“Penearandúkena ha peñatende porã”

 1. ¿Mbaʼépa Jesús heʼi vaʼekue idisipulokuérape pe fin rehe, ha mbaʼépa heʼi vaʼekue chupekuéra ojapo hag̃ua?

JESÚS omano mboyvemi, unos kuánto idisípulo oporandu vaʼekue chupe: “¿Mbaʼe señálpa oĩta ropilla hag̃ua nde reimemaha orendive, ha pe fin ou potaitemaha?” (Mat. 24:3). Koʼã disípulo oime vaʼerã oikuaase raʼe arakaʼépa opáta pe sistéma judío. Péro Jesús ombohováirõ guare chupekuéra ndahaʼéi omombeʼúnteva chupekuéra arakaʼépa opáta pe sistéma judío, síno omombeʼu avei chupekuéra arakaʼépa opáta ko múndo aña. Jesús heʼi: “Avave ndoikuaái ni pe óra ni pe día, ndoikuaái umi ánhel oĩva yvágape, ni pe Taʼýra, pe Túa añoite oikuaa”. Péro Jesús si heʼi vaʼekue idisipulokuérape ‘oñatende porã’ hag̃ua hikuái (Mar. 13:32-37).

 2. ¿Mbaʼérepa umi kristiáno síglo primeropegua oñatende porã vaʼerã kuri umi señál Jesús omeʼẽ vaʼekuére?

² Umi kristiáno síglo primeropegua oñatende porã vaʼerã kuri umi mbaʼe oikóvare, pórke upévare odepende hikuái ojesalva hag̃ua. Jesús omeʼẽ vaʼekue chupekuéra umi señál ikatu hag̃uáicha haʼekuéra oikuaa arakaʼépa opáta pe sistéma judío. Haʼe heʼi vaʼekue chupekuéra: “Pehecha vove umi ehérsito omongoraha Jerusalén, péva heʼise ja oñehundi potaitemaha”. Upéicharõ haʼekuéra ohecha vove koʼã mbaʼe oikoha osẽ vaʼerã kuri okañy pe montañaháre (Luc. 21:20, 21). Umi oñatende porã vaʼekue koʼã señál Jesús omeʼẽ vaʼekuére, ojesalva vaʼekue umi rromanokuéra ohundírõ guare Jerusalén.

 3. ¿Mbaʼépa jahecháta ko artíkulope?

³ Ñande ningo jaiko hína koʼág̃a pe tiémpo ko múndo aña oñehundi potaitemahápe, upévare tekotevẽ avei ñande ñañatende porã ko ñane tiémpope. Ko artíkulope jahecháta mbaʼéichapa ñande ikatu jasegi ñapensa porã ñañatende aja umi mbaʼe oikóvare ko múndope. Avei mbaʼéichapa ikatu ñañatende ñandejehe ha jaipuru porã ñane tiémpo.

 4. ¿Mbaʼérepa jaikuaase vaʼerã umi mbaʼe oikóva ko múndope okumplípa hína umi profesía oĩva la Bíbliape?

⁴ Ñande ningo jaikuaase mbaʼéichapa umi mbaʼe oikóva ko múndope okumpli hína umi profesía oĩva la Bíbliape. Jesús heʼi vaʼekue unas kuánta kósa oikótava jaikuaa hag̃ua ko múndo aña oñehundi potaitemaha (Mat. 24:3-14). Apóstol Pedro heʼi vaʼekue ñañatende porã hag̃ua koʼã profesíare ikatu hag̃uáicha ñande jerovia imbarete (2 Ped. 1:19-21). Pe último lívro oĩva la Bíbliape oñepyrũ voi péicha: “Koʼã mensáhe Jesucristo orresivi Ñandejáragui ha koʼág̃a oikuaauka hína. Haʼe orresivi koʼã mbaʼe ohechauka hag̃ua Ñandejára esklavokuérape umi mbaʼe oikótava koʼẽrõite” (Apoc. 1:1). Avése ñande jaikuaaseterei voi umi mbaʼe oikóva ko múndo tuichakuére ha mbaʼéichapa umíva ohechauka hína oñekumpliha umi profesía. Upévare ikatu ñañemongetaseterei voi ñande rapichándi umi mbaʼe oiko vaʼekuére.

 5. ¿Mbaʼépa ndajajapói vaʼerã, ha mbaʼépa jajapo vaʼerã? (Ehecha avei umi taʼanga).

⁵ Ñañeʼẽ jave ñane ermanokuérandi umi profesía bíblica oñekumplívare hína tekotevẽ ñañatende la jaʼétavare. ¿Mbaʼérepa? Ñande ndajaʼeséi umi mbaʼe ñandénte ñapensáva, pórke ikatu ogueru joavy kongregasiónpe. Por ehémplo ikatu umi governánte oñeʼẽ umi idéa haʼekuéra oguerekóvare ogueru hag̃ua pyʼaguapy ha segurida ko yvy ape ári, ha ikatu voi ñapensa haʼekuéra heʼívo koʼã mbaʼe okumpliha 1 Tesalonicenses 5:3 heʼíva. Péro péicha ñapensa rangue iñimportanteve jaikuaa umi informasión ipyahuvéva Jehová organisasión oguenohẽ vaʼekue. Upéicharõ ñañemongeta jave ñane ermanokuérandi umi profesía oñekumplívare ñane tiémpope ha mbaʼéichapa omyesakã ohóvo ñandéve Jehová organisasión, ñaipytyvõta hína pe kongregasiónpe ani hag̃ua oĩ joavy ha jaiko hag̃ua peteĩ ñeʼẽme (1 Cor. 1:10; 4:6).

 6. ¿Mbaʼépa ñanemboʼe 2 Pedro 3:11-13?

⁶ (Elee 2 Pedro 3:11-13). Apóstol Pedro ñanepytyvõ jahecha hag̃ua hendaitépe umi profesía. Haʼe ñanemokyreʼỹ ikatu hag̃uáicha siémpre ñahaʼarõ ha ñanemanduʼa meme Jehová árare. ¿Mbaʼérepa? Péva ndahaʼéi jaikuaa hag̃ua ‘mbaʼe día ni mbaʼe órapa’ oúta Jehová ára guasu, síno ikatu hag̃uáicha jaipuru pe tiémpo hembýva ñandéve jasegi hag̃ua ‘ñanekondúkta potĩ ha jaadora hag̃ua Ñandejárape ñande pyʼaite guive’ (Mat. 24:36; Luc. 12:40). Upéicharõ ñande jasegise jajapo umi mbaʼe ogustáva Jehovápe ha jahechauka jahayhuha chupe, péro upearã tekotevẽ avei ñañatende porã ñandejehe.

 7. ¿Mbaʼéichapa jahechauka ñañatendeha jaikóvo ñandejehe? (Lucas 21:34).

⁷ Jesús heʼi vaʼekue idisipulokuérape oñatende vaʼerãha ndahaʼéi umi mbaʼe oikóvare ko múndopente, síno avei oñatende vaʼerãha hikuái ijehe. Upéva ojekuaa porã umi mbaʼe heʼívare pe téxto de Lucas 21:34 (elee). Upépe Jesús heʼi vaʼekue: “Peñatendéke pendejehe”. Peteĩ persóna oñatendéva ijehe ningo siémpre oĩ aténto umi mbaʼe ikatúvare oapeligra pe amista oguerekóva Jehovándi, ha ojapo ikatúva guive ojehekýi hag̃ua umívagui, péicha rupi osegi oĩ Jehová mborayhúpe (Prov. 22:3; Jud. 20, 21).

 8. ¿Mbaʼe konséhopa omeʼẽ vaʼekue apóstol Pablo umi kristianokuérape?

⁸ Apóstol Pablo omokyreʼỹ vaʼekue umi kristianokuérape oñatende hag̃ua ijehe. Por ehémplo haʼe heʼi vaʼekue umi kristiáno Efesoguápe: “Peñatende porãke peiko lájare, ani peiko umi itavývaicha, síno umi iñarandúvaicha” (Efes. 5:15, 16). Koʼã ára pahápe ñande jerovia kontinuadoite oñemoĩ a pruéva. Upévare la Bíbliape oĩ voi peteĩ konsého heʼíva: “Pesegi pehecha mbaʼépa hína Jehová oipota pejapo”, péicha ikatúta ñambohovái kualkiér provléma ikatúva oapeligra ñane amista Jehovándi (Efes. 5:17).

 9. ¿Mbaʼéichapa ikatu jaikuaa mbaʼépa hína Jehová volunta ñandéve g̃uarã?

⁹ La Bíbliape añetehápe nomombeʼupái umi mbaʼe ikatúva oapeligra pe ñane amista Jehovándi. Heta vése ñandete voi tekotevẽta jadesidi algúna kósa, pórke la Biblia ndeʼíri diréktamente mbaʼeve upévare. Upéicha jave jadesidi porã hag̃ua tekotevẽta ñañehaʼã ñapensa Jehová ha Jesucristo opensaháicha. ¿Péro mbaʼépa ñanepytyvõta ikatu hag̃uáicha jadesidi porã? Jastudia meméramo mbaʼépa ogusta Jehovápe ha jajepyʼamongeta umívare. Amáske ñantende mbaʼépa Jehová volunta ha ñapensa “Cristo opensaháicha”, ñanepytyvõta ñanearandu hag̃ua ndaipóriramo jepe peteĩ léi heʼíva mbaʼépa jajapo vaʼerã káda okasiónpe (1 Cor. 2:14-16). Avése ningo ifásilta jahecha hag̃ua umi pelígro, péro oĩ avei umi ndahaʼemoʼãiva la ifasiletereíva jahecha hag̃ua.

10. ¿Mbaʼéguipa jajekuida vaʼerã?

¹⁰ Umi mbaʼe la Biblia heʼíva ñamboyke vaʼerãha apytépe ningo oike hína: Jajegustapa rei, ñamokõ rasa, umi entretenimiénto naiporãiva ha pornografía (Sal. 101:3). Satanás kontinuadoite oñehaʼã hína ñanemomombyry Jehovágui, ha péicha ombyai hag̃ua pe amista jarekóva hendive (1 Ped. 5:8). Upévare japillaʼỹre ikatúma jaju hína ñaneenvidióso, nañaneonrradovéi, ñandetaryrýi, ndajachaʼéi ñande rapicháre, ñandeorgullóso, térã ñandepyʼaro ñande rapichándi (Gál. 5:19-21). Ñepyrũrã ikatu koʼã mbaʼe ñañandúva naimbaretéi. Péro peteĩ plántaicha avei ikatu oñepyrũ oñembohapo ñane korasõme, okakuaa, ha upéi ikatúma ñaneprovléma hína (Sant. 1:14, 15).

11. ¿Mbaʼeichagua pelígropa ikatu oñepresenta ñandéve ñañemeʼẽʼỹre enkuénta, ha mbaʼérepa jajehekýi vaʼerã umívagui?

¹¹ Peteĩva umi pelígro ikatúva oñepresenta ñandéve ñañemeʼẽʼỹre enkuénta haʼe hína umi júnta vai. Eñeimahinamína embaʼapoha peteĩ persóna ndahaʼéivandi Testígo. Ha nde eipota oñeñeʼẽ porã umi Testígore, upévare neamávle hendive. Avése ekaru jepi hendive, upéi ensegidamínte ejepokuaáma ejapo upéva. Sapyʼánte oñeʼẽma ndéve umi mbaʼe tieʼỹre, ha ñepyrũrã nde eñehaʼã emboyke upéva. Péro upéi mbeguekatúpe umi mbaʼe heʼíva ja nandestorvavéima. Kon el tiémpo katu ja eñakostumbráma umi mbaʼe heʼívare. Upéi peteĩ díape neinvita ekomparti hag̃ua hendive peteĩ vevída traváho rire, ha nde reasepta ha eho hendive. Upéi mbeguekatúpe nde avei ja epensáma haʼéicha. Ekalkulamíntena, ¿mboy tiémpo haguépepa nde ere eñepyrũtaha eñekomporta avei pe ne kompañéro de traváhoicha? Jaikuaa ningo ñande ñaneamavleha enterovéndi, péro ñanemanduʼa vaʼerã ñane júnta oafektaha umi mbaʼe ñapensáva ha jadesidíva (1 Cor. 15:33). Jasegíramo Jesús konsého ndajahasamoʼãi hetaiterei tiémpo umi ndahaʼéivandi Testígo (2 Cor. 6:15). Ha jahechakuaáta umi pelígro oñepresenta mboyve jepe ha jajehekýita umívagui.

12. ¿Mbaʼépa ojapo vaʼerã Jesús disipulokuéra koʼã ára pahápe?

¹² ¿Jesús piko heʼi raʼe idisipulokuérape ohaʼarõnte hag̃ua hikuái ojapoʼỹre mbaʼeve koʼã ára pahápe? Nahániri, Jesús omanda vaʼekue chupekuéra opredika hag̃ua “Jerusalénpe, oparupiete Judéape, Samáriape ha umi lugár mombyryvehápe jepe ko yvy ape ári” (Hech. 1:6-8). Ko tembiapo Jesús oheja vaʼekue isegidorkuérape ningo tuichaiterei, péro ojapóramo hikuái opa ikatúva okumpli hag̃ua, oipuru porãta itiémpo.

13. ¿Mbaʼérepa jaipuru porã vaʼerã ñane tiémpo? (Colosenses 4:5).

¹³ (Elee Colosenses 4:5). Ñande ningo tekotevẽ ñañatende mbaʼéichapa jaipuru ñane tiémpo. Heʼiháicha Eclesiastés 9:11-pe, entéronte ‘ikatu jahasa peteĩ tiémpo ijetuʼúvare’. Upévare en kualkiér moménto okambiaite la ñane situasión, ha ikatu voi jaju ñamano.

14, 15. ¿Mbaʼéichapa ikatu jaipuru porã ñane tiémpo? (Hebreos 6:11, 12). (Ehecha avei pe taʼanga).

¹⁴ Pe mbaʼe iporãvéva ikatúva jajapo jaipuru porã hag̃ua ñane tiémpo haʼe hína jajapo Jehová rembipota ha ñañemoag̃uive hese (Juan 14:21). Upearã ikatu jasegi pe konsého omeʼẽva la Biblia 1 Corintios 15:58-pe: “Siémpre penerembiapo heta vaʼerã ñande Ruvicha servísiope”. Péicha oúramo pe fin térã ñamanóramo upe mboyve, nañambyasymoʼãi mbaʼéichapa jaipuru kuri ñane tiémpo Jehová servísiope (Mat. 24:13; Rom. 14:8).

¹⁵ Jesús ningo koʼág̃arupi ñandegia hína japredika hag̃ua Ñandejára mensáhe ko yvy ape ári. Haʼe opromete haguéicha, Jehová organisasión rupive Jesús ñanemboʼe ha omeʼẽ ñandéve umi erramiénta ñaikotevẽva japredika hag̃ua (Mat. 28:18-20). Ñandéve ningo otoka japredika ñande rapichakuérape ha ñamboʼe chupekuéra kyreʼỹme, ha avei jasegi vaʼerã ñañatende porã ñahaʼarõ aja Jehová ohundi ko múndo aña. Ha jasegíramo pe konsého jatopáva Hebreos 6:11, 12-pe (elee) ñanepytyvõta ñañakarama hatã hag̃ua ñane esperánsare “ipahaite peve”.

16. ¿Mbaʼépa ñaime desidído jajapotaha?

¹⁶ Jehová omoĩma peteĩ día arakaʼetépa ohundíta ko múndo aña. Ha og̃uahẽ vove upe día, haʼe okumplipaitéta umi profesía jatopáva la Bíbliape. Sapyʼánte ningo ikatu ñapensa heta gueteri ofaltaha og̃uahẽ hag̃ua pe fin, péro Jehová ára “ni mbaʼevéicharõ ndotardamoʼãi” (Hab. 2:3). Upévare ñande ñaime desidído jajapotaha la heʼíva Miqueas 7:7: “Asegíta ahaʼarõ la Jehová ojapótava. Ahechaukáta ahaʼarõkuaaha ha arekoha esperánsa Ñandejárare, haʼe hína upe chesalváva”.