Mbaʼépepa idiferénte umi oservíva Jehovápe ha umi ndoservíriva chupe

1, 2. ¿Mbaʼépa ombohovái Ñandejára siervokuéra koʼã ára pahápe? (Ehecha pe taʼanga oĩva iñepyrũme).

HETA doktór ha enferméra ningo oñatende umi pasiénte orekóvare enfermeda ikontahiósova. Haʼekuéra ojapo upéva oipytyvõségui umi héntepe. Péro ojekuida vaʼerã hikuái ani hag̃ua ova hesekuéra umi mbaʼasy. Upéicha avei ñande jaservíva Jehovápe jatrata opaichagua persónandi. Heta oĩ ñande apytépe ombaʼapo térã oikóva umi persóna ndoservírivandi Jehovápe. Upévare jajekuidámante vaʼerã ani hag̃ua ova ñanderehe ilajakuéra, pórke haʼekuéra ndoikói Jehová oipotaháicha.

² Koʼã ára pahápe ningo la hénte ndoikuaasevéima mbaʼépa iporã ha mbaʼépa ivai, oikóntema haʼekuéra oikoseháicha. Apóstol Pablo oskrivírõ guare Timotéope omombeʼu mbaʼéichapa oñekomportáta umi hénte ndoservíriva Ñandejárape. Heʼi avei amáske hiʼag̃ui pe fin hetavetaha upeichagua persóna (elee 2 Timoteo 3:1-5, 13). Nañandegustáiramo jepe mbaʼéichapa oñekomporta umi hénte, jaiko rupi ijapytepekuéra ikatu hína mbeguekatúpe ñapensa, ñañeʼẽ térã jajeportáma avei haʼekuéraicha (Prov. 13:20). Upévare ko artíkulope jahecháta mbaʼeichaitépa Jehová siervokuéra idiferénte umi persóna ndoservírivagui chupe. Jahecháta avei mbaʼépa ikatu jajapo ani hag̃ua ova ñanderehe umi hénte lája, ha mbaʼéichapa ikatu ñaipytyvõ chupekuéra oikuaa hag̃ua Ñandejárape.

 3. ¿Mbaʼeichagua persónarepa oñeʼẽ 2 Timoteo 3:2-5?

³ Apóstol Pablo heʼi vaʼekue koʼã ára pahápe ijetuʼutaha la situasión. Upéi omombeʼu 19 kósa ivaíva ojehechátava umi héntere koʼã tiémpope. Romanos 1:29-31-pe Pablo oñeʼẽ kuri avei umi mbaʼére, péro 2 Timoteo 3:2-5 oreko hetave detálle ndaipóriva ótra párte Escrituras Griegas Cristiánaspe. Upe téxtope Pablo oñepyrũre voi heʼíma umi hénte ijehénte opensataha, ha upéi heʼi hetave mbaʼe. Péro upéva ndeʼiséi entéro persóna ojeportataha Pablo heʼi haguéicha. Umi oservíva Jehovápe idiferénteta chuguikuéra (elee Malaquías 3:18).

 4. Emombeʼu mbaʼéichapa opensa umi persóna oñemombaʼeguasúva.

⁴ Pablo heʼi kuri umi hénte ijehénte ojepyʼapytaha ha iplatarayhúta. Upéi heʼi avei hesekuéra oñembotuichataha, ijejapóta ha oñemombaʼeguasúta. Peichagua persóna opensa iñimportanteveha hapichakuéragui, tahaʼe ivaleve rupi, iporãvégui, ipláta térã ijestúdio porãgui. Haʼekuéra oipota umi ótro ombotuicha chupekuéra. Peteĩ expérto heʼi umi oñemombaʼeguasúvare: “Peichagua persóna haʼete voi orekóva iméntepe peteĩ altár ijupe g̃uarã, ha haʼe voi oñesũ henondépe”. Oĩ heʼíva peteĩ persóna ijorgullósovape jepe omolestaitereiha ohecha jave ótro oñemombaʼeguasuha.

 5. ¿Mbaʼépa oiko vaʼekue Ñandejára siervokuéra ifiélvare?

⁵ Jehovápe ndogustái umi persóna ijorgullósova. La Biblia heʼi voi haʼe ndochaʼeiha pe oñemombaʼeguasúvare (Prov. 6:16, 17). Ko mbaʼe vaiete ningo ñanemomombyry Ñandejáragui (Sal. 10:4). Ha jaikuaaháicha, pe orgúllo ou Satanásgui (1 Tim. 3:6). Péro ñambyasýramo jepe, Ñandejára siervokuéra ifiélva jepe ikatu ou oñemombaʼeguasu. Por ehémplo, rréi Uzías Judagua iñeʼẽrendu vaʼekue Jehovápe heta áñore. Péro la Biblia heʼi hese: “Imbaretemírente, ou oñemombaʼeguasu ha upéva ohundiete chupe, ha nopenái Ijára Jehová heʼívare ha oike Jehová témplope ohapy hag̃ua insiénso pe altár ojehapyhápe insiénso”. Uzías ndorekói kuri derécho ojapóvo upéva. Tiémpo rire rréi Ezequías ou avei oñemombaʼeguasu, péro haʼe okambia jey kuri (2 Crón. 26:16, TNM; 32:25, 26).

 6. a) ¿Mbaʼérepa jaʼekuaa David ikatu hague kuri oñemombaʼeguasu? b) ¿Mbaʼépa oipytyvõ chupe siémpre iñumílde hag̃ua?

⁶ Oĩ persóna oúva oñemombaʼeguasu iporã haguére, ojekuaa haguére chupe opárupi, ivale rupi músikape, imbaretégui térã oĩgui omombaʼetereíva chupe. David orekopaite vaʼekue koʼã mbaʼe, upéicharõ jepe haʼe siémpre iñumílde. Por ehémplo, ojukárõ guare Goliátpe, rréi Saúl heʼi chupe ikatuha omenda itajýrare. Péro David osẽ heʼi: “¿Mbaʼéicha piko che amendáta peteĩ rréi rajýre? Chéngo ndarekói mbaʼeve, ha che túa hentekuéra naiñimportántei Israélpe” (1 Sam. 18:18, TNM). ¿Mbaʼépa oipytyvõ Davídpe ani hag̃ua oñemombaʼeguasu? Haʼe oikuaa porã vaʼekue Ñandejára iñumílde rupínte omaña hague hese ha omeʼẽ chupe heta kualida porã, priviléhio, ha ombokatupyry avei chupe (Sal. 113:5-8). David ontende Jehovánte omeʼẽ hague chupe opa mbaʼe porã orekóva (embojoja 1 Corintios 4:7 rehe).

 7. ¿Mbaʼépa ñanepytyvõta ñaneumílde hag̃ua?

⁷ Ñande ningo ñañehaʼã avei ñaneumílde David iñumílde haguéicha. Ñamombaʼeterei avei jahechávo mbaʼéichapa Jehová iñumílde haʼéramo jepe pe Rréi del univérso (Sal. 18:35). Ñañehaʼãmbaite ningo jasegi ko konsého oĩva la Bíbliape: “Pehechaukákena peiporiahuverekoha pende rapichápe pende pyʼaite guive, penembaʼeporã, peñemomirĩ, ani pendepochy rei ha penepasiénsiakena” (Col. 3:12). Ñande jaikuaa avei pe oporohayhúva ndaijejapói ha noñembotuichaiha (1 Cor. 13:4). Umi hénte ohecha jave ñaneumildeha, ikatu hína oikuaase avei Jehovápe. Upéicha avei sapyʼánte umi ména ndahaʼéiva Testígo ikatu hína “ojerovia Ñandejárare ojeʼeʼỹre chupe mbaʼeve, hembireko hekoporã rupi” (1 Ped. 3:1).

 8. a) ¿Mbaʼépa umi hénte opensa koʼág̃arupi ohechávo umi mitã naiñeʼẽrenduiha ituakuérape? b) ¿Mbaʼépa la Biblia omanda mitãnguérape?

⁸ Pablo omombeʼu vaʼekue avei mbaʼéichapa ojotratáta umi hénte koʼã ára pahápe. Haʼe heʼi umi mitãnguéra naiñeʼẽrendumoʼãiha ituakuérape. Koʼág̃arupi heta lívro, pelíkula ha prográmape oñeñeʼẽ térã ojehechauka ndaivairirõguáicha la mitãnguéra naiñeʼẽrendúi ituakuérape. Péro añetehápe upéva ikatu ombyai peteĩ família, ha umi família oñembyaíramo oafekta avei enterovépe. Ymaite guivéma ojehechakuaa siertoha upéva. Upévare, ymave Gréciape umi kuimbaʼe ombyepotíramo itúape operdepaite vaʼekue pe derécho orekóva umi siudadáno. Rómape katu pe léi ombojoja vaʼekue pe persóna oinupãvape itúape peteĩ oporojukávare. Pe Escrituras Hebreas ha Escrituras Griegas Cristianas omanda mitãnguérape omombaʼe hag̃ua ituakuérape (Éx. 20:12; Efes. 6:1-3).

 9. ¿Mbaʼépa oipytyvõta mitãrusu ha mitãkuñanguérape iñeʼẽrendu hag̃ua itúa ha isýpe?

⁹ ¿Mbaʼépa ikatu oipytyvõ umi mitãme iñeʼẽrendu hag̃ua ituakuérape oĩramo jepe heta ndojapóiva upéva? Opensáramo hikuái entéro mbaʼe itúa ha isy ojapóvare hesehapekuéra, katuete ijagradesidovéta ha iñeʼẽrenduvéta. Umi mitã imanduʼa vaʼerã avei ñande Ru yvagapegua oipotaha iñeʼẽrendu hikuái ituakuérape. Umi mitãrusu ha mitãkuña oñeʼẽ porãramo ituakuérare, oipytyvõta umi hapichápe haʼekuéra avei orrespetave hag̃ua ituakuérape. Oĩ ningo añete umi túa térã sy ndohayhúiva ifamíliape, ha upéicha jave ijetuʼuve umi mitãme iñeʼẽrendu hag̃ua chupekuéra ipyʼaite guive. Péro umi mitã ohechakuaáramo itúa ha isy ohayhuha chupekuéra, ndojaposemoʼãi mbaʼeve ombopochýtava ituakuérape. Upéva rangue iñovediénteta hikuái, sapyʼánte ijetuʼúramo jepe. Peteĩ ermáno imitãva hérava Austin heʼi: “Sapyʼánte ningo ajapose umi mbaʼe chéve chegustáva, péro aikuaa noĩvairiha umi rrégla omoĩva chéve che tuakuéra. Haʼekuéra oexplika porã vaʼekue chéve mbaʼérepa omoĩ umi rrégla ha siémpre cherendu porãnte avei hikuái. Umi mbaʼe chepytyvõ cheñeʼẽrendu hag̃ua. Che siémpre ahechakuaa mbaʼéichapa ojepyʼapy cherehe hikuái ha upévare ndajaposéi mbaʼeve ombopochýtava chupekuéra”.

10, 11. a) ¿Mbaʼéichapa ojekuaa umi héntere ndohayhuiha hapichápe? b) ¿Mbaʼérepa jaʼekuaa umi kristiáno verdadéro ohayhu añeteha hapichakuérape?

¹⁰ Pablo oñeʼẽ avei heta ótra kósa ojekuaáva umi hénte lájare ha ohechaukáva haʼekuéra ndohayhuiha hapichápe. Omombeʼu rire oĩtaha naiñeʼẽrendúiva ituakuérape heʼi avei imalagradesidotaha hikuái. Umi imalagradesídova ningo nomombaʼéi voi la ótro ojapóva hesehapekuéra. Pablo heʼi avei umi hénte oporombotavytaha ha oñemohatãtaha haʼekuéra heʼívapente. Upéva heʼise noñehaʼãmoʼãiha ojogueraha porã hag̃ua hapichakuérandi. Haʼekuéra otaky hapicháre ha itraisionéro. Heʼi umi mbaʼe ivaíva ótrore ha Ñandejárare jepe. Haʼekuéra okopi ótrore ha heʼi umi mbaʼe vai operhudika hag̃ua hapichakuérape.a

¹¹ La majoría umi hénte oĩva ko múndope ndoporohayhúi. Péro Jehová siervokuéra ndaupéichai, haʼekuéra ohayhu añete hapichápe ha ymaite guive voi ojapo upéicha. Jesús heʼi vaʼekue pe segundo mandamiénto iñimportantevéva oĩva pe Léi Mosáikape haʼeha hína jahayhu ñande rapichakuérape, upéicha jahechauka pe amór agápe. Sólamente pe primer mandamiénto heʼíva jahayhu vaʼerãha Ñandejárape la iñimportantevéva chugui (Mat. 22:38, 39). Jesús heʼi vaʼekue avei umi kristiáno verdadérope ojekuaataha ojoayhu rupi (elee Juan 13:34, 35). Haʼekuéra ohayhúta iñenemigokuérape jepe (Mat. 5:43, 44).

12. ¿Mbaʼéichapa Jesús ohechauka vaʼekue ohayhuha umi héntepe?

¹² Jesús ningo siémpre ohechauka vaʼekue ohayhu añeteha umi héntepe. Haʼe oho peteĩ puévlogui ótrope oñeʼẽ hag̃ua umi persónape umi mbaʼe porã Ñandejára Rréino ojapótavare. Omonguera avei umi siégope, ikarẽvape, ilépravape, nohendúivape, ha omanóvape jepe omoingove jey (Luc. 7:22). Ha ndahaʼéi upévante, omano kuri entéro yvypóra rehehápe, oĩramo jepe ndaijaʼéiva hese. Upévare ikatu jaʼe Jesús osegi hague itúa ehémplo, pórke haʼe oporohayhueterei vaʼekue. Koʼág̃a avei, testígo de Jehová oparupigua ohaʼanga Jesúspe ohayhúvo hapichápe.

13. ¿Mbaʼépa jahupytýta jahechaukáramo jahayhuha ñande rapichápe?

¹³ Ñañehaʼãramo jahechauka jahayhuha ñande rapichakuérape ikatu hína upéva omomýi chupekuéra oikuaase hag̃ua Ñandejárape. Por ehémplo, peteĩ karai Tailandiagua oasisti kuri peteĩ aty guasu tres diaguápe, ha ohecharamoiterei mbaʼéichapa entéronte ojoayhujoa. Upéi, oho jey rire hógape, ojerure umi testígo de Jehovápe ombostudia hag̃ua chupe la Biblia 2 vése por semána. Oñepyrũma avei opredika entéro ihentekuérape, ha 6 mése haguépe ojapo pe lektúra bíblica primera ves Salón del Réinope. Ha ñande, ¿jahechaukápa jahayhuha ñande rapichápe? Jaikuaa hag̃ua upéva iporã ñañeporandu: ¿Ajapo piko ikatúva guive aipytyvõ hag̃ua che hentekuérape, ermanokuérape ha umi hénte atopávape territóriope? ¿Añehaʼãmbaitépa ahecha enterovépe Jehová ohechaháicha chupekuéra?

14, 15. a) ¿Mbaʼeichagua komportamiénto vaípa ojehecha heta persónare? b) ¿Mbaʼe kámbiopa ojapo heta hénte?

¹⁴ Koʼã ára pahápe ojehecha umi héntere hetave mbaʼe vai, ha ñande kristianokuéra ñañehaʼã vaʼerã ani hag̃ua jajeheʼa umichagua persónare. Por ehémplo, oĩ umi ndohayhúiva mbaʼeve iporãva. Peichagua héntepe ndogustaiete voi umi mbaʼe porã ha oñemoĩ voi umívare. Avei ndojejokokuaái ha oñemboharái hapicháre. Oĩ hovaʼatãva ha ojapo rei reíva heta mbaʼe ha ni nopensái umíva ikatuha operhudika hapichápe.

¹⁵ Heta oĩ ymave ojeporta vaʼekue animálcha, péro upe rire okambia la ilajakuéra. Peteĩ profesía bíblica heʼi voi heta persóna ojapotaha koʼã kámbio tuichaitéva hekovépe (elee Isaías 11:6, 7). Ko profesía oñeʼẽ umi animál salváhere, heʼi pe lóvo ha león oikotaha trankílo umi ovecharaʼy ha vakaraʼýndi. ¿Mbaʼéicha rupípa oiko upéva? La Biblia oprofetisa kuri: “Ko yvy henyhẽta Jehová enseñánsagui” (Is. 11:9, TNM). Umi animál ningo ndaikatúi oaprende umi mbaʼe Jehová omboʼéva. Upévare jaʼekuaa ko profesía oñeʼẽha umi héntere, ha ohechauka mbaʼéichapa okambiáta hikuái oikuaa rire Jehovápe.

16. ¿Mbaʼéichapa la Biblia okambia heta héntepe?

¹⁶ Heta ermáno ha ermána oñekomporta vaʼekue lóvoicha oikuaa mboyve Jehovápe, péro koʼág̃a oiko porã hapichándi. Ikatu jalee algúno ermáno rembiasakue ñande sítio jw.org-pe umi artíkulo héravape “La Biblia okambia chupekuéra”. Umi oikuaáva Jehovápe ha oservíva chupe ndojoguaiete umi persóna heʼi guaʼúvape oserviha Ñandejárape, péro hekovére ojekuaa ndosegiriha chupe. Umíva heʼi omombaʼeguasuha Ñandejárape péro la ojapóvare ohechauka ndaupeichaiha. Ñandejára siervokuéra apytépe katu oĩ la ojeporta vaʼekue ymave animálcha, péro koʼág̃a omondéma “pe teko pyahu ojejapo vaʼekue Ñandejára oipotaháicha ha oñemopyendáva tekojoja ha jerovia teetépe” (Efes. 4:23, 24). Heta persóna oaprende jave Jehovágui ohechakuaa tekotevẽha ojapo la haʼe oipotáva. Upévare ojapo kámbio umi mbaʼe ogueroviávape, opensa lájape, ha umi mbaʼe ojapóvape avei. Hasýramo jepe koʼã kámbio, lomímonte okonsegi hikuái pórke Jehová oipytyvõ ijespíritu rupive umi ojaposévape hembipota.

17. ¿Mbaʼépa ñanepytyvõta ani hag̃ua ova ñanderehe umi hénte lája?

¹⁷ Amás día ojekuaa porãve mbaʼéichapa idiferénte umi persóna oservíva Ñandejárape ha umi ndoservíriva chupe. Ñande jaservíva Jehovápe jajekuida vaʼerã ani hag̃ua umi hénte lája ova ñanderehe. Ñahendúkena Jehová konsého ha ñañemomombyry umi hénte oñekomportávagui 2 Timoteo 3:2-5-pe oĩháicha. Upéicharõ jepe, jaikuaa ndaikatuiha ñamboykete umichaguápe. Heta oĩ ñande apytépe ombaʼapóva, ohóva koléhiope térã oikóva umi persóna ndoservírivandi Jehovápe. Péro ñande nañapensái ni ndajaikói vaʼerã haʼekuéraicha. ¿Mbaʼépa ñanepytyvõta upearã? Ñañemoag̃uive vaʼerã Jehováre. Upearã jastudia meme vaʼerã Iñeʼẽ ha jaiporavo ñane amigorã umi persóna ohayhúva chupe.

18. ¿Mbaʼéichapa umi mbaʼe jaʼéva ha jajapóva ikatu oipytyvõ ñande rapichápe oikuaa hag̃ua Jehovápe?

¹⁸ Ñande ningo ñaipytyvõseterei ñande rapichápe oikuaa hag̃ua Jehovápe. Jahekákena oportunida japredika hag̃ua chupekuéra, ha jajerure avei Jehovápe tañanepytyvõ jaʼe hag̃ua entéro mbaʼe hendaitépe ha itiempoitépe. Ñamombeʼu vaʼerã enterovépe ñande haʼeha testígo de Jehová. Upéicharõmante umi ohecháva ñane kondúkta porãha, omombaʼeguasúta Ñandejárape ha ndahaʼéi ñandéve. Jehová “ñanerekomboʼe ñamboyke hag̃ua opa mbaʼe oñemoĩva Ñandejára rembipotáre ha ani hag̃ua jaipota umi mbaʼe ko mundopegua. Péicha ñaneakãguapýta, jaikóta hekópe ha ñamombaʼeguasúta Ñandejárape jaikóramo jepe ko múndope” (Tito 2:11-14). Jasegíramo Jehová ehémplo ha jajapóramo la chupe ogustáva, umi hénte ohechakuaáta upéva ha ikatu voi heʼi: “Ore rohose penendive, pórke rohendu Ñandejára oĩha penendive” (Zac. 8:23, TNM).