Jesús ojapo heta milágro Capernáumpe

Jesús oinvita kuri Pedro, Andrés, Santiago ha Juánpe omoirũ meme hag̃ua chupe. Og̃uahẽvo sábado oho hikuái Capernáumpe peteĩ sinagógape. Upépe Jesús oñepyrũ oporomboʼe, ha umi hénte opyta ijurujái ohendúvo chupe. Haʼe ningo oporomboʼekuaaiterei voi, ndojoguaiete umi líder rrelihiósope.

Upe díape avei oho pe sinagógape peteĩ endemoniádo, ha oñepyrũ osapukái: “Nde, Jesús Nazaretgua, ¿maʼerã guaʼu piko reju? ¿Reju piko orerundi hag̃ua mbaʼe? Aikuaa porãiterei nde haʼeha Ñandejára Remimbou Marangatu”. Jesús ojaʼo pe demóniope ha heʼi chupe: “¡Ekirirĩke, ha esẽ chugui!” (Marcos 1:24, 25).

Upémarõ pe demónio ojapete yvýre pe kuimbaʼépe, omboatáke chupe ha osapukái hatã osẽnguévo chugui. Pe demónio osẽ pe kuimbaʼégui “ojapoʼỹre hese mbaʼeve” (Lucas 4:35). Enterovete umi hénte oñesorprende, ha oñeporandujoa hikuái: “¿Mbaʼe piko kóva? [...] Autorida reheve omanda umi demóniope jepe, ha haʼekuéra iñeʼẽrendu chupe” (Marcos 1:27). Ko suséso pyaʼeterei ojekuaapa Galiléare.

Jesús ha idisipulokuéra osẽ pe sinagógagui ha oho Simón Pedro rógape. Upépe Pedro suégra hasyete hína, iñakãnundu pepe anga. Umi oĩva upépe ojerure Jesúspe tomonguerami pe kuñakaraípe. Upémarõ Jesús oñemboja hendápe, ojagarra chupe ipógui ha omopuʼã chupe. Upepete pe kuñakarai okuera, ha oñepyrũ oñekosina chupekuéra.

Upéi kuarahy oike rire, ojegueru Pedro rógape opáguio ládo umi hasývape. Ha sapyʼaitépe haimete voi entéro umi hénte oikóva pe siudápe ijatypa upépe. “Entéro orekóva hógape hasýva, tahaʼe haʼéva imbaʼasy, ogueru chupekuéra Jesús rendápe. Haʼe omoĩ ipo hiʼarikuéra ha omonguera enterovépe.” (Lucas 4:40.) Jesús omonguerapaite umi hénte hasývape, ojeprofetisa haguéicha (Isaías 53:4). Avei omonguera umi endemoniádope. Umi demónio osẽvo umi héntegui katu osapukái ha heʼi: “Nde hína Ñandejára Raʼy” (Lucas 4:41). Umi demónio ningo oikuaa Jesús haʼeha pe Cristo. Péro Jesús ojaʼo ha omokirirĩ chupekuéra, pórke ndoipotái oñepensa haʼekuéra omeʼẽha testimónio oúva Ñandejáragui.