Jehová ijeroviapy ha oĩ oporoperdona hag̃uáicha

1, 2. a) ¿Mbaʼérepa jaguerohory umi amígo ijeroviapývape ha oĩvape oporoperdona hag̃uáicha? b) ¿Mbaʼe mbaʼépa ñambohováita?

¿MBAʼÉICHA vaʼerãpa peteĩ amigoite? Peteĩ kristiána hérava Ashley heʼi: “Chéve g̃uarã peteĩ amígo tee haʼe hína pe akóinte oĩva nde ykére ha neperdonáva refalla jave”. Opavave ningo jaguerohory umi amígo ijeroviapývape ha oĩva oporoperdona hag̃uáicha. Jahechakuaa ñanderayhuha ha ñañeñandu porã hendivekuéra (Prov. 17:17).

² Jehová hína pe Amígo ijeroviapyvéva ha oĩva ñaneperdona hag̃uáicha. Peteĩ salmísta heʼi: “[Jehová], nde niko nembaʼeporã ha reheja rei oréve ore rembiapo vaikue. Nerenyhẽ mborayhúgui umi nemombaʼévape g̃uarã” (Sal. 86:5). ¿Mbaʼépa heʼise ñandejeroviapyha ha japoroporiahuverekoha? ¿Mbaʼéichapa Jehová ohechauka koʼã mbaʼe porã? ¿Mbaʼéichapa ñande ikatu ñahaʼanga chupe? Ñambohováivo koʼã porandu jaikuaáta mbaʼépa jajapo vaʼerã jahayhuve hag̃ua Jehovápe, ñande Amígo iñimportantevéva, ha avei jajeheʼavéta ñane ermanokuérare (1 Juan 4:7, 8).

 3. ¿Mbaʼeichaguápa peteĩ persóna ijeroviapýva?

³ Peteĩ persóna ijeroviapýva ningo oporohayhueterei ha arakaʼeve ndoporotraisionái. Peichagua tapicha nokambiareíri, síno akóinte oĩ hapicha ykére, ivaíramo jepe pe situasión. La Biblia heʼi voi Jehováre “Ñandejára Jeroviaha” (Rev. 16:5, NM).

4, 5. a) ¿Mbaʼéichapa Jehová ohechauka ijeroviapyha? b) ¿Mbaʼéichapa ñanemombarete jajepyʼamongetávo umi mbaʼe Jehová ojapóvare ijeroviapy rupi?

⁴ ¿Mbaʼéichapa Jehová ohechauka ijeroviapyha? Haʼe arakaʼeve ndohejareíri hembiguaikuérape. Por ehémplo, David ohechakuaa Jehová akóinte oĩ hague ijykére (elee 2 Samuel 22:26). Jehová ndahaʼéi heʼínteva ijeroviapytaha hendive, síno oñangareko voi hese, oisãmbyhy ha oipytyvõ chupe ombohovái hag̃ua umi mbaʼe ijetuʼúva (2 Sam. 22:1). David ningo ‘heko jeroviapy’, upévare Jehová ndohejái chupe. Añetehápe, Ñandejára ohechauka omombaʼeha isiervokuéra ijeroviapývape haʼe voi ijeroviapývo hendivekuéra (Prov. 2:6-8).

⁵ Jajepyʼamongetávo umi mbaʼe Jehová ojapóvare ijeroviapy rupi ñanepytyvõ jagueropuʼaka hag̃ua opa mbaʼe. Peteĩ ermáno hérava Reed heʼi: “Chemokyreʼỹeterei aleévo mbaʼéichapa Jehová oipytyvõ vaʼekue Davídpe ijetuʼúrõ guare hendive. Akóinte oñangareko hese oikórõ guare okañyháre umi itakuáre jepe. ¡Upéva ningo chemombareteterei! Chemomanduʼa Jehová katuete oĩtaha che ykére cheñeʼẽrendúma guive chupe, taivai jepe raʼe che situasión”. Oime vaʼerã enterove jaservíva Jehovápe ñañeñandu avei upéicha (Rom. 8:38, 39).

 6. ¿Mbaʼéichapa Jehová ohechauka avei ijeroviapyha, ha mbaʼéichapa ñanevenefisia upéva?

⁶ ¿Mbaʼéichapa Jehová ohechauka avei ijeroviapyha? Haʼe nosẽi Iñeʼẽ heʼívagui. Haʼe heʼi: “Che [nakambiamoʼãi] pende tuja peve” (Is. 46:4, ÑÑB). Opa mbaʼe odesidíva oñemopyenda imandamientokuérape ha umíva nokambiái arakaʼeve (Mal. 3:6). Avei ohechauka ijeroviapyha okumplívo iñeʼẽ, térã ipromesakuéra (Is. 55:11). Enterove iñeʼẽrendúva ikatu oñevenefisia Ñandejára ijeroviapy haguére. ¿Mbaʼérepa jaʼe upéva? Ñañehaʼãmbaitéramo jajapo ojeruréva ñandéve, katuete okumplíta ipromésa ñanevendesívo (Is. 48:17, 18).

 7. ¿Mbaʼéichapa ikatu jahechauka ñandejeroviapyha Jehová ojapoháicha?

⁷ ¿Mbaʼéichapa ikatu jahechauka ñandejeroviapyha Jehová ojapoháicha? Por ehémplo, ñaipytyvõkuaa umi ohasávape peteĩ situasión ijetuʼúva (Prov. 3:27). Ikatu jaikuaa peteĩ ermáno ikangyha oikóvo hasykatu rupi, ojavy haguére térã oñemoĩgui hese ihentekuéra. ¿Mbaʼére piko nañañembojái pe ermáno rendápe ha ñamokyreʼỹ chupe jaiporúvo “ñeʼẽ iporãva” ha oporokonsoláva? (Zac. 1:13.)a Péicha jahechaukáta oikoha ñandehegui amígo teete ha ijeroviapýva, ha ‘oporohayhuvéva [peteĩ ermáno] teégui’ (Prov. 18:24).

 8. ¿Mbaʼéichapa ñahaʼanga Jehovápe jahechaukávo ñandejeroviapyha, por ehémplo ñane rembiayhúndi?

⁸ Ikatu avei ñahaʼanga Jehovápe jahechaukávo ñandejeroviapyha umi jahayhúva ndive. Oiméramo ñamendáva, jaikuaa porã arakaʼeve nañambotavýi vaʼerãha ñane rembiayhúpe (Prov. 5:15-18). Upéicha rupi, ñañangareko ani hag̃ua jajapo mbaʼeve ikatúva ñandegueraha vai ha ñamoakãratĩ ñane ména térã ñane rembirekópe (Mat. 5:28). Jahechauka avei ñandejeroviapyha ndajaikóiramo ñañeʼẽ vai ñane ermanokuérare ni jaʼe mbaʼeveichagua japu hesekuéra, avei nañahendúi umichagua ñeʼẽrei (Prov. 12:18).

9, 10. a) ¿Mávandipa ñandejeroviapy vaʼerã opa mbaʼe ári? b) ¿Mbaʼérepa heta vése ijetuʼu jajapo Jehová heʼíva?

⁹ Péro opa mbaʼe ári jahechaukase ñandejeroviapyha Jehová ndive. ¿Mbaʼéichapa ikatu jajapo upéva? Ñañehaʼã vaʼerã jahecha opa mbaʼe haʼe ohechaháicha ha upéi jaiko oipotahaichaite. Upearã jahayhu vaʼerã haʼe ohayhúva ha ndajachaʼéi umi mbaʼe haʼe ndaijaʼéivare (elee Salmo 97:10). Jajoguavévo Jehovápe umi mbaʼe ñapensa ha ñañandúvape, koʼýte ñaneñeʼẽrenduséta chupe (Sal. 119:104).

¹⁰ Añetehápe, heta vése ijetuʼu jajapo Jehová heʼíva, ha ikatu oime ñañehaʼãmbaite hína ñaneñeʼẽrendu hag̃ua. Ñamoĩ chupe peteĩ Testígo omendaseha péro ndojuhúi gueteri ermanokuéra apytépe peteĩ iñirũrã oipytyvõtava chupe (1 Cor. 7:39). Por ehémplo, peteĩ ermánape ikompañerokuéra de traváho omboliga omenda hag̃ua ha oheka voi chupe ipareharã. Ikatu pe ermána omendase avei, péro haʼe ojedesidi iñeʼẽrendu Jehovápe. ¡Ajépa jaguerohoryete umi oñehaʼãvape iñeʼẽrendu Jehovápe! Katuete haʼe ovendesi enterovete ijeroviapývape ohasáramo jepe heta mbaʼe ijetuʼúva (Heb. 11:6).

11. ¿Mbaʼépa heʼise Jehová oĩha oporoperdona hag̃uáicha?

¹¹ Jehová ohechauka avei peteĩ mbaʼe iporãitereíva: haʼe oĩ oporoperdona hag̃uáicha. ¿Mbaʼépa ojapo peteĩ oporoperdonakuaáva? Upeichagua persóna ombohasa rei hapicha rembiapo vaikue oñarrepentíma guive. Upéva ndeʼiséi nopenaiha pe oiko vaʼekuére ni nopensaiha ndoikói hague mbaʼeve, síno odesidi ndaipyʼarói pe ofalla vaʼekuéndi. La Biblia ohechauka Jehová ‘oheja reiha umi tembiapo vaikue’ umi ohechaukávape oñarrepentiha ipyʼaite guive (Sal. 86:5).

12. a) ¿Mbaʼéichapa Jehová ohechauka oĩha oporoperdona hag̃uáicha? b) ¿Mbaʼépa heʼise “ojevorraha” ñande pekádo?

¹² ¿Mbaʼéichapa Jehová ohechauka oĩha oporoperdona hag̃uáicha? Haʼe ipyʼaporã “oheja rei hag̃ua” ñane rembiapo vai, térã operdonambaite ha naimanduʼavéima arakaʼeve (Is. 55:7). ¿Mbaʼérepa jaʼekuaa Jehová operdonambaiteha ñane rembiapo vaikue? Ñapensamína heʼívare Hechos 3:19 (elee). Apóstol Pedro heʼi umi ohendúvape chupe: “Peñarrepentíke ha pejevy”. Peteĩ pekadór oñarrepentíva ipyʼaite guive ombyasyeterei hembiapo vai haguére ha ojedesidi ndojapomoʼãveimaha upe mbaʼe vai (2 Cor. 7:10, 11). Avei ojevy térã ohejaite hape vai ha ojapo meme Ñandejárape ogustáva. Péro, ¿mbaʼépa ohupytýta kuri umi ohendúva Pédrope ohechaukáramo oñarrepentiha? Haʼe voi heʼi haguéicha, “ojevorráta” ipekadokuéra. Griégope, ko ñeʼẽ heʼise “ojekyty ojepeʼa hag̃ua”. Upévare, Jehová oporoperdona jave ovorrapaite ñande pekádo, térã operdonambaite (Heb. 10:22; 1 Juan 1:7).

13. ¿Mbaʼépa heʼise Jehová ‘naimanduʼamoʼãvéimaha’ ñande pekádore?

¹³ ¿Mbaʼérepa jaʼekuaa Jehová oporoperdona jave naimanduʼaveimaha arakaʼeve? Jahechamína mbaʼépa oprofetisa Jeremías oñeʼẽrõ guare pe kompromíso pyahu ojejapóta vaʼekuére umi kristiáno unhído ndive. Upe kompromíso rupive ikatu oñeperdona ipekádo opavave ojeroviávape Jesús sakrifísiore (elee Jeremías 31:34). Jehová opromete vaʼekue: “Che aheja reíta hembiapo vaikue ha nachemanduʼamoʼãvéi [ipekádore]”. Jahechaháicha, haʼe heʼi ñaneperdona rire ndohekyimoʼãveimaha ñandéve ñane rembiapo vaikue. Naimanduʼamoʼãi ñande pekádore ñandekastiga hag̃ua, síno ñaneperdonáta ha hesaráitama chugui (Rom. 4:7, 8).

14. ¿Mbaʼéichapa ñanekonsola jahechakuaávo Jehová oporoperdonaha? Emoĩ peteĩ ehémplo.

¹⁴ Tuichaiterei ningo ñanekonsola jahechakuaávo mbaʼeichaitépa Jehová oporoperdona. Ojapo heta áño peteĩ ermána ñambohératava Elena oñemose hague kongregasióngui, péro tiémpo rire ou jey. Ko ermána heʼi: “Che haʼémi Jehová cheperdonamaha, péro añetehápe nañeñandúi upéicha, haʼete chéve mombyry oĩva chehegui. Apensa Jehová ohayhuveha umi ótro ermánope”. Péro Elena olee ha ohesaʼỹijo umi téxto ohechaukáva Jehová oporoperdonaha, ha upéva tuicha okonsola chupe. Haʼe omombeʼu: “Upépe ae añandu mbaʼeichaitépa Jehová cherayhu ha cheporiahuvereko”. Upe rire heʼi: “Jehová operdonávo ñande pekádo haʼete omopotĩva pe mbaʼe kyʼa oja vaʼekue ñanderehe ñanerembiapo vai haguére”.b Upéi Elena ontende porãma mbaʼéichapa Jehová opensa, ha heʼi: “Ahechakuaa añetehápe ndagueroviái hague Jehová ikatuha cheperdonaite; apensa voi aguerahataha pe mbaʼe pohýi aikove aja pukukue. Aikuaa ningo mbeguekatúpemante cheresaraitaha upévagui. Péro koʼág̃a añandu ikatumaha añemoag̃ui Jehováre, ha upéva tuicha chembovevúi”. ¡Ajépa ñandeporiahuvereko ha ñanderayhuete Ñandejára! (Sal. 103:9.)

15. ¿Mbaʼéichapa ikatu ñaporoperdona Jehová ojapoháicha?

¹⁵ Ikatu ñahaʼanga Jehovápe jadesidívo ñaperdona ñande rapichápe ohechaukáramo oñarrepentiha (elee Lucas 17:3, 4). Ñanemanduʼa vaʼerã Jehová ñaneperdonávo hesaraimaha ñane rembiapo vaikuégui, térã arakaʼeve ndoiporúi umíva ñane kóntrape. Ñande avei ikatu ñanderesarái ñande rapichakuéra rembiapo vaígui jahejávo tapykuépe pe oiko vaʼekue ha arakaʼeve ndajaiporúi umíva jataky hag̃ua hesekuéra.

16. a) Emyesakã mbaʼérepa ñaime ñaporoperdona hag̃uáicha ndeʼiséi jaheja reiha opa mbaʼe vai ojejapóva ni jaheja umi hénte ojaprovecha ñanderehe. b) ¿Mbaʼépa jajapo vaʼerã jaipotáramo Jehová ñaneperdona?

¹⁶ Ñaime ñaporoperdona hag̃uáicha ndeʼiséi jaheja rei vaʼerãha opa mbaʼe vai ojejapóva ni jaheja umi hénte ojaprovecha ñanderehe. Heʼise uvei nañandepyʼaroiha japytávo. Ñanemanduʼa vaʼerã avei Jehová ñaneperdonataha ñande ñaporoperdonáramo añoite (Mat. 6:14, 15). Jehová imbaʼerechakuaa ñanendive ha imanduʼa “yvynteha voi ñande” (Sal. 103:14). Upéva ñanemomýi vaʼerã ñanembaʼerechakuaa hag̃ua avei ñande rapichándi ofalla jave ñanendive ha ñaperdona chupe ñande pyʼaite guive (Efe. 4:32; Col. 3:13).

17. ¿Mbaʼépa ñanepytyvõta ani hag̃ua japyta ñandepyʼaro peteĩ ermáno ofalláramo ñanendive?

¹⁷ Sapyʼánte hasy ñaporoperdona hag̃ua. Heta kristiáno unhído síglo primero guare ojoavy kuri ha chupekuéra jepe ijetuʼu vaʼekue omboyke hapichakuéra rembiapo vai (Filip. 4:2). ¿Mbaʼépa ñanepytyvõta ani hag̃ua japyta ñandepyʼaro peteĩ ermáno ofalláramo ñanendive? Jahechamína mbaʼépa ojapo vaʼekue Job. Haʼe ningo opyta vaieterei Elifaz, Bildad ha Zofar reiete otakýrõ guare hese (Job 10:1; 19:2). Ipahápe Jehová heʼi koʼã mbohapy kuimbaʼépe tuicha ojavyha ha omanda chupekuéra oho hag̃ua Job rendápe ha toikuaveʼẽ peteĩ sakrifísio ikatu hag̃uáicha oñeperdona chupekuéra (Job 42:7-9). Péro heʼi avei Job tekotevẽha ojapo peteĩ mbaʼe: oñemboʼe vaʼerã hesehapekuéra. Upéi Job ojapo upéva ha Jehová ovendesi chupe oĩgui oporoperdona hag̃uáicha (elee Job 42:10, 12, 16, 17). ¿Mbaʼépa ñanemboʼe upéva? Ñañemboʼe vaʼerãha umi ofallávare ñanendive, ha upéva ñanepytyvõta ani hag̃ua japyta ñandepyʼaro.

18, 19. ¿Mbaʼéichapa ikatu ñamombaʼeve umi mbaʼe porã Jehová ohechaukáva?

¹⁸ ¡Ajépa ñanemokyreʼỹete ñahesaʼỹijóvo umi mbaʼe porã Jehová ohechaukáva! Jahecha kuri Jehová oĩha oporohendu hag̃uáicha, ndoporoporavoiha, ipojera, noñemohatãi haʼe heʼívape, ijeroviapy ha oĩha oporoperdona hag̃uáicha. Péro oĩ hetaiteve mbaʼe ikatúva ñaaprende Jehovágui. Ha pe múndo pyahúpe katu jaikuaavétantema chupe koʼẽ koʼẽre (Ecl. 3:11). Ñapensa avei apóstol Pablo opensa haguéicha: “¡Ajépa ipypukuete Ñandejára mbaʼeta, arandu ha mbaʼekuaa!”. Hiʼarive ñamombaʼeterei Ñandejára mborayhu ha umi seis mbaʼe porã jahecha vaʼekue (Rom. 11:33, NM).

¹⁹ Ñamombaʼékena ára ha árare umi mbaʼe porã Jehová ohechaukáva. Upearã ñahesaʼỹijo vaʼerã umíva peteĩteĩ, jajepyʼamongeta hese ha ñañehaʼã ñande voi jahechauka jaiko lájare (Efes. 5:1). Upéicha ñañeñandúta oñeñandu haguéicha pe salmísta. Haʼe ohai vaʼekue: “Chéve g̃uarã iporã añemoag̃ui Ñandejára rehe” (Sal. 73:28, NM).