Umi ipojeráva katuete ovyʼa

 1. ¿Mbaʼépa ohechauka Jehová ipojeraha?

JEHOVÁ oiko vaʼekue haʼeñoite heta tiémpore, upéicharõ jepe nopensái ijehénte. Haʼe odesidi okrea umi ánhel ha yvyporakuérape oikove hag̃ua avei. La Biblia ohenói Jehovápe “Ñandejára ovyʼáva”. Haʼe añetehápe omeʼẽseterei heta mbaʼe porã enterovépe (1 Tim. 1:11; Sant. 1:17). Jehová oipota ñande avei javyʼa haʼe ovyʼaháicha. Upévare ñanemboʼe ñandepojera ha ñakomparti hag̃ua ótrondi umi mbaʼe jarekóva (Rom. 1:20).

2, 3. a) ¿Mbaʼérepa javyʼa ñandepojera jave? b) ¿Mbaʼépa jahecháta ko artíkulope?

² Jehová ñandeapo vaʼekue ijoguahárõ (Gén. 1:27). Upéva heʼise ñandekrea hague ikatu hag̃uáicha jahechauka umi kualida haʼe orekóva. Upévare, javyʼaséramo añete ha jaipotáramo Jehová ñanevendesi, tekotevẽ jasegi iñehémplo. Avei ñañeinteresa vaʼerã ñande pyʼaite guive ñande rapicháre ha ñakomparti hendivekuéra umi mbaʼe jarekóva (Filip. 2:3, 4; Sant. 1:5). ¿Mbaʼérepa? Pórke Jehová ñandeapo vaʼekue jajapo hag̃ua koʼã mbaʼe. Ñaneimperféktoramo jepe, ikatu jasegi iñehémplo ha ñandepojera avei.

³ Ko artíkulope jahecháta mbaʼéichapa la Biblia ñanemokyreʼỹ ñandepojera hag̃ua, ha mbaʼérepa ikatu jaʼe Jehová ovyʼaha ñandereheve ñandepojera jave. Avei ñahesaʼỹijóta mbaʼéichapa ñandepojeráramo ikatúta jajapo pe tembiapo Jehová onkarga vaʼekue ñandéve, ha mbaʼérepa javyʼa ñandepojera jave. Ipahaitépe jahecháta mbaʼérepa tekotevẽ jasegi ñandepojera.

4, 5. ¿Mbaʼéichapa Jehová ha Jesús ipojera, ha mbaʼérepa jasegi vaʼerã iñehemplokuéra?

⁴ Jehová oipota jasegi iñehémplo, upévare haʼe ovyʼa ñandepojera jave (Efes. 5:1). Jehová oipota avei javyʼa. Upévare ñandeapo porãiterei vaʼekue ha avei okrea ko yvy ha opa mbaʼe oĩva pype ikatu hag̃uáicha javyʼa (Sal. 104:24; 139:13-16). Upéicharõ, jahechauka hína ñamombaʼeha Jehovápe ñañehaʼãramo avei ñambovyʼa ñande rapichápe.

⁵ Jesús ipojeraiterei vaʼekue, ha péicha oheja ñandéve pe ehémplo iporãvéva jasegi hag̃ua. Haʼe heʼi vaʼekue: “Pe Yvypóra Raʼy ndoúi oporojokuái hag̃ua, ou guei oiko tembiguáiramo, ha omeʼẽ hekove, opaga ha oguenohẽ hag̃ua hetápe pekádo poguýgui” (Mat. 20:28). Apóstol Pablo omokyreʼỹ vaʼekue avei kristianokuérape heʼívo: “Pesegíkena pepensa Cristo Jesús opensa haguéicha”. Upéi heʼi avei mbaʼépa ojapo Jesús: “Oheja opa mbaʼe oreko vaʼekue ha oiko tembiguáiramo” (Filip. 2:5, 7). Upévare iporã ñañeporandu: “¿Ikatúpa hína asegi porãve Jesús ehémplo?” (elee 1 Pedro 2:21).

 6. ¿Mbaʼépa ñanemboʼe Jesús omombeʼúrõ guare pe istória oñeʼẽva pe samaritano imbaʼeporãvare? (Ehecha pe taʼanga oĩva iñepyrũme).

⁶ Jehová ovyʼaiterei jasegi jave pe ehémplo porãite oheja vaʼekue ñandéve haʼe ha Itaʼýra. Ñande jahechauka jasegiha iñehemplokuéra ñañeinteresáramo ñande rapicháre ha ñapensáramo mbaʼéichapa ikatu ñaipytyvõ chupekuéra. Jesús ohechauka vaʼekue iñimportanteha jajapo koʼã mbaʼe omombeʼúrõ guare pe istória oñeʼẽva pe samaritano imbaʼeporãvare (elee Lucas 10:29-37). Haʼe omboʼe idisipulokuérape oipytyvõ vaʼerãha entéro hapichápe tahaʼe haʼéva tetãygua. Jesús omombeʼu vaʼekue ko istória pórke peteĩ kuimbaʼe judío oporandu chupe: “¿Máva piko añetehápe che rapicha?”. Umi mbaʼe Jesús heʼi vaʼekue ko kuimbaʼépe ñanemboʼe tekotevẽha ñanembaʼeporã pe samaritano ojapo haguéicha. Péicha jajapóramo, Jehová ovyʼáta ñandereheve.

 7. ¿Mbaʼéichapa jahechauka jagueroviaha Jehová añoite ojapoha hekoitépe opa mbaʼe? Emyesakã.

⁷ ¿Mbaʼérepa iporã avei ñandepojera? Jahechamína mbaʼépa oiko vaʼekue hardín de Edénpe. Satanás heʼi vaʼekue Adán ha Eva ovyʼavetaha naiñeʼẽrendúiramo ha opensáramo ijehénte. Eva ojepyʼapy ijehénte ha ojoguase Ñandejárape. Adán avei opensa ijehénte ha omeʼẽseve gústo Évape iñeʼẽrendu rangue Jehovápe (Gén. 3:4-6). Jaikuaaháicha, sarambi oiko kuri odesidi vai rupi hikuái. Umi mbaʼe oiko vaʼekue Adán ha Évare, ñanemboʼe ñapensáramo ñandejehénte arakaʼeve ndajavyʼamoʼãiha. Péro ñandepojeráramo, jahechaukáta jagueroviaha Jehová añoite ojapoha hekoitépe opa mbaʼe.

 8. ¿Mbaʼérepa Adán ha Eva ojepyʼapy vaʼerãmoʼã kuri ótrore?

⁸ Adán ha Eva oiko vaʼekue haʼeño hardín de Edénpe. Péro ¿mbaʼérepa ikatu jaʼe haʼekuéra ndojepyʼapýi hague ótrore? Jehová heʼi vaʼekue chupekuéra ifamília reta hag̃ua ikatu hag̃uáicha omyenyhẽ ko yvy ha ojapo chugui peteĩ paraíso (Gén. 1:28). Jehová oipota kuri entéro oikóva ko yvy ape ári ovyʼa. Adán ha Eva katu ndojepyʼapýi umi ifamília onasétavare. Jehová oipota kuri Adán ha Eva familiakuéra ombaʼapo oñondive ojapo hag̃ua ko yvýgui peteĩ paraíso. Upéva ningo haʼe vaʼekue peteĩ tembiapo tuichaitereíva.

 9. ¿Mbaʼérepa yvyporakuéra ovyʼa vaʼerãmoʼã kuri ojapórire ko yvýgui peteĩ paraíso?

⁹ Adán ha Eva oipytyvõ vaʼerãmoʼã Jehovápe okumpli hag̃ua hembipota ojapóvo ko yvýgui peteĩ paraíso. Haʼekuéra ojapórire upéva ikatúta kuri oike pe lugár Ñandejára orekóvape opytuʼu hag̃ua (Heb. 4:11). Epensamíntena mbaʼeichaitépa ovyʼa vaʼerãmoʼã hikuái ojapórire upe tembiapo. Jehová katuete tuichaiterei ovendesi vaʼerãmoʼã chupekuéra opensárire hapicháre.

10, 11. ¿Mbaʼépa ñanepytyvõta ñakumpli hag̃ua pe tembiapo Jehová onkarga vaʼekue ñandéve?

¹⁰ Ñandéve avei Jehová onkarga peteĩ tembiapo ijojahaʼỹva. Haʼe oipota japredika ha ñaipytyvõ ñande rapichápe oiko hag̃ua chugui Jesús disípulo. Jajapo porã hag̃ua ko tembiapo ñañeinteresa vaʼerã ñande pyʼaite guive umi héntere. Añetehápe, jahayhu vaʼerã Jehovápe ha ñande rapichápe jasegi hag̃ua japredika ha ñamboʼe umi héntepe la Biblia.

¹¹ Pablo heʼi vaʼekue haʼe ha ambue kristiáno haʼeha “Ñandejára ajudánte”, pórke opredika ha omboʼe pe añetegua umi héntepe (1 Cor. 3:6, 9). ¿Mbaʼéichapa ikatu avei oiko ñandehegui “Ñandejára ajudánte”? Vyʼápe jaipurúramo ñane tiémpo, ñane mbaretekue ha ñande pláta jajapo hag̃ua pe tembiapo Ñandejára onkarga vaʼekue ñandéve. ¡Ajépa tuichaite priviléhio jajapo ko tembiapo!

12, 13. ¿Mbaʼérepa ikatu jaʼe jahupytyha heta mbaʼe porã ñamboʼéramo la Biblia ñande rapichápe?

¹² Javyʼaiterei ningo jaipuru jave ñane tiémpo ha ñane mbaretekue japredika ha ñaporomboʼe hag̃ua. Umi ermáno ha ermána ombostudiáva la Biblia hapichápe ovyʼaiterei ikatu haguére ojapo upéva. Añetehápe javyʼa umi ñane estudiánte oñemosiona jave oaprende rupi mbaʼépa añetehápe omboʼe la Biblia, ha jahecha jave ojeroviaha hikuái Jehováre. Avei javyʼa jahecháramo ojapoha hikuái heta kámbio, ha oñepyrũha omombeʼu ótrope umi mbaʼe oaprendéva. Jesús avei ovyʼaiterei vaʼekue ohechárõ umi 70 disípulo ouha “vyʼapópe” predikasióngui ohupyty haguére heta mbaʼe porã (Luc. 10:17-21).

¹³ Entéro ermáno oĩva ko yvy tuichakuére ovyʼa ohecha jave pe marandu porã oipytyvõha umi héntepe oiko porãve hag̃ua. Por ehémplo, peteĩ ermána soltéra hérava Ana ojaposeve kuri Jehová servísiope.a Upévare ova éste gotyo, Európape, pórke upépe oñekotevẽve opredika vaʼerãre. Haʼe heʼi: “Avyʼaiterei ajapo jave estúdio bíblico, ha koʼápe areko heta oportunida ajapo hag̃ua upéva. Añetehápe avyʼa aservi rupi Jehovápe. Ag̃uahẽ rire ógape, apensa umi provléma ohasávare che estudiantekuéra, upévare nahembyvéi chéve tiémpo ajepyʼapy hag̃ua chejehe. Avei ahecha mbaʼéichapa ikatu amokyreʼỹ ha aipytyvõ chupekuéra. Añetehápe ‘javyʼaiteve ñameʼẽvo, ñandéve oñemeʼẽ rangue’” (Hech. 20:35).

14. ¿Mbaʼérepa ikatu javyʼa oĩramo jepe nañanerenduséiva predikasiónpe?

¹⁴ Oĩramo jepe nañanerenduséiva, ikatúnte avei javyʼa japredikáramo hekoitépe ha entéro ikatúvape. Péicha ñameʼẽ hína oportunida ñande rapichakuérape ohendu hag̃ua pe marandu porã. Jehová oipota avei jajapo proféta Ezequiélpe omanda vaʼekue: “Nerendu térã nanerendúiramo jepe, ere vaʼerã chupekuéra umi mbaʼe haʼéva ndéve” (Ezeq. 2:7; Is. 43:10). Heta vése umi hénte nañanerenduséi, upéicharõ jepe Jehová omombaʼeterei opa mbaʼe jajapóva predikasiónpe (elee Hebreos 6:10). Peteĩ ermáno heʼi: “Ñande ñañotỹ, jarrega, ha jajerure Jehovápe oipytyvõ hag̃ua umi ipyʼaporãvape oprogresa hag̃ua” (1 Cor. 3:6).

15. ¿Ñandepojera vaʼerãpa umi hénte oagradesévandi añoite ñandéve? Emyesakã.

¹⁵ Jesús avei oipota javyʼa. Haʼe oikuaa ñandepojeráramo ñañeñandu porãvetaha. Heta persóna omombaʼe ñandepojera jave. Upévare haʼe heʼi: “Pendepojera memékena pende rapichándi ha oñemyengoviáta peẽme, ojehykuavóta pende ao ruguáipe hetaiterei mbaʼe, ha ijave hag̃ua ojejopy ha oñemonguʼéta, ikatu hag̃uáicha henyhẽ chovi. Cháke pe medída peipurúva pende rapicháre ojepurúta penderehe avei” (Luc. 6:38). Ñandepojeráramo jepe, ndahaʼéi upe haguére entéro oagradesétava ñandéve. Péro ñane ehémplo ikatu hína oipytyvõ ótrope ipojera hag̃ua avei. Upévare, jasegíkena ñandepojera oĩramo jepe ndoagradeséiva ñandéve. Heta mbaʼe porã ningo ikatu hína jahupyty ñandepojeráramo.

16. ¿Mávandipa ñandepojera vaʼerã, ha mbaʼérepa?

¹⁶ Umi añetehápe ipojeráva nohaʼarõi umi ótro omyengovia chupe upe haguére. Jesús heʼi vaʼekue: “Rejapo jave karu guasu reinvita vaʼerã umi imboriahúvape, umi ijyvaʼỹva, umi oguataʼỹva, ha umi siégope. Ha revyʼáta, haʼekuéra ndoguerekóigui omyengovia hag̃ua ndéve” (Luc. 14:13, 14). La Biblia heʼi avei: “Pe imbaʼeporãva [...] orresivíta heta vendisión”, ha ótro téxto heʼi: “Ovyʼa pe oipytyvõva umi imboriahúvape” (Prov. 22:9; Sal. 41:1). Jahechaháicha, ñaipytyvõ vaʼerã ñande rapichápe ikatu hag̃uáicha javyʼa.

17. ¿Mbaʼéichapa ikatu avei jahechauka ñandepojeraha?

¹⁷ Pablo omensionárõ guare Jesús heʼi hague javyʼaiteveha “ñameʼẽvo, ñandéve oñemeʼẽ rangue”, ndeʼiséi ñameʼẽ vaʼerãha pláta ha mbaʼerepy añónte, síno avei ñamokyreʼỹ, ñaipytyvõ ha ñaakonseha vaʼerãha la Biblia rupive umi oikotevẽvape (Hech. 20:31-35). Umi mbaʼe Pablo heʼívare ha ojapóvare ñaaprende iñimportanteha ñandepojera. Jahechaukáta ñandepojeraha ñameʼẽ jave ñane tiémpo ha ñane mbaretekue ótro rehehápe, ha ñañeinteresa ha jahayhúramo ñande rapichápe.

18. ¿Mbaʼépa heʼi heta investigadór umi hénte ipojerávare?

¹⁸ Umi investigadór ostudiáva yvyporakuéra lája heʼi peteĩ tapicha ipojeráva ovyʼaveha. Peteĩ informasión heʼi avei: “Heta hénte omombeʼu ovyʼaiteveha hikuái oipytyvõ jave hapichápe”. Umi investigadór heʼi avei ñaipytyvõ jave ótrope isentidoha la ñande rekove. Upévare unos kuánto expérto oakonseha umi héntepe ombaʼapo hag̃ua de voluntário oipytyvõ hag̃ua hapichápe. Haʼekuéra heʼi umi hénte ojapórõ upéva hesãivetaha ha ovyʼavetaha. Péro ndajahecharamói koʼã mbaʼe, pórke ñande Apohare Jehová ñanderayhuetéva heʼi voi javyʼaveha ñameʼẽ jave (2 Tim. 3:16, 17).

19, 20. ¿Mbaʼérepa siémpre ñañehaʼã vaʼerã ñandepojera?

¹⁹ Jaiko rupi peteĩ múndo henyhẽva umi hénte ojepyʼapývagui ijehénte, ikatu hína ijetuʼu jasegi hag̃ua ñandepojera. Péro Jesús heʼi vaʼekue umi mokõi mandamiénto iñimportantevéva haʼeha jahayhu Jehovápe ñande pyʼaite guive, ñande rekove kompletoite reheve, entéro ñane pensamiénto reheve, ha ñane mbaretekue reheve, ha avei jahayhu vaʼerãha ñande rapichápe ñande voi jajehayhuháicha (Mar. 12:28-31). Ko artíkulo ñanemboʼe jasegíramo Jehová ehémplo jahechaukaha hína jahayhuha chupe. Jehová ha Jesús ningo ipojera ha ñanemokyreʼỹ jasegi hag̃ua iñehemplokuéra pórke péicha añetehápe javyʼáta. Ñañehaʼã vaʼerã ñandepojera Jehovándi ha ñande rapichakuérandi. Péicha ñamombaʼeguasúta Ñandejárape ha jahupytýta heta mbaʼe porã ñande voi ha avei ñande rapichakuéra.

²⁰ Oime vaʼerã ñañehaʼãma voi hína jajapo ikatúva guive ñandepojera ha ñaipytyvõ hag̃ua ñande rapichápe, ha koʼýte ñane ermanokuérape (Gál. 6:10). Jasegíramo jajapo upéva katuete javyʼáta, ha umi hénte oagradeséta ñandéve ha ñanderayhúta. La Biblia heʼi: “Pe persóna ipojerávape katuete oñevendesíta, pe omeʼẽva y hapichápe hoyʼu hag̃ua, orresivíta avei y” (Prov. 11:25). Ikatu ningo heta hendáicha jahechauka ñandepojeraha predikasiónpe térã ambue situasiónpe. Pe artíkulo oúvape jahecháta mbaʼéichapa ikatu jajapo upéva.