Mbaʼéichapa ikatu javyʼa ñambaʼapo jave

1-3. a) ¿Mbaʼépa heta hénte opensa itraváhore? b) ¿Mbaʼe mbaʼépa ñambohováita ko kapítulope?

KO MÚNDO tuichakuére umi hénte ombaʼapo oñemantene hag̃ua ha ikatu hag̃uáicha omeʼẽ ifamiliakuérape oikotevẽva. Hetápe ndogustái itraváho ha ótro katu ndohoséi voi ombaʼapo. Oiméramo nde reñeñandu upéicha, ¿mbaʼépa ikatu rejapo ndegusta hag̃ua nde traváho ha revyʼave hag̃ua rembaʼapo jave?

² La Biblia heʼi voi ñandéve: “Iporã enterovéva jakaru, jaʼu vevída, ha javyʼa ñambaʼapo pohýivo. Péva peteĩ rregálo oúva Ñandejáragui” (Eclesiastés 3:13). Jehová ningo ñandeapo vaʼekue ikatu hag̃uáicha ñañeñandu porã ñambaʼapo jave, upévare haʼe oipota javyʼa jajapo jave ñane rembiapo (elee Eclesiastés 2:24; 5:18).

³ Upéicharõ, ¿mbaʼépa ikatu ñanepytyvõ javyʼa hag̃ua ñambaʼapo jave? ¿Mbaʼépa jareko vaʼerã enkuénta jaiporavóta jave mbaʼépepa ñambaʼapóta? ¿Mbaʼéichapa ikatu ñakumpli porã ñande travahohápe ha avei jasegi ñamotenonde ñande servísio Jehovápe? ¿Mbaʼépa pe traváho iñimportantevéva ikatúva jajapo?

4, 5. ¿Mbaʼépa Jehová opensa pe traváhore?

⁴ Ñandejára Jehová ningo ombaʼaposeterei voi. Génesis 1:1 heʼi: “Iñepyrũme Ñandejára ojapo vaʼekue yvága ha yvy”. Jehová ojapopa rire ko yvy ha opa mbaʼe oĩva pype, omaña hembiapokuére ha “ohecha iporãitereiha” (Génesis 1:31). Haʼe ovyʼaiterei ohecha rire umi mbaʼe ojapo vaʼekue (1 Timoteo 1:11).

⁵ Jehová koʼag̃aite peve ombaʼapo. Jesús heʼi vaʼekue: “Che Ru osegi ombaʼapo koʼág̃a peve, upévare che asegi avei ambaʼapo” (Juan 5:17). Añetehápe ndajaikuaái opa mbaʼe porã Jehová ojapóva, péro oĩ umi mbaʼe jaikuaáva. Por ehémplo oiporavo umi ogovernátavape Itaʼýra Jesucrístondi yvágape (2 Corintios 5:17). Haʼe avei ogia ha okuida yvyporakuérare. Avei ojepredika rupi opárupi umi hénte oikuaa hína Jehovápe, ha upéicha rupi haʼekuéra ikatu oreko pe esperánsa oikóvo pára siémpre peteĩ paraísope ko yvy ape ári (Juan 6:44; Romanos 6:23).

6, 7. ¿Mbaʼeichagua travahadórpa haʼe raʼe Jesús?

⁶ Jesús avei ombaʼaposeterei. Haʼe ou mboyve ko yvy ape ári ombaʼapo vaʼekue Itúandi “peteĩ konstruktór ivaletereívaicha”, ha oipytyvõ chupe ojapo hag̃ua opa mbaʼe oĩva yvágape ha ko yvýpe (Proverbios 8:22-31; Colosenses 1:15-17). Ha osegi ombaʼapo oúrõ guare ko yvy ape ári. Por ehémplo imitãrusúpe oiko chugui peteĩ karpintéro ikatupyrýva, ha ikatu ñaime segúro ojapóne hague umi muévle ha omopuʼã hague óga. Haʼe ikatupyryetereígui itraváhope umi hénte ohenói voi chupe “pe karpintéro” (Marcos 6:3).

⁷ Péro pe traváho iñimportantevéva Jesús ojapo vaʼekue haʼe opredika umi héntepe Ñandejára Rréino ha omboʼe chupekuéra Itúagui. Haʼe ningo 3 áño imédiore ojapo upéva, ha oñepyrũ vaʼekue pyharevete guive ha oho hese pyharepyte peve (Lucas 21:37, 38; Juan 3:2). Jesús avei oguata kuri heta kilómetro umi tape yvy reíre opredika hag̃ua opa ikatúvape (Lucas 8:1).

8, 9. ¿Mbaʼéichapa jaikuaa ombovyʼa hague Jesúspe itraváho?

⁸ Heta vése Jesús hembiapoitereígui naitiémpoi ni okaru hag̃ua. Péro umi mbaʼe ojapo vaʼekue Jehovápe g̃uarã haʼete voi chupe g̃uarã tembiʼu, pórke omombarete ha omokyreʼỹ chupe (Juan 4:31-38). Haʼe oaprovecha vaʼekue opa oportunida orekóva oñeʼẽ hag̃ua umi héntepe Itúare. Ojapo rupi upéicha ikatu vaʼekue heʼi Jehovápe: “Che ajapopa pe tembiapo nde remeʼẽ vaʼekue chéve, ha péicha rombotuicha ko yvy ape ári” (Juan 4:31-38; 17:4).

⁹ Jehová ha Jesús ningo iguapoiterei, ha ombovyʼaiterei chupekuéra umi mbaʼe ojapóva. Ñande jasegise Jehová ehémplo ha avei jajapose “umi mbaʼe haʼe ojapo vaʼekue” (Efesios 5:1; 1 Pedro 2:21). Upévare ñañehaʼãmbaite jajapo porã opa mbaʼe.

10, 11. ¿Mbaʼépa ñanepytyvõta ñandepositívo hag̃ua ñande travahohápe?

¹⁰ Jehová siervokuéra ningo ñambaʼapo ñañemantene hag̃ua ha ikatu hag̃uáicha ñameʼẽ ñane familiakuérape oikotevẽva. Ha hiʼãiterei ñandéve javyʼa ñambaʼapo jave, péro heta vése ijetuʼu upéva. Upéicharamo, ¿mbaʼépa ikatu jajapo ñandegusta hag̃ua ñande traváho?

¹¹ Ñandepositívo vaʼerã. Heta vése ningo ndaikatúi ñakambia la ñande traváho, ha ikatu avei sapyʼánte hetáma ñandehegui la jajapo vaʼerã, upéicharõ jepe ikatu ñañehaʼã ñandepositívo hag̃ua. Upearã tuicha ñanepytyvõta jarekóramo enkuénta mbaʼépa Jehová ohaʼarõ ñandehegui. Por ehémplo, Jehová oipota umi omoakãva pe ogapy ojapo ikatúva guive okuida porã hag̃ua hembireko ha ifamiliakuérare. La Biblia heʼi voi peteĩ persóna ndojapóiva upéva ‘oĩ vaiveha peteĩ ojeroviaʼỹvagui’ (1 Timoteo 5:8). Oiméramo nde remoakã hína nde rogapy, eñehaʼãmbaitékena emeʼẽ hag̃ua ne famíliape umi mbaʼe oikotevẽva. Rejapóramo upéicha nandegustáiramo jepe nde traváho, ikatúta reime segúro Jehová oguerohorytaha umi mbaʼe rejapóva.

12. ¿Mbaʼépa jahupytýta ñandetravahadór ha ñaneonrrádoramo?

¹² Ñaneonrrádo ha ñandetravahadór vaʼerã. Upéva ikatu ñanepytyvõ javyʼave hag̃ua ñambaʼapo jave (Proverbios 12:24; 22:29). Avei neonrrádoramo ne patrón ojeroviavéta nderehe. Oñemombaʼeterei ningo peichagua travahadórpe, pórke haʼekuéra nomondái ipatróngui ipláta ni ikosakuéra, ha ndoikói ojapo ótra kósa itraváho órape (Efesios 4:28). Ha iñimportanteveha, Jehová ohecháta reñehaʼãha neonrrádo ha ndetravahadór. Ha reikuaávo Jehová ndeguerohoryha reñandúta ne “konsiénsia ipotĩha” (Hebreos 13:18; Colosenses 3:22-24).

13. ¿Mbaʼépa jahupytýta ñañekomporta porãramo ñande travahohápe?

¹³ Ñanemanduʼa vaʼerã ñañekomporta lája ñande travahohápe ikatuha omombaʼeguasu Jehovápe. Upéva avei ñanepytyvõta javyʼa hag̃ua ñambaʼapo jave (Tito 2:9, 10). Ikatu voi peteĩ ombaʼapóva ñanendive oñepyrũ ostudia la Biblia ñameʼẽ rupi ehémplo iporãva ñande travahohápe (elee Proverbios 27:11; 1 Pedro 2:12).

14-16. ¿Mbaʼépa jareko vaʼerã enkuénta jaiporavóta jave mbaʼépepa ñambaʼapóta?

¹⁴ La Bíbliape ndaipóri peteĩ lísta heʼíva ñandéve mbaʼe mbaʼépepa ñambaʼapo vaʼerã, péro omeʼẽ ñandéve heta konsého jadesidi porã hag̃ua jaiporavóta jave ñande travahorã (Proverbios 2:6). Jahechamína mbaʼe konsého bíblicopa ikatu jaipuru ñambohovái hag̃ua koʼã porandu.

¹⁵ ¿Ojejapópa ko travahohápe peteĩ mbaʼe ndogustáiva Jehovápe? Ñaaprendéma kuri oĩha heta mbaʼe ombojeguarúva Jehovápe, por ehémplo ñamonda térã ñandejapu (Éxodo 20:4; Hechos 15:29; Efesios 4:28; Apocalipsis 21:8). Upéicha rupi ñamboyke vaʼerã oimeraẽ traváho ndojogueraháiva la Biblia heʼívandi (elee 1 Juan 5:3).

¹⁶ ¿Oimépa ko traváho omokyreʼỹ la héntepe ojapo hag̃ua peteĩ mbaʼe Jehová heʼíva ivaiha? Por ehémplo, ¿mbaʼépa oikóta rembaʼapóramo oñemopuʼãhápe peteĩ tupao? Añetehápe ningo ndaivaíri ñambaʼapo konstruksiónpe. Péro jaikuaaháicha, Jehovápe ombojeguaru umi japu omboʼéva umi rrelihión. Ha ñande ndajajapomoʼãiramo jepe umi mbaʼe ojapóva ha omboʼéva upe rrelihión, ¿opensánepa Jehová jaapojaha chupekuéra jaaseptáramo pe traváho? (Apocalipsis 18:4).

17. ¿Mbaʼépa ñanepytyvõta jadesidi hag̃ua umi mbaʼe ombovyʼátava Ñandejárape?

¹⁷ Jasegíramo umi konsého bíblico, oikóta ñandehegui peteĩ persóna ‘siémpre oipurúva iñakã’ ha ikatúta ‘ñadiferensia mbaʼépa iporã ha mbaʼépa ivai’ (Hebreos 5:14). Upévare iporã ñañeporandu: “¿Oĩtapa opensa vaíva aaseptáramo ko traváho? ¿Tekotevẽtapa aha mombyry che familiakuéragui, ikatu voi hína ótro tetãme? ¿Mbaʼéichapa opytáta hikuái chereheʼỹ?”.

18. ¿Mbaʼérepa ikatu ijetuʼu ñamotenonde ñande servísio Jehovápe?

¹⁸ Ndahaʼéi la ifasilpáva ñamotenonde meme ñande servísio Jehovápe. La Biblia heʼi voi: “Umi ára pahápe pe situasión ijetuʼúta ha ipeligrósota” (2 Timoteo 3:1). Ikatu hína ijetuʼu ñandéve jatopa hag̃ua ñande travahorã, ha ani hag̃ua japerde upéva tiémpo rire. Avei ñañatende porãmante vaʼerã ñane famíliare, péro jaikuaa siémpre ñamotenonde vaʼerãha ñande servísio Jehovápe. Upévare ndajahejái vaʼerã umi mbaʼerepy ou iñimportanteterei ñandéve g̃uarã (1 Timoteo 6:9, 10). Upéicharõ, ¿mbaʼépa ikatu jajapo jahecha hag̃ua “mbaʼépa pe iñimportantevéva”, ha jakuida porã hag̃ua ñane famíliare? (Filipenses 1:10).

19. ¿Mbaʼéichapa ñanepytyvõta jajeroviáramo Jehováre ani hag̃ua jajepyʼapyeterei ñande traváhore?

¹⁹ Jajerovia vaʼerã Jehováre ñande pyʼaite guive (elee Proverbios 3:5, 6). Ikatu ñaime segúro Jehová oikuaa porãitereiha mbaʼe mbaʼépa ñaikotevẽ ha avei ojepyʼapyha ñanderehe (Salmo 37:25; 1 Pedro 5:7). La Biblia heʼi: “Aníkena peiko pendeplatarayhu, upéva rangue pevyʼáma vaʼerã umi mbaʼe perekóvare. Ñandejára heʼi voi: ‘Núnka ndorohejamoʼãi ha núnka nderepytamoʼãi neaño’” (Hebreos 13:5). Jehová ndoipotái jajepyʼapyeterei umi mbaʼe tekotevẽvare jajapo jakuida hag̃ua ñane famíliare. Haʼe ningo hetaiterei vésema ohechauka ikatuha omeʼẽ isiervokuérape umi mbaʼe oikotevẽva (Mateo 6:25-32). Upévare, heta vése ijetuʼúramo jepe jareko hag̃ua peteĩ traváho porã, aníkena ñambotapykue umi mbaʼe iñimportantevéva, por ehémplo jastudia meme la Biblia, ñasẽ meme predikasiónpe ha jaha meme rreunionhápe (Mateo 24:14; Hebreos 10:24, 25).

20. ¿Mbaʼépa jajapo vaʼerã sensillomínte jaiko hag̃ua?

²⁰ Jajesareko vaʼerã umi mbaʼe iporãvare añoite (elee Mateo 6:22, 23). Upéva heʼise jaiko vaʼerãha sensillomínte jaservi porãve hag̃ua Jehovápe. Añetehápe ndajahechaukamoʼãi hína ñanearanduha ñambotapykuéramo ñane amista Jehovándi jaiko porãsevégui, ñandepláta hetasevégui, térã jaipotágui umi mbaʼe ipyahuvéva. Upéicharõ, ¿mbaʼépa ñanepytyvõta ñamotenonde hag̃ua umi mbaʼe iñimportantevéva? Jajapo vaʼerã ikatúva guive ani hag̃ua jaju jadeve. Ha oiméramo jarekóma voi umi déuda japaga vaʼerã, ñaplanea porã vaʼerã ikatu hag̃uáicha saʼive jadeve térã japagapaite hag̃ua voi. Nañañatendéiramo ikatu hína umi mbaʼerepy oipurupa ñandehegui ñane tiémpo ha ñane mbaretekue, ha upévare saʼivéma ñañemboʼe, jastudia ha japredika. Jaheja rangue umi mbaʼerepy ñandedistrae, iporãvéta ñaaprendéramo javyʼa jarekóma guive ñaikotevẽmíva, por ehémplo “jaʼumi vaʼerã ha ñande aorã” (1 Timoteo 6:8). Ha tahaʼe haʼéva ñane situasión, iporã ñañemotiémpo jepi ha jajepyʼamongeta jahecha hag̃ua mbaʼetekópa ñaime ha mbaʼéichapa ikatu jajapove Jehová servísiope.

21. ¿Mbaʼérepa jaikuaa vaʼerã mbaʼépa umi mbaʼe iñimportantevéva?

²¹ Ñamotenonde vaʼerã umi mbaʼe iñimportantevéva. Jaipuru porãkena ñane tiémpo, ñane mbaretekue ha ñande kosakuéra. Nañañatendéiramo, ikatu hína umi mbaʼe naiñimportanteguasúiva hoʼupa ñandehegui ñane tiémpo, umíva apytépe ikatu oĩ umi estúdio ha pe pláta. Jesús heʼi voi vaʼekue: “Pemotenonde meméke Ñandejára Rréino” (Mateo 6:33). Umi mbaʼe jadesidíva, umi kostúmbre jarekóva, umi mbaʼe jajepokuaáva jajapo ha avei umi mbaʼe jahupytyséva, ohechaukáta mbaʼépa la añetehápe iñimportantevéva ñandéve g̃uarã.

22, 23. a) ¿Mbaʼépa pe iñimportantevéva ikatúva jajapo? b) ¿Mbaʼépa ñanepytyvõta javyʼa hag̃ua ñambaʼapo jave?

²² Pe mbaʼe iñimportantevéva ikatúva jajapo ningo haʼe jaservi Jehovápe, ha upéva jajapo por ehémplo japredika jave umi notísia porã (Mateo 24:14; 28:19, 20). Jesús oñehaʼãmbaite vaʼekue ojapo hag̃ua upéva, ha ñande avei jajapose upéicha. Oĩ heta ermáno odesidíva ova oñekotevẽhápe hetave opredikáva. Oĩ avei oaprendéva ótro idióma opredika hag̃ua hetave héntepe. Eñemongetamína umi ojapóvandi koʼã mbaʼe, ha haʼekuéra katuete omombeʼúta ndéve mbaʼeichaitépa ovyʼa ha oñeñandu porã hikuái (elee Proverbios 10:22).

²³ Oĩ heta ñande apytépe tekotevẽva ombaʼapo heta órare térã diferénte traváhope omeʼẽ hag̃ua ifamíliape umi mbaʼe oikotevẽva. Jehová ohecha opa koʼã mbaʼe ha omombaʼeterei la jajapóva. Upévare, tahaʼe haʼéva la ñande traváho, jasegíkena siémpre Jehová ha Jesús ehémplo ha ñañehaʼã ñandetravahadór. Ha ñanemanduʼa vaʼerã pe mbaʼe iñimportantevéva ikatúva jajapo haʼeha jaservi Jehovápe ha japredika umi notísia porã. Koʼã mbaʼe haʼe la añetehápe ñanembovyʼátava.