LEKSIÓN 57
¿Mbaʼépa oiko oĩramo opeka vaietereíva?
Jahayhúramo jepe Jehovápe ñande pyʼaite guive, ha ñañehaʼãmbaitéramo jepe ani hag̃ua ñamoñeñandu vai chupe, ñanemanduʼa vaʼerã sapyʼánte jajavytanteha voi. Péro oĩ hína umi pekádo ivaivéva ótrogui (1 Corintios 6:9, 10). ¿Heʼisépa upéva Jehová nanderayhumoʼãveimaha oiméramo repeka vai? Nahániri. Haʼe ningo nepytyvõseterei ha oĩ neperdona hag̃uáicha.
1. ¿Mbaʼépa jajapo vaʼerã Jehová ñaneperdona hag̃ua?
Peteĩ persóna ohayhúva Jehovápe opeka vaíramo oñeñandu vaieterei upe haguére. Péro tuicha okonsola chupe la Jehová oprometéva isiervokuérape: “Pende pekadokuéra pytãramo jepe tuguýicha, opytáta morotĩ asy pe niéveicha” (Isaías 1:18). Ñañarrepentíramo ñande pyʼaite guive Jehová katuete ñaneperdonáta. Péro, ¿mbaʼépa heʼise ñañarrepenti? Upéva heʼise ñambyasyha ñande pyʼaite guive upe mbaʼe vai jajapo vaʼekue, ndajajapoveiete upéva ha jajerure asy Jehovápe tañaneperdona. Avei ñañehaʼã vaʼerã japilla noiméipa jaʼa raʼe upe pekádope pórke jajepokuaa ñapensa térã jajapo peteĩ mbaʼe noĩporãiva. Ha jahechakuaávo koʼã mbaʼe ñakambiaite vaʼerã, ikatu hag̃uáicha jaiko Jehová oipotaháicha (elee Isaías 55:6, 7).
2. ¿Mbaʼéichapa Jehová ojevale umi ansiánore ñanepytyvõ hag̃ua japekáramo?
Oiméramo japeka vaieterei, Jehová heʼi ñahenói vaʼerãha “umi ansiáno kongregasionpeguápe” (elee Santiago 5:14, 15). Umi ansiáno ohayhueterei Jehovápe ha entéro umi oservívape chupe. Chupekuéra oñembokatupyry ñanepytyvõ hag̃ua, ikatu hag̃uáicha ñaĩ porã jey Jehová renondépe (Gálatas 6:1).
¿Mbaʼéichapa ñanepytyvõ umi ansiáno japeka vaíramo? Mokõi térã mbohapy ansiáno oipurúta la Biblia ohechauka hag̃ua ñandéve mbaʼépepa jajavy raʼe. Haʼekuéra ñanemokyreʼỹta ha omeʼẽta ñandéve umi konsého iporãva anivéma hag̃ua japeka. Péro, ¿mbaʼépa oikóta peteĩ persóna noñarrepentíriramo? Upéicharõ umi ansiáno onohẽmante vaʼerã chupe kongregasióngui ani hag̃ua ogueraha vai ótrope hapykuéri.
EJEPYʼAMONGETAMÍNA
Jahechamína mbaʼe mbaʼépa ojapo Jehová ñanepytyvõ hag̃ua japeka vaíramo ha mbaʼéichapa nde ikatu rehechauka revaloraha upéva.
3. ¿Mbaʼéichapa ñanepytyvõta ñamombeʼúramo japeka hague?
Oimehaichagua pekádo omoñeñandu vaieterei Jehovápe, upévare ñamombeʼu vaʼerã chupe ñande japekáramo. Elee Salmo 32:1-5, ha upéi erresponde ko porandu:
¿Mbaʼérepa iporãta ñamombeʼúramo Jehovápe ñande pekádo, jaguerokirirĩnte rangue?
Ñamombeʼu rire Jehovápe ñande pekádo, ñanemoñeñandu porãitereíta avei jajeruréramo umi ansiánope ñanepytyvõ hag̃ua. Ehecha pe VIDÉO, ha upéi erresponde ko porandu:
Según pe vidéo, ¿mbaʼéichapa umi ansiáno oipytyvõ raʼe ermáno Cánonpe oñemoĩ porã jey hag̃ua Jehovándi?
Iñimportánte ningo ñanesinséro ha ñamombeʼupaite umi ansiánope la jajapo vaʼekue, pórke haʼekuéra oĩ ñanepytyvõ hag̃ua. Elee Santiago 5:16, ha upéi erresponde ko porandu:
¿Mbaʼérepa ifasilvéta umi ansiánope ñanepytyvõ hag̃ua ñanesinséroramo hendivekuéra?
Ñamombeʼupaite vaʼerã Jehovápe ha umi ansiánope ñande pekádo, ñanesinséro hendivekuéra ha jaasepta Jehová ajúda
4. Jehová ohechauka oiporiahuverekoha umi opekávape
Peteĩ persóna opeka vaietereíramo ha ndojaposevéi la Jehová ojeruréva chupe, oñenohẽmante vaʼerã chupe kongregasióngui. Ha upéicha jave la Biblia heʼi ndovaleiha jajeheʼa upe persónare. Elee 1 Corintios 5:6, 11, ha upéi erresponde ko porandu:
Pe téxto heʼi michĩmi levadúra ombovupaiteha pe mása kompletoite. Upéicharõ, ¿mbaʼéichapa peteĩ pekadór noñarrepentíriva ikatu ombyai la kongregasión?
Jehová ningo oiporiahuverekoiterei umi opeka vaʼekuépe, ha umi ansiáno upeichaiténte avei. Haʼekuéra oñehaʼãmbaite oipytyvõ umi oñenohẽ vaʼekuépe kongregasióngui. Heta umíva apytégui oñemoag̃ui jey Jehováre, ¿mbaʼérepa? Pórke hasýramo jepe chupekuéra pe disiplína, upéva oipytyvõ chupekuéra ohechakuaa hag̃ua mbaʼépepa ojavy raʼe (Salmo 141:5).
¿Mbaʼéichapa Jehová ohechauka ihustoha umi pekadór ndive, ha avei ohayhu ha oiporiahuverekoha chupekuéra?
5. Jehová ñaneperdonáta ñañarrepentíramo
Jesús oipuru peteĩ ehémplo ñanepytyvõva ñantende hag̃ua mbaʼéichapa Jehová oñeñandu oĩramo peteĩ persóna oñarrepentíva. Elee Lucas 15:1-7, ha upéi erresponde ko porandu:
¿Mbaʼépa nemboʼe Jehovágui ko ehémplo?
Elee Ezequiel 33:11, ha upéi erresponde ko porandu:
¿Mbaʼépa iñimportánte jajapo jahechauka hag̃ua ñañarrepentiha ñande pyʼaite guive?
Peteĩ pastór ojepyʼapyháicha ijovecháre, Jehová ojepyʼapy avei ipyʼaite guive ijovechakuéra mimíre
OĨRAMO HEʼÍVA: “Che akyhyje añeʼẽ hag̃ua umi ansiánondi, pórke amombeʼúramo la ajapo vaʼekue haʼekuéra chenohẽta kongregasióngui”.
¿Mbaʼépa nde eréne peteĩ opensávape upéicha?
RRESÚMEN
Japeka vaíramo, péro ñañarrepenti ñande pyʼaite guive ha jajedesidi ndajajapomoʼãveimaha, Jehová katuete ñaneperdonáta.
Rrepáso
¿Mbaʼérepa iporãta ñamombeʼúramo Jehovápe ñande pekádo?
¿Mbaʼépa jajapo vaʼerã Jehová ñaneperdona hag̃ua japekáramo?
Oiméramo japeka vai, ¿mbaʼérepa jajerure vaʼerã umi ansiánope ñanepytyvõ hag̃ua?
EINVESTIGA HAG̃UA
Isaías 1:18 ohechauka Jehová ñandeporiahuverekoitereiha, ehecha mbaʼéichapa peteĩ karai ohechakuaa upéva siertoha.
Aníkena núnka jaduda Jehová katuete ñandeporiahuverekotaha (5:02)
¿Mbaʼéichapa umi ansiáno oñehaʼã oipytyvõ umi opeka vaieterei vaʼekuépe?
“Umi ansiáno ohayhu ha oiporiahuvereko umi opekávape” (Ñemañaha agosto de 2024)
Ehechamína mbaʼéichapa ojehechauka ojehayhu ha ojeporiahuverekoha umi opeka vaʼekuépe ha noñarrepentíriva.
Pe experiénsia héravape ‘Aikotevẽ añemoag̃ui jey Jehováre’, ehecha mbaʼéichapa peteĩ ermáno oñandu Jehová omoag̃ui jeyha chupe kongregasiónre.
“La Biblia okambia chupekuéra” (Ñemañaha Julio-Septiembre de 2012)