).

¹⁷ Jahechamína la ohasáva Mateo, peteĩ ermáno ombaʼapóva pe Comité de Enlace con los Hospitales ndive. ¿Mbaʼépa oipytyvõ chupe oaguanta hag̃ua? Haʼe omombeʼu: “Ahechakuaa siertoha la heʼíva Filipenses 4:13. Sapyʼánte chekaneʼõitereíma, péicha jave añemboʼe che pyʼaite guive ha arroga Jehovápe omeʼẽ hag̃ua chéve fuérsa aipytyvõ hag̃ua ermanokuérape. Upéi añandu jepi Jehová espíritu chemombareteha asegi hag̃ua aaguanta”. Gedeón ojapo haguéicha, umi ansiáno avei ombaʼapo jejopy oñatende porã hag̃ua pe kongregasiónre, ndahaʼéiramo jepe siémpre la ifasilpáva. Siérto, haʼekuéra tekotevẽ iñumílde orrekonose hag̃ua ndaikatumoʼãiha ojapo entéro mbaʼe ojaposéva. Péro umi ansiáno ikatu ojerovia Jehová ohendutaha chupekuéra ojerure jave ajúda ha omombaretetaha osegi hag̃ua oaguanta hikuái (Sal. 116:1; Filip. 2:13).

18. Jahecháma haguéicha, ¿mbaʼéichapa umi ansiáno ikatu osegi Gedeón ehémplo?

¹⁸ Jahechaháicha umi ansiáno ikatu oaprende heta mbaʼe Gedeóngui. Haʼekuéra tekotevẽ orrekonose mboy traváhore ikatúta ipuʼaka, avei iñumílde vaʼerã oĩ jave okritikáva hesekuéra térã oguerohorýva chupekuéra. Iñimportanteterei iñeʼẽrendu ha ipyʼaguasu hikuái, koʼýte hiʼag̃uivévo ohóvo pe fin. Ha ndodudái vaʼerã Ñandejára omombaretetaha chupekuéra tahaʼe haʼéva la oñepresentáva. Añetehápe enterovéva javaloraiterei umi ansiánope ha ‘jasegise ñamombaʼe’ chupekuéra (Filip. 2:29).