Jajerovia mbaretéramo Jehováre ndajakyhyjemoʼãi

‘Jehová cherendúta katuete ambaʼejerure asýramo chupe.’ (SAL. 4:3, ÑÑB)

1, 2. a) Mbaʼe situasión ijetuʼúvapa ohasavaʼekue David? b) Mbaʼépa ñahesaʼỹijóta koʼág̃a?

ÑAPENSAMÍNA mbaʼe ijetuʼúvapa ombohovaivaʼekue David heta áño oisãmbyhy rire tetã Israel. Itaʼýra Absalón opuʼã hese ha mbaretépe ojupi hekovia rréiramo, upévare David ohómante Jerusaléngui. Hiʼarive peteĩ ikonsehéro ohayhuvéva otraisiona chupe. Pynandi ha hasẽ anga ohóvo David mbovymi iñirũnguérandi pe mónte de los Olivos rupi. Upe rire, ivaive hag̃ua, Simeí oñembohory hese ha ojapi chupe itápe, opoi hese yvytimbo ha omaldesi chupe (2 Sam. 15:30, 31; 16:5-14).

² Ojukánepa Davídpe koʼã mbaʼe vai ohasáva? Nahániri, haʼe ojerovia mbarete Jehováre, ohechaukaháicha Salmo 3. Upépe David omombeʼu mbaʼéichapa oñeñandu osẽrõ guare Jerusaléngui. Pe rréi ohaivaʼekue avei Salmo 4, heʼihápe ojeroviaha Ñandejára ohendu ha ombohovaiha isiervokuéra iñeʼẽrendúva ñemboʼe (Sal. 3:4; 4:3). Koʼã sálmo ohechauka Jehová oĩha hendivekuéra ára ha pyhare, oipytyvõ, ombopyʼaguapy ha oñangareko hag̃ua hesekuéra (Sal. 3:5; 4:8). Upévare iporãta ñahesaʼỹijóramo koʼã mokõi purahéi, omombaretéva ñande jerovia ha ohechaukáva Jehová oñangarekoha ñanderehe.

“Heta oĩ opuʼãva cherehe”

 3. Mbaʼépa ohasáraʼe David heʼiháicha Salmo 3?

³ Peteĩ kuimbaʼe heʼi Davídpe: ‘Israelgua ohopa Absalón rapykuéri’ (2 Sam. 15:13, ÑÑB). Haʼe ni noimoʼãi itaʼýra peichaite ombyatyha iñirũrã, ha heʼi: ‘Che Jára Jehová, heta oĩ ndaijaʼéi ha opuʼãva cherehe. Heta oĩ heʼíva: “Ñandejára noguenohẽmoʼãi chupe jejopy vaígui”’ (Sal. 3:2, 3 [3:1, 2, NM]). Umi Israelgua ndojeroviái Jehová osalvataha Davídpe Absalón ha iñirũnguéragui.

4, 5. a) Mbaʼépa oikuaa porã vaʼekue David? b) Mbaʼépa heʼise pe ñeʼẽ: “Nde upe chemoakãrapuʼãva”?

⁴ Péro David ndokyhyjéi ojeroviágui Ñandejárare ipyʼaite guive. Upévare heʼi: “Nde katu che Jára, che renondépe reñemoĩ ani hag̃ua ojehu chéve mbaʼeve. Nde upe remeʼẽva chéve opa mbaʼe. Nde upe chemoakãrapuʼãva” (Sal. 3:4 [3:3, NM]). David oikuaa Jehová oñangarekotaha hese, peteĩ eskúdo omoʼãháicha peteĩ soldádope. Pe rréi itĩndy ha oñakãhoʼi ohóvo ohechauka hag̃ua oñemotĩ hague, péro oikuaa Jehová okambiataha upéva ha omoakãrapuʼã jeytaha chupe. Haʼe oñemboʼe Jehovápe ojeroviágui ohendutaha chupe. Ha ñande, jahechaukápa avei jajeroviaha Jehováre upéicha?

⁵ David heʼívo: “Nde upe chemoakãrapuʼãva”, ohechakuaa Jehová añoite ikatuha oipytyvõ chupe. Peteĩ diccionario bíblico heʼi ‘Ñandejára ñanemoakãrapuʼãha omeʼẽvo ñandéve esperánsa ha omombaretévo ñande jerovia’. Oiméne oñeñandu vaietéraʼe David opuʼãrõ guare hese itaʼýra ha mbaretépe ojupi hekovia rréiramo. Péro Jehová ‘omoakãrapuʼãvo’ chupe ipyʼaguasu jey, imbareteve ijerovia ha ndokyhyjevéima.

“Haʼe cherendúta”

 6. Mbaʼérepa David heʼi Jehová ombohovaitaha iñemboʼe imontáña marangatu guive?

⁶ David ndokyhyjéi ojerovia rupi Jehováre, upévare ohai ko salmo: ‘Ñandejárape ajerure asýta chepytyvõ hag̃ua. Haʼe cherendúta ha oñeʼẽta chéve imontáña marangatu guive’ (Sal. 3:5 [3:4, NM]). Pe árka dél pákto orrepresentáva Ñandejárape oĩ pe mónte Siónpe, heʼi haguéicha David (elee 2 Samuel 15:23-25). Upévare haʼe heʼi Jehová ombohovaitaha iñemboʼe imontáña marangatu guive.

 7. Mbaʼérepa ndokyhyjeivaʼekue David?

⁷ David oikuaa noñemboʼereiriha, upévare ndokyhyjéi ohechaukaháicha pe purahéi ohaivaʼekue: “Che añenóramo, ake porã ha apáy pyʼaguapýpe, [Jehová] oñangareko porãgui cherehe” (Sal. 3:5, ÑÑB). Pyharekue ningo ipeligrosove ojejúrõ g̃uarã chupe, péro haʼe ndokyhyjéi oke hag̃ua. Haʼe oikuaa ikoʼẽ jeytaha ha ojerovia Itúva yvagapegua oñangarekotaha hese jepiveguáicha. Ñande avei ikatu jajerovia upéicha Jehováre jasegíramo jaguata ‘hapére’, ha akóinte jajepytaso ijykére (elee 2 Samuel 22:21, 22).

 8. Mbaʼéichapa David ohechauka ojeroviaha Ñandejárare heʼiháicha Salmo 27:1-4?

⁸ Ambue sálmope David ohechauka ndokyhyjeiha ha ojeroviaha Ñandejárare ipyʼaite guive, heʼívo: ‘Jehová upe che rekove ohesapéva ha upe chepytyvõva. Mávagui piko akyhyjéta? Jehová oñangareko cherehe, máva piko chemongyhyjéta? [...] Oñembohetáramo jepe ñorairõharakuéra ha chemongora, ndakyhyjéi chuguikuéra. Peteĩ mbaʼénte ajerure Jehovápe ha upéva ahekáta: aikose hógape aikove aja pukukue, hese ajepyʼamongeta hag̃ua ha amombaʼeguasu hag̃ua chupe’ (Sal. 27:1-4). Ha ñande avei jahechaukáta ñapensaha upéicha, ñañehaʼãmbaitéramo ñaime káda rreuniónpe (Heb. 10:23-25).

9, 10. Mbaʼérepa ikatu jaʼe David noñevengaséi hague avavére?

⁹ Otraisionáramo jepe chupe itaʼýra ha opuʼã hese heta oĩva ipoguýpe, David heʼi: ‘Hetáramo jepe chemongoráva, ndakyhyjéi. Epuʼã Jehová che Jára! Chepeʼa jejopy vaígui! Umi cherayhuʼỹvape rehovapetéta, umi iñañáva rãi reitypáta’ (Sal. 3:7, 8 [3:6, 7, NM]).

¹⁰ David ningo noñevengaséi avavére. Upévare heʼi Ñandejára ‘ohovapetetaha umi ohayhuʼỹvape’ chupe, ndahaʼéi haʼe ojapótava upéva. Rréi David okopia Jehová Léi imbaʼerã, upévare oikuaa Haʼe heʼi hague: ‘Che ahepymeʼẽ ha amyengoviáta’ (Deu. 17:14, 15, 18; 32:35). Oikuaa avei pe Ipuʼakapáva ‘oitypataha umi iñañáva rãi’, upéva heʼise ndohejamoʼãveimaha chupekuéra ojapo mbaʼe vai. Ñandejára ‘omaʼẽ yvypóra pyʼapýre’ ha oikuaa porã mávapa hína umi iñañáva (1 Sam. 16:7). Ajéiko jaagradesete Chupe péicha omombarete haguére ñande jerovia ha ñanepytyvõ ñambohovái hag̃ua pe aña ruvichápe! Koʼẽrõitéma Jehová opoíta yvykua pypukúpe upe ndaijaʼeietévape hese. Upérõ ko añágui oikótama peteĩ león pochy nahãivéimava, ohaʼarõvahína pe ára oñehundi hag̃ua (1 Ped. 5:8, 9; Rev. 20:1, 2, 7-10).

‘Jehová, nde orepeʼa jejopy vaígui’

11. Mbaʼérepa ñañemboʼevaʼerã ñane ermanokuéra rehehápe?

¹¹ David ohechakuaa Jehová añoite ikatuha omosãso chupe. Péro nopensái ijehénte, haʼe ojepyʼapy entéro Ñandejára rembiguaikuérare, upévare omohuʼãnguévo ipurahéi heʼi: ‘Jehová, nde orepeʼa jejopy vaígui. Rehovasa ne retã!’ (Sal. 3:9 [3:8, NM]). Añetehápe David heta iprovléma, péro oñemboʼe Jehovápe hetã rehehápe ha ojerovia ovendesitaha chupekuéra. Ñande avei akóinte ñañemboʼevaʼerã ñane ermanokuéra rehehápe ha jajerure Jehovápe tomeʼẽ chupekuéra ijespíritu sánto, pyʼaguasúpe omombeʼu hag̃ua pe marandu porã (Efe. 6:17-20).

12, 13. Mbaʼépa oiko Absalón rehe, ha mbaʼéichapa oñeñandúraʼe David?

¹² Ñanemanduʼami jeýna Absalón rehe, haʼe opuʼãvaʼekue Jehová rembiguáire ha osẽ vai. Upéva ohechauka mbaʼépa ikatu oiko umi otrata vaívare hapichápe, koʼýte umi otakýva Ñandejára rembiguaikuérare, haʼe voi oiporavovaʼekue (elee Proverbios 3:31-35). Upéicha rupi umi opuʼãvaʼekue David rehe operde ñorãirõhápe, ha upémarõ Absalón osẽ oho peteĩ vúrro ári. Péro ohasakuévo peteĩ yvyramáta guasu guýrupi, ojeliapa iñakãrague hakãre ha opyta osaingo upépe. Nomanóiramo jepe ndaikatuvéima ojapo mbaʼeve. Upéi ou Joab ha oikutu ikorasõitére mbohapy flécha (2 Sam. 18:6-17).

¹³ Ovyʼáparaʼe David itaʼýra omano haguére? Nahániri. Haʼe ningo ou ha oho, ojaheʼo ha osapukái: ‘Che raʼy Absalón, che raʼy, che raʼy Absalón. Chéngaʼu amanóraʼe nerendaguépe, Absalón che raʼy, che raʼy!’ (2 Sam. 18:24-33, ÑÑB). Joab heʼíva añoite ombopyʼaguapy Davídpe. Ajéiko ijetuʼuete ko situasión! Péro Absalón voi oheka upéva, itaryrýigui opuʼã itúvare, pe rréi Jehová oiporavovaʼekue (2 Sam. 19:1-8; Pro. 12:21; 24:21, 22).

David ohechauka jey ojeroviaha Ñandejárare

14. Mbaʼérepa oiméne David ojapóraʼe pe Salmo 4?

¹⁴ Salmo 4-pe avei David oñemboʼe ipyʼaite guive ha ohechauka ojerovia mbareteha Jehováre (Sal. 3:4; 4:3). Oiméne ojapóraʼe Absalón opuʼã riréma hese, oagradese hag̃ua Ñandejárape ombopyʼaguapy ha oñangareko haguére hese. Térã oiméne ojapóraʼe umi levíta opurahéi hag̃ua. Tahaʼe haʼeháicha ñande jerovia imbareteve jajepyʼamongetávo ko sálmore.

15. Mbaʼérepa ikatu ñañemboʼe Jesucristo rérape?

¹⁵ Upéi David ohechauka jey ojeroviaha Jehová ohendu ha ombohovaitaha iñemboʼe. Haʼe heʼi: ‘Cherendumíkena rohenói jave, che Jára nderekojojáva. Che ahasa asy jave Nde reñangareko porã cherehe, Nde chembopyʼaguapy akyhyje jave. Cheporiahuverekomína ha ehendu che ñemboʼe’ (Sal. 4:1, ÑÑB). Ñanderekojojáramo Jehová oipotaháicha, jajeroviáta avei David ojerovia haguéicha. ‘Ñandejára ningo hekojoja’ ha ohovasa umi yvypóra hekojojávape. Ha jajerovia rupi Jesucristo sakrifísiore ikatu ñañemboʼe hérape ñande Ru yvagapeguápe ha haʼe katuete ñanerendúta (Juan 3:16, 36). Ajépa tuichaite ñanembopyʼaguapy ko mbaʼe!

16. Mbaʼépa oiméne omokangyrakaʼe Davídpe?

¹⁶ Sapyʼánte jahasa umi situasión ijetuʼúva ha ndajajeroviavéi ñandejehe. David avei oiméne oñeñandurakaʼe upéicha, upévare heʼi: ‘Peẽ karai guasu raʼykuéra, arakaʼe peve piko chekutúta peneñeʼẽ vai rupi ha pehayhúta mbaʼe guaʼu rei pehekávo umi ñeʼẽ japu reheguáva?’ (Sal. 4:2, ÑÑB). Heʼívo ‘peẽ karai guasu raʼykuéra’ oñeʼẽhína yvypórare. Koʼápe pe salmísta oñeʼẽ vai umi iñenemígore ha heʼi voi hesekuéra ‘ohayhuha mbaʼe guaʼu rei, ohekávo umi ñeʼẽ japu reheguáva’. Pe Biblia ojapovaʼekue Sociedad Bíblica Paraguaya heʼi ko versíkulope: “Arakaʼe peve piko pehekáta mbaʼe rei rei, ñeʼẽ japu reheve pende jurúpe?”. Péicha David rembiasakue ñanemboʼe ñanemokangýramo jepe ñande rapichakuéra ojapóva, akóinte ñañemboʼevaʼerãha Ñandejárape ñande pyʼaite guive ha jajerovia mbarete hese.

17. Mbaʼéichapa ikatu ñanepytyvõ Salmo 4:3 heʼíva?

¹⁷ David ohechauka jey mbaʼeichaitépa ojerovia Ñandejárare: ‘Peikuaákena Jehová omboguata porãha umi hese ojeroviávape. Jehová cherendúta katuete ambaʼejerure asýramo chupe’ (Sal. 4:3, ÑÑB). Jaikuaa akóinte ñaneñeʼẽrendu hag̃ua Ñandejárape tekotevẽha ñandepyʼaguasu ha jajerovia mbarete hese. Koʼã mokõi mbaʼe ñanepytyvõta heta hendáicha, pór ehémplo oĩ jave ñande rogaygua oñemosẽva kongregasióngui ndojevýi rupi hembiapo vaikuégui. Péro ñaneñeʼẽrendúramo Jehovápe ha ñamombaʼe heʼíva, haʼe katuete ñanderovasáta. Avei ñañemoĩvo ipoguýpe ha jajeroviávo hese ñande pyʼaite guive, jaikóta vyʼápe oñondivepa Iñorganisasiónpe (Sal. 84:11, 12).

18. Mbaʼépa jajapovaʼerã oĩramo iñeʼẽ arhélva ñandéve térã ojapóva ñanderehe mbaʼe vai?

¹⁸ Péro, mbaʼépa jajapóta oĩramo iñeʼẽ arhélva ñandéve térã ojapóva ñanderehe mbaʼe vai? Jajapovaʼerã David heʼivaʼekue: “Peẽ pendepochýramo, ani peñemohembiapo vai, pejepyʼamongeta peime jave pende rupápe ha pekirirĩ” (Sal. 4:4, ÑÑB). Oĩramo iñeʼẽ pohýi térã ñandetrata vaíva aníkena jajapo ñande avei hese upéicha (Rom. 12:17-19). Iporãvéta jaháramo ñañeno ha jaʼe jaʼeséva ñandepyʼapýpe. Ñañemboʼévo Jehovápe upe mbaʼére jahecháta haʼe ohechaháicha pe situasión ha ñaperdonáta ñande rapichápe jahayhúgui chupe (1 Ped. 4:8). Ñanemanduʼavaʼerã avei apóstol Pablo oñeʼẽ hague ko mbaʼére, ha amalisia upérõ oiporu Salmo 4:4. Haʼe heʼi: “Pendepochýramo, ani peʼa tembiapo vaípe. Ani peheja kuarahy oike jepe pendepochy poi hag̃ua. Ani pemeʼẽ juruja añáme” (Efe. 4:26, 27).

19. Mbaʼérepa jajapovaʼerã Salmo 4 heʼíva jaservívo Ñandejárape?

¹⁹ David heʼi jey vaʼekue tekotevẽha jahechauka jajeroviaha Ñandejárare: “Penembaʼekuaveʼẽ pemeʼẽ pende pyʼaite guive, ha pejerovia [Jehová] rehe” (Sal. 4:6 [4:5, NM]). Yma umi isrraelíta ombaʼekuaveʼẽvaʼerã Jehovápe ipyʼaite guive, upéicharõ añoite Haʼe oguerohory chupekuéra (Isa. 1:11-17). Ha ñande jaipotáramo Ñandejára oguerohory ñande servísio, jajapovaʼerã avei ñande pyʼaite guive ha jajerovia mbarete hese (elee Proverbios 3:5, 6 ha Hebreos 13:15, 16).

20. Mbaʼépa heʼise: “Ehesapéna ore ári nde rova ojajaipáva”?

²⁰ David ohai: ‘Heta oĩ heʼíva: “Máva piko ohechaukáta oréve mbaʼe iporãva?”. Nde Jehová ore Jára, ehesapéna ore ári nde rova ojajaipáva’ (Sal. 4:6, ÑÑB). Ko téystope heʼívo: “Ehesapéna ore ári nde rova ojajaipáva”, David ojerure Ñandejárape oguerohorymi hag̃ua chupekuéra (Sal. 89:15). Ha ñande jajeroviágui Jehováre, haʼe ñanderovasa ha javyʼa jajapóvo hembipota.

21. Mbaʼépa jahupytýta ñambaʼapo kyreʼỹramo Jehová servísiope?

²¹ David oikuaa Jehová omeʼẽtaha chupe heta mbaʼe porã ha ovyʼavetaha umi chokokuégui kosécha tiémpope. Upévare opurahéi Jehovápe: ‘Nde chembopyʼaroryve chuguikuéra. Chembovyʼave oñembyatyha áragui kogaʼa ha parrál rykue’ (Sal. 4:7, ÑÑB). Ñande avei javyʼáta upéicha ñambaʼapo kyreʼỹramo Jehová servísiope (Luc. 10:2). Koʼág̃a javyʼaiterei jahechávo heta hetaveha ohóvo umi oipytyvõva unhidokuérape (Isa. 9:3). Upévare káda uno iporã ñañeporandumi: “Avyʼa piko ambaʼapóvo Jehová servísiope?”.

Jajeroviákena Ñandejárare ha ani jakyhyje

22. Mbaʼéichapa oikovaʼekue umi isrraelíta ojapóva Jehová heʼíva?

²² David omohuʼãvo ipurahéi heʼi: ‘Pyʼaguapýpe añeno ake, nde Jehová chembopyʼapytuʼúgui’ (Sal. 4:9 [4:8, NM]). Umi isrraelíta ojapo aja Jehová heʼíva oiko pyʼaguapýpe ha kyhyjeʼỹme. Pór ehémplo, Salomón oisãmbyhy aja ‘Judá ha Israel oiko pyʼaguapýpe’ (1 Rey. 4:25, ÑÑB). Ha oĩramo jepe sapyʼánte heta tetã ombohasa asýva chupekuéra, umi ojeroviáva Ñandejárare ipyʼaguapy. Koʼág̃a ñande avei ikatu jake porã David ojapo haguéicha, jaikuaágui Jehová ‘ñanembopyʼapytuʼuha’.

23. Mbaʼéichapa ñañeñandúta jajerovia mbaretéramo Jehováre?

²³ Jaservíramo Ñandejárape kyhyjeʼỹme ha ñañemoag̃ui hese, Haʼe omeʼẽta ñandéve ‘pyʼaguapy tuichavéva opa ikatuvaʼerãgui ñahaʼãrõ’ (Fili. 4:6, 7). Ajépa javyʼaite jaikuaávo ko mbaʼe! Upévare aníkena ñanderesarái jajerovia mbarete vaʼerãha Jehováre ñambohovái hag̃ua kyhyjeʼỹme ñane renonderã.

Mbaʼépa rembohováita?

• Mbaʼépa ohasavaʼekue David opuʼãrõ guare hese Absalón?

• Mbaʼéichapa Salmo 3 ñanemombarete ha ñanembopyʼaguapy?

• Mbaʼéichapa Salmo 4 omombarete ñande jerovia?

• Mbaʼépa jahupytýta jahechaukáramo jajeroviaha Jehováre?

[Nóta oĩva taʼanga ndive páhina 29]

David ojerovia mbarete Jehováre, Absalón opuʼãrõ guare hese

[Nóta oĩva taʼanga ndive páhina 32]

Ndépa rejerovia mbarete Jehováre?