2 Samuẹli

15 To onú ehe lẹpo godo, Absalọmi wleawuna osọ́-kẹkẹ de po osọ́ lẹ po bọ sunnu 50 nọ to wezunhọ̀n to nukọnna ẹn.+ 2 Absalọmi nọ fọ́n to afọnnu fuu bo nọ ṣite to aliho he yì họngbo tòdaho lọ tọn kọ̀n+ ji. Whedepopenu he mẹde tindo owhẹ̀ de bo hẹn ẹn ja ahọlu dè na whẹdida,+ Absalọmi nọ ylọ ẹ bo nọ dọna ẹn dọmọ: “Tòdaho tẹ mẹ wẹ a wá sọn?” bọ mẹlọ nọ dọ dọ: “Dopo to hẹnnu Islaeli tọn lẹ mẹ wẹ devizọnwatọ towe wá sọn.” 3 Absalọmi nọ dọna mẹlọ dọmọ: “Pọ́n lehe owhẹ̀ towe jlọ bo sọgbe do, ṣigba mẹdepope ma tin to ahọlu dè he na dotoaina owhẹ̀ towe.” 4 Absalọmi sọ nọ dọmọ: “Ṣo, eyin yè ko de mi di whẹdatọ to aigba lọ ji wẹ! Whenẹnu, mẹdepope he tindo owhẹ̀ de kavi whẹdida de sọgan wá dè e bọ n’na hẹn ẹn diun dọ e mọ whẹdida dodo yí.”

5 Podọ eyin mẹde sẹpọ Absalọmi nado dẹ́ do odò na ẹn, ewọ nọ dlẹnalọ etọn bo nọ hẹn mẹlọ go bosọ nọ donùnùgo na ẹn.+ 6 Mọ wẹ Absalọmi nọ basi do na Islaelivi he wá ahọlu dè na whẹdida lẹpo; gbọnmọ dali Absalọmi nọ to ahun omẹ Islaeli tọn lẹ tọn fìn.+

7 To owhe ẹnẹ* godo, Absalọmi dọna ahọlu dọmọ: “Jaale, dike ma yì Heblọni+ nado yì de opà he n’do na Jehovah. 8 Na devizọnwatọ towe ko dopà+ po nujikudo po to whenue n’tin to Gẹṣuli+ to Silia dọmọ: ‘Eyin Jehovah hẹn mi lẹkọwa Jelusalẹm, n’na basi avọ́nunina de* hlan Jehovah.’” 9 Enẹwutu, ahọlu dọna ẹn dọmọ: “Yì to jijọho mẹ.” Ewọ sọ fọ́n bo dedo Heblọni.

10 Todin, Absalọmi do amẹ́ lẹ hlan hẹnnu Islaeli tọn lẹpo mẹ dọmọ: “Tlolo he mì sè nudidọ azò tọn, mì ni lá dọ, ‘Absalọmi ko lẹzun ahọlu to Heblọni!’”+ 11 Sunnu 200 sọn Jelusalẹm wẹ ko hodo Absalọmi yì dọ́n; yewlẹ yin oylọ-basina, yé sọ yì to homẹvọ mẹ bo ma yọnẹn dọ nudepope to jijọ. 12 Humọ, to whenue Absalọmi basi avọ́sinsan lẹ, e dowẹn hlan Ahitofẹli+ Gilonu lọ, yèdọ ayinamẹtọ Davidi tọn,+ sọn tòdaho etọn Gilo mẹ.+ Sébibla lọ sọ to aihẹn dogọ, bọ mẹhe to godo na Absalọmi lẹ to susudeji.+

13 To nukọn mẹ, mẹde wá gbàpá Davidi dọmọ: “Ahun omẹ Islaeli tọn lẹ tọn ko lẹhlan Absalọmi dè.” 14 To afọdopolọji, Davidi dọna devizọnwatọ etọn he to e dè to Jelusalẹm lẹpo dọmọ: “Mì fọ́n bo gbọ mí ni họnyi,+ na depope to mí mẹ ma na họ̀ngán sọn alọ Absalọmi tọn mẹ! Mì yawu, ewọ nikaa wá mí ji po awuyiya po bo hẹn nugbajẹmẹji wá mí ji bosọ yí ohí do hù mẹhe to tòdaho lọ mẹ lẹ!”+ 15 Devizọnwatọ ahọlu tọn lẹ sọ dọna ahọlu dọmọ: “Devizọnwatọ towe lẹ to gbesisọ mẹ nado yinuwa sọgbe hẹ nudide depope he oklunọ mítọn basi.”+ 16 Enẹwutu, ahọlu tọ́nyi bọ whédo etọn pete to hihodo e, ṣigba ahọlu jo asimọwhlá ao do+ nado nọ penukundo whégbè* go. 17 Ahọlu sọ wleali dedo bọ omẹ etọn lẹpo to hihodo e, yé sọ nọte to Bẹti-mẹlhaki.

18 Devizọnwatọ etọn he to hihodo e* lẹpo, podọ Kelẹtinu lẹ, Pelẹtinu lẹ+ gọna Gatinu lẹ,+ yèdọ sunnu 600 he hodo e sọn Gati+ lẹpo to jujuwayi bọ ahọlu to gbigbeje yé pọ́n.* 19 Whenẹnu, ahọlu dọna Ittai+ Gatinu lọ dọmọ: “Naegbọn hiẹ lọsu jlo na hodo mí yì? Lẹkọyi whé bo yì nọ ahọlu yọyọ lọ dè, na jonọ de wẹ hiẹ bo ko sọ họ̀njẹgbé sọn otò towe mẹ. 20 Osọ fi janwẹ a wá, bọ to egbé din, yẹn na ko sọ hẹn we nado jẹ lèlèsà pé ji hẹ mí, nado nọ yì to whenue yẹn dona yì podọ nado nọ yì fidepope he yẹn jei wẹ ya? Plan mẹmẹsunnu towe lẹ na mì ni lẹkọyi whé, podọ Jehovah ni do owanyi nugbo po nugbonọ-yinyin po hia we!”+ 21 Ṣigba, Ittai gblọnna ahọlu dọmọ: “Dile Jehovah togbẹ̀ podọ dile e họnwun dọ oklunọ ṣie ahọlu togbẹ̀, fidepope he oklunọ ṣie ahọlu te, vlavo okú wẹ ya kavi ogbẹ̀, finẹ wẹ devizọnwatọ towe na te ga!”+ 22 Whenẹnu, Davidi dọna Ittai+ dọmọ: “Yì bo dasá.” Ittai Gatinu lọ sọ plan sunnu etọn lẹ po ovi etọn lẹpo po bo dasá.

23 Mẹhe to otò lọ mẹ lẹpo wẹ to avivi po awhá po dile omẹ ehe lẹpo to didasa, bọ ahọlu sọ ṣite to Agbàdo Kidlọni tọn kọ̀n;+ gbẹtọ lọ lẹpo to didasa dedo aliho he yì danfafa ji lọ ji. 24 Zadọki+ lọsu tin to finẹ bọ Levinu+ he nọ ze apotin+ alẹnu Jiwheyẹwhe nugbo lọ tọn+ lẹpo tin topọ hẹ ẹ; yé sọ zlọn Apotin Jiwheyẹwhe nugbo lọ tọn dai; Abiatali+ sọ hẹji yì dile gbẹtọ lọ lẹpo tọ́n sọn tòdaho lọ mẹ bo dasá. 25 Ṣigba, ahọlu dọna Zadọki dọmọ: “Ze Apotin Jiwheyẹwhe nugbo lọ tọn lẹkọyi tòdaho lọ mẹ.+ Eyin n’ko mọ nukundagbe Jehovah tọn, ewọ nasọ plan mi lẹkọ bo na dike yẹn ni mọ apotin lọ po fihe e nọ nọ̀ po.+ 26 Ṣigba, eyin ewọ dọ dọ, ‘Yẹn ma tindo homẹhunhun de to hiẹ mẹ,’ whenẹnu ewọ ni bo wà nudepope he yọ́n to nukun etọn mẹ na mi.” 27 Ahọlu sọ dọna Zadọki yẹwhenọ lọ dọmọ: “E ma yin numọtọ+ de wẹ hiẹ? Plan visunnu mìtọn awe lẹ, yèdọ Ahimaazi visunnu towe titi po Jonatani+ visunnu Abiatali tọn po, bo lẹkọyi tòdaho lọ mẹ to jijọho mẹ. 28 Pọ́n, yẹn na dọngbàn vude to fie tọ̀sisa danfafa ji tọn lọ ma siso te kakajẹ whenue n’na sè owẹ̀n de sọn mì dè.”+ 29 Enẹwutu, Zadọki po Abiatali po ze Apotin Jiwheyẹwhe nugbo lọ tọn lẹkọyi Jelusalẹm, yé sọ gbọṣi finẹ.

30 Dile Davidi hẹji dedo Osó* Olivie tọn+ ji, e to avivi dile e to jihẹ yì; e sọ ṣinyọnnudo ota bo zọ̀n afọ-vọ́. Mẹhe hodo e lẹpo sọ ṣinyọnnudo ota bo to avivi dile yé hẹji dedo. 31 Whenẹnu wẹ e yin didọna Davidi dọmọ: “Ahitofẹli tin to mẹhe to sébla+ hẹ Absalọmi lẹ mẹ.”+ Enẹwutu, Davidi dọmọ: “Jehovah E,+ jaale diọ ayinamẹ Ahitofẹli tọn zun nulú!”+

32 Whenue Davidi jẹ aga pete osó lọ tọn fihe gbẹtọ lẹ nọ dẹ́ do odò na Jiwheyẹwhe te, Huṣai+ Alkinu+ lọ ko tin to finẹ nado wá pé e po tewu tintlẹ́n po to okọ̀ bọ kọ́gudu to ota na ẹn. 33 Ṣigba, Davidi dọna ẹn dọmọ: “Eyin hiẹ hodo mi dasá, a na lẹzun agbàn pinpẹn de na mi. 34 Amọ́, eyin hiẹ lẹkọyi tòdaho lọ mẹ, a na dọna Absalọmi dọ, ‘Ahọlu E, n’ko lẹzun devizọnwatọ towe. Devizọnwatọ otọ́ towe tọn wẹ n’yin dai, ṣigba todin n’ko lẹzun devizọnwatọ towe,’+ whenẹnu hiẹ sọgan hẹn ayinamẹ Ahitofẹli tọn gble na mi.+ 35 Be Zadọki po Abiatali po he yin yẹwhenọ lẹ ma tin to finẹ hẹ we? Hiẹ dona nọ dọ nuhe a sè sọn owhé ahọlu tọn gbè lẹpo na Zadọki po Abiatali po he yin yẹwhenọ lẹ.+ 36 Pọ́n! Visunnu yetọn awe lẹ tin to yé dè, yèdọ Ahimaazi+ visunnu Zadọki tọn po Jonatani+ visunnu Abiatali tọn po, hiẹ ni nọ dowẹn gbọn yé ji nado dọ nuhe a sè lẹpo na mi.” 37 Enẹwutu, Huṣai, họntọn Davidi tọn,*+ lẹkọyi tòdaho lọ mẹ dile Absalọmi to bibiọ Jelusalẹm.