1 Otànnugbo lẹ

18 To ojlẹ vude godo, Davidi gbawhàn Filistinu lẹ tọn bo hẹn yé zun mẹmẹglọ bosọ yí Gati+ po tòpẹvi he to oglọ na ẹn* lẹ po sọn alọ Filistinu lẹ tọn mẹ.+ 2 Enẹgodo, e gbawhàn Moabi tọn,+ bọ Moabinu lẹ lẹzun devizọnwatọ Davidi tọn lẹ bo nọ hẹn takuẹ wá.+

3 Davidi gbawhàn Ahọlu Hadadezẹli+ Zoba+ tọn to Hamati pá,+ dile ewọ to aliji jei nado yì hẹn aṣẹpipa etọn lodo to Tọ̀sisa Euflate kọ̀n.+ 4 Davidi wle osọ́-kẹkẹ 1 000, osọ́nọ 7 000 po awhànfuntọ he nọ zọ̀n afọ 20 000 po sọn omẹ etọn lẹ mẹ.+ Enẹgodo, osọ́ he nọ dọ̀n osọ́-kẹkẹ lẹpo wẹ Davidi sán dọ̀nklanmẹ na, adavo 100.+ 5 Whenue Silianu he to Damasku lẹ wá nado gọalọna Ahọlu Hadadezẹli Zoba tọn, Davidi hù omẹ 22 000 sọn Silianu lọ lẹ mẹ.+ 6 Davidi sọ do awhànfun-gbẹ́ delẹ ai do Silia Damasku tọn, bọ Silianu lẹ lẹzun devizọnwatọ Davidi tọn lẹ bo nọ hẹn takuẹ wá. Jehovah sọ nọ hẹn Davidi nado gbawhàn* to fidepope he e yì.+ 7 Humọ, Davidi yí awọ̀yinu sika tọn loboto lẹ sọn devizọnwatọ Hadadezẹli tọn lẹ si bo hẹn yé wá Jelusalẹm. 8 Davidi sọ bẹ gànvẹẹ susugege sọn Tibhati po Kuni po, yèdọ tòdaho Hadadezẹli tọn lẹ. Ehelẹ wẹ Sọlomọni yí do basi Ohù gànvẹẹ tọn lọ,+ dòtin lẹ po nuyizan gànvẹẹ tọn lẹ po.+

9 To whenue Ahọlu Tọu Hamati tọn sè dọ Davidi ko gbawhàn awhànpa Ahọlu Hadadezẹli+ Zoba tọn lẹpo tọn,+ 10 e do visunnu etọn Hadolami hlan Ahọlu Davidi to afọdopolọji nado kàn dagbemẹninọ etọn biọ podọ nado pà ẹ na e ko hoavùn hẹ Hadadezẹli bo gbawhàn etọn wutu (na Hadadezẹli nọ saba hoavùn hẹ Tọu dai), visunnu lọ sọ hẹn núzinzan fataka, sika po gànvẹẹ po tọn wunmẹ lẹpo wá. 11 Ahọlu Davidi klan onú ehelẹ do wiwe hlan Jehovah,+ kẹdẹdile e ko klan fataka po sika po he e bẹ sọn akọta lọ lẹpo mẹ do wiwe do: yèdọ sọn Edomi po Moabi po, sọn Amọninu lẹ,+ Filistinu lẹ+ po Amalẹkinu lẹ+ po si.

12 Abiṣai+ visunnu Zeluia+ tọn sọ hù Edominu 18 000 to Agbàdo Ojẹ̀ tọn mẹ.+ 13 E do awhànfun-gbẹ́ delẹ ai do Edomi, bọ Edominu lẹpo lẹzun devizọnwatọ Davidi tọn lẹ.+ Jehovah sọ nọ hẹn Davidi nado gbawhàn* to fidepope he e yì.+ 14 Davidi zindonukọn nado to gandu do Islaeli pete ji,+ e sọ nọ hẹn whẹdida dodo po dodowiwa po ṣẹ na omẹ etọn lẹpo.+ 15 Joabi visunnu Zeluia tọn wẹ yin nukọntọ na awhànpa lọ,+ Jehoṣafati+ visunnu Ahiludi tọn wẹ yin kandai-basitọ, 16 Zadọki visunnu Ahitubi tọn po Ahimelẹki visunnu Abiatali tọn po wẹ yin yẹwhenọ lẹ bọ Ṣavṣa yin wekantọ. 17 Bẹnaia visunnu Jehoiada tọn wẹ yin nukọntọ na Kelẹtinu lẹ+ po Pelẹtinu lẹ po.+ Visunnu Davidi tọn lẹ wẹ sọ bọdo ahọlu go tlolo.