Ñaneonrrádo vaʼerã opa mbaʼépe

1, 2. ¿Mbaʼéichapa oñeñandu Jehová ñaneonrrádoramo?

EÑEIMAHINAMÍNA peteĩ mitã ohokuévo eskuélape otopaha peteĩ villetéra henyhẽtéva plátagui. ¿Mbaʼépa ojapóta pe mitã? Haʼe ningo ikatu ohejánte imbaʼerã, péro upéva rangue odesidínte omeʼẽ jey ijárape. Isy oikuaa rire imemby ojapo vaʼekue, ovyʼaiterei heseve.

² La majoría umi túa ha sy ovyʼa ifamiliakuéra iñonrrádoramo. Ha ñande Ru Jehovágui ningo “ou pe añetegua”, upévare haʼe avei ovyʼaiterei ohechávo ñaneonrradoha (Salmo 31:5). Ñande ningo ñambovyʼase chupe, upévare ‘siertoguávante jaʼe vaʼerã ñande rapichakuérape’ (Efesios 4:25). Ko kapítulope jahecháta mbaʼéicha javépa ikatu ijetuʼu ñandéve ñaneonrrádo hag̃ua, ha jahecháta avei mbaʼe mbaʼépa jahupytýta ñaneonrrádoramo.

3-5. a) ¿Mbaʼéichapa ikatu ñañembotavy ñandejupe voi? b) ¿Mbaʼépa ñanepytyvõta ñaneonrrádo hag̃ua ñanendive voi?

³ Ikatu hag̃uáicha jaʼe siertoguávante ñande rapichakuérape, tekotevẽ ñaneonrrádo ñanendive voi. Ha heta vése ikatu ijetuʼu upéva. Apóstol Juan oskrivírõ guare Apocalipsis, umi ermáno Laodiceagua oñembotavy vaʼekue ijupe voi pórke haʼekuéra opensa vaʼekue ojapoha Ñandejára rembipota, péro añetehápe ndaupéichai kuri (Apocalipsis 3:17). Ñande ikatu avei ñapensa ñaime porãha hína, péro ndahaʼéi raʼe upéicha añetehápe.

⁴ Disípulo Santiago heʼi vaʼekue: “Peteĩ kuimbaʼe opensáramo oadoraha Ñandejárape péro ndojokói ijuru, oñembotavy ijupe voi, ha pe adorasión omeʼẽva Ñandejárape ndovaléi mbaʼeverã” (Santiago 1:26). Tuichaiterei jajavýta ñapensáramo jajapóma guive unos kuánto mbaʼe iporãva ndaivairiha Ñandejárape g̃uarã ñanemaledukádo, ñandejapu térã ñañembohorýramo ñande rapicháre jaheja vai hag̃ua chupe. Upéicharõ, ¿mbaʼépa ikatu jajapo ani hag̃ua ñañembotavy ñandejupe voi?

⁵ Ñamaña jave ñandejehe peteĩ espéhope jahecha mbaʼetekópa oĩ ñane pínta, péro jalee jave la Biblia ikatu jahecha mbaʼépa jareko ñande pyʼapýpe. La Biblia ñanepytyvõ jaikuaa hag̃ua mbaʼépepa ñanembarete ha avei mbaʼépepa ñanekangy. Avei ñanepytyvõ jahecha hag̃ua sapyʼánte tekotevẽha ñakambia peteĩ mbaʼe ñapensáva, térã ñañeʼẽ ha ñañekomporta lája (elee Santiago 1:23-25). Péro ñapensáramo natekotevẽiha voi ñakambia, upéicharõ hasýta ñamehora hag̃ua. Upévare ñaneonrrádo vaʼerã ñanendive voi ha jaipuru la Biblia upearã (Lamentaciones 3:40; Ageo 1:5). Ñañemboʼe meméramo Jehovápe jahechakuaáta mbaʼépa jareko ñande pyʼapýpe. Upévare jajerure vaʼerã chupe tomaña ñande pyʼapýpe oĩvare, ha tañanepytyvõ jahecha hag̃ua mbaʼépepa ñanekangy ñamehora hag̃ua (Salmo 139:23, 24). Jaikuaa porã Jehová ndaijaʼeiha umi hénte oporombotavývare, péro umi ihústova katu iñamigoite hína (Proverbios 3:32).

 6. ¿Mbaʼérepa siémpre iñonrrádo vaʼerã oñondive umi omendáva?

⁶ Iñimportanteterei avei ñaneonrrádo ñande rogapýpe. Ména ha tembireko heʼíramo ojupe siertoguávante katuete ojeroviavéta ojuehe ha oiko porãvéta oñondive. Péro, ¿mbaʼéicha javépa ikatu hína ména térã tembireko ohechauka naiñonrradoiha? Por ehémplo, ohecháramo pornografía, opiropea térã onovilleáramo ótrore, ha avei ojegustáramo ótrore ñemiháme. Peteĩ salmísta heʼi vaʼekue voi: “Umi ijapúva ni mbaʼevéicharõ ndahaʼéi che amígo, ha ndajeheʼái umi hovamokõivare” (Salmo 26:4). Peteĩ omendáva ohechaukáta avei naiñonrradoiha hembiayhúndi orekóramo pensamiénto itieʼỹva ótra persónandi, ha upéva katuete ombyaíta imatrimónio.

7, 8. ¿Mbaʼéichapa ikatu reipuru la Biblia remboʼe hag̃ua ne familiakuérape iñimportantetereiha iñonrrádo?

⁷ La Biblia rupive umi túa ha sy omboʼe vaʼerã ifamiliakuérape iñimportantetereiha iñonrrádo. Pype oñemombeʼu oĩ hague heta ohejáva ehémplo vai naiñonrrádoi rupi. Por ehémplo Acángui oiko vaʼekue peteĩ mondaha, Guehazí ijapu vaʼekue okonsegi hag̃ua pláta, ha Judas katu imonda vaʼekue ha upéi otraisiona voi Jesúspe 30 monéda de pláta rehe (Josué 6:17-19; 7:11-25; 2 Reyes 5:14-16, 20-27; Mateo 26:14, 15; Juan 12:6).

⁸ La Biblia omombeʼu avei oĩ hague heta ohejáva ehémplo porã ñandéve iñonrrádo rupi. Por ehémplo, Jacob heʼi vaʼekue itaʼyrakuérape omeʼẽ jey hag̃ua pe pláta otopa vaʼekue hikuái, Jefté ha itajýra okumpli kuri peteĩ promésa ojapo vaʼekue Ñandejárape, ha Jesús katu heʼi vaʼekue siertoguávante ijetuʼu jave entéro (Génesis 43:12; Jueces 11:30-40; Juan 18:3-11). Koʼãichagua ehémplo ikatu oipytyvõ ne familiakuérape ohechakuaa hag̃ua iñimportantetereiha ñaneonrrádo.

 9. ¿Mbaʼérepa umi sy ha túa iñonrrádo vaʼerã?

⁹ Umi túa ha sy imanduʼa vaʼerã avei ko konsého bíblicore: “Nde reikóva remboʼe ótrope, ¿mbaʼére piko nereñehekomboʼéi ndejupe? Nde reikóva repredika ha ere: ‘Aníke remonda’, ¿mbaʼére piko nde remonda?” (Romanos 2:21). Por ehémplo umi túa ha sy heʼíramo peteĩ mbaʼe péro ojapo ótra kosaite, ifamiliakuéra opilláta upéva. Ha omboʼéramo chupekuéra iñonrrádo vaʼerãha, péro haʼekuéra voi naiñonrrádoi, umi mitã oñekonfundipáta. Haʼekuéra ohecháramo ituakuéra ijapuha, tahaʼe jepe raʼe michĩmínte, provávlemente ijapuséta avei hikuái (elee Lucas 16:10). Péro ohecháramo ituakuéra iñonrradoha, amo gotyove haʼekuéra ifamília vove, iñonrrádota avei hendivekuéra (Proverbios 22:6; Efesios 6:4).

10. ¿Mbaʼéichapa ikatu ñaneonrrádo ñane ermanokuérandi?

¹⁰ Tekotevẽ avei ñaneonrrádo kongregasiónpe. Nañañatendéiramo, heta vése ndahasyiete ñamombeʼu hag̃ua peteĩ chísme, térã ikatu voi jaju jataky ñane ermanokuérare. Ñamombeʼúramo peteĩ mbaʼe ndajaikuaaporãiva siertoha, ikatu hína ñandejapu. Upévare iñimportánte ñañatende mbaʼépa jaʼéta (Proverbios 10:19). Péro ñaneonrrádo ndeʼiséi ikatuha jaʼe opa mbaʼe ñapensáva, jaikuaáva térã ñahendu vaʼekue. Ha siértoramo jepe peteĩ mbaʼe jaʼétava, ñapensa vaʼerã tekotevẽpa añetehápe ñamombeʼu, avei ohechaukátapa japorohayhuha, ha ñanemanduʼa vaʼerã avei naiporãiha ñañentremete hendapeʼỹ ótro ojapóvare (1 Tesalonicenses 4:11). Oĩ heta hénte oñeʼẽ vai guasúva hapichápe ha heʼi ndaivairiha upéva pórke siertoguávante la heʼíva. Péro ñande Jehová siervokuéra, siémpre jaʼe vaʼerã umi mbaʼe ijukýva ha ohechaukáva japorohayhuha (elee Colosenses 4:6).

11, 12. a) ¿Mbaʼérepa peteĩ kristiáno heʼi vaʼerã siertoguávante oiméramo ou opeka? b) Jaikuaáramo ñane amígo opeka hague, ¿mbaʼépa iporã ñañeporandu? c) ¿Mbaʼéichapa ikatu jahechauka ñaneonrradoha ñamyenyhẽ jave ñane infórme térã peteĩ solisitu?

¹¹ Jehová omeʼẽ pe rresponsavilida umi ansiánope oipytyvõ hag̃ua kongregasiónpe, ha ifasilvéta chupekuéra ojapo hag̃ua itraváho jaʼéramo chupekuéra siertoguánte. ¿Mbaʼérepa? Ñapensamína ko ehémplore: ñamoĩ chupe nderasyha ha reho peteĩ doktór rendápe, ¿remokañýtapa chugui umi mbaʼe hasýva ndéve? Rejapóramo upéicha ijetuʼúta chupe nepytyvõ hag̃ua. Upéicha avei, jajúramo japeka nañamokañýi vaʼerã umi mbaʼe oiko vaʼekue ni nañandejapúi vaʼerã ñamombeʼu jave. Upéva rangue jajerure umi ansiánope tañanepytyvõ ha ñamombeʼupaite chupekuéra pe oiko vaʼekue (Salmo 12:2; Hechos 5:1-11). Koʼág̃a eñeporandumi, ¿mbaʼépa nde rejapóta peteĩ ne amígo oúramo opeka? (Levítico 5:1). ¿Epensátapa haʼe rupi ne amígo mehorveha reguerokirirĩnte la ojapo vaʼekue? ¿Térãpa nemanduʼáta umi ansianokuéra ikatuha omombarete ha oipytyvõ ne amígope oñemoĩ porã jey hag̃ua Jehovándi? (Hebreos 13:17; Santiago 5:14, 15).

¹² Avei tekotevẽ ñaneonrrádo ñamyenyhẽ jave ñane infórme térã ñakompleta jave pe solisitu oiko hag̃ua ñandehegui prekursór. Ha avei ñaneonrrádo vaʼerã ñamyenyhẽ jave oimeraẽ solisitu jajapove hag̃ua Jehová servísiope (elee Proverbios 6:16-19).

13. ¿Mbaʼéichapa ikatu jahechauka ñaneonrradoha jajapo jave negósio ñane ermanokuérandi?

¹³ Ñande kristianokuéra nañañeʼẽi negósiore jaadora jave Jehovápe. Upévare ndajajapói negósio ñaime jave Salón del Réinope térã japredika jave. Avei ndajajeaprovechái ñane ermánore ñambaʼapo jave hendivekuéra. Peteĩ ermáno ombaʼapóramo ndéve, epaga vaʼerã chupe pe kantida eñekompromete vaʼekue ha avei pe fécha pepyta haguépe. Avei emeʼẽ vaʼerã chupe umi venefísio pe léi heʼiháicha, umíva apytépe ikatu oike hína pe segúro médiko térã epaga chupe umi día oĩ hague de vakasión (1 Timoteo 5:18; Santiago 5:1-4). Ha oiméramo rembaʼapo peteĩ ermánope, ani repensa pe ermáno ndetrata porãve vaʼerãha umi ne kompañéro de traváhogui (Efesios 6:5-8). Avei rejapo vaʼerã umi mbaʼe haʼe ohaʼarõva ndehegui ha ekumpli vaʼerã pe óra haʼe omoĩ vaʼekue rembaʼapo hag̃ua (2 Tesalonicenses 3:10).

14. ¿Mbaʼépa jareko vaʼerã enkuénta jajapo mboyve negósio ñane ermánondi?

¹⁴ ¿Mbaʼépa jareko vaʼerã enkuénta jajapo jave negósio ñane ermánondi? Ikatu hína remoĩ pláta pemoñepyrũ hag̃ua peteĩ negósio oñondive térã reipuruka voi chupe pláta. Upéicha jave ikatu ñanemanduʼa peteĩ konsého iñimportantetereíva oĩvare la Bíbliape: tekotevẽha jajapo peteĩ dokuménto entéro negósio jajapóvape g̃uarã. Proféta Jeremías ojoguárõ guare peteĩ terréno, oanotapaite vaʼekue upéva peteĩ dokuménto ojesellávape ha avei ótro ndojeselláivape. Upéi ojerure unos kuánto testígope ofirma hag̃ua pe dokuméntore, ikatu hag̃uáicha ojerrevisa jey ág̃a tekotevẽ vove (Jeremías 32:9-14; ehecha avei Génesis 23:16-20). Oĩ opensáva siémpre japreparáramo dokuménto jajapo jave negósio térã ótra kósa, jahechaukataha ndajajeroviaiha ñane ermanokuérare. Péro añetehápe, jajapóramo upéva ifasilvéta ani hag̃ua upéi jaju jajoavy nañantendeporãigui peteĩ mbaʼe, ñandepochy oñondive térã jaiko vai. Ñanemanduʼa vaʼerã avei jajapóramo jepe negósio ñane ermánondi, iñimportanteveha hína jaiko pyʼaguapýpe oñondive kongregasiónpe (1 Corintios 6:1-8; ehecha nóta 30 entende porãve hag̃ua).

15. ¿Mbaʼépa opensa Jehová ohechávo oĩha heta naiñonrrádoiva ojapo jave negósio?

¹⁵ Jehová omombaʼeterei ohecháramo ñaneonrradoha. Upévare ñande ñaneonrrádo vaʼerã entérondi, ha avei umi ndahaʼéivandi Testígo. La Biblia heʼi voi ñandéve: “Jehovápe ombojeguaru ojepurúramo valánsa monda, péro haʼe oguerohory peteĩ valánsa ijexáktova” (Proverbios 11:1; 20:10, 23). La Biblia omombeʼu yma ojepurúmi hague valánsa ojejapo jave negósio. Péro heta vendedór ombotavými vaʼekue la héntepe oipurúvo umi valánsa ha pésa japu, térã okovrávo chupekuéra hepyeterei. Koʼág̃arupi upeichaite avei oiko pórke hetaiterei oĩ naiñonrrádoiva. Péro Jehová nokambiái ha koʼag̃aite peve ipochyeterei ohechávo koʼãichagua hénte naiñonrradoiha.

16, 17. ¿Mbaʼe mbaʼépa naiporãi jajapo jasegi hag̃ua ñaneonrrádo?

¹⁶ Heta vése ndahaʼéi la ifasilpáva ñaneonrrádo hag̃ua, por ehémplo jajeruréta jave ñande travahorã, ñakompletáta jave umi dokuménto ojeruréva pe goviérno, térã jareko jave exámen eskuéla ha koléhiope. Oĩ opensáva ndaivairiha ñandejapu, jaexahera térã ñaporombotavy. Péro upéva nañanesorprendéi vaʼerã, pórke la Biblia heʼíma voi kuri ñane tiémpope umi hénte ojepyʼapytaha ijehénte, ohayhutaha pe pláta ha ndogustamoʼãiha chupekuéra umi mbaʼe iporãva (2 Timoteo 3:1-5).

¹⁷ Sapyʼánte ikatu ñapensa oho porãveha umi naiñonrrádoivape (Salmo 73:1-8). Heta vése ñaneonrrádo rupi ikatu voi jaju japerde ñande traváho, japerde ñande pláta térã oĩ ñandetrata vaíva ñambaʼapohápe. Péro jahechataháicha koʼág̃a, katuete jahupytýta hína heta mbaʼe porã ñañehaʼãramo ñaneonrrádo.

18. ¿Mbaʼérepa iñimportantete ñañehaʼã ñaneonrrádo?

¹⁸ Ñaneonrrádoramo jahupytýta hetaiterei mbaʼe porã, hiʼarive koʼág̃arupi saʼi oĩ peichagua hénte (Miqueas 7:2). Upéicharõ jepe, entéro ikatu ñañehaʼã opavave ohechakuaa hag̃ua ñaneonrradoha. Ikatu oĩ oñembohorýva ñanderehe térã heʼíva ñandevyroha, péro oĩta avei heta ñanemombaʼéva ha ojeroviáva ñanderehe upe haguére. Ko múndo tuichakuére opavave oikuaa umi Testígope iñonrrádo rupi. Ha oĩ voi heta omombaʼaposevéva umi Testígope oikuaágui iñonrradoha hikuái. Heta vése avei umi Testígo ndoperdéi itraváho oĩ jave oñemosẽva naiñonrrádoi rupi.

19. ¿Mbaʼéichapa oñeñandúta Jehová ohecháramo ñaneonrradoha?

¹⁹ Siémpre ñaneonrrádoramo ñanekonsiénsia potĩta ha ñandepyʼaguapýta. Péicha ikatúta jaʼe la heʼi vaʼekue apóstol Pablo: “Ore rojerovia ore konsiénsia ipotĩha ha hiʼãiterei rojapo porã entéro mbaʼe” (Hebreos 13:18). Ha iñimportanteveha, ñande Ru Jehová ohecháta ha omombaʼetereíta ñañehaʼã haguére ñaneonrrádo opa mbaʼépe (elee Salmo 15:1, 2; Proverbios 22:1).