Jesús oike Jerusalénpe peteĩ vúrro raʼy ári

¿Ohechaukápa umi profesía bíblica Jesús haʼeha pe Mesías?

Mbaʼépa heʼi la Biblia

Si, Jesús oĩrõ guare ko yvy ape ári okumpli heta profesía oñeʼẽva “Mesías, pe Líder” rehe, upe ‘osalváva ko múndope’ (Daniel 9:25; 1 Juan 4:14). Haʼe omano rire jepe osegi okumpli umi profesía oñeʼẽva pe Mesías rehe (Salmo 110:1; Hechos 2:34-36).

**¿Mbaʼépa heʼise pe palávra Mesías?**

Pe palávra hebrea Mesías (Maschíaj) griégope haʼe Cristo (Kjristós) ha heʼise “Unhído” térã “Elehído”. Upéicharõ Jesucristo heʼise “Jesús pe Unhído” térã “Jesús pe Mesías”.

Yma umi tiémpo bíblicope ojeelehi térã oñeunhítaramo álgienpe oreko hag̃ua peteĩ rresponsavilida espesiál oñeñohẽ vaʼekue aséite pe persóna akã ári (Levítico 8:12; 1 Samuel 16:13). Ñandejára oelehi Jesúspe oiko hag̃ua chugui Mesías, peteĩ puésto iñimportantetereíva (Hechos 2:36). Péro Ñandejára oipuru rangue aséite ounhi hag̃ua chupe oipuru espíritu sánto (Mateo 3:16).

¿Ikatúpa hetave persóna okumpli umi profesía oñeʼẽva pe Mesías rehe?

No, entéro umi profesía oñekumplíva ohechauka porã oĩha peteĩ Mesías térã Cristo añónte. Péro la Biblia ñandeavisa peteĩ pelígrogui heʼívo: “Cháke oĩta heta cristo guaʼu ha proféta japu, ha ojapóta hikuái heta milágro tuichaitereíva oñehaʼã hag̃ua ombotavy umi Ñandejára oiporavo vaʼekuépe jepe” (Mateo 24:24).

¿Ikatúpa jaʼe pe Mesías outaha amo gotyove?

No, la Biblia heʼi pe Mesías ou vaʼerãha rréi David familiarégui peteĩ rréi omanda vaʼekue Israélpe (Salmo 89:3, 4). Péro umi rrehístro oĩháme rréi David desendientekuéra oñehundipáma. Amalisia umíva oñehundi umi rrománo ojagarrárõ guare Jerusalén áño 70-pe.a Upe áño guive ndaikatuvéima avave oreko pruéva ohechaukáva haʼeha rréi David familiare. Péro Jesús tiémpope si oĩ vaʼekue umi rrehístro, upévare ni umi iñenemigokuéra ndaikatúi vaʼekue onega Jesús haʼe hague rréi David desendiénte (Mateo 22:41-46).

¿Mboy profesíapa oĩ la Bíbliape oñeʼẽva pe Mesías rehe?

Ndaikatúi jaʼe mboy profesíapa oĩ exáktamente oñeʼẽva pe Mesías rehe. ¿Mbaʼérepa? Pórke sapyʼánte umi profesía oñeʼẽva direktoite pe Mesíasre oñekonta jepi de diferénte fórma. Por ehémplo Isaías 53:2-7-pe oñemombeʼu heta mbaʼe oñekumplíva pe Mesías rehe. Algúno heʼi ko párte kompletoite haʼeha peteĩ profesíante, péro oĩ ótro okontáva káda suséso ojepredesíva kómo diferénte profesía.

Unas kuánta profesía oñeʼẽva pe Mesíasre ha oñekumplíva Jesúsre

Profesía	Moõpa oĩ	Oñekumpli
Ou Abrahán familiarégui	Génesis 22:17, 18	Mateo 1:1
Ou Isaac familiarégui haʼéva Abrahán raʼy	Génesis 17:19	Mateo 1:2
Onase pe trívu israelita de Judápe	Génesis 49:10	Mateo 1:1, 3
Rréi David familiarégui	Isaías 9:7	Mateo 1:1
Onase peteĩ kuña vírhengui	Isaías 7:14	Mateo 1:18, 22, 23
Onase Belénpe	Miqueas 5:2	Mateo 2:1, 5, 6
Oñehenói chupe Emmanuelb	Isaías 7:14	Mateo 1:21-23
Iñumílde ha oiko sensillomi	Isaías 53:2	Lucas 2:7
Onase rire ojejuka heta mitãme	Jeremías 31:15	Mateo 2:16-18
Oñehenói chupe Egíptogui	Oseas 11:1	Mateo 2:13-15
Oñehenói chupe Nazarenoc	Isaías 11:1	Mateo 2:23
Peteĩ mensahéro oho henonderã	Malaquías 3:1	Mateo 11:7-10
Oñeunhi kómo Mesías áño 29-pe	Daniel 9:25	Mateo 3:13-17
Ñandejára heʼi haʼeha Itaʼýra	Salmo 2:7	Hechos 13:33, 34
Ohayhueterei Ñandejára róga	Salmo 69:9	Juan 2:13-17
Opredika umi notísia porã	Isaías 61:1	Lucas 4:16-21
Galiléape ohesape peteĩ lus rendýicha	Isaías 9:1, 2	Mateo 4:13-16
Ojapo milágro Moisés ojapo haguéicha	Deuteronomio 18:15	Hechos 2:22
Oñeʼẽ Ñandejára rérape Moisés ojapo haguéicha	Deuteronomio 18:18, 19	Juan 12:49
Omonguera heta hasývape	Isaías 53:4	Mateo 8:16, 17
Núnka noñembotuichái	Isaías 42:2	Mateo 12:17, 19
Oiporiahuvereko umi osufrívape	Isaías 42:3	Mateo 12:9-20; Marcos 6:34
Omboʼe Ñandejára hustísia	Isaías 42:1, 4	Mateo 12:17-20
Konsehéro Katupyry	Isaías 9:6, 7	Juan 6:68
Omombeʼu Jehová réra	Salmo 22:22	Juan 17:6
Oipuru ehémplo	Salmo 78:2	Mateo 13:34, 35
Haʼe peteĩ Líder	Daniel 9:25	Mateo 23:10
Heta ndojeroviái hese	Isaías 53:1	Juan 12:37, 38
Oĩ oñepysangáva ikáusare	Isaías 8:14, 15	Mateo 21:42-44
Umi hénte omboyke chupe	Salmo 118:22, 23	Hechos 4:10, 11
Reiete ndojechaʼéi hese	Salmo 69:4	Juan 15:24, 25
Ojeguerohory oikévo Jerusalénpe peteĩ vúrro raʼy ári	Zacarías 9:9	Mateo 21:4-9
Umi mitã ombotuicha chupe	Salmo 8:2	Mateo 21:15, 16
Ou Jehová rérape	Salmo 118:26	Juan 12:12, 13
Iñamigoite otraisiona chupe	Salmo 41:9	Juan 13:18
Oñetraisiona chupe 30 monéda de plátared	Zacarías 11:12, 13	Mateo 26:14-16; 27:3-10
Iñamigokuéra oheja rei chupe	Zacarías 13:7	Mateo 26:31, 56
Testígo japu otestifika ikóntrape	Salmo 35:11	Mateo 26:59-61
Okirirĩnte ojeakusárõ guare chupe	Isaías 53:7	Mateo 27:12-14
Oñendyvu hese	Isaías 50:6	Mateo 26:67; 27:27, 30
Oñenupã chupe iñakãrupi	Miqueas 5:1	Marcos 15:19
Oñembyepoti chupe	Isaías 50:6	Juan 19:1
Noñedefendéi oñemaltratárõ guare chupe	Isaías 50:6	Juan 18:22, 23
Umi governantekuéra opersegi chupe	Salmo 2:2	Lucas 23:10-12
Ojeklava chupe peteĩ yvyráre ipy ha ipógui	Salmo 22:16	Mateo 27:35; Juan 20:25
Osortea hikuái ijao	Salmo 22:18	Juan 19:23, 24
Ojetrata chupe peteĩ pekadórcha	Isaías 53:12	Mateo 27:38
Oñembohory ha oñeñeʼẽ vai hese	Salmo 22:7, 8	Mateo 27:39-43
Osufri ñande pekádore	Isaías 53:5, 6	1 Pedro 2:23-25
Haʼete Ñandejára oheja reíva chupe	Salmo 22:1	Marcos 15:34
Oñemeʼẽ chupe vinágre mbaʼe iróvare	Salmo 69:21	Mateo 27:34
Ijuhéi omano mboyvemi	Salmo 22:15	Juan 19:28, 29
Oheja Ñandejára pópe hekove	Salmo 31:5	Lucas 23:46
Omeʼẽ hekove	Isaías 53:12	Marcos 15:37
Ñanderreskata pekádo poguýgui	Isaías 53:12	Mateo 20:28
Noñemopẽi ni peteĩ ikangue	Salmo 34:20	Juan 19:31-33, 36
Ojekutu chupe	Zacarías 12:10	Juan 19:33-35, 37
Oñeñotỹ umi iplátava apytépe	Isaías 53:9	Mateo 27:57-60
Oikove jey	Salmo 16:10	Hechos 2:29-31
Ojeelehi ótrope pe traidór rekovia	Salmo 109:8	Hechos 1:15-20
Oguapy Ñandejára deréchape	Salmo 110:1	Hechos 2:34-36

a Pe Cyclopedia de McClintock y Strong heʼi: “Ojejagarrárõ guare Jerusalén, katuete oñehundíne raʼe umi rrehístro oĩháme umi trívu ha família judía, ha ndahéi upe mboyve”.

b Emmanuel hebréope heʼise “Ñandejára oĩ orendive”, péva ohechauka porã Jesús rresponsavilida kómo Mesías. Haʼe oĩ aja ko yvy ape ári ha umi mbaʼe ojapo rupive ohechauka Ñandejára oĩha isiervokuérandi (Lucas 2:27-32; 7:12-16).

c Pe palávra “Nazareno” amalisia ou pe palávra hebréagui nétser heʼiséva “hoky”.

d Ko profesía ningo jatopa lívro de Zacaríaspe, péro Matéope heʼi “péicha oñekumpli Ñandejára heʼi vaʼekue proféta Jeremías rupive” (Mateo 27:9). Amalisia lívro de Jeremías oñemoĩ vaʼekue tenondete pe seksión oñembohéravape “umi Proféta” (Lucas 24:44). Ha oiméne Mateo heʼívo Jeremías ojerreferi raʼe ko seksión kompletoitére oĩháme avei lívro de Zacarías.