Oñehekomboʼe umi opredikátavape pe Rréino

1-3. ¿Mbaʼépa ojapo Jesús ojepredikave hag̃ua? ¿Mbaʼépa ikatu ñañeporandu?

DOS áño pukukue Jesús opredika Galilea tuichakuére (elee Mateo 9:35-38). Haʼe okorre heta siuda ha puévlore omboʼe hag̃ua umi sinagogahárupi ha opredika umi notísia porã. Ohohápente umi hénte ijatypa ijerére. Jesús heʼi voi ‘hetaiterei oĩ hague pe kóga oñemonoʼõ vaʼerã’ péro umi omonoʼõva katu saʼi.

² Jesús ojapo oñekotevẽtava ojepredikave hag̃ua. ¿Mbaʼépa ojapo raʼe? Omondo umi 12 ijapóstolpe “opredika hag̃ua Ñandejára Rréino” (Luc. 9:1, 2). Oiméne umi apóstol oikuaase mbaʼéichapa ojapóta pe tembiapo. Péro omondo mboyve chupekuéra, Jesús ojapo mborayhúpe peteĩ mbaʼe itúva ojapo vaʼekue avei: omboʼe raẽ chupekuéra.

³ Koʼã mbaʼe ningo ñanemopensa ha ñañeporandu: ¿Mbaʼéichapa Jehová omboʼe raʼe Jesúspe? ¿Mbaʼéichapa Jesús omboʼe upéi idisipulokuérape? ¿Osegípa ojapo upéva koʼág̃a peve? Oimérõ upéicha, ¿mbaʼéicha ojapo?

 4. ¿Moõ ha arakaʼépa Jehová omboʼe Jesúspe?

⁴ Jesús omombeʼu porã Itúva omboʼe hague chupe. Opredika aja ko yvy ape ári Jesús heʼi vaʼekue: ‘Amombeʼu koʼã mbaʼe pe Túva chemboʼe haguéicha’ (Juan 8:28). ¿Moõ ha arakaʼépa oiko raʼe upéva? Jehová oiméne oñepyrũ rakaʼe omboʼe itaʼýrape ojapo riremínte chupe. Haʼe ojapo Jesúspe raẽvete, upévare Jesús hína pe taʼýra ypykue (Col. 1:15). Jesús oĩ vaʼekue Itúva ndive hetaiterei áñore yvágape. Upe aja ohendu ha ohecha opa mbaʼe ojapóva pe ‘Mboʼehára ndaijojaháiva’ (Is. 30:20). Upéicha rupi oikuaa porãve Itúvape, oaprende mbaʼépa ojapo ha mbaʼépa ojapovéta gueteri amo gotyove.

 5. ¿Mbaʼéichapa Jehová omboʼe itaʼýrape ou hag̃ua opredika ko yvy ape ári?

⁵ Og̃uahẽvo pe tiémpo, Jehová oñepyrũ ombokatupyry itaʼýrape ou hag̃ua opredika ko yvy ape ári. Jahechamína peteĩ profesía omombeʼúva mbaʼéichapa pe Mboʼehára ndaijojaháiva omboʼe itaʼýrape (elee Isaías 50:4, 5). Upépe heʼi Jehová omombayha itaʼýrape káda “pyhareve”. Haʼete peteĩ profesór omboʼéva iñalúmnope káda pyhareve voi porã. Peteĩ lívro oñeʼẽva la Bíbliare heʼi ko téxtore: “Haʼete ku Jehová ogueraháva eskuélape Jesúspe ha omboʼe chupe mbaʼépa opredika vaʼerã ha mbaʼéichapa ojapo vaʼerã”. Ikatu jaʼe upe eskuélape, oĩva yvágape, Jehová omboʼe hague Jesúspe ‘mbaʼépa heʼíta ha omboʼéta’ (Juan 12:49). Jehová heʼi avei itaʼýrape mbaʼéichapa oporomboʼe vaʼerã.a Oĩ aja ko yvy ape ári Jesús ojapopaite umi mbaʼe oaprende vaʼekue ha ndahaʼéi haʼénte okumplíva hembiapo. Síno ohechauka idisipulokuérape mbaʼéichapa haʼekuéra avei ikatu opredika ha oporomboʼe hekoitépe.

6, 7. a) ¿Mbaʼe mbaʼépa heʼi Jesús idisipulokuérape, ha mbaʼérepa ideprovéchota chupekuéra upéva? b) ¿Mbaʼéichapa Jesús ñanerekomboʼe koʼág̃a?

⁶ ¿Mbaʼéichapa Jesús omboʼe idisipulokuérape opredika hag̃ua? Ohechaukaháicha Mateo kapítulo 10, Jesús omeʼẽ chupekuéra heta detálle. Heʼi idisipulokuérape: moõpa opredika vaʼerã (versíkulo 5 ha 6), mbaʼépa heʼi vaʼerã (versíkulo 7), ojerovia vaʼerãha Jehováre (versíkulo 9 ha 10), mbaʼéichapa oñepyrũ vaʼerã oñeʼẽ (versíkulo 11-13), mbaʼépa ojapo vaʼerã oĩrõ nohenduséiva chupekuéra (versíkulo 14 ha 15) ha mbaʼépa ojapo vaʼerã oĩrõ oñemoĩ mbaretéva hesekuéra (versíkulo 16-23).b Umi mbaʼe Jesús omboʼéva ijapostolkuérape ideprovechoiterei chupekuéra omoakã hag̃ua predikasión upe tiémpope.

⁷ ¿Ha mbaʼépa ikatu jaʼe ñane tiémpore? Jesús pe Rréi oĩva Ñandejára Rréinope oheja ñande kárgope pe tembiapo iñimportantevéva. Upéva hína japredika ‘koʼã notísia porã oñeʼẽva Ñandejára Rréinore oparupiete ko yvy ape ári’ (Mat. 24:14). ¿Ha ñanepytyvõpa pe Rréi jajapo hag̃ua pe tembiapo? Ikatu jaʼe Jesús oñenkargaha oñemeʼẽ hag̃ua ñandéve ñaikotevẽva guive ikatu hag̃uáicha japredikakuaa ha ñakumpli porã ñane rembiapo kongregasiónpe.

8, 9. a) ¿Maʼerãpa oñemoñepyrũ rakaʼe pe Eskuéla Jaiporukuaa Hag̃ua la Biblia? b) ¿Mbaʼéichapa nepytyvõ predikasiónpe rreunión entresemanagua?

⁸ Jehová organisasión ningo ojevale umi asambléa ha rreuniónre ombokatupyry hag̃ua umi opredikávape. Por ehémplo jareko pe Aty Ñanemboʼéva Japredika Hag̃ua. Péro áño 1940 guive, umi ermáno omoakãva Jehová organisasión odesidi oĩtaha heta eskuéla ñanemboʼétava mbaʼéichapa jajapo vaʼerã ñane rembiapo.

⁹ Eskuéla Jaiporukuaa Hag̃ua la Biblia. Jahecha haguéicha pe ótro kapítulope ko eskuéla oñepyrũ áño 1943-pe. Ko eskuéla oipytyvõ ermanokuérape ojapokuaa hag̃ua diskúrso rreunionhápe, ¿péro upévantepa ojapo? Nahániri. Ko eskuéla oprepara vaʼekue ermanokuérape oñeʼẽkuaave hag̃ua, péicha oporomboʼe porãvéta ha omombaʼeguasúta Jehovápe (Sal. 150:6). Oñepytyvõ vaʼekue enterove oĩvape ko eskuélape opredikakuaa hag̃ua umi notísia porã. Koʼág̃a oñembokatupyry ermanokuérape pe rreunión entresemanagua rupive.

10, 11. ¿Mávapa ohokuaa Eskuéla de Galaádpe, ha maʼerãpa ojejapo?

¹⁰ Eskuéla Vívlika de Galaad. Ko eskuéla oñepyrũ vaʼekue peteĩ lunes 1 de febrero de 1943. Upépe ohómi umi prekursór ha ótro ermáno oiporupaitéva itiémpo Jehová servísiope. Ojeprepara chupekuéra oservi hag̃ua de misionéro ha oñemondo diferénte lugárpe. Péro octubre de 2011 guive oñekambiaʼimi mávapa ikatu oho. Koʼág̃a oñeinvita umi prekursór espesiál, superintendénte ha hembireko, vetelíta ha umi misionéro neʼĩrava oho ko eskuélape.

¹¹ ¿Maʼerãpa ojejapo Eskuéla Vívlika de Galaad? Peteĩ ermáno omboʼéva heta áñorema ko eskuélape heʼi: “Koʼápe oñemombareteve umi ermáno jerovia ha upearã heta ojestudia la Biblia. Avei ojeprepara chupekuéra ikatu hag̃uáicha oaguanta umi mbaʼe ijetuʼúva ombohováitava iñasignasiónpe. Ha oĩ ótra kósa iñimportantetereíva. Ko eskuéla oipytyvõ chupekuéra ikyreʼỹve hag̃ua predikasiónpe” (Efes. 4:11).

12, 13. ¿Mbaʼépa ojehupyty Eskuéla de Galaad rupive? Emombeʼu peteĩ ehémplo.

¹² ¿Mbaʼépa ojehupyty ko yvy tuichakuére ko eskuéla rupive? Áño 1943 guive ohóma Galaádpe mas de 8.500 ermáno ha ermánac ha oñemondo chupekuéra 170 tetãme. Koʼã ermáno ojapo umi mbaʼe oaprende vaʼekue. Iguápo predikasiónpe ha oipytyvõ ótrope ikyreʼỹ hag̃ua avei. Haʼekuéra omoĩ ehémplo porã ha omotenonde predikasión umi lugár saʼihápe umi testígo.

¹³ Jahechami mbaʼépa oiko vaʼekue Japónpe. Upépe haimete ni ndojepredikavéi segunda gérra mundiál aja. Agosto de 1949-pe ndaipóri vaʼekue ni 10 puvlikadór Japónpe. Péro upe áño opakuévo oĩ 13 misionéro ohóva Galaádgui ha opredikáva kaneʼõʼỹre. Upe rire hetave misionéro og̃uahẽ upépe. Primerorã oñehaʼã opredikave hikuái umi siuda tuichavévape, ha upéi ova ótro lugárpe. Koʼã misionéro omokyreʼỹ iñestudiantekuérape ha ótro ermánope ojapo hag̃ua iprekursorádo. Upéicha rupi ojehupyty heta mbaʼe porã. Koʼág̃a oĩma mas de 216.000 opredika kyreʼỹva ha koʼãvagui 86.000 rupi oservi de prekursór.d

14. ¿Mbaʼépa ohechauka porã umi eskuéla ojejapóva? (Ehecha avei pe rrekuádro “Eskuéla ombokatupyrýva umi opredikávape”, oĩva páhina 188-pe.)

¹⁴ Ótra eskuéla. Pe Eskuéla Prekursorkuérape G̃uarã, pe Eskuéla Vívlika umi Omendávape G̃uarã ha pe Eskuéla Vívlika umi Kuimbaʼe Soltérope G̃uarã ideprovechoiterei. Oipytyvõ umi ermánope ikatu hag̃uáicha ikatupyryve ha omotenonde kyreʼỹme predikasión.e Koʼã eskuéla ohechauka porãiterei pe Rréi opreparaha umi oĩvape ipoguýpe ojapo porã hag̃ua hembiapo (2 Tim. 4:5).

15. ¿Mbaʼéichapa umi omoakãva kongregasión osegi Jesús ehémplo?

¹⁵ Jahecháma haguéicha pe profesía de Isaíaspe, Jehová omboʼe Jesúspe heta mbaʼe. Upépe Jesús oaprende mbaʼéichapa heʼíva rupive ikatu ‘omokyreʼỹ umi ikaneʼõvape’ (Is. 50:4). Oĩrõ guare ko yvy ape ári haʼe oiporu pe oaprende vaʼekue ha omokyreʼỹ umi ‘ombaʼapo jejopy ha ikárga pohýivape’ (Mat. 11:28-30). Umi omoakãva kongregasión ningo osegi Jesús ehémplo ha oñehaʼã omombarete iñermanokuérape. Upearã ojejapo umi eskuéla ohechaukáva chupekuéra mbaʼéichapa ikatu oipytyvõ porãve iñermanokuérape.

16, 17. ¿Maʼerãpa ojejapo pe Eskuéla del Ministério del Rréino? (Ehecha avei pe nóta.)

¹⁶ Eskuéla Superintendénte, Ansiáno ha Siérvo Ministeriálpe g̃uarã (Eskuéla del Ministério del Rréino). Oñepyrũ pe 9 de marzo de 1959, Nueva Yórkpe (South Lansing). Oñeinvita oho hag̃ua pe kúrsope un mes aja umi superintendénte ha siérvo de kongregasiónpe (upéi oñehenóiva koordinadór del kuérpo de ansiáno). Tiémpo rire pe kúrso ojetradusi hetave idiómape, ha upéicha heta ermáno oparupigua ikatúma oho ko eskuélape.f

¹⁷ Pe Anuario de los Testigos de Jehová de 1962 heʼi: “Ko múndope entéronte saʼi ñane tiémpo. Upévare peteĩ ansiáno kongregasionpegua omohendakuaa vaʼerã hembiapo ikatu hag̃uáicha oñatende porã enterove umi ermánore, péichamante oipytyvõta chupekuéra. Péro ndaikatúi avei ombotapykue ifamíliape oñatendégui kongregasiónre. Upévare ko yvy tuichakuére umi siérvo de kongregasión ikatúta oho Eskuéla Superintendénte, Ansiáno ha Siérvo Ministeriálpe g̃uarãme. Upépe ojepreparáta chupekuéra ikatu hag̃uáicha ojapo pe oñehaʼarõva umi omoakãvagui kongregasión heʼiháicha la Biblia” (1 Tim. 3:1-7; Tito 1:5-9).

18. ¿Mbaʼérepa jaʼekuaa enterovépe ideprovechoha pe Eskuéla del Ministério del Rréino?

¹⁸ Umi ansiáno ha siérvo ministeriál ojapóvo umi mbaʼe oaprende vaʼekue ko eskuélape, omokyreʼỹ ha omombarete entéro ermánope. Péicha osegi Jesús ehémplo. Upévare jaʼekuaa enterovépe ideprovechoha ko eskuéla. Epensamíntena, ¿ndojapoporãipa nderehe peteĩ ansiáno térã siérvo ministeriál nemokyreʼỹrõ? Térã, ¿ojapysaka porãrõ nderehe reñeʼẽvo chupe? ¿Mbaʼéichapa reñeñandu ohórõ ndevisita ojepyʼapýgui nderehe? (1 Tes. 5:11.) Koʼã ermáno ikatupyrýva ningo peteĩ vendisión kongregasiónpe g̃uarã.

19. ¿Mbaʼe ótra eskuélapa omoñepyrũ pe Komite de Enseñánsa, ha maʼerãpa ojejapo?

¹⁹ Ótra eskuéla. Pe Komite de Enseñánsa del Kuérpo Governánte ojapo avei ótra eskuéla ikatuhápe oho umi ermáno orekóva rresponsavilida Jehová organisasiónpe. Koʼã eskuéla ombokatupyry umi ansiánope, superintendénte ha umi oĩvape Komite de Sukursálpe ojapo porãve hag̃ua hembiapo. Omokyreʼỹ chupekuéra káda día omombareteve hag̃ua ijerovia. Avei ojeʼe koʼã ermánope mbaʼéichapa otrata vaʼerã umi ovecha Jehová ohejáva ikargopekuéra (1 Ped. 5:1-3).

20. ¿Mbaʼérepa Jesús heʼi vaʼekue Jehová ohekomboʼetaha opavavépe? ¿Mbaʼépa rejedesidi rejapo?

²⁰ Jahecha porãiterei pe Rréi ogovernáva Ñandejára Rréinope ombokatupyryha umi oikóvape ipoguýpe. Péro upéva yvágapema voi oñepyrũ: Jehová oprepara vaʼekue itaʼýrape, ha upéi Jesús omboʼe idisipulokuérape. Upévare Jesús heʼi vaʼekue: “Jehová ohekomboʼéta opavavépe” (Juan 6:45; Is. 54:13). Jaaprovechapaitéke umi mbaʼe ñanemboʼéva pe Rréi. Ñanemanduʼákena entéro koʼã mbaʼe ñanepytyvõha jajerovia mbareteve hag̃ua ha péicha jajapo porãve pe traváho oñemeʼẽva ñandéve.