Javyʼaiterei jajapóvo iporãva ótro rehehápe

1, 2. Jehová ñandeapo vaʼekue javyʼaiteve hag̃ua ñameʼẽvo, ¿mbaʼéichapa upéva ñanevenefisia?

ÑANDE javyʼaiteve ñameʼẽvo ótrope, oñemeʼẽ rangue ñandéve. Péicha voi Jehová ñandeapo vaʼekue (Hech. 20:35). ¿Heʼisépa upéva ndajavyʼaiha oñemeʼẽrõ ñandéve peteĩ rregálo? Nahániri. Jaikuaa ningo ñandepyʼaroryha jarresivi jave peteĩ rregálo, péro javyʼavéntema oimérõ ñande la ñameʼẽva hína. Legálmente tuicha ñañevenefisia Jehová ñandeapo haguére upéicha. ¿Mbaʼérepa jaʼe upéva?

² Jehová ñandeapo rupi péicha, omeʼẽ ñandéve la oportunida ñande voi jajapóvo álgo ikatu hag̃uáicha javyʼa. Upévare ikatu javyʼave jahekárõ mbaʼéichapa ñaipytyvõkuaa ótrope. ¡Ajépa iporãite la Jehová ñandeapo haguére péicha! (Sal. 139:14).

 3. ¿Mbaʼérepa ojeʼe Jehováre haʼeha ‘Ñandejára ovyʼáva’?

³ La Biblia heʼi porã umi omeʼẽva ovyʼaitereiha. Upévare ikatu ñantende mbaʼérepa Jehová haʼe hína ‘Ñandejára ovyʼáva’ (1 Tim. 1:11). Haʼe ningo pe primeroite imbaʼeporã vaʼekue ótrondi ha ndaipóri haʼéicha omeʼẽkuaáva. Apóstol Pablo heʼi haguéicha Jehová “rupive ningo jaikove, jakuʼe ha jaexisti” (Hech. 17:28). Añetehápe “entéro mbaʼe porã ha rregálo iporãva” ou Jehovágui (Sant. 1:17).

 4. ¿Mbaʼépa ñanepytyvõta javyʼave hag̃ua?

⁴ Enterovéva ningo javyʼaseve ñameʼẽvo, ha upéva ikatu jajapo jasegírõ Jehová ehémplo ha ñanembaʼeporãrõ haʼéicha (Efes. 5:1). Ko artíkulope jahecháta Jehová ehémplo porãite, ha ñaanalisáta mbaʼépa ikatu jajapo haʼetérõ ndojeagradeséiva ñandéve la jajapóva. Koʼã mbaʼe ñanepytyvõta jasegi hag̃ua ñanembaʼeporã ha péicha javyʼave.

JASEGI JEHOVÁ EHÉMPLO HA ÑANEMBAʼEPORÃ

 5. ¿Mbaʼe mbaʼépa Jehová omeʼẽ ñandéve?

⁵ ¿Mbaʼéichapa Jehová ohechauka imbaʼeporãha ñanendive? Jahechamína unos kuánto ehémplo. Jehová omeʼẽ ñandéve la ñaikotevẽva. Ikatu oime ndajarekói hetaiterei mbaʼe, péro jareko la ñaikotevẽva jaikove hag̃ua. Por ehémplo Ñandejára rupive jareko la ñamonde vaʼerã, jaʼumi vaʼerã ha peteĩ lugár jaiko hag̃ua (Sal. 4:8; Mat. 6:​31-33; 1 Tim. 6:​6-8). Jehová nomeʼẽi ñandéve koʼã mbaʼe oñandúgui ojapómante vaʼerãha upéva ñanderehehápe. ¿Mbaʼére upéicharõ imbaʼeporã ñanendive?

 6. ¿Mbaʼépa ñanemboʼe Mateo 6:​25, 26?

⁶ Jehová omeʼẽ ñandéve la ñaikotevẽva ñanderayhu rupi. Jahechamína la Jesús heʼi vaʼekue Mateo 6:​25, 26-pe (elee). Haʼe oñeʼẽ vaʼekue Jehová kreasiónre, por ehémplo umi guyráre ha heʼi: “Haʼekuéra noñemitỹi, nomonoʼõi ha nombyatýi hembiʼurã galpónpe”. Péro upéi Jesús heʼive: “Pende Ru oĩva yvágape omongaru chupekuéra. ¿Ndapevalevéi piko peẽ chuguikuéra?”. ¿Mbaʼépa ñaaprende? Jehovápe g̃uarã ningo isiervokuéra tuicha iñimportanteve umi animálgui, ha haʼe okuidárõ umi animál rehe, koʼýte omeʼẽta ñandéve la ñaikotevẽva. Peteĩ túa oporohayhúvaicha, Jehová okuida ifamíliare ohayhuetereígui chupekuéra (Sal. 145:16; Mat. 6:32).

 7. ¿Mbaʼépa ikatu jajapo ñanembaʼeporã hag̃ua Jehová ojapoháicha? (Ehecha pe taʼanga).

⁷ Ikatu jasegi Jehová ehémplo ñameʼẽvõ mborayhúpe ótrope la oikotevẽva. Por ehémplo, ¿reikuaápa peteĩ ermáno oikotevẽvape hína ao térã hoʼumi vaʼerã? Jehová ikatu hína ojevale nderehe eipytyvõ hag̃ua chupe. Jehová puévlo ningo ikonosído voi pyaʼe oporopytyvõ haguére oiko jave umi desástre. Por ehémplo pe pandémia de COVID-19 aja, umi ermáno omeʼẽ ao, provísta ha hetave mbaʼe umi oikotevẽvape. Heta ermáno avei omeʼẽ ikontrivusión pe óvra mundiálpe g̃uarã. Péicha ikatu oñepytyvõ umi ermáno oĩvape ko yvy tuichakuére oikohápe umi desástre. Koʼã ermáno imbaʼeporãitéva oreko enkuénta la heʼíva Hebreos 13:16: “Ani penderesarái pejapo vaʼerãha iporãva ha pekomparti vaʼerãha la peguerekóva pende rapichakuérandi. Koʼã mbaʼe ningo peteĩ ofrénda Ñandejárape g̃uarã ha ombovyʼaiterei chupe”.

 8. ¿Mbaʼéichapa ñanepytyvõ Jehová podér? (Filip. 2:13).

⁸ Jehová omeʼẽ ñandéve podér. Jehová podér núnka ndopái ha haʼe omeʼẽse voi pe fuérsa ha podér isiervokuérape (elee Filipenses 2:13). Epensamíntena, ¿ejerurémapa algúna ves Jehovápe tanemombarete rembohovái porã hag̃ua peteĩ tentasión? ¿Térã ejerure chupe fuérsa eaguanta hag̃ua káda día? Nde rehechávo oñekontestaha ne ñemboʼe katuete reñeñandu apóstol Pablo oñeñandu haguéicha. Haʼe heʼi vaʼekue: “Che chembarete ambohovái hag̃ua entéro mbaʼe Ñandejára omeʼẽgui chéve podér” (Filip. 4:13).

 9. ¿Mbaʼéichapa ikatu jaipuru pe podér jarekóva Jehová ojapoháicha? (Ehecha pe taʼanga).

⁹ Ñande ndajarekói podér opaʼỹva Jehová orekoháicha, ha upévare ndaikatúi ñameʼẽ fuérsa ñande rapichápe haʼe ojapoháicha. Péro si ikatu jaipuru ñane mbaretekue ñande rapicha rehehápe ha péicha jasegi Jehová ehémplo. Por ehémplo, ikatu ñaipytyvõ umi ermáno hasýva térã ijedávape jajapóvo chupekuéra umi mbaʼe ogapypegua, térã ñambaʼejoguávo la oikotevẽva. Ha oĩrõ ñande posivilidápe, ikatu jajeofrese ñamopotĩ térã jajapo hag̃ua mantenimiénto pe Salón del Rréinope. Jaipurúrõ péicha pe podér jarekóva, tuichaiterei ikatu ñaipytyvõ umi ermáno ha ermánape.

10. ¿Mbaʼéichapa ikatu ñamombarete ótrope la jaʼéva rupive?

¹⁰ Ñanemanduʼa vaʼerã avei la jaʼéva rupive ikatuha ñamombarete ótrope. ¿Mávapepa ikatu remokyreʼỹ efelisitávo chupe la ojapo vaʼekuére? ¿Oĩpa álgien oikotevẽva rekonsola chupe? Oimérõ upéicha, eaprovechákena upe oportunida ehechauka hag̃ua chupe reñeinteresaha hese. Upearã ikatu evisita chupe hógape, ehenói, emondo chupe peteĩ kartaʼi térã peteĩ mensáhe. Ani epensa tekotevẽha neñeʼẽkuaaiterei eporomokyreʼỹ hag̃ua. Upe ermáno térã ermána oikotevẽnte hína álgien ikatúva oñeʼẽ chupe mborayhúpe. Upévare eipurúrõ umi palávra isensíllova ikatu hína reipytyvõ chupe oñeñandu porãve hag̃ua ha osegi hag̃ua ifiél (Prov. 12:25; Efes. 4:29).

11. ¿Mbaʼéichapa Jehová oipuru iñarandu?

¹¹ Jehová omeʼẽ ñandéve arandu. Pe disípulo Santiago oskrivi vaʼekue: “Oĩramo pende apytépe oikotevẽva arandu, ojerure meme vaʼerã Ñandejárape ha haʼe omeʼẽta chupe. Pórke Ñandejára ipojera omeʼẽ hag̃ua upéva enterovépe, ha ndaipochymoʼãi upe ojerurévandi [térã “ndohovaʼapimoʼãi avavépe”]” (Sant. 1:​5, nóta). Heʼiháicha ko téxto Jehová nahakateʼỹi pe arandúre, síno ipojera voi omeʼẽ hag̃ua upéva ótrope. Santiago avei heʼi Jehová omeʼẽ jave arandu ‘ndaipochyiha pe ojerurévandi upéva’ térã ‘ndohovaʼapimoʼãiha’ upe haguére pe persónape. Jehová ndoipotaiete ñañeñandu vai jajerure haguére chupe tañanemoarandu ha tañandegia, síno oipota voi jajerure chupe upéva (Prov. 2:​1-6).

12. ¿Mbaʼe oportunidápa jareko ñakompartívo la jaikuaáva?

¹² ¿Ikatúpa ñande jasegi Jehová ehémplo ko kásope? (Sal. 32:8). Jehová siervokuéra oreko heta oportunida omoarandu hag̃ua ótrope okompartívo la oikuaáva. Por ehémplo pyʼỹinte ñaipytyvõ umi ipyahúvape predikasiónpe. Avei umi ansiáno ipasiénsia ombokatupyry hag̃ua umi siérvo ministeriálpe ha umi ótro ermánope ojapokuaa hag̃ua hembiapo kongregasiónpe. Ha umi ermáno ha ermána ivaléva konstruksiónpe ha mantenimiéntope oipytyvõ ótrope ikatupyry hag̃ua umi traváho ojejapóvape Jehová servísiope.

13. Ñambokatupyry jave ótrope, ¿mbaʼéichapa ikatu jasegi Jehová ehémplo?

¹³ Jasegíkena Jehová ehémplo otoka jave ñandéve ñambokatupyry ótrope. Péicha jave ñanemanduʼa vaʼerã Jehová pojerápe omeʼẽha ñandéve arandu. Upévare ñande vyʼápe avei ñakompartise la jaikuaáva umi oaprendévandi hína. Ni mbaʼevéicharõ ndajaikomoʼãi ñañemohakateʼỹ la jaikuaávare jakyhyjégui oñemeʼẽrõ g̃uarã ótrope ñane asignasión. Avei ndajaikói vaʼerã jaʼe: “Chéve avave nachemboʼéi vaʼekue, toaprende haʼe ijeheguínte”. Ni peteĩ Jehová siérvo nopensái vaʼerã péicha. Upéva rangue vyʼápe ñakomparti la jaikuaáva ha ndahaʼéi voi upévante, ‘ñameʼẽ voi ñande rekove jepe ñaporopytyvõ hag̃ua’ (1 Tes. 2:8). Ñande jaipotaiterei entéro umi ermáno ‘ikatupyry avei omboʼe hag̃ua ótrope’ (2 Tim. 2:​1, 2). Opavave ñakompartírõ pe arandu pojerápe, enterovéva javyʼáta ha ñanearanduvéta.

HAʼETÉRÕ NDOJEAGRADESÉIVA ÑANDÉVE LA JAJAPÓVA

14. ¿Mbaʼépa oiko jepi ñaipytyvõ jave ótrope?

¹⁴ Normálmente ñane ermáno ha ermanakuéra oagradese ñandéve la jajapóvare hesehapekuéra. Ikatu omondo ñandéve peteĩ kartaʼi térã oheka hikuái mbaʼépa ikatu ojapo ohechauka hag̃ua oagradeseha hikuái (Col. 3:15). Péicha jave javyʼavéntema ñaipytyvõ haguére chupekuéra.

15. ¿Mbaʼe rehepa ñanemanduʼa vaʼerã oĩramo ndoagradeséiva la jajapóvare?

¹⁵ Sapyʼánte ningo oĩ persóna ndohechaukáiva térã ndeʼíriva oagradeseha ñandéve la jajapo vaʼekuére hesehápe. Ikatu oime jaipuru raʼe ñane tiémpo, ñane mbaretekue térã ñande pláta ñaipytyvõ hag̃ua chupe. Péro upéi ñañandu nomombaʼeiha ni michĩmi la jajapo vaʼekue. Oiko sapyʼárõ upéva, ¿mbaʼépa ikatu jajapo ani hag̃ua ñandepochy ha jaju ñañamarga? Ñanemanduʼákena la heʼívare Hechos 20:​35, upe téxto omopyenda ko artíkulo. Ñande javyʼa ñameʼẽvo ótrope ha la ñañandúva nodependéi umi ótro oagradesépa ñandéve térã nahániri. Ñande ikatu jadesidi jasegitaha ñaporopytyvõ vyʼápe, haʼetéramo jepe noñemombaʼéiva la jajapóva. ¿Mbaʼépa ñanepytyvõta upearã? Jahechamína unos kuánto konsého.

16. ¿Mbaʼépa ikatu ñanepytyvõ jasegi hag̃ua ñameʼẽ vyʼápe?

¹⁶ Ñañehaʼã jasegi Jehová ehémplo. Haʼe ningo omeʼẽ heta mbaʼe iporãva enterovépe oĩramo jepe ndoagradeséiva chupe (Mat. 5:​43-48). Jehová opromete oñemeʼẽtaha ñandéve peteĩ rregálo tuichaitereíva ñaipytyvõrõ umi ótrope ñahaʼãrõʼỹre mbaʼeve (Luc. 6:35). Upévare aníkena ñañedesanima sapyʼánte oĩramo ndoagradeséiva ñandéve la jajapo vaʼekuére. Ñanemanduʼákena Jehová ñanepremiataha jajapo haguére iporãva ñande rapicha rehehápe, ha ñameʼẽ rupi vyʼápe ótrope la oikotevẽva (Prov. 19:17; 2 Cor. 9:7).

17. ¿Mbaʼépa la iñimportánte vaʼerã ñanembaʼeporã jave ótrondi? (Lucas 14:​12-14).

¹⁷ Jasegi hag̃ua Jehová ehémplo ikatu jajapo la Jesús heʼi vaʼekue Lucas 14:​12-14-pe (elee). Jaikuaa oĩha umi ikatúva omyengovia ñandéve la jajapóva hesehapekuéra, ha ndaivaíri añete ñainvita chupekuéra ñande rógape ha ñanembaʼeporã hendivekuéra. ¿Péro mbaʼépa oikóta japilláramo jaikoha ñameʼẽ ñahaʼarõguinte ojepaga jey ñandéve? Oimérõ upéicha iporãta jasegi Jesús konsého. Upearã ñañehaʼã vaʼerã ñanembaʼeporã umi ndaikatumoʼãivandi omyengovia jey ñandéve. Péicha jajapóramo javyʼáta pórke jasegi Jehová ehémplo. Avei ñameʼẽrõ ñahaʼarõʼỹre mbaʼeve, lomímonte javyʼáta ndojeagradeséi jave ñandéve la jajapo vaʼekuére.

18. ¿Mbaʼépa ndovaléi jajapo ha mbaʼérepa?

¹⁸ Ani ñapensa vai ñande rapicháre (1 Cor. 13:7). Oimérõ oĩ algúno ndohechaukáiva oagradeseha ndéve la rejapóva, ikatu reñeporandu: ¿Legálmente piko imalagradesído térã hesaráinte hína oagradese hag̃ua chéve? Ndajaikuaapái ningo mbaʼérepa peteĩ persóna ndoagradeséi ñandéve ñahaʼarõ haguéicha. Oĩ ningo algúno omombaʼetereíva la ojejapóva hesehápe péro ijetuʼu chupe ohechauka hag̃ua oagradeseha upéva. Ikatu oime otĩ pórke koʼág̃a oikotevẽ ótrore, koʼýte oimérõ pe persóna ymave ojepokuaa vaʼekue oporopytyvõ ha koʼág̃a ndaikatuvéi. Tahaʼe haʼeháicha, japorohayhu añetéramo ndajaikomoʼãi ñapensa vai ñane ermanokuérare ha jasegíta ñanembaʼeporã vyʼápe (Efes. 4:2).

19, 20. ¿Mbaʼérepa tekotevẽ ñanepasiénsia ñaporopytyvõ jave? (Ehecha pe taʼanga).

¹⁹ Ñanepasiénsiakena. Rréi Salomón oskrivi vaʼekue: “Emombo ne pan pe ýpe, upéi algún tiémpo rire katuete retopa jeýta” (Ecl. 11:1). Ohechaukaháicha ko téxto, sapyʼánte oĩta algúno oagradeséva ñandéve la jajapo vaʼekuére “algún tiémpo rire”. Jahechamína peteĩ experiénsia ohechaukáva upéva siertoha.

²⁰ Ojapo unos kuánto áño peteĩ superintendénte de sirkuíto rembireko oskrivi hague peteĩ kárta peteĩ ermána ojevautisa ramóvape, pórke omokyreʼỹse chupe osegi hag̃ua ifiél Jehovápe. Ohasa rire 8 áño pe ermána ojevautisa ramo vaʼekue okontesta pe kárta ha heʼi: ‘Oiméne nereñeimahinái mbaʼeichaitémapa nde chepytyvõ koʼã áño ohasa vaʼekuépe. La reskrivi vaʼekue chéve opokoiterei vaʼekue cherehe ha núnka ndacheresaráiri pe téxto remensiona vaʼekuégui nde kártape’.a Upéi pe ermána omombeʼu pe superintendénte rembirekópe umi situasión ijetuʼúva ohasa vaʼekue ha heʼi: ‘Sapyʼánte chekaneʼõ ha añentregaséntema, ni Jehovápe ndaservisevéima. Péro péicha jave chemanduʼa jey pe téxto reskrivi vaʼekuére ha upéva chemombarete asegi hag̃ua alucha. Legálmente nde kárta ha upe téxto rekomparti vaʼekue chendive la chemokyreʼỹve vaʼekue koʼã 8 áño ohasa vaʼekuépe’. Oiméne ovyʼaite pe superintendénte rembireko oñekontestárõ guare chupe la ikárta “algún tiémpo rire”. Ñande kásope avei ikatu oiko upéva. Ikatu oĩ oagradeséva la jajapo vaʼekuére hesehápe un tiémpo rire ae.

21. ¿Mbaʼérepa resegise Jehová ehémplo porãite?

²¹ Jahecháma haguéicha Jehová ñandeapo vaʼekue javyʼave hag̃ua ñameʼẽvo, ñandéve oñemeʼẽ rangue. Ñañeñandu porã ningo ikatu jave ñaipytyvõ ñane ermanokuérape, ha ñanembopyʼarory haʼekuéra ohechauka jave oagradeseha la jajapo vaʼekue. Péro oĩramo jepe ndohechaukáiva ijagradesidoha, lomímonte jasegi javyʼa jaikuaágui jajapo hague la oĩ porãva. Siémprekena ñanemanduʼa ‘Jehová ikatuha omeʼẽve ñandéve hetaitereive’ pe ñande ñameʼẽ vaʼekuégui ótrope (2 Crón. 25:9). Ndaipóri ótro imbaʼeporãvéva ha ipojeravéva Jehovágui. Ha javyʼaiterei haʼe omyengovia jave ñandéve la jajapo vaʼekuére. Upévare jasegíkena pe ehémplo omoĩva ñandéve ñande Ru yvagapegua imbaʼeporãitéva.