2 Samuẹli

17 Enẹgodo, Ahitofẹli dọna Absalọmi dọmọ: “Jaale, gbọ ma de sunnu 12 000 bo fọ́n bosọ dómọna Davidi to egbé whèjai. 2 Yẹn na tọ́n do e ji to whenue agbọ́ na ko pé e bọ huhlọn na ko vọ̀ do e pete,*+ yẹn nasọ dobuna ẹn; mẹhe to e dè lẹpo nasọ họnyi bọ yẹn na hù ahọlu lọ kẹdẹ.+ 3 Enẹgodo, yẹn na gọkọna gbẹtọ lẹpo hlan dè we. Nuhe na jọ do dawe he dín a te lọ go wẹ na dohia eyin gbẹtọ lẹpo na lẹkọwa dè we kavi lala. Whenẹnu, gbẹtọ lẹpo na tin to jijọho mẹ.” 4 Ayinamẹ lọ sọ yọ́n taun to nukun Absalọmi tọn mẹ podọ to nukun mẹho Islaeli tọn lẹpo tọn mẹ.

5 Ṣigba, Absalọmi dọmọ: “Jaale, ylọ Huṣai+ Alkinu lọ wá, na mí ni sè nuhe ewọ lọsu tindo nado dọ.” 6 Enẹwutu, Huṣai wá Absalọmi dè. Absalọmi sọ dọna ẹn dọmọ: “Ayinamẹ he Ahitofẹli na die. Mí ni hodo ayinamẹ etọn ya? Eyin e ma yinmọ, hiẹ ni bo dọ towe.” 7 Whenẹnu, Huṣai dọna Absalọmi dọmọ: “Ayinamẹ Ahitofẹli tọn ma yọ́n to ninọmẹ ehe mẹ!”+

8 Huṣai yidogọ dọmọ: “Hiẹ lọsu yọnẹn ganji dọ huhlọnnọ wẹ otọ́ towe po sunnu etọn lẹ po,+ podọ yé ko jẹma* di beali he hẹn ovivu etọn lẹ bu to danji.+ Humọ, awhànfuntọ de wẹ otọ́ towe+ podọ ewọ ma na dọ́ fidopo lọ hẹ omẹ etọn lẹ. 9 To alọnu din, e to ede whlá do oslò* lẹ mẹ kavi do fidevo de;+ eyin ewọ whẹ́ wẹ jẹ omẹ towe lẹ ji, mẹhe sè lẹ na dọ dọ, ‘Mẹhe hodo Absalọmi lẹ ko ṣíawhàn!’ 10 E họnwun dọ, obu na jẹ mẹhe tlẹ yin adọgbotọ bọ ahun etọn taidi kinnikinni+ de tọn ji, na Islaeli pete wẹ yọnẹn dọ huhlọnnọ de wẹ otọ́ towe+ bọ sunnu he to e dè lẹ sọ yin adọgbotọ. 11 Ayinamẹ ṣie die: Gbọ Islaeli pete, sọn Dani kaka yì Beẹli-ṣeba,+ ni yin bibẹpli do dè we, na yé ni sù di tọkẹ́n ohù tọn,+ bọ hiẹ na nọ nukọnna yé biọ avùnhiho lọ mẹ. 12 Mí na tọ́n do ewọ ji to fidepope he e sọgan yin mimọ te, bọ mí na wá e ji kẹdẹdile ahun nọ ja do aigba do; podọ dopo tata to yé mẹ ma na họ̀ngán, vlavo ewọ wẹo kavi depope to sunnu he to e dè lẹ mẹ. 13 Eyin e ka họnyi tòdaho de mẹ, Islaeli pete na yì tòdaho lọ mẹ po okàn po bọ mí na dọ̀n tòdaho lọ họ́ liai dlan agbàdo mẹ sọmọ bọ zannu pẹvi dopo tata ma na yin jijodo.”

14 Whenẹnu, Absalọmi po sunnu Islaeli tọn lẹpo po dọmọ: “Ayinamẹ Huṣai Alkinu lọ tọn yọ́n hugan+ ayinamẹ Ahitofẹli tọn!” Na Jehovah ko magbe* nado hẹn ayinamẹ dagbe Ahitofẹli tọn gble,+ na Jehovah nido hẹn nugbajẹmẹji wá Absalọmi ji.+

15 Enẹgodo, Huṣai dọna Zadọki po Abiatali po+ he yin yẹwhenọ lẹ dọmọ: “Ayinamẹ le po le po wẹ Ahitofẹli na Absalọmi po mẹho Islaeli tọn lẹ po, podọ ayinamẹ le po le po wẹ n’na. 16 Todin, yawu dowẹn hlan Davidi nado na ẹn avase dọmọ: ‘A gbọṣi fie tọ̀sisa ma siso te* to danfafa ji to egbé whèjai blo, kakatimọ a dona dasá yì awà awetọ ji dandan, na ahọlu po mẹhe to e dè lẹpo po nikaa yin vivasudo.’”*+

17 Jonatani+ po Ahimaazi+ po tin to Ẹn-logẹli+ to whenẹnu; enẹwutu deviyọnnu de yì bo dowẹn yé bọ yewlẹ yì nado dọna Ahọlu Davidi, na yè ma hà bo mọdọ yé biọ tòdaho lọ mẹ. 18 Ṣigba, dẹpẹ de mọ yé bo dọna Absalọmi. Enẹwutu, yé omẹ awe lẹ yawu họnyi Bahulimi,+ to owhé dawe he tindo dotọ̀ to awánu etọn mẹ de tọn gbè. Yé sọ biọ dotọ̀ lọ mẹ, 19 bọ asi dawe lọ tọn ṣinyọnnudo dotọ̀ lọ nù bo kọ̀n jinukun he yè ko glin lẹ do e ji; mẹde ma yọ́n nude gando ehe go. 20 Devizọnwatọ Absalọmi tọn lẹ wá yọnnu lọ dè to owhé etọn gbè bo kanse dọmọ: “Fie wẹ Ahimaazi po Jonatani po te?” Yọnnu lọ gblọn dọmọ: “Yé gbọn fi wayi bo dedo tọ̀sisa lọ waji.”+ Whenẹnu, sunnu lọ lẹ dómọna yé ṣigba yé ma mọ yé, enẹwutu yé lẹkọyi Jelusalẹm.

21 To whenue sunnu lọ lẹ ko yì pó godo, yewlẹ tọ́njẹgbonu sọn dotọ̀ lọ mẹ bo yì dowẹn Ahọlu Davidi. Yé dọna ẹn dọmọ: “Fọ́n bo yawu dasá tọ̀sisa lọ, na ayinamẹ le po le po wẹ Ahitofẹli na sọta we.”+ 22 Davidi po mẹhe to e dè lẹpo po sọ fọ́n to afọdopolọji bo dasá Jọdani. Whẹpo ai nido họ́n, mẹde ma pò to yé mẹ he ma ko dasá Jọdani.

23 Whenue Ahitofẹli mọdọ ayinamẹ emitọn ma yin hihodo, e hẹ kẹtẹkẹtẹ ji bo yì owhé etọn gbè to tòdaho etọn mẹ.+ To whenue e ko na anademẹ lẹ whédo etọn pó godo,+ e dokankọ na* ede.+ Mọ wẹ e kú do bo yin dìdì do ṣiọditẹn tọgbo etọn lẹ tọn.

24 To ojlẹ enẹ gblamẹ, Davidi ko yì Mahanaimi+ bọ Absalọmi po sunnu Islaeli tọn lẹpo po dasá Jọdani. 25 Absalọmi de Amasa+ do otẹn Joabi+ tọn mẹ taidi ogán awhànpa lọ tọn; Amasa yin visunnu dawe de tọn, he nọ yin Itla Islaelivi lọ, he tindo kọndopọ zanhẹmẹ tọn hẹ Abigaili+ viyọnnu Nahaṣi tọn, he yin nọviyọnnu Zeluia, onọ̀ Joabi tọn tọn. 26 Islaeli po Absalọmi po sọ dosla do aigba Giliadi+ tọn ji.

27 Tlolo he Davidi wá Mahanaimi, Ṣobi visunnu Nahaṣi he wá sọn Laba+ Amọninu lẹ tọn, Makili+ visunnu Amiẹli he wá sọn Lo-debali tọn po Balzilai+ Giliadinu lọ he wá sọn Logelimi po 28 hẹn adọzan lẹ, basia lẹ, okò-zẹ́n lẹ, likun, balekun, linfin, jinukun sisọ, ayìví, apàkún lẹntile tọn po jinukun húhú po wá, 29 gọna owín, limu anọ́sin tọn, lẹngbọ po anọ́sin mimlin* po. Yé hẹn onú ehe lẹpo wá na Davidi po mẹhe to e dè lẹ po nado dù,+ na yé dọmọ: “Huvẹ na ko hù gbẹtọ lọ lẹ bọ agbọ́ na ko pé yé podọ nugbla na ko hù yé to danfafa ji.”+