Emyesakã hekoitépe umi téxto

ÑAMBOʼE ñande rapichápe ndeʼiséi jaleetanteha chupe algún téxto vívliko. Apóstol Pablo heʼi vaʼekue Timotéope: “Eñehaʼãmbaitéke reime porã hag̃ua Ñandejára renondépe, peteĩ kuimbaʼe ombaʼapo jejopývaicha, ndorekóiva mbaʼérepa otĩ hag̃ua, oiporúva Ñandejára Ñeʼẽ hekoitépe” (2 Tim. 2:15).

Upéva heʼise remyesakã jave umi téxto, upe eréva nokontradesíri vaʼerã la Bíbliape. Upévare tekotevẽ reñatende porã mbaʼépa heʼi upe téxto mboyve ha upe rire, repilla hag̃ua oĩ porãpa pe erétava. Ndovaléi reiporavo umi palávra ndévente ndegustáva ha remohenda ndegustaháichante. Proféta Jeremías rupive Jehová oavisa vaʼekue umi hudíope oĩtaha proféta japu heʼi guaʼúva oñeʼẽha Jehová rérape, péro añetehápe haʼekuéra heʼíta umi mbaʼe oúva chupekuéra iñakãmente (Jer. 23:16). Apóstol Pablo heʼi vaʼekue avei umi kristiánope ani hag̃ua omongyʼa Ñandejára Ñeʼẽ heʼíva omboʼévo umi filosofokuéra opensáva. Haʼe heʼi: ‘Ndajajapói mbaʼeve ñemiháme ni oporomotĩva, ndajaikói ñambotavy ótrope, ni ñamboʼe hekopeʼỹ Ñandejára Ñeʼẽ’. Upe tiémpope umi komersiánte pokarẽ omboʼy pe víno oganave hag̃ua pláta. Péro ñande ndajaikói ñambojeheʼa Ñandejára Ñeʼẽ yvyporakuéra omboʼévandi. Pablo heʼi vaʼekue: ‘Ñande ndajaikói jakovra ñande rapichápe Ñandejára Ñeʼẽre, oĩháicha heta ojapóva. Ñande hína Cristo disípulo ha Ñandejára rembijokuái, upévare japredika pe añeteguánte, ha jajapo ko tembiapo Ñandejára renondépe’ (2 Cor. 2:17; 4:2).

Oĩ téxto ndeʼirihápe direktoite mbaʼépa jajapo vaʼerã, síno omeʼẽ konsého ikatúva ñandegia jadesidi porã hag̃ua diferénte situasiónpe. Reporomboʼe jave oiméne reiporúma koʼãichagua téxto (2 Tim. 3:16, 17). Rejapo jave upéva reñatende vaʼerã oimépa remyesakã porã hína pe téxto heʼiséva, ha ani revoleapa oñentende hag̃ua ndéve ndegustaháichante (Sal. 91:11, 12; Mat. 4:5, 6). Umi mbaʼe eréva oĩ porã ha okoinsidi vaʼerã Jehová heʼívandi Iñeʼẽme.

‘Jaiporu Ñandejára Ñeʼẽ hekoitépe’ heʼise ñantende vaʼerãha mbaʼépa añetehápe oñemboʼe la Bíbliape. Upévare ñande ndajaiporúi la Biblia peteĩ “garróteicha” ñamongyhyje hag̃ua ótrope. Jesús tiémpope umi rrelihión omoakãva oiporúramo jepe Ñandejára Ñeʼẽ, nokumplíri umi mbaʼe iñimportantevéva: tekojoja, poriahuvereko ha jerovia (Mat. 22:23, 24; 23:23, 24). Jesús katu omboʼe jave Ñandejára Ñeʼẽ, otrata umi héntepe mborayhúpe, Jehová ojapoháicha. Ha ñande avei jasegi vaʼerã iñehémplo (Mat. 11:28).

¿Mbaʼéichapa ikatu remyesakã hekoitépe umi téxto? Tenonderã relee meme vaʼerã la Biblia. Avei umi informasión omeʼẽva ñandéve Jehová “tembiguái jeroviaha ha iñarandúva” rupive. Haʼe ojevale hesekuéra omeʼẽ hag̃ua isiervokuérape opa mbaʼe oikotevẽva omombarete hag̃ua ijerovia (Mat. 24:45). ¿Mbaʼéicha ikatu reaprovecha porã pe tembiguái omeʼẽva? Restudiáramo neañoháme, nderefaltái rreunionhápe, ha ekomenta meme.

Pe lívro Razonamiento a partir de las Escrituras, omyesakã heta téxto vívliko ojeporu meméva predikasiónpe, eñehaʼãke eiporu meme upéva. Reiporuséramo peteĩ téxto predikasiónpe péro ndereikuaaporãi mbaʼéichapa oñemyesakã vaʼerã, iporãve neumílde ha reinvestiga raẽ. Upéicha rejapóramo, remyesakãta hekoitépe Ñandejára Ñeʼẽ (Prov. 11:2).

Ehechauka mbaʼéichapa umi téxto omopyenda umi mbaʼe eréva. Rejapóramo peteĩ porandu relee mboyve peteĩ téxto, rehechauka vaʼerã mbaʼéichapa upéva ombohovái pe porandu. Ha reiporúramo peteĩ téxto remopyenda hag̃ua la eréva, eñehaʼãkena ehecha oimépa umi nerendúva ontende porã hína upéva.

Oĩramo jepe umi orekóva la Biblia, heta vése ndoleeguasúi voi ha ijetuʼu chupekuéra ontende hag̃ua. Upévare relee porãramo jepe umi téxto repredika jave, umi hénte ikatu nontendéi mbaʼépa heʼise. Upéicha rupi relee jey vaʼerã pe téxto ha erresalta porã pe palávra térã pe párte iñimportantevéva.

Upearã reiporavo porã vaʼerã umi palávra omopyendáva la eréva, ha errepeti jey umíva. Reñemongeta jave pe ogajárandi, ikatu rejapo umi porandu oipytyvõtava chupe otopa hag̃ua umi palávra térã fráse. ¿Péro mbaʼépa ikatu rejapo oĩramo hetave hénte, por ehémplo kongregasiónpe? Opilla hag̃ua hikuái umi palávra iñimportantevéva, ikatu reiporu ótra palávra ojoguáva chupe, térã errepeti jey pe idéa, ojapoháicha heta diskursánte. Péro reñatende vaʼerã ani rekonfundipa umi ermánope, ha ndopillái jey hikuái mbaʼéichapa umi palávra oĩva pe téxtope omopyenda umi mbaʼe eréva.

Rerresalta rire umi palávra iñimportánteva, ikatúta resegi remyesakã pe téma. Iñimportánte ontende hikuái mbaʼérepa relee pe téxto. Oiméramo relee mboyve neremyesakãporãi mbaʼérepa ojeleéta, upe rire rehechauka porã vaʼerã upéva.

Umi fariséo oporandu vaʼekue Jesúspe peteĩ mbaʼe oimoʼãva haʼe ndaikatumoʼãiha ombohovái: “¿Ovale piko peteĩ kuimbaʼe ojedivorsia hembirekógui oimeraẽ mbaʼérente?”. Jesús ojevale Génesis 2:24 rehe ombohovái hag̃ua chupekuéra. Haʼe orresalta peteĩ pártente pe téxtogui, kuña ha kuimbaʼe omendávo ‘mokõivégui oikomaha peteĩntema’. Upéi omohuʼã heʼívo: “Upévare, avave ndoipeʼái vaʼerã ojuehegui Ñandejára omoĩ vaʼekue oñondive peteĩ júgo guýpe” (Mat. 19:3-6).

Remyesakã jave mbaʼéichapa peteĩ téxto omopyenda la eréva, ¿tekotevẽtapa rembopukueterei? Upéva odependétama koʼã mokõi mbaʼére: ¿Oikuaápa umi nerendúva heta mbaʼe la Bíbliagui, térã nahániri? ¿Iñimportántepa pe púnto remyesakãtava, térãpa nahaniriguasúi? Ani reiporu umi palávra hasýva oñentende hag̃ua, síno eñehaʼãke taisensíllo ha toñentende porã.

Emopensa umi nerendúvape. La Biblia omombeʼu apóstol Pablo opredikárõ guare Tesalónicape ‘omboʼe ha oipytyvõ hague umi héntepe ojepyʼamongeta hag̃ua Ñandejára Ñeʼẽre’. Haʼe ohechauka mbaʼéichapa Jesús okumpli umi profesía oñeʼẽva pe Crístore. Upévare omohuʼãvo heʼi: “Pe Cristo haʼe hína Jesús, upe che aikuaaukáva peẽme” (Hech. 17:2, 3). Enterove kristiáno ñañehaʼã vaʼerã avei jasegi apóstol Pablo ehémplo ñamboʼe jave.

Oskrivírõ guare ikárta umi ermáno evréope, apóstol Pablo pyʼỹinte oiporu umi Eskritúra Evréa orresalta hag̃ua pe omboʼeséva. Haʼe oiporavo peteĩ palávra térã fráse ha ohechauka mbaʼérepa iñimportánte (Heb. 12:26, 27). Hebreos kapítulo 3-pe jatopa haʼe omyesakã hague Salmo 95:7-11 heʼíva, ha oñeʼẽ mbohapy mbaʼe rehe: 1) korasõ rehe (Heb. 3:8-12), 2) mbaʼépa heʼise pe palávra: “koestedía” (Heb. 3:7, 13-15; 4:6-11), ha 3) mbaʼépa heʼise pe fráse ‘ndoikemoʼãi hikuái pe lugár aprepara vaʼekuépe apytuʼu hag̃ua’ (Heb. 3:11, 18, 19; 4:1-11). Nde ikatu avei resegi iñehémplo reiporu jave la Biblia.

Jesús avei oporomboʼe jave oiporu Ñandejára Ñeʼẽ omopensa hag̃ua umi héntepe. Peteĩ kuimbaʼe oikuaa porãva umi Léi ou oporandu chupe: “Mboʼehára, ¿mbaʼépa tekotevẽ ajapo ahupyty hag̃ua jeikove opaveʼỹva?”. Tenonderã, Jesús oporandu chupe mbaʼépa haʼe opensa, ha upéi omyesakã chupe mbaʼérepa iñimportánte ñakumpli Ñandejára mandamiénto. Ohechakuaámarõ nontendeiha mbaʼépa la heʼiséva, Jesús oexplika chupe mávapa añetehápe ‘hapicha’. Péro ndeʼíri upéva direktoite, síno ojevale peteĩ ehémplore haʼete voi ohechakuaa hag̃ua (Luc. 10:25-37).

Jahecha upéicharõ Jesús ombohovái jave umi porandu ndahaʼéi omombeʼúnteva mbaʼépa heʼi Ñandejára Ñeʼẽ ha oĩma. Opensa raẽ mbaʼépa heʼi umi téxto, ha upéi omyesakã chupekuéra mbaʼéichapa umíva ombohovái pe porandu.

Umi saduséo heʼírõ guare umi omano vaʼekue nopuʼãmoʼãveimaha, Jesús oiporu Éxodo 3:6 ombohovái hag̃ua chupekuéra. Péro Jesús ndahaʼéi omombeʼúnteva upe téxto heʼíva, upéva rangue haʼe oiporu upe téxto ohechauka hag̃ua Ñandejára omoingove jeytaha umi omano vaʼekuépe (Mar. 12:24-27).

Upéicharõ, oiko hag̃ua ñandehegui mboʼehára katupyry, tekotevẽ jaiporukuaa la Biblia ñarrasona hag̃ua umi ñanerendúvandi.