Apocalipsis: ¿Mbaʼérepa iñimportánte ko lívro ñandéve g̃uarã koʼág̃arupi?

1, 2. ¿Mbaʼérepa iñimportantete ñandéve g̃uarã pe lívro de Apocalipsis?

¿NDÉPA algúna ves reñemoĩmava remaña hína umi fóto orekóvare peteĩ ne amígo? Ikatu oime ndereikuaái hetápe umi fótope, péro derrepénte nderesaho sapyʼa peteĩva umi fótore pórke nde voi reĩ pype. Entónse eñemoĩ epensa ha eñahaʼã nemanduʼa arakaʼe guarépa upe fóto, ha mbaʼépa oiko rakaʼe upérõ. Ha ikatu avei eñemoĩ emaña umi ótro oĩvare pe fótope jahecha eikuaápa avei chupekuéra. Ha nde reĩ rupi upépe, katuete upe fóto iñimportánte hína ndéve g̃uarã.

² Pe lívro de Apocalipsis ningo ojogua upe fótope. ¿Mbaʼérepa jaʼe upéva? Pórke upe lívro ojeskrivi vaʼekue ñandéve g̃uarã. Pe primer versíkulopema voi heʼi ñandéve: “Koʼã mensáhe Jesucristo orresivi Ñandejáragui ha koʼág̃a oikuaauka hína. Haʼe orresivi koʼã mbaʼe ohechauka hag̃ua Ñandejára esklavokuérape umi mbaʼe oikótava koʼẽrõite” (Apoc. 1:1). Ohechaukaháicha ko téxto, ko lívro ndojeskrivíri enterove persónape g̃uarã, síno ñande jaservívape g̃uarã Jehovápe. Ha ñande ñaipytyvõ hína oñekumpli hag̃ua umi profesía oĩva ko lívrope. Jaʼe porãsérõ g̃uarã, ñande ñaĩ hína ko fótope.

3, 4. ¿Arakaʼe guivépa oñepyrũ raʼe oñekumpli la oĩva lívro de Apocalípsispe, ha mbaʼépa jajapo vaʼerã ñande?

³ Ikatu avei jaʼe pe lívro de Apocalipsis iñimportanteha ñandéve g̃uarã oñekumpli rupi ñane tiémpope. Apóstol Juan ohechauka vaʼekue upéva heʼírõ guare: “Pe espíritu sánto rupive ojehechauka chéve umi mbaʼe oikótava ñande Ruvicha díape” (Apoc. 1:10). Juan oskrivi vaʼekue kóva áño 96-pe d.C. Ha upérõ hetáiti ofalta kuri og̃uahẽ hag̃ua pe ‘ñande Ruvicha día’ (Mat. 25:14, 19; Luc. 19:12). Péro umi profesía bíblica ohechauka upe día oñepyrũ hague 1914-pe, Jesús oñepyrũrõ guare ogoverna yvágape. Upe áño guive oñepyrũma kuri oñekumpli umi profesía oĩva lívro de Apocalípsispe, ha jarekóvo enkuénta upéva ikatu jaʼe ñande jaikoha hína “ñande Ruvicha díape”.

⁴ Jaiko rupi ko tiémpo iñimportantetévape, koʼýte jareko vaʼerã enkuénta pe konsého oĩva Apocalipsis 1:3-pe: “Ovyʼa pe persóna olee hatãva ko profesía, ha ovyʼa umi ohendúva la heʼíva ko profesía ha umi ojapóva heʼíva pype. Pórke pe tiémpo oñemoĩ vaʼekue hiʼag̃uimbaitéma hína”. Upéicharõ, heʼiháicha ko téxto ñande ‘jalee hatã’ vaʼerã ko profesía ikatu hag̃uáicha ‘ñahendu’ ha ‘jajapo’ la upépe oĩva. ¿Péro mbaʼe mbaʼépa oĩ hína umíva apytépe?

 5. ¿Mbaʼéichapa lívro de Apocalipsis ohechauka iñimportanteha jaadora Jehovápe haʼe oipotaháicha?

⁵ Jaleéramo pe lívro de Apocalipsis pe primer kapítulo guivéma voi, jahechakuaáta Jesús oikuaapaiteha la oikóva umi kongregasiónpe (Apoc. 1:12-16, 20; 2:1). Upéva ojekuaa porãiterei umi mbaʼe Jesús heʼi vaʼekuére umi 7 kongregasión oĩvape Asia Menórpe. Haʼe omeʼẽ vaʼekue chupekuéra heta konsého ikatu hag̃uáicha haʼekuéra ojasegura oadoraha hína Jehovápe haʼe oipotaháicha. Péro umi konsého ningo ideprovéchonte avei ñandéve g̃uarã koʼág̃arupi. ¿Ha mbaʼépa ñanemboʼe upéva? Jesucristo voi haʼeha la ñanemoakãva, ha haʼe ohechapaiteha entéro mbaʼe oikóva umi kongregasiónpe. ¡Ndaipóri ojehasareíva chugui! Ha haʼe oikuaa avei mbaʼépa jajapo vaʼerã ikatu hag̃uáicha Jehová siémpre ñandeguerohory. Jahechamína koʼág̃a mbaʼe konséhopa haʼe omeʼẽ vaʼekue umi kongregasiónpe.

 6. a) Según Apocalipsis 2:3, 4, ¿mbaʼe provlémapa oreko rakaʼe pe kongregasión de Éfeso? b) ¿Mbaʼépa ñanemboʼe upéva?

⁶ (Elee Apocalipsis 2:3, 4). Jasegi vaʼerã jahayhu Jehovápe, ha ndajahejái vaʼerã mbaʼeve omokangy upéva. Jesús oguerohory vaʼekue pe kongregasión de Éfesope oaguanta haguére heta mbaʼe, ha osegi haguére oservi Jehovápe iprovléma hetáramo jepe. Péro heʼi avei chupekuéra ndohayhuveimaha hikuái Jehovápe anteve guaréicha, ha tekotevẽha ojapo upéva ikatu hag̃uáicha Jehová oasepta la iñadorasión. Ha upéicha avei ñande ndahaʼéi ñaaguanta reínte vaʼerã, pórke Jehovápe g̃uarã iñimportánte la jajapóva, péro iñimportánte hína avei mbaʼérepa jajapo upéva. Haʼe oipota ñande jaadora chupe jahayhúgui chupe ha ñambovyʼaségui chupe (Prov. 16:2; Mar. 12:29, 30).

 7. a) Según Apocalipsis 3:1-3, ¿mbaʼe provlémapa oreko vaʼekue pe kongregasión de Sardis? b) ¿Mbaʼépa ñanemboʼe upéva?

⁷ (Elee Apocalipsis 3:1-3). Jasegi vaʼerã ñanekyreʼỹ Jehová servísiope. Umi ermáno oĩ vaʼekue kongregasión de Sárdispe oreko vaʼekue ótro provléma. Haʼekuéra ñepyrũrã ikyreʼỹeterei vaʼekue Jehovápe g̃uarã, péro tiémpo rire ou ikaigue hikuái. Upévare Jesús heʼi vaʼekue upe kongregasiónpe: “Epáykena”. ¿Mbaʼépa ñanemboʼe upe konsého? Siérto, Jehová ningo ndahesaraimoʼãi umi mbaʼe jajapo vaʼekuégui anteve (Heb. 6:10). Péro nañapensái vaʼerã umi mbaʼe jajapo vaʼekue yma ovalemaha. Ikatu oime koʼág̃a ndaikatuvéima jajapo heta mbaʼe anteve guaréicha, péro lomímonte ñañehaʼãmbaite vaʼerã jajapo la ikatúva guive “ñande Ruvicha servísiope”, ha jajapo vaʼerã upéva og̃uahẽ meve pe fin (1 Cor. 15:58; Mat. 24:13; Mar. 13:33).

 8. a) Según Apocalipsis 3:15-17, ¿mbaʼe konséhopa oñemeʼẽ vaʼekue kongregasión de Laodicéape? b) ¿Mbaʼépa ñanemboʼe upéva?

⁸ (Elee Apocalipsis 3:15-17). Ñañatende vaʼerã ani ñandepyʼamokõi. Kongregasión de Laodicéape katu Jesús heʼi vaʼekue orekoha ótro provléma. Heʼi vaʼekue chupekuéra ‘ojoguaha y tíviope’, pórke ndoadoravéima Jehovápe ipyʼaite guive. Upévare haʼe heʼi vaʼekue chupekuéra ‘ivaipaitemaha la isituasión ha imboriahuha’ hikuái. Upévare haʼekuéra okambiámante vaʼerã ha oñepyrũ oadora jey Jehovápe ipyʼaite guive (Apoc. 3:19). ¿Mbaʼépa ñanemboʼe upéva? Oiméramo ñande nañanekyreʼỹguasuvéi Jehovápe g̃uarã, ñañehaʼãmbaite vaʼerãha ñapensa entéro mbaʼe Jehová omeʼẽ vaʼekuére ñandéve ha ñamombaʼe umíva (Apoc. 3:18). Ñañatende vaʼerã avei ñandejehe ani hag̃ua jaiko porãségui, jaju ñambotapykue Jehová servísio.

 9. ¿Mbaʼépa ñaaprende la Jesús heʼi vaʼekuégui kongregasión de Pérgamo ha Tiatírape?

⁹ Ñañatende vaʼerã ani hag̃ua ñanembotavy umi apóstata. Jesús okorrehi vaʼekue unos kuánto oĩvape pe kongregasión de Pérgamope, pórke haʼekuéra oiko omoingovaipa la ermanokuérape ha omoñepyrũ umi sékta (Apoc. 2:14-16). Kongregasión de Tiatírape katu ofelisita vaʼekue unos kuánto ermánope, pórke haʼekuéra omboyke vaʼekue “umi enseñánsa japu oúva Satanásgui”, ha upévare Jesús omokyreʼỹ vaʼekue chupekuéra ‘osegi hag̃ua oñakarama hatã’ pe añeteguáre (Apoc. 2:24-26). Péro oĩ vaʼekue avei umi oheja vaʼekue ombotavy chupe umi enseñánsa japu, ha upévare haʼekuéra tekotevẽ kuri oñarrepenti ha okambia. ¿Mbaʼépa ñanemboʼe upéva? Ñande avei ñamboyke vaʼerãha entéro umi enseñánsa japu oñemoĩva la Biblia heʼívare. Oĩ apóstata “haʼetévaicha oservíva Ñandejárape, péro hekovére ohechaukáta ndoikoiha upéicha” (2 Tim. 3:5). ¿Mbaʼépa jajapo vaʼerã ikatu hag̃uáicha japilla oĩramo ñanembotavyséva, ha péicha ñamboyke umi enseñánsa japu oúva Satanásgui? Upearã jastudia porã vaʼerã Ñandejára Ñeʼẽ ha jaikuaa mbaʼépa la Jehová ñanemboʼéva (2 Tim. 3:14-17; Jud. 3, 4).

10. ¿Mbaʼépa ikatu avei ñaaprende la Jesús heʼi vaʼekuégui Pérgamo ha Tiatírape?

¹⁰ Ñanembojeguaru vaʼerã opaichagua tekovai. Oĩ vaʼekue avei ótro provléma Pérgamo ha Tiatírape. Umíva umi kongregasiónpe ningo oĩ vaʼekue umi hekovaíva ha Jesús okondena vaʼekue chupekuéra ha umi opermitívape haʼekuéra osegi upe kongregasiónpe (Apoc. 2:14, 20). ¿Mbaʼépa ñanemboʼe upéva? Jehová ni mbaʼevéicharõ nopermitimoʼãiha osegi ikongregasiónpe peteĩ persóna hekovaíva ha nombohasareimoʼãiha avei chugui upéva, oiméramo jepe haʼe oservíma chupe heta áñore térã oreko heta priviléhio (1 Sam. 15:22; 1 Ped. 2:16). Haʼe oipota ñande siémpre ñanderekopotĩ, jepe amás día ko múndo desastreve (Efes. 6:11-13).

11. ¿Mbaʼe mbaʼépa ñaaprendéma koʼa peve? (Ehecha avei pe rrekuádro “¿Mbaʼépa ñanemboʼe koʼág̃arupi?”).

¹¹ ¿Mbaʼe mbaʼépa ñaaprendéma koʼa peve? Por ehémplo jahecháma jajasegura vaʼerãha jaadoraha hína Jehovápe haʼe oipotaháicha, ha oiméramo jajapo hína algúna kósa ñandereja vaítava henondépe, upepete ñakambia vaʼerã (Apoc. 2:5, 16; 3:3, 16). Péro oĩ avei ótra kósa Jesús oakonseha vaʼekue umi kongregasionkuérape. Jahechamína mbaʼépa upéva.

12. ¿Mbaʼépa Jesús heʼi vaʼekue umi kongregasión de Esmirna ha Filadélfiape, ha mbaʼérepa iñimportánte ñandéve g̃uarã upéva koʼág̃arupi? (Apocalipsis 2:10).

¹² Jahechamína koʼág̃a mbaʼépa Jesús heʼi vaʼekue umi kongregasión de Esmirna ha Filadélfiape. Haʼe heʼi vaʼekue koʼã kongregasiónpe ani hag̃ua okyhyje oĩramo g̃uarã oñemoĩva hesekuéra, pórke Jehová katuete opremiataha chupekuéra osegíramo ifiél (elee Apocalipsis 2:10; 3:10). ¿Mbaʼépa ñanemboʼe upéva? Ikatuha avei oĩ ñandepersegíva ñandéve, péro ñande ñaĩ vaʼerãha dispuésto ñaaguantávo upéva (Mat. 24:9, 13; 2 Cor. 12:10). ¿Mbaʼérepa iñimportantete ko konsého?

13, 14. ¿Mbaʼéichapa oafekta Ñandejára puévlope umi mbaʼe oñemombeʼúva Apocalipsis kapítulo 12-pe?

¹³ Lívro de Apocalipsis ñandeavisa porã voi kóva ko tiémpope oĩtaha umi opersegíva Ñandejára puévlope. Apocalipsis kapítulo 12-pe por ehémplo oñemombeʼu Ñandejára Rréino oñepyrũrõ guare ogoverna yvágape, oñepyrũ hague upépe peteĩ gérra. Miguel ha hiʼanhelkuéra oñorairõ Satanás ha umi demoniokuéra kóntrape (Apoc. 12:7, 8). Péro Satanás umíva operde ha upéicha rupi oñemosẽ chupekuéra yvágagui ha ou hikuái ko yvy ape ári ombosufri la héntepe (Apoc. 12:9, 12). ¿Péro mbaʼéichapa upéva operhudika Ñandejára puévlope?

¹⁴ Lívro de Apocalipsis omombeʼu avei ñandéve mbaʼéichapa Satanás orreaksiona upe haguére. Koʼág̃a ningo haʼe ndaikatuvéima oho yvágape, ha upévare oñemoĩ kon tódo oataka umi unhído hembývape, pórke haʼekuéra hína Ñandejára rrepresentánte ko yvy ape ári ha chupekuéra ‘oñenkarga vaʼekue pe traváho oñeʼẽ hag̃ua Jesús rehe’ (Apoc. 12:17; 2 Cor. 5:20; Efes. 6:19, 20). Jahechamína mbaʼéichapa Satanás ojapo upéva.

15. ¿Mávapepa orrepresenta umi mokõi testígo oñemensionáva Apocalipsis kapítulo 11-pe, ha mbaʼépa oiko raʼe hesekuéra?

¹⁵ Satanáspe oñemosẽ rire yvágagui, haʼe oñepyrũ vaʼekue oataka vaipaite umi unhídope ha prinsipálmente ojeserra vaʼekue umi ogiávare Jehová organisasión upe tiémpope. Koʼã ermáno haʼe vaʼekue ‘umi mokõi testígo’ ojeprofetisa vaʼekue ojejukataha (Apoc. 11:3, 7-11).b Ha upe profesía oñekumpli vaʼekue áño 1918-pe, pórke upérõ 8 umi ogiáva Jehová organisasión ojegueraha vaʼekue préso ha oñekondena chupekuéra opyta hag̃uáicha kárselpe heta áñore. Upéicha rupi haʼetévaicha pe traváho ojapóva umi unhído opa rei hague térã heʼiháicha pe profesía “omano”.

16. ¿Mbaʼépa oiko raʼe upéi áño 1919-pe, péro mbaʼépa Satanás osegi ojapo upe tiémpo guive?

¹⁶ Pe profesía heʼi vaʼekue avei un tiémpo haguépe ‘umi mokõi testígo’ oikove jeytaha. ¿Mbaʼéichapa oñekumpli raʼe upe profesía? Upéva oiko vaʼekue al áño sigiénte, pórke 1919-pe umi 8 ermáno ojegueraha vaʼekue kárselpe ojelivera, pórke ojehechakuaa ojeakusa reínte hague chupekuéra. Ha koʼã ermáno pyaʼe voi omoñepyrũ jeýma pe predikasión. Péro Satanás lomímonte osegi vaʼekue oataka Jehová puévlope. Upe tiémpo guive, haʼe “peteĩ rríoicha” omondo hiʼarikuéra la persekusión (Apoc. 12:15). Upévare oiméramo ñande jahasa hína koʼãichagua mbaʼe, tekotevẽ ñaaguanta ha jajerovia (Apoc. 13:10).

17. ¿Mbaʼérepa ikatu jaʼe Jehová puévlope oñepytyvõ hague oñeimoʼãʼỹháicha Satanás oataka vaipaitéramo jepe chupekuéra?

¹⁷ Apocalipsis 12 omombeʼu avei Jehová puévlope oñepytyvõtaha oñeimoʼãʼỹháicha. ¿Mbaʼérepa jaʼe upéva? Pórke omombeʼu “pe yvy” omokõtaha “pe rrío” de persekusión (Apoc. 12:16). ¿Mbaʼéichapa oñekumpli vaʼekue ko profesía? Upéva ningo oiko, pórke Satanás múndo voi oñemeʼẽʼỹre enkuénta oipytyvõ vaʼekue Jehová puévlope. Por ehémplo ojejapo jave peteĩ huísio ñane ermanokuéra kóntrape, oĩ umi hués osẽva ñande favórpe ha omeʼẽ umi ermanokuérape liverta oadora hag̃ua Jehovápe. ¿Ha mbaʼéichapa ñane ermanokuéra oaprovecha vaʼekue pe liverta oñemeʼẽ vaʼekue chupekuéra? Haʼekuéra ojapo vaʼekue opa ikatúva okumpli porã hag̃ua pe traváho Jehová onkarga vaʼekue chupekuéra (1 Cor. 16:9). ¿Péro mbaʼépa hína upe traváho?

18. ¿Mbaʼépa hína pe traváho iñimportantevéva jarekóva koʼã ára pahápe?

¹⁸ Jesús oprofetisa vaʼekue idisipulokuéra opredikataha “umi notísia porã oñeʼẽva Ñandejára Rréinore” ko yvy tuichakuére og̃uahẽ mboyve pe fin (Mat. 24:14). Péro koʼã disípulo noĩri haʼeño, pórke umi ánhel oipytyvõ hína chupekuéra ikatu hag̃uáicha opredika umi “notísia porã umi oikóvape ko yvy ári, entéro tetã, trívu, puévlo ha umi oñeʼẽvape diferénte idióma” (Apoc. 14:6).

19. ¿Mbaʼe mensáhepa ñamombeʼu vaʼerã avei umi héntepe?

¹⁹ Péro Jesús disipulokuéra ndahaʼéi umi notísia porã añónte la opredikáva. Pórke Apocalipsis 8 al 10 omombeʼu umi ánhel orekoha avei peteĩ mensáhe heʼíva oñehunditaha umi hénte aña. Ha Jesús disipulokuéra oapoja chupekuéra omombeʼu hag̃ua avei ko mensáhe. Upéicha rupi umi testígo de Jehová hetaiterei áñorema opredika oikóvo peteĩ mensáhe oñekomparáva ‘amandáu ha tatáre’, ha heʼíva mbaʼéichapa oñehundíta Satanás múndo aña (Apoc. 8:7, 13). Upévare umi hénte oikuaámante vaʼerã ko mensáhe ikatu hag̃uáicha okambia ha oheja umi mbaʼe vai ojapóva ikatu hag̃uáicha ojesalva ág̃a ou vove Jehová ára guasu (Sof. 2:2, 3). Péro heta hénte ningo nohenduséi ko mensáhe ha upévare tekotevẽmante ñandepyʼaguasu jasegi hag̃ua ñamombeʼu chupekuéra upéva. Péro jareko vaʼerã enkuénta pe jehasa asy guasu aja, ipohyive jeytaha pe mensáhe jagueraháva umi héntepe (Apoc. 16:21).

20. ¿Mbaʼe mbaʼépa jahecháta umi ótro mokõi artíkulope?

²⁰ Ñandéve g̃uarã ningo iñimportanteterei ñañatende porã la heʼívare “ko profesía”, pórke ñande ñaipytyvõ hína oñekumpli hag̃ua la upépe heʼíva (Apoc. 1:3). ¿Péro mbaʼépa ñanepytyvõta jasegi hag̃ua ñaaguanta oĩramo oñemoĩva ñanderehe ha jasegi hag̃ua avei ñamombeʼu umi notísia porã entéro umi héntepe? Upearã ñanepytyvõta hína ñapensáramo mokõi mbaʼére: Primero, ¿mbaʼépa Apocalipsis heʼi oikotaha umi Jehová enemigokuérare? Ha segundo, ¿mbaʼe vendisiónpa ñande jahupytýta amo gotyove jasegíramo ñaneñeʼẽrendu Jehovápe? Koʼã mbaʼére ñañeʼẽta umi ótro mokõi artíkulope.