Ñaneñeʼẽrendu Ñandejárape ha ñañevenefisia ipromésagui

 1. ¿Mbaʼérepa idiferentete Jehová promésa yvyporakuéra oprometévagui?

JEHOVÁ ningo “Ñandejára heʼíva pe añetegua” (Sal. 31:5, NM). Hese jajeroviakuaa ‘Haʼe ndaikatúigui ijapu’. Péro yvyporakuéra katu ojavy meme ha upévare ndaikatúi jajeroviapa hesekuéra (Heb. 6:18, ÑÑB; elee Números 23:19). Opa mbaʼe Jehová oprometéva ou porã yvypórape ha oñekumpli katuete. Pór ehémplo, Ñandejára ojapovaʼekue ko Yvy ha entéro mbaʼe oĩva ipype seis día ipuku pukúvape. Ha oñepyrũ mboyve káda día, heʼíma mbaʼépa ojapóta ha upéi “oiko haʼe heʼi haguéicha”. Upéicha rupi, og̃uahẽvo huʼãme pe sexto día, “omaʼẽ opa mbaʼe ojapovaʼekuére ha ojuhu iporãitereiha” (Gén. 1:6, 7, 30, 31).

 2. ¿Mbaʼépa pe ára Ñandejára opytuʼuha, ha mbaʼépa heʼise omomarangatu hague upe ára?

² Ohecha rire opa mbaʼe ojapovaʼekue, Ñandejára heʼi oñepyrũha pe ára sieteha. Haʼe noñeʼẽikuri peteĩ día orekóvare veinticuatro órante, síno peteĩ tiémpo ipukúvare. Upe ára sietehápe Jehová opytuʼu hembiapokuéragui, ha ndojapovéima mbaʼeve ipyahúva ko yvy ape ári (Gén. 2:2). Ha upe “día” ndopái gueteri (Heb. 4:9, 10). La Biblia nomombeʼúi arakaʼetépa oñepyrũ upe ára, péro jaʼekuaa oñepyrũ hague Ñandejára ojapo riremi Évape, Adán rembireko, ojapo seis mil áño rupi. Koʼág̃a katu ñahaʼarõñaína pe goviérno oĩtava Jesucristo pópe mil áñore ha okumplítava Jehová rembipota ko Yvýpe g̃uarã. ¿Mbaʼépa hína hembipota? Yvyporakuéra perfékto jeýta ha oikovéta opa ára g̃uarã peteĩ lugár neporãmba jepévape (Gén. 1:27, 28; Rev. 20:6). ¿Ikatúpa jajerovia oñekumplitaha ko promésa porãite? Ikatu. “Ñandejára ovendesi ha omomarangatu pe ára sieteha.” Upéva ohechauka og̃uahẽvo huʼãme pe ára haʼe opytuʼuha, katuete oñekumplitaha hembipota, toiko la oikóva (Gén. 2:3, NM).

 3. a) ¿Mbaʼépa oiko oñepyrũ riremi pe ára Ñandejára opytuʼuha? b) ¿Mbaʼéichapa Jehová omombeʼu ohunditaha umi oñemoĩvape hese?

³ Péro oñepyrũmírente pe ára Ñandejára opytuʼuha, oiko peteĩ mbaʼe ivaietereíva. Peteĩ ánhel, Satanás, ou ijapu Évape ha opuʼã Jehováre oipotágui oñemombaʼeguasu avei chupe. Ikúlpare Eva ou naiñeʼẽrendúi Ijapoharépe (1 Tim. 2:14). Upéi katu Eva okonsegi iména omoirũ chupe hembiapo vaípe (Gén. 3:1-6). Upérõ guare Satanás ogueroviaukase Ñandejára oporombotavyha, ha ijetuʼúramo jepe upe situasión, Jehová nopensái tekotevẽha ojapo peteĩ huraménto ohechauka hag̃ua okumplitaha hembipota. Upéva rangue heʼi mbaʼéichapa oñehundíta umi oñemoĩva hese, ha upéva omombeʼu oñentende hag̃uáicha itiempoitépe. Ñandejára heʼi Satanáspe: “Kuña ndive romoingo vaíta, ha iñemoñare ne ñemoñare ndive. Kuña ñemoñare ne akãre opyrũta, nde katu [reisuʼúta chupe] ipytápe” (Gén. 3:15; Rev. 12:9).

4, 5. ¿Mbaʼépa ojapovaʼekue Abrahán tres vése rupi?

⁴ Upe tiémpope oiméne natekotevẽirakaʼe ojejapo peteĩ huraménto ojehechauka hag̃ua oñekumplitaha katuete peteĩ mbaʼe iñimportánteva. Opavave ningo perfékto, ha umi ohayhúva Ñandejárape ha ohaʼangáva chupe, ndaijapúi ha ojeroviaiterei ojuehe. Péro ko situasión okambia Adán ha Eva opeka guive ha oiko rire chuguikuéra yvypóra imperfékto. Upe guive, heta hetave oĩ ijapu ha oporombotavýva, upéicha rupi peteĩ tapicha oñekomprometéva ojapotaha peteĩ mbaʼe, tekotevẽma kuri ohura ikatu hag̃uáicha ojejerovia hese.

⁵ Ñandejára Ñeʼẽ heʼi Abrahán avei ojapo hague huraménto tres vése rupi (Gén. 21:22-24; 24:2-4, 9). Pór ehémplo, oñorairõ rire rréi Elamgua ha umi ótro rréi ndive, osẽ ohug̃uaitĩ chupe rréi Salemgua ha Sodomaygua. Peteĩva, hérava Melquisedec, haʼéva avei “Ñandejára Ijyvatetéva saserdóte”, ovendesi Abrahánpe ha omombaʼeguasu Jehovápe oipytyvõ haguére chupe ogana hag̃ua upe ñorairõ (Gén. 14:17-20, NM). Upe rire, pe rréi Sodomaygua ohepymeʼẽse Abrahánpe orreskata haguére ipuévlope iñenemigokuéragui. Péro Abrahán heʼi chupe: “Amopuʼã che po [Ñandejára] yvatetegua, yvága ha yvy Apoharépe, ameʼẽvo che ñeʼẽ hérape, ndarahamoʼãiha mbaʼevete asy nembaʼéva, tahaʼe jepe raʼe sapatu sã térã inimbo pehengue. Upéicha ndaikatumoʼãi ere reikóvo: ‘Abrán oñemombaʼereta che rupive’” (Gén. 14:21-23).

 6. a) ¿Mbaʼe ehémplopa omoĩ ñandéve Abrahán? b) ¿Mbaʼéichapa ou porã ñandéve Abrahán iñeʼẽrendu haguére?

⁶ Jehová ojapo avei heta huraménto ikatu hag̃uáicha jajerovia ipromesakuérare. Umíva oñepyrũ jepi péicha: “Che, opa mbaʼe Jára, chejehe voi ahura” (Ezeq. 17:16, NM). La Bíbliape jatopa cuarenta vése rasa umi huraménto Ñandejára ojapóva, ha pe ojapovaʼekue Abrahánpe ikatu hína pe ojekuaavéva. Ohasávo pe tiémpo, Jehová opromete chupe heta mbaʼe, ha umíva ohechauka pe Ñemoñare oñeprometevaʼekue outaha ifamiliarégui, itaʼýra Isaac rupive (Gén. 12:1-3, 7; 13:14-17; 15:5, 18; 21:12). Upéi Ñandejára ojerure Abrahánpe ojapo hag̃ua peteĩ mbaʼe ijetuʼuetereíva. Heʼi chupe osakrifika hag̃ua itaʼýra ohayhuetéva. Péro oñemoĩvo ojapo hag̃uáicha upéva, peteĩ ánhel ojoko chupe. Upe rire Jehová ohura Abrahánpe: “Chejehe voi [ahura]. Rejapo haguére haʼevaʼekue ndéve, ha nanerakateʼỹigui remeʼẽ hag̃ua chéve nde raʼy, ambohetaitereíta ndéve ne ñemoñare, mbyjakuéra yvagapegua ha yvykuʼi raʼỹi yguasu rembeʼypeguáicha. Ne ñemoñarekuéra ipuʼakáta umi hesekuéra ijaʼeʼỹvare. Ha opa tetã ko yvy arigua [oñevendesíta] ne ñemoñare rupi, rejapo haguére haʼéva ndéve” (Gén. 22:1-3, 9-12, 15-18).

7, 8. a) ¿Maʼerãpa Ñandejára ohura Abrahánpe okumplitaha ipromésa? b) ¿Mbaʼéichapa oñevenefisiáta Jehová huraméntogui “ambue ovechakuéra”?

⁷ ¿Maʼerãpa Jehová ohura Abrahánpe okumplitaha ipromésa? Ikatu hag̃uáicha omokyreʼỹ ha omombarete umi oisãmbyhýtavape Cristo ndive. Haʼekuéra ningo oĩ avei pe “ñemoñare” oñeprometevaʼekue apytépe (elee Hebreos 6:13-18; Gál. 3:29, NM). Apóstol Pablo heʼivaʼekue: “Ñandejára ojapo peteĩ huraménto, ikatu hag̃uáicha mokõi mbaʼe noñekambiáiva rupi [ipromésa ha ihuraménto] ohechauka Haʼe ndaikatuiha ijapu. Upéva rupive jajejoko hatãve jahávo pe esperánsa jarekóva rehe ñane renonderãme g̃uarã”.

⁸ Jehová ohuravaʼekue Abrahán “ñemoñare” rupive oñevendesitaha “opa tetã ko yvy arigua” (Gén. 22:18). Upévare jaʼekuaa ndahaʼeiha umi oisãmbyhýtava Cristo ndive añónte oñevenefisiáva ko huraméntogui. Ohupytýta avei “ambue ovechakuéra” iñeʼẽrendúvape oikótava opa ára g̃uarã ko yvy ape ári (Juan 10:16, NM). Upéicharõ, tahaʼe jaikótarõ yvágape térã ko Yvýpe, “jajejoko hatãve” vaʼerã ñane esperánsare ñaneñeʼẽrendúvo Jehovápe opa mbaʼépe (elee Hebreos 6:11, 12).

 9. ¿Mbaʼépa Ñandejára ohuravaʼekue Abrahán ñemoñarekuérape oikóramo guare hikuái tembiguáiramo Egíptope?

⁹ Heta tiémpo rire, Jehová ohura jey okumplitaha umi promésa ojapovaʼekue Abrahánpe omondórõ guare Moiséspe oñeʼẽ hag̃ua umi isrraelítape, oikóva upérõ tembiguáiramo Egíptope (Éx. 6:6-8). Upérõ guare Ñandejára heʼi: “Aiporavóramo guare Israélpe [...] [ahuravaʼekue] anohẽtaha Egíptogui ha araha chupekuéra pe yvýpe che aiporavovaʼekue chupekuéra g̃uarã, peteĩ yvy, kamby ha eíra osyryhápe ýicha” (Ezeq. 20:5, 6).

10. ¿Mbaʼépa Jehová ohura Israélpe omosãso rire chupekuéra Egíptogui?

¹⁰ Omosãso rire umi isrraelítape Egipto poguýgui, Ñandejára ojapo jey ambue huraménto chupekuéra: “Pejapóramo añetehápe che haʼehaichaite, ha ñaĩramo oñoñeʼẽme, upéicharõ poiporavóta che retã teerã opa tetã apytégui, chembaʼéramo jepe ko yvy tuichakue. Ha oĩta oservíva rréi ha saserdóteramo chéve g̃uarã ha oikóta pendehegui tetã imarangatúva” (Éx. 19:5, 6, NM). ¡Ajépa tuichaite mbaʼe upéva! Haʼekuéra iñeʼẽrendúrire Jehovápe, heta isrraelíta ikatuvaʼerãmoʼã oservi rréi ha saserdóteramo oñevendesi hag̃ua opavave yvypórape. Upe rire, Ñandejára omyesakã ojapovaʼekue hesehapekuéra upérõ guare: “[Ahura ndéve]. Añemoĩ peteĩ ñeʼẽme nendive” (Ezeq. 16:8).

11. ¿Mbaʼépa ojapo umi isrraelíta Ñandejára oinvitárõ guare chupekuéra oike hag̃ua peteĩ kompromísope?

¹¹ Jehová ndojopyivaʼekue umi isrraelítape ohura hag̃ua iñeʼẽrendutaha chupe, ni ndojeruréi chupekuéra ojagarra hag̃ua pe kompromíso hendive. Haʼekuéra ijeheguieténte heʼivaʼekue: “Rojapóta opa mbaʼe heʼíva Ñandejára” (Éx. 19:8). Tres día haguépe Jehová heʼi chupekuéra mbaʼépa ojapovaʼerã ohechauka hag̃ua hetã teeha. Ñepyrũrã ojelee chupekuéra umi Diez Mandamiénto, ha upéi Moisés rupive oñemeʼẽ hetave léi (Éx. 20:22–23:33). ¿Mbaʼépa ojapo hikuái? “Maymáva heʼi: ‘Rojapóta opa mbaʼe heʼíva Ñandejára’.” (Éx. 24:3.) Upéi Moisés ohai umi léi peteĩ lívrope, oñembohérava “lívro del pákto”, ha olee hatã porã ikatu hag̃uáicha entéro ohendu jey. Upepete Israel opromete tres veseha: “Rojapóta opa mbaʼe heʼíva Ñandejára” (Éx. 24:4, 7, 8).

12. ¿Mbaʼépa ojapo Jehová ha ipuévlo pe kompromísogui?

¹² Jehová pyaʼe voi okumpli pe ikompromíso. Ojapouka peteĩ lugár oñemombaʼeguasu hag̃ua chupe ha omoñepyrũ pe saserdósio ikatu hag̃uáicha oñemoag̃ui hese yvyporakuéra imperfékto. Péro umi isrraelíta sapyʼaitépe hesarái oñemeʼẽma hague oservi hag̃ua Ñandejárape. Umi mbaʼe ojapóva rupi “omoñeñandu vai hikuái Israel Jára Imarangatuetévape” (Sal. 78:41, NM). Pór ehémplo, Moiséspe oñemeʼẽ aja umi léi mónte Sinaípe, haʼekuéra opensa haʼe oheja reiha chupekuéra, upémarõ naipasiensiavéi ha ndojeroviavéi Jehováre. Upévare ojapo hikuái peteĩ vakaraʼy raʼanga ha osapukaijoa: “Israel, kóva haʼe [nde jára] nerenohẽvaʼekue Egipto retãgui” (Éx. 32:1, 4, ÑÑB). Upéi haʼekuéra oñepyrũ oñesũ ha ojapo sakrifísio pe taʼanga renondépe ha ohenói upe fiéstape “vyʼa guasu Ñandejára rérape”. Jehová ohechávo upéva heʼi Moiséspe: “Pyaʼeterei ojei hikuái che rapégui” (Éx. 32:5, 6, 8). Ñambyasýramo jepe, upe guive Israel ojepokuaa ohura ha nokumplíri iñeʼẽ (Núm. 30:2).

13. ¿Mbaʼépa Ñandejára ohura rréi Davídpe, ha mbaʼérepa jaʼekuaa oñeʼẽ hague pe Ñemoñare oñeprometevaʼekue rehe?

¹³ David oisãmbyhy aja, Jehová ojapove mokõi huraménto ikatu hag̃uáicha oñevendesi opavave hembiguái iñeʼẽrendúvape. Primero, ohura Davídpe igoviérno opytataha opa árare (Sal. 89:35, 36; 132:11, 12). Upéva heʼise pe Ñemoñare oñeprometevaʼekue outaha ifamiliarégui, ha upévare oñehenoitaha chupe “David Raʼy” (Mat. 1:1; 21:9, NM). Avei David voi oñeʼẽvaʼekue upe ñemoñare rehe, heʼívo hese “che Ruvicha”. Péicha haʼe ohechauka Cristo omanda tuichavetaha chugui (Mat. 22:42-44, NM).

14. ¿Mbaʼépa Jehová ohura pe Ñemoñare oñeprometevaʼekuére, ha mbaʼéichapa upéva ou porã ñandéve?

¹⁴ Segundo, Jehová ohaika Davídpe espíritu sánto rupive ko Rréigui oikotaha avei Saserdóte Guasu opavave yvypórape g̃uarã. Yma Israélpe umi rréi ndaikatuivaʼekue oservi saserdóteramo ha umi saserdótegui ndaikatúi oiko rréi. Pór ehémplo, opavave saserdóte ou Leví trívugui, ha enterove umi rréi katu ojeporavo Judá trívugui. Péro David oprofetisavaʼekue ko Rréi omanda guasútavare: “Ñandejára heʼi che Ruvicha guasúpe: ‘Eguapy che akatúa gotyo, tamoĩ ne pyendáramo umi nderayhuʼỹva’. Ñandejára omeʼẽ iñeʼẽ héra rehe ha nopyrũichéne hese: ‘Nde hína [saserdóte haʼe haguéicha] Melquisedec opa árape g̃uarã’” (Sal. 110:1, 4). Pe profesía heʼi hagueichaite, pe Ñemoñare oñeprometevaʼekue, Jesucristo, ogovernáma yvágape. Avei oservíma Saserdóte Guasúramo oipytyvõ rupi umi oñembyasývape hembiapo vaikuégui oñemoĩ porã jey hag̃ua Ñandejára ndive (elee Hebreos 7:21, 25, 26).

15, 16. a) La Biblia oñeʼẽ mokõi Israel rehe, ¿mávapa umíva, ha mavaitévapepa ovendesi Ñandejára koʼág̃a? b) ¿Mbaʼépa omanda Jesús hemimboʼekuérape?

¹⁵ Umi Israelgua orrechasárõ guare Jesucrístope, Jehová omboykéma avei chupekuéra, ha haʼekuéra ndaikatuvéima “oservi rréi ha saserdóteramo”. Jesús heʼi umi hudiokuéra rrelihión omoakãvape: “Ñandejára Rréino ojepeʼáta pendehegui ha oñemeʼẽta umi hénte ojapóvape hembipota” (Mat. 21:43, NM). Ko tetã pyahu oñepyrũ Pentecostés áño 33-pe Jesús ou rire, oñemeʼẽrõ guare espíritu sánto umi 120 kristiánope ijatyvaʼekue Jerusalénpe, ha oñehenói avei “Israel Ñandejára mbaʼéva”. Ko grúpo oñembotuichave omoirũvo chupekuéra heta kristiáno oikóva opárupi (Gál. 6:16, NM).

¹⁶ Pe Israel Ñandejára mbaʼéva akóinte iñeʼẽrendu ha ohechauka meme hembiapo porãha. Pór ehémplo, haʼekuéra katuete okumpli umi mbaʼe ohuravaʼekue, ndojoguaiete umi isrraelítape. Yma Jesús oikórõ guare ko yvy ape ári, heta hénte ojepokuaa ohurapa rei, térã ohura umi mbaʼe naiñimportánteivare (Mat. 23:16-22). Upéicharõ jepe, Jesús heʼi hemimboʼekuérape: “Ni mbaʼevéicharõ ani pehura [...]. Pejéramo pejapotaha peteĩ mbaʼe, pejapovaʼerã, ha pejéramo ndapejapomoʼãiha, anítei pejapo, cháke oimeraẽ mbaʼe pemoĩvéva upévape, oúma pe añágui” (Mat. 5:34, 37, NM).

17. ¿Mbaʼépa ñambohováita pe artíkulo oúvape?

¹⁷ Upéicharõ, ¿ndovaléipa arakaʼeve jahura? Ha iñimportanteveha katu, ¿mbaʼépa heʼise: “Pejéramo pejapotaha peteĩ mbaʼe, pejapovaʼerã”? Koʼã porandu ñambohováita pe artíkulo oúvape. Jajepyʼamongeta memékena Ñandejára Ñeʼẽre, upéva ñanepytyvõta akóinte ñaneñeʼẽrendu hag̃ua Jehovápe. Upéicha haʼe ñanevendesíta opa árare ohura haguéicha ojapotaha.