Neñeʼẽrendúramo oho porãta ndéve

¿NDÉPA revyʼáne ikatúramo siémpre rejapo nde rejaposévante, avave heʼiʼỹre ndéve mbaʼeve? Eremína chéve mbaʼépa repensa...

Péro, ¿okonvenípa ndéve rejapóramo ndegustávante? ¿Térãpa oho porãve ndéve rejapo jave nde túva ha nde sy heʼíva?... Ñandejára heʼi rejapo vaʼerãha nde sy ha nde túva heʼíva, ha haʼe oikuaa upéva iporãveha. Jahechamína mbaʼérepa.

¿Mboy áñopa nde ereko?... ¿Ha mboy áñopa oreko nde túva, nde sy ha nde avuelokuéra?... Haʼekuéra ningo oiko arevéma, upévare oikuaavéma ndehegui. Haʼekuéra heta mbaʼéma ohecha, ohendu ha ojapo. Upévare nde ikatu reaprende heta mbaʼe chuguikuéra.

¿Ndépa reikuaa ótro imitãvévape ndehegui?... Katuete reikuaáma hetave mbaʼe chugui ¿ajépa?... ¿Mbaʼérepa?... Reiko arevéma rupi chugui, ha upévare hetave mbaʼéma reaprende ha reikuaa.

¿Mávapa upe oiko arevémava ndehegui, chehegui ha oimeraẽvagui?... Ñandejára Jehová; upéicha rupi oikuaa hetaiteve mbaʼe enterovégui. Upévare heʼi jave ñandéve jajapo hag̃ua peteĩ mbaʼe jaikuaa iporãha, hasýramo jepe ñakumpli. ¿Ndépa reikuaa peteĩ jey pe Mboʼehára Guasúpe ijetuʼu hague iñeʼẽrendu?...

Upérõ guare, Ñandejára omanda Jesúspe ojapo hag̃ua peteĩ mbaʼe ijetuʼuetereíva. Jahechaháicha ko divúhope, Jesús ojerure asy Ñandejárape: ‘Che Ru, eipeʼamína chehegui ko mbaʼe ijetuʼuetéva’. Péicha Jesús ohechauka sapyʼánte hasyha jajapo Ñandejára oipotáva. Péro, ¿reikuaápa mbaʼépa heʼi oñemboʼepa mboyve?...

Haʼe heʼi: “Péro ani oiko che aipotáva, síno nde reipotáva” (Lucas 22:41, 42). Jesúspe g̃uarã iñimportanteterei ojejapo Ñandejára oipotáva, upévare ohendu Itúvape ha ndojapói haʼe ojaposévante.

¿Mbaʼépa ñaaprende upévagui?... Siémpre iporãveha jajapo Ñandejára heʼíva, ijetuʼúramo jepe ñakumpli hag̃ua. Péro ñaaprende avei ótra kósa. ¿Mbaʼépa hína upéva?... Jesús ndahaʼeiha Ñandejára. Oĩ heʼíva Ñandejára ha Jesús peteĩnteha, péro Jehová tuichave Jesúsgui ha oikuaa hetave mbaʼe chugui.

Jajapóvo Ñandejára heʼíva, jahechauka jahayhuha chupe. La Biblia heʼi: “Jahayhu Ñandejárape heʼise ñakumpli imandamiénto” (1 Juan 5:3). Upévare enterove jajapo vaʼerã Ñandejára ojeruréva ñandéve. ¿Ndépa rejapose upéva?...

Jahechamína mbaʼépa Ñandejára oipota ojapo mitãnguéra. Jaleemína la Bíbliape Efesios, kapítulo 6, versíkulo 1, 2 ha 3. Upépe heʼi: “Taʼyrakuéra, peneñeʼẽrendúkena pende tuvakuérape ñande Ruvicha oipotaháicha, upéva ningo oĩ porã Ñandejára renondépe: ‘Emombaʼe nde ru ha nde sýpe’; péva hína pe primer mandamiénto oñemeʼẽ vaʼekue peteĩ promésa reheve: ‘Oho porã hag̃ua ndéve ha reikove puku hag̃ua ko yvy ape ári’”.

Rehechaháicha, Jehová voi heʼi rejapo vaʼerãha nde túva ha nde sy heʼíva ndéve. ¿Ha mbaʼépa heʼise remombaʼe chupekuéra? Heʼise rerrespeta vaʼerãha chupekuéra. Ha Ñandejára heʼi oho porãtaha ndéve neñeʼẽrendúramo nde túva ha nde sýpe.

Amombeʼumíta ndéve peteĩ istória ohechaukáva mbaʼéichapa heta hénte ojesalva iñeʼẽrendu rupi. Haʼekuéra oiko vaʼekue peteĩ siuda héravape Jerusalén. Heta umi oikóva upépe nohendúi Ñandejárape. Upévare Jesús heʼi chupekuéra Ñandejára ohejataha oñehundi upe siuda. Péro omombeʼu chupekuéra mbaʼéichapa ikatu ojesalva. Haʼe heʼi: ‘Pehecha vove umi ehérsito omongora Jerusalén, peikuaáta oñehundipotaitemaha. Upévo umi oĩva Jerusalénpe osẽ vaʼerã okañy umi sérrore’ (Lucas 21:20-22).

Jesús heʼi haguéicha, pe ehérsito Romagua omongora Jerusalén ha ojeprepara oñorairõ hag̃uáicha hendivekuéra. Péro upéi umi soldádo ohopaite jey upégui ha avave ndoikuaái mbaʼérepa. Oĩ heta oimoʼãva umi soldádo ndoumoʼãveimaha ha upévare opytánte pe siudápe. ¿Péro mbaʼépa heʼi vaʼekue Jesús ojapo vaʼerãha hikuái?... Ha nde, reikórire Jerusalénpe ¿mbaʼépa rejapo vaʼerãmoʼã?... Umi ojerovia vaʼekue Jesús rehe ohejapa hóga ha oho oiko umi sérrore, mombyry Jerusaléngui.

Ohasa un áño, ha ndoikói mbaʼevete asy. Ohasa dos áño, tres áño ha ni umi soldádo resakue ndojekuaái. Katuete oĩne raʼe heʼíva: “Ajépa ivyroite umi oho vaʼekue”. Péro upeichaháguinte, cuatro áño haguépe, ou jey pe ehérsito Romagua ha omongora upe siuda. Ha upépe katu avavéma ndaikatuvéi osẽ upégui. Umi soldádo ohundipaite pe siuda ha hetaitereípe ojuka. Ha umi nomanóivape katu ojegueraha préso.

¿Ha mbaʼépa oiko raʼe umi iñeʼẽrendu vaʼekuégui?... Haʼekuéra oĩ mombyry Jerusaléngui, ha upéicha rupi ndojehúi chupekuéra mbaʼeve. Ohendu rupi ojeʼéva chupekuéra ojesalva.

¿Oho porãtapa ndéve neñeʼẽrendúramo?... Ikatu oime nde tuvakuéra heʼi ndéve ani hag̃ua resẽ rehuga kállepe. ¿Mbaʼérepa upéva?... Ikatúgui ochoka nderehe peteĩ áuto. Péro ikatu peteĩ día repensa: “Umi ótro mitãre ningo ndoikóiva mbaʼeve, hiʼarive koʼág̃a ndoúi ni peteĩ áuto. ¡Ndojehumoʼãingo chéve mbaʼeve!”.

Upéicha opensa vaʼekue avei umi oikóva Jerusalénpe. Umi soldádo ohopa jeýrõ guare, haʼete ndoikomoʼãvéimava hesekuéra mbaʼeve. Oĩ heta opytáva Jerusalénpe ohechávo umi ótro opytaha. Ojeʼe porã kuri chupekuéra mbaʼépa ojapo vaʼerã, péro haʼekuéra nopenái ha upéicha rupi omano.

Jahechamína ótro ehémplo. ¿Rehugámavapa fósforore?... Ikatu igústo ndéve rehecha mbaʼéichapa pe fósforo hendy ohóvo. Péro upéva ipeligróso. Ikatu okaipa nde róga ha remano.

Nemanduʼákena siémpre rejapo vaʼerãha ojeʼéva ndéve, ha ndahaʼéi sapyʼapyʼánte térã rejapose javénte. Upéicharõ añoite oho porãta ndéve. Ha ¿mávapa upe heʼíva: “Taʼyrakuéra, peneñeʼẽrendúkena pende tuvakuérape”?... Ñandejára. Ha aníke nderesarái haʼe heʼiha upéva nderayhúguinte.