Umi opredikáva umi notísia porã

JEHOVÁ ombou vaʼekue Itaʼýra Jesucrístope ñande jasegi hag̃ua iñehémplo porãite (1 Ped. 2:21). Peteĩ persóna oñepyrũvo omoirũ Jesucrístope oñepyrũ omombeʼu umi notísia porã ha oiko chugui Ñandejára siérvo. Jesús heʼi vaʼekue javyʼataha ñamoirũvo chupe, haʼe heʼi: “Peju che rendápe enterove peẽ penekaneʼõva ha pendekárga pohýiva, ha che pombopiroʼýta. Pehupi pende ári che júgo ha peaprende chehegui. Che ningo ndachepochyreíri ha cheumílde che pyʼaite guive, upévare katuete pombopiroʼýta” (Mat. 11:28, 29). Umi oaseptámava ko invitasión oikuaa siertoha Jesús opromete vaʼekue.

² Jesús ningo pe predikadór iñimportantevéva ha haʼe oinvita vaʼekue algúnope omoirũ hag̃ua chupe (Mat. 9:9; Juan 1:43). Haʼe ombokatupyry idisipulokuérape oporomboʼe hag̃ua ha upéi omondo chupekuéra ojapo hag̃ua pe traváho haʼe voi omoñepyrũ vaʼekue (Mat. 10:1–11:1; 20:28; Luc. 4:43). Upe rire haʼe omondo 70 disípulope omombeʼu hag̃ua avei umi notísia porã oñeʼẽva Ñandejára Rréinore (Luc. 10:1, 8-11). Omondórõ guare idisipulokuérape, heʼi: “Peẽme penerendúva, chéve avei cherendu. Ha oimeraẽ nopenáiva penderehe, nopenái avei cherehe. Ha pe persóna nopenáiva cherehe, nopenái pe chembou vaʼekuére” (Luc. 10:16). Péicha Jesús ohechauka porã tuichaitereiha pe rresponsavilida oñemeʼẽva chupekuéra. Haʼekuéra orrepresentáta kuri Jesúspe ha Ñandejára Todopoderósope. Ha koʼág̃a avei umi oaseptáva pe invitasión omoirũ hag̃ua Jesúspe orrepresenta chupe ha Jehovápe (Luc. 18:22; 2 Cor. 2:17). Koʼãvape Ñandejára omanda opredika hag̃ua umi notísia porã oñeʼẽva Ñandejára Rréinore ha omboʼe hag̃ua umi héntepe (Mat. 24:14; 28:19, 20).

³ Ñande ningo jaasepta Jesús invitasión ha ñamoirũ chupe, upévare jarresivi heta vendisión, por ehémplo ikatu jaikuaave Jehovápe ha Jesucrístope (Juan 17:3). Avei Jehová ñanerekomboʼe, ha haʼe ñanepytyvõ rupi ñakambia ñapensa lája, jaheja pe kondúkta yma guare ha jaiko Jehová léi heʼiháicha (Rom. 12:1, 2; Efes. 4:22-24; Col. 3:9, 10). Ñamombaʼeterei ningo koʼã mbaʼe, upévare jadesidi ñañemeʼẽ Jehovápe ha upéi jajevautisa. Upe moménto guive oiko ñandehegui Ñandejára siérvo térã itestígo.

⁴ Jaservi hag̃ua Ñandejárape ndajajapói vaʼerã mbaʼeve ivaíva ha ñane korasõ ipotĩ vaʼerã (Sal. 24:3, 4; Is. 52:11; 2 Cor. 6:14–7:1). Jajerovia rupi Jesucrístore ñane konsiénsia ipotĩ (Heb. 10:19-23, 35, 36; Apoc. 7:9, 10, 14). Apóstol Pablo omokyreʼỹ vaʼekue kristianokuérape ojapo hag̃ua entéro mbaʼe ombotuicha hag̃ua Ñandejárape, ani hag̃ua omoñepysanga térã oofende ótrope. Apóstol Pedro heʼi vaʼekue iñimportantetereiha ñanekondúkta porã ikatu hag̃uáicha umi ndojeroviáiva oñepyrũ iñeʼẽrendu (1 Cor. 10:31, 33; 1 Ped. 3:1). ¿Mbaʼéichapa ikatu ñaipytyvõ ótrope oñepyrũ hag̃ua opredika umi notísia porã ñanendive?

⁵ Reñepyrũ guive remboʼe la Biblia peteĩ persónape remokyreʼỹ vaʼerã chupe omombeʼu hag̃ua ótrope umi mbaʼe oaprendéva hína. Haʼe ikatu omombeʼu ihentekuérape, iñamigokuérape, ikompañéro de traváhope ha hetavépe. Iñimportanteterei ñamokyreʼỹ chupekuéra ojapo hag̃ua upéva ikatu hag̃uáicha osegi Jesúspe ha opredika umi notísia porã (Mat. 9:9; Luc. 6:40). Upe persóna ijerovia mbaretevévo ohóvo ha ojepokuaárõ oñeʼẽ umi mbaʼe oaprendévare, ifasilvéta chupe ojedesidi hag̃ua osẽ opredika pe kongregasión ndive.

⁶ Reinvita mboyve peteĩ persónape osẽ hag̃ua opredika ogahárupi, reĩ vaʼerã segúro okumplípa umi rrekisíto. Umi hénte ohechávo peteĩ persónape osẽha opredika ogahárupi heʼíma hese haʼeha testígo de Jehová. Upévare umi osẽtava opredika tekotevẽ oiko Jehová léi heʼiháicha, ha okumpli vove umi rrekisíto ikatu oiko chuguikuéra puvlikadór no vautisádo.

⁷ Jastudiávo peteĩ persónandi ñañeʼẽma umi enseñánsa oĩvare la Bíbliape ha katuete jaikuaáma avei mbaʼe situasiónpepa oĩ pe estudiánte. Ikatu oime nde rehecháma ne estudiánte oñepyrũha ojapo la Biblia heʼíva. Upéicharamo jepe umi ansiáno oñembyatýta nendive ha pe estudiánte ndive oikuaave hag̃ua algúna kósa chugui.

⁸ Pe koordinadór del kuérpo de ansiáno ohecháta mokõi ansiáno oñembyaty hag̃ua penendive (peteĩva umi ansiáno haʼe vaʼerã pe komite de servisiopegua). Oimérõ saʼieterei umi ansiáno, ikatu oñembyaty penendive peteĩ ansiáno ha peteĩ siérvo ministeriál ikatupyrýva. Umi ermáno ojeelehíva upearã oñehaʼãmbaite vaʼerã oñeʼẽ penendive ensegída. Por ehémplo peteĩ rreuniónpe oikuaárõ pe estudiánte osẽsemaha opredika, ikatu voi opa rire upe rreunión oñembyatýma penendive. Haʼekuéra oñemongetáta pe estudiánte ndive trankílo porã. Ojeaprova mboyve pe estudiántepe oiko hag̃ua chugui puvlikadór no vautisádo, umi ansiáno ohecha vaʼerã koʼã mbaʼe:

1. 1) Oguerovia vaʼerã la Biblia haʼeha Ñandejára Ñeʼẽ (2 Tim. 3:16).

2. 2) Oikuaa porã ha oguerovia vaʼerã umi enseñánsa iñimportantevéva omboʼéva la Biblia. Péicha oñeporandu jave chupe umívare ikatúta okontesta la Biblia rupive, ojesegi rangue umi rrelihión japu omboʼévare térã haʼe opensávarente (Mat. 7:21-23; 2 Tim. 2:15).

3. 3) Oho vaʼerã umi rreunionhápe Ñandejára puévlondi la Biblia omandaháicha, noiméiramo oreko algún impediménto (Sal. 122:1; Heb. 10:24, 25).

4. 4) Oikuaa vaʼerã la Biblia heʼíva pe tekovaíre, por ehémplo pe ñemoakãratĩre, peteĩ persóna omendáramo mas de una persónandi ha peteĩ kuimbaʼe oikóramo kuimbaʼéndi térã kuña kuñándi. Oiméramo oiko hína peteĩ persónandi omendaʼỹre, omenda vaʼerã pe léi omandaháicha (Mat. 19:9; 1 Cor. 6:9, 10; 1 Tim. 3:2, 12; Heb. 13:4).

5. 5) Oikuaa porã vaʼerã la Biblia oproiviha jakaʼu. Ndovaléi oipuru mbaʼeveichagua sustánsia oenvisiáva chupe térã oafektátava iménte tahaʼe naturál térã umi ojefavrikáva, ndahaʼéiramo peteĩ doktór omandágui chupe (2 Cor. 7:1; Efes. 5:18; 1 Ped. 4:3, 4).

6. 6) Ohechakuaa vaʼerã mbaʼérepa ndovaléi ijúnta vai (1 Cor. 15:33).

7. 7) Oiméramo haʼe opertenese raʼe peteĩ rrelihión japúpe, ojeietéma vaʼerã chugui. Ndohovéi vaʼerã umi irreunionkuérape ni ndoapojái vaʼerã mbaʼeveichagua aktivida ojapóva hikuái (2 Cor. 6:14-18; Apoc. 18:4).

8. 8) Ndoikéi vaʼerã polítikape ha ojeiete vaʼerã chugui (Juan 6:15; 15:19; Sant. 1:27).

9. 9) Ndoapojái vaʼerã ni noñentremetéi vaʼerã mbaʼevetépe umi tetã oiko vai jave (Is. 2:4).

10. 10) Añetehápe oservise vaʼerã Jehovápe itestígoramo (Sal. 110:3).

⁹ Umi ansiáno ndopillaporãiramo mbaʼépa opensa pe estudiánte koʼã púntore, oporandu vaʼerã chupe, upearã ikatu oipuru umi téxto oñemongeta hag̃ua hendive. Pe estudiánte ontende vaʼerã enterove opredikáva umi testígo de Jehovándi osegi vaʼerãha umi mandáto oĩva la Bíbliape. Umi mbaʼe heʼíva pe estudiánte oipytyvõta umi ansiánope ohechakuaa hag̃ua ontendépa hína umi mbaʼe oñehaʼarõva chugui ha okumplípa hína ikatuháicha umi rrekisíto oñepyrũma hag̃ua osẽ opredika.

¹⁰ Umi ansiáno ensegidamínte omombeʼu vaʼerã pe estudiántepe oimérõ ikatúma oiko chugui puvlikadór. Normálmente umi ansiáno oñeʼẽmba rire pe estudiánte ndive ikatúma heʼi chupe mbaʼépa odesidi hikuái. Pe estudiánte okumplíramo umi rrekisíto umi ansiáno ofelisitáta chupe ikatúma haguére oservi de puvlikadór (Rom. 15:7). Umi ansiáno omokyreʼỹ vaʼerã chupe osẽma hag̃ua opredika ikatu vovéntema ha ontrega hag̃ua iñinfórme pe mes opávo. Umi ansiáno oexplika vaʼerã chupe peteĩ estudiánte okumpli vove umi rrekisíto oservi hag̃ua de puvlikadór no vautisádo ha ontrega vove pe primer infórme, oñemyenyhẽha peteĩ tarhéta hérava Rrehístro de puvlikadór de la kongregasión. Upe tarhétape oñemoĩ héra ha oñeñongatu pe archívo kongregasionpegua ndive. Umi ansiáno ombyaty umi dáto de káda puvlikadór ikatu hag̃uáicha pe organisasión oñatende porã umi traváho ojapóvare umi testígo de Jehová ko múndo tuichakuére, ha avei ikatu hag̃uáicha umi puvlikadór opartisipa umi aktivida ojejapóvape kongregasiónpe ha orresivi pe ajúda espirituál oikotevẽva. Avei umi ansiáno ikatu omomanduʼa umi puvlikadór pyahúpe umi idáto personál ojepurutaha ojerekóvo enkuénta la heʼíva pe Política global de protección de datos personales de los testigos de Jehová, oĩva jw.org-pe.

¹¹ Enterove jaikuaa porãve vaʼerã pe puvlikadór pyahúpe ha jahechauka vaʼerã javyʼaha oprogresa haguére kongregasiónpe. Upéva katuete opokóta hese ha omomýita chupe osẽ meme hag̃ua predikasiónpe ha ombaʼaposeve hag̃ua Jehová servísiope (Filip. 2:4; Heb. 13:2).

¹² Umi ansiáno odesidi rire pe estudiánte ikatuha oservi de puvlikadór no vautisádo, omeʼẽta chupe pe lívro hérava Pe organisasión ojapóva Jehová volunta. Pe estudiánte ontrega rire pe primer infórme de predikasión ojejapóta peteĩ anúnsio mbykýva pe kongregasiónpe ha ojeʼéta pe estudiánte haʼemaha puvlikadór no vautisádo.

¹³ Umi mitã ikatu okumpli umi rrekisíto oservi hag̃ua de puvlikadór. Jesús orresivi porã vaʼekue umi mitãme ha ovendesi chupekuéra (Mat. 19:13-15; 21:15, 16). Añetehápe umi túa hína la prinsipálmente oipytyvõ vaʼerã ifamiliakuérape, péro umi ermáno ikatu avei oipytyvõ umi mitã opredikasémavape. Oiméramo nde peteĩ túa térã sy, remoĩ vaʼerã ehémplo iporãva resẽvo kyreʼỹme predikasiónpe, péva omomýita chupe osegi hag̃ua ne ehémplo. Peteĩ mitã ikondúkta porãva heʼíramo osẽsemaha opredika, ¿mbaʼéichapa ikatu oñepytyvõ porãve chupe?

¹⁴ Iporãta pe túa oñeʼẽramo peteĩ ansiáno oĩvandi pe komite de servísiope ohecha hag̃ua hikuái upe mitã okumplímapa umi rrekisíto oiko hag̃ua chugui puvlikadór. Pe ansiáno koordinadór ohecháta arakaʼépa ikatu mokõi ansiáno oñerreuni hendivekuéra. Upe rreuniónpe oĩ vaʼerã itúa ha isy haʼéva Testígo, térã pe persóna oñenkargáva pe mitãre. Peteĩva umi ansiáno haʼe vaʼerã pe komite de servisiopegua. Pe mitã oikuaáramo umi enseñánsa iñimportantevéva oĩva la Bíbliape, ha añetehápe osẽséma opredika, upéva ohechauka oprogresa porãha ohóvo. Umi ansiáno ohecha rire koʼã mbaʼe ha umi ótro téma oñeanalisáva avei umi kakuaándi, ohecháta hikuái okumplímapa umi rrekisíto oiko hag̃ua chugui puvlikadór no vautisádo (Luc. 6:45; Rom. 10:10). Umi ansiáno oñembyaty jave peteĩ mitãndi natekotevẽmoʼãi oanalisapaite hendive umi rrekisíto oñeanalisáva peteĩ okakuaapámava ndive.

¹⁵ Oñembyaty vove upe mitãndi, umi ansiáno ofelisita vaʼerã chupe oprogresa haguére ha omokyreʼỹ vaʼerã chupe ojevautisa hag̃ua upe rire. Oguerohory vaʼerã avei ituakuérape pórke haʼekuéra heta oñehaʼã omboʼe hag̃ua ifamíliape. Ikatu hag̃uáicha umi túa osegi oipytyvõ ifamíliape, umi ansiáno heʼi vaʼerã chupekuéra olee hag̃ua ko lívro páhina 179 al 181, pe párte hérava “Peteĩ mensáhe tuakuérape g̃uarã”.

¹⁶ Oimérõ reikuaa porãvéma Jehovápe, rehayhuve chupe, ha rekumplíma umi rrekisíto resẽ hag̃ua repredika, koʼág̃a tekotevẽ remombareteve ne amista Jehovándi. ¿Mbaʼéichapa ikatu rejapo upéva? Reñemeʼẽ vaʼerã Jehovápe ha rejevautisa (Mat. 28:19, 20).

¹⁷ Ñañemeʼẽ Jehovápe heʼise jajapoha peteĩ orasión ha ñapromete chupe jaipurutaha ñande rekove jaadora hag̃ua chupe ha jaguatataha hapére. Heʼise jaadorataha chupe añoite pára siémpre (Deut. 5:9). Ndete redesidi vaʼerã reñemeʼẽtapa Jehovápe, avave ndaikatúi ojapo upéva nde vése.

¹⁸ Péro ndahaʼéi rejapónte vaʼerã peteĩ orasión remombeʼuhápe Jehovápe reñemeʼẽtaha chupe. Tekotevẽ rehechauka ótrope reñemeʼẽma hague, ha upéva rejapo rejevautisávo Jesús ojapo haguéicha (1 Ped. 2:21; 3:21). Oimérõ redesidíma reservi Jehovápe ha rejevautisase, ¿mbaʼépa rejapo vaʼerã? Remombeʼu vaʼerã pe koordinadórpe. Haʼe ohecháta mávapa umi ansiáno ikatútava oñeʼẽ nendive ohecha hag̃ua rekumplímapa umi rrekisíto oĩva la Bíbliape rejevautisa hag̃ua. Ikatu rehecha ko lívro páhina 182 al 184 pe párte hérava “Peteĩ mensáhe umi puvlikadór no vautisádope g̃uarã” ha páhina 185 al 207, pe párte hérava “Porandu umi ojevautisasévape g̃uarã”.

¹⁹ Enterovénte ovyʼa oñemombeʼúvo mbaʼéichapa okakuaa ohóvo Jehová organisasión. Jesús heʼi vaʼekue umi disípulope ojepredikataha umi notísia porã ko yvy tuichakuére, upévare kristianokuéra oikuaaseterei mbaʼéichapa oñekumpli ohóvo upéva (Mat. 28:19, 20; Mar. 13:10; Hech. 1:8).

²⁰ Jesús segidorkuéra ovyʼaiterei vaʼekue ohendúvo umi mbaʼe porã ojehupytýva pe predikasión rupive (Mar. 6:30). Lívro de Hechos omombeʼu 120 disípulorupi orresivi hague pe espíritu sánto pe Pentekostés áño 33-pe. Tiémpo riremi oĩma kuri 3 mil disípulorupi ha upéi 5 mil rupi. Avei oñemombeʼu ‘káda día Jehová osegi hague ogueru umi héntepe omoirũ hag̃ua chupekuéra, umíva hína umi ojesalváva’ ha oñemombeʼu avei ‘hetaiterei saserdóte oñepyrũ hague ojerovia’ (Hech. 1:15; 2:5-11, 41, 47; 4:4; 6:7). ¡Mbaʼeichaitépa oime vaʼerã omokyreʼỹ koʼã notísia porã umi disípulope! Katuete upe rire osegi opredika kyreʼỹme okumpli hag̃ua oñemandáva chupekuéra, oñemoĩ mbaretéramo jepe hesekuéra umi omoakãva judiokuéra rrelihión.

²¹ Áño 60 ha 61 rupi apóstol Pablo omombeʼu peteĩ kárta rupive umi Colosasguápe umi notísia porã ‘okakuaa ha oñemombeʼu hague oparupiete ko múndope’, ha ‘ojepredikáma hague ko múndo tuichakuére’ (Col. 1:5, 6, 23). Umi kristiáno ypykue osegi vaʼekue Ñandejára Ñeʼẽ heʼíva, ha pe espíritu sánto omombarete chupekuéra opredika hag̃ua oñehundi mboyve Jerusalén áño 70-pe. Katuete umi kristiáno ikyreʼỹ vaʼekue ohendúvo ojehupytyha heta mbaʼe porã pe predikasión rupive.

²² Upéicha avei Jehová organisasión koʼag̃agua oñehaʼãmbaite orekopaite umi infórme ohechaukáva mbaʼéichapa oñekumpli Mateo 24:14, upépe heʼi: “Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin”. Upéicharõ entéro ñañemeʼẽmava Ñandejárape jareko peteĩ traváho urhénte jajapo hag̃ua. Káda uno jajapo vaʼerã ñande párte oñekumpli hag̃ua pe téxto heʼíva ou mboyve pe fin. Jehová ningo oñenkargáta ojejapopa hag̃ua upe traváho, ha haʼe ñanevendesíta ñañehaʼãramo jajapo umi mbaʼe haʼe oguerohorýva (Ezeq. 3:18-21).

²³ ¿Mbaʼépa ñainforma vaʼerã? Jehová organisasión omeʼẽ peteĩ óha hérava Infórme predikasión rehegua ha upépe heʼi voi mbaʼépa reanota vaʼerã. Péro katuete ideprovéchota ndéve koʼã informasión.

²⁴ Pe párte heʼihápe “Puvlikasión (oñeimprimíva ha elektróniko)” remoĩ vaʼerã mboy puvlikasión oñeimprimíva térã elektrónikopa remeʼẽ térã rekomparti umi ndahaʼéivandi Testígo. Pe párte heʼívape “Vidéo rehechaukáva” remoĩ vaʼerã mboy vésepa rehechauka raʼe umi vidéo upe méspe.

²⁵ Pe párte heʼihápe “Rrevisíta”, remoĩ vaʼerã mboy vésepa reñeʼẽ jey la Bíbliare peteĩ persóna ohendu porã vaʼekuéndi ñane mensáhe, péro ndahaʼéiva Testígo. Rejapo hag̃ua peteĩ rrevisíta, ikatu reho pe persóna rendápe, rejapo chupe peteĩ kárta, rehenói chupe por teléfono, remondo chupe peteĩ mensáhe por teléfono o korréo elektróniko rupive, térã reheja chupe peteĩ puvlikasión. Káda ke rejapo peteĩ estúdio bíblico, ikatu reanota peteĩ rrevisíta. Oiméramo peteĩ famíliape oĩ mitã neʼĩrava ojevautisa, pe túa térã sy odirihíva pe estúdio de família ikatu oanota peteĩ rrevisíta káda semána.

²⁶ Peteĩ estúdio ningo normálmente ojejapo una ves por semána, upéicharõ jepe reanota vaʼerã peteĩ estúdio bíbliconte káda mes ne infórmepe. Umi puvlikadór oanota vaʼerã káda mes mboy estúdiopa oreko en totál. Ikatu reanota umi estúdio rejapóva umi ndojevautisáivape, umi ojevautisa ramóvape ha neʼĩrava ostudiapa pe lívro ¡Jaikóta vyʼápe pára siémpre! Oimérõ ojerure raʼe ndéve peteĩ ansiáno komite de servisiopegua restudia hag̃ua peteĩ ermáno inaktívondi, ikatu reanota avei upéva.

²⁷ Pe párte heʼihápe “Óra” remoĩ vaʼerã exáktamente mboy órapa rejapo káda mes. Upévape oike hína pe tiémpo reipurúva repredika hag̃ua umi ndahaʼéivape Testígo, tahaʼe repredikávo ogahárupi, rejapóvo rrevisíta, estúdio, térã repredikávo informálmente. Oimérõ mokõi puvlikadór osẽ ojapo aktivida, mokõivéva ikatu okonta pe óra, péro peteĩvante ikatu oanota pe rrevisíta térã estúdio ojapóva. Ojejapo jave pe estúdio de família, pe sy ha pe túa ikatu okonta sólamente una óra por semána. Umi ermáno ojapóva diskúrso púvliko ikatu oanota avei pe tiémpo. Umi intérprete, tahaʼe ermáno térã ermána, ikatu avei okonta upéva. Oĩ ningo heta mbaʼe iñimportánteva jajapóva péro nañaanotái umi óra, por ehémplo pe tiémpo jaipurúva jajepreparávo jaha hag̃ua predikasiónpe, pe aty predikasionrã ha umícha.

²⁸ Káda puvlikadór oñemboʼe ha osegi vaʼerã ikonsiénsia heʼíva oanotáta jave mboy tiémpopa oipuru predikasiónpe. Oĩ ermáno opredikáva umi siuda tuichávape, ótro katu opredika umi lugár saʼihápe la hénte ha heta oviaha vaʼerã. Umi território idiferénte, ha umi puvlikadór idiferénte avei opensa lája. Pe Kuérpo Governánte nomoĩri léi umi ermanokuéra osegi hag̃ua okonta jave mboy tiémpopa oipuru predikasiónpe, ha haʼekuéra nomoĩri avavépe odesidi hag̃ua upéva ótrore (Mat. 6:1; 7:1; 1 Tim. 1:5).

²⁹ Pe tiémpo jahasáva predikasiónpe ñainforma vaʼerã en óra kompléta, ndahaʼéi en minúto. Oĩ puvlikadór ijedáva ha ndaikatúiva ojapo heta mbaʼe, oĩ umi hasyetéva ha upévare ndaikatuvéi osẽ hógagui, térã orekóva algúna diskapasida, haʼekuéra ikatu okonta pe tiémpo de a 15 minúto. Pe ermáno térã ermána opredikáramo sólamente 15 minúto peteĩ méspe, ikatu oinforma upéva. Haʼe osegíta kómo puvlikadór rregulár. Ko arréglope oike avei umi ermáno térã ermána ndaikatúiva ojapo heta mbaʼe peteĩ tiémpore, por ehémplo umi ndaikatúiva oguata un mes térã hetave tiémpore hasyete rupi térã ojegolpea vai haguére. Ko arréglo ojejapo oñepytyvõ hag̃ua umi ermáno térã ermána añetehápe ndaikatuietévape ojapo heta mbaʼe. Pe komite de servísio odesidíta mávapa ikatu oike ko arréglope.

³⁰ Pe infórme de predikasión remeʼẽva káda mes oñeanotapa pe Rrehístro de puvlikadór de la kongregasiónpe. Koʼã rrehístro pe kongregasión mbaʼe hína. Nde revaséramo ótra kongregasiónpe remombeʼu vaʼerã umi ansiánope. Pe sekretário omondóta nde rrehístro ne kongregasión pyahúpe. Upéicha umi ansiáno upepegua ikatúta nderresivi ha oikuaa porãvéta mbaʼéichapa nepytyvõta. Oimérõ nereimemoʼãi ne kongregasiónpe 3 mése aja térã saʼive, esegínte emondo ne infórme ne kongregasiónpe.

³¹ ¿Nderesaráipa jepi rentrega hag̃ua ne infórme? Entéronte ñaikotevẽ jepi ótro ñanemomanduʼa ñane infórmere. Péro ñamombaʼéramo la ojehupytýva umi infórme rupive ha ñantendéramo mbaʼérepa iñimportánte ñainforma, ikatu hína ifasilve ñanemanduʼa hag̃ua ñantrega vaʼerãha.

³² Oĩ heʼíva jepi: “Jehová ningo oikuaapa la ajapóva iservísiope, ¿mbaʼére piko upéicharõ antrega vaʼerã che infórme?”. Añetehápe Jehová oikuaa mbaʼépa jajapo, ha oikuaa jaservípa chupe ñande pyʼaite guive térãpa ñameʼẽ chupe la hembývante. Péro iporã ñanemanduʼa Jehová oreko hague enkuénta entéro mbaʼe ojapo vaʼekue isiervokuéra, umi detálle jepe. Por ehémplo orrehistra vaʼekue mboy díapa Noé opyta pe árkape, mboy áñopa umi israelita oiko pe desiértore, ha mboýpa ifiél chupe ha mboýpa naiñeʼẽrendúi. Avei oanotakapa vaʼekue mbaʼéichapa ojejagarra vaʼekue ohóvo Canaán ha umi mbaʼe ojapóva umi hués iñeʼẽrendúva Israélpe. Upéicha jahecha iñimportanteha Ñandejárape g̃uarã ojereko peteĩ rrehístro ijexáktova ohechaukáva mbaʼépa ojejapo.

³³ Umi istória oñemombeʼúva la Bíbliape ohechauka Ñandejára puévlo siémpre oskrivi hague exáktamente umi mbaʼe oiko vaʼekue. Heta vése umi número ñanepytyvõ ñantende porãve hag̃ua umi rreláto bíblico. Por ehémplo, ehechamína mbaʼépa heʼi koʼã téxto: Génesis 46:27; Éxodo 12:37; Jueces 7:7; 2 Reyes 19:35; 2 Crónicas 14:9-13; Juan 6:10; 21:11 ha Hechos 2:41; 19:19.

³⁴ Pe primer síglope umi apóstol ou rire predikasióngui oho Jesús rendápe ha “omombeʼupaite chupe umi mbaʼe ojapóva hikuái ha mbaʼéichapa oporomboʼe” (Mar. 6:30). Ñande ningo ndajaikói ñaanota entéro mbaʼe jajapóva jaadorávo Jehovápe, upéicharõ jepe umi infórme ideprovécho Jehová organisasiónpe. Por ehémplo ñane infórme ikatu ohechauka mbaʼépepa ikatu ñambaʼapove predikasiónpe. Avei ohechauka mbaʼépepa Jehová puévlo kompletoite oprogresa ha mbaʼépepa tekotevẽ ñamehora, por ehémplo ikatu oime ndaiporiguasúi puvlikadór pyahu. Umi infórme rupive ojehechakuaa noiméipa tekotevẽ oñemokyreʼỹ umi ermánope térã oñesolusiona peteĩ provléma. Umi ermáno ñandegiáva ohechávo umi infórme, oñehaʼãta osolusiona peteĩ provléma ojokóva hína ermanokuérape térã pe kongregasión kompletoitépe ani hag̃ua oprogresa.

³⁵ Umi infórme rupive Jehová organisasión ikatu ohecha mbaʼe lugárpepa oñekotevẽve umi ermáno opredikáva. Ojehecha koʼã mbaʼe: moõpa oĩve hénte oñeinteresáva la Bíbliare, moõpa saʼive ojeprogresa ha mbaʼe puvlikasiónpa oñekotevẽ oñemboʼe hag̃ua umi héntepe. Umi infórme oipytyvõ Jehová organisasiónpe oikuaa hag̃ua mbaʼe puvlikasiónpa tekotevẽ oprepara peteĩ lugárpe g̃uarã.

³⁶ Tuichaiterei ningo ñanemokyreʼỹ umi infórme. Ajépa javyʼaite ñahendúvo umi mbaʼe ohupytýva predikasiónpe ñane ermanokuéra oĩva ko múndo tuichakuére. Umi infórme rupive jahechakuaa mbaʼéichapa Jehová organisasión okakuaave ohóvo. Ñane ermanokuéra experiénsia ñanembopyʼarory ha ñanemomýi ñambaʼapove hag̃ua Jehová servísiope (Hech. 15:3). Iñimportanteterei ningo ñantrega ñane infórme, péicha jahechauka hína ñañeinteresaha ñane ermanokuéra oĩvare opárupi. Haʼetéramo jepe sonseraiterei, ñantregávo ñane infórme jahechauka hína jaapojaha Jehová organisasión heʼíva (Luc. 16:10; Heb. 13:17).

³⁷ Ndajaikói vaʼerã ñakompara umi mbaʼe ñande jajapóva predikasiónpe la ótro ojapóvare (Gál. 5:26; 6:4). Káda uno ningo idiferénte isituasión. Upévare ñamoĩ vaʼerã umi méta ikatútava jahupyty jahecha hag̃ua mbaʼéichapa japrogresa jahávo, ha jahupytývo umíva javyʼaitereíta.

³⁸ Jahecha porãiterei Jehová rupínte oñembyatyha hetave hénte ikatu hag̃uáicha ojesalva pe ‘jehasa asy guasúpe’. Koʼág̃arupi oñekumpli pe profesía Isaías heʼi vaʼekue: “Pe saʼimi oĩva upéi oĩta 1.000. Pe tetã michĩvagui oikóta peteĩ tetã ipoderósova. Che, Jehová, ambotuicháta chupe itiempoitépe” (Apoc. 7:9, 14; Is. 60:22). Tuichaiterei mbaʼe ningo ñandéve g̃uarã ñamombeʼu umi notísia porã koʼã ára pahápe (Mat. 24:14).