Ndaipóri mbaʼeve oñemopuʼãva ñanekóntrape ipuʼakátava ñanderehe

“Ndaipóri gueteri oikuaáva mbaʼépepa ikatúta nerundi.” (ISAÍAS 54:17.)

1, 2. Mbaʼéichapa oñekumpli Isaías 54:17 umi testigos de Jehová Albaniapeguáre?

OĨNINGO Európape peteĩ tetã michĩva ha sérro memetéva. Upépe yma ogovernavaʼekue umi komunísta ha umi ndogueroviáiva Ñandejára oĩha. Upe tetã héra hína Albania, ha umi mburuvicha upepegua ojapo opa ikatúva ohundi hag̃ua umi kristiáno añeteguápe. Péro ndaipuʼakái hesekuéra, otortura ha omombaʼapo pohýiramo jepe, ni oñeʼẽ vaíramo jepe hesekuéra. Mávare piko ojejaporakaʼe upéicha? Testigos de Jehová rehe. Ijetuʼuetereíramo jepe chupekuéra oñembyaty ha opredika hag̃ua, heta áñorema oñehaʼã oiko hikuái kristianoitéicha ha omombaʼeguasu Jehovápe. Áño 2006-pe ojejapopa Albaniapegua sukursál pyahu, ha upévare ojejapo peteĩ aty guasu. Upépe peteĩ ermáno aréma oservíva Ñandejárape heʼi: “Satanás oñehaʼãmbaitéramo jepe katuete osẽ vai ha Jehová katu osẽ porã!”.

² Umi ermáno rehe oñekumpli Ñandejára heʼivaʼekue Isaías 54:​17-pe. Upépe heʼi: “Ndaipóri gueteri oikuaáva mbaʼépepa ikatúta nerundi. Rembotýta nembojovakeséva juru”. Ymaite guive umi oĩva Satanás poguýpe ojapo opa mbaʼe ani hag̃ua oñemombaʼeguasu Jehovápe. Upéicharõ jepe ndaipóri mbaʼeve oguenohẽva chupekuéra Ñandejára rapégui.

Satanás ojapóvante nosẽporãi

3, 4. a) Mbaʼe mbaʼépa Satanás ojapo jepi Jehová siervokuérare? b) Mbaʼérepa jaʼe Satanáspe nosẽporãiha umi mbaʼe ojapóva?

³ Ñandejára siervokuéra rehe ojejapo heta mbaʼe vai. Umíva apytépe ojeproivi chuguikuéra opredika, oñemondo chupekuéra kárselpe ha oñemoĩ umi léi ojeguereko asy hag̃ua chupekuéra. Oĩ avei hénte aty opuʼãva hesekuéra (Salmo 94:20). Ha koʼag̃aite, jastudia aja ko artíkulo heta tetã rupi ‘oñembohasa asy hína’ ñane ermanokuérape ojeroviahaguére Ñandejárare (Apocalipsis [Revelación] 2:10).

⁴ Peteĩ sukursál omombeʼu un áñopente 32 vése ojejaʼo ha oñembyepoti vaipa hague ermanokuérape opredika jave. Avei 59 vése ojagarra chupekuéra polisía opredika jave, ha tahaʼe mitã, tuja, kuña térã kuimbaʼépe. Umi polísia ningo hetápe otrata peteĩ mondaháicha. Upévare omokuã hũ ha ofotografia raẽ omoinge hag̃ua chupekuéra kárselpe. Ótrope katu oamenasa vaipa hikuái. Peteĩ tetãme ojekuaa avei ohasamaha mil cien umi testigos de Jehová ojejagarra, oñemulta ha oñembyepotivaʼekue. Umíva apytépe oĩhína doscientos ermáno rupi ojejagarravaʼekue oñembyatýrõ guare ogueromanduʼa hag̃ua Jesús ñemano. Upéicharõ jepe, koʼã tetãme ha ambuépe avei, Jehová oipytyvõ isiervokuérape ijespíritu rupive, haʼetéramo jepe ndaiporivéitamava solusión (Zacarías 4:6). Ipochyvéramo jepe umi ndaijaʼéiva ñanderehe, nañakirirĩmoʼãi, ha jasegíta ñamombaʼeguasu Jehovápe. Jaikuaa porã ndaiporimoʼãiha mbaʼeve ojokóva Ñandejárape ojapo hag̃ua heʼivaʼekue.

Ñamboty umi ijapúva juru

 5. Mbaʼéichapa síglo primérope oñeñeʼẽ vai vaʼekue Jehová siervokuérare?

⁵ Isaías heʼivaʼekue umi oservíva Ñandejárape ojuru mbotytaha umi oñeʼẽ vaívape hesekuéra ha ojekuaáta ijapuha hikuái. Síglo primérope, umi kristiáno rehe pyʼỹinte oñeñeʼẽ vaími vaʼekue, ha ojeʼe voi katu hesekuéra delinkuenteha. Hechos 16:​20, 21-pe jahechakuaa mbaʼéichapa oñeñeʼẽ vai vaʼekue hesekuéra. Upépe heʼi: “Koʼã Israelguáva omyangekói ñande táva, ha oporomboʼe heta mbaʼére, ñande Romayguáva ikatuʼỹva jarohory”. Upe rireve katu umi omoakãva hudiokuérape heʼi umi mburuvichápe ojagarra hag̃ua Jesucristo remimboʼekuérape. Heʼi hesekuéra: “Koʼã kuimbaʼe oporomyangekoivaʼekue yvy jerekuévo, ou koʼápe avei, ha [...] haʼekuéra opuʼãhína Romaygua ruvicha guasúre” (Hechos 17:​6, 7). Apóstol Pablo rehe heʼi hikuái ‘mbaʼasy vaícha’ oguerovaha hapichakuérare umi mbaʼe opensáva ha ojeʼe avei hese omoakãha peteĩ aty ‘omyasãiva opárupi joavy’ (Hechos 24:​2-5).

6, 7. Mbaʼéichapa ikatu jahechauka ijapuha umi oñeʼẽ vaíva ñanderehe?

⁶ Upévare ndajahecharamói oĩramo koʼág̃a rupi oñeʼẽ vai ha otakýva ermanokuéra rehe. Ha mbaʼéichapa upéicharõ jajuru mboty umi oñeʼẽ vaívape ñanderehe? (Isaías 54:17.)

⁷ Pyʼỹinte ñande jajeporta porã rupi opyta vai umi oñeʼẽ vaíva ñanderehe (1 Pedro 2:12). Ojehecháningo ñanderehe jarrespetaha umi léi, ñande reko potĩ ha jajepyʼapyha ñande rapichakuérare. Ha upéicha ojekuaa ijapuha umi oñeʼẽ vaíva ñanderehe. Jajeporta porã rupi ñambohovaimañaína chupekuéra. Umi ohecháva ñande reko porãha, omombaʼeguasúta avei Ñandejárape ha ohechakuaáta oiko porãveha umi oservíva chupe (Isaías 60:14; Mateo 5:​14-16).

 8. a) Mbaʼépa tekotevẽta sapyʼánte jajapo ñadefende hag̃ua jagueroviáva? b) Jesús ojapohaguéicha, mbaʼéichapa ñande jajuru mboty avei umi oñeʼẽ vaívape ñanderehe?

⁸ Jajeporta porãramo jepe, sapyʼánte tekotevẽta ñadefende umi mbaʼe jagueroviáva. Upearã ikatu avei jaha umi mburuvichakuéra rendápe ha umi trivunálpe (Ester 8:3; Hechos 22:​25-29; 25:​10-12). Jesús oĩrõ guare Yvy ape ári, sapyʼánte ombohovái upepete voi umi oñeʼẽ vaívape hese. Mbaʼerãpa ojapo upéicha? Ohechauka hag̃ua ijapuha hikuái (Mateo 12:​34-37; 15:​1-11). Upéicha avei ñande ndajahejái ohasa rei ñañeʼẽ hag̃ua ñande rapichakuérape ñande jeroviáre (1 Pedro 3:15). Aníkena nañañeʼẽvéi mbaʼe Ñandejára Ñeʼẽre oñembohory rupi ñanderehe ñane irũnguéra eskuelapegua térã ñande travahohapegua térã umi ñane hénte ndahaʼéiva testígo (2 Pedro 3:​3, 4).

Jerusalén ningo peteĩ “ita pohýi”

 9. Mbaʼeichagua Jerusalénpa hína pe oñembojojáva ‘ita pohýire’ Zacarías 12:​3-pe, ha mávapa orrepresenta chupe ko Yvy ape ári?

⁹ Proféta Zacarías heʼivaʼekue mbaʼérepa umi tetãnguéra opuʼã kristianokuéra rehe. Jahechamína heʼíva Zacarías 12:3: “Upérõ ajapóta Jerusaléngui ita pohýi tetãnguérape g̃uarã”. Mbaʼeichagua Jerusalén rehépa oñeʼẽhína koʼápe? “Jerusalén yvagapegua” rehe, umi kristiáno ojeporavovaʼekue oho hag̃ua oisãmbyhy yvágape (Hebreos 12:​22, BNP). Ko Yvy ape ári oĩ gueteri mbovymi umi oisãmbyhýtava Jesús ndive. Omoirũningo chupekuéra “ambue ovecha” aty, ha oñondive heʼi hikuái opavavépe ikatu reheve oñemoĩ hag̃ua Ñandejára Goviérno guýpe (Juan 10:16; Revelación 11:15). Mbaʼépa ojapo umi tetãnguéra ojeʼévo chupekuéra kóicha? Ha mbaʼéichapa Jehová oipytyvõ isiervokuérape koʼág̃a rupi? Jaikuaa hag̃ua, ñahesaʼỹijomi heʼíva Zacarías kapítulo 12-pe. Péicha jahecháta ndaiporimoʼãiha ipuʼakáva umi yvágape ohótava ha iñirũnguéra rehe.

10. a) Mbaʼérepa umi tetãnguéra opuʼã Jehová siervokuérare? b) Mbaʼépa oiko umi oipeʼasevaʼekuére haperãgui pe “ita pohýi”?

¹⁰ Zacarías 12:3 heʼi umi tetãnguérape ‘oñehungataha’. Mbaʼéicha piko oikóta upéva? Ñandejára ningo heʼi oñemombeʼuvaʼerãha pe marandu porã, ha testigos de Jehová ojapohína upéva. Péro, umi tetãnguérape g̃uarã ningo haʼete peteĩ “ita pohýi” ñamombeʼu jave Ñandejára goviérno añoite oipytyvõtaha yvyporakuérape. Upévare, haʼekuéra ojapo opa mbaʼe oipeʼa hag̃ua haperãgui umi marandu porã omombeʼúvape. Upéicha ojapohaguére ‘oñehunga’ chupekuéra ha opyta vai hikuái. Ha oñemotĩ voi katu osẽ vaígui chupekuéra ojaposéva. Ndaikatúi omokirirĩ hikuái Ñandejára siervokuérape. Koʼãva ningo omombaʼeterei ikatu haguére oñeʼẽ Ñandejára Goviérnore oñehundi mboyve ko múndo (Revelación 14:6). Áfricape peteĩ karseléro ohechávo mbaʼéichapa ojetrata vai Jehová siervokuérape, heʼi: “Ojepersegi rei ningo koʼã héntepe. Testigokuéra ningo ndoguevimoʼãiʼasy chupekuéra. Hetave uvei ohóvo hikuái”.

11. Mbaʼéichapa Ñandejára ojapo heʼivaʼekue Zacarías 12:​4-pe?

¹¹ Eleemína Zacarías 12:4. Koʼápe Jehová heʼívaicha omohesatũ ha ‘omondyitaha’ umi isiervokuérare opuʼãvape. Ha upeichaite ningo haʼe ojapo. Jahechakuaa upéva oikovaʼekuére peteĩ tetã ojeproivihápe predikasión. Upépe, umi ndaijaʼéiva Jehová siervokuérare ndaikatúi ojapo mbaʼeve ani hag̃ua og̃uahẽ chupekuéra umi puvlikasión. Upévare, peteĩ diáriope heʼi umi testigos de Jehová ñemihápe jepe omoingeha ipuvlikasionkuéra upe tetãme. Péicha Ñandejára ojapohína heʼivaʼekue: “Añangarekóta ha amohesatũta tetãnguéra kavaju”. Umi ndaijaʼéiva Ñandejára siervokuérare, ipochyetereígui ndoikuaái mbaʼépa ojapóta. Ñande katu jaikuaa porã Jehová oñangarekotaha isiervokuérare ha oipytyvõtaha chupekuéra (2 Reyes 6:​15-19).

12. a) Mbaʼéicha piko Jesús omyendyrakaʼe tata yvyporakuéra apytépe? b) Mbaʼéichapa umi omoirũva Jesucrístope omyendy avei tata oñeʼẽ rupi Ñandejárare, ha mbaʼépa oiko upévare?

¹² Eleemína Zacarías 12:​5, 6. Upépe ningo oñeʼẽ “Judá ruvichakuéra” rehe. Umíva hína umi omoakãva Ñandejára siervokuérape. Chupekuéra Jehová oipytyvõ mbarete hína ojepytasohaguére Igoviérno ykére ko Yvy ape ári. Peteĩ árape Jesús heʼivaʼekue hemimboʼekuérape: “Che ajuvaʼekue amyendývo tata yvypóra apytépe” (Lucas 12:49). Ha ojapovaʼekue upéva. Opredika kyreʼỹ rupi ohechauka iñimportantetereiha ñañeʼẽ Ñandejára Goviérnore. Upévare oñepyrũvaʼekue opuʼãmba ojuehe umi Judeaygua (Mateo 4:​17, 25; 10:​5-7, 17-20). Koʼág̃a rupi umi omoirũva Jesucrístope omyendy avei tata hapichakuéra apytépe oñeʼẽ rupi Ñandejárare. Haʼete hikuái “tatapỹi rendýicha jepeʼa apytépe ha tataʼy rendýicha trígo apesã apytépe”. Upe 1917-pe peteĩ lívro hérava The Finished Mysterya (El misterio terminado) omombeʼu mbaʼeichaitépa hovamokõi umi rrelihión japu. Upévare umi omoakãva chupekuéra ipochyeterei. Ramoiténte oñeguenohẽkuri pe tratádo Noticias del Reino núm. 37, “Koʼẽrõitéma oñehundíta rrelihión japu!”. Ko tratádo rupive heta tapicha ojepytaso Ñandejára Goviérno ykére térã oñemoĩ ikóntrape.

‘Ojepeʼa jejopýgui Judá rogayguápe’

13. Mbaʼépa ojehechauka ojeʼévo ‘Judá róga kárpa’, ha mbaʼérepa hesekuéra raẽvete Jehová oñangarekóta?

¹³ Eleemína Zacarías 12:​7, 8. Yma ningo Israélpe ojehecháva voínte umi óga kárpa. Oiko pype umi oñangarekóva ovecháre ha umi ombaʼapóva kokuépe. Hesekuéra raẽvete oñeñangarekovaʼerã ou mbaʼéramo Jerusalénpe umi ndaijaʼéiva hesekuéra. Ojeʼévo ‘Judá róga kárpa’ ohechaukahína umi yvágape ohótava ndoikoiha peteĩ táva imurallapávape. Ha jaʼe porãsérõ g̃uarã ñúrente oikohína hikuái. Upépe haʼekuéra odefende kyhyjeʼỹme opa mbaʼe Ñandejára goviérno rehegua. Jehová oñangarekóta ‘Judá rogayguáre’ raẽvete, Satanás ojaposégui hesekuéra mbaʼe vai.

14. Mbaʼéichapa Jehová odefende umi ‘Judá róga kárpape’ oikóvape, ha mbaʼéichapa ndohejái ikangy hikuái?

¹⁴ Heta mbaʼe ojehasavaʼekuére jahechakuaa Jehová odefendeha umi yvágape ogovernátavape. Haʼekuéra ningo haʼetévaicha oikóva ñúre ‘óga kárpapente’.b Ndohejái chupekuéra ‘ikangy’, omombarete ha ombopyʼaguasu uvei chupekuéra rréi David imbarete ha ipyʼaguasuhaguéicha.

15. Mbaʼérepa Jehová ‘ohundise opa tetãnguérape’, ha arakaʼépa ojapóta upéva?

¹⁵ Eleemína koʼág̃a Zacarías 12:9. Mbaʼérepa Jehová ‘ohundise opa tetãnguérape’? Opuʼãségui katuete hikuái Igoviérnore. Oñehundíta chupekuéra ombohasa asy rupi Jehová siervokuérape. Koʼẽrõitéma Satanás rembiguaikuéra opuʼãta Ñandejára siervokuérare ohundi hag̃uáicha chupekuéra. Upéicha oñeg̃uahẽta la Biblia ohenóivape Har–​Magedón (Revelación 16:​13-16). Péro Jehová odefendéta isiervokuérape ha omombaʼeguasúta héra opa tetãnguéra renondépe (Ezequiel 38:​14-18, 22, 23).

16, 17. a) Mbaʼépa ‘Jehová omeʼẽ hembiguaikuérape’? b) Mbaʼépa jahechauka jagueropuʼakáramo umi mbaʼe vai Satanás ojapóva ñanderehe?

¹⁶ Satanás mbaʼevéicharõ ndaikatúi omokangy ñande jerovia. Ñandepyʼaguapýningo jaikuaágui Ñandejára oñangarekoha ñanderehe. Upéva ningo ‘Jehová omeʼẽ hembiguaikuérape’ (Isaías 54:17). Avave ndaikatúi oipeʼa ñandehegui ñandepyʼaguapy ha umi mbaʼe Ñandejára omeʼẽva ñandéve ñamombarete hag̃ua ñande jerovia (Salmo 118:6). Satanás katu osegíta oñemoĩ ñanderehe ha oñehaʼãta ñanembohasa asy. Péro jasegíramo Jehová ykére oĩramo jepe otakýva ñanderehe, ojekuaáta Haʼe ñanepytyvõha ijespíritu rupive (1 Pedro 4:14). Opárupi oñemombeʼuhína pe marandu porã Ñandejára goviérno rehegua. Ha jaikuaa avei oĩha heta mbaʼe oñemopuʼãvahína ñanekóntrape. Upéicharõ jepe Ñandejára ñanemombarete jagueropuʼaka hag̃ua opa mbaʼe vai (Zacarías 9:15). Ndaipóriningo omokirirĩvaʼerã umi ohótavape yvágape ha iñirũnguérape avei!

¹⁷ Hiʼãitereímaningo ñandéve og̃uahẽ pe ára jajeietetaha Satanás poguýgui. Upe mboyve katu, ñanembopyʼaguapy Jehová heʼíva: “Ndaipóri gueteri oikuaáva mbaʼépepa ikatúta nerundi. Rembotýta nembojovakeséva juru”.

[Nóta]

Mbaʼéichapa ñambohováita?

• Mbaʼéichapa ojekuaa umi mbaʼe vai Satanás ojapóva ndaipuʼakaiha ñanderehe?

• Mbaʼéichapa oiko peteĩ “ita pohýi” umi yvágape ohótavagui?

• Mbaʼéichapa Jehová oñangareko ‘Judá róga kárpa’ rehe?

• Mbaʼépa jaikuaa Ñandejára ojapotaha ñanderehehápe hiʼag̃uívo Armagedón?