Oĩvaʼerã peteĩ ovecha atýnte ha peteĩ ovecha rerekuánte

‘Peẽ chemoirũvaʼekue, peguapýta avei doce trónope pehusga hag̃ua umi doce trívu oĩvape Israélpe.’ (MAT. 19:​28, NM.)

 1. Mbaʼéichapa Jehová otrata Abrahán familiarekuérape ha mbaʼérepa jaʼe nomboykéi hague umi ambue tetãyguápe?

JEHOVÁ ningo ohayhuetereivaʼekue Abrahánpe ha upévare ohayhu avei ifamiliarekuérape térã umi Israelguápe ha okumpli pe oprometevaʼekue. Jehová ningo oiporavo voi chupekuéra imbaʼerã ha mil quinientos áño rasa oguereko chupekuéra ‘hetã teéramo’ (jaleemína Deuteronomio 7:6). Péro Haʼe nomboykeivaʼekue umi hénte ambue tetãyguápe. Umíva omombaʼeguasuséramo Jehovápe, ikatúnte avei omoirũ Israélpe. Umi ojapóva upéicha ikatu avei oiko Israelguáramo. Upévare haʼekuéra ojapovaʼerã opa mbaʼe Ñandejára léi heʼíva ha umi Israelgua otratavaʼerã chupekuéra iñermánoicha (Lev. 19:​33, 34; 24:22).

 2. Mbaʼépa heʼi Jesús umi hudíope ha mbaʼépa ñañeporandu upévare?

² Péro nañaimoʼãiramo jepe, peteĩ árape Jesús heʼi umi hudíope: ‘Ñandejára rréino ojepeʼáta pendehegui ha oñemeʼẽta peteĩ tetã ojapóvape hembipota’ (Mat. 21:43). Mávapa oĩtahína upe tetã pyahúpe? Mbaʼe iporãvapa ñande jahupyty Jehová ojapo haguére upéicha?

Pe tetã pyahu

3, 4. a) Mbaʼépa heʼi apóstol Pedro pe tetã pyahúre? b) Mávapa oĩ pe tetã pyahúpe?

³ Apóstol Pedro omyesakã porã mávapa oĩ upe tetã pyahúpe heʼívo kristianokuérape: ‘Peẽ katu pe tetã poravopyre, peteĩ ñemoñare saserdóte reheguáva, peteĩ tetã imarangatúva, peteĩ tetã Ñandejára oiporavopyre imbaʼerã ha omombeʼu hag̃ua mbaʼe porãita ojapóva. Peẽ peimékuri pytũmbýpe ha penerenói peike hag̃ua hesapeha porãitépe’ (1 Ped. 2:​9, JMP). Pe profesía heʼi haguéicha, umi isrraelíta raẽvete oĩ pe tetã pyahúpe, umi ogueroviavaʼekue Jesús haʼeha pe Mesías (Dan. 9:27a; Mat. 10:6). Péro upe rire omoirũ chupekuéra heta ndahaʼéiva hudío. Apóstol Pablo heʼivaʼekue voi: ‘Peẽ yma ndahaʼeivaʼekue Ñandejára retã, ha koʼág̃a oikóma pendehegui hetã’ (1 Ped. 2:​10, JMP).

⁴ Apóstol Pedro kárta oñepyrũvo heʼi mávapepa ojeʼe upéicha. Upépe heʼi: ‘Ñandejára ñanemoingo pyahu jey vaʼekue Jesucristo oikove jey rupi omanóva apytégui ha upéicha ñahaʼarõ peteĩ erénsia tapia g̃uarãva, oñembyaiʼỹva ha havẽʼỹva’ (1 Ped. 1:​3, 4, BNP). Upéicharõ pe tetã pyahu haʼehína enterove ungído ohótava yvágape. Ha Gálatas 6:​16-pe oñehenói chupekuéra ‘Israel Ñandejára mbaʼéva’. Ha apóstol Juan umi visión rupive oikuaa ko mbaʼe pe tetã pyahúgui: oĩtaha 144.000 ‘ojejogua tenondevaʼekue yvyporakuéra apytégui Ñandejára ha Ovecharaʼýpe térã Jesucrístope g̃uarã’. Avei oikotaha chuguikuéra ‘saserdóte ha oisãmbyhýta Jesús ndive mil áño pukukue’ (Rev. 5:10; 7:4; 14:​1, 4; 20:6; Sant. 1:18).

Mávapa oĩ avei upe tetãme?

 5. a) Mávarepa oñeñeʼẽhína ojeʼévo ‘Israel Ñandejára mbaʼéva’? b) Mbaʼérepa jaʼe pe tetã Israel orrepresentaha avei ambue tapichápe ha ndahaʼéi umi ungídope añónte?

⁵ Jahecháma haguéicha ojeʼévo ‘Israel Ñandejára mbaʼéva’ oñeñeʼẽhína umi ungídore añónte (Gálatas 6:16). Upéicharõ jepe Jehová oiporúmi avei pe tetã Israel orrepresenta hag̃ua umi ambue tapichápe. Upéva jahechakuaa Jesús heʼivaʼekuére ijapostolkuérape: ‘Che ajapo penendive peteĩ kompromíso, che Ru ojapo haguéicha chendive. Peẽ pekaru ha peyʼu hag̃ua che mesápe che rréinope, ha peguapyvaʼerã umi tróno ári che rréinope pehusga hag̃ua umi doce trívu Israelguápe’ (Luc. 22:​28-30). Ha upéva ningo haʼekuéra ojapóta opa mbaʼe oñembopyahu jey aja térã Jesucristo ogoverna jave mil áño pukukue (jaleemína Mateo 19:28).

6, 7. Mávapa hína umi ‘doce trívu Israelgua’ oñeñeʼẽha Mateo 19:28 ha Lucas 22:​30-pe?

⁶ Jesucristo oisãmbyhy jave mil áño, umi 144.000 oĩtava yvágape oisãmbyhýta hendive, ombaʼapóta saserdóte ha huésramo (Rev. 20:4). Ha mávapepa haʼekuéra ohusga ha oisãmbyhýta? Mateo 19:28 ha Lucas 22:​30-pe ohechauka ohusga ha oisãmbyhytaha umi ‘doce trívu Israelguápe’. Péro, mávapepa orrepresenta ‘umi doce trívu Israelgua’? Jaʼekuaa umíva orrepresentaha opavave yvypóra oikótavare ko yvy ape ári ojerovia rupi Jesús sakrifísiore. Péro norrepresentái umi oisãmbyhýtavape rréi ha saserdóteramo Jesús ndive (jaikuaa yma umi levíta noñemoĩri hague umi doce trívu apytépe). Upéicharõ koʼã téystope ojeʼévo ‘umi doce trívu Israelgua’ oñeñeʼẽhína umi yvypóra ohupytýtavare heta mbaʼe porã umi 144.000 saserdóte poguýpe. Koʼã tapicha ningo oservihína Ñandejára siervokuéra apytépe ha oĩ porã hikuái Jehová renondépe. Ajépa opyta porã la oñembojoja chupekuéra Israel ymaguarére.

⁷ Ñahesaʼỹijomína koʼág̃a ótro téysto. Peteĩ visiónpe apóstol Juan ohechákuri pe jehasa asy guasu mboyve ojesellaiteha umi 144.000-pe. Ha mbaʼépa ohecha upe rire? ‘Ohecha peteĩ aty oúva opa tetãgui’ (Rev. 7:​9, BNP). Ko aty guasu nomanói pe jehasa asy guasúpe ha oike Cristo goviérno poguýpe. Péro ndahaʼéi koʼãva añónte oĩtava upépe, omoirũta avei chupekuéra hetaiterei tapicha oñemoingove jeýva (Juan 5:​28, 29; Rev. 20:13). Opa koʼã oikótava yvy ape ári haʼehína pe ‘doce trívu Israelgua’. Koʼãvape ohusgáta Jesús ha umi 144.000 oisãmbyhýtava hendive (Hech. 17:31; 24:15; Rev. 20:12).

 8. Mbaʼépa jahechakuaa ñahesaʼỹijóramo pe Ñemoĩ porã jey árape ojejapovaʼekue?

⁸ Ñahesaʼỹijóramo mbaʼépa ojejaporakaʼe pe Ñemoĩ porã jey árape (Día de Expiación), jahechakuaáta pe profesía orrepresentaha mbaʼéichapa oĩ térã ombaʼapo oñondive umi 144.000 ha ambue yvyporakuéra (Lev. 16:​6-10). Pe Ñemoĩ porã jey ára ningo ojejapovaʼekue káda áño. Upe jave pe saserdóte guasu osakrifika raẽ peteĩ tóro Jehovápe ‘oheja rei hag̃ua chupe ha hogayguakuérape hembiapo vaikue’. Upéicha avei Jesús sakrifísio oipytyvõ raẽ umi saserdóte ha rréi yvagapeguápe, ipoguýpe oservívape. Péro pe Ñemoĩ porã jey árape ojeporuvaʼekue avei mokõi kavara mácho ojeheja rei hag̃ua hembiapo vai ambue Israelguakuérape. Ha ñande ningo jaikuaáma umi saserdóte orrepresentaha umi 144.000-pe ha ambue Israelgua katu umi oikótavape opa ára g̃uarã ko yvy ape ári. Upéicharõ Mateo 19:​28-pe ‘umi doce trívu Israelgua’ orrepresenta umi yvypóra ojeroviávape avei Cristo sakrifísiore.a Ha ndahaʼéi umi saserdóte ungídope.

 9. Pe visión Ezequiel ohechavaʼekuépe, mávapepa orrepresenta umi saserdóte ha umi isrraelíta?

⁹ Ñahesaʼỹijomína ótro ehémplo, Ezequiel ohechárõ guare Jehová témplo peteĩ visión rupive (Eze., kapítulo 40 guive 48 peve). Upe visiónpe haʼe ohecha umi saserdóte ombaʼapo Jehová témplope, oporohekomboʼe ha oheja Jehová ojokuái chupekuéra oñemoñeʼẽ ha oporokorrehi hag̃ua (Eze. 44:​23-31). Umi ambue isrraelíta opa trivupegua katu oho omombaʼeguasu hag̃ua Jehovápe ha omeʼẽ chupe sakrifísio (Eze. 45:​16, 17). Ko visión Ezequiel ohechavaʼekuépe ningo umi saserdóte orrepresentahína umi ungídope. Umi ambue isrraelíta katu orrepresenta umi yvypóra oikótavape ko yvy ape ári. Koʼãva ningo iñeʼẽrendu umi ungído omoakãvape chupekuéra omombaʼeguasu hag̃ua Jehovápe tekomarangatúpe.

10, 11. a) Mbaʼéichapa jahecha oñekumpliha koʼág̃a Jesús heʼivaʼekue? b) Mbaʼépa ñambohováita koʼág̃a?

¹⁰ Jesús omombeʼuvaʼekue orekoha ‘ambue ovecha aty’ ndahaʼéiva pe ‘ovecha aty michĩvapegua’ térã ungído (Juan 10:16; Luc. 12:32). Ha umívare heʼi: ‘Chupekuéra avei aguerúta ha ohendúta che ñeʼẽ, ha péicha oĩta peteĩ atýnte ha peteĩ ovecha rerekua’. Ajépa ñanemokyreʼỹete jahechávo mbaʼéichapa oñekumpli Jesús heʼivaʼekue! Koʼág̃a ningo oñomoirũma koʼã mokõi aty: pe ovecha aty michĩva ha pe ovecha aty guasu (jaleemína Zacarías 8:23). Pe ovecha aty guasu ndojapóiramo jepe umi ungído rembiapo, oservi hendivekuéra Jehovápe.

¹¹ Jahecháma haguéicha, Jehová oiporu jepi umi isrraelíta ndahaʼéivape saserdóte orrepresenta hag̃ua umi ambue ovechakuérape. Ha heʼisépa upéva umi oikótava opa ára g̃uarã ko yvy ape ári orekoha avei derécho hoʼúvo pe pán ha víno Conmemoracionhápe? Ñambohovaimína upéva koʼág̃a.

Pe kompromíso pyahu

12. Mbaʼeichagua kompromíso pyahúpa Jehová omombeʼu ojapotaha?

¹² Jehová ningo omombeʼu ojapotaha peteĩ kompromíso pyahu isiervokuéra ndive heʼívo: ‘Kóvata hína pe kompromíso ajapótava Israelgua ndive upéramo. Amoĩta che léi ipyʼapýpe ha ahaíta iñeʼãme. Che aikóta chupekuéra Ijáraramo ha haʼekuéra oikóta che retãramo’ (Jer. 31:​31-33). Ko kompromíso pyahu rupive Jehová okumplíta opa ára g̃uarã iñeʼẽ omeʼẽvaʼekue Abrahánpe (jaleemína Génesis 22:18).

13, 14. a) Mávapa oike pe kompromíso pyahúpe? b) Mávapa hína umi ohupytýtava heta mbaʼe porã pe kompromíso pyahu rupive ha mbaʼéichapa oñemoĩ hikuái ipoguýpe?

¹³ Pe pyhare omano mboyvemi Jesús oñeʼẽ voi ko kompromíso pyahúre heʼívo: ‘Ko kópa haʼe pe kompromíso pyahu ojejapóva che ruguy rupi, penderehehápe oñeñohẽtava’ (Luc. 22:​20, BNP; 1 Cor. 11:25). Enterove kristiáno piko oike ko kompromíso pyahúpe? Nahániri. Oĩnte la oikéva upe kompromíso pyahúpe, umíva apytépe oĩ umi apóstol hoʼuvaʼekue pe víno upe pyharépe.b Ha umívandi Jesús ojapo peteĩ kompromíso ogoverna hag̃ua hendive (Luc. 22:​28-30). Upéicharõ oisãmbyhýta hikuái Jesucristo ndive pe Rréino (Luc. 22:15).

¹⁴ Ha mbaʼépa jaʼekuaa umi oikótavare ko yvy ape ári pe Rréino guýpe? Koʼãva ningo ohupytýta heta mbaʼe porã pe kompromíso pyahu rupive (Gál. 3:​8, 9). Haʼekuéra noĩriramo jepe pe kompromíso pyahúpe, oñemoĩ hikuái ipoguýpe. Upéicha voi Jehová heʼivaʼekue proféta Isaías rupive: ‘Umi tetã ambuegua ojeroviáva cherehe oiko hag̃ua che rembiguáiramo ha cherayhúva omboarete pe sábado ani hag̃ua oñemongyʼa ha oñemoĩva pe che kompromíso poguýpe, umívape aguerúta che sérro marangatúpe ha ambovyʼáta che róga guasu oñeñemboʼehápe. Che rógare ojeʼéta opa tetãme g̃uarã ñemboʼe róga’ (Isa. 56:​6, 7).

Mávapa hoʼuvaʼerã pe pán ha víno?

15, 16. a) Mbaʼépa heʼi apóstol Pablo pe kompromíso pyahúre? b) Mbaʼérepa ndoʼuivaʼerã pe pán ha víno umi kristiáno oikótava ko yvy ape ári?

¹⁵ Apóstol Pablo heʼi umi oikéva pe kompromíso pyahúpe ‘ikatuha oike pe lugár marangatúpe’ (jaleemína Hebreos 10:​15-20). Chupekuéra ‘oñemeʼẽta pe Ñandejára sãmbyhy ndaikatumoʼãiva oñemonguʼe’ (Heb. 12:28). Ha pe “kópa” orrepresenta rupi pe kompromíso pyahu, omboyʼuvaʼerã chugui umi kristiáno ohótava añoite yvágape oiko hag̃ua rréi ha saserdóteramo Jesucristo ndive. Hesekuéra avei ojeʼe haʼeha pe Ovecharaʼy nóvia (2 Cor. 11:2; Rev. 21:​2, 9). Upévare ambue ohóva Conmemoracionhápe ojesarekónte pyʼaporãme ha ndoʼúi pe pán ha víno.

¹⁶ Apóstol Pablo heʼivaʼekue ñanepytyvõ avei ñantende hag̃ua mbaʼérepa umi ohaʼarõva oiko ko yvy ape ári ndoʼúi pe pán ha víno Conmemoración jave. Pe apóstol heʼivaʼekue umi ungídope: ‘Peʼu jave ko pán ha peʼu jave pe kopapeguágui, pesegi pemombeʼu Cristo omano hague, haʼe ou peve’ (1 Cor. 11:26). Ha arakaʼépa haʼe ou jeýta? Ou jey vove ogueraha hag̃ua yvágape pe último ungído (Juan 14:2). Upévare ikatu jaʼe pe Cena del Señor ndojejapomoʼãiha opa árare. Ha umi ungído “opytáva” gueteri ko yvy ape ári osegíta ojapo ko “Cena” ohopa peve hikuái yvágape (Rev. 12:17). Péro umi oikótava opa ára g̃uarã ko yvy ape ári hoʼúramo pe pán ha víno ningo pe Conmemoración ojejapovaʼerã opa árare.

‘Haʼekuéra oikóta che retãramo’

17, 18. Mbaʼéichapa oñekumpli pe profesía oĩva Ezequiel 37:​26, 27-pe?

¹⁷ Jehová omombeʼu mbaʼéichapa oikóta hembiguaikuéra peteĩ ñeʼẽme. Haʼe heʼi: ‘Añembopyʼapeteĩta hendivekuéra oiko hag̃ua hikuái tapia g̃uarã pyʼaguapýpe, amohenda porãta chupekuéra, amoñemoñáta chupekuéra, ha amoĩta che róga guasu ijapytepekuéra opaite árape g̃uarã. Ijapytepekuéra oĩta che róga guasu, ha aikóta ijára teéramo, ha haʼekuéra oikóta che retãramo’ (Eze. 37:​26, 27, ÑÑB).

¹⁸ Enterove kristiáno ningo ohupyty heta mbaʼe porã. Mbaʼérepa? Jehová okumpli rupi ipromésa ha oñembopyʼapeteĩ isiervokuéra ndive. Jehová ningo heʼi voi haʼekuéra iñeʼẽrendúramo oikotaha pyʼaguapýpe. Ha jahechakuaa hesekuéra omoheñoiha hekovépe umi mbaʼe porã oúva Ñandejára espíritugui. Avei omombaʼeguasu hikuái Ñandejárape hekopete. Haʼekuéra oiko Ñandejára retãramo pórke ni mbaʼeveichavérõ nomombaʼeguasúi taʼanga ha Jehovápe añoite omombaʼeguasu.

19, 20. a) Mávapa omoirũ pe Israel Ñandejára mbaʼévape? b) Mbaʼépa ojehupyty pe kompromíso pyahu rupive?

¹⁹ Ajépa javyʼaite jahecha haguére mbaʼéichapa oĩ peteĩ ñeʼẽme umi ungído ha umi oikótava opa ára g̃uarã ko yvy ape ári! Pe ovecha aty guasu ndohomoʼãiramo jepe yvágape, ovyʼaiterei ombaʼapo haguére umi ohótava ndive. Umi oikótava ko yvy ape ári katu omoirũ rupi pe Israel Ñandejára mbaʼévape oike Jehová siervokuéra apytépe. Ha hesekuéra oñekumpli ko profesía heʼíva: ‘Heta tetã ojoajuvaʼerã Jehová ndive upe ára upévape, ha oikóta hikuái avei hetãramo, ha Haʼe oikóta ijapytepekuéra’ (Zac. 2:11; 8:21; jaleemína Isaías 65:22 ha Revelación 21:​3, 4).

²⁰ Jehová ningo ojapo opa koʼã mbaʼe pe kompromíso pyahu rupive. Jahecha opaichagua tapicha omoirũha koʼág̃a Ñandejára siervokuérape (Miq. 4:​1-5). Koʼãva osegi oñemoĩ pe kompromíso pyahu poguýpe ha ojapo opa mbaʼe ojeʼehaichaite chupekuéra (Isa. 56:​6, 7). Upéicha rupi oiko hikuái vyʼápe ha pyʼaguapýpe pe Israel Ñandejára mbaʼéva ndive. Ajépa javyʼaite jahupyty haguére péicha hetaite mbaʼe porã koʼág̃a ha opa ára g̃uarã!

[Nóta]

Reikuaápa koʼã mbaʼe?

• Mávapepa orrepresenta ‘umi doce trívu Israelgua’?

• Mbaʼéichapa pe kompromíso pyahu rupive ombaʼapo oñondive umi ungído ha ambue ovechakuéra?

• Enterove kristiánopa hoʼuvaʼerã pe pán ha víno Conmemoración jave?

• Mbaʼéichapa ojeʼe oikotaha oñondive umi ungído ha ambue ovechakuéra?

[Nóta oĩva taʼanga ndive páhina 25]

(Emaña pe kuatiañeʼẽre rehecha hag̃ua osẽ hagueichaite ko párte)

Heta oĩ omoirũva pe Israel Ñandejára mbaʼéva

7.313.173

4.017.213

1.483.430

373.430

1950 1970 1990 2009