Jehová ogarantisa ojapotaha ko yvýgui peteĩ paraíso

 1. ¿Mbaʼe mensáhepa Isaías omeʼẽ vaʼekue umi ótro israelítape?

PE PROFÉTA Isaías heʼi vaʼekue Jehová haʼeha pe “Dios verdadéro”. Pe palávra “verdadéro” heʼise avei “amén” (Is. 65:16). Amén heʼise “taupéicha” térã “katuete”. La Bíbliape ojepuru jepi pe palávra “amén” ojehechauka hag̃ua Jehová ha Jesús siémpre heʼi ha ojapoha siertoguáva. Isaías mensáhe hesakã porãiterei vaʼekue umi ótro israelítape: Jehová heʼíva katuete oñekumpli. Jehová ohechaukáma voi entéro umi ipromésa oñekumpliha.

 2. ¿Mbaʼérepa ikatu jajerovia Jehová oprometévare, ha mbaʼépa ñakontestáta ko artíkulope?

² ¿Ikatúpa avei ñande jajerovia umi mbaʼe Jehová oprometévare amo gotyove g̃uarã? Haimete 800 áño Isaías tiémpo rire, apóstol Pablo oexplika vaʼekue mbaʼérepa ikatu ñaime segúro Jehová promesakuéra siémpre oñekumpliha. Pablo heʼi vaʼekue ‘Ñandejára ni mbaʼevéicharõ ndaikatuiha ijapu’ (Heb. 6:18). Ñapensamína ko ehémplore: Peteĩ ykuágui osẽramo y porã ikatúva jaʼu, upégui avei ndaikatúi osẽ jukyry. Upéicha avei, Jehovágui voi ou pe añetegua ha upévare chugui ndaikatúi osẽ mbaʼeveichagua japu. Upéicha rupi ñande pyʼaite guive ikatu jajerovia entéro mbaʼe Jehová heʼívare, umíva apytépe, umi promésa ojapóvare ñane renonderãme g̃uarã. Ko artíkulope ñambohováita koʼã porandu: ¿Mbaʼépa Jehová opromete ñandéve? ¿Ha mbaʼe garantíapa haʼe omeʼẽ ohechauka hag̃ua okumplitaha katuete la oprometéva?

 3. a) ¿Mbaʼe promésapa ñamombaʼeterei ñande jaservíva Jehovápe? (Apocalipsis 21:​3, 4). b) ¿Mbaʼépa sapyʼánte oĩ heʼíva jalee jave chupe Ñandejára promésa?

³ Enterove jaservíva Jehovápe ningo ñamombaʼeterei pe promésa ñaanalisátava koʼág̃a (elee Apocalipsis 21:​3, 4). Jehová opromete voi og̃uahẽtaha pe tiémpo ‘ndaiporimoʼãveimahápe omanóva, oñelamentáva, hasẽva ni hasýva’. Ñande jalee jepi koʼã versíkulo jahechauka hag̃ua la héntepe mbaʼéichapa jaikóta pe paraísope. ¿Péro mbaʼépa sapyʼánte ojeʼe ñandéve jalee jave ko promésa? Ikatu oĩ heʼíva: “Iporãiterei ningo añete, péro ijetuʼu la oiko hag̃ua”.

 4. a) ¿Mbaʼépa Jehová oikuaa vaʼekue oikotaha koʼág̃arupi? b) ¿Mbaʼépa avei ojapo vaʼekue Jehová omeʼẽrõ guare ipromésa porãite?

⁴ Jehová omeʼẽ vaʼekue apóstol Juan rupive ko promésa oñeʼẽva pe paraísore. Upérõ Jehová oikuaáma vaʼekue ko promésa ñakompartitaha la héntendi japredika jave. Haʼe oikuaa vaʼekue avei heta héntepe ijetuʼutaha oguerovia hag̃ua oñekumplitaha koʼã mbaʼe (Is. 42:9; 60:2; 2 Cor. 4:​3, 4). ¿Mbaʼéichapa ikatu jaasegura ótrope ha ñandejupe voi oñekumplitaha katuete pe promésa oĩva Apocalipsis 21:​3, 4-pe? Jehová oprometérõ guare koʼã mbaʼe, omeʼẽ vaʼekue avei pruéva ohechaukáva mbaʼérepa ikatu jajerovia haʼe nopyrũmoʼãiha iñeʼẽre. ¿Mbaʼeichagua garantíapa haʼe omeʼẽ?

 5. ¿Mbaʼe versíkulopa ohechauka ikatuha jajerovia Jehová promésare ha mbaʼépa heʼi umi versíkulo?

⁵ Jehová opromete rire mbaʼéichapa ojeikóta pe paraísope, heʼi avei mbaʼérepa ikatu jajerovia oñekumplitaha. Umi versíkulo heʼi: “Ñandejára oguapýva pe trónope heʼi: ‘Ambopyahu hína entéro mbaʼe’. Ha heʼi avei: ‘Eskrivíkena koʼã mbaʼe, pórke koʼã ñeʼẽ ningo siertoite ha umi hénte ikatu ojerovia hese’. Ha heʼi chéve: ‘¡Umi mbaʼe oikopáma! Che hína Alfa ha Omega, pe iñepyrũ ha pe ipahaite’”(Apoc. 21:​5, 6a).

 6. ¿Mbaʼérepa la heʼíva Apocalipsis 21:​5, 6 omombarete ñande jerovia Jehová promésare?

⁶ ¿Mbaʼérepa umi versíkulo heʼíva omombarete ñande jerovia Ñandejára promésare? Koʼã versíkulope ningo haʼete Jehová ofirmáva hína peteĩ dokuménto oasegurahápe haʼe katuete okumplitaha ipromésa. Upéicharõ Apocalipsis 21:​3, 4-pe jatopa la Jehová oprometéva. Péro upéi versíkulo 5 ha 6-pe, jaʼe porãsérõ g̃uarã, Jehová omoĩ ifírma ogarantisa hag̃ua okumplitaha ipromésa. Ñaanalisa porãvemína mbaʼéichapa Jehová ogarantisa ñandéve ikatuha jajerovia hese.

 7. ¿Mbaʼe garantíapa jatopa oñepyrũvo versíkulo 5 ha mbaʼérepa upéva ndaijojahái?

⁷ Ñandejára garantía jatopa oñepyrũvo pe versíkulo 5. Upépe heʼi: “Ñandejára oguapýva pe trónope heʼi” (Apoc. 21:5a). Koʼápe heʼíva ningo ndaijojahái, pórke en totál 3 vésente Jehová oñeʼẽ lívro de Apocalípsispe. Upéicharõ ndahaʼéi peteĩ ánhel ni Jesús la omeʼẽva hína ko garantía, síno Jehovaite voi. Upéva ohechauka ikatuha jajerovia ñande pyʼaite guive la heʼívare upe rire. ¿Mbaʼérepa? Pórke Jehová haʼe hína “Ñandejára ikatuʼỹva ijapu” (Tito 1:2). Upévare ikatu ñakonfia ñane korasõite guive la heʼívare Apocalipsis 21:​5, 6.

 8. ¿Mbaʼéichapa Jehová oasegura katuete oñekumplitaha la oprometéva? (Isaías 46:10).

⁸ Upéi Ñandejára heʼi: “Ambopyahu hína entéro mbaʼe” (Apoc. 21:5). Jaikuaa ningo Jehová oñeʼẽha umi mbaʼe oikótavare amo gotyove. Péro chupe g̃uarã la oprometéva katuete oñekumplíta, upévare haʼe oñeʼẽvo koʼã mbaʼére, oñeʼẽ oñekumplipamarõguáicha (elee Isaías 46:10).

 9. a) ¿Mbaʼépa heʼise pe fráse “ambopyahu hína entéro mbaʼe”? b) ¿Mbaʼépa oikóta “pe yvága ha pe yvy” oĩvagui koʼág̃a?

⁹ Jahecháma Jehová heʼi hague Apocalipsis 21:​5-pe: “Ambopyahu hína entéro mbaʼe”. ¿Mbaʼépa upéva heʼise? La Bíbliape ko kapítulope oñeñeʼẽ mokõi mbaʼe Jehová ojapótavare: Omyengovia ha ombopyahu. Primero, ¿mbaʼépa Jehová la omyengoviátava? Apocalipsis 21:​1-pe heʼi: “Pe yvága ha pe yvy yma guare ohasáma”. Heʼívo ‘pe yvága yma guare’ oñeñeʼẽ hína umi goviérno oĩvare Satanás ha idemoniokuéra poguýpe (Mat. 4:​8, 9; 1 Juan 5:19). La Bíbliape ojeʼévo “pe yvy” ikatu avei oñeñeʼẽ hína yvyporakuérare (Gén. 11:1; Sal. 96:1). Upéicharõ pe versíkulo 1 heʼívo “pe yvy yma guare”, heʼise hína umi hénte aña oikóva ko tiémpope. Jehová ndahaʼéi oarregla térã omyatyrõtanteva pe yvága ha yvy oĩva koʼág̃a, síno ohundietéta ha omyengoviáta voi chupekuéra. Upéi haʼe omoĩta hekoviakuéra peteĩ yvága pyahu, upéva hína peteĩ goviérno pyahu, ha peteĩ yvy pyahu, haʼéva hína umi hénte ihústova oikótava pe goviérno poguýpe.

10. ¿Mbaʼépa Jehová ombopyahúta?

¹⁰ Apocalipsis 21:​5-pe jatopa mbaʼépa heʼi Jehová umi mbaʼe ombopyahútavare. Jahechakuaa Jehová ndeʼíri hague: “Ajapo jeýta ótro ipyahúva”, síno heʼi: “Ambopyahu hína entéro mbaʼe”. Jehová ombopyahúta la oĩmava, haʼetéta voi Jehová ombopyahútava ko yvy ha yvyporakuéra pórke entéro mbaʼe perféktotama. Isaías oprofetisa haguéicha, Jehová ojapóta ko yvy tuichakuégui peteĩ lugár iporãitereíva ojoguáva pe hardín de Edénpe. Ñandéve avei haʼe ñanembopyahúta, pórke káda únope ñanemongueraitéta voi entéro mbaʼégui. Okueráta umi ndaikatúiva oguata, umi ndohecháiva ha nohendúiva ha umi omano vaʼekue jepe oikove jeýta (Is. 25:8; 35:​1-7).

11. ¿Mbaʼépa Jehová omanda vaʼekue Juánpe ojapo hag̃ua ha mbaʼérepa?

¹¹ ¿Mbaʼépa avei heʼi Ñandejára omeʼẽ hag̃ua ñandéve pe garantía ikatuha jajerovia hese? Jehová heʼi vaʼekue Juánpe: “Eskrivíkena koʼã mbaʼe, pórke koʼã ñeʼẽ ningo siertoite ha umi hénte ikatu ojerovia hese” (Apoc. 21:5). Jehová ndahaʼéi omandánte vaʼekue ojeskrivi hag̃ua, síno heʼi avei mbaʼérepa ojeskrivi vaʼerã. Haʼe heʼi: “Koʼã ñeʼẽ ningo siertoite ha umi hénte ikatu ojerovia hese”. Upéva heʼise Ñandejára heʼíva siertoguaha ha ikatuha ñakonfia hese. ¡Ajépa javaloraite la Juan iñeʼẽrendu haguére oñemandárõ guare chupe oskrivi hag̃ua! Upéicha rupi ikatu jalee Ñandejára promésa oñeʼẽva pe paraísore ha jajepyʼamongeta umi vendisión porãite ñaneraʼarõvare.

12. ¿Mbaʼérepa Jehová ikatu heʼi: “¡Umi mbaʼe oikopáma!”?

¹² ¿Mbaʼépa Ñandejára heʼi upéi? “¡Umi mbaʼe oikopáma!” (Apoc. 21:6). Koʼápe Jehová oñeʼẽ oikopamarõguáicha entéro mbaʼe oñemensiona vaʼekue pe paraísore. Haʼe ikatu oñeʼẽ upéicha, pórke ndaipóri mbaʼeve ikatu vaʼerã ojoko chupe okumpli hag̃ua ivolunta. Upéi Jehová heʼive álgo ogarantisáva ñandéve ipromésa katuete oñekumplitaha. ¿Mbaʼépa hína upéva?

13. ¿Mbaʼérepa Jehová heʼi vaʼekue: “Che hína Alfa ha Omega”?

¹³ Oñemensionáma haguéicha, Jehová oñeʼẽ vaʼekue 3 vése umi visión ojehechauka vaʼekuépe Juánpe (Apoc. 1:8; 21:​5, 6; 22:13). Koʼã 3 vése Jehová heʼi: “Che hína Alfa ha Omega”. Pe avesedário griégope “Alfa” haʼe pe primera létra ha “Omega” haʼe hína pe último. Jehová heʼírõ guare ijehe haʼeha “Alfa ha Omega” ñanepytyvõ ñantende hag̃ua haʼe oñepyrũ jave álgo katuete omohuʼãtaha.

14. a) ¿Mbaʼérõ guarépa Jehová heʼi vaʼekue “Alfa”, ha arakaʼépa heʼíta “Omega”? b) ¿Mbaʼe garantíapa jatopa Génesis 2:​1-3-pe?

¹⁴ Jehová okrea rire Adán ha Évape, heʼi chupekuéra mbaʼépa ivolunta ko yvy ha yvyporakuérape g̃uarã. La Biblia heʼi: “Ñandejára ovendesi avei chupekuéra ha heʼi: ‘Penefamília retákena ha peñemboheta hetave ha pemyenyhẽ ko yvy ha peipuru’” (Gén. 1:28). Upérõ guare Jehová primera ves heʼi vaʼekue mbaʼépa ivolunta, ha haʼete heʼíva “Alfa”. Ivolunta hína Adán ha Eva familiare iperféktova ha iñeʼẽrendúva omyenyhẽ ko yvy ha ojapo chugui peteĩ paraíso. Ág̃a Jehová okumplipa vove ivolunta haʼetéta heʼíva “Omega”. Ojapopa rire pe yvága ha ko yvy ha entéro mbaʼe oĩva pype, Jehová omeʼẽ peteĩ garantía ohechaukáva katuete okumplitaha ivolunta. Upéva jatopa hína Génesis 2:​1-3-pe (elee). Jehová heʼi vaʼekue pe séptimo día sagradoha. ¿Mbaʼépa upéva heʼise? Heʼise haʼe oaparta hague pe séptimo día okumpli hag̃ua ivolunta ko yvy ha yvyporakuérape g̃uarã. Upéicharõ haʼe heʼírõ guare sagradoha pe séptimo día, haʼete heʼíva ivolunta katuete oñekumplipaitetaha oñemohuʼãvo upe día.

15. ¿Mbaʼérepa oiméne Satanás opensa raʼe ojoko hague Jehovápe ani hag̃ua okumpli ipromésa?

¹⁵ Adán ha Eva opuʼã rire Jehová kóntrape oiko chuguikuéra pekadór ha ombohasa pe pekádo ha ñemano umi ifamiliarépe (Rom. 5:12). Upéicha rupi haʼete núnka ndaikatumoʼãiva ko yvy henyhẽ hénte perfékto ha iñeʼẽrendúvagui Jehovápe. Haʼetévaicha Satanás ojokóva Jehovápe ani hag̃ua okumpli ipromésa ha ndaikatumoʼãiva núnka heʼi “Omega”. Ikatu oime Satanás opensa raʼe osẽ hague la ijidéape. ¿Mbaʼérepa? Satanás oiméne okalkula raʼe Jehová ohundíta hague Adán ha Évape ha okreáta hague ótra paréha perfékta ikatúva okumpli ivolunta. Péro Jehová ojapórire upéva, pe Diablo ikatúta kuri heʼi hese ijapuha. ¿Mbaʼérepa? Pórke jalee haguéicha Génesis 1:​28-pe Jehová heʼíma vaʼekue Adán ha Évape ifamiliare omyenyhẽtaha ko yvy.

16. ¿Mbaʼérepa oiméne Satanás opensa raʼe Jehová ndaikatumoʼãiha okumpli ivolunta?

¹⁶ ¿Mbaʼe ótra kósapa oiméne Satanás okalkula raʼe avei Jehová ojapóta hague? Ikatu oime Satanás opensa raʼe Jehová ohejáta hague Adán ha Évape ifamília, péro umíva núnka ndaikatumoʼãi iperfékto (Ecl. 7:20; Rom. 3:23). Adán ha Eva familiakuéra núnka ndaikatúirõ iperfékto, pe Diablo heʼíta kuri Jehová nokumplíri hague ivolunta. Pórke upéicharõ ko yvy nahenyhẽmoʼãi hénte perféktogui.

17. Oñepuʼã rire hese, ¿mbaʼépa Jehová odesidi ojapo ha mbaʼépa ojehupytýta upéva rupive? (Ehecha pe taʼanga).

¹⁷ Satanás oiméne ni noimoʼãi raʼe la oikóva. Jehová osolusiona la provléma ikatu hag̃uáicha oñekumpli ivolunta opuʼãramo jepe ikóntrape Satanás, Adán ha Eva (Sal. 92:5). Jehová ohechauka ndaijapuiha, upévare oheja Adán ha Eva ifamília ikatu hag̃uáicha oñekumpli la haʼe heʼíma vaʼekue. Avei Jehová ohechauka haʼe heʼíma guive oikotaha álgo ndaipóri ojokove vaʼerã chupe. ¿Mbaʼépa Jehová ojapo oasegura hag̃ua oñekumplitaha ivolunta? Opromete peteĩva umi “familiare” apytégui osalvataha entéro umi Adán ha Eva familiare iñeʼẽrendúvape (Gén. 3:15; 22:18). Jehová omeʼẽ Itaʼýrape omano hag̃ua yvyporakuéra rehehápe ha péicha orreskata chupekuéra. Oiméne ni ndohasái kuri Satanás akãrupi la Jehová ojapóva, pórke Jehová ojapo kuri upe sakrifísio oporohayhueterei rupi (Mat. 20:28; Juan 3:16). Satanás katu ni michĩmi ndoporohayhúi, haʼe ijehénte opensa. ¿Ha mbaʼépa ojehupytýta pe rreskáte rupive? Cristo ogoverna rire 1.000 áño, ko yvýgui oikóta peteĩ paraíso ha upépe oikóta Adán ha Eva familiare iñeʼẽrendúva ha perféktotama hikuái. Péicha oñekumplíta Jehová volunta. Upe moméntope haʼetéta Jehová heʼíva “Omega”.

18. ¿Mbaʼe mbaʼérepa ikatu jajerovia Jehová promésare? (Ehecha pe rrekuádro “Mbohapy garantía Jehová omeʼẽva jajerovia hag̃ua ipromésare”).

¹⁸ Ko artíkulope jahecháma mbaʼe mbaʼérepa ikatu ñaime segúro ko yvýgui oikotaha peteĩ paraíso. ¿Péro mbaʼépa ikatu jaʼe ótrope oguerovia hag̃ua ko promésa oñekumplitaha? Ikatu ñamensiona koʼã mbaʼe. Primero, Jehová voi la ojapóva ko promésa. Lívro de Apocalipsis heʼi: “Ñandejára oguapýva pe trónope heʼi: ‘Ambopyahu hína entéro mbaʼe’”. Haʼe ningo iñarandu, ipoderóso ha hiʼarive oipotaiterei ko promésa oñekumpli. Segundo, Jehová ni michĩmi ndodudái oikotaha la heʼíma vaʼekue, upévare oñeʼẽ oikopamarõguáicha voi. Haʼe heʼi: ‘Koʼã ñeʼẽ ningo siertoite ha umi hénte ikatu ojerovia hese. ¡Umi mbaʼe oikopáma!’. Tercero, Jehová oñepyrũma guive ojapo álgo, omohuʼã katuete. Upévare haʼe heʼi: “Che hína Alfa ha Omega”. Jehová ohechaukáta Satanás ijapuha ha ni mbaʼevéicharõ ndaikatuiha ojoko chupe okumpli hag̃ua ivolunta.

19. ¿Mbaʼépa ikatu jaʼe umi hénte ndojeroviapáivape oñekumplitaha Jehová promésa?

¹⁹ Ñamombeʼu jave umi héntepe mbaʼéichapa Jehová ogarantisa okumplitaha ipromésa, ñande voi jajeroviave hese. Upévare jalee jey vove álgienpe ko promésa oĩva Apocalipsis 21:​4-pe ha heʼíramo ñandéve: “Iporãiterei ningo añete, péro ijetuʼu la oiko hag̃ua”. ¿Mbaʼépa ikatu jaʼe? ¿Mbaʼérepa ndajaexplikái la heʼíva pe versíkulo 5 ha 6? Jahechaukákena umi héntepe mbaʼéichapa Jehová ogarantisa okumplitaha ipromésa. Haʼete voi ofirmáva hese ikatu hag̃uáicha jajerovia ko promésa porãitére ñande pyʼaite guive (Is. 65:16).