Peẽ ovecharerekua, pehaʼangákena Jehová ha Jesúspe

1, 2. a) ¿Mbaʼépa ojehupyty oñeñangareko porãramo umi ovecháre? b) ¿Mbaʼérepa heta hénte Jesús tiémpope guare oiko vaʼekue ovecha herekuaʼỹvaicha?

UMI ovecha ningo okakuaa porãmba pe ovecharerekua oñangarekóramo hekoitépe hesekuéra. Peteĩ lívro omboʼéva mbaʼéichapa oñemongakuaa vaʼerã ovechakuéra heʼi: “Pe ovecharerekua ogueraháramo opoi rei chupekuéra okaru hag̃uánte ha noñatendéi hesekuéra, tiémpo riremi heta ovecha hasýta ha ndaikatumoʼãi oñeguenohẽ provécho chuguikuéra”. Péro oñeñangareko porãramo umi ovecháre katu sapyʼaitérõ g̃uarã heta hetave hikuái.

² Peichaite avei oiko kongregasiónpe. Umi ovecharerekua oñangareko porãramo káda ovecha Jehová omoĩvare ipoguypekuéra, pe kongregasión oĩ porãvéta. Ñanemanduʼa vaʼerã Jesús oiporiahuvereko hague umi héntepe “ohechágui mbaʼéichapa oiko asyeterei ha isarambipa hikuái umi ovecha herekuaʼỹvaicha” (Mat. 9:36, NM). ¿Mbaʼérepa oiko asyete hikuái? Umi kuimbaʼe omboʼe vaʼerã chupekuéra pe Léi ningo hovamokõi, ipyʼahatã ha ojopy hendivekuéra. Koʼã mboʼehára oipytyvõ rangue umi héntepe ojeroviave hag̃ua, omoĩve “kárga pohýi” hiʼarikuéra (Mat. 23:4, NM).

 3. ¿Mbaʼérehepa akóinte imanduʼa vaʼerã ansianokuéra oñangarekóvo umi ijovecháre?

³ Umi ovecharerekua ñane tiempopegua, térã umi ansiáno kongregasiongua, oreko tuicha rresponsavilida. Umi ovecha oñangarekoha hikuái Jehová ha Jesús mbaʼe hína. La Biblia heʼi voi Jesús haʼeha pe “ovecharerekua imbaʼeporãva” (Juan 10:11, NM). Koʼã ovecháre hepyeterei ojepaga: “Cristo ruguy iporãitereíva” (1 Cor. 6:20; 1 Ped. 1:18, 19, NM). Haʼe ohayhueterei chupekuéra, upévare omeʼẽ hekove hesehapekuéra. Umi ansiáno akóinte imanduʼa vaʼerã ombaʼapoha Ñandejára Raʼy ipyʼaporãitéva poguýpe, haʼéva hína “pe ovecharerekua tuichavéva” (Heb. 13:20, NM).

 4. ¿Mbaʼe porandúpa ñambohováita ko artíkulope?

⁴ Upéicharõ, ¿mbaʼéichapa umi ovecharerekua otrata vaʼerã ermanokuérape? Entéro kristiánope ojeʼe ‘iñeʼẽrendu vaʼerãha umi omoakãvape’ chupekuéra. Péro oñemokyreʼỹ avei ansianokuérape ani hag̃ua ojopy ‘umi Ñandejára mbaʼévape’ (Heb. 13:17, NM; elee 1 Pedro 5:2, 3). ¿Mbaʼéichapa ansianokuéra ogia vaʼerã umi ovechápe odominaʼỹre chupekuéra? Térã ¿mbaʼéichapa oñatende porãta hesekuéra oiporu vaiʼỹre pe autorida Jehová omeʼẽ vaʼekue chupekuéra?

 5. ¿Mbaʼépa ñanemboʼe Jehovágui pe ehémplo oĩva Isaías 40:11-pe?

⁵ Proféta Isaías heʼi vaʼekue Jehováre: “Ku ovecharerekua oñangarekoháicha hymba aty rehe; ijyva ári ogueraháta umi ovecharaʼy, ha ipytiʼakuápe oñongatu chupekuéra, mborayhupópe oñangarekóta umi imemby ramóva rehe” (Is. 40:11, ÑÑB). Ko ehémplo ohechauka Jehová oñangareko porãha umi ikangývare ha oikotevẽvévare. Peteĩ ovecharerekua oikuaa mbaʼépa oikotevẽ káda ovecha ha oĩ oñatende hag̃uáicha opavavére. Péicha avei Jehová oikuaa porã mbaʼe mbaʼépa oikotevẽ káda ermáno oĩva kongregasiónpe ha oñangarekose voi hesekuéra. Sapyʼánte pe ovecharerekua ohupi ha ogueraha ijaokuápe peteĩ ovechaʼi onase ramóvape. Jehová ningo “peteĩ Túva oporoporiahuverekóva” ha ñanembopyʼaguapýta jahasa jave umi mbaʼe ijetuʼúva, ku ñanderupirõguáicha ijyva ári. Haʼe ñanekonsola ha ñanemombaretéta ñambohovái jave umi pruéva ijetuʼúva térã peteĩ provléma ñandejopyetereíva (2 Cor. 1:3, 4, NM).

 6. ¿Mbaʼéichapa ansianokuéra ohaʼanga Jehovápe oñangarekóvo umi ermánore?

⁶ ¡Ajépa iporãite pe ehémplo Jehová omoĩva ansianokuérape! Jehová ojapoháicha, haʼekuéra ojesareko vaʼerã umi ovecháre oikuaa hag̃ua mbaʼe situasiónpepa oĩ hikuái. ¿Mbaʼérepa? Ansianokuéra oikuaáramo mbaʼe mbaʼépa ohasa umi ermáno ha mbaʼépa oikotevẽ, ikatúta oipytyvõ ha omombarete chupekuéra oikotevẽhaichaite (Prov. 27:23). Jaikuaaháicha, umi ansiáno ohasa vaʼerã tiémpo ermanokuéra ndive oñemongeta ha ohendu hag̃ua chupekuéra. Ha ojapóvo upéva ndoikói oñentremete rei, síno orrespeta opavave ermánope. Péro upéicha avei oñeinteresa opa mbaʼe ohecháva ha ohendúvare kongregasiónpe, ha ‘oipytyvõ [...] umi ikangývape’ (Hech. 20:35, NM; 1 Tes. 4:11).

 7. a) ¿Mbaʼéichapa ojetrata vaʼekue Ñandejára ovechakuérape Ezequiel ha Jeremías tiémpope? b) ¿Mbaʼépa ñaaprende jahechávo mbaʼéichapa Jehová omongavaju umi ovecharerekua nokumpliporãivape hembiapo?

⁷ Ñandejára omongavaju umi ansiáno oiko vaʼekuépe Ezequiel ha Jeremías tiémpope noñangarekoporãi haguére ijovechakuérare. Haʼe heʼi chupekuéra: “Mymba ñarõ opaichagua omonda ha hoʼupa che ovechakuéra ndaherekuáigui. [...] [Umi ovecharerekua] oñangareko ijehénte ha noñangarekói che ovecha atýre”. Pe puévlo heta ohasa asy umi omoakãva opensa rupi ijehénte ha ojaprovechágui hesekuéra (Ezeq. 34:7-10; Jer. 23:1). Ñandejára omboyke haguéicha koʼã ovecharerekuápe, koʼág̃a omboyke avei umi omoakãvape umi kristiáno guaʼúpe. ¿Mbaʼépa ikatu oaprende ansianokuéra Jehová heʼi vaʼekuégui umi ovecharerekuáre? Iñimportanteha oñangareko hikuái mborayhúpe Jehová ovechakuérare.

 8. ¿Mbaʼe ehémplopa omoĩ Jesús okorrehírõ guare idisipulokuérape?

⁸ Opavave ovecha iñimperfékto rupi, oĩta umi nontendeporãiva mbaʼépa Ñandejára ohaʼarõ chuguikuéra. Ikatu upévare ndosegíri peteĩ konsého oĩva la Bíbliape térã ojapo peteĩ mbaʼe ohechaukáva naimbareteiha gueteri pe añeteguápe. ¿Mbaʼépa ojapo vaʼerã upéicha jave umi ansiáno? Ipasiénsia vaʼerã Jesús ojapo haguéicha umi disípulo oiko vaírõ guare oikoségui pe iñimportantevévaramo pe Rréinope. Jesús ipochy rangue hesekuéra, osegi omboʼe ha oñemoñeʼẽ chupekuéra hekomirĩ hag̃ua (Luc. 9:46-48; 22:24-27). Ombojepyhéivo umi disípulope ohechauka chupekuéra iñumílde vaʼerãha. Péicha vaʼerã avei entéro ansiáno kongregasiongua (elee Juan 13:12-15; 1 Ped. 2:21).

 9. ¿Mbaʼérepa Jesús tekotevẽ kuri okorrehi idisipulokuérape?

⁹ Apóstol Santiago ha Juan oimoʼã vaʼekue umi ovecharerekua omanda vaʼerãha hapichakuérare. Haʼekuéra ojerure Jesúspe peteĩ puésto iñimportánteva pe Rréinope. Péro Jesús okorrehi chupekuéra heʼívo: “Peẽngo peikuaa mbaʼéichapa umi mburuvicha omanda hetãyguakuérare, ha umi poguasukuéra ojopy umi héntendi. Péro peẽ ndaupéichai vaʼerã; pe tuichaséva pende apytépe, oiko vaʼerã pene rembijokuáirõ” (Mat. 20:25, 26, NM). Jesús apostolkuéra tekotevẽ kuri oñehaʼãmbaite ani hag̃ua omandase hapichakuérare.

10. a) ¿Mbaʼéichapa Jesús oipota ansianokuéra otrata umi ermánope? b) ¿Mbaʼe ehémplopa omoĩ Pablo?

¹⁰ Jesús oipota ansianokuéra otrata porã umi ermánope haʼe ojapo haguéicha. Ndoipotái omanda hesekuéra, síno oservi enterovévape. Pablo ohechauka vaʼekue iñumildeha oservívo ermanokuérape. Haʼe heʼi vaʼekue umi ansiáno Efesoguápe: “Peẽ peikuaa porã mbaʼéichapa aju ypy guive Ásiape aime pende apytépe opa árare, aservi tembiguáiramo ñande Ruvichápe, ndaikóiva añemombaʼeguasu”. Apóstol Pablo oipota umi ansiáno iñumílde ha ojesakrifika ermanokuéra rehehápe. Upéi heʼi chupekuéra: “Opa mbaʼépe ahechauka peẽme pembaʼapo vaʼerãha peipytyvõ hag̃ua umi ikangývape” (Hech. 20:18, 19, 35, NM). Pablo heʼi avei umi kristiáno Corintoguápe haʼe nomandaiha ijeroviakuérare, síno ombaʼapoha ijykerekuéra ikatu hag̃uáicha vyʼápe oservi hikuái Jehovápe (2 Cor. 1:24). Jahechaháicha, apóstol Pablo iñumílde ha oñemeʼẽmbaite vaʼekue ermanokuéra rehehápe. Péicha oheja peteĩ ehémplo iporãva umi ansiáno koʼag̃aguápe.

11, 12. ¿Mbaʼéichapa ansianokuéra ikatu oipytyvõ umi ermánope odesidi porã hag̃ua?

¹¹ Umi ansiáno kongregasiongua “oñakarama hatã vaʼerã pe ñeʼẽ añeteguáre oporomboʼe jave” (Tito 1:9, NM). Péro ojapo vaʼerã upéva “pyʼaguapýpe porãnte” (Gál. 6:1, NM). Por ehémplo, oiko rangue heʼi peteĩ ermánope mbaʼe mbaʼépa ojapo vaʼerã, umi ansiáno ikatupyrýva oñehaʼã opoko ikorasõre. Ikatu ohechauka chupe umi téxto térã orrepasa hendive peteĩ artíkulo osẽ vaʼekue ñane puvlikasiónpe oipytyvõtava chupe odesidi porã hag̃ua. Ikatu avei oipytyvõ pe ermánope ohechakuaa hag̃ua mbaʼépepa ogueraháta chupe pe odesidítava ha mbaʼéichapa opytáta upe rire Jehová ndive. Pe ansiáno tekotevẽ avei heʼi porã chupe iñimportanteha oñemboʼe odesidi mboyve ha tojerure Jehovápe ogia hag̃ua chupe (Prov. 3:5, 6). Péro ojapopa rire koʼã mbaʼe, oheja vaʼerã pe ermáno odesidi mbaʼépa ojapóta (Rom. 14:1-4).

¹² Umi ansiáno ndojopýi vaʼerã avavépe ojapo hag̃ua haʼekuéra opensaháichante, síno osegi vaʼerã la Biblia heʼíva. Upévare tekotevẽterei oiporukuaa Ñandejára Ñeʼẽ ha nosẽi vaʼerã upépe heʼívagui omeʼẽ jave konsého. Upéicha ndoikomoʼãi omandase iñermanokuérare. Umi ovecha kongregasiongua ndahaʼéi ansianokuéra mbaʼe, ha káda ermáno ojecháta Jehová ha Jesús ndive hembiapokuére (Gál. 6:5, 7, 8).

13, 14. ¿Mbaʼe mbaʼépepa umi ansiáno ehémplo vaʼerã?

¹³ Apóstol Pedro heʼi ansianokuérape mbaʼéichapa otrata vaʼerã umi ermánope: “Haʼekuéra Ñandejára mbaʼe hína, upévare ndovaléi pemanda guasu hesekuéra”. Upéi heʼi avei: “Peẽ ningo ehémplo vaʼerã pe ovecha atýpe g̃uarã” (1 Ped. 5:3, NM). ¿Mbaʼéichapa ansianokuéra ikatu osegi ko konsého? Ñahesaʼỹijomína mokõi rrekisíto okumpli vaʼerã umi ‘kuimbaʼe oñehaʼãmbaitéva oservi ansiánoramo’. Haʼekuéra “iñakãguapy vaʼerã” ha “omoakã porã vaʼerã hogapy”. Pe kuimbaʼe ‘iñakãguapýva’ ontende porã umi téxto oĩva la Bíbliape ha oikuaa mbaʼéichapa oiporúta hekovépe. Haʼe ndojedesesperái ohasa jave peteĩ situasión ijetuʼúva ha opensa porã odesidi mboyve peteĩ mbaʼe. Ha oiméramo pe kuimbaʼe ifamília, ogia porã vaʼerã chupekuéra. Haʼe “ndoikuaáiramo mbaʼéichapa omoakãta hogapy, ¿mbaʼéicha piko oñangarekóta Ñandejára kongregasión rehe?” (1 Tim. 3:1, 2, 4, 5, NM). Umi ansiáno ojapóramo hekopete koʼã mbaʼe, ermanokuéra kongregasiongua ojeroviavéta hesekuéra.

¹⁴ Ansianokuéra ehémplo vaʼerã avei predikasiónpe. Oĩrõ guare ko yvy ape ári, Jesúspe g̃uarã iñimportanteterei vaʼekue pe predikasión. Hiʼarive omboʼe idisipulokuérape mbaʼéichapa ojapo vaʼerã ko tembiapo (Mar. 1:38; Luc. 8:1). Koʼág̃a avei, umi puvlikadór ovyʼa opredika haguére ansianokuéra ndive. Ohecha mbaʼeichaitépa kyreʼỹme ojapo hikuái ko tembiapo ha oaprende avei omboʼe lájagui. Umi ansiáno oiporu meme jave itiémpo opredika hag̃ua pe marandu porã hembiapo hetáramo jepe, ermanokuéra ikyreʼỹ osegi hag̃ua iñehémplo. Umi ansiáno omoĩ avei ehémplo porã ojeprepara porãvo rreunionrã ha okomentávo. Avei oipytyvõ oñemopotĩ jave Salón térã ojejapo jave mantenimiénto (Efes. 5:15, 16; elee Hebreos 13:7).

15. ¿Mbaʼérepa umi ansiáno ovisita vaʼerã ermanokuérape?

¹⁵ Umi oñatende porãva ijovechakuérare ndohejareíri hymba hasy jave térã oñelastimáramo, síno pyaʼe oñatende hesekuéra. Upéicha avei, ansianokuéra pyaʼe oñatende ermanokuérare ohasa asy jave térã oikotevẽramo oñemokyreʼỹ térã oñeakonseha chupekuéra. Umi ermáno ijedáva ha umi hasykatúva katuete oikotevẽ oipytyvõ vaʼerã chupekuéra ndojevalepái rupi ijehe. Péro koʼýte oikotevẽ oñemokyreʼỹ ha oñemombarete chupekuéra la Biblia rupive (1 Tes. 5:14). Mitãrusu ha mitãkuñanguéra sapyʼánte ombohovái vaʼerã “umi mbaʼe ojaposéva jepi mitãrusukuéra” (2 Tim. 2:22, NM). Upévare, umi ansiáno oñangareko porã hag̃ua umi ermánore, tekotevẽ avei ovisita chupekuéra ikatu hag̃uáicha oikuaa mbaʼe situasiónpepa oĩ, ha omokyreʼỹkuaa chupekuéra umi téxto vívliko rupive. Oñeñatende pyaʼéramo umi provlémare, heta vése ikatu oñesolusiona ivaive mboyve.

16. ¿Mbaʼépa ojapo vaʼerã ansianokuéra peteĩ ermáno oikotevẽramo oñepytyvõ?

¹⁶ Péro, ¿mbaʼépa ikatu ojapo peteĩ ermáno oúramo tuicha iprovléma ha oñemomombyry Jehovágui? Disípulo Santiago heʼi vaʼekue: “¿Oĩpa hasýva pende apytépe? Tohenói umi ansiáno kongregasionpeguápe, ha haʼekuéra oñemboʼéta hese ha omonáta hese aséite Jehová rérape. Ha pe ñemboʼe ojejapóva jerovia reheve omongueráta pe hasývape, ha Jehová omopuʼãta chupe. Avei oiméramo opeka raʼe, oñeperdonáta chupe” (Sant. 5:14, 15, NM). Ikatu ningo peteĩ ermáno ofalla Ñandejára renondépe ha noñembojái umi ansiáno rendápe. Péro haʼekuéra ohendúramo mbaʼe situasiónpepa oĩ pe ermáno, pyaʼe oipytyvõ vaʼerã chupe. Umi ansiáno oñemboʼéramo iñermanokuéra rehehápe ha hendivekuéra, ha oipytyvõramo chupekuéra oikotevẽ jave, ohechauka hína oñangareko porãha Jehová ovechakuérare (elee Isaías 32:1, 2).

17. ¿Mbaʼépa ojehupyty umi ansiáno ohaʼangáramo pe ‘ovecharerekua tuichavévape’?

¹⁷ Umi ansiáno oñehaʼãmbaite ohaʼanga opa mbaʼépe pe ‘ovecharerekua tuichavévape’. Koʼã kuimbaʼe jeroviapy tuichaiterei oipytyvõ ermanokuérape ha pe kongregasión oñakãrapuʼã. Upéva ñanemomýi vaʼerã jaagradese ha ñamombaʼeguasu hag̃ua Jehovápe, pe Ovecharerekua Ijojahaʼỹva.