Jareko hag̃ua amigo, ñande avei amigo vaʼerã

Pe amistad ojejapo mborayhúpe. Reikuaavévo rehóvo Jehovágui, tuichavéta ne mborayhu hese ha rejaposéta pe heʼíva. Kóva nemomýita reiko hag̃ua Jesucristo remimboʼérõ (Mateo 28:19). Ikatúta reguereko Ñandejára amistad opa ára g̃uarã rejeheʼárõ testigos de Jehová ndive ha revyʼa hendivekuéra. Mbaʼépa rejapovaʼerã reime hag̃ua ijapytepekuéra?

Ehechauka rehayhuha Ñandejárape rejapóvo pe heʼíva. “Porque kóva heʼise jahayhu Ñandejárape: jajapo imandamiento; ha upevére imandamiento ndahasýi ijapo.” (1 Juan 5:​3, NM.)

Rejapovaʼerã umi reikuaáva rehóvo. Jesús omombeʼu peteĩ historia ohechaukáva ko mbaʼe. Peteĩ tapicha iñakã porãva ojapovaʼekue hogarã ita ári, ha peteĩ ivýrova katu ojapo yvykuʼi ári. Oúrõ guare peteĩ yvytu ipochyetereíva, pe óga ojejapovaʼekue ita ári opyta, ha upe ojejapovaʼekue yvykuʼi ári hoʼa tyapúpe. Jesús heʼi umi iñeʼẽrendúva chupe ojoguaha iñakãporãvape ojapovaʼekue hogarã ita ári. Heʼi avei umi ohendúva chupe ha ndojapóiva haʼe heʼiháicha ojoguaha pe výrope omopuʼãvaʼekue hogarã yvykuʼi ári. Mávapepa nde rejoguase? (Mateo 7:24-27.)

Rejededicavaʼerã Ñandejárape. Ikatu rejapo upéva reñemboʼévo Jehovápe ha ere chupe rejaposeha opa ára g̃uarã upe haʼe oipotáva. Jajapórõ Ñandejára oipotáva, ñande jahechauka haʼeha Jesucristo remimboʼe (Mateo 11:29).

Rejebautizavaʼerã. “Ha koʼág̃a, mbaʼe piko rehaʼarõ? Epuʼã ejebautiza ha ejohéi nde pecado remombaʼeguasu rupi héra” (Hechos 22:16, NM).

Ejapopaite Ñandejára oipotáva. “Opa pejapóva pejapo vyʼápe, pembaʼapo ramo guáicha Ñandejárape guarã, ndahaʼéi yvypórape.” (Colosenses 3:23.)