Job omombaʼeguasu Jehovápe

“Toñemombaʼeguasu Ñandejára réra.” (JOB 1:21.)

 1. Mávapa ohai pe lívro de Job ha arakaʼépa?

MOISÉS orekópe cuarenta áño rupi okañyvaʼekue pe faraóngui ha oho oiko Madiánpe (Hech. 7:23). Oiméne upépe oikópe oikuaarakaʼe mbaʼeichaitépa Job ohasa asy. Job ningo ag̃uínte oiko upégui, pe lugár hérava Úzpe. Ha are oiko rire pe desiértore, umi Israelgua ohasa Job oikoha ypy rupi. Upérupi oiméne Moiséspe oñeñeʼẽ jeýraʼe Job rehe, ha upérõ Job omanombotaitéma. Ha umi hudío ojapoháicha, Job omano riréma Moisés ohai pe lívro de Job.

 2. Mbaʼérepa pe lívro de Job omombarete Ñandejára rembiguaikuérape?

² Pe lívro de Job ningo omombarete Ñandejára rembiguaikuérape koʼág̃a rupi. Mbaʼérepa jaʼe upéicha? Omombeʼu rupi umi mbaʼe oikovaʼekue yvágape ojetakýrõ guare Jehová sãmbyhýre. Ñanepytyvõ ñantende porã hag̃ua mbaʼépa heʼise jajerovia Jehováre ñande pyʼaite guive. Ha mbaʼérepa sapyʼánte Haʼe oheja ohasa asy hembiguaikuéra. Ohechauka avei Satanás ndaijaʼeieteha voi Jehováre ha yvyporakuérare. Ñanemboʼe avei ñaneimperfékto ha jahasa asyvéramo jepe, ikatuha Job ojapo haguéicha ñaneñeʼẽrendu ha akóinte jajerovia Jehováre. Upévare, jahechamína mbaʼe mbaʼépa omombeʼu ñandéve ko lívro de Job.

Satanás ojopy vai Jóbpe

 3. a) Mbaʼeichaguápa rakaʼe Job? b) Mbaʼérepa Satanás otaky Job rehe?

³ Job ningo peteĩ karai ipláta hetáva ha ojekuaáva opárupi. Haʼéngo hekopotĩ, oñemoñeʼẽ hekopete ha oipytyvõ umi oikotevẽvape. Ha iporãveha katu haʼe okyhyje Ñandejáragui. La Biblia omombeʼu Job ‘hekoporã, hekopotĩ’ ha ‘okyhyjeha Ñandejáragui, upévare ojei opaichagua mbaʼe vai apógui’. Job ningo ohayhu Ñandejárape ipyʼaite guive. Upévare Satanás otaky hese, ndahaʼéi ipláta heta térã ojekuaágui chupe opárupi (Job 1:1; 29:​7-16; 31:1).

 4. Mbaʼeichaguápa peteĩ iñeʼẽrendúva?

⁴ Pe lívro de Job oñepyrũvo omombeʼu umi ánhel oñembyaty hague Jehová renondépe ha upépe Satanás otaky Job rehe (jaleemína Job 1:​6-11). Satanás ohechaukase Job iñeʼẽrenduha oñemeʼẽgui chupe heta mbaʼe ha ndahaʼéi ohayhúgui Ñandejárape. Péro, peteĩ iñeʼẽrendúva ningo hekopotĩ, imarangatu ha ikatu jajerovia hese. La Bíbliape heʼi jepi upeichagua ohayhuha Jehovápe ipyʼaite guive.

 5. Mbaʼépa Satanás heʼi Job rehe?

⁵ Satanás heʼi Job ndohayhuiha Ñandejárape ha oserviha chupe ohupytýtagui heta mbaʼe ijupe g̃uarãnte. Heʼi voi hese iñeʼẽrendutaha Jehovápe ovendesi ha oñangareko ajánte hese. Ha Jehová ombohovái hag̃ua Satanáspe, oheja ombohasa asy Jóbpe. Upévare un diaitépe voi, hymbakuéra oñemonda chugui ha umi hembýva katu omanomba, hembiguaikuérape ojejuka ha ifamiliakuéra omanombaite (Job 1:​13-19). Péro Job ndojapói Satanás heʼi haguéicha. Og̃uahẽrõ guare chupe koʼã notísia vai, heʼi: “Ñandejára omeʼẽmba chéve, ha Ñandejára oipeʼapa jey chehegui. Toñemombaʼeguasu Ñandejára réra!” (Job 1:21).

 6. a) Mbaʼépa oiko umi ánhel oñembyaty jeýrõ guare Jehová renondépe? b) Mbaʼérepa ndahaʼéi Job rehe añónte otakyvaʼekue Satanás?

⁶ Upe riremínte umi ánhel oñembyaty jey Jehová renondépe. Ha Satanás otaky jeýma Job rehe: “Yvypóra oĩ omeʼẽ hag̃uáicha oimeraẽ mbaʼe oikove hag̃ua rehehápe. Repokóramo hese katu, rehecháne mbaʼéichapa ojahéi nderehe”. Péicha jahecha Satanás oñeʼẽ vaimaha opavave Ñandejára rembiguáire, ndahaʼéi Job rehe añónte. Upévare Ñandejára oheja jey Satanáspe ombohasa asy Jóbpe. Ha koʼág̃a katu Satanás ojapete hese peteĩ mbaʼasy vai (Job 2:​1-8). Péro ndopái upépe, osegínte ombohasa asy chupe.

Mbaʼépa ñanemboʼe Job rembiasakue

 7. Mbaʼépa heʼi Jóbpe hembireko ha umi iñamígo guaʼu?

⁷ Ñepyrũrã ningo Job rembireko ohasa asy avei iménaicha. Oiméne ijetuʼuetéraʼe chupe opytárõ guare hikuái mbaʼeveʼỹre ha imembykuéra omanombárõ guare. Ha ombyasyeténe avei ohechávo iména hasy vaiha. Upéi osapukái Jóbpe: ‘Neñeʼẽrendútante piko reikóvo? Ejahéina Ñandejárare ha emano!’. Upéi mbohapy iñamígo guaʼu Elifaz, Bildad ha Zofar oho ndajeko oñandu hag̃ua Jóbpe. Péro haʼekuéra heʼi heta mbaʼe hendapeʼỹ, ha ‘omyangekoive’ guei Jóbpe. Pór ehémplo, Bildad heʼi Job familiakuéra oiméne hague hembiapo vai ha upévare ojekastigaha chupekuéra. Elifaz katu heʼi Jóbpe oiméne hag̃ua ohasa asy hembiapo vaikuére. Ha heʼi voi Ñandejára nomombaʼeiha isiervokuéra iñeʼẽrendúvape! (Job 2:​9, 11; 4:8; 8:4; 16:2; 22:​2, 3.) Job katu iñeʼẽrendu ha ndohejái Ñandejárape. Péro ojavy avei heʼírõ guare ijehe “hekopotĩha”, heʼirangue Ñandejára rehe upéva (Job 32:2). Upéicharõ jepe Job akóinte ojeroviavaʼekue Ñandejárare.

 8. Mbaʼéichapa Elihú omoĩ ehémplo iporãva umi oñemoñeʼẽvape koʼág̃a rupi?

⁸ Koʼág̃a jahechami mbaʼépa heʼivaʼekue Elihú. Haʼe ningo oho avei oñandu hag̃ua Jóbpe. Ñepyrũrã haʼe ohendúnte heʼíva Job ha umi mbohapy iñamígo. Péro, Elihú imitãvéramo jepe ijapytepekuéra, ohechauka imbaʼerechakuaaveha chuguikuéra. Haʼe ningo imbaʼeporã Job ndive, ohenói voi chupe héra rupi oñeʼẽ jave hendive. Ha oguerohory Jóbpe hekoporã haguére, péro heʼi avei chupe ojepyʼapyetereimaha ohechauka hag̃ua ndojapói hague mbaʼeve ivaíva. Upéi heʼi iporãha ñaneñeʼẽrendu ha jaservi Ñandejárape (jaleemína Job 36:​1, 11). Péicha omoĩ ehémplo iporãva umi oñemoñeʼẽvape koʼág̃a rupi. Jahechakuaa Elihú ojapysaka porã hague Job rehe ha ipasiénsia hese. Haʼe oguerohory Jóbpe ha oñemoñeʼẽ jepi chupe hekopete (Job 32:2; 33:32).

 9. Mbaʼéichapa Jehová oipytyvõ Jóbpe?

⁹ Upe rire Job rehe oiko peteĩ mbaʼe oimoʼãʼỹva: “Ñandejára oñeʼẽ Jóbpe yvytu atã paʼũme”. Jehová ningo oipytyvõ hag̃ua Jóbpe oporandu chupe heta mbaʼe ikatu hag̃uáicha okambia. Job noñemombaʼeguasúi ha heʼi voi: “Chemichĩeterei ningo”, ndahaʼeiete voi mbaʼeve. “Añembyasy añeʼẽ vai haguére ha atĩ apytávo, aguapy yvykuʼi ha tanimbúpe.” Ñandejára katu heʼi umi Job amígo guaʼúpe ipochyetereiha hendivekuéra. Upe rire heʼi Jóbpe oñemboʼe hag̃ua hesekuéra. Ha ‘Job oñemboʼe rire, Ñandejára omeʼẽ jey chupe hekoporã yma guare, ha omeʼẽ joʼa chupe opa mbaʼe oguerekovaʼekue’ (Job 38:1; 40:4; 42:​6, ÑÑB; 42:​8-10).

Jahayhúpa Jehovápe ñande pyʼaite guive?

10. Mbaʼérepa Jehová ndojukái Satanáspe térã nopenáinte hese?

¹⁰ Jehová ningo pe mburuvicha guasu ha ñande Apohare. Haʼe ikatu oheja reínte kuri Satanás heʼíva, péro ndojapói upéicha. Mbaʼérepa? Oikuaágui oĩha peteĩ provléma ha ndaikatumoʼãiha oñesolusiona ojukáramo chupe. Satanás heʼi voi Job ohejataha Jehovápe ojepeʼapáramo chugui opa mbaʼe orekóva. Péro Job ndojapói upéicha, haʼe ogueropuʼaka opa mbaʼe. Upéi Satanás heʼi entéro yvypórape oñembohasa asýramo ohejataha Ñandejárape. Heta ningo Job ohasa asy, upéicharõ jepe ojerovia Ñandejárare ipyʼaite guive. Upéicha ohechauka japuha umi mbaʼe ojeʼevaʼekue hese. Ha mbaʼépa ojapovaʼerã ambue oservíva Ñandejárape?

11. Mbaʼéichapa Jesús ohechauka porãma vaʼekue Satanás ijapuha?

¹¹ Peteĩ oservíva Ñandejárape iñeʼẽrendúramo ohasa asy jave, ohechauka Satanás ijapuha. Ha Jesús oúrõ guare ko yvy ape ári ohechauka porãma vaʼekue Satanás ijapuha. Haʼe ningo peteĩ kuimbaʼe perfékto vaʼekue, Adán perfékto haguéicha. Ha iñeʼẽrendu rupi omanoite peve ohechauka Satanás ijapu ha oñeʼẽmbareiha (Rev. 12:10).

12. Mbaʼépa káda uno ikatu jahechauka?

¹² Upéicharõ jepe, Satanás osegínte ojopy Ñandejára siervokuérape. Upévare káda uno ikatu jahechauka ñaneñeʼẽrenduha Jehovápe jahayhu rupi chupe, ndahaʼéi ñapenságui ñandejehénte. Upéva ningo tuichaiterei mbaʼe ñandéve g̃uarã. Ñandepyʼaguapy avei jaikuaávo Jehová ñanemombaretetaha jagueropuʼaka hag̃ua opa mbaʼe. Job rehe oñangareko haguéicha, ndohejamoʼãi jahasa umi mbaʼe ndajagueropuʼakamoʼãiva (1 Cor. 10:13).

Satanás oñemoĩ mbarete Ñandejárare

13. Mbaʼépa heʼi avei pe lívro de Job?

¹³ La Bíbliape Génesis guive Malaquías peve omombeʼu mbaʼéichapa Satanás opuʼãvaʼekue Ñandejárare ha mbaʼéichapa oñehaʼã ogueraha vai yvyporakuérape. Ha Mateo guive Revelación peve omombeʼu avei upe oikovaʼekue Satanás otakýrõ guare Jehováre. Pór ehémplo, Revelaciónpe heʼi Jehová ohechaukataha haʼe oisãmbyhyvaʼerãha opa mbaʼe ha Satanás oñehundietetaha. Pe lívro de Job heʼi avei Satanás oho hague mokõi aty ojejapovaʼekuépe yvágape. Péro haʼe oho otaky hag̃ua Jehováre, ndahaʼéi omombaʼeguasu hag̃ua chupe. Satanás oñeʼẽ vai Job rehe ha ojeʼe rire chupe ikatuha ombohasa asy Jóbpe, “osẽ Ñandejára renondégui” (Job 1:12; 2:7).

14. Mbaʼépa ojapo Satanás Job rehe?

¹⁴ Pe lívro de Job ohechauka Satanás ndaijaʼeietereiha yvyporakuérare. Job 1:​6-pe oñeñeʼẽ peteĩ atýre, ha tiémpo rire oiméne oikorakaʼe pe ótro aty Job 2:​1-pe oñeñeʼẽha. Upe tiémpope Job ohasa opaichagua mbaʼe vai. Péro iñeʼẽrendu meme rupi, Jehová heʼi Satanáspe: ‘Job iñeʼẽrendu, ahejáramo jepe nde pópe rembohasa asy rei hag̃ua chupe’ (Job 2:​3, ÑÑB). Satanás ndeʼiséigui ojavy hague, ojerure Jehovápe ombohasa asyve hag̃ua Jóbpe. Haʼe ningo ojopy vai Jóbpe ipláta hetárõ guare, ha opytárõ guare avei mbaʼeveʼỹre jepe. Péicha Satanás ohechauka ndaijaʼeieteha voi umi iñeʼẽrendúvare, ha ndoiporiahuverekoiha umi oikotevẽ ha ohasa asývape (Job 2:3). Upéicharõ jepe, Job ojerovia Jehováre ipyʼaite guive ha ohechauka Satanás ijapuha.

15. Mbaʼérepa ojogua Satanáspe umi koʼág̃a rupi opuʼãva Jehováre?

¹⁵ Satanás raẽvete opuʼãvaʼekue Jehováre. Ha umi koʼág̃a rupi opuʼãva hese ojoguaiterei Satanáspe. Haʼekuéra ningo ponsóña memete, otaky ermanokuérare, umi ansiánore ha pe Cuerpo Gobernante rehe. Oĩ umi ndoiporuséiva Ñandejára réra, ha ndoikuaaséiva Jehovágui mbaʼeve ni ndoserviséiva chupe. Haʼekuéra ningo ojogua itúva Satanáspe, otaky ha ombohasa asy Ñandejára siervokuérape (Juan 8:44). Upévare ñande ndajajeheʼaiete voi hesekuéra (2 Juan 10, 11).

Job omombaʼeguasu Jehovápe

16. Mbaʼéichapa Job omombaʼeguasu Jehovápe?

¹⁶ Job oiporu Ñandejára réra ha omombaʼeguasu chupe. Oñemombeʼúrõ guare Jóbpe ifamiliakuéra omanombaha, haʼe ndeʼíri mbaʼeve ivaíva Jehováre. Ha oimoʼãramo jepe Ñandejára oipeʼapa hague chugui oguerekóva, haʼe osegi omombaʼeguasu chupe. Job heʼi voi: ‘Upe okyhyjéva Ñandejáragui iñarandu ha upe ojeíva mbaʼe vaígui, iñakã porã’ (Job 28:​28, ÑÑB).

17. Mbaʼépa oipytyvõ Jóbpe iñeʼẽrendu meme hag̃ua Jehovápe?

¹⁷ Mbaʼépa oipytyvõ Jóbpe iñeʼẽrendu meme hag̃ua Jehovápe? Haʼe ningo Jehová iñamigoite ymaite guive. Job odesidíma iñeʼẽrendutaha, ndoikuaáiramo jepe Satanás ojapovaʼekue. Haʼe heʼi voi: ‘Amano meve cheñeʼẽrendúta’ (Job 27:​5, ÑÑB). Ha mbaʼéicha rupípa haʼe Jehová amigoite rakaʼe? Oiméne oikuaa mbaʼéichapa Jehová amigoitevaʼekue Abrahán, Isaac, Jacob ha umi ihentekuéra yma guare. Avei omañávo Jehová rembiapokuére, ohechakuaáneraʼe mbaʼeichaguápa Haʼe (jaleemína Job 12:​7-9, 13, 16).

18. a) Mbaʼépa ojapo Job ohechauka hag̃ua ohayhuha Jehovápe? b) Mbaʼéichapa ikatu jasegi Job ehémplo?

¹⁸ Job ningo oikuaa porãgui Jehovápe ojapose hembipota. Ha ohayhúgui Chupe, pyʼỹinte ojapóva sakrifísio oimérõ g̃uarã ifamiliakuéra ojapóraʼe ivaíva térã ‘ojahéi Ñandejárare ipyʼapýpe’ (Job 1:5). Ohasa asyvéramo jepe, Job katuete imanduʼa porãva Ñandejárare (Job 10:12). Haʼéngo peteĩ ehémplo ñandéve g̃uarã! Ñande avei jaikuaavevaʼerã Jehovápe ha mbaʼépa ojapóta. Tekotevẽ ningo ñañemotiémpo jastudia hag̃ua la Biblia, jaha hag̃ua rreunionhápe, ñañemboʼe ha japredika hag̃ua. Ñañehaʼãmbaitevaʼerã avei jaikuaauka ñande rapichakuérape Ñandejára réra. Job ningo iñeʼẽrendu rupi ombovyʼavaʼekue Jehovápe. Ha ñande avei ikatu ñambovyʼa Jehovápe ñaneñeʼẽrendu ha jajeroviáramo hese ñande pyʼaite guive (Pro. 27:11). Upévare ñañeʼẽta pe artíkulo oúvape.

Nemanduʼápa koʼã mbaʼére?

• Mbaʼérepa Satanás otaky Job rehe?

• Mbaʼe mbaʼépa ohasa Job, ha mbaʼépa ojapo?

• Mbaʼépa ñanepytyvõta jasegi hag̃ua Job ehémplo ha ñaneñeʼẽrendu hag̃ua Jehovápe?

[Nóta oĩva taʼanga ndive páhina 4]

Job rembiasakue ñanemomanduʼa Satanás opuʼã hague Jehová sãmbyhýre

[Nóta oĩva taʼanga ndive páhina 6]

Mbaʼéicha javépa ikatu ijetuʼu ñandéve ñaneñeʼẽrendu hag̃ua?