Ñamboʼe ótrope ojapo hag̃ua umi mbaʼe Cristo omanda vaʼekue

 1. Heʼiháicha Mateo 28:18-20, ¿mbaʼépa Jesús omanda vaʼekue idisipulokuérape ojapo hag̃ua?

JESÚSPE oñemoingove jey rire umi omanóva apytégui, ojaparese idisipulokuéra oñembyatývape hína Galiléape. Haʼe oreko kuri peteĩ mbaʼe iñimportantetereíva heʼi vaʼerã chupekuéra. ¿Mbaʼépa rakaʼe upéva? Umi mbaʼe haʼe heʼi vaʼekue jatopa Mateo 28:18-20-pe (elee).

 2. ¿Mbaʼe porandúpa ñambohováita?

² Jesús mandamiénto ojejapo hag̃ua disípulo ñakumpli vaʼerã avei káda uno Ñandejára siervokuéra koʼag̃agua. Ñambohovaimína upévare mbohapy mbaʼe ikatúva ñañeporandu ko asignasión Jesús omeʼẽ vaʼekuére ñandéve. Primero, umi disípulo pyahúpe ningo ñamboʼe vaʼerã mbaʼépa Ñandejára ohaʼarõ chuguikuéra, ¿péro mbaʼépa avei jajapo vaʼerã? Segundo, ¿mbaʼéichapa enterove puvlikadór oĩva kongregasiónpe ikatu oipytyvõ umi estudiántepe oprogresa hag̃ua? Tercero, ¿mbaʼéichapa ikatu ñaipytyvõ umi ñane ermanokuéra inaktívope ojapo jey hag̃ua disípulo?

 3. ¿Mbaʼe iñimportántevapa Jesús omanda vaʼekue jajapo hag̃ua?

³ Jesús omyesakã porãiterei vaʼekue mbaʼépa oipota jajapo: Ñamboʼe umi héntepe umi mbaʼe haʼe omanda vaʼekue. Péro nañanderesaráiri vaʼerã peteĩ mbaʼe iñimportantetereívagui. Jesús ndeʼíri vaʼekue: ‘Pemboʼe chupekuéra entéro mbaʼe amanda vaʼekue peẽme’. Upéva rangue, haʼe heʼi: “Pemboʼe chupekuéra ojapo hag̃ua entéro mbaʼe amanda vaʼekue peẽme”. Ikatu hag̃uáicha ñakumpli ko mbaʼe Jesús heʼi vaʼekue, tekotevẽ ñamboʼe ñane estudiántepe mbaʼépa ojapo vaʼerã, ha avei jahechauka chupe mbaʼéichapa ojapo vaʼerã upéva. ¿Mbaʼérepa tekotevẽ jajapo upéicha?

 4. ¿Mbaʼe ehémplopa ohechauka mbaʼéichapa ikatu ñamboʼe peteĩ persónape ojapo hag̃ua peteĩ mbaʼe oaprende vaʼekue?

⁴ Ñantende porãve hag̃ua mbaʼéichapa ikatu ñamboʼe peteĩ persónape ojapo hag̃ua umi mbaʼe Jesús omanda vaʼekue, ñapensami ko ehémplore. Oiméramo peteĩ persóna omboʼe hína ótrope omanehakuaa hag̃ua áuto, ¿mbaʼéichapa ikatu oipytyvõ chupe okumpli hag̃ua umi léi de tránsito? Primero omboʼe vaʼerã chupe umi léi de tránsito tekotevẽtava okumpli omaneha jave. Péro omboʼe hag̃ua chupe mbaʼéichapa okumpli vaʼerã umi léi, ¿mbaʼépa ojapo vaʼerã avei? Oho vaʼerã iñestudiántendi pe áutope ha ohechauka chupe mbaʼéichapa ikatu ojapo umi mbaʼe oaprende vaʼekue. ¿Mbaʼépa ñanemboʼe ko ehémplo?

 5. a) Ohechaukaháicha Juan 14:15 ha 1 Juan 2:3, ¿mbaʼépa ñamboʼe vaʼerã ñane estudiántepe ojapo hag̃ua? b) ¿Mbaʼéichapa ikatu ñaipytyvõ ñane estudiántepe omoĩ hag̃ua en práktika la Biblia heʼíva?

⁵ Jastudia jave la Biblia ótrondi, ñande ñamboʼe chupekuéra mbaʼépa Ñandejára ohaʼarõ jajapo. Péro ndahaʼéi upévante la jajapo vaʼerã. Ñamboʼe vaʼerã avei ñane estudiántepe omoĩ hag̃ua en práktika umi mbaʼe oaprendéva (elee Juan 14:15; 1 Juan 2:3). Ñane ehémplo rupive, ikatu jahechauka ñane estudiántepe mbaʼéichapa haʼekuéra ikatu ojapo umi mbaʼe oaprendéva la Bíbliagui tahaʼe ijeskuélape, itravahohápe térã ojediverti jave. Ñande ikatu ñamombeʼu chupe mbaʼéichapa umi konsého oĩva la Bíbliape ñandeprotehéma umi pelígrogui, térã mbaʼéichapa ñanepytyvõma raʼe jadesidi porã hag̃ua. Ñañemboʼe jave ñane estudiántendi ikatu jajerure Jehovápe ijespíritu sánto ogiami hag̃ua chupe (Juan 16:13).

 6. ¿Mbaʼépa avei tekotevẽ jajapo ñamboʼe jave ótrope ojapo hag̃ua umi mbaʼe Jesús omanda vaʼekue?

⁶ ¿Mbaʼépa avei tekotevẽ jajapo ñamboʼe jave ótrope ojapo hag̃ua umi mbaʼe Jesús omanda vaʼekue? Ñaipytyvõ vaʼerã ñane estudiántepe ojapose hag̃ua disípulo. Ikatu oĩ umi estudiánte okyhyjéva opredika hag̃ua, upévare tekotevẽ ñanepasiénsia ñaipytyvõ aja chupekuéra ontende porãve hag̃ua pe añetegua oĩva la Bíbliape, ha péicha imbareteve hag̃ua ijerovia. Upéva og̃uahẽta ikorasõme ha omomýita chupekuéra opredika hag̃ua. ¿Mbaʼépa ikatu jajapo ñaipytyvõ hag̃ua ñane estudiántepe opredikase hag̃ua umi notísia porã?

 7. ¿Mbaʼéichapa ikatu ñaipytyvõ ñane estudiántepe opredikase hag̃ua umi notísia porã?

⁷ Ikatu ñaporandu ñane estudiántepe koʼã mbaʼe: “¿Mbaʼéichapa omehoráma nde rekove rejapo rupi la Biblia heʼíva? ¿Ndépa epensa umi ótro tekotevẽha avei ohendu ko mensáhe? ¿Mbaʼépa ikatu ejapo eipytyvõ hag̃ua chupekuéra?” (Prov. 3:27; Mat. 9:37, 38). Jahechauka ñane estudiántepe umi tratádo oĩva ñande Kit de Enseñánzape, ha jaʼe chupe toiporavo umi haʼe opensáva oleesetaha umi ipariénte, iñamígo térã ikompañéro de traváho. Ñameʼẽ ñane estudiántepe unos kuánto umi tratádo, ha ñañensaja mbaʼéichapa haʼe torýpe ikatu ontrega koʼã tratádo. Ha ág̃a oiko rire chugui puvlikadór no vautisádo, ñande ñaĩséta ijykére japredika hag̃ua hendive ha ñaipytyvõ hag̃ua chupe (Ecl. 4:9, 10; Luc. 6:40).

 8. ¿Mbaʼérepa iñimportánte ñane estudiánte ohayhu Ñandejárape ha hapichakuérape ipyʼaite guive? (Ehecha avei pe rrekuádro “¿Mbaʼépa jajapo vaʼerã ñane estudiánte ohayhuve hag̃ua Ñandejárape?”).

⁸ Jesús heʼi vaʼekue ñandéve ñamboʼe vaʼerãha ótrope ojapo hag̃ua entéro mbaʼe haʼe omanda vaʼekue. Umíva apytépe oĩ hína umi mokõi mandamiénto iñimportantevéva: Jahayhu vaʼerãha Ñandejárape ha ñande rapichakuérape (Mat. 22:37-39). Ñande ningo jahayhúmante vaʼerã Ñandejárape ha la héntepe ikatu hag̃uáicha japredika. Jaikuaa ningo oĩha umi estudiánte okyhyjéva opensávo osẽ vaʼerãha opredika. Péro ikatu jaasegura ñane estudiántepe, Jehová oipytyvõ rupi chupe mbeguekatúpe saʼivéma okyhyjetaha yvyporakuéragui (Sal. 18:1-3; Prov. 29:25). Pe rrekuádro oĩva ko artíkulope ohechauka mbaʼe mbaʼépa ikatu jajapo ñaipytyvõ hag̃ua ñane estudiántepe ohayhuve hag̃ua ohóvo Ñandejárape. ¿Péro mbaʼépa pe kongregasión ikatu ojapo oipytyvõ hag̃ua umi estudiántepe ohayhuve hag̃ua Jehovápe ha hapichakuérape?

 9. Pe ehémplo jahecha vaʼekuépe, ¿mbaʼéichapa pe persóna omaneha ramóva ikatu oaprende heta mbaʼe iñimportánteva?

⁹ Ñapensami jeýna pe persóna oaprendévare hína omanehakuaa hag̃ua. ¿Mbaʼéichapa haʼe ikatu oaprende omaneha hag̃ua iñinstruktór oho aja ijykére? Ohendúvo umi mbaʼe heʼíva chupe ha omañávo umi ótro omanehakuaávare. Por ehémplo, pe instruktór ikatu ohechauka chupe mbaʼéichapa peteĩ konduktór iñamávleva omeʼẽ páso ótrope ha oheja oñadelanta hese. Térã ikatu ohechauka chupe mbaʼéichapa peteĩ konduktór omoĩ iseñaléro ha omokyreʼỹ iñestudiántepe ojapo hag̃ua avei upéicha. Koʼã ehémplo rupive, pe estudiánte oaprendéta heta mbaʼe iñimportánteva ikatúva ojapo omaneha aja.

10. ¿Mbaʼépa oipytyvõta pe estudiántepe oprogresa hag̃ua?

¹⁰ Upéicha avei, pe estudiánte oñepyrũva oservi Jehovápe oaprende iñinstruktórgui, péro avei umi ehémplo porã omoĩvagui umi ótro ermáno. Upévare iñimportanteterei umi estudiánte oho rreunionhápe oprogresa hag̃ua. ¿Mbaʼérepa? Pórke umi mbaʼe ohendúva rreunionhápe oipytyvõta chupekuéra oaprende hag̃ua hetave mbaʼe, omombaretéta ijerovia ha oipytyvõta chupekuéra ohayhuve hag̃ua Ñandejárape (Hech. 15:30-32). Avei umi rreunionhápe, pe instruktór ikatu opresenta chupe umi ermáno ha ermána ohasáva avei umi mbaʼe ijetuʼúva pe estudiánte ohasáva. ¿Mbaʼéichapa umi ermáno ha ermanakuéra ehémplo ikatu oipytyvõ pe estudiántepe? Jahechamína.

11. ¿Mbaʼeichagua ehémplopa pe estudiánte ikatu ohecha kongregasiónpe, ha mbaʼéichapa upéva ikatu oipytyvõ chupe?

¹¹ Ñapensamína koʼã situasiónre. Peteĩ estudiánte haʼéva mádre soltéra ohecha peteĩ ermána oĩvape la mísma situasiónpe, ha omombaʼeterei mbaʼéichapa pe ermána oñehaʼãmbaite oho rreunionhápe imembykuéra mimi reheve. Peteĩ estudiánte oñehaʼãmbaitéva hína opoi pe sigarríllogui, oikuaa peteĩ ermáno oheja vaʼekuépe upe vísio. Pe ermáno heʼi pe estudiántepe haʼe iñeʼẽrendu hague Ñandejára mandamientokuérape ohayhu rupi Jehovápe ipyʼaite guive (2 Cor. 7:1; Filip. 4:13). Pe ermáno omombeʼu rire chupe umi mbaʼe ohasa vaʼekue, omokyreʼỹ pe estudiántepe oasegurávo chupe: “Nde ikatu avei epoi la sigarríllogui”. Peteĩ mitãkuña ostudiáva hína la Biblia, ohecha peteĩ ermána imitãva ovyʼaitereiha oservívo Jehovápe. Ohechávo upéva, pe estudiánte oikuaase mbaʼérepa pe ermána siémpre ovyʼa.

12. ¿Mbaʼérepa ikatu jaʼe káda uno ñaiméva guive kongregasiónpe ikatuha ñaipytyvõ umi estudiántepe?

¹² Pe estudiánte oikuaavévo ohóvo hetave ermáno ifiélvape, iñehemplokuéragui oaprendéta ohayhu hag̃ua Ñandejárape ha hapichakuérape Cristo omanda haguéicha (Juan 13:35; 1 Tim. 4:12). Ha jaʼéma haguéicha, peteĩ estudiánte ikatu oaprende umi ermáno ombohováivagui umi situasión haʼe ohasáva hína. Umi ehémplo rupive, pe estudiánte ohechakuaáta haʼe ikatuha avei ojapo umi kámbio tekotevẽva oiko hag̃ua chugui Cristo disípulo (Deut. 30:11). Káda uno ñaiméva kongregasiónpe ñaipytyvõkuaa heta hendáicha umi estudiántepe oprogresa hag̃ua (Mat. 5:16). ¿Mbaʼe mbaʼépa nde rejapo hína remokyreʼỹ hag̃ua umi estudiánte oúvape rreunionhápe?

13, 14. ¿Mbaʼéichapa Jesús otrata vaʼekue ijapostolkuérape ikangýrõ guare hikuái?

¹³ Ñande ningo ñaipytyvõse ñane ermáno ha ermanakuéra inaktívope opredika ha ojapo jey hag̃ua disípulo Cristo omanda haguéicha. Jaikuaa hag̃ua mbaʼéichapa ikatu jajapo upéva, ikatu jahecha Jesús ojapo vaʼekue oipytyvõ hag̃ua ijapostolkuérape ikangýrõ guare hikuái.

¹⁴ Jesús omano mboyvemi, umi apóstol “oheja chupe ha odiparapa” (Mar. 14:50; Juan 16:32). ¿Mbaʼéichapa Jesús otrata vaʼekue ijapostolkuérape ikangýrõ guare hikuái? Orresusita riremi, Jesús heʼi unos kuánto isegidorkuérape: “¡Ani pekyhyje! Tapeho pemombeʼu che ermanokuérape [aikove jeýma hague]” (Mat. 28:10a). Jesús nopensái vaʼekue ijapostolkuéra naipohãveimaha. Haʼekuéra oheja reíramo jepe chupe, Jesús lomímonte ohenói chupekuéra ‘che ermanokuéra’. Jesús osegi vaʼekue Jehová ehémplo oiporiahuverekóvo ha operdonávo chupekuéra (2 Rey. 13:23).

15. ¿Mbaʼépa ñañandu umi ñane ermáno opyta vaʼekuére inaktívo?

¹⁵ Upéicha avei, ñande jajepyʼapyeterei umi ñane ermáno opyta vaʼekuére inaktívo. Haʼekuéra ningo haʼe gueteri ñane ermáno ha ermanakuéra, ha ñande jahayhueterei chupekuéra. Ñanemanduʼa gueteri mbaʼéichapa ombaʼapo jejopy vaʼekue Jehovápe g̃uarã, ha ikatu voi ojapo raʼe upéva hetaiterei áñore, péro koʼág̃a opyta hikuái inaktívo (Heb. 6:10). ¡Ñande ningo añetehápe jahechagaʼueterei chupekuéra! (Luc. 15:4-7). ¿Mbaʼe mbaʼépa ikatu jajapo jahechauka hag̃ua jajepyʼapyha hesekuéra?

16. ¿Mbaʼéichapa ikatu jahechauka jajepyʼapyha ñane ermáno ha ermanakuéra inaktívore?

¹⁶ Torýpe ñainvita chupekuéra rreunionhápe. Omokyreʼỹ hag̃ua ijapostolkuéra ikangývape, Jesús oinvita vaʼekue chupekuéra peteĩ rreunionrã (Mat. 28:10b; 1 Cor. 15:6). Upéicha avei koʼág̃arupi, oiméramo umi inaktívo ndohói gueteri rreunionhápe, ñande ikatu ñainvita chupekuéra oho hag̃ua. Jaikuaa sapyʼánte tekotevẽtaha ñainvita chupekuéra heta vése oho hag̃ua. Jesús ningo ovyʼaiterei vaʼekue idisipulokuéra oaseptárõ guare iñinvitasión, ha ñande upeichaite avei javyʼáta ág̃a ou vove umi inaktívo (ekompara Mateo 28:16 ha Lucas 15:6 heʼívare).

17. ¿Mbaʼépa jajapo vaʼerã peteĩ inaktívo ohóramo rreunionhápe?

¹⁷ Mborayhúpe jarresivi chupekuéra. Jesús omoñeñandu porã vaʼekue idisipulokuérape ojotopárõ guare hikuái hendive. Haʼe voi oñemotenonde vaʼekue oñeʼẽ hag̃ua chupekuéra (Mat. 28:18). ¿Mbaʼépa ñande jajapóta peteĩ inaktívo og̃uahẽramo Salónpe? Ñande voi ñañemboja vaʼerã hendápe ha mborayhúpe jarresivi chupe. Primerorã ikatu hína jajepyʼapy ndajaikuaáigui mbaʼépa jaʼéta. Péro ñamoñeñandu vaiʼỹre chupe, ikatúnte jaʼe: “¡Avyʼaite piko rohecha haguére!”.

18. ¿Mbaʼéichapa ikatu ñamokyreʼỹ umi inaktívope?

¹⁸ Ñamokyreʼỹ chupekuéra. Jesús disipulokuéra opensáne raʼe ndaikatumoʼãiha opredika ko múndo tuichakuére. Upévare Jesús omokyreʼỹ vaʼekue chupekuéra heʼívo: “Che aĩta penendive káda día” (Mat. 28:20). ¿Oipytyvõpa raʼe upéva idisipulokuérape? Si, pórke upe riremínte oikóma “omboʼe ha oikuaauka hikuái umi notísia porã” (Hech. 5:42). Umi inaktívo ningo oikotevẽ avei ñamokyreʼỹ chupekuéra. Haʼekuéra ikatu hína okyhyje oñepyrũ jey hag̃ua opredika. Ñande ñamokyreʼỹkuaa chupekuéra, jaʼévo ndopredikamoʼãiha hikuái haʼeño. Ha ág̃a ikatu jey vove osẽ opredika, ñamoirũkuaa chupekuéra predikasiónpe. Haʼekuéra katuete oagradesetereíta ñaipytyvõ haguére chupekuéra opredika jey hag̃ua umi notísia porã. Ñande jahechaukáramo umi inaktívope jahechaha chupekuéra ñane ermáno ha ermánaicha, haʼekuéra ikatúta oñerreuni ha opredika meme jey, ha upéva ombovyʼaitereíta enterovépe kongregasiónpe.

19. ¿Mbaʼépa ñande jajapose ñande pyʼaite guive, ha mbaʼérepa?

¹⁹ ¿Arakaʼe pevépa jasegi vaʼerã japredika ha jajapo disípulo? “Og̃uahẽ meve pe fin” (Mat. 28:20; ehecha Diksionário, “Umi ára paha, pe fin og̃uahẽ mbotaitévo”). ¿Ikatútapa japredika ha jajapo disípulo upe tiémpo peve? ¡Si, ñande jajedesidíma jajapotaha upéva! Ñande vyʼápe jaipuru ñane tiémpo, ñane mbaretekue ha ñande pláta jatopa hag̃ua ‘umi ipyʼaporãvape ohupyty hag̃ua jeikove opaveʼỹva’ (Hech. 13:48). Jajapo jave upéva, jasegi hína Jesús ehémplo. Haʼe heʼi vaʼekue: “Che rembiʼu hína kóva: ajapo upe chembou vaʼekue volunta, ha atermina pe traváho haʼe omeʼẽ vaʼekue chéve” (Juan 4:34; 17:4). Ha ñande ningo ñande pyʼaite guive jajapose avei upéva. Ñaterminase pe traváho Jesús onkarga vaʼekue ñandéve (Juan 20:21). Ha jaipota voi umi ótro osegi ojapo ñanendive ko traváho, umíva apytépe umi inaktívo (Mat. 24:13).

20. Ohechaukaháicha Filipenses 4:13, ¿mbaʼérepa ikatu ñaime segúro ikatuha ñakumpli pe traváho Jesús onkarga vaʼekue ñandéve?

²⁰ Ñande ningo jaikuaa tuichaitereiha pe traváho Jesús onkarga vaʼekue ñandéve. Péro ñande nañaiméi ñaneaño. Jesús opromete vaʼekue oĩtaha ñanendive. Ñande jajapo jave disípulo, oiko hína ñandehegui “Ñandejára ajudánte”, ha “ñamoirũ Crístope” (1 Cor. 3:9; 2 Cor. 2:17). Upévare ñaime segúro ikatuha jajapopa ko traváho. ¡Ajépa javyʼaite ha tuichaite priviléhio ñandéve g̃uarã ikatu haguére jajapo ko traváho, ha ñaipytyvõ ótrope ojapo hag̃ua avei upéicha! (Elee Filipenses 4:13).