¡Ñakonfiákena Jehováre ha jaikove!

 1. ¿Mbaʼérepa enterovéva ñaikotevẽ konsuélo?

ENTEROVÉVA ningo ñaikotevẽ konsuélo. Ikatu hína ñanerenyhẽ provlémagui, ndoikói umi mbaʼe ñahaʼarõ vaʼekue ha jajepyʼapy. Ikatu avei ñanderasykatu, ñandeedáma jahávo térã omano peteĩ jahayhúva. Oĩ avei umi ohasa asýva ótro otrata vai haguére chupe. Avei, opárupi umi hénte iviolentove ohóvo. Añetehápe ko situasión ijetuʼúva ohechauka jaikoha “umi ára pahápe” ha káda día ñañemoag̃uiveha pe múndo pyahúre (2 Tim. 3:1). Hiʼarive, ikatu hína heta tiémpoma ñahaʼarõ oñekumpli hag̃ua Jehová promesakuéra, ha upe aja jahasa heta hetave provléma. ¿Moõpa ikatu jajuhu konsuélo?

2, 3. a) ¿Mbaʼépa la jaikuaáva Habacúcgui? b) ¿Mbaʼérepa ñaanalisa umi mbaʼe oĩva lívro de Habacúcpe?

² Ñambohovái hag̃ua ko porandu ikatu ñahesaʼỹijo lívro de Habacuc. La Biblia ningo nomombeʼúi heta mbaʼe proféta Habacúcgui, péro pe lívro añetehápe ñanemokyreʼỹ. Amalisia pe téra Habacuc heʼise “Ñeañua”. Upéva ikatu ohechauka mokõi mbaʼe: Jehová haʼeteha la ñaneañuáva ñanekonsola hag̃ua, térã mbaʼéichapa umi jaservíva chupe ñakonfia ha ñañakarama hatã hese. Habacuc oñeʼẽ Ñandejárape ha oporandu chupe unas kuánta kósa. Jehová orresponde chupe ha omomýi ko profétape oskrivi hag̃ua umi mbaʼe oñemongeta vaʼekue hikuái, pórke oikuaa ideprovechotaha ñandéve (Hab. 2:2).

³ Habacuc oñemongetárõ guare Jehovándi ohechauka vaʼekue ojepyʼapyetereiha, ha upévante la jaikuaáva pe profétagui la Biblia rupive. Péro ko lívro oĩ Ñandejára Ñeʼẽme, “opa mbaʼe ojehai vaʼekue yma” apytépe. “Koʼãva omeʼẽ ñandéve esperánsa, ñanepytyvõgui ñaaguanta hag̃ua ha ñanekonsola avei” (Rom. 15:4). ¿Mbaʼéichapa pe lívro de Habacuc ikatu ñanepytyvõ káda únope? Ikatu ñanepytyvõ jaikuaa hag̃ua mbaʼépa heʼise jajerovia Jehováre. Avei, pe lívro de Habacuc ohechauka porãiterei ikatuha ñandepyʼaguapy tahaʼe haʼéva la provléma térã pruéva jahasáva.

 4. ¿Mbaʼérepa ojepyʼapyeterei vaʼekue Habacuc?

⁴ (Elee Habacuc 1:2, 3). Habacuc oiko vaʼekue peteĩ tiémpo ijetuʼuetereívape. Umi hénte itiémpope guare iñaña ha iviolénto, ha upévare Habacuc ndovyʼaieterei kuri. Opárupinte haʼe ohecha umi israelita iñinhustoha ha ojotrata vaietereiha. Upévare pe proféta oporandu arakaʼépa opáta umi mbaʼe vai, ha mbaʼérepa Jehová ohaʼarõiterei osolusiona hag̃ua la situasión. Habacuc oñandu ndogueropuʼakaveimaha la oikóva, péro ojerure asy Jehovápe ojapo hag̃ua álgo. Haʼe opensáne raʼe Jehová ndojepyʼapyveiha ipuévlore, térã otardaitereiha ojapo hag̃ua la tekotevẽva. ¿Oikómapa ñanderehe upéva?

 5. ¿Mbaʼépa ikatu ñaaprende lívro de Habacúcgui? (Ehecha pe taʼanga oĩva iñepyrũme).

⁵ ¿Oporandu piko Habacuc koʼã mbaʼe pórke ndojeroviavéi Jehováre ha ipromesakuérare? Nahániri. Haʼe omombeʼu Jehovápe iprovlemakuéra ha umi mbaʼe okevrantáva chupe, ndahaʼéi yvyporakuérape la omombeʼúva. Péicha ohechauka ndojedesesperaiha ha ojeroviaha Ñandejárare. Habacuc ningo ojepyʼapyeterei ha ndoikuaái mbaʼépa ohaʼarõta. Ndaikatúi ontende mbaʼérepa Jehová ndojapóima álgo, ha mbaʼérepa opermiti osufri. Jehová omomýi Habacúcpe oskrivi hag̃ua umi mbaʼe oipyʼapýva chupe, ha upéva ñanemboʼe peteĩ leksión iñimportánteva: ndajakyhyjéi vaʼerãha ñamombeʼu hag̃ua Jehovápe la ñanekevrantáva ha umi dúda jarekóva. Upéva rangue, mborayhúpe ñaneinvita ñamombeʼu hag̃ua chupe mbaʼeichaitépa ñañeñandu (Sal. 50:15; 62:8). Proverbios 3:5 ñanemokyreʼỹ enterovépe heʼívo: “Rekonfia vaʼerã Jehováre nde pyʼaite guive, ha ani rejerovia umi mbaʼe nde repensávare”. Habacuc ojapo vaʼekue ko téxto heʼíva.

 6. ¿Mbaʼérepa iñimportánte ñañemboʼe?

⁶ Habacuc ojerovia vaʼekue Jehováre, pórke haʼe Iñamígo ha Itúa. Upévare oñanima oñeʼẽ chupe. Haʼe oiko rangue ojepyʼapy isituasiónre ha ojerovia ijehénte, omombeʼu Jehovápe mbaʼéichapa oñeñandu ha la okevrantáva chupe. Upéva peteĩ ehémplo neporãva ñandéve g̃uarã. Jehová hína pe ohendúva ñane ñemboʼe, ha oipota jahechauka ñakonfiaha hese ñamombeʼúvo chupe umi mbaʼe ñandepyʼapýva (Sal. 65:2). Jajapóramo péicha, jahechakuaáta mbaʼéichapa haʼe ombohovái ñane ñemboʼe. Ñañandúta lomímo ke ñaneañuáva ñanekonsola ha ñandegia hag̃ua (Sal. 73:23, 24). Jehová ñanepytyvõta ñantende hag̃ua mbaʼéichapa haʼe ohecha ñane situasión tahaʼe haʼéva la jahasáva. ¿Mbaʼéichapa ikatu jahechauka añetehápe jajeroviaha hese? Por ehémplo, ñañemboʼéramo chupe ñande pyʼaite guive.

 7. ¿Mbaʼépa Jehová ojapo Habacuc omombeʼúrõ guare umi mbaʼe oipyʼapýva chupe?

⁷ (Elee Habacuc 1:5-7). Habacuc omombeʼu rire Jehovápe la oipyʼapýva chupe, ikatu kuri oñesorprende Ñandejára orreaksiona lája. Peteĩ Túa oporohayhukuaáva ojapoháicha, Jehová ontende la oñandúva Habacuc. Haʼe oikuaa Habacuc osufriha ha oikotevẽha oñepytyvõ chupe. Upévare Jehová nomongavajúi isiérvope, upéva rangue omombeʼu chupe mbaʼépa oiko potaitéma umi judío naiñeʼẽrendúivare. Posívlemente Habacuc haʼe vaʼekue pe primera persóna Jehová omombeʼu hague og̃uahẽ potaitemaha pe kastígo oguerútava upe tiémpope.

 8. ¿Mbaʼérepa umi mbaʼe Jehová heʼíva ndahaʼéi vaʼekue la ohaʼarõva Habacuc?

⁸ Jehová heʼi Habacúcpe ojapotamaha álgo. Haʼe okastigáta umi hénte aña ha ivioléntovape oikóva Judápe. Jehová heʼi chupe: “Pene tiémpope oikóta”. Péicha ohechauka pe huísio oikotaha oikove aja gueteri pe proféta ha umi hénte itiempopegua. Umi mbaʼe Jehová heʼíva ndahaʼéi vaʼekue la ohaʼarõva pe proféta. Umi caldeo térã babilonio ningo ndoiporiahuverekói avavépe. Haʼekuéra iviolentove umi israelítagui, pórke koʼãva por lo méno oikuaa Jehová mandamientokuéra. Péro, ¿mbaʼérepa Ñandejára ojevale pe tetã iñañaitévare okastiga hag̃ua ipuévlope? Upéva ningo ombosufrivéta guei Judápe.a ¿Mbaʼéichapa ñañeñandúta kuri ñahendúrire koʼã mbaʼe oikótava?

 9. ¿Mbaʼépa Habacuc oporanduve vaʼekue Jehovápe?

⁹ (Elee Habacuc 1:12-14, 17). Habacuc ontendéramo jepe mbaʼérepa Jehová oipuru umi babilóniope okastiga hag̃ua ipuévlo añáme, lomímonte oiméne oñesorprende raʼe. Péro haʼe hekomirĩ ha osegi ojerovia Jehováre. Habacuc oikuaa Ñandejára haʼeha pe “Ita Guasu” (Deut. 32:4; Is. 26:4). Haʼe ndodudái Jehová oporohayhu ha ivuenoitereiha, upévare ndokyhyjéi ombaʼeporanduve hag̃ua chupe. Por ehémplo, Habacuc oporandu avei Jehovápe mbaʼérepa opermiti oiko Judápe umi mbaʼe ombosufrietéva umi héntepe. Mbaʼéicha rupípa ensegídama voi ndojapói álgo. Ha mbaʼérepa pe Todopoderóso okirirĩ ha oheja oiko umi mbaʼe vai opárupi. Pe proféta ningo ohenói voi chupe pe “Dios Sánto” ha heʼi avei hese: “Nde ningo nepotĩeterei ha ni peteĩ defékto ndereguerekói, upévare ndaikatúi voi ni rehecha la ivaíva”.

10. ¿Mbaʼérepa sapyʼánte ikatu ñañeñandu Habacuc oñeñandu haguéicha?

¹⁰ Sapyʼánte ikatu ñañeñandu Habacuc oñeñandu haguéicha. Ñande ningo jajerovia avei Jehováre, jalee ha jastudia Iñeʼẽ. Upévare jarovia ñande pyʼaite guive oñekumplitaha umi mbaʼe ñahaʼarõva. Ñaaprende avei heta mbaʼe Ñandejára promésagui iñorganisasión rupive. Péro oiko haguéicha Habacuc rehe, ikatu gueteri ñañeporandu: ¿Arakaʼe piko opáta ñane sufrimiénto? Jahechamína mbaʼépa heʼive kuri Habacuc, ha la ikatúva ñaaprende upévagui.

11. ¿Mbaʼépa Habacuc oĩ desidído ojapotaha?

¹¹ (Elee Habacuc 2:1). Habacuc opyta ipyʼaguapy oñemongeta rire Jehovándi. Oipytyvõ chupe ojerovia hag̃ua Jehová oñenkargataha opa mbaʼére. Jahechakuaa upéva koʼã mbaʼe heʼi vaʼekuére: “Ahaʼarõ kirirĩháme ou pe sarambi guasu” (Hab. 3:16). Heta ótro oservíva fiélmente Ñandejárape ohechauka avei ipasiensiaha ohaʼarõvo Jehová ojapo la oñekotevẽva. Koʼã persóna ehémplo ñanemokyreʼỹ ha ñanemomýi jajapo meme hag̃ua avei upéva (Miq. 7:7; Sant. 5:7, 8).

12. ¿Mbaʼépa ikatu ñaaprende Habacúcgui?

¹² ¿Mbaʼépa ñaaprende Habacuc odesidi vaʼekuégui ojapo? Primero, siémpre ñañemboʼe vaʼerãha Jehovápe ijetuʼúramo jepe ñane situasión. Segundo, tekotevẽha ñahendu umi mbaʼe Jehová omombeʼúva Iñeʼẽ ha iñorganisasión rupive. Tercero, ñanepasiénsia vaʼerã ha ñahaʼarõ la ojapótava Jehová, ha jajerovia haʼe ñanepytyvõtaha itiempoitépe. Jasegíramo Habacuc ehémplo, ñandepyʼaguapýta ha ikatúta ñaaguanta. Jagueroviáramo añetehápe oñekumplitaha Ñandejára promesakuéra, ñanepasiénsiata ha javyʼáta tahaʼe haʼéva umi provléma jahasáva. Jarekóramo esperánsa Jehováre ndajadudamoʼãi haʼe ojapotaha la tekotevẽva guive itiempoitépe (Rom. 12:12).

13. ¿Mbaʼéichapa Jehová okonsola vaʼekue Habacúcpe?

¹³ (Elee Habacuc 2:3). Katuete oiméne Jehová ovyʼa Habacuc odesidi haguére ohaʼarõ umi mbaʼe oikótava. Ñandejára haʼe pe Todopoderóso ha oikuaa mbaʼeichaitépa Habacuc osufri, upévare okonsola chupe ha mborayhúpe ombohovái umi porandu haʼe ojapóva. Saʼíma kuri ofalta oñesolusiona hag̃ua umi mbaʼe oipyʼapýva pe profétape. Haʼete voi Jehová heʼíva kuri Habacúcpe: “Nepasiénsiakena ha ekonfia cherehe. Che ambohováita ne ñemboʼe haʼetéramo jepe la ohasámava heta tiémpo”. Jehová oipota Habacuc imanduʼa haʼe odesidíma hague mbaʼéichapa oñekumplíta umi promesakuéra, ha omokyreʼỹ chupe osegi hag̃ua ohaʼarõ. Jaikuaaháicha, pe proféta nohaʼarõreíri kuri.

14. ¿Mbaʼépa jajedesidi vaʼerã jajapo jahasa jave umi mbaʼe ijetuʼúva?

¹⁴ Ñande avei tekotevẽ ñahaʼarõ oñekumpli Jehová promesakuéra ha ñañatende porã vaʼerã la heʼívare. Upéicha jajeroviáta hese ha ñandepyʼaguapýta jahasáramo jepe heta mbaʼe ijetuʼúva. Jesús ñanemokyreʼỹ ani hag̃ua ñañekonsentra “arakaʼépa oikóta umi mbaʼe térã mbaʼe tiémpopa ojeporavo upearã”, pórke umíva Ñandejára nomombeʼúi ñandéve (Hech. 1:7). Tekotevẽ guei jajerovia Jehová oikuaaha mbaʼe moméntopepa iporãve ojapo hembipota. Ñañehaʼãkena ani hag̃ua ñañentrega, avei ñaneumílde, ñanepasiénsia ha jajerovia Ñandejárare. Ñahaʼarõ aja, jaipuru porã pe tiémpo hembýva ha jajapo ikatúva guive jaservi porã hag̃ua Jehovápe (Mar. 13:35-37; Gál. 6:9).

15, 16. a) ¿Mbaʼe promésa iñimportantetévapa jatopa lívro de Habacúcpe? b) ¿Mbaʼépa ñanemboʼe koʼã promésa?

¹⁵ Jehová opromete: “Pe ihústova katu oikovéta iñeʼẽrendu rupi”. Heʼi avei: “Opárupi ojekuaáta Jehová podér tuichaha, upe ojekuaáva omyenyhẽta ko yvy” (Hab. 2:4, 14). Jahechaháicha, Jehová opromete omeʼẽtaha jeikove opaveʼỹva umi ipasiénsia ha ojeroviávape hese.

¹⁶ Pe promésa jatopáva Habacuc 2:4-pe ningo iñimportanteterei, upévare apóstol Pablo osita upe téxto 3 vése voi umi ikártape (Rom. 1:17; Gál. 3:11; Heb. 10:38). Ñaneñeʼẽrendúrõ Jehovápe ha jajeroviárõ hese, katuete jahecháta okumpli vove ipromesakuéra tahaʼe haʼéva umi mbaʼe ijetuʼúva jahasáva. Jehová oipota jajesareko umi mbaʼe haʼe oguerútavare amo gotyove.

17. ¿Mbaʼépa oasegura ñandéve lívro de Habacuc?

¹⁷ Lívro de Habacuc ñanemboʼe heta mbaʼe iñimportantetereíva entéro jaikóvape koʼã ára pahápe. Jehová opromete jeikove opaveʼỹva umi persóna hekojojáva ha ojeroviávape hese. Upévare ñamombarete vaʼerã ñande jerovia jarekóramo jepe heta provléma ha umi mbaʼe ñanekevrantáva. Jehová heʼi vaʼekue Habacúcpe umi mbaʼe ohechaukáva ikatuha ñaĩ segúro haʼe ñanepytyvõ ha ñandesalvataha. Haʼe imbaʼeporã rupi, ojerure jajerovia hag̃ua hese ha pyʼaguapýpe ñahaʼarõ hag̃ua pe tiémpo Irréino ogovernatahápe ko yvy. Oiko vove upéva, ko yvy henyhẽta umi hénte ovyʼáva ha ipyʼaguapývagui ha enterovéva oadoráta Jehovápe (Mat. 5:5; Heb. 10:36-39).

18. ¿Mbaʼéichapa oipytyvõ Habacúcpe umi mbaʼe Jehová heʼíva?

¹⁸ (Elee Habacuc 3:16-19). Umi mbaʼe Jehová heʼíva Habacúcpe opokoiterei hese. Habacuc ojepyʼamongeta umi mbaʼe porãite Jehová ojapo vaʼekuére ipuévlo rehehápe. Péicha koʼýte ojeroviave Jehováre. Haʼe oĩ segúro Jehová ndotardamoʼãiha ojapo hag̃ua la tekotevẽva guive. Upévare pe proféta ipyʼaguapy, jepe oikuaa osufrivétaiti hague peteĩ tiémpore. Haʼe ndodudavéima ni michĩmi. Upéva rangue, ojerovia ipyʼaite guive Jehová oñangarekotaha hese. Umi mbaʼe heʼíva pe versíkulo 18-pe ohechauka Habacuc ojeroviaiterei hague Ñandejárare. Kóva hína peteĩva umi párte iporãvéva oĩva la Bíbliape oñeʼẽva pe konfiánsare. Peteĩ expérto heʼi upe téxto heʼiseha voi: “Apo vyʼágui ajerovia rupi che Járare; hiʼãite voi chéve ajeroky amombaʼe rupi Ñandejárape”. ¡Ajépa tuichaite mbaʼe la ñaaprendéva Habacuc ehémplogui! Jehová ndahaʼéi oprometénteva umi mbaʼe porãite amo gotyove g̃uarã, haʼe oasegura voi ñandéve pyaʼe okumplitaha la heʼíva.

19. ¿Mbaʼépa jajapo vaʼerã Jehová ñanekonsola hag̃ua okonsola haguéicha Habacúcpe?

¹⁹ ¿Mbaʼépa la iñimportantevéva ñaaprendéva lívro de Habacúcgui? Ñakonfia vaʼerãha Jehováre (Hab. 2:4). Jasegi hag̃ua jajerovia Jehováre tekotevẽ ñañemoag̃uive jahávo hese. Upearã jajapo vaʼerã mbohapy mbaʼe: 1) Ñañemboʼe meme vaʼerã ha ñamombeʼu Ñandejárape umi provléma ha entéro umi mbaʼe ñandepyʼapýva. 2) Ñahendu mbaʼépa heʼi ñandéve Jehová Iñeʼẽ rupive, ha jasegi umi instruksión omeʼẽva iñorganisasión. Ha 3) jajerovia Ñandejárare ha ñanepasiénsia ñahaʼarõ aja Jehová okumplipaite ipromesakuéra. Péicha ojapo kuri Habacuc. Upévare haʼe ndovyʼáiramo jepe oñepyrũrõ guare oñeʼẽ Jehovándi, ikyreʼỹ ha ovyʼaiterei oñemongetapa rire hendive. Jasegíramo Habacuc ehémplo, ñande Ru yvagapegua Jehová ñanekonsoláta ñaneañuaramoguáicha mborayhúpe. ¿Oĩnepa ko múndo añáme konsuélo iporãvéva ikatúva jarresivi?