Jasegíkena ñaneñeʼẽrendu Jesúspe

1, 2. a) ¿Mbaʼépa omanda vaʼekue Ñandejára mbohapy Jesús apóstolpe, ha mbaʼépa ojapo hikuái? b) ¿Mbaʼépa jahecháta ko artíkulope?

OPA rire pe Páskua áño 32-pe, umi apóstol Pedro, Santiago ha Juan oreko vaʼekue peteĩ visión ijojahaʼỹva. Posívlemente haʼekuéra oĩ kuri pe Sérro Hermónpe, ha upépe ohecha mbaʼéichapa Jesús oñekambiapaite la ipínta. La Biblia heʼi: “Pe hova kuarahýicha omimbi ha ijao avei omimbipa” (Mat. 17:1-4). Opa mboyvemi upéva upe visión, umi apóstol ohendu Ñandejára voi oñeʼẽha chupekuéra pe yvágagui, ha heʼi: “Kóva hína che Raʼy ahayhuetéva ha aguerohorýva, pehendúke chupe” (Mat. 17:5). Ñande ningo jasegiseterei koʼã mbohapy apóstol ehémplo, pórke haʼekuéra siémpre ohechauka vaʼekue iñeʼẽrenduha Jesúspe.

² Pe ótro artíkulope jahecháma kuri Jesús omanda hague ñandéve ndajajapói vaʼerãha mokõi mbaʼe. Ko artíkulope katu jahecháta mokõi mbaʼe Jesús omanda vaʼekue ñandéve jajapo vaʼerãha.

 3. ¿Mbaʼépa heʼi Mateo 7:13, 14 jajapo vaʼerãha?

³ (Elee Mateo 7:13, 14). Ko téxtope Jesús oñeʼẽ mokõi okẽ rehe. Peteĩva ñandegueraha peteĩ tape ipévare, ha pe ótro katu peteĩ tape ipoʼívare. Ko téxtope Jesús ndeʼíri oĩha mbohapy tape, síno mokõinte. Ha káda uno jadesidi vaʼerã mbaʼe tapérupipa jaháta. Upéva ningo iñimportanteterei, pórke ñande rekove odepende hína la jadesidívare.

 4. ¿Mbaʼépa ikatu jaʼe pe tape tuichávare?

⁴ Iñimportanteterei jahechakuaa mbaʼépepa idiferénte koʼã mokõi tape. Ifasileterei ningo jaguata hag̃ua pe tape tuichávare, ha ñambyasýramo jepe oĩ heta hénte ohóva upérupi. Haʼekuéra ndohechakuaái Satanás oipotaitereiha jaha upe tapére, pórke jajapóramo upéva ñañehundíta (1 Cor. 6:9, 10; 1 Juan 5:19).

 5. ¿Mbaʼe mbaʼépa ojapo heta hénte otopa hag̃ua pe tape ipoʼíva ha oho hag̃ua upérupi?

⁵ Pe ótro tape Jesús oñeʼẽ hague katu ndatuichaiete voi. Upéva rangue, haʼe heʼi voi kuri ipoʼiha ha saʼieterei oĩha umi ohóva upe tapérupi. ¿Mbaʼérepa upéva? Pe sigiénte versíkulope Jesús heʼi kuri idisipulokuérape oĩha hetaiterei proféta japu (Mat. 7:15). Ha koʼág̃arupi upeichaite avei, pórke oĩ hetaiterei rrelihión. La majoría umíva apytépe ningo heʼi orekoha la verda, péro añetehápe okonfundipa rei la héntepe pórke nomboʼéi pe añetegua. Ha hetaiterei hénte ohechávo koʼã mbaʼe oñedesanimáma, ha upéicha rupi ni noñehaʼãvéima oheka pe tape ñandegueraháva jeikovépe. ¿Péro serápa imposívle jatopa upe tape? No, ikatu hína jajapo upéva. Jesús heʼi vaʼekue voi: “Peẽ pesegíramo pejapo che haʼéva, peẽ añetehápe che disípulo hína. Peẽ peikuaáta pe añetegua ha upéva omeʼẽta peẽme liverta” (Juan 8:31, 32). Nde ningo reñehaʼãmbaite reikuaa hag̃ua la verda ha nderejesegíri la hénte heʼívarente, upévare emerese ejefelisita. Katuete oiméne hetaitereíma restudia Ñandejára Ñeʼẽ ha eaprendéma heta mbaʼe chugui. Ha katuete avei rejapo umi mbaʼe Jesús omboʼe vaʼekue. Por ehémplo Jehová oipota ñamboykete umi enseñánsa omboʼéva umi rrelihión japu ha ndoipotái japartisipa umi fiésta oúvape koʼã rrelihióngui. Oiméne rehechakuaa ndahaʼeiha la ifasilpáva jajapo hag̃ua entéro koʼã mbaʼe Jehová ojeruréva ñandéve (Mat. 10:34-36). Péro nde eñehaʼãmbaite hína embovyʼa hag̃ua Ñandejárape, ha katuete haʼe ovyʼaiterei avei ndereheve (Prov. 27:11).

 6. Ohechaukaháicha Salmo 119:9, 10, 45, 133, ¿mbaʼépa ñanepytyvõta ani hag̃ua ñasẽ pe tape poʼígui?

⁶ Ñande ningo jaháma hína pe tape ipoʼívare. ¿Péro mbaʼépa ñanepytyvõta jasegi hag̃ua jaguata upérupi? Ñapensamína peteĩ ehémplore. Umi tape ojupíva umi montáñare oreko jepi peteĩ varréra de proteksión pe tape oríllare, ani hag̃ua umi oviaháva upérupi hoʼa mbaʼe pe varránkape. ¡Ha ndaiporichéne ojeplageáva oñemoĩ haguére koʼãichagua varréra de proteksión! Upeichaite avei umi mbaʼe Jehová ñanemboʼéva la Biblia rupive, pórke umíva ñandeprotehe ha ñanepytyvõ ani hag̃ua ñasẽ pe tape poʼígui (elee Salmo 119:9, 10, 45, 133).

 7. ¿Mbaʼépa opensa vaʼerã umi imitãva pe tape ipoʼívare?

⁷ Mitãrusu ha mitãkuñanguéra, ¿pepensápa sapyʼánte Jehová iñexihentetereimaha penendive? Añetehápe ningo Satanás haʼe hína la oipotáva pepensa upéicha. Haʼe oipota peñekonsentra la ojapóvare umi ohóva pe tape tuichávare ojediverti hag̃ua, ikatu hag̃uáicha pepensa haʼekuéra siémpre ovyʼaha. Haʼe oipota pepensa peservíramo Jehovápe ndaikatumoʼãiha voi pejediverti, ha upearã ikatu hína oipuru umi mbaʼe ojapóva pene kompañerokuéra térã umi mbaʼe pehecháva Internétpe. Satanás oipota pepensa umi ojapóva guive Jehová heʼíva núnka ndojedivertiriha.b Péro penemanduʼákena Satanás ndoipotaiha peikuaa mbaʼépa la oĩva opakuévo pe tape tuicháva, péva ningo añetehápe oporogueraha hína ñehundípe. Jehová katu idiferentete, pórke haʼe omombeʼu porã peẽme mbaʼépa penderupytýta peneñeʼẽrendúramo chupe. Haʼe ningo oipota iporãvante peẽme g̃uarã, ha pejapóramo la haʼe heʼíva penevendesíta katuete (Sal. 37:29; Is. 35:5, 6; 65:21-23).

 8. ¿Mbaʼépa umi imitãva ikatu oaprende Osvaldo ehémplogui?

⁸ Ehechamína avei mbaʼépa ikatu eaprende peteĩ mitãkariaʼy héravagui Osvaldo.c Ikompañerokuéra ningo omboligámi vaʼekue chupe hekovai hag̃ua. Haʼe oexplika haʼeha testígo de Jehová ha upévare oñehaʼãmbaiteha hekopotĩ la Biblia heʼiháicha. Upévare a propósito voi unos kuánto ikompañéra oñenkapricha hese ha oiko voi ijapére oreko hag̃ua hendivekuéra rrelasión sexuál. Péro Osvaldo nopenái hesekuéra ha osegi hekopotĩ. Péro upéi oñepresenta avei chupe ótro provlemahaite. Osvaldo omombeʼu ñandéve mbaʼépa la oiko vaʼekue hese: “Che profesorkuéra manterei heʼi chéve aha vaʼerãha universidápe, pórke upéicharõ ikatúta chefamóso ha aiko porã. Ha heʼi chéve ndajapóiramo upéva núnka ndahupytymoʼãiha mbaʼeve che rekovépe”. ¿Mbaʼépa la oipytyvõ vaʼekue Osváldope oaguanta hag̃ua koʼã mbaʼe? Haʼe voi omombeʼu ñandéve: “Añehaʼã vaʼekue añemoamígo umi ermáno oĩvare che kongregasiónpe, ha upéva tuichaiterei chepytyvõ pórke haʼekuéra haʼete voi che hénte teete. Ha ajapove avei ótra kósa: Añemoĩ astudia porãve la Biblia. Ha amáske astudia porãve, aime segúro kóva haʼeha la rrelihión verdadéra. Upéicha rupi ajedesidi che pyʼaite guive ndahejamoʼãiha Jehovápe”.

 9. ¿Mbaʼépa ojapo vaʼerã umi osegiséva pe tape ipoʼívare?

⁹ Satanás ningo oipotánte nde resẽ pe tape ipoʼívagui, ha oipota reho la majoría umi hénte ohóvandi pe tape tuicháva oporoguerahávare ñehundípe (Mat. 7:13). ¡Péro ñande nañameʼẽmoʼãi chupe gústo, ha jasegíta pe tape ipoʼívarupi! ¿Mbaʼéichapa jajapóta upéva? Upearã tekotevẽ ñahendu Jesúspe ha ñantende péva pe tape haʼeha peteĩ proteksión ñandéve g̃uarã. Ñaanalisamína koʼág̃a ótra kósa Jesús omanda vaʼekue ñandéve jajapo vaʼerãha.

10. Ohechaukaháicha Mateo 5:23, 24, ¿mbaʼépa heʼi kuri Jesús jajapo vaʼerãha?

¹⁰ (Elee Mateo 5:23, 24). Koʼápe Jesús oñeʼẽ peteĩ mbaʼe iñimportantetereíva ojapo vaʼekuére umi judío oadora hag̃ua Jehovápe. Eñeimahinamína peteĩ judío oguerahaha hína iñofrénda ojapo hag̃ua sakrifísio pe témplope, péro omeʼẽta javete pe saserdótepe imanduʼa iñermáno ipochy hague hese. Upémarõ oheja iñofrénda upépe ha oho pe témplogui. ¿Mbaʼépa raʼe la iñimportantevétava pe judíope g̃uarã pe ofrénda ojapótavagui, ajeve la ohejánte upépe ha oho? Jesús omeʼẽ la rrespuésta heʼírõ guare: “Tereho eiko porã raẽ ne ermánondi”.

11. ¿Mbaʼe mbaʼépa ojapo Jacob oiko porã jey hag̃ua Esaúndi?

¹¹ Jahecháma upéicharõ iñimportanteha jaiko porã ñane ermanokuérandi, ha ñantende porãve hag̃ua upéva ñaanalisamína la oiko vaʼekue Jacob rehe. Haʼe ningo oho vaʼekue oiko mombyry hógagui amo 20 áñorupi, ha upéi katu Ñandejára omanda chupe oho jey hag̃ua ivállepe (Gén. 31:11, 13, 38). Péro oĩ kuri peteĩ provléma pórke iñermáno majór hérava Esaú ojukase kuri chupe (Gén. 27:41). Jacob ningo okyhyjeterei kuri la iñermánogui ha oipyʼapy chupe oiméramo g̃uarã osegi gueteri ipyʼaro hese (Gén. 32:7). Upémarõ, ¿mbaʼépa ojapo Jacob oiko porã jey hag̃ua iñermánondi? Primeroite voi haʼe oñemboʼe Jehovápe ipyʼaite guive, ha upéi katu oguerahaka peteĩ rregálo iporãitereíva iñermáno Esaúpe (Gén. 32:9-15). Ha amo ipahápe, haʼe ojotopárõ guare iñermánondi ohechauka orrespetaitereiha chupe. La Biblia heʼi voi haʼe oñakãityete hague Esaú renondépe, ha ndahaʼéi una térã 2 vésente, síno 7 vése voi. Péicha haʼe ohechauka iñumildeha ha orrespetaha iñermánope, ha ojapo rupi entéro koʼã mbaʼe Jacob ikatu kuri oiko porã jey hendive (Gén. 33:3, 4).

12. ¿Mbaʼépa ñaaprende Jacob ehémplogui?

¹² ¿Mbaʼépa ñaaprende la ojapo vaʼekuégui Jacob ojotopa hag̃ua iñermáno Esaúndi? Primero ningo haʼe iñumílde ha ojerure voi Jehovápe toipytyvõ chupe. Upéi katu oprepara tekotevẽva guive ojotopa mboyve iñermánondi ikatu hag̃uáicha orresivi porã chupe. Ha ojotopárõ guare hikuái ndahaʼéi ku Jacob oñepyrũva ojodiskuti mbaʼe Esaúndi oikuaa hag̃ua mávapa oreko raʼe la kúlpa. Upéva rangue, Jacob oñehaʼãmbaite kuri oñemoĩ porã jey hag̃ua iñermánondi. ¿Mbaʼéichapa ñande ikatu jasegi iñehémplo?

13, 14. ¿Mbaʼépa jajapo vaʼerã oiméramo ñamoñeñandu vai raʼe peteĩ ermánope?

¹³ Ñande jaháva hína pe tape ipoʼívare ñañehaʼãmbaite jajogueraha porã hag̃ua ñane ermanokuérandi (Rom. 12:18). Upévare, ¿mbaʼépa ikatu jajapo ñañemeʼẽramo enkuénta ñamoñeñandu vai hague peteĩ ermánope? Jasegi vaʼerã Jacob ehémplo ha jajerure Jehovápe tañanepytyvõ. Por ehémplo, ikatu jajerure chupe ovendesi hag̃ua umi mbaʼe jajapóva jaiko porã jey hag̃ua ñane ermánondi.

¹⁴ Iporãta ningo japytaʼimíramo ha ñapensa mbaʼetekópa ñaime hína ñande. Por ehémplo ikatu ñañeporandu koʼã mbaʼe: “¿Ijetuʼúpa chéve arrekonose hag̃ua ajavy hague ha ajediskulpa ikatu hag̃uáicha roiko porã jey? ¿Mbaʼéichapa oñeñandúta Jehová ha Jesús, che voi púntape añehaʼãramo añemoĩ porã jey che ermánondi?”. Asegún mbaʼéichapa ñarresponde koʼã pregúnta ikatu hína jahechakuaa tekotevẽha jajapo la Jesús heʼi vaʼekue ha ñaneumílde. Upéva ñanepytyvõta ikatu hag̃uáicha jajogueraha porã jey ñane ermanokuérandi, ha jajapóramo upéva jasegíta hína Jacob ehémplo.

15. ¿Mbaʼéichapa ñanepytyvõ la heʼíva Efesios 4:2, 3 ñañemoĩ porã jey hag̃ua ñane ermanokuérandi?

¹⁵ Eñeimahinamína mbaʼépa oiko vaʼerãmoʼã Jacob ijorgullósorire ha otrata vai mbaʼe Esaúpe. ¡Tuichaiterei ningo oiko vaimoʼã kuri hikuái! ¿Mbaʼépa ñaaprende upévagui? Ñañehaʼãramo ñañemoĩ porã jey peteĩ ermánondi, iñimportanteterei ñaneumílde (elee Efesios 4:2, 3). Proverbios 18:19 heʼi voi: “Ifasilve rejagarra peteĩ siuda imurallapáva ke la reñemoĩ porã jey peteĩ ne amígo ipochy vaʼekuéndi. Umi diskusión ikatu omomombyry umi héntepe ojuehegui, peteĩ okẽ itránka mbaretéva ojapoháicha”. ¿Mbaʼépa ñaaprende ko téxtogui? Ñaneumílderamo haʼetéta hína jaavríva pe “okẽ itránka mbaretéva” ha ñañemoĩ porã jey ñane ermánondi.

16. ¿Mbaʼe ótra kósapa jareko vaʼerã avei enkuénta ha mbaʼérepa?

¹⁶ Iñimportanteterei avei ñapensa porã mbaʼépa jaʼéta ñane ermánope, ha mbaʼéichapa jaʼéta chupe upéva. Ha jaha vove ñañemongeta hendive jareko vaʼerã enkuénta mbaʼépa la jahupytyséva. Ñande ningo jajogueraha porãse jey ñane ermánondi ha jaipota haʼe oñeñandu porã. Péro ikatu hína primerorã ijarhél ñandéve térã ñandetrata vai. Ha upéicha jave ifasileterei ñande avei ñañepyrũ hag̃ua ñandepochy ha ñañedefende. ¿Péro serápa ikatúta jajogueraha porã jey hendive la jajapóramo upéva? ¡Nahániri legálmente! Ñanemanduʼákena ñañemongetaha ñane ermánondi jajogueraha porã jey hag̃ua hendive, ha ndahaʼéi jaikuaa hag̃ua mávapa la kulpávle (1 Cor. 6:7).

17. ¿Mbaʼépa ñaaprende Gilberto ehémplogui?

¹⁷ Jahechamína mbaʼépa ikatu ñaaprende peteĩ ermáno héravagui Gilberto. Haʼe omombeʼu: “Una vuéltape ningo tuichaiterei ajoavy peteĩ che rajýndi, ha mas de 2 áñore añehaʼã vaʼekue roñemongeta hag̃ua trankílo ha roiko porã jey hag̃ua”. Péro Gilberto ojapove avei ótra kósa. Haʼe heʼi: “Roñemongeta mboyve siémpre añemboʼe ha ajepreparáma voi ani hag̃ua chepochy heʼi mbaʼérõ g̃uarã chéve álgo chemorrenegátava. Ahechakuaa avei iñimportanteha aime aperdona hag̃uáicha chupe, ha ndahaʼéi vaʼerã aikóva añedefendesénte. Upéva rangue che ajogueraha porãse jey kuri hendive”. ¿Mbaʼépa ohupyty Gilberto ojapo rupi koʼã mbaʼe? Haʼe voi omombeʼu ñandéve: “Koʼág̃a ikatu aime trankílo pórke ajogueraha porã che família kompletoiténdi”.

18, 19. Oiméramo jajoavy raʼe peteĩ ermánondi, ¿mbaʼépa jajedesidi vaʼerã jajapo ha mbaʼérepa?

¹⁸ Upéicharõ, ¿mbaʼépa la jajapo vaʼerã jajoavýramo peteĩ ermánondi? Jasegi vaʼerã pe konsého Jesús omeʼẽ vaʼekue ha ñañehaʼã ñañemoĩ porã jey hendive. Ñañemboʼe vaʼerã avei Jehovápe ha ñakonfia hese, haʼe katuete ñanepytyvõta ijespíritu rupive. Ha jajapóramo entéro koʼã mbaʼe ikatúta javyʼa, ha ojekuaáta ñanderehe ñaneñeʼẽrenduha Jesúspe (Mat. 5:9).

¹⁹ Jehová ningo omoĩ Jesúspe omoakã hag̃ua pe kongregasión, ha jaagradeseterei chupe ojevale haguére hese ñandegia hag̃ua (Efes. 5:23). Katuete ningo ñande jajedesidíma ñaneñeʼẽrendutaha chupe, ojapo haguéicha Pedro, Santiago ha Juan (Mat. 17:5). Ko artíkulope ñaanalisa kuri jajapo hag̃ua upéva iñimportantetereiha ñañemoĩ porã ñane ermanokuérandi oiméramo jajoavy raʼe hendivekuéra. Avei ñañehaʼãmbaite vaʼerã jasegi pe tape ipoʼívarupi. Upéicha Jehová ñanevendesíta koʼág̃ama voi ha avei pára siémpre.